ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠭᠤᠷᠪᠠ
1 ᠪᠢᠳᠡ ᠳᠠᠬᠢᠭᠠᠳ ᠥᠪᠡᠷᠰᠡᠳ ᠢ ᠪᠠᠨ ᠮᠠᠭᠲᠠᠵᠤ ᠡᠬᠢᠯᠡᠵᠦ ᠪᠠᠢᠨᠠ ᠭᠡᠵᠢ ᠤᠤ︖ ᠪᠢᠳᠡ ᠵᠠᠷᠢᠮ ᠬᠥᠮᠦᠨ ᠮᠡᠲᠦ ᠪᠡᠷ ᠥᠪᠡᠷ ᠢ ᠪᠠᠨ ᠲᠠᠨᠢᠯᠴᠠᠭᠤᠯᠬᠤ ᠵᠠᠬᠢᠳᠠᠯ ᠢ ᠲᠠ ᠨᠠᠷ ᠲᠤ ᠦᠵᠡᠭᠦᠯᠬᠦ᠂ ᠡᠰᠡᠬᠦᠯᠡ ᠲᠠ ᠨᠠᠷ ᠠᠴᠠ ᠠᠪᠬᠤ ᠬᠡᠷᠡᠭᠲᠡᠢ ᠭᠡᠵᠢ ᠤᠤ︖ 2 ᠲᠠ ᠨᠠᠷ ᠪᠣᠯ ᠪᠢᠳᠡᠨ ᠦ ᠵᠠᠬᠢᠳᠠᠯ ᠮᠥᠨ᠂ ᠲᠡᠷᠡ ᠨᠢ ᠪᠢᠳᠡᠨ ᠦ ᠵᠢᠷᠦᠬᠡᠨ ᠳᠦ ᠪᠢᠴᠢᠭᠳᠡᠭᠡᠳ ᠪᠦᠬᠦ ᠬᠥᠮᠦᠨ ᠳᠦ ᠲᠠᠨᠢᠭᠳᠠᠨ ᠤᠩ᠋ᠰᠢᠭᠳᠠᠵᠤ ᠪᠠᠢᠨᠠ᠃ 3 ᠲᠠ ᠨᠠᠷ ᠪᠣᠯ ᠪᠢᠳᠡᠨ ᠦ ᠦᠢᠯᠡᠴᠢᠯᠡᠯ ᠦᠨ ᠦᠷᠡ ᠪᠦᠲᠦᠮᠵᠢ ᠪᠠᠷ ᠪᠢᠴᠢᠭᠳᠡᠭᠰᠡᠨ ᠾᠷᠢᠰᠲ᠋ᠣᠰ ᠤᠨ ᠵᠠᠬᠢᠳᠠᠯ ᠭᠡᠳᠡᠭ ᠨᠢ ᠲᠣᠳᠣᠷᠠᠭᠤᠯᠤᠭᠳᠠᠵᠠᠢ᠃ ᠲᠡᠷᠡ ᠵᠠᠬᠢᠳᠠᠯ ᠪᠡᠬᠡ ᠪᠡᠷ ᠪᠢᠰᠢ᠂ ᠬᠠᠷᠢᠨ ᠠᠮᠢᠳᠤ ᠪᠤᠷᠬᠠᠨ ᠤ ᠰᠦᠨᠡᠰᠦ ᠪᠡᠷ᠂ ᠮᠥᠨ ᠴᠢᠯᠠᠭᠤᠨ ᠰᠠᠮᠪᠠᠷᠠ ᠳᠡᠭᠡᠷᠡ ᠪᠢᠰᠢ᠂ ᠬᠠᠷᠢᠨ ᠮᠢᠬᠠᠨ ᠪᠡᠶᠡ ᠶᠢᠨ ᠵᠢᠷᠦᠬᠡᠨ ᠰᠠᠮᠪᠠᠷᠠ ᠳᠡᠭᠡᠷᠡ ᠪᠢᠴᠢᠭᠳᠡᠪᠡ᠃
4 ᠪᠢᠳᠡ ᠾᠷᠢᠰᠲ᠋ᠣᠰ ᠤᠨ ᠠᠴᠢ ᠪᠠᠷ ᠪᠤᠷᠬᠠᠨ ᠳᠤ ᠡᠢᠮᠦ ᠢᠲᠡᠭᠡᠯ ᠲᠡᠢ ᠪᠠᠢᠭᠠ ᠶᠤᠮ᠃ 5 ᠭᠡᠬᠦ ᠳᠡᠭᠡᠨ ᠪᠢᠳᠡᠨ ᠦ ᠥᠪᠡᠷᠰᠡᠳ ᠦᠨ ᠬᠢ ᠭᠡᠵᠦ ᠪᠣᠳᠣᠮᠠᠷ ᠬᠠᠩ᠋ᠭᠠᠮᠵᠢ ᠪᠢᠳᠡᠨ ᠳᠦ ᠪᠠᠢᠨᠠ ᠭᠡᠰᠡᠨ ᠦᠭᠡ ᠪᠢᠰᠢ᠂ ᠪᠢᠳᠡᠨ ᠦ ᠬᠠᠩ᠋ᠭᠠᠮᠵᠢ ᠪᠣᠯ ᠪᠤᠷᠬᠠᠨ ᠤ ᠬᠢ ᠪᠢᠯᠡ᠃ 6 ᠲᠡᠷᠡ ᠪᠢᠳᠡᠨ ᠳᠦ ᠰᠢᠨᠡ ᠭᠡᠷᠡ ᠶᠢᠨ ᠦᠢᠯᠡᠴᠢᠯᠡᠭᠴᠢ ᠪᠣᠯᠬᠤ ᠬᠢᠷᠢ ᠭᠡᠮ ᠣᠯᠭᠣᠭᠰᠠᠨ᠂ ᠲᠡᠷᠡ ᠭᠡᠷᠡ ᠨᠢ ᠪᠢᠴᠢᠭ ᠢᠶᠠᠷ ᠪᠤᠰᠤ᠂ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠶᠤᠮ᠂ ᠤᠴᠢᠷ ᠨᠢ᠂ ᠪᠢᠴᠢᠭ ᠪᠣᠯ ᠦᠬᠦᠭᠦᠯᠵᠦ᠂ ᠠᠷᠢᠭᠤᠨ ᠰᠦᠨᠡᠰᠦ ᠪᠣᠯ ᠠᠮᠢᠳᠤᠷᠠᠭᠤᠯᠳᠠᠭ᠃
ᠰᠢᠨᠡ ᠭᠡᠷᠡ ᠶᠢᠨ ᠰᠦᠷ ᠵᠢᠪᠬᠤᠯᠠᠩ
7 ᠬᠠᠷᠢᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠰᠡᠢᠯᠦᠭᠳᠡᠭᠰᠡᠨ ᠦᠬᠦᠯ ᠲᠡᠢ ᠪᠢᠴᠢᠭ ᠤᠨ ᠲᠤᠰᠢᠶᠠᠯ ᠴᠤ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠪᠣᠯᠬᠣᠷ ᠢᠰᠷᠧᠯᠴᠦᠳ ᠮᠣᠰᠧ ᠶᠢᠨ ᠨᠢᠭᠤᠷ ᠳᠡᠭᠡᠷᠡᠬᠢ ᠲᠦᠷ ᠵᠠᠭᠤᠷᠠ ᠶᠢᠨ ᠰᠦᠷ ᠵᠢᠪᠬᠤᠯᠠᠩ ᠠᠴᠠ ᠪᠣᠯᠵᠤ ᠲᠡᠭᠦᠨ ᠦ ᠨᠢᠭᠤᠷ ᠢ ᠰᠢᠷᠲᠡᠵᠦ ᠳᠡᠢᠯᠦᠭᠰᠡᠨ ᠦᠭᠡᠢ ᠶᠤᠮ ᠪᠣᠯ᠂ 8 ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠲᠤᠰᠢᠶᠠᠯ ᠨᠡᠩ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠪᠢᠰᠢ ᠤᠤ︖ 9 ᠶᠠᠯᠠᠯᠠᠬᠤ ᠲᠤᠰᠢᠶᠠᠯ ᠨᠢ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠶᠤᠮ ᠪᠣᠯ᠂ ᠵᠥᠪᠲᠥᠭᠡᠬᠦ ᠲᠤᠰᠢᠶᠠᠯ ᠨᠢ ᠨᠡᠩ ᠢᠯᠡᠭᠦᠦ ᠰᠦᠷ ᠵᠢᠪᠬᠤᠯᠠᠩ ᠢᠶᠠᠷ ᠳᠦᠭᠦᠷᠴᠦ ᠪᠠᠢᠳᠠᠭ᠃ 10 ᠦᠨᠡᠨ ᠳᠡᠭᠡᠨ ᠴᠠᠭᠯᠠᠰᠢ ᠦᠭᠡᠢ ᠰᠦᠷ ᠵᠢᠪᠬᠤᠯᠠᠩ ᠠᠴᠠ ᠪᠣᠯᠵᠤ ᠡᠮᠦᠨᠡᠬᠢ ᠰᠦᠷ ᠵᠢᠪᠬᠤᠯᠠᠩ ᠨᠢ ᠰᠦᠷ ᠵᠢᠪᠬᠤᠯᠠᠩ ᠦᠭᠡᠢ ᠪᠣᠯᠵᠠᠢ᠃ 11 ᠲᠦᠷ ᠵᠠᠭᠤᠷᠠ ᠶᠢᠨ ᠬᠢᠨᠢ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠶᠤᠮ ᠪᠣᠯ᠂ ᠥᠨᠢᠳᠡ ᠶᠢᠨ ᠬᠢᠨᠢ ᠨᠡᠩ ᠢᠯᠡᠭᠦᠦ ᠰᠦᠷ ᠵᠢᠪᠬᠤᠯᠠᠩ ᠲᠠᠢ᠃
12 ᠪᠢᠳᠡ ᠡᠢᠮᠦ ᠡᠷᠡᠮᠡᠯᠵᠡᠯ ᠲᠡᠢ ᠪᠣᠯᠬᠣᠷ ᠶᠡᠬᠡᠳᠡ ᠵᠣᠷᠢᠭᠲᠠᠢ ᠪᠣᠯᠳᠠᠭ ᠶᠤᠮ᠃ 13 ᠲᠦᠷ ᠵᠠᠭᠤᠷᠠ ᠶᠢᠨ ᠢᠶᠠᠨ ᠡᠴᠦᠰ ᠢ ᠢᠰᠷᠧᠯᠴᠦᠳ ᠲᠦ ᠰᠢᠷᠲᠡᠭᠦᠯᠬᠦ ᠦᠭᠡᠢ ᠶᠢᠨ ᠲᠤᠯᠠᠳᠠ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠯᠭᠡ ᠪᠡᠷ ᠪᠦᠲᠡᠭᠡᠭᠰᠡᠨ ᠮᠣᠰᠧ ᠲᠠᠢ ᠪᠢᠳᠡ ᠠᠳᠠᠯᠢ ᠦᠭᠡᠢ᠃ 14 ᠬᠠᠷᠢᠨ ᠲᠡᠳᠡᠨ ᠦ ᠤᠬᠠᠭᠠᠨ ᠬᠠᠲᠠᠭᠤᠷᠠᠵᠠᠢ᠃ ᠡᠢᠮᠦ ᠡᠴᠡ ᠲᠡᠳᠡ ᠬᠠᠭᠤᠴᠢᠨ ᠭᠡᠷᠡ ᠶᠢ ᠤᠩ᠋ᠰᠢᠳᠠᠭ ᠪᠣᠯᠪᠠᠴᠤ ᠣᠳᠣ ᠪᠣᠯᠲᠠᠯᠠ ᠲᠡᠷᠡ ᠪᠦᠲᠡᠭᠡᠯᠭᠡ ᠨᠢ ᠢᠷᠠᠭᠳᠠᠬᠤ ᠦᠭᠡᠢ ᠪᠠᠢᠭᠰᠠᠭᠠᠷ (ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠯᠠ ᠢᠷᠠᠭᠳᠠᠨᠠ᠃)᠂ 15 ᠣᠳᠣ ᠪᠣᠯᠲᠠᠯᠠ ᠮᠣᠰᠧ ᠶᠢ ᠤᠩ᠋ᠰᠢᠬᠤ ᠪᠦᠷᠢ ᠳᠤ ᠲᠡᠷᠡ ᠪᠦᠲᠡᠭᠡᠯᠭᠡ ᠲᠡᠳᠡᠨ ᠦ ᠰᠡᠳᠬᠢᠯ ᠢ ᠪᠦᠲᠡᠭᠡᠵᠦ ᠪᠠᠢᠳᠠᠭ᠃ 16 ᠬᠠᠷᠢᠨ ᠬᠥᠮᠦᠨ ᠡᠵᠡᠨ ᠤᠷᠤᠭᠤ ᠡᠷᠭᠢᠬᠦ ᠪᠣᠯᠭᠠᠨ ᠳᠤ ᠲᠡᠷᠡ ᠪᠦᠲᠡᠭᠡᠯᠭᠡ ᠢᠷᠠᠭᠳᠠᠨᠠ᠃ 17 ᠡᠵᠡᠨ ᠪᠣᠯ ᠰᠦᠨᠡᠰᠦ᠂ ᠡᠵᠡᠨ ᠦ ᠰᠦᠨᠡᠰᠦ ᠬᠠᠮᠢᠭᠠ ᠪᠠᠢᠪᠠᠯ ᠲᠡᠨᠳᠡ ᠡᠷᠬᠡ ᠴᠢᠯᠥᠭᠡ ᠪᠠᠢᠨᠠ᠃ 18 ᠪᠢᠳᠡ ᠪᠦᠭᠦᠳᠡᠭᠡᠷ ᠪᠦᠲᠡᠭᠡᠯᠭᠡ ᠪᠡᠨ ᠢᠷᠠᠭᠰᠠᠨ ᠨᠢᠭᠤᠷ ᠢᠶᠠᠷ ᠡᠵᠡᠨ ᠦ ᠰᠦᠷ ᠵᠢᠪᠬᠤᠯᠠᠩ ᠢ ᠲᠣᠯᠢᠳᠠᠵᠤ 1 ᠡᠵᠡᠨ ᠦ ᠰᠦᠨᠡᠰᠦ ᠪᠢᠳᠡᠨ ᠢ ᠡᠵᠡᠨ ᠦ ᠲᠥᠷᠬᠥ ᠲᠠᠢ ᠪᠣᠯᠭᠠᠨ ᠵᠢᠪᠬᠤᠯᠠᠩ ᠠᠴᠠ ᠵᠢᠪᠬᠤᠯᠠᠩ ᠳᠤ ᠬᠦᠷᠭᠡᠵᠦ ᠪᠠᠢᠳᠠᠭ᠃