ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠳᠣᠯᠣᠭᠠ
1 ᠬᠠᠢᠷᠠᠲᠤ ᠨᠤᠭᠤᠳ ᠡ᠂ ᠪᠢᠳᠡᠨ ᠳᠦ ᠡᠳᠡᠭᠡᠷ ᠠᠮᠠᠯᠠᠯᠲᠠ ᠪᠠᠢᠭᠠ ᠪᠣᠯᠬᠣᠷ ᠮᠢᠬᠠᠨ ᠪᠡᠶᠡ ᠪᠣᠯᠣᠨ ᠰᠦᠨᠡᠰᠦᠨ ᠦ ᠠᠯᠢᠪᠠ ᠪᠣᠬᠢᠷᠳᠤᠭᠤᠯᠤᠭᠴᠢ ᠡᠴᠡ ᠥᠪᠡᠷᠰᠡᠳ ᠢ ᠪᠠᠨ ᠴᠡᠪᠡᠷᠯᠡᠵᠡᠭᠡᠶᠡ᠂ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠨ ᠲᠡᠭᠦᠰ ᠠᠷᠢᠭᠤᠨ ᠪᠣᠯᠵᠠᠭᠠᠶᠠ᠃
ᠭᠡᠮᠰᠢᠯ ᠪᠠ ᠪᠠᠶᠠᠰᠤᠯ
2 ᠲᠠ ᠨᠠᠷ ᠪᠢᠳᠡᠨ ᠢ ᠰᠡᠳᠬᠢᠯ ᠳᠡᠭᠡᠨ ᠤᠭᠲᠤᠨ ᠠᠪ᠃ ᠪᠢᠳᠡ ᠬᠡᠨ ᠳᠦ ᠴᠤ ᠵᠥᠪ ᠪᠤᠰᠤ ᠪᠠᠢᠭᠠ ᠦᠭᠡᠢ᠂ ᠬᠡᠨ ᠢ ᠴᠤ ᠤᠷᠤᠭᠤ ᠲᠠᠲᠠᠭᠠ ᠦᠭᠡᠢ᠂ ᠬᠡᠨ ᠢ ᠴᠤ ᠮᠥᠯᠵᠢᠭᠡ ᠦᠭᠡᠢ᠃ 3 ᠪᠢ ᠲᠠ ᠨᠠᠷ ᠢ ᠪᠤᠷᠤᠭᠤᠳᠬᠠᠬᠤ ᠭᠡᠵᠦ ᠡᠭᠦᠨ ᠢ ᠬᠡᠯᠡᠭᠰᠡᠨ ᠪᠢᠰᠢ᠃ ᠮᠢᠨᠦ ᠤᠷᠢᠳᠠ ᠨᠢ ᠬᠡᠯᠡᠭᠰᠡᠨᠴᠢᠯᠡᠨ ᠲᠠ ᠨᠠᠷ ᠰᠡᠳᠬᠢᠯ ᠳᠤ ᠮᠢᠨᠢ ᠪᠠᠢᠵᠤ ᠪᠢᠳᠡ ᠬᠠᠮᠲᠤ ᠳᠠᠭᠠᠨ ᠦᠬᠦᠵᠦ᠂ ᠬᠠᠮᠲᠤ ᠳᠠᠭᠠᠨ ᠠᠮᠢᠳᠤᠷᠠᠬᠤ ᠪᠣᠯᠣᠨᠠ᠃ 4 ᠪᠢ ᠲᠠ ᠨᠠᠷ ᠲᠤ ᠮᠠᠰᠢ ᠰᠢᠳᠤᠷᠭᠤ ᠪᠠᠷ ᠶᠠᠷᠢᠳᠠᠭ ᠪᠥᠭᠡᠳ ᠲᠠ ᠨᠠᠷ ᠢᠶᠠᠷ ᠮᠠᠰᠢ ᠪᠠᠶᠠᠷᠯᠠᠳᠠᠭ ᠶᠤᠮ᠃ ᠲᠡᠢᠮᠦ ᠡᠴᠡ ᠠᠯᠢᠪᠠ ᠵᠣᠪᠠᠯᠠᠩ ᠤᠨ ᠳᠤᠮᠳᠠ ᠲᠠᠢᠳᠬᠤᠷᠠᠯ ᠢᠶᠠᠷ ᠳᠦᠭᠦᠷᠴᠦ ᠪᠠᠶᠠᠰᠤᠯ ᠢᠶᠠᠷ ᠪᠢᠯᠬᠠᠳᠠᠭ᠃
5 ᠪᠢᠳᠡ ᠮᠠᠺᠧᠳᠣᠨᠢᠶᠠ ᠳᠤ ᠣᠴᠢᠭᠰᠠᠨ ᠤ ᠳᠠᠷᠠᠭᠠ ᠪᠡᠶᠡ ᠮᠢᠨᠢ ᠠᠮᠠᠷᠠᠭᠰᠠᠨ ᠦᠭᠡᠢ᠂ ᠭᠠᠳᠠᠨᠠ ᠶᠢᠨ ᠲᠤᠯᠤᠯᠳᠤᠭᠠᠨ᠂ ᠳᠣᠲᠣᠷᠠ ᠶᠢᠨ ᠲᠦᠭᠰᠢᠭᠦᠷᠢ ᠳᠤ ᠪᠦᠬᠦ ᠲᠠᠯᠠ ᠪᠠᠷ ᠬᠠᠪᠴᠢᠭᠳᠠᠪᠠ᠃ 6 ᠭᠡᠪᠡᠴᠦ ᠪᠤᠷᠬᠠᠨ ᠲᠢᠲ ᠢ ᠶᠠᠪᠤᠭᠤᠯᠤᠭᠰᠠᠨ ᠢᠶᠠᠷ ᠢᠶᠠᠨ ᠤᠷᠮᠠ ᠠᠯᠳᠠᠷᠠᠭᠰᠠᠳ ᠢ ᠲᠠᠢᠳᠬᠤᠷᠠᠭᠤᠯᠤᠭᠰᠠᠨ ᠶᠤᠮ᠃ 7 ᠲᠡᠭᠦᠨ ᠦ ᠢᠷᠡᠭᠰᠡᠨ ᠢᠶᠡᠷ ᠲᠡᠳᠦᠢ ᠦᠭᠡᠢ᠂ ᠮᠥᠨ ᠲᠡᠭᠦᠨ ᠦ ᠲᠠ ᠨᠠᠷ ᠠᠴᠠ ᠣᠯᠣᠭᠰᠠᠨ ᠲᠠᠢᠳᠬᠤᠷᠠᠯ ᠴᠤ ᠪᠢᠳᠡᠨ ᠢ ᠲᠠᠢᠳᠬᠤᠷᠠᠭᠤᠯᠤᠭᠰᠠᠨ ᠶᠤᠮ᠃ ᠲᠡᠷᠡ ᠪᠢᠳᠡᠨ ᠳᠦ ᠲᠠ ᠨᠠᠷ ᠤᠨ ᠨᠠᠮᠠᠶᠢ ᠰᠠᠨᠠᠵᠤ ᠪᠠᠢᠭᠠ ᠪᠠ ᠭᠠᠰᠢᠭᠤᠳᠠᠵᠤ᠂ ᠵᠢᠳᠬᠦᠵᠦ ᠪᠠᠢᠭᠠ ᠶᠢ ᠳᠤᠭᠤᠯᠭᠠᠭᠰᠠᠨ ᠳᠤ ᠪᠢ ᠤᠯᠠᠮ ᠶᠡᠬᠡ ᠪᠠᠶᠠᠷᠯᠠᠪᠠ᠃ 8 ᠪᠢ ᠵᠠᠬᠢᠳᠠᠯ ᠳᠠᠭᠠᠨ ᠲᠠ ᠨᠠᠷ ᠢ ᠵᠣᠪᠠᠨᠢᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠠᠮᠰᠠᠬᠤ ᠦᠭᠡᠢ᠂ ᠬᠠᠷᠠᠮᠰᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠵᠠᠬᠢᠳᠠᠯ ᠲᠦᠷ ᠵᠠᠭᠤᠷᠠ ᠯᠠ ᠲᠠ ᠨᠠᠷ ᠢ ᠵᠣᠪᠠᠨᠢᠭᠤᠯᠤᠭᠰᠠᠨ ᠢ ᠮᠡᠳᠡᠭᠡᠳ 9 ᠵᠣᠪᠠᠨᠢᠭᠤᠯᠤᠭᠰᠠᠨ ᠳᠠᠭᠠᠨ ᠪᠤᠰᠤ᠂ ᠬᠠᠷᠢᠨ ᠵᠣᠪᠠᠨᠢᠵᠤ ᠭᠡᠮᠰᠢᠭᠰᠡᠨ ᠳᠦ ᠴᠢᠨᠢ ᠡᠳᠦᠭᠡ ᠪᠠᠶᠠᠷᠯᠠᠵᠤ ᠪᠠᠢᠨᠠ᠃ ᠲᠠ ᠨᠠᠷ ᠪᠤᠷᠬᠠᠨ ᠤ ᠰᠠᠨᠠᠭᠠ ᠪᠠᠷ ᠭᠤᠨᠢᠭᠯᠠᠪᠠᠯ ᠪᠦᠬᠦ ᠵᠦᠢᠯ ᠳᠤ ᠪᠢᠳᠡᠨ ᠡᠴᠡ ᠪᠣᠯᠵᠤ ᠬᠣᠬᠢᠷᠠᠬᠤ ᠦᠭᠡᠢ᠃ 10 ᠪᠤᠷᠬᠠᠨ ᠤ ᠰᠠᠨᠠᠭᠠ ᠠᠴᠠ ᠪᠣᠯᠣᠭᠰᠠᠨ ᠵᠣᠪᠠᠨᠢᠯ ᠬᠥᠮᠦᠨ ᠢ ᠭᠡᠮᠰᠢᠭᠦᠯᠵᠦ ᠠᠪᠤᠷᠠᠳᠠᠭ ᠲᠤᠯᠠ ᠬᠠᠷᠠᠮᠰᠠᠯ ᠪᠠᠢᠳᠠᠭ ᠦᠭᠡᠢ᠃ ᠬᠠᠷᠢᠨ ᠶᠢᠷᠲᠢᠨᠴᠦ ᠶᠢᠨ ᠵᠣᠪᠠᠨᠢᠯ ᠨᠢ ᠦᠬᠦᠯ ᠳᠦ ᠬᠦᠷᠭᠡᠳᠡᠭ᠃ 11 ᠠᠩ᠋ᠬᠠᠷᠤᠭᠲᠤᠨ᠂ ᠪᠤᠷᠬᠠᠨ ᠤ ᠰᠠᠨᠠᠭᠠ ᠠᠴᠠ ᠪᠣᠯᠣᠭᠰᠠᠨ ᠵᠣᠪᠠᠨᠢᠯ ᠲᠠ ᠨᠠᠷ ᠤᠨ ᠳᠤᠮᠳᠠ ᠬᠢᠷᠢ ᠵᠡᠷᠭᠡ ᠶᠢᠨ ᠶᠡᠬᠡ ᠵᠢᠳᠬᠦᠯ᠂ ᠬᠠᠮᠠᠭᠠᠯᠠᠯᠲᠠ᠂ ᠬᠢᠯᠢᠩ᠂ ᠠᠢᠳᠠᠰ᠂ ᠰᠠᠨᠠᠭᠠᠰᠢᠷᠠᠯ᠂ ᠡᠷᠡᠮᠡᠯᠵᠡᠯ ᠪᠠ ᠰᠢᠳᠬᠡᠯ ᠢ ᠤᠴᠠᠷᠠᠭᠤᠯᠤᠭᠰᠠᠨ ᠶᠤᠮ ᠪᠤᠢ︖ ᠲᠠ ᠨᠠᠷ ᠲᠡᠷᠡ ᠬᠦ ᠶᠠᠪᠤᠳᠠᠯ ᠳᠡᠭᠡᠷᠡ ᠪᠤᠷᠤᠭᠤ ᠦᠭᠡᠢ ᠭᠡᠰᠡᠨ ᠢᠶᠡᠨ ᠪᠦᠬᠦ ᠲᠠᠯᠠ ᠪᠠᠷ ᠢᠯᠡᠷᠬᠡᠶᠢᠯᠡᠭᠰᠡᠨ ᠶᠤᠮ᠃ 12 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠲᠤ ᠤᠷᠢᠳᠠ ᠨᠢ ᠪᠢᠴᠢᠭᠰᠡᠨ ᠮᠢᠨᠢ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠤᠭᠴᠢ ᠶᠢᠨ ᠲᠥᠯᠥᠭᠡ ᠪᠢᠰᠢ᠂ ᠬᠣᠬᠢᠷᠠᠯ ᠠᠮᠰᠠᠭᠴᠢᠳ ᠤᠨ ᠲᠥᠯᠥᠭᠡ ᠴᠤ ᠪᠢᠰᠢ᠂ ᠬᠠᠷᠢᠨ ᠪᠢᠳᠡᠨ ᠦ ᠲᠥᠯᠥᠭᠡ ᠲᠠ ᠨᠠᠷ ᠬᠡᠴᠢᠨᠡᠨ ᠶᠡᠬᠡ ᠵᠢᠳᠬᠦᠵᠦ ᠪᠤᠢ ᠶᠢ ᠪᠤᠷᠬᠠᠨ ᠤ ᠮᠡᠯᠮᠡᠢ ᠶᠢᠨ ᠡᠮᠦᠨᠡ ᠢᠯᠡᠷᠡᠭᠦᠯᠬᠦ ᠶᠢᠨ ᠲᠥᠯᠥᠭᠡ ᠶᠤᠮ᠃ 13 ᠡᠢᠨ ᠬᠦ ᠪᠢᠳᠡ ᠲᠠᠢᠳᠬᠤᠷᠠᠪᠠ᠃
14 ᠪᠢ ᠲᠢᠲ ᠲᠤ ᠲᠠ ᠨᠠᠷ ᠢ ᠮᠠᠭᠲᠠᠭᠰᠠᠨ ᠳᠠᠭᠠᠨ ᠢᠴᠢᠭᠡ ᠦᠭᠡᠢ᠂ ᠲᠠ ᠨᠠᠷ ᠲᠤ ᠬᠡᠯᠡᠭᠰᠡᠨ ᠪᠢᠳᠡᠨ ᠦ ᠦᠭᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠦᠨᠡᠨ ᠪᠠᠢᠭᠰᠠᠨ ᠮᠡᠲᠦ᠂ ᠲᠢᠲ ᠤᠨ ᠡᠮᠦᠨᠡ ᠮᠠᠭᠲᠠᠭᠰᠠᠨ ᠪᠢᠳᠡᠨ ᠦ ᠦᠭᠡ ᠴᠤ ᠦᠨᠡᠨ ᠪᠣᠯᠵᠠᠢ᠃ 15 ᠲᠠ ᠪᠦᠭᠦᠳᠡᠭᠡᠷ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠵᠤ ᠡᠮᠢᠶᠡᠨ ᠴᠡᠴᠡᠷᠡᠨ ᠥᠪᠡᠷ ᠢ ᠨᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠢ ᠲᠢᠲ ᠰᠠᠨᠠᠵᠤ᠂ ᠲᠠ ᠨᠠᠷ ᠲᠤ ᠨᠡᠩ ᠶᠡᠬᠡ ᠬᠠᠢᠷᠠᠲᠠᠢ ᠪᠣᠯᠣᠭᠰᠠᠨ ᠶᠤᠮ᠃ 16 ᠠᠯᠢᠪᠠ ᠵᠦᠢᠯ ᠳᠤ ᠪᠢ ᠲᠠ ᠨᠠᠷ ᠲᠤ ᠢᠲᠡᠭᠡᠯ ᠲᠡᠢ ᠪᠣᠯᠣᠭᠰᠠᠨ ᠳᠠᠭᠠᠨ ᠪᠠᠶᠠᠷᠯᠠᠬᠤ ᠪᠣᠯᠣᠯᠠ᠃