ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠠᠷᠪᠠ
ᠰᠢᠳᠠᠷ ᠱᠠᠪᠢ ᠶᠢᠨ ᠡᠷᠬᠡ ᠮᠡᠳᠡᠯ
1 ᠲᠠ ᠨᠠᠷ ᠲᠠᠢ ᠨᠢᠭᠤᠷ ᠵᠣᠯᠭᠠᠬᠤ ᠳᠤ ᠵᠣᠷᠢᠭ ᠦᠭᠡᠢ ᠪᠣᠯᠪᠠᠴᠤ ᠳᠠᠯᠳᠠ ᠳᠠᠭᠠᠨ ᠵᠣᠷᠢᠭᠲᠠᠢ ᠪᠠᠢᠳᠠᠭ ᠫᠠᠦ᠋ᠯ ᠪᠢ ᠲᠠ ᠨᠠᠷ ᠢ ᠾᠷᠢᠰᠲ᠋ᠣᠰ ᠤᠨ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠢᠶᠡᠷ ᠢᠳᠬᠠᠶᠠ᠃ 2 ᠪᠢᠳᠡᠨ ᠢ ᠮᠢᠬᠠᠨ ᠪᠡᠶᠡᠲᠦ ᠬᠥᠮᠦᠨ ᠦ ᠪᠠᠨ ᠶᠣᠰᠣᠭᠠᠷ ᠠᠮᠢᠳᠤᠷᠠᠳᠠᠭ ᠭᠡᠵᠦ ᠪᠣᠳᠣᠳᠠᠭ ᠵᠠᠷᠢᠮ ᠬᠥᠮᠦᠰ ᠲᠦ ᠪᠢ ᠵᠣᠷᠢᠭᠲᠠᠢ ᠬᠠᠨᠳᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠬᠠᠷᠢᠨ ᠲᠡᠨᠳᠡ ᠣᠴᠢᠭᠠᠳ ᠲᠡᠢᠮᠦ ᠵᠣᠷᠢᠭ ᠭᠠᠷᠭᠠᠬᠤ ᠴᠢᠬᠤᠯᠠ ᠦᠭᠡᠢ ᠪᠠᠢᠬᠤ ᠶᠢ ᠪᠢ ᠬᠦᠰᠡᠨᠡ᠃ 3 ᠪᠢᠳᠡ ᠦᠨᠡᠨ ᠳᠡᠭᠡᠨ ᠮᠢᠬᠠᠨ ᠪᠡᠶᠡ ᠶᠢᠨ ᠢᠶᠠᠨ ᠳᠣᠲᠣᠷᠠ ᠠᠮᠢᠳᠤᠷᠠᠳᠠᠭ᠂ ᠭᠡᠪᠡᠴᠦ ᠮᠢᠬᠠᠨ ᠪᠡᠶᠡᠲᠦ ᠬᠥᠮᠦᠨ ᠦ ᠪᠠᠨ ᠶᠣᠰᠣᠭᠠᠷ ᠡᠰᠡ ᠲᠡᠮᠡᠴᠡᠳᠡᠭ ᠪᠥᠭᠡᠳ 4 (ᠲᠡᠮᠡᠴᠡᠯ ᠳᠦ ᠠᠰᠢᠭᠯᠠᠳᠠᠭ ᠵᠡᠪᠰᠡᠭ ᠮᠢᠨᠢ ᠮᠢᠬᠠᠨ ᠪᠡᠶᠡᠲᠦ ᠬᠥᠮᠦᠨ ᠦ ᠬᠢ ᠪᠢᠰᠢ᠂ ᠬᠠᠷᠢᠨ ᠪᠡᠬᠢᠯᠡᠯᠲᠡ ᠨᠤᠭᠤᠳ ᠢ ᠨᠤᠷᠠᠭᠠᠬᠤ ᠪᠤᠷᠬᠠᠨ ᠤ ᠬᠦᠴᠦᠲᠦ ᠵᠡᠪᠰᠡᠭ) 5 ᠪᠤᠷᠬᠠᠨ ᠢ ᠮᠡᠳᠡᠬᠦ ᠶᠢ ᠡᠰᠡᠷᠭᠦᠴᠡᠭᠴᠢ ᠦᠵᠡᠯ ᠰᠠᠨᠠᠭᠠ ᠪᠣᠯᠣᠨ ᠠᠯᠢᠪᠠ ᠳᠡᠭᠡᠷᠡᠩᠭᠦᠢ ᠪᠠᠷᠳᠠᠮᠨᠠᠯ ᠢ ᠨᠤᠷᠠᠭᠠᠵᠤ᠂ ᠠᠯᠢᠪᠠ ᠪᠣᠳᠣᠯ ᠰᠠᠨᠠᠭᠠ ᠶᠢ ᠣᠯᠵᠠᠯᠠᠨ ᠾᠷᠢᠰᠲ᠋ᠣᠰ ᠲᠤ ᠵᠠᠬᠢᠷᠤᠭᠤᠯᠳᠠᠭ᠃ 6 ᠲᠠ ᠨᠠᠷ ᠪᠦᠷᠢᠨ ᠵᠠᠬᠢᠷᠤᠭᠳᠠᠬᠤ ᠴᠠᠭ ᠲᠤ ᠪᠢᠳᠡ ᠠᠯᠢᠪᠠ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠶᠠᠪᠤᠳᠠᠯ ᠢ ᠰᠢᠳᠬᠡᠬᠦ ᠳᠦ ᠪᠡᠯᠡᠨ ᠪᠠᠢᠬᠤ ᠪᠣᠯᠣᠨᠠ᠃
7 ᠲᠠ ᠨᠠᠷ ᠭᠠᠳᠠᠨᠠ ᠲᠥᠷᠬᠥ ᠶᠢ ᠯᠠ ᠦᠵᠡᠳᠡᠭ᠂ ᠥᠪᠡᠷ ᠢ ᠪᠠᠨ ᠾᠷᠢᠰᠲ᠋ᠣᠰ ᠤᠨ ᠬᠢ ᠭᠡᠵᠦ ᠢᠲᠡᠭᠡᠭᠴᠢ ᠨᠢ ᠥᠪᠡᠷ ᠢᠶᠡᠨ ᠾᠷᠢᠰᠲ᠋ᠣᠰ ᠤᠨ ᠬᠢ ᠪᠠᠢᠳᠠᠭ ᠲᠠᠢ ᠠᠳᠠᠯᠢ ᠪᠠᠷ ᠪᠢᠳᠡᠨ ᠢ ᠴᠤ ᠲᠡᠷᠡ ᠮᠡᠲᠦ ᠪᠡᠷ ᠳᠠᠬᠢᠨ ᠪᠣᠳᠣᠲᠤᠭᠠᠢ᠃ 8 ᠨᠠᠮᠠᠶᠢ ᠡᠷᠬᠡ ᠮᠡᠳᠡᠯ ᠢᠶᠡᠨ ᠵᠢᠭᠠᠬᠠᠨ ᠬᠡᠲᠦᠷᠬᠡᠢ ᠮᠠᠭᠲᠠᠳᠠᠭ ᠭᠡᠰᠡᠨ ᠴᠤ ᠪᠢ ᠢᠴᠢᠬᠦ ᠦᠭᠡᠢ᠂ ᠤᠴᠢᠷ ᠨᠢ᠂ ᠲᠠ ᠨᠠᠷ ᠢ ᠨᠤᠷᠠᠭᠠᠬᠤ ᠪᠠᠷ ᠪᠢᠰᠢ᠂ ᠬᠠᠷᠢᠨ ᠪᠣᠰᠬᠠᠨ ᠪᠠᠢᠭᠤᠯᠬᠤ ᠭᠡᠵᠦ ᠡᠵᠡᠨ ᠲᠡᠷᠡ ᠡᠷᠬᠡ ᠶᠢ ᠪᠢᠳᠡᠨ ᠳᠦ ᠰᠣᠶᠣᠷᠬᠠᠭᠰᠠᠨ ᠶᠤᠮ᠃ 9 ᠨᠠᠮᠠᠶᠢ ᠵᠠᠬᠢᠳᠠᠯ ᠤᠳ ᠢᠶᠠᠷ ᠢᠶᠠᠨ ᠲᠠ ᠨᠠᠷ ᠢ ᠰᠦᠷᠳᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠪᠦᠦ ᠪᠣᠳᠣ᠃ 10 ᠶᠠᠭᠤ ᠭᠡᠪᠡᠯ᠂ ᠵᠠᠷᠢᠮ ᠨᠢ᠄ 《ᠲᠡᠭᠦᠨ ᠦ ᠵᠠᠬᠢᠳᠠᠯ ᠤᠳ ᠬᠦᠨᠳᠦ ᠪᠥᠭᠡᠳ ᠬᠦᠴᠦᠲᠡᠢ ᠪᠣᠯᠪᠠᠴᠤ ᠠᠭᠤᠯᠵᠠᠭᠠᠳ ᠬᠠᠷᠠᠪᠠᠯ ᠪᠡᠶᠡ ᠨᠢ ᠰᠤᠯᠠ᠂ ᠦᠭᠡ ᠶᠠᠷᠢᠶᠠ ᠨᠢ ᠪᠢᠳᠠᠭᠤ》 ᠭᠡᠵᠦ ᠪᠠᠢᠳᠠᠭ᠃ 11 ᠲᠡᠳᠡᠭᠡᠷ ᠬᠥᠮᠦᠨ ᠡᠭᠦᠨ ᠢ ᠮᠡᠳᠡᠲᠦᠭᠡᠢ᠂ ᠬᠠᠮᠲᠤ ᠪᠠᠢᠬᠤ ᠦᠭᠡᠢ ᠦᠶᠡ ᠳᠡᠭᠡᠨ ᠪᠢᠳᠡᠨ ᠦ ᠵᠠᠬᠢᠳᠠᠯ ᠤᠨ ᠦᠭᠡᠰ ᠶᠠᠮᠠᠷ ᠪᠠᠢᠭᠰᠠᠨ ᠪᠣᠯ᠂ ᠬᠠᠮᠲᠤ ᠪᠠᠢᠬᠤ ᠳᠠᠭᠠᠨ ᠪᠢᠳᠡᠨ ᠦ ᠦᠢᠯᠡᠰ ᠮᠥᠨ ᠲᠡᠭᠦᠨᠴᠢᠯᠡᠨ ᠪᠠᠢᠳᠠᠭ᠃
12 ᠥᠪᠡᠷᠰᠡᠳ ᠢ ᠪᠠᠨ ᠮᠠᠭᠲᠠᠳᠠᠭ ᠵᠠᠷᠢᠮ ᠬᠥᠮᠦᠰ ᠲᠡᠢ ᠥᠪᠡᠷᠰᠡᠳ ᠢ ᠪᠠᠨ ᠲᠡᠩᠴᠡᠭᠦᠯᠬᠦ ᠪᠤᠶᠤ ᠬᠠᠷᠢᠴᠠᠭᠤᠯᠬᠤ ᠵᠣᠷᠢᠭ ᠪᠢᠳᠡᠨ ᠳᠦ ᠪᠠᠢᠬᠤ ᠦᠭᠡᠢ᠃ ᠭᠡᠪᠡᠴᠦ ᠲᠡᠳᠡ ᠪᠣᠯ ᠥᠪᠡᠷᠰᠡᠳ ᠢ ᠪᠠᠨ ᠥᠪᠡᠷᠰᠡᠳ ᠢᠶᠡᠷ ᠢᠶᠠᠨ ᠬᠡᠮᠵᠢᠵᠦ᠂ ᠥᠪᠡᠷᠰᠡᠳ ᠢ ᠪᠠᠨ ᠥᠪᠡᠷᠰᠡᠳ ᠢᠶᠡᠷ ᠢᠶᠠᠨ ᠬᠠᠷᠢᠴᠠᠭᠤᠯᠳᠠᠭ ᠪᠣᠯᠬᠣᠷ ᠤᠬᠠᠭᠠᠨ ᠦᠭᠡᠢ ᠪᠠᠢᠨᠠ᠃ 13 ᠪᠢᠳᠡ ᠬᠡᠮᠵᠢᠶᠡᠨ ᠡᠴᠡ ᠪᠡᠨ ᠬᠡᠲᠦᠷᠬᠡᠢ ᠰᠠᠢᠷᠬᠠᠬᠤ ᠦᠭᠡᠢ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠪᠢᠳᠡᠨ ᠳᠦ ᠬᠦᠷᠲᠡᠭᠡᠭᠰᠡᠨ ᠲᠠ ᠨᠠᠷ ᠲᠤ ᠴᠤ ᠬᠦᠷᠬᠦ ᠬᠡᠮᠵᠢᠶᠡᠨ ᠦ ᠳᠣᠲᠣᠷᠠ ᠰᠠᠢᠷᠠᠬᠠᠶᠠ᠃ 14 ᠪᠢᠳᠡ ᠬᠡᠮᠵᠢᠶᠡᠨ ᠡᠴᠡ ᠪᠡᠨ ᠬᠡᠲᠦᠷᠡᠨ ᠲᠠᠨ ᠤ ᠲᠡᠨᠳᠡ ᠬᠦᠷᠦᠭᠰᠡᠨ ᠪᠢᠰᠢ᠂ ᠦᠨᠡᠨ ᠳᠡᠭᠡᠨ ᠲᠠᠨ ᠤ ᠲᠡᠨᠳᠡ ᠾᠷᠢᠰᠲ᠋ᠣᠰ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠠᠩᠬᠠ ᠬᠦᠷᠭᠡᠭᠰᠡᠨ ᠨᠢ ᠪᠢᠳᠡ ᠪᠢᠯᠡ᠃ 15 ᠪᠢᠳᠡ ᠬᠡᠮᠵᠢᠶᠡᠨ ᠡᠴᠡ ᠪᠡᠨ ᠴᠠᠰᠢ ᠪᠤᠰᠤᠳ ᠤᠨ ᠦᠢᠯᠡ ᠠᠵᠢᠯ ᠢᠶᠠᠷ ᠰᠠᠢᠷᠬᠠᠳᠠᠭ ᠦᠭᠡᠢ᠃ ᠲᠠ ᠨᠠᠷ ᠤᠨ ᠢᠲᠡᠭᠡᠯ ᠥᠰᠬᠦ ᠶᠢᠨ ᠳᠠᠭᠠᠤ ᠪᠢᠳᠡᠨ ᠦ ᠠᠵᠢᠯᠯᠠᠭᠠ ᠴᠤ ᠲᠠ ᠨᠠᠷ ᠤᠨ ᠳᠤᠮᠳᠠ ᠬᠡᠮᠵᠢᠶᠡ ᠬᠢᠵᠠᠭᠠᠷ ᠤᠨ ᠢᠶᠠᠨ ᠳᠣᠲᠣᠷᠠ ᠨᠡᠩ ᠢᠯᠡᠭᠦᠦ ᠲᠡᠯᠡᠵᠦ ᠪᠤᠢ᠂ 16 ᠪᠢᠳᠡ ᠲᠠᠨ ᠤ ᠲᠡᠨᠳᠡ ᠡᠴᠡ ᠴᠠᠰᠢ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠭᠡᠷᠡᠭᠦᠯᠬᠦ ᠶᠢ ᠡᠷᠡᠮᠡᠯᠵᠡᠵᠦ ᠪᠠᠢᠨᠠ᠃ ᠪᠤᠰᠤᠳ ᠤᠨ ᠬᠢᠵᠠᠭᠠᠷ ᠤᠨ ᠳᠣᠲᠣᠷᠠ ᠪᠡᠯᠡᠬᠡᠨ ᠪᠣᠯᠣᠭᠰᠠᠨ ᠵᠦᠢᠯᠡᠰ ᠢᠶᠡᠷ ᠰᠠᠢᠷᠬᠠᠬᠤ ᠦᠭᠡᠢ ᠶᠤᠮ᠃ 17 ᠭᠡᠪᠡᠴᠦ 《ᠰᠠᠢᠷᠬᠠᠭᠴᠢ ᠨᠢ ᠡᠵᠡᠨ ᠦ ᠳᠣᠲᠣᠷᠠ ᠰᠠᠢᠷᠬᠠᠭ᠃》 18 ᠶᠠᠭᠤ ᠭᠡᠪᠡᠯ᠂ ᠮᠠᠭᠲᠠᠭᠳᠠᠭᠴᠢ ᠨᠢ ᠪᠡᠶᠡ ᠪᠡᠨ ᠡᠷᠭᠦᠮᠵᠢᠯᠡᠳᠡᠭ᠌ ᠨᠢ ᠪᠢᠰᠢ᠂ ᠬᠠᠷᠢᠨ ᠡᠵᠡᠨ ᠳᠦ ᠡᠷᠭᠦᠮᠵᠢᠯᠡᠭᠳᠡᠳᠡᠭ᠌ ᠨᠢ ᠪᠢᠯᠡ᠃