ᠠᠮᠣᠰ ᠨᠠᠢ᠌ᠮᠠ
ᠪᠡᠯᠡᠨ ᠪᠣᠯᠣᠭᠰᠠᠨ ᠰᠢᠳᠬᠡᠯ
1 ᠡᠵᠡᠨ ᠶᠣᠬᠣᠸᠠ ᠨᠠᠳᠠ ᠳᠤ ᠳᠠᠷᠠᠭᠠᠬᠢ ᠵᠦᠢᠯᠡᠰ ᠢ ᠦᠵᠡᠭᠦᠯᠪᠡ᠄ ᠬᠠᠷᠠ᠂ ᠲᠡᠨᠳᠡ ᠪᠣᠯᠪᠠᠰᠤᠷᠡᠵᠤ ᠭᠦᠢᠴᠡᠭᠰᠡᠨ ᠵᠢᠮᠢᠰ ᠲᠠᠢ ᠨᠢᠭᠡᠨ ᠰᠠᠭᠰᠤ ᠪᠠᠢᠪᠠ᠃ 2 ᠲᠡᠷᠡ᠄ 《ᠠᠮᠣᠰ ᠡ᠂ ᠴᠢ ᠶᠠᠭᠤ ᠬᠠᠷᠠᠵᠤ ᠪᠠᠢᠨᠠ︖》 ᠭᠡᠬᠦ ᠳᠦ᠂ ᠪᠢ᠄ 《ᠪᠣᠯᠪᠠᠰᠤᠷᠡᠵᠤ ᠭᠦᠢᠴᠡᠭᠰᠡᠨ ᠵᠢᠮᠢᠰ ᠲᠠᠢ ᠰᠠᠭᠰᠤ》 ᠭᠡᠪᠡ᠃ ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠮᠢᠨᠦ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠭᠦᠢᠴᠡᠯᠲᠡ ᠢᠷᠡᠵᠦ ᠪᠠᠢᠨᠠ᠃ ᠪᠢ ᠳᠠᠬᠢᠨ ᠲᠡᠳᠡᠨ ᠢ ᠬᠡᠯᠲᠦᠷᠢᠭᠦᠯᠬᠦ ᠦᠭᠡᠢ᠃ 3 ᠣᠷᠳᠣᠨ ᠤ ᠳᠠᠭᠤᠤ ᠲᠡᠷᠡ ᠡᠳᠦᠷ ᠣᠷᠢ ᠳᠠᠭᠤ ᠪᠣᠯᠣᠨᠠ᠂ ᠭᠠᠵᠠᠷ ᠰᠠᠢ ᠦᠭᠡᠢ ᠪᠠᠢᠭᠠ ᠣᠯᠠᠨ ᠦᠬᠦᠳᠡᠯ ᠢ ᠲᠡᠳᠡ ᠳᠠᠭᠤ ᠦᠭᠡᠢ ᠪᠠᠷ ᠬᠠᠶᠠᠨᠠ》 ᠭᠡᠪᠡ᠃ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
4 ᠡᠭᠦᠨ ᠢ ᠰᠣᠨᠣᠰᠴᠠᠭᠠ ᠭᠠᠴᠢᠭᠳᠠᠭᠰᠠᠳ ᠢ ᠲᠠᠯᠬᠢᠯᠠᠵᠤ ᠭᠠᠵᠠᠷ ᠤᠨ ᠶᠠᠳᠠᠭᠤᠰ ᠢ ᠲᠠᠯᠬᠢᠳᠠᠳᠠᠭ ᠬᠥᠮᠦᠰ ᠡ᠂
5 ᠲᠠ ᠨᠠᠷ᠄ 《ᠰᠢᠨᠡ ᠰᠠᠷᠠ ᠬᠡᠵᠢᠶᠡ ᠥᠩᠭᠡᠷᠡᠬᠦ ᠪᠤᠢ︖ ᠪᠢᠳᠡ ᠦᠷᠡ ᠲᠠᠷᠢᠶᠠ ᠪᠠᠨ ᠬᠤᠳᠠᠯᠳᠤᠨᠠ ᠠᠮᠠᠷᠠᠯ ᠤᠨ ᠡᠳᠦᠷ ᠬᠡᠵᠢᠶᠡ ᠥᠩᠭᠡᠷᠡᠬᠦ ᠪᠤᠢ︖ ᠪᠢᠳᠡ ᠪᠤᠭᠤᠳᠠᠢ ᠪᠠᠨ ᠬᠤᠳᠠᠯᠳᠤᠨᠠ ᠵᠢᠩᠯᠡᠭᠦᠷ ᠦᠨ ᠲᠠᠤᠬᠠᠢ ᠶᠢ ᠵᠢᠵᠢᠭᠷᠡᠭᠦᠯᠵᠦ ᠦᠨᠡ ᠶᠢ ᠥᠰᠭᠡᠨ ᠬᠠᠭᠤᠷᠮᠠᠭ ᠬᠡᠮᠵᠢᠭᠦᠷ ᠢᠶᠡᠷ ᠮᠡᠬᠡᠯᠡᠵᠦ
6 ᠶᠠᠳᠠᠭᠤᠰ ᠢ ᠮᠥᠩᠭᠥ ᠪᠡᠷ ᠭᠠᠴᠢᠭᠳᠠᠭᠰᠠᠳ ᠢ ᠵᠦᠢᠷᠡᠢ ᠱᠠᠬᠠᠢ ᠪᠠᠷ ᠠᠪᠬᠤ ᠭᠡᠵᠦ ᠪᠤᠭᠤᠳᠠᠢ ᠶᠢᠨ ᠦᠯᠡᠳᠡᠪᠦᠷᠢ ᠪᠠᠨ ᠴᠤ ᠬᠤᠳᠠᠯᠳᠤᠨᠠ》 ᠭᠡᠳᠡᠭ᠃
7 ᠶᠣᠬᠣᠸᠠ ᠶᠠᠺᠣᠪ ᠤᠨ ᠰᠦᠷ ᠵᠢᠪᠬᠤᠯᠠᠩ ᠢᠶᠠᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ᠄ 《ᠲᠡᠳᠡᠨ ᠦ ᠪᠦᠬᠦ ᠦᠢᠯᠡ ᠶᠢ ᠪᠢ ᠬᠡᠵᠢᠶᠡ ᠴᠤ ᠮᠠᠷᠲᠠᠬᠤ ᠦᠭᠡᠢ᠃
8 ᠡᠭᠦᠨ ᠦ ᠤᠯᠠᠮ ᠢᠶᠠᠷ ᠭᠠᠵᠠᠷ ᠬᠥᠳᠡᠯᠵᠦ᠂ ᠳᠡᠭᠡᠷᠡ ᠨᠢ ᠣᠷᠣᠰᠢᠳᠠᠭ ᠬᠥᠮᠦᠨ ᠪᠦᠬᠦᠨ ᠭᠠᠰᠢᠭᠤᠳᠠᠬᠤ ᠶᠣᠰᠣᠲᠠᠢ ᠪᠢᠰᠢ ᠤᠤ︖ ᠪᠦᠬᠦᠢᠯᠡ ᠭᠠᠵᠠᠷ ᠨᠢᠯ ᠰᠢᠭ ᠪᠣᠰᠴᠤ᠂ ᠶᠧᠵᠢᠫᠲ ᠤᠨ ᠮᠥᠷᠡᠨ ᠰᠢᠭ ᠬᠥᠳᠡᠯᠦᠭᠰᠡᠨ ᠦ ᠳᠠᠷᠠᠭᠠ᠂ ᠳᠣᠷᠣᠭᠰᠢ ᠰᠠᠭᠤᠬᠤ ᠪᠣᠯᠣᠨᠠ᠃》
9 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠡᠷᠡ ᠡᠳᠦᠷ ᠪᠢ ᠦᠳᠡ ᠳᠤᠮᠳᠠ ᠨᠠᠷᠠ ᠶᠢ ᠵᠢᠷᠭᠠᠭᠠᠵᠤ᠂ ᠭᠡᠭᠡᠨ ᠡᠳᠦᠷ ᠭᠠᠵᠠᠷ ᠢ ᠬᠠᠷᠠᠩ᠋ᠭᠤᠢ ᠪᠣᠯᠭᠠᠨᠠ᠃
10 ᠪᠠᠶᠠᠷ ᠨᠠᠭᠠᠳᠤᠮ ᠢ ᠴᠢᠨᠢ ᠭᠠᠰᠢᠭᠤᠳᠠᠯ ᠪᠦᠬᠦ ᠳᠠᠭᠤᠤ ᠶᠢ ᠴᠢᠨᠢ ᠤᠬᠢᠯᠠᠭᠠᠨ ᠢᠶᠠᠷ ᠰᠣᠯᠢᠵᠤ ᠪᠡᠯᠬᠡᠭᠦᠰᠦ ᠪᠦᠷᠢ ᠳᠤ ᠲᠠᠭᠠᠷ ᠪᠦᠰᠡᠯᠡᠭᠦᠯᠵᠦ ᠲᠣᠯᠣᠭᠠᠢ ᠪᠦᠷᠢ ᠶᠢ ᠬᠠᠯᠵᠠᠨ ᠪᠣᠯᠭᠠᠨᠠ ᠭᠠᠭᠴᠠ ᠬᠦᠦ ᠶᠢᠨ ᠢᠶᠠᠨ ᠲᠥᠯᠥᠭᠡ ᠭᠠᠰᠢᠭᠤᠳᠠᠬᠤ ᠡᠳᠦᠷ ᠮᠡᠲᠦ ᠲᠡᠭᠦᠰᠬᠡᠯ ᠨᠢ ᠴᠤ ᠭᠠᠰᠢᠭᠤᠨ ᠪᠠᠢᠬᠤ ᠡᠳᠦᠷ ᠮᠡᠲᠦ ᠪᠣᠯᠭᠠᠨᠠ᠃
11 ᠬᠠᠷᠠ᠂ ᠬᠦᠨᠡᠰᠦ ᠦᠭᠡᠢ ᠡᠴᠡ ᠪᠣᠯᠣᠭᠰᠠᠨ ᠥᠯᠥᠰᠬᠥᠯᠡᠩ᠂ ᠤᠮᠳᠠ ᠦᠭᠡᠢ ᠡᠴᠡ ᠪᠣᠯᠣᠭᠰᠠᠨ ᠴᠠᠩ᠋ᠭᠠᠭᠠ ᠶᠢ ᠪᠢᠰᠢ᠂ ᠬᠠᠷᠢᠨ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠬᠤ ᠦᠭᠡᠢ ᠡᠴᠡ ᠪᠣᠯᠣᠭᠰᠠᠨ ᠥᠯᠥᠰᠬᠥᠯᠡᠩ ᠢ ᠪᠢ ᠭᠠᠵᠠᠷ ᠳᠡᠭᠡᠷᠡ ᠢᠯᠡᠭᠡᠨᠡ᠂ ᠲᠡᠷᠡ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ᠃》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
12 ᠬᠥᠮᠦᠰ ᠳᠠᠯᠠᠢ ᠠᠴᠠ ᠳᠠᠯᠠᠢ ᠤᠷᠤᠭᠤ ᠤᠮᠠᠷᠠ ᠠᠴᠠ ᠳᠣᠷᠣᠨᠠ ᠬᠦᠷᠲᠡᠯᠡ ᠲᠡᠨᠦᠨ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠡᠷᠢᠭᠰᠡᠭᠡᠷ ᠨᠠᠰᠢ ᠴᠠᠰᠢ ᠶᠠᠪᠤᠬᠤ ᠪᠣᠯᠪᠠᠴᠤ ᠲᠡᠭᠦᠨ ᠢ ᠡᠰᠡ ᠣᠯᠣᠨᠠ᠃
13 ᠲᠡᠷᠡ ᠡᠳᠦᠷ ᠰᠠᠢᠬᠠᠨ ᠥᠬᠢᠳ᠂ ᠬᠦᠴᠦᠲᠦ ᠵᠠᠯᠠᠭᠤᠰ ᠴᠠᠩ᠋ᠭᠠᠵᠤ ᠤᠬᠠᠭᠠ ᠠᠯᠳᠠᠨᠠ᠃
14 ᠰᠠᠮᠠᠷᠢᠶᠠ ᠶᠢᠨ ᠢᠴᠢᠭᠦᠷᠢᠲᠦ ᠰᠢᠲᠦᠭᠡᠨ ᠢᠶᠡᠷ ᠲᠠᠩ᠋ᠭᠠᠷᠢᠭᠯᠠᠭᠴᠢᠳ᠄ 〈ᠳ᠋ᠠᠨ ᠡ᠂ ᠴᠢᠨᠦ ᠪᠤᠷᠬᠠᠨ ᠤ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ〉 ᠭᠡᠵᠦ 〈ᠪᠧᠷ ᠱᠧᠪᠠ ᠶᠢᠨ ᠪᠤᠷᠬᠠᠨ ᠤ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ〉 ᠭᠡᠳᠡᠭ ᠪᠣᠯᠪᠠᠴᠤ ᠲᠡᠳᠡ ᠤᠨᠠᠭᠠᠳ ᠳᠠᠬᠢᠨ ᠪᠣᠰᠬᠤ ᠦᠭᠡᠢ᠃》