ᠠᠮᠣᠰ ᠶᠢᠰᠦ
ᠵᠠᠢᠯᠠᠰᠢ ᠦᠭᠡᠢ ᠢᠷᠡᠬᠦ ᠰᠢᠳᠬᠡᠯ
1 ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠤᠢ ᠡᠵᠡᠨ ᠢ ᠪᠢ ᠬᠠᠷᠠᠪᠠ᠂ ᠲᠡᠷᠡ᠄ 《ᠪᠣᠱᠣᠭᠠ ᠶᠢ ᠬᠥᠳᠡᠯᠲᠡᠯᠡ ᠨᠢ ᠲᠤᠯᠭᠠᠭᠤᠷᠢ ᠶᠢ ᠴᠣᠬᠢ ᠪᠦᠭᠦᠳᠡ ᠶᠢᠨ ᠬᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠡᠳᠡᠭᠡᠷ ᠢ ᠪᠢᠴᠠᠯ ᠦᠯᠡᠳᠡᠭᠰᠡᠳ ᠢ ᠨᠢ ᠪᠢ ᠢᠯᠳᠦ ᠪᠡᠷ ᠠᠯᠠᠨᠠ ᠳᠤᠲᠠᠭᠠᠬᠤ ᠭᠡᠰᠡᠨ ᠴᠤ ᠲᠡᠳᠡ ᠳᠤᠲᠠᠭᠠᠵᠤ ᠳᠡᠢᠯᠬᠦ ᠦᠭᠡᠢ ᠵᠠᠢᠯᠠᠬᠤ ᠭᠡᠰᠡᠨ ᠴᠤ ᠵᠢᠭᠤᠲᠠᠵᠤ ᠴᠢᠳᠠᠬᠤ ᠦᠭᠡᠢ᠃
2 ᠲᠡᠳᠡ ᠦᠬᠦᠭᠰᠡᠳ ᠦᠨ ᠣᠷᠣᠨ ᠤᠷᠤᠭᠤ ᠤᠬᠤᠭᠠᠳ ᠣᠷᠣᠭᠰᠠᠨ ᠴᠤ ᠲᠡᠨᠳᠡ ᠡᠴᠡ ᠮᠢᠨᠦ ᠮᠤᠲᠤᠷ ᠭᠠᠷᠭᠠᠵᠤ ᠠᠪᠤᠨᠠ ᠲᠩᠷᠢ ᠥᠭᠡᠳᠡ ᠭᠠᠷᠤᠭᠰᠠᠨ ᠴᠤ ᠲᠡᠨᠳᠡ ᠡᠴᠡ ᠪᠢ ᠪᠠᠭᠤᠯᠭᠠᠨᠠ
3 ᠺᠠᠷᠮᠧᠯ ᠤᠨ ᠣᠷᠭᠢᠯ ᠳᠤ ᠨᠢᠭᠤᠭᠳᠠᠭᠰᠠᠨ ᠴᠤ ᠪᠢ ᠬᠠᠢᠭᠠᠳ ᠣᠯᠣᠨᠠ ᠬᠠᠷᠠᠴᠠᠨ ᠠᠴᠠ ᠮᠢᠨᠢ ᠵᠠᠢᠯᠠᠬᠤ ᠭᠡᠵᠦ ᠳᠠᠯᠠᠢ ᠶᠢᠨ ᠢᠷᠤᠭᠠᠷ ᠲᠤ ᠳᠠᠯᠳᠠᠯᠠᠭᠰᠠᠨ ᠴᠤ ᠲᠡᠨᠳᠡ ᠪᠢ ᠮᠣᠭᠠᠢ ᠳᠤ ᠲᠤᠰᠢᠶᠠᠵᠤ᠂ ᠲᠡᠳᠡᠨ ᠢ ᠬᠠᠳᠬᠤᠭᠤᠯᠤᠨᠠ᠃
4 ᠣᠯᠵᠠᠯᠠᠭᠳᠠᠭᠠᠳ ᠳᠠᠢᠰᠤᠨ ᠤ ᠪᠠᠨ ᠡᠮᠦᠨᠡ ᠶᠠᠪᠤᠭᠰᠠᠨ ᠴᠤ ᠪᠢ ᠢᠯᠳᠦᠨ ᠳᠦ ᠲᠤᠰᠢᠶᠠᠵᠤ᠂ ᠲᠡᠳᠡᠨ ᠢ ᠠᠯᠠᠭᠤᠯᠤᠨᠠ ᠰᠠᠢᠨ ᠪᠤᠰᠤ᠂ ᠰᠠᠭᠠᠷ ᠤᠨ ᠲᠥᠯᠥᠭᠡ ᠪᠢ ᠮᠡᠯᠮᠡᠢ ᠪᠡᠨ ᠲᠡᠳᠡᠨ ᠦ ᠳᠡᠭᠡᠷᠡ ᠲᠣᠭᠲᠠᠭᠠᠨᠠ᠃
5 ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠶᠣᠬᠣᠸᠠ ᠲᠡᠷᠡ ᠪᠡᠷ ᠭᠠᠵᠠᠷ ᠲᠤ ᠬᠦᠷᠪᠡᠯ ᠭᠠᠵᠠᠷ ᠬᠠᠢᠯᠵᠤ ᠭᠠᠵᠠᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠦᠭᠦᠳᠡ ᠭᠠᠰᠢᠭᠤᠳᠠᠨᠠ ᠪᠦᠬᠦᠢᠯᠡ ᠭᠠᠵᠠᠷ ᠨᠢᠯ ᠰᠢᠭ ᠪᠣᠰᠴᠤ᠂ ᠶᠧᠵᠢᠫᠲ ᠤᠨ ᠮᠥᠷᠡᠨ ᠰᠢᠭ ᠳᠣᠷᠣᠭᠰᠢ ᠰᠠᠭᠤᠨᠠ᠂
6 ᠲᠩᠷᠢ ᠳᠡᠭᠡᠷᠡ ᠰᠦᠷᠯᠢᠭ ᠣᠷᠳᠣᠨ ᠢᠶᠠᠨ ᠪᠠᠷᠢᠵᠤ ᠳᠡᠯᠡᠬᠡᠢ ᠳᠦ ᠰᠠᠭᠤᠷᠢ ᠶᠢ ᠨᠢ ᠲᠠᠯᠪᠢᠵᠤ ᠳᠠᠯᠠᠢ ᠶᠢᠨ ᠤᠰᠤ ᠶᠢ ᠳᠠᠭᠤᠳᠠᠵᠤ᠂ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠳᠡᠭᠡᠷᠡ ᠠᠰᠬᠠᠭᠴᠢ ᠨᠢᠭᠡᠨ ᠲᠡᠭᠦᠨ ᠦ ᠨᠡᠷᠡ ᠪᠣᠯ ᠶᠣᠬᠣᠸᠠ᠃
7 《ᠢᠰᠷᠧᠯᠴᠦᠳ ᠡ ᠲᠠ ᠨᠠᠷ ᠨᠠᠳᠠ ᠳᠤ ᠡᠲ᠋ᠢᠶᠣᠫᠢᠶᠠᠴᠤᠳ ᠲᠠᠢ ᠠᠳᠠᠯᠢ ᠪᠢᠰᠢ ᠭᠡᠵᠢ ᠤᠤ︖》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ 《ᠢᠰᠷᠧᠯ ᠢ ᠪᠢ ᠶᠧᠵᠢᠫᠲ ᠡᠴᠡ ᠠᠪᠴᠢᠷᠠᠭᠰᠠᠨ᠂ ᠬᠠᠷᠢᠨ ᠹᠢᠯᠢᠰᠲ᠋ᠴᠦᠳ ᠢ ᠺᠠᠹᠲ᠋ᠣᠷ ᠠᠴᠠ ᠠᠷᠠᠮᠴᠤᠳ ᠢ ᠺᠢᠷ ᠡᠴᠡ ᠠᠪᠴᠢᠷᠠᠭᠠ ᠦᠭᠡᠢ ᠭᠡᠵᠢ ᠤᠤ︖
8 ᠬᠠᠷᠠ᠂ ᠶᠣᠬᠣᠸᠠ ᠪᠤᠷᠬᠠᠨ ᠤ ᠮᠡᠯᠮᠡᠢ ᠨᠢᠭᠦᠯᠲᠦ ᠬᠠᠭᠠᠨᠴᠢᠯᠠᠯ ᠳᠡᠭᠡᠷᠡ ᠪᠠᠢᠳᠠᠭ︕ ᠪᠢ ᠲᠡᠭᠦᠨ ᠢ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠠᠴᠠ ᠤᠰᠠᠳᠬᠠᠨᠠ ᠭᠡᠪᠡᠴᠦ ᠪᠢ ᠶᠠᠺᠣᠪ ᠤᠨ ᠭᠡᠷ ᠢ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠬᠤ ᠪᠢᠰᠢ᠂》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
9 《ᠬᠠᠷᠠ᠂ ᠪᠢ ᠲᠤᠰᠢᠶᠠᠵᠤ ᠪᠠᠢᠨᠠ ᠰᠢᠭᠰᠢᠭᠦᠷ ᠢᠶᠡᠷ ᠰᠢᠭᠰᠢᠬᠦ ᠮᠡᠲᠦ ᠪᠢ ᠢᠰᠷᠧᠯ ᠤᠨ ᠭᠡᠷ ᠢ ᠪᠦᠬᠦ ᠦᠨᠳᠦᠰᠦᠲᠡᠨ ᠢᠶᠡᠷ ᠰᠢᠭᠰᠢᠭᠦᠯᠦᠨᠡ ᠭᠡᠪᠡᠴᠦ ᠭᠠᠭᠴᠠ ᠴᠤ ᠮᠥᠬᠥᠯᠢᠭ ᠭᠠᠵᠠᠷ ᠲᠤ ᠤᠨᠠᠬᠤ ᠦᠭᠡᠢ᠃
10 ᠠᠷᠠᠳ ᠲᠦᠮᠡᠨ ᠦ ᠮᠢᠨᠢ ᠳᠣᠲᠣᠷᠠᠬᠢ ᠠᠯᠢᠪᠠ ᠨᠢᠭᠦᠯᠲᠡᠨ᠄ 〈ᠭᠠᠢ ᠣᠢᠷᠠᠲᠤᠬᠤ ᠦᠭᠡᠢ᠂ ᠪᠢᠳᠡᠨ ᠳᠦ ᠤᠴᠠᠷᠠᠬᠤ ᠦᠭᠡᠢ〉 ᠭᠡᠭᠴᠢᠳ ᠪᠦᠭᠦᠳᠡ ᠢᠯᠳᠦᠨ ᠳᠦ ᠰᠥᠨᠥᠨᠡ᠃
ᠢᠷᠡᠭᠡᠳᠦᠢ ᠶᠢᠨ ᠰᠡᠷᠭᠦᠯᠲᠡ
11 ᠲᠡᠷᠡ ᠡᠳᠦᠷ ᠪᠢ ᠳ᠋ᠠᠸᠢᠳ᠋ ᠤᠨ ᠨᠤᠷᠠᠭᠰᠠᠨ ᠮᠠᠢᠬᠠᠨ ᠢ ᠪᠣᠰᠬᠠᠨᠠ ᠴᠥᠮᠥᠷᠬᠡᠢ ᠶᠢ ᠨᠢ ᠪᠥᠭᠯᠡᠨ ᠰᠦᠢᠷᠡᠭᠰᠡᠨ ᠢ ᠨᠢ ᠪᠣᠰᠬᠠᠵᠤ ᠤᠷᠢᠳᠤ ᠶᠢᠨ ᠡᠳᠦᠷ ᠤᠳ ᠤᠨ ᠬᠢᠨᠢ ᠰᠢᠭ ᠲᠡᠭᠦᠨ ᠢ ᠪᠠᠷᠢᠨᠠ᠃
12 ᠢᠩᠭᠢᠭᠡᠳ ᠲᠡᠳᠡ ᠡᠳᠣᠮ ᠤᠨ ᠦᠯᠡᠳᠡᠭᠰᠡᠳ ᠢ᠂ ᠮᠥᠨ ᠮᠢᠨᠦ ᠨᠡᠷᠡ ᠪᠡᠷ ᠳᠠᠭᠤᠳᠠᠭᠳᠠᠬᠤ ᠪᠦᠬᠦ ᠦᠨᠳᠦᠰᠦᠲᠡᠨ ᠢ ᠥᠮᠴᠢᠯᠡᠬᠦ ᠪᠣᠯᠣᠨᠠ᠃》 ᠡᠳᠡᠭᠡᠷ ᠢ ᠦᠢᠯᠡᠳᠬᠦ ᠨᠢᠭᠡᠨ᠂ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
13 ᠬᠠᠷᠠ᠂ ᠲᠡᠷᠡ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ ᠭᠠᠵᠠᠷ ᠬᠠᠭᠠᠯᠤᠭᠴᠢ ᠨᠢ ᠤᠷᠭᠤᠴᠠ ᠬᠤᠷᠢᠶᠠᠭᠴᠢ ᠶᠢᠨ ᠠᠷᠤ ᠠᠴᠠ ᠦᠵᠦᠮ ᠭᠢᠰᠬᠢᠭ᠍ᠴᠢ ᠨᠢ ᠦᠷᠡ ᠲᠠᠷᠢᠭᠴᠢ ᠶᠢᠨ ᠠᠷᠤ ᠠᠴᠠ ᠭᠦᠢᠴᠡᠨᠡ ᠠᠭᠤᠯᠠᠰ ᠠᠮᠲᠠᠲᠤ ᠳᠠᠷᠠᠰᠤ ᠳᠤᠰᠤᠯᠤᠭᠤᠯᠵᠤ ᠲᠣᠯᠣᠭᠠᠳ ᠪᠦᠭᠦᠳᠡ ᠲᠡᠭᠦᠨ ᠢ ᠤᠷᠤᠰᠬᠠᠬᠤ ᠪᠣᠯᠣᠨᠠ᠃
14 ᠪᠢ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠢᠶᠠᠨ ᠴᠥᠯᠡᠯᠭᠡ ᠡᠴᠡ ᠪᠤᠴᠠᠭᠠᠵᠤ ᠲᠡᠳᠡ ᠨᠤᠷᠠᠩ᠋ᠬᠠᠢ ᠬᠣᠲᠠ ᠨᠤᠭᠤᠳ ᠢ ᠪᠣᠰᠬᠠᠨ ᠲᠡᠨᠳᠡ ᠰᠠᠭᠤᠬᠤ ᠪᠣᠯᠣᠨᠠ ᠲᠡᠳᠡ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠪᠠᠢᠭᠤᠯᠵᠤ ᠳᠠᠷᠠᠰᠤ ᠶᠢ ᠨᠢ ᠤᠤᠭᠤᠨᠠ ᠴᠡᠴᠡᠷᠯᠢᠭ ᠪᠠᠢᠭᠤᠯᠵᠤ᠂ ᠵᠢᠮᠢᠰ ᠢ ᠨᠢ ᠢᠳᠡᠬᠦ ᠪᠣᠯᠣᠨᠠ᠃
15 ᠪᠢ ᠪᠠᠰᠠ ᠲᠡᠳᠡᠨ ᠢ ᠭᠠᠵᠠᠷ ᠳᠡᠭᠡᠷᠡ ᠨᠢ ᠲᠠᠷᠢᠵᠤ ᠮᠢᠨᠦ ᠥᠭᠭᠥᠭᠰᠡᠨ ᠭᠠᠵᠠᠷ ᠠᠴᠠ ᠲᠡᠳᠡ ᠳᠠᠬᠢᠨ ᠦᠭᠲᠡᠭᠡᠭᠳᠡᠬᠦ ᠦᠭᠡᠢ᠂》 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃