ᠨᠣᠮᠯᠠᠭᠴᠢ ᠶᠢᠨ ᠦᠭᠡᠰ ᠠᠷᠪᠠᠨ ᠬᠣᠶᠠᠷ
1 ᠵᠠᠯᠠᠭᠤ ᠨᠠᠰᠤᠨ ᠤ ᠪᠠᠨ ᠡᠳᠦᠷ ᠤᠳ ᠢᠶᠠᠷ ᠥᠪᠡᠷ ᠦᠨ ᠢᠶᠠᠨ ᠪᠦᠲᠦᠭᠡᠭᠴᠢ ᠶᠢ ᠰᠠᠨᠠᠵᠤ ᠶᠠᠪᠤ᠃ 《ᠪᠠᠶᠠᠷ ᠵᠢᠷᠭᠠᠯ ᠨᠠᠳᠠ ᠳᠤ ᠠᠯᠠᠭᠠ》 ᠭᠡᠵᠦ ᠬᠡᠯᠡᠬᠦ ᠬᠡᠴᠡᠭᠦᠦ ᠵᠢᠯ ᠡᠳᠦᠷ ᠤᠳ ᠣᠢᠷᠠᠲᠤᠵᠤ ᠢᠷᠡᠬᠦ ᠡᠴᠡ ᠡᠮᠦᠨᠡ᠂ 2 ᠨᠠᠷᠠ᠂ ᠭᠡᠷᠡᠯ᠂ ᠰᠠᠷᠠ᠂ ᠣᠳᠣᠳ ᠬᠠᠷᠠᠩ᠋ᠭᠤᠢᠯᠠᠬᠤ ᠠᠴᠠ ᠡᠮᠦᠨᠡ᠂ ᠪᠣᠷᠣᠭᠠᠨ ᠤ ᠳᠠᠷᠠᠭᠠ ᠡᠭᠦᠯᠡᠰ ᠡᠷᠭᠢᠨ ᠬᠤᠷᠭᠠᠬᠤ ᠠᠴᠠ ᠡᠮᠦᠨᠡ ᠲᠡᠭᠦᠨ ᠢ ᠰᠠᠨᠠ᠃ 3 ᠭᠡᠷ ᠦᠨ ᠬᠠᠷᠠᠭᠤᠯ ᠤᠳ ᠰᠠᠯᠭᠠᠨᠠᠨ᠂ ᠬᠦᠴᠦᠲᠡᠳ ᠪᠥᠭᠲᠥᠢᠨᠡ᠂ ᠴᠥᠭᠡᠷᠡᠭᠰᠡᠨ ᠲᠡᠭᠡᠷᠮᠡᠴᠢᠳ ᠠᠵᠢᠯ ᠢᠶᠠᠨ ᠵᠣᠭᠰᠣᠵᠤ᠂ ᠴᠣᠩ᠋ᠬᠣ ᠪᠠᠷ ᠬᠠᠷᠠᠭᠰᠠᠳ ᠰᠦᠮᠡᠭᠡᠶᠢᠷᠡᠨᠡ᠃ 4 ᠭᠤᠳᠤᠮᠵᠢᠨ ᠤ ᠬᠠᠭᠠᠯᠭᠠ ᠨᠤᠭᠤᠳ ᠬᠠᠭᠠᠭᠳᠠᠨᠠ᠂ ᠲᠡᠭᠡᠷᠮᠡ ᠶᠢᠨ ᠳᠠᠭᠤ ᠬᠣᠯᠠᠳᠠᠨᠠ᠂ ᠰᠢᠪᠠᠭᠤᠳ ᠤᠨ ᠵᠢᠷᠭᠢᠭᠡᠨ ᠢᠶᠡᠷ ᠪᠣᠰᠣᠨᠠ᠂ ᠠᠶᠠ ᠳᠠᠭᠤᠤ ᠪᠦᠭᠦᠳᠡ ᠨᠠᠮᠳᠠᠨᠠ᠂ 5 ᠥᠭᠰᠥᠭᠦᠷ ᠭᠠᠵᠠᠷ ᠠᠴᠠ ᠠᠶᠤᠨ᠂ ᠵᠠᠮ ᠳᠤ ᠭᠠᠷᠬᠤ ᠠᠴᠠ ᠵᠢᠷᠦᠬᠡᠰᠢᠶᠡᠵᠦ᠂ ᠪᠤᠢᠯᠠᠰᠤ ᠮᠣᠳᠣ 5 ᠴᠡᠴᠡᠭᠯᠡᠵᠦ᠂ ᠴᠠᠷᠴᠠᠬᠠᠢ ᠠᠴᠢᠶᠠ ᠪᠣᠯᠵᠤ᠂ ᠬᠦᠰᠡᠯ ᠲᠠᠴᠢᠶᠠᠯ ᠲᠠᠰᠤᠷᠠᠨᠠ᠂ ᠢᠩᠭᠢᠭᠡᠳ ᠬᠥᠮᠦᠨ ᠮᠥᠩᠬᠡ ᠶᠢᠨ ᠭᠡᠷ ᠲᠡᠭᠡᠨ ᠣᠳᠬᠤ ᠳᠤ᠂ ᠭᠠᠰᠢᠭᠤᠳᠠᠭᠰᠠᠳ ᠭᠤᠳᠤᠮᠵᠢ ᠪᠠᠷ ᠠᠯᠬᠤᠬᠤ ᠪᠣᠯᠣᠨᠠ᠃ 6 ᠮᠥᠩᠭᠥᠨ ᠤᠲᠠᠰᠤ ᠲᠠᠰᠤᠷᠠᠵᠤ᠂ ᠠᠯᠲᠠᠨ ᠰᠠᠪᠠ ᠬᠠᠭᠠᠷᠠᠨ᠂ ᠪᠤᠯᠠᠭ ᠤᠨ ᠬᠠᠵᠠᠭᠤ ᠳᠠᠬᠢ ᠪᠣᠳᠣᠩ ᠬᠡᠮᠬᠡᠷᠡᠵᠦ᠂ ᠬᠤᠳᠳᠤᠭ ᠤᠨ ᠬᠦᠷᠳᠦ ᠰᠠᠯᠪᠠᠷᠠᠨᠠ᠃ 7 ᠲᠣᠭᠣᠰᠣ ᠨᠢ ᠤᠷᠢᠳᠤ ᠶᠢᠨ ᠪᠠᠢᠭᠰᠠᠨ ᠰᠢᠷᠣᠢ ᠳᠠᠭᠠᠨ ᠪᠤᠴᠠᠵᠤ᠂ ᠠᠮᠢᠰᠬᠤᠯ ᠨᠢ ᠥᠪᠡᠷ ᠢ ᠨᠢ ᠰᠣᠶᠣᠷᠬᠠᠭᠰᠠᠨ ᠪᠤᠷᠬᠠᠨ ᠳᠠᠭᠠᠨ ᠪᠤᠴᠠᠬᠤ ᠠᠵᠢ᠃ 8 ᠬᠣᠭᠣᠰᠣᠨ ᠠᠴᠠ ᠬᠣᠭᠣᠰᠣᠨ᠂ ᠨᠣᠮᠯᠠᠭᠴᠢ ᠶᠠᠷᠢᠵᠤ ᠪᠠᠢᠨᠠ᠂ ᠪᠦᠭᠦᠳᠡ ᠬᠣᠭᠣᠰᠣᠨ᠃
ᠲᠡᠭᠦᠰᠬᠡᠯ ᠦᠨ ᠦᠭᠡ
9 ᠨᠣᠮᠯᠠᠭᠴᠢ ᠮᠡᠷᠭᠡᠨ ᠪᠠᠢᠭᠰᠠᠨ ᠪᠥᠭᠡᠳ ᠠᠷᠠᠳ ᠣᠯᠠᠨ ᠳᠤ ᠮᠡᠳᠡᠯᠭᠡ ᠰᠤᠷᠭᠠᠪᠠ᠃ ᠲᠡᠷᠡ ᠣᠯᠠᠨ ᠵᠦᠢᠷ ᠦᠭᠡ ᠶᠢ ᠲᠤᠩ᠋ᠭᠠᠵᠤ ᠰᠤᠳᠤᠯᠤᠨ᠂ ᠡᠮᠬᠢᠯᠡᠭᠰᠡᠨ ᠪᠢᠯᠡ᠃ 10 ᠨᠣᠮᠯᠠᠭᠴᠢ ᠲᠠᠭᠠᠯᠠᠮᠵᠢᠲᠤ ᠦᠭᠡᠰ ᠢ ᠣᠯᠬᠤ ᠪᠠᠷ ᠴᠢᠷᠮᠠᠢᠨ᠂ ᠦᠨᠡᠨ ᠦᠭᠡ ᠶᠢ ᠰᠢᠳᠤᠷᠭᠤ ᠪᠠᠷ ᠪᠢᠴᠢᠭᠰᠡᠨ ᠶᠤᠮ᠃ 11 ᠮᠡᠷᠭᠡᠳ ᠦᠨ ᠦᠭᠡᠰ ᠨᠢ ᠰᠢᠯᠪᠢᠭᠦᠷ᠂ ᠴᠤᠭᠯᠠᠭᠤᠯᠤᠭᠰᠠᠨ ᠦᠭᠡᠰ ᠨᠢ ᠪᠠᠲᠤ ᠲᠣᠭᠲᠠᠭᠠᠭᠰᠠᠨ ᠬᠠᠳᠠᠭᠠᠰᠤ ᠮᠡᠲᠦ᠂ ᠨᠢᠭᠡ ᠯᠠ ᠬᠣᠨᠢᠴᠢᠨ ᠡᠳᠡᠭᠡᠷ ᠢ ᠰᠣᠶᠣᠷᠬᠠᠭᠰᠠᠨ ᠠᠵᠢ᠃ 12 ᠬᠦᠦ ᠮᠢᠨᠢ᠂ ᠡᠳᠡᠭᠡᠷ ᠡᠴᠡ ᠭᠠᠳᠠᠨᠠ ᠴᠢᠮᠠ ᠳᠤ ᠰᠠᠨᠠᠭᠤᠯᠬᠤ ᠦᠭᠡ ᠪᠠᠢᠨᠠ᠄ 《ᠣᠯᠠᠨ ᠨᠣᠮ ᠪᠢᠴᠢᠬᠦ ᠨᠢ ᠡᠴᠦᠰ ᠦᠭᠡᠢ᠂ ᠦᠯᠡᠮᠵᠢ ᠶᠡᠬᠡ ᠰᠤᠳᠤᠯᠬᠤ ᠨᠢ ᠪᠡᠶᠡ ᠳᠦ ᠬᠠᠯᠠ ᠲᠠᠢ᠃》 13 ᠰᠣᠨᠣᠰᠬᠠᠭᠰᠠᠨ ᠪᠦᠬᠦᠨ ᠦ ᠪᠠᠨ ᠲᠤᠬᠠᠢ ᠳ᠋ᠦᠩᠨᠡᠬᠦ ᠦᠭᠡ ᠮᠢᠨᠢ ᠡᠨᠡ᠄ ᠪᠤᠷᠬᠠᠨ ᠠᠴᠠ ᠡᠮᠢᠶᠡ᠂ ᠲᠡᠭᠦᠨ ᠦ ᠲᠤᠰᠢᠶᠠᠯ ᠢ ᠳᠠᠭᠠ᠂ ᠬᠥᠮᠦᠨ ᠦ ᠪᠦᠬᠦᠨ ᠨᠢ ᠡᠨᠡ ᠶᠤᠮ᠃ 14 ᠪᠤᠷᠬᠠᠨ ᠰᠠᠢᠨ ᠮᠠᠭᠤ ᠪᠦᠬᠦ ᠦᠢᠯᠡ ᠶᠢ᠂ ᠮᠥᠨ ᠨᠢᠭᠤᠴᠠᠯᠠᠭᠳᠠᠭᠰᠠᠨ ᠪᠦᠬᠦᠨ ᠢ ᠰᠢᠭᠦᠯᠲᠡ ᠳᠦ ᠠᠪᠠᠴᠢᠬᠤ ᠪᠣᠯᠣᠨᠠ᠃