ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠶᠢᠰᠦ
1 ᠠᠷᠢᠭᠤᠨ ᠬᠥᠮᠦᠰ ᠢ ᠲᠡᠳᠬᠦᠬᠦ ᠡᠨᠡ ᠠᠵᠢᠯᠯᠠᠭᠠ ᠶᠢᠨ ᠲᠤᠬᠠᠢ ᠲᠠ ᠨᠠᠷ ᠲᠤ ᠪᠢᠴᠢᠬᠦ ᠨᠢ ᠬᠡᠷᠡᠭ ᠦᠭᠡᠢ ᠪᠠᠢᠬᠠ᠃ 2 ᠪᠢ ᠲᠠ ᠨᠠᠷ ᠤᠨ ᠰᠡᠳᠬᠢᠯ ᠪᠡᠯᠡᠬᠡᠨ ᠭᠡᠳᠡᠭ ᠢ ᠮᠡᠳᠡᠨᠡ᠃ ᠲᠡᠢᠮᠦ ᠡᠴᠡ ᠪᠢ ᠮᠠᠺᠧᠳᠣᠨᠢᠴᠤᠳ ᠲᠤ ᠲᠠ ᠨᠠᠷ ᠢ ᠮᠠᠭᠲᠠᠨ᠄ 《ᠠᠺᠠᠢᠶᠠ ᠳᠤ ᠪᠣᠯ ᠨᠢᠳᠤᠨᠤᠨ ᠨᠢᠭᠡᠨᠲᠡ ᠪᠡᠯᠡᠳᠬᠡᠴᠢᠬᠡᠭᠰᠡᠨ》 ᠭᠡᠰᠡᠨ ᠳᠦ᠂ ᠲᠠ ᠨᠠᠷ ᠤᠨ ᠵᠢᠳᠬᠦᠯ ᠢᠶᠡᠷ ᠣᠯᠠᠩᠬᠢ ᠬᠥᠮᠦᠨ ᠦ ᠰᠡᠳᠬᠢᠯ ᠳᠣᠭᠳᠣᠯᠪᠠ᠃ 3 ᠡᠨᠡ ᠠᠵᠢᠯᠯᠠᠭᠠ ᠳᠡᠭᠡᠷᠡ ᠲᠠ ᠨᠠᠷ ᠢ ᠮᠠᠭᠲᠠᠭᠰᠠᠨ ᠢ ᠮᠢᠨᠢ ᠲᠠ ᠨᠠᠷ ᠦᠯᠦ ᠬᠣᠭᠣᠰᠣᠳᠠᠭᠤᠯᠤᠨ ᠮᠢᠨᠦ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠪᠡᠯᠡᠳᠬᠡᠯᠭᠡᠬᠦ ᠭᠡᠵᠦ ᠪᠢ ᠠᠬᠠ ᠳᠡᠭᠦᠦ ᠨᠠᠷ ᠢᠶᠠᠨ ᠢᠯᠡᠭᠡᠵᠦ ᠪᠠᠢᠨᠠ᠃ 4 ᠬᠡᠷᠪᠡ ᠮᠠᠺᠧᠳᠣᠨᠢᠴᠤᠳ ᠨᠠᠳᠠ ᠲᠠᠢ ᠬᠠᠮᠲᠤ ᠣᠴᠢᠭᠠᠳ ᠲᠠ ᠨᠠᠷ ᠤᠨ ᠪᠡᠯᠡᠳᠬᠡᠯ ᠦᠭᠡᠢ ᠶᠢ ᠣᠯᠵᠤ ᠬᠠᠷᠠᠪᠠᠯ᠂ ᠲᠠ ᠨᠠᠷ ᠪᠠᠢᠲᠤᠭᠠᠢ᠂ ᠪᠢᠳᠡ ᠴᠤ ᠲᠠ ᠨᠠᠷ ᠲᠤ ᠲᠡᠢᠮᠦ ᠢᠲᠡᠭᠡᠯ ᠲᠡᠢ ᠪᠠᠢᠭᠰᠠᠨ ᠠᠴᠠ ᠪᠠᠨ ᠢᠴᠢᠩᠭᠦᠷᠡᠬᠦ ᠪᠣᠯᠣᠨᠠ᠃ 5 ᠲᠡᠢᠮᠦ ᠡᠴᠡ ᠪᠢ ᠲᠡᠳᠡᠭᠡᠷ ᠠᠬᠠ ᠳᠡᠭᠦᠦᠰ ᠢ ᠢᠳᠬᠠᠵᠤ᠂ ᠲᠠᠨ ᠤ ᠲᠡᠨᠳᠡ ᠤᠷᠢᠳᠠᠪᠠᠷ ᠶᠠᠪᠤᠭᠤᠯᠤᠭᠠᠳ ᠲᠠ ᠨᠠᠷ ᠤᠨ ᠠᠮᠠᠯᠠᠭᠰᠠᠨ ᠡᠷᠭᠦᠯ ᠢ ᠪᠡᠯᠡᠳᠬᠡᠯᠭᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠪᠣᠳᠣᠪᠠ᠃ ᠡᠨᠡ ᠨᠢ ᠲᠡᠷᠡ ᠡᠷᠭᠦᠯ ᠢ ᠠᠯᠪᠠᠳᠠᠯᠭᠠ ᠪᠠᠷ ᠪᠤᠰᠤ᠂ ᠬᠠᠷᠢᠨ ᠦᠨᠡᠨ ᠬᠦ ᠡᠷᠭᠦᠯ ᠪᠣᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠶᠤᠮ᠃
ᠥᠭᠯᠢᠭᠡ ᠶᠢᠨ ᠵᠠᠷᠴᠢᠮ ᠪᠠ ᠦᠷᠡ ᠠᠰᠢᠭ
6 ᠲᠣᠪᠴᠢᠯᠠᠨ ᠶᠠᠷᠢᠶᠠ᠃ ᠬᠣᠮᠰᠠᠬᠠᠨ ᠲᠠᠷᠢᠭᠴᠢ ᠨᠢ ᠬᠣᠮᠰᠠᠬᠠᠨ ᠬᠤᠷᠢᠶᠠᠨᠠ᠂ ᠡᠯᠪᠡᠭ ᠲᠠᠷᠢᠭᠴᠢ ᠨᠢ ᠡᠯᠪᠡᠭ ᠬᠤᠷᠢᠶᠠᠨᠠ᠃ 7 ᠬᠥᠮᠦᠨ ᠪᠣᠯᠭᠠᠨ ᠰᠡᠳᠬᠢᠯ ᠳᠡᠭᠡᠨ ᠰᠢᠢᠳᠦᠭᠰᠡᠨ ᠦ ᠳᠠᠭᠠᠤ ᠵᠣᠪᠠᠨᠢᠯ ᠲᠠᠢ ᠪᠠᠷ ᠪᠤᠰᠤ᠂ ᠠᠯᠪᠠᠳᠠᠯᠭᠠ ᠶᠢᠨ ᠪᠤᠰᠤ ᠪᠠᠷ ᠡᠷᠭᠦᠭᠲᠦᠨ᠃ ᠳᠤᠷᠠᠲᠠᠶᠠ ᠡᠷᠭᠦᠭᠴᠢ ᠳᠤ ᠪᠤᠷᠬᠠᠨ ᠬᠠᠢᠷᠠᠲᠠᠢ ᠪᠠᠢᠳᠠᠭ᠃ 8 ᠪᠤᠷᠬᠠᠨ ᠲᠠ ᠨᠠᠷ ᠢ ᠦᠷᠭᠦᠯᠵᠢᠳᠡ ᠪᠦᠬᠦ ᠲᠠᠯᠠ ᠪᠠᠷ ᠳᠦᠭᠦᠷᠡᠩ ᠬᠠᠩ᠋ᠭᠠᠯᠲᠠᠲᠠᠢ ᠪᠠᠢᠯᠭᠠᠵᠤ᠂ ᠲᠠ ᠨᠠᠷ ᠢᠶᠠᠷ ᠵᠦᠢᠯ ᠪᠦᠷᠢ ᠶᠢᠨ ᠰᠠᠢᠨ ᠦᠢᠯᠡ ᠶᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠶᠡᠬᠡ ᠬᠢᠯᠭᠡᠬᠦ ᠶᠢᠨ ᠲᠤᠯᠠᠳᠠ ᠲᠠ ᠨᠠᠷ ᠲᠤ ᠪᠦᠬᠦ ᠢᠪᠡᠭᠡᠯ ᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠶᠡᠬᠡ ᠪᠢᠯᠬᠠᠭᠠᠬᠤ ᠴᠢᠳᠠᠯ ᠲᠠᠢ᠃ 9 ᠡᠨᠡ ᠲᠤᠬᠠᠢ᠄ 《ᠲᠡᠷᠡ ᠲᠦᠭᠡᠭᠡᠵᠦ ᠶᠠᠳᠠᠭᠤᠰ ᠲᠤ ᠥᠭᠭᠥᠭᠰᠡᠨ᠂ ᠵᠥᠪᠲᠦ ᠦᠢᠯᠡᠰ ᠨᠢ ᠮᠥᠩᠬᠡᠳᠡ ᠦᠯᠡᠳᠡᠨᠡ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ᠃ 10 ᠲᠠᠷᠢᠭᠴᠢ ᠳᠤ ᠦᠷᠡ ᠪᠠ ᠬᠣᠭᠣᠯᠠ ᠬᠦᠨᠡᠰᠦ ᠰᠣᠶᠣᠷᠬᠠᠭᠴᠢ ᠨᠢ ᠲᠠ ᠨᠠᠷ ᠲᠤ ᠴᠤ ᠦᠷᠡ ᠰᠣᠶᠣᠷᠬᠠᠵᠤ ᠦᠷᠡᠵᠢᠭᠦᠯᠦᠨ ᠵᠥᠪ ᠦᠨ ᠬᠤᠷᠢᠶᠠᠯᠲᠠ ᠶᠢ ᠴᠢᠨᠢ ᠨᠡᠮᠡᠨᠡ᠃ 11 ᠲᠠ ᠨᠠᠷ ᠪᠦᠬᠦ ᠲᠠᠯᠠ ᠪᠠᠷ ᠪᠠᠶᠠᠵᠢᠵᠤ ᠢᠮᠠᠭᠲᠠ ᠥᠭᠭᠢᠶᠡᠮᠦᠷ ᠢᠶᠡᠷ ᠡᠷᠭᠦᠬᠦ ᠪᠥᠭᠡᠳ ᠥᠭᠭᠢᠶᠡᠮᠦᠷ ᠡᠷᠭᠦᠯ ᠢ ᠴᠢᠨᠢ ᠪᠢᠳᠡᠨ ᠢᠶᠡᠷ ᠳᠠᠮᠵᠢᠨ ᠬᠦᠯᠢᠶᠡᠨ ᠠᠪᠤᠭᠴᠢᠳ ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠬᠤ ᠪᠣᠯᠣᠨᠠ᠃ 12 ᠡᠢᠮᠦᠷᠬᠦ ᠲᠡᠳᠬᠦᠮᠵᠢ ᠶᠢᠨ ᠠᠵᠢᠯᠯᠠᠭᠠ ᠪᠣᠯ ᠠᠷᠢᠭᠤᠨ ᠬᠥᠮᠦᠰ ᠦᠨ ᠬᠡᠷᠡᠭᠴᠡᠭᠡ ᠶᠢ ᠬᠠᠩ᠋ᠭᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠪᠤᠷᠬᠠᠨ ᠳᠤ ᠡᠷᠭᠦᠬᠦ ᠲᠠᠯᠠᠷᠬᠠᠯ ᠢ ᠡᠯᠪᠡᠭᠵᠢᠬᠦᠯᠳᠡᠭ᠌᠃ 13 ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠳᠦ ᠢᠲᠡᠭᠡᠯ ᠲᠡᠢ ᠪᠠᠢᠭᠠ ᠪᠠᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠶᠣᠰᠣᠭᠠᠷ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠵᠤ᠂ ᠲᠡᠳᠡᠨ ᠳᠦ ᠪᠣᠯᠣᠨ ᠪᠦᠬᠦ ᠬᠥᠮᠦᠨ ᠢ ᠥᠭᠭᠢᠶᠡᠮᠦᠷ ᠢᠶᠡᠷ ᠲᠤᠰᠠᠯᠠᠳᠠᠭ ᠢ ᠴᠢᠨᠢ ᠡᠨᠡ ᠠᠵᠢᠯᠯᠠᠭᠠ ᠭᠡᠷᠡᠴᠢᠯᠡᠬᠦ ᠪᠥᠭᠡᠳ ᠬᠥᠮᠦᠰ ᠡᠳᠡᠭᠡᠷ ᠭᠡᠷᠡᠴᠢᠯᠡᠯ ᠢᠶᠡᠷ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠵᠤ᠂ 14 ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠭᠤᠶᠤᠵᠤ᠂ ᠲᠠ ᠨᠠᠷ ᠲᠤ ᠪᠠᠢᠭᠠ ᠪᠤᠷᠬᠠᠨ ᠤ ᠠᠭᠤᠤ ᠶᠡᠬᠡ ᠢᠪᠡᠭᠡᠯ ᠢᠶᠡᠷ ᠲᠠ ᠨᠠᠷ ᠢ ᠮᠥᠷᠥᠭᠡᠳᠬᠦ ᠪᠣᠯᠣᠨᠠ᠃ 15 ᠥᠭᠦᠯᠡᠰᠢ ᠦᠭᠡᠢ ᠰᠣᠶᠣᠷᠬᠠᠯ ᠤᠨ ᠲᠥᠯᠥᠭᠡ ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠶᠠ᠃