ᠨᠣᠮᠯᠠᠭᠴᠢ ᠶᠢᠨ ᠦᠭᠡᠰ ᠲᠠᠪᠤ
ᠪᠤᠷᠬᠠᠨ ᠤ ᠡᠮᠦᠨᠡ ᠳᠡᠮᠡᠢ ᠶᠠᠷᠢᠵᠤ ᠦᠯᠦ ᠪᠣᠯᠣᠨᠠ
1 ᠴᠢ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠳᠦ ᠣᠴᠢᠬᠤ ᠳᠠᠭᠠᠨ ᠠᠯᠬᠤᠮ ᠢᠶᠠᠨ ᠬᠢᠨᠠᠭᠲᠤᠨ᠃ ᠪᠤᠷᠤᠭᠤ ᠦᠢᠯᠡ ᠪᠡᠨ ᠮᠡᠳᠡᠬᠦ ᠦᠭᠡᠢ ᠮᠤᠩ᠋ᠬᠠᠭ ᠤᠨ ᠲᠠᠬᠢᠯ ᠢ ᠡᠷᠭᠦᠭᠰᠡᠨ ᠡᠴᠡ ᠣᠢᠷᠠᠲᠤᠨ ᠣᠴᠢᠭᠠᠳ ᠴᠢᠩᠨᠠᠭᠰᠠᠨ ᠨᠢ ᠳᠡᠭᠡᠷᠡ᠃ 2 ᠪᠤᠷᠬᠠᠨ ᠤ ᠣᠷᠣᠰᠢᠬᠤᠢ ᠳᠤ ᠦᠭᠡ ᠬᠡᠯᠡᠬᠦ ᠭᠡᠵᠦ ᠠᠮᠠ ᠴᠢᠨᠢ ᠪᠦᠦ ᠶᠠᠭᠠᠷᠠᠭ᠂ ᠰᠡᠳᠬᠢᠯ ᠴᠢᠨᠢ ᠪᠦᠦ ᠰᠠᠨᠳᠤᠷᠤᠭ᠃ ᠪᠤᠷᠬᠠᠨ ᠲᠩᠷᠢ ᠳᠤ᠂ ᠴᠢ ᠭᠠᠵᠠᠷ ᠲᠤ ᠪᠠᠢᠨᠠ᠂ ᠴᠢᠨᠦ ᠦᠭᠡ ᠴᠥᠭᠡᠬᠡᠨ ᠪᠠᠢᠭ᠃ 3 ᠵᠣᠪᠠᠨᠢᠯ ᠣᠯᠠᠳᠠᠪᠠᠯ ᠵᠡᠭᠦᠳᠦᠨ ᠳᠦ ᠣᠷᠣᠨᠠ᠂ ᠦᠭᠡ ᠣᠯᠠᠳᠠᠪᠠᠯ ᠮᠤᠩ᠋ᠬᠠᠭ ᠤᠨ ᠳᠠᠭᠤ ᠬᠣᠭᠣᠯᠠᠢ ᠪᠣᠯᠣᠨᠠ᠃
4 ᠪᠤᠷᠬᠠᠨ ᠳᠤ ᠠᠮᠠᠯᠠᠭᠰᠠᠨ ᠪᠣᠯ ᠪᠡᠶᠡᠯᠡᠭᠦᠯᠬᠦ ᠳᠡᠭᠡᠨ ᠪᠦᠦ ᠬᠣᠢᠷᠭᠣᠰᠢ᠃ ᠪᠤᠷᠬᠠᠨ ᠮᠤᠩ᠋ᠬᠠᠭ ᠢ ᠲᠠᠭᠠᠯᠠᠳᠠᠭ ᠦᠭᠡᠢ᠂ ᠠᠮᠠᠯᠠᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯ︕ 5 ᠠᠮᠠᠯᠠᠭᠠᠳ ᠦᠯᠦ ᠪᠡᠶᠡᠯᠡᠭᠦᠯᠬᠦ ᠡᠴᠡ ᠠᠮᠠᠯᠠᠬᠤ ᠦᠭᠡᠢ ᠪᠠᠢᠬᠤ ᠴᠢᠨᠢ ᠳᠡᠭᠡᠷᠡ᠃ 6 ᠠᠮᠠ ᠴᠢᠨᠢ ᠮᠢᠬᠠᠨ ᠪᠡᠶᠡ ᠶᠢ ᠴᠢᠨᠢ ᠨᠢᠭᠦᠯ ᠪᠦᠦ ᠦᠢᠯᠡᠳᠦᠭᠦᠯᠦᠭ᠂ ᠪᠤᠷᠬᠠᠨ ᠤ ᠡᠯᠴᠢ ᠶᠢᠨ ᠡᠮᠦᠨᠡ 《ᠠᠯᠳᠠᠭᠠ ᠪᠠᠢᠵᠠᠢ》 ᠭᠡᠵᠦ ᠪᠦᠦ ᠶᠠᠷᠢᠭ᠃ ᠪᠤᠷᠬᠠᠨ ᠢ ᠠᠭᠤᠷᠰᠠᠭᠤᠯᠵᠤ᠂ ᠭᠠᠷ ᠤᠨ ᠠᠵᠢᠯ ᠢᠶᠠᠨ ᠪᠤᠰᠠᠨᠢᠭᠤᠯᠬᠤ ᠬᠡᠷᠡᠭ ᠶᠠᠭᠤᠨ︖
7 ᠵᠡᠭᠦᠳᠦ ᠣᠯᠠᠨ᠂ ᠦᠭᠡ ᠣᠯᠠᠨ ᠪᠣᠯ ᠬᠣᠭᠣᠰᠣᠨ ᠪᠣᠯᠣᠨᠠ᠂ ᠬᠠᠷᠢᠨ ᠴᠢ ᠪᠤᠷᠬᠠᠨ ᠠᠴᠠ ᠡᠮᠢᠶᠡ᠃
ᠡᠳ᠋ ᠪᠠᠶᠠᠯᠢᠭ ᠨᠢ ᠬᠣᠭᠣᠰᠣᠨ
8 ᠭᠠᠵᠠᠷ ᠨᠤᠲᠤᠭ ᠲᠤ ᠶᠠᠳᠠᠭᠤᠰ ᠢ ᠬᠠᠪᠴᠢᠬᠤ ᠪᠠ ᠵᠥᠪ ᠰᠢᠳᠤᠷᠭᠤ ᠶᠣᠰᠣ ᠶᠢ ᠵᠥᠷᠢᠴᠡᠬᠦ ᠶᠢ ᠬᠠᠷᠠᠭᠰᠠᠨ ᠴᠤ ᠪᠦᠦ ᠭᠠᠢᠬᠠ᠃ ᠤᠴᠢᠷ ᠨᠢ ᠳᠡᠭᠡᠳᠦ ᠲᠤᠰᠢᠶᠠᠯᠲᠠᠨ ᠤ ᠳᠡᠭᠡᠷᠡ ᠳᠡᠭᠡᠳᠦ ᠲᠤᠰᠢᠶᠠᠯᠲᠠᠨ᠂ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠰᠠ ᠳᠡᠭᠡᠳᠦ ᠲᠤᠰᠢᠶᠠᠯᠲᠠᠳ ᠬᠢᠨᠠᠵᠤ ᠪᠠᠢᠨᠠ᠃ 9 ᠭᠠᠵᠠᠷ ᠤᠨ ᠠᠰᠢᠭ ᠨᠢ ᠪᠦᠭᠦᠳᠡ ᠶᠢᠨ ᠬᠢ᠂ ᠬᠠᠭᠠᠨ ᠬᠦᠷᠲᠡᠯᠡ ᠲᠠᠷᠢᠶᠠᠯᠠᠩ ᠤᠨ ᠬᠠᠩ᠋ᠭᠠᠯᠭᠠ ᠶᠢ ᠬᠦᠷᠲᠡᠨᠡ 1 ᠃
10 ᠮᠥᠩᠭᠥ ᠶᠢ ᠬᠠᠢᠷᠠᠯᠠᠭᠴᠢ ᠮᠥᠩᠭᠥᠨ ᠳᠤ ᠬᠠᠨᠤᠳᠠᠭ ᠦᠭᠡᠢ᠂ ᠡᠳ᠋ ᠪᠠᠶᠠᠯᠢᠭ ᠢ ᠬᠠᠢᠷᠠᠯᠠᠭᠴᠢ ᠣᠷᠣᠯᠭᠠ ᠳᠠᠭᠠᠨ ᠴᠠᠳᠳᠠᠭ ᠦᠭᠡᠢ᠃ ᠡᠨᠡ ᠨᠢ ᠮᠥᠨ ᠯᠠ ᠬᠣᠭᠣᠰᠣᠨ᠃ 11 ᠣᠯᠵᠠ ᠣᠯᠠᠰᠢᠷᠠᠪᠠᠯ ᠡᠳ᠋ᠯᠡᠳᠡᠭ ᠬᠥᠮᠦᠰ ᠨᠢ ᠣᠯᠠᠰᠢᠷᠠᠨᠠ᠂ ᠡᠵᠡᠨ ᠳᠦᠨᠢ ᠥᠪᠡᠷ ᠦᠨ ᠢᠶᠠᠨ ᠨᠢᠳᠦ ᠪᠡᠷ ᠲᠡᠭᠦᠨ ᠢ ᠦᠵᠡᠬᠦ ᠡᠴᠡ ᠥᠭᠡᠷᠡ ᠠᠰᠢᠭ ᠶᠠᠭᠤ ᠪᠠᠢᠨᠠ︖ 12 ᠠᠵᠢᠯᠴᠢᠨ ᠶᠡᠬᠡ ᠢᠳᠡᠭᠰᠡᠨ ᠴᠤ᠂ ᠪᠠᠭᠠ ᠢᠳᠡᠭᠰᠡᠨ ᠴᠤ ᠨᠣᠢᠷ ᠨᠢ ᠠᠮᠲᠠᠲᠠᠢ᠂ ᠪᠠᠶᠠᠨ ᠬᠥᠮᠦᠨ ᠴᠠᠳᠬᠤᠯᠠᠩ ᠪᠠᠢᠭᠰᠠᠨ ᠢᠶᠠᠷ ᠢᠶᠠᠨ ᠲᠠᠢᠪᠤᠩ ᠨᠣᠢᠷᠰᠣᠳᠠᠭ ᠪᠢᠰᠢ᠃
13 ᠨᠠᠷᠠᠨ ᠤ ᠳᠣᠣᠷᠠ ᠪᠢ ᠨᠢᠭᠡᠨ ᠭᠠᠰᠠᠯᠤᠮᠠᠷ ᠭᠠᠢ ᠶᠢ ᠦᠵᠡᠪᠡ᠃ ᠬᠠᠳᠠᠭᠠᠯᠠᠭᠰᠠᠨ ᠪᠠᠶᠠᠯᠢᠭ ᠨᠢ ᠡᠵᠡᠨ ᠳᠡᠭᠡᠨ ᠭᠠᠢ ᠠᠪᠴᠢᠷᠠᠪᠠ᠃ 14 ᠭᠠᠢ ᠠᠴᠠ ᠪᠣᠯᠵᠤ᠂ ᠪᠠᠶᠠᠯᠢᠭ ᠨᠢ ᠦᠭᠡᠢ ᠪᠣᠯᠪᠠ᠃ ᠬᠦᠦ ᠲᠠᠢ ᠪᠣᠯᠪᠠᠴᠤ ᠭᠠᠷ ᠲᠤᠨᠢ ᠶᠠᠭᠤ ᠴᠤ ᠦᠭᠡᠢ ᠬᠣᠴᠣᠷᠪᠠ᠃ 15 ᠲᠡᠷᠡ ᠪᠡᠷ ᠡᠬᠡ ᠶᠢᠨ ᠢᠶᠠᠨ ᠬᠡᠪᠡᠯᠢ ᠡᠴᠡ ᠭᠠᠷᠬᠤ ᠳᠠᠭᠠᠨ ᠨᠢᠴᠦᠭᠦᠨ ᠢᠷᠡᠭᠰᠡᠨ ᠰᠢᠭ ᠢᠶᠠᠨ ᠨᠢᠴᠦᠭᠦᠨ ᠪᠤᠴᠠᠬᠤ ᠪᠣᠯᠣᠨᠠ᠃ ᠲᠡᠷᠡ ᠬᠥᠳᠡᠯᠮᠦᠷᠢᠯᠡᠵᠦ ᠣᠯᠣᠭᠰᠠᠨ ᠠᠴᠠ ᠪᠠᠨ ᠶᠠᠭᠤ ᠶᠢ ᠴᠤ ᠭᠠᠷ ᠲᠠᠭᠠᠨ ᠠᠪᠠᠴᠢᠵᠤ ᠴᠢᠳᠠᠬᠤ ᠦᠭᠡᠢ᠃ 16 ᠡᠨᠡ ᠨᠢ ᠦᠨᠡᠬᠡᠷ ᠭᠠᠰᠠᠯᠤᠮᠠᠷ ᠭᠠᠢ ᠶᠤᠮ᠂ ᠬᠥᠮᠦᠨ ᠢᠷᠡᠭᠰᠡᠨ ᠲᠡᠢ ᠪᠡᠨ ᠠᠳᠠᠯᠢ ᠶᠠᠪᠤᠨᠠ᠂ ᠲᠡᠭᠡᠪᠡᠯ ᠲᠡᠭᠦᠨ ᠳᠦ ᠶᠠᠭᠤ ᠨᠢ ᠠᠰᠢᠭ ᠲᠠᠢ ᠪᠤᠢ︖ ᠲᠡᠷᠡ ᠪᠡᠷ ᠰᠠᠯᠬᠢᠨ ᠤ ᠲᠥᠯᠥᠭᠡ ᠬᠥᠳᠡᠯᠮᠦᠷᠢᠯᠡᠨ 17 ᠪᠦᠬᠦᠢᠯᠡ ᠡᠳᠦᠷ ᠦᠨ ᠢᠶᠠᠨ ᠲᠤᠷᠰᠢ ᠦᠯᠡᠮᠵᠢ ᠤᠢ ᠭᠠᠰᠢᠭᠤ᠂ ᠡᠪᠡᠳᠴᠢᠨ᠂ ᠠᠭᠤᠷ ᠬᠢᠯᠢᠩ ᠲᠠᠢ ᠪᠠᠷ ᠬᠠᠷᠠᠩ᠋ᠭᠤᠢ ᠳᠤ ᠬᠣᠭᠣᠯᠠᠯᠠᠬᠤ ᠪᠣᠯᠣᠨᠠ᠃
18 ᠢᠩᠭᠢᠭᠡᠳ ᠪᠢ ᠤᠬᠠᠭᠠᠷᠠᠯᠠ᠃ ᠪᠤᠷᠬᠠᠨ ᠤ ᠰᠣᠶᠣᠷᠬᠠᠭᠰᠠᠨ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠪᠦᠬᠦᠢᠯᠡ ᠡᠳᠦᠷ ᠢᠶᠡᠷ ᠢᠳᠡᠵᠦ ᠤᠤᠭᠤᠨ᠂ ᠨᠠᠷᠠᠨ ᠤ ᠳᠣᠣᠷᠠ ᠬᠥᠳᠡᠯᠮᠦᠷᠢᠯᠡᠭᠰᠡᠨ ᠪᠦᠬᠦ ᠬᠥᠳᠡᠯᠮᠦᠷᠢ ᠡᠴᠡ ᠪᠡᠨ ᠵᠢᠷᠭᠠᠯ ᠢ ᠠᠮᠰᠠᠬᠤ ᠨᠢ ᠬᠥᠮᠦᠨ ᠳᠦ ᠰᠠᠢᠨ ᠰᠠᠢᠬᠠᠨ᠃ ᠲᠡᠭᠦᠨ ᠦ ᠬᠤᠪᠢ ᠨᠣᠭᠳᠠᠯ ᠡᠨᠡ ᠶᠤᠮ᠃ 19 ᠪᠤᠷᠬᠠᠨ ᠶᠠᠮᠠᠷ ᠨᠢᠭᠡ ᠬᠥᠮᠦᠨ ᠳᠦ ᠡᠳ᠋ ᠪᠠᠶᠠᠯᠢᠭ ᠰᠣᠶᠣᠷᠬᠠᠵᠤ᠂ ᠲᠡᠭᠦᠨ ᠢ ᠠᠰᠢᠭᠯᠠᠬᠤ᠂ ᠬᠤᠪᠢ ᠨᠣᠭᠳᠠᠯ ᠢᠶᠠᠨ ᠬᠦᠯᠢᠶᠡᠨ ᠠᠪᠴᠤ᠂ ᠬᠥᠳᠡᠯᠮᠦᠷᠢ ᠲᠡᠭᠡᠨ ᠪᠠᠶᠠᠷᠯᠠᠬᠤ ᠶᠢ ᠵᠥᠪᠰᠢᠶᠡᠷᠡᠭᠰᠡᠨ ᠪᠣᠯ᠂ ᠡᠨᠡ ᠨᠢ ᠪᠤᠷᠬᠠᠨ ᠤ ᠬᠡᠰᠢᠭ ᠮᠥᠨ᠃ 20 ᠪᠤᠷᠬᠠᠨ ᠵᠢᠷᠦᠬᠡ ᠶᠢ ᠨᠢ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠠᠢᠯᠭᠠᠳᠠᠭ ᠲᠤᠯᠠ ᠲᠡᠷᠡ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠡᠳᠦᠷ ᠤᠳ ᠲᠤ ᠶᠡᠬᠡ ᠰᠠᠨᠠᠭᠠ ᠪᠣᠯᠬᠤ ᠬᠡᠷᠡᠭ ᠦᠭᠡᠢ᠃