ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠠᠷᠪᠠᠨ ᠭᠤᠷᠪᠠ
ᠰᠠᠨᠠᠭᠤᠯᠭᠠ ᠪᠠ ᠮᠡᠨᠳᠦᠴᠢᠯᠡᠭᠡ
1 ᠪᠢ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠲᠠᠨ ᠤ ᠲᠡᠨᠳᠡ ᠣᠴᠢᠬᠤ ᠭᠡᠵᠦ ᠪᠠᠢᠨᠠ᠃ 《ᠬᠡᠷᠡᠭ ᠪᠣᠯᠭᠠᠨ ᠬᠣᠶᠠᠷ ᠪᠤᠶᠤ ᠭᠤᠷᠪᠠᠨ ᠭᠡᠷᠡᠴᠢ ᠶᠢᠨ ᠠᠮᠠ ᠪᠠᠷ ᠬᠦᠴᠦᠨ ᠲᠡᠢ ᠪᠣᠯᠣᠨᠠ᠃》 2 ᠬᠣᠶᠠᠳᠤᠭᠠᠷ ᠤᠳᠠᠭᠠ ᠳᠡᠷᠭᠡᠳᠡ ᠴᠢᠨᠢ ᠪᠠᠢᠬᠤ ᠳᠠᠭᠠᠨ ᠰᠠᠨᠠᠭᠤᠯᠤᠭᠰᠠᠨ ᠢᠶᠠᠨ ᠡᠳᠦᠭᠡ ᠪᠢ ᠬᠠᠮᠲᠤ ᠪᠠᠢᠬᠤ ᠦᠭᠡᠢ ᠦᠶᠡ ᠳᠡᠭᠡᠨ᠂ ᠥᠩᠭᠡᠷᠡᠭᠰᠡᠨ ᠳᠦ ᠨᠢᠭᠦᠯ ᠦᠢᠯᠡᠳᠦᠭᠰᠡᠳ ᠪᠠ ᠪᠤᠰᠤᠳ ᠬᠥᠮᠦᠰ ᠲᠦ ᠤᠷᠢᠳᠴᠢᠯᠠᠨ ᠰᠠᠨᠠᠭᠤᠯᠵᠤ ᠪᠠᠢᠨᠠ᠄ ᠪᠢ ᠳᠠᠬᠢᠭᠠᠳ ᠣᠴᠢᠪᠠᠯ ᠬᠡᠯᠲᠦᠷᠢᠭᠦᠯᠬᠦ ᠦᠭᠡᠢ ᠰᠢᠦ᠃ 3 ᠤᠴᠢᠷ ᠨᠢ᠂ ᠾᠷᠢᠰᠲ᠋ᠣᠰ ᠤᠨ ᠨᠠᠳᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠶᠠᠷᠢᠳᠠᠭ ᠤᠨ ᠪᠠᠲᠤᠯᠠᠭᠠ ᠶᠢ ᠲᠠ ᠨᠠᠷ ᠡᠷᠢᠵᠦ ᠪᠠᠢᠨᠠ᠃ ᠾᠷᠢᠰᠲ᠋ᠣᠰ ᠲᠠ ᠨᠠᠷ ᠲᠤ ᠰᠤᠯᠠ ᠳᠣᠷᠣᠢ ᠪᠢᠰᠢ᠂ ᠲᠠ ᠨᠠᠷ ᠤᠨ ᠳᠤᠮᠳᠠ ᠬᠦᠴᠦᠲᠡᠢ ᠪᠠᠢᠳᠠᠭ᠃ 4 ᠲᠡᠷᠡ ᠰᠤᠯᠠ ᠳᠣᠷᠣᠢ ᠪᠠᠷ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠪᠤᠷᠬᠠᠨ ᠤ ᠬᠦᠴᠦ ᠪᠡᠷ ᠠᠮᠢᠳᠤ ᠪᠠᠢᠨᠠ᠃ ᠪᠢᠳᠡ ᠪᠠᠰᠠ ᠲᠡᠭᠦᠨ ᠦ ᠳᠣᠲᠣᠷᠠ ᠰᠤᠯᠠ ᠳᠣᠷᠣᠢ ᠪᠣᠯᠪᠠᠴᠤ ᠲᠠ ᠨᠠᠷ ᠲᠤ ᠬᠠᠨᠳᠤᠭᠰᠠᠨ ᠪᠤᠷᠬᠠᠨ ᠤ ᠬᠦᠴᠦ ᠪᠡᠷ ᠠᠮᠢᠳᠤ ᠪᠠᠢᠬᠤ ᠪᠣᠯᠣᠨᠠ᠃
5 ᠲᠠ ᠨᠠᠷ ᠢᠲᠡᠭᠡᠯ ᠳᠣᠲᠣᠷᠠ ᠪᠠᠢᠭᠠ ᠡᠰᠡᠬᠦ ᠪᠡᠨ ᠰᠣᠷᠢᠵᠤ ᠦᠵᠡ᠂ ᠥᠪᠡᠷᠰᠡᠳ ᠢ ᠪᠠᠨ ᠰᠢᠯᠭᠠ᠃ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠲᠠ ᠨᠠᠷ ᠤᠨ ᠳᠤᠮᠳᠠ ᠪᠠᠢᠭᠠ ᠶᠢ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠮᠡᠳᠡᠬᠦ ᠦᠭᠡᠢ ᠪᠣᠯ ᠲᠠ ᠨᠠᠷ ᠲᠡᠩᠴᠡᠭᠡ ᠦᠭᠡᠢ ᠭᠡᠰᠡᠨ ᠦᠭᠡ᠃ 6 ᠬᠠᠷᠢᠨ ᠪᠢᠳᠡ ᠪᠣᠯ ᠲᠡᠩᠴᠡᠭᠡ ᠦᠭᠡᠢ ᠪᠢᠰᠢ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠲᠦᠭᠡᠢ᠃ 7 ᠪᠢᠳᠡ ᠲᠠ ᠨᠠᠷ ᠢ ᠶᠠᠮᠠᠷ ᠴᠤ ᠮᠠᠭᠤ ᠶᠢ ᠪᠦᠦ ᠬᠢᠭᠡᠰᠡᠢ ᠭᠡᠵᠦ ᠪᠤᠷᠬᠠᠨ ᠳᠤ ᠳᠠᠭᠠᠳᠬᠠᠳᠠᠭ᠃ ᠡᠨᠡ ᠨᠢ ᠪᠢᠳᠡ ᠲᠡᠩᠴᠡᠭᠰᠡᠨ ᠢᠶᠡᠨ ᠢᠯᠡᠷᠡᠭᠦᠯᠬᠦ ᠭᠡᠰᠡᠨ ᠳᠡᠭᠡᠨ ᠪᠢᠰᠢ᠂ ᠬᠠᠷᠢᠨ ᠲᠡᠩᠴᠡᠭᠡ ᠦᠭᠡᠢ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠪᠠᠴᠤ ᠲᠠ ᠨᠠᠷ ᠢ ᠰᠠᠢᠨ ᠢ ᠦᠢᠯᠡᠳᠦᠭᠡᠰᠡᠢ ᠭᠡᠰᠡᠨ ᠳᠡᠭᠡᠨ ᠶᠤᠮ᠃ 8 ᠤᠴᠢᠷ ᠨᠢ᠂ ᠪᠢᠳᠡ ᠦᠨᠡᠨ ᠡᠴᠡ ᠡᠰᠡᠷᠭᠦ ᠪᠡᠷ ᠶᠠᠭᠤ ᠴᠤ ᠬᠢᠵᠦ ᠴᠢᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠦᠨᠡᠨ ᠦ ᠲᠥᠯᠥᠭᠡ ᠯᠠ ᠬᠢᠵᠦ ᠴᠢᠳᠠᠨᠠ᠃ 9 ᠪᠢᠳᠡ ᠰᠤᠯᠠ ᠳᠣᠷᠣᠢ ᠪᠠᠢᠪᠠᠴᠤ ᠲᠠ ᠨᠠᠷ ᠢ ᠬᠦᠴᠦᠲᠡᠢ ᠪᠠᠢᠬᠤ ᠳᠤ ᠪᠠᠶᠠᠷᠯᠠᠳᠠᠭ ᠪᠥᠭᠡᠳ ᠲᠠ ᠨᠠᠷ ᠤᠨ ᠲᠡᠭᠦᠰ ᠪᠣᠯᠬᠤ ᠶᠢᠨ ᠲᠥᠯᠥᠭᠡ ᠳᠠᠭᠠᠳᠬᠠᠵᠤ ᠪᠠᠢᠳᠠᠭ᠃ 10 ᠡᠢᠮᠦ ᠡᠴᠡ ᠨᠤᠷᠠᠭᠠᠬᠤ ᠶᠢᠨ ᠲᠤᠯᠠᠳᠠ ᠪᠤᠰᠤ᠂ ᠬᠠᠷᠢᠨ ᠪᠣᠰᠬᠠᠨ ᠪᠠᠢᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠡᠵᠡᠨ ᠦ ᠨᠠᠳᠠ ᠳᠤ ᠰᠣᠶᠣᠷᠬᠠᠭᠰᠠᠨ ᠡᠷᠬᠡ ᠮᠡᠳᠡᠯ ᠢ ᠪᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠳᠠᠭᠠᠨ ᠬᠠᠲᠠᠭᠤ ᠪᠠᠷ ᠬᠡᠷᠡᠭᠯᠡᠬᠦ ᠦᠭᠡᠢ ᠶᠢᠨ ᠲᠥᠯᠥᠭᠡ ᠬᠠᠮᠲᠤ ᠦᠭᠡᠢ ᠦᠶᠡ ᠳᠡᠭᠡᠨ ᠡᠳᠡᠭᠡᠷ ᠢ ᠪᠢᠴᠢᠵᠦ ᠪᠠᠢᠨᠠ᠃
11 ᠨᠡᠮᠡᠵᠦ ᠬᠡᠯᠡᠶᠡ᠂ ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠠᠶᠠᠷᠯᠠᠵᠠᠭᠠ᠂ ᠲᠡᠭᠦᠰ ᠪᠣᠯᠵᠠᠭᠠ᠂ ᠲᠠᠢᠳᠬᠤᠷᠠᠵᠠᠭᠠ 8 ᠂ ᠰᠠᠨᠠᠭᠠ ᠨᠢᠭᠡᠲᠡᠢ ᠪᠠᠢᠵᠠᠭᠠ᠂ ᠲᠠᠢᠪᠤᠩ ᠠᠮᠢᠳᠤᠷᠠᠵᠠᠭᠠ᠂ ᠬᠠᠢᠷᠠ ᠪᠠ ᠠᠮᠤᠭᠤᠯᠠᠩ ᠤᠨ ᠪᠤᠷᠬᠠᠨ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ᠃ 12 ᠲᠠ ᠨᠠᠷ ᠠᠷᠢᠭᠤᠨ ᠦᠨᠦᠰᠦᠯᠲᠡ ᠪᠡᠷ ᠬᠠᠷᠢᠯᠴᠠᠨ ᠮᠡᠨᠳᠦᠴᠢᠯᠡᠭᠡᠷᠡᠢ᠃
13 ᠠᠷᠢᠭᠤᠨ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠠ ᠨᠠᠷ ᠤᠨ ᠠᠮᠤᠷ ᠢ ᠡᠷᠢᠵᠦ ᠪᠠᠢᠨᠠ᠃ 14 ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ᠂ ᠪᠤᠷᠬᠠᠨ ᠤ ᠬᠠᠢᠷᠠ ᠪᠠ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠨᠥᠬᠥᠷᠯᠡᠯ ᠲᠠ ᠪᠦᠬᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ︕