ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠨᠠᠢ᠌ᠮᠠ
ᠥᠭᠯᠢᠭᠡᠴᠢᠳ ᠤᠨ ᠦᠯᠢᠭᠡᠷ ᠵᠢᠱᠢᠶᠡ
1 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠮᠠᠺᠧᠳᠣᠨᠢᠶᠠ ᠶᠢᠨ ᠴᠢᠭᠤᠯᠭᠠᠨ ᠨᠤᠭᠤᠳ ᠲᠤ ᠰᠣᠶᠣᠷᠬᠠᠭᠰᠠᠨ ᠪᠤᠷᠬᠠᠨ ᠤ ᠢᠪᠡᠭᠡᠯ ᠢ ᠲᠠ ᠨᠠᠷ ᠲᠤ ᠮᠡᠳᠡᠭᠦᠯᠦᠶᠡ᠃ 2 ᠬᠦᠨᠳᠦ ᠵᠣᠪᠠᠯᠠᠩ ᠤᠨ ᠰᠣᠷᠢᠯᠲᠠ ᠳᠤᠮᠳᠠ ᠲᠡᠳᠡᠨ ᠦ ᠣᠷᠭᠢᠯᠤᠭᠤᠨ ᠪᠠᠶᠠᠰᠤᠯ ᠪᠠ ᠲᠤᠢᠯ ᠤᠨ ᠶᠠᠳᠠᠭᠤᠷᠠᠯ ᠨᠢ ᠨᠡᠮᠡᠭᠳᠡᠭᠡᠳ ᠲᠡᠳᠡᠨ ᠢ ᠡᠯᠪᠡᠭ ᠥᠭᠯᠢᠭᠡᠴᠢ ᠪᠣᠯᠭᠠᠵᠠᠢ᠃ 3 ᠪᠢ ᠭᠡᠷᠡᠴᠢᠯᠡᠶᠡ᠂ ᠲᠡᠳᠡ ᠴᠢᠳᠠᠯ ᠤᠨ ᠢᠶᠠᠨ ᠬᠢᠷᠢ ᠪᠠᠷ᠂ ᠪᠠᠰᠠ ᠴᠢᠳᠠᠯ ᠠᠴᠠ ᠪᠠᠨ ᠢᠯᠡᠭᠦᠦ ᠶᠢ ᠴᠤ ᠰᠠᠢᠨ ᠳᠤᠷᠠ ᠠᠴᠠ ᠪᠠᠨ ᠡᠷᠭᠦᠭᠰᠡᠨ ᠪᠥᠭᠡᠳ 4 ᠠᠷᠢᠭᠤᠨ ᠬᠥᠮᠦᠰ ᠢ ᠲᠡᠳᠬᠦᠬᠦ ᠳᠦ ᠣᠷᠣᠯᠴᠠᠬᠤ ᠣᠨᠴᠠᠭᠠᠢ ᠢᠪᠡᠭᠡᠯ ᠢ ᠪᠢᠳᠡᠨ ᠡᠴᠡ ᠶᠡᠬᠡᠳᠡ ᠬᠢᠴᠢᠶᠡᠩᠭᠦᠢᠯᠡᠨ ᠭᠤᠶᠤᠵᠤ᠂ 5 ᠪᠢᠳᠡᠨ ᠦ ᠬᠦᠰᠡᠯ ᠢ ᠪᠤᠰᠤ᠂ ᠪᠤᠷᠬᠠᠨ ᠤ ᠰᠠᠨᠠᠭᠠ ᠶᠢ ᠳᠠᠭᠠᠵᠤ ᠥᠪᠡᠷᠰᠡᠳ ᠢ ᠪᠠᠨ ᠤᠷᠢᠳᠠᠪᠠᠷ ᠡᠵᠡᠨ ᠳᠦ᠂ ᠳᠠᠷᠠᠭᠠ ᠨᠢ ᠪᠢᠳᠡᠨ ᠳᠦ ᠡᠷᠭᠦᠭᠰᠡᠨ ᠪᠢᠯᠡ᠃ 6 ᠡᠢᠮᠦ ᠡᠴᠡ ᠪᠢᠳᠡ ᠲᠢᠲ ᠢ ᠢᠳᠬᠠᠨ ᠡᠢᠮᠦᠷᠬᠦ ᠢᠪᠡᠭᠡᠯᠲᠦ ᠠᠵᠢᠯᠯᠠᠭᠠ ᠪᠠᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠤᠷᠢᠳᠠᠪᠠᠷ ᠡᠬᠢᠯᠡᠭᠰᠡᠨ ᠶᠣᠰᠣᠭᠠᠷ ᠢᠶᠠᠨ ᠭᠦᠢᠴᠡᠳᠬᠡᠭᠲᠦᠨ ᠭᠡᠪᠡ᠃ 7 ᠲᠠ ᠨᠠᠷ ᠠᠯᠢᠪᠠ ᠶᠠᠪᠤᠳᠠᠯ ᠳᠡᠭᠡᠷᠡ᠂ ᠲᠤᠬᠠᠢᠯᠠᠪᠠᠯ ᠢᠲᠡᠭᠡᠯ᠂ ᠦᠭᠡ ᠶᠠᠷᠢᠶᠠ᠂ ᠮᠡᠳᠡᠯᠭᠡ᠂ ᠠᠯᠢᠪᠠ ᠵᠢᠳᠬᠦᠯ ᠪᠠ ᠪᠢᠳᠡᠨ ᠳᠦ ᠬᠠᠢᠷᠠᠲᠠᠢ ᠪᠠᠷ ᠢᠶᠠᠨ ᠭᠠᠷᠮᠠᠭᠠᠢ ᠪᠠᠢᠳᠠᠭ ᠪᠣᠯᠬᠣᠷ ᠡᠨᠡ ᠢᠪᠡᠭᠡᠯᠲᠦ ᠠᠵᠢᠯᠯᠠᠭᠠᠨ ᠳᠤ ᠴᠤ ᠭᠠᠷᠮᠠᠭᠠᠢᠯᠠᠬᠤ ᠪᠣᠯᠲᠤᠭᠠᠢ᠃
8 ᠪᠢ ᠲᠠ ᠨᠠᠷ ᠲᠤ ᠡᠭᠦᠨ ᠢ ᠲᠤᠰᠢᠶᠠᠵᠤ ᠪᠠᠢᠭᠠ ᠪᠢᠰᠢ᠂ ᠬᠠᠷᠢᠨ ᠲᠠ ᠨᠠᠷ ᠤᠨ ᠬᠠᠢᠷᠠ ᠶᠢᠨ ᠦᠨᠡᠨ ᠡᠰᠡᠬᠦ ᠶᠢ ᠪᠤᠰᠤᠳ ᠤᠨ ᠵᠢᠳᠬᠦᠯ ᠢᠶᠡᠷ ᠯᠠᠪᠯᠠᠬᠤ ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ᠃ 9 ᠤᠴᠢᠷ ᠨᠢ᠂ ᠲᠠ ᠨᠠᠷ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ ᠢ ᠮᠡᠳᠡᠳᠡᠭ᠃ ᠲᠡᠷᠡ ᠪᠠᠶᠠᠨ ᠪᠣᠯᠪᠠᠴᠤ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠶᠠᠳᠠᠭᠤᠷᠠᠭᠰᠠᠨ ᠨᠢ ᠶᠠᠳᠠᠭᠤᠷᠠᠯ ᠢᠶᠠᠷ ᠢᠶᠠᠨ ᠲᠠ ᠨᠠᠷ ᠢ ᠪᠠᠶᠠᠵᠢᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠶᠤᠮ᠃
ᠥᠭᠯᠢᠭᠡ ᠶᠢᠨ ᠵᠣᠷᠢᠯᠭᠠ
10 ᠡᠨᠡ ᠲᠠᠯᠠ ᠪᠠᠷ ᠲᠠ ᠨᠠᠷ ᠲᠤ ᠲᠤᠰᠠ ᠪᠣᠯᠬᠤ ᠰᠠᠨᠠᠯ ᠢᠶᠠᠨ ᠬᠡᠯᠡᠶᠡ᠂ ᠲᠠ ᠨᠠᠷ ᠨᠢᠳᠤᠨᠤᠨ ᠤ ᠪᠤᠰᠤᠳ ᠠᠴᠠ ᠲᠦᠷᠦᠭᠦᠯᠡᠨ ᠡᠷᠡᠮᠡᠯᠵᠡᠵᠦ ᠡᠬᠢᠯᠡᠭᠰᠡᠨ ᠠᠵᠢᠯᠯᠠᠭᠠ ᠪᠠᠨ 11 ᠣᠳᠣ ᠪᠡᠶᠡᠯᠡᠭᠦᠯ᠂ ᠴᠢᠩ ᠰᠡᠳᠬᠢᠯ ᠢᠶᠠᠷ ᠡᠷᠡᠮᠡᠯᠵᠡᠭᠰᠡᠨ ᠶᠣᠰᠣᠭᠠᠷ ᠥᠪᠡᠷ ᠦᠨ ᠪᠠᠢᠭᠠ ᠪᠠᠷ ᠢᠶᠠᠨ ᠪᠡᠶᠡᠯᠡᠭᠦᠯᠦᠭᠲᠦᠨ᠃ 12 ᠥᠪᠡᠷ ᠦᠨ ᠪᠠᠢᠬᠤ ᠦᠭᠡᠢ ᠵᠦᠢᠯ ᠢᠶᠠᠷ ᠪᠤᠰᠤ᠂ ᠬᠠᠷᠢᠨ ᠪᠠᠢᠭᠠ ᠪᠠᠷ ᠢᠶᠠᠨ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠡᠷᠭᠦᠪᠡᠯ ᠲᠠᠭᠠᠯᠠᠯ ᠢ ᠬᠦᠷᠲᠡᠨᠡ᠃ 13 ᠪᠢ ᠪᠤᠰᠤᠳ ᠢ ᠬᠥᠩᠭᠡᠷᠡᠭᠦᠯᠵᠦ ᠲᠠ ᠨᠠᠷ ᠢ ᠬᠦᠨᠳᠦᠷᠡᠭᠦᠯᠬᠦ ᠭᠡᠰᠡᠨ ᠪᠢᠰᠢ᠂ ᠬᠠᠷᠢᠨ ᠲᠡᠩᠴᠡᠭᠦᠯᠬᠦ ᠭᠡᠵᠦ ᠪᠠᠢᠨᠠ᠃ 14 ᠣᠳᠣ ᠲᠠ ᠨᠠᠷ ᠤᠨ ᠢᠯᠡᠭᠦᠳᠡᠯ ᠲᠡᠳᠡ ᠨᠠᠷ ᠤᠨ ᠳᠤᠲᠠᠭᠤ ᠶᠢ ᠨᠥᠬᠥᠬᠦ ᠶᠢᠨ ᠠᠳᠠᠯᠢ ᠲᠡᠳᠡᠨ ᠦ ᠢᠯᠡᠭᠦᠳᠡᠯ ᠴᠤ ᠲᠠ ᠨᠠᠷ ᠤᠨ ᠳᠤᠲᠠᠭᠤ ᠶᠢ ᠨᠥᠬᠥᠨᠡ᠃ 15 ᠡᠨᠡ ᠨᠢ 《ᠠᠷᠪᠢᠨ ᠲᠠᠢ ᠨᠢ ᠢᠯᠡᠭᠦᠳᠡᠭᠰᠡᠨ ᠦᠭᠡᠢ᠂ ᠴᠥᠭᠡᠨ ᠲᠡᠢ ᠨᠢ ᠴᠤ ᠳᠤᠲᠠᠭᠰᠠᠨ ᠦᠭᠡᠢ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠲᠡᠢ ᠠᠳᠠᠯᠢ ᠪᠣᠯᠣᠨᠠ᠃
ᠥᠭᠯᠢᠭᠡ ᠬᠠᠷᠢᠭᠤᠴᠠᠭᠴᠢᠳ
16 ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠨᠠᠳᠠ ᠰᠢᠭ᠋ ᠵᠢᠳᠬᠦᠬᠦ ᠰᠡᠳᠬᠢᠯ ᠢ ᠲᠢᠲ ᠲᠤ ᠰᠣᠶᠣᠷᠬᠠᠭᠰᠠᠨ ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠶᠠ᠃ 17 ᠲᠡᠷᠡ ᠪᠢᠳᠡᠨ ᠦ ᠢᠳᠬᠠᠯ ᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠲᠡᠳᠦᠢ ᠦᠭᠡᠢ᠂ ᠨᠡᠩ ᠢᠯᠡᠭᠦᠦ ᠵᠢᠳᠬᠦᠯ ᠲᠡᠢ ᠪᠠᠷ ᠰᠠᠢᠨ ᠳᠤᠷᠠ ᠠᠴᠠ ᠪᠠᠨ ᠲᠠᠨ ᠤ ᠲᠡᠨᠳᠡ ᠣᠴᠢᠬᠤ ᠪᠣᠯᠣᠯᠠ᠃ 18 ᠪᠢᠳᠡ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠰᠠ ᠨᠢᠭᠡ ᠳᠡᠭᠦᠦ ᠶᠢ ᠢᠯᠡᠭᠡᠵᠦ ᠪᠠᠢᠨᠠ᠃ ᠡᠨᠡ ᠬᠥᠮᠦᠨ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠠᠵᠢᠯ ᠢᠶᠠᠷ ᠬᠠᠮᠤᠭ ᠴᠢᠭᠤᠯᠭᠠᠨ ᠳᠤ ᠰᠠᠢᠰᠢᠶᠠᠭᠳᠠᠭᠰᠠᠨ᠃ 19 ᠡᠭᠦᠨ ᠢᠶᠡᠷ ᠪᠠᠷᠠᠬᠤ ᠦᠭᠡᠢ᠂ ᠴᠢᠭᠤᠯᠭᠠᠨ ᠨᠤᠭᠤᠳ ᠲᠡᠭᠦᠨ ᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠠᠶᠠᠯᠠᠭᠤᠯᠬᠤ ᠪᠠᠷ ᠲᠣᠮᠢᠯᠠᠵᠠᠢ᠃ ᠪᠢᠳᠡ ᠡᠵᠡᠨ ᠢ ᠠᠯᠳᠠᠷᠰᠢᠭᠤᠯᠤᠨ ᠴᠢᠩ ᠰᠡᠳᠬᠢᠯ ᠢᠶᠠᠨ ᠬᠠᠷᠠᠭᠤᠯᠬᠤ ᠶᠢᠨ ᠲᠥᠯᠥᠭᠡ ᠡᠨᠡ ᠢᠪᠡᠭᠡᠯᠲᠦ ᠠᠵᠢᠯᠯᠠᠭᠠ ᠶᠢ ᠬᠠᠷᠢᠭᠤᠴᠠᠳᠠᠭ ᠪᠥᠭᠡᠳ 20 ᠪᠢᠳᠡᠨ ᠦ ᠬᠠᠷᠢᠭᠤᠴᠠᠵᠤ ᠪᠠᠢᠭᠠ ᠡᠯᠪᠡᠭ ᠬᠠᠨᠳᠢᠪ ᠤᠨ ᠤᠯᠠᠮ ᠢᠶᠠᠷ ᠬᠡᠨ ᠳᠦ ᠴᠤ ᠥᠭᠡᠯᠡᠭᠳᠡᠬᠦ ᠦᠭᠡᠢ ᠭᠡᠳ ᠪᠣᠯᠭᠣᠮᠵᠢᠯᠠᠵᠤ ᠪᠠᠢᠳᠠᠭ᠃ 21 ᠦᠨᠡᠨ ᠳᠡᠭᠡᠨ ᠪᠢᠳᠡ ᠡᠵᠡᠨ ᠦ ᠡᠮᠦᠨᠡ ᠲᠡᠳᠦᠢ ᠦᠭᠡᠢ᠂ ᠬᠥᠮᠦᠨ ᠦ ᠡᠮᠦᠨᠡ ᠴᠤ ᠰᠢᠳᠤᠷᠭᠤ ᠪᠠᠢᠬᠤ ᠶᠢ ᠠᠩ᠋ᠬᠠᠷᠳᠠᠭ᠃ 22 ᠪᠢᠳᠡ ᠪᠠᠰᠠ ᠨᠢᠭᠡ ᠳᠡᠭᠦᠦ ᠶᠢ ᠲᠡᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠭᠤᠯᠪᠠ᠃ ᠪᠢᠳᠡ ᠲᠡᠭᠦᠨ ᠦ ᠵᠢᠳᠬᠦᠯᠲᠡᠨ ᠭᠡᠳᠡᠭ ᠢ ᠣᠯᠠᠨ ᠤᠳᠠᠭᠠ ᠣᠯᠠᠨ ᠶᠠᠪᠤᠳᠠᠯ ᠢᠶᠠᠷ ᠰᠢᠯᠭᠠᠭᠠᠳ ᠪᠠᠲᠤᠯᠠᠪᠠ᠃ ᠣᠳᠣ ᠲᠡᠷᠡ ᠲᠠ ᠨᠠᠷ ᠢ ᠢᠲᠡᠭᠡᠭᠡᠳ ᠤᠯᠠᠮ ᠶᠡᠬᠡ ᠵᠢᠳᠬᠦᠯ ᠭᠠᠷᠭᠠᠵᠤ ᠪᠠᠢᠨᠠ᠃ 23 ᠲᠢᠲ ᠪᠣᠯ ᠮᠢᠨᠦ ᠠᠨᠳᠠ ᠪᠥᠭᠡᠳ ᠲᠠ ᠨᠠᠷ ᠲᠤ ᠵᠣᠷᠢᠭᠤᠯᠤᠭᠰᠠᠨ ᠬᠠᠮᠲᠤᠷᠠᠨ ᠠᠵᠢᠯᠯᠠᠭᠴᠢ ᠮᠥᠨ᠃ ᠪᠢᠳᠡᠨ ᠦ ᠠᠬᠠ ᠳᠡᠭᠦᠦ ᠨᠠᠷ ᠪᠣᠯ ᠴᠢᠭᠤᠯᠭᠠᠨ ᠨᠤᠭᠤᠳ ᠤᠨ ᠡᠯᠴᠢ ᠪᠥᠭᠡᠳ ᠾᠷᠢᠰᠲ᠋ᠣᠰ ᠤᠨ ᠠᠯᠳᠠᠷ ᠪᠢᠯᠡ᠃ 24 ᠲᠠ ᠨᠠᠷ ᠤᠨ ᠬᠠᠢᠷᠠ ᠪᠠ ᠪᠢᠳᠡᠨ ᠦ ᠲᠠ ᠨᠠᠷ ᠢ ᠮᠠᠭᠲᠠᠭᠰᠠᠨ ᠤ ᠦᠨᠡᠨ ᠭᠡᠳᠡᠭ ᠢ ᠴᠢᠭᠤᠯᠭᠠᠨ ᠨᠤᠭᠤᠳ ᠤᠨ ᠡᠮᠦᠨᠡ ᠲᠡᠳᠡᠨ ᠳᠦ ᠦᠵᠡᠭᠦᠯᠦᠭᠡᠷᠡᠢ᠃