ᠠᠮᠣᠰ ᠬᠣᠶᠠᠷ
1 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠮᠣᠶᠠᠪ ᠤᠨ ᠭᠤᠷᠪᠠ᠂ ᠳᠥᠷᠪᠡᠨ ᠨᠢᠭᠦᠯ ᠦᠨ ᠤᠯᠠᠮ ᠢᠶᠠᠷ ᠪᠢ ᠰᠢᠳᠬᠡᠯ ᠢᠶᠡᠨ ᠪᠤᠴᠠᠭᠠᠬᠤ ᠦᠭᠡᠢ ᠲᠡᠳᠡ ᠡᠳᠣᠮ ᠤᠨ ᠬᠠᠭᠠᠨ ᠤ ᠶᠠᠰᠤ ᠶᠢ ᠰᠢᠲᠠᠭᠠᠵᠤ ᠦᠨᠡᠰᠦ ᠪᠣᠯᠭᠠᠭᠰᠠᠨ ᠲᠤᠯᠠ
2 ᠪᠢ ᠮᠣᠶᠠᠪ ᠤᠨ ᠳᠡᠭᠡᠷᠡ ᠭᠠᠯ ᠢᠯᠡᠭᠡᠵᠦ ᠭᠠᠯ ᠺᠧᠷᠢᠶᠣᠲ ᠤᠨ ᠣᠷᠳᠣᠨ ᠨᠤᠭᠤᠳ ᠢ ᠴᠥᠯᠮᠥᠬᠦ ᠪᠣᠯᠣᠨᠠ ᠮᠣᠶᠠᠪ ᠦᠢᠮᠡᠭᠡᠨ ᠳᠤᠮᠳᠠ᠂ ᠳᠠᠢᠨ ᠤ ᠤᠤᠬᠠᠢ᠂ ᠪᠦᠷᠢᠶᠡᠨ ᠳᠠᠭᠤᠨ ᠤ ᠳᠤᠮᠳᠠ ᠮᠥᠬᠥᠨᠡ
3 ᠪᠢ ᠲᠡᠳᠡᠨ ᠦ ᠳᠤᠮᠳᠠ ᠠᠴᠠ ᠵᠠᠬᠢᠷᠤᠭᠴᠢ ᠶᠢ ᠨᠢ ᠤᠰᠠᠳᠬᠠᠨ ᠪᠦᠬᠦ ᠨᠣᠶᠠᠨ ᠢ ᠨᠢ ᠲᠡᠭᠦᠨ ᠲᠡᠢ ᠬᠠᠮᠲᠤ ᠰᠥᠨᠥᠭᠡᠨᠡ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
ᠶᠦᠳᠠ ᠳᠤ ᠪᠠᠭᠤᠬᠤ ᠰᠢᠳᠬᠡᠯ
4 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠶᠦᠳᠠ ᠶᠢᠨ ᠭᠤᠷᠪᠠ᠂ ᠳᠥᠷᠪᠡᠨ ᠨᠢᠭᠦᠯ ᠦᠨ ᠤᠯᠠᠮ ᠢᠶᠠᠷ ᠪᠢ ᠰᠢᠳᠬᠡᠯ ᠢᠶᠡᠨ ᠪᠤᠴᠠᠭᠠᠬᠤ ᠦᠭᠡᠢ ᠲᠡᠳᠡ ᠶᠣᠬᠣᠸᠠ ᠶᠢᠨ ᠬᠠᠤᠯᠢ ᠶᠢ ᠣᠭᠣᠷᠴᠤ᠂ ᠲᠤᠰᠢᠶᠠᠯ ᠤᠳ ᠢ ᠨᠢ ᠡᠰᠡ ᠰᠠᠬᠢᠨ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠳᠠᠭᠠᠵᠤ ᠪᠠᠢᠭᠰᠠᠨ ᠬᠤᠳᠠᠯ ᠬᠠᠭᠤᠷᠮᠠᠭ ᠲᠤ ᠤᠷᠤᠭᠤ ᠲᠠᠲᠠᠭᠳᠠᠭᠰᠠᠨ ᠲᠤᠯᠠ
5 ᠪᠢ ᠶᠦᠳᠠ ᠳᠡᠭᠡᠷᠡ ᠭᠠᠯ ᠢᠯᠡᠭᠡᠵᠦ ᠭᠠᠯ ᠶᠧᠷᠦ᠋ᠰᠠᠯᠧᠮ ᠤᠨ ᠣᠷᠳᠣᠨ ᠨᠤᠭᠤᠳ ᠢ ᠴᠥᠯᠮᠥᠬᠦ ᠪᠣᠯᠣᠨᠠ᠃
ᠢᠰᠷᠧᠯ ᠳᠤ ᠪᠠᠭᠤᠬᠤ ᠰᠢᠳᠬᠡᠯ
6 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠢᠰᠷᠧᠯ ᠤᠨ ᠭᠤᠷᠪᠠ᠂ ᠳᠥᠷᠪᠡᠨ ᠨᠢᠭᠦᠯ ᠦᠨ ᠤᠯᠠᠮ ᠢᠶᠠᠷ ᠪᠢ ᠰᠢᠳᠬᠡᠯ ᠢᠶᠡᠨ ᠪᠤᠴᠠᠭᠠᠬᠤ ᠦᠭᠡᠢ ᠲᠡᠳᠡ ᠮᠥᠩᠭᠥᠨ ᠦ ᠲᠥᠯᠥᠭᠡ ᠵᠥᠪᠲᠦ ᠶᠢ᠂ ᠵᠦᠢᠷᠡᠢ ᠱᠠᠬᠠᠢ ᠶᠢᠨ ᠲᠥᠯᠥᠭᠡ ᠶᠠᠳᠠᠭᠤ ᠶᠢ ᠬᠤᠳᠠᠯᠳᠤᠳᠠᠭ
7 ᠦᠭᠡᠭᠦᠦ ᠬᠥᠮᠦᠨ ᠦ ᠲᠣᠯᠣᠭᠠᠢ ᠶᠢ ᠭᠠᠵᠠᠷ ᠤᠨ ᠰᠢᠷᠣᠢ ᠳᠡᠭᠡᠷᠡ ᠭᠢᠰᠬᠢᠯᠡᠨ ᠵᠣᠪᠠᠯᠠᠩᠲᠤ ᠬᠥᠮᠦᠨ ᠦ ᠵᠠᠮ ᠢ ᠨᠢ ᠭᠠᠵᠢᠭᠤᠯᠵᠤ ᠡᠴᠢᠭᠡ ᠬᠦᠦ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠥᠬᠢᠨ ᠲᠠᠢ ᠶᠠᠪᠤᠯᠳᠠᠵᠤ ᠠᠷᠢᠭᠤᠨ ᠨᠡᠷᠡ ᠶᠢ ᠮᠢᠨᠢ ᠭᠤᠲᠤᠭᠠᠳᠠᠭ
8 ᠪᠦᠬᠦ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠠᠵᠠᠭᠤ ᠳᠠᠬᠢ ᠪᠠᠷᠢᠴᠠᠭᠠᠨ ᠳᠤ ᠠᠪᠤᠭᠰᠠᠨ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠲᠣᠷᠭᠠᠭᠤᠯᠢ ᠳᠤ ᠠᠪᠤᠭᠰᠠᠨ ᠳᠠᠷᠠᠰᠤ ᠪᠠᠨ ᠪᠤᠷᠬᠠᠨ ᠤ ᠪᠠᠨ ᠭᠡᠷ ᠲᠦ ᠤᠤᠭᠤᠳᠠᠭ᠂
9 ᠬᠠᠷᠢᠨ ᠲᠡᠳᠡᠨ ᠦ ᠡᠮᠦᠨᠡ ᠠᠮᠣᠷᠢᠴᠤᠳ ᠢ ᠤᠰᠠᠳᠬᠠᠭᠰᠠᠨ ᠨᠢ ᠪᠢ ᠪᠢᠯᠡ ᠬᠤᠱᠢ ᠮᠡᠲᠦ ᠥᠨᠳᠥᠷ᠂ ᠴᠠᠷᠠᠰᠤ ᠮᠡᠲᠦ ᠬᠦᠴᠦᠲᠡᠢ ᠪᠠᠢᠭᠰᠠᠨ ᠴᠤ ᠳᠡᠭᠡᠷᠡᠬᠢ ᠵᠢᠮᠢᠰ᠂ ᠳᠣᠣᠷᠠᠬᠢ ᠦᠨᠳᠦᠰᠦ ᠶᠢ ᠨᠢ ᠪᠢ ᠤᠰᠠᠳᠬᠠᠭᠰᠠᠨ᠃
10 ᠲᠠ ᠨᠠᠷ ᠢ ᠶᠧᠵᠢᠫᠲ ᠡᠴᠡ ᠠᠪᠴᠢᠷᠠᠭᠰᠠᠨ ᠨᠢ ᠪᠢ ᠪᠢᠯᠡ᠂ ᠪᠢ ᠲᠠ ᠨᠠᠷ ᠢ ᠴᠥᠯ ᠳᠤ ᠳᠥᠴᠢᠨ ᠵᠢᠯ ᠠᠯᠬᠤᠭᠤᠯᠵᠤ ᠲᠠ ᠨᠠᠷ ᠲᠤ ᠠᠮᠣᠷᠢᠴᠤᠳ ᠤᠨ ᠨᠤᠲᠤᠭ ᠢ ᠡᠵᠡᠮᠰᠢᠭᠦᠯᠦᠭᠰᠡᠨ
11 ᠦᠷᠡ ᠬᠡᠦᠬᠡᠳ ᠤᠳ ᠤᠨ ᠴᠢᠨᠢ ᠳᠤᠮᠳᠠ ᠠᠴᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠢᠳᠡᠷ ᠵᠠᠯᠠᠭᠤᠰ ᠤᠨ ᠴᠢᠨᠢ ᠳᠤᠮᠳᠠ ᠠᠴᠠ ᠨᠠᠽᠢᠷᠴᠤᠳ ᠢ ᠪᠢ ᠪᠣᠰᠬᠠᠭᠰᠠᠨ ᠡᠢᠮᠦ ᠪᠢᠰᠢ ᠭᠡᠵᠢ ᠤᠤ︖ ᠢᠰᠷᠧᠯᠴᠦᠳ ᠡ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂
12 ᠬᠠᠷᠢᠨ ᠲᠠ ᠨᠠᠷ ᠨᠠᠽᠢᠷᠴᠤᠳ ᠲᠤ ᠳᠠᠷᠠᠰᠤ ᠤᠤᠭᠤᠯᠭᠠᠵᠤ ᠡᠰᠢ ᠦᠵᠡᠭᠦᠯᠦᠭᠴᠢ ᠳᠤ᠄ 〈ᠡᠰᠢ ᠦᠵᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ〉 ᠭᠡᠵᠦ ᠲᠤᠰᠢᠶᠠᠳᠠᠭ᠂
13 ᠬᠠᠷᠠ᠂ ᠶᠡᠦᠵᠢᠯᠡᠭᠰᠡᠨ ᠲᠠᠷᠢᠶᠠ ᠪᠠᠷ ᠳᠦᠭᠦᠷᠡᠩ ᠲᠡᠷᠭᠡ ᠭᠠᠵᠠᠷ ᠢ ᠳᠠᠷᠤᠳᠠᠭ ᠰᠢᠭ᠋ ᠪᠢ ᠲᠠ ᠨᠠᠷ ᠢ ᠳᠠᠷᠤᠨᠠ᠂
14 ᠬᠤᠷᠳᠤᠨ ᠨᠢ ᠵᠢᠭᠤᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠬᠦᠴᠦ ᠲᠠᠢ ᠨᠢ ᠬᠦᠴᠦ ᠪᠡᠨ ᠭᠠᠷᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠭᠠᠲᠤᠷ ᠨᠢ ᠴᠤ ᠠᠮᠢ ᠪᠠᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ
15 ᠨᠤᠮᠤ ᠠᠳᠬᠤᠭᠴᠢ ᠨᠢ ᠵᠣᠭᠰᠣᠵᠤ ᠴᠢᠳᠠᠬᠤ ᠦᠭᠡᠢ ᠬᠤᠷᠳᠤᠨ ᠬᠥᠯ ᠲᠡᠢ ᠨᠢ ᠵᠢᠭᠤᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠮᠣᠷᠢᠲᠠᠨ ᠨᠢ ᠴᠤ ᠠᠮᠢ ᠪᠠᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ
16 ᠬᠠᠮᠤᠭ ᠤᠨ ᠵᠣᠷᠢᠭᠲᠤ ᠪᠠᠭᠠᠲᠤᠷ ᠴᠤ ᠲᠡᠷᠡ ᠡᠳᠦᠷ ᠨᠢᠴᠦᠭᠦᠨ ᠵᠢᠭᠤᠲᠠᠨᠠ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃