ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠳᠥᠷᠪᠡ
ᠠᠯᠳᠠᠷ ᠰᠤᠤ ᠪᠠ ᠳᠠᠷᠤᠤ ᠦᠢᠯᠡᠴᠢᠯᠡᠯ
1 ᠲᠡᠢᠮᠦ ᠡᠴᠡ ᠪᠢᠳᠡ ᠡᠨᠡᠷᠢᠭᠳᠡᠵᠦ ᠡᠨᠡ ᠲᠤᠰᠢᠶᠠᠯ ᠢ ᠠᠪᠤᠭᠰᠠᠨ ᠲᠤᠯᠠ ᠰᠢᠨᠲᠠᠷᠠᠬᠤ ᠦᠭᠡᠢ᠃ 2 ᠪᠢᠳᠡ ᠢᠴᠢᠭᠦᠷᠢᠲᠡᠢ ᠨᠢᠭᠤᠭᠳᠠᠮᠠᠯ ᠵᠦᠢᠯ ᠤᠳ ᠢᠶᠠᠨ ᠬᠠᠶᠠᠭᠰᠠᠨ᠂ ᠪᠢᠳᠡ ᠵᠠᠯᠢ ᠮᠡᠬᠡ ᠭᠠᠷᠭᠠᠳᠠᠭ ᠦᠭᠡᠢ᠂ ᠪᠤᠷᠬᠠᠨ ᠤ ᠦᠭᠡ ᠶᠢ ᠭᠠᠵᠢᠭᠤᠳᠠᠭᠤᠯᠳᠠᠭ ᠦᠭᠡᠢ᠂ ᠬᠠᠷᠢᠨ ᠦᠨᠡᠨ ᠢ ᠢᠯᠡᠷᠡᠭᠦᠯᠦᠨ ᠪᠤᠷᠬᠠᠨ ᠤ ᠬᠠᠷᠠᠭᠠᠨ ᠳᠤ᠂ ᠪᠠᠰᠠ ᠪᠦᠬᠦ ᠬᠥᠮᠦᠨ ᠦ ᠮᠥᠰᠥ ᠴᠢᠨᠠᠷ ᠤᠨ ᠡᠮᠦᠨᠡ ᠥᠪᠡᠷᠰᠡᠳ ᠢ ᠪᠠᠨ ᠬᠠᠷᠠᠭᠤᠯᠳᠠᠭ᠃ 3 ᠬᠡᠷᠪᠡ ᠪᠢᠳᠡᠨ ᠦ ᠪᠠᠶᠠᠷ ᠤᠨ ᠮᠡᠳᠡᠭᠡ ᠪᠦᠲᠡᠭᠡᠭᠳᠡᠭᠰᠡᠨ ᠭᠡᠪᠡᠯ ᠮᠥᠬᠥᠵᠦ ᠪᠠᠢᠭᠰᠠᠳ ᠲᠤ ᠪᠦᠲᠡᠭᠡᠭᠳᠡᠭᠰᠡᠨ ᠶᠤᠮ᠃ 4 ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠡᠵᠡᠨ 2 ᠦᠯᠦ ᠢᠲᠡᠭᠡᠭᠴᠢᠳ ᠤᠨ ᠰᠠᠨᠠᠭᠠ ᠶᠢ ᠪᠢᠲᠡᠭᠦᠯᠦᠭᠰᠡᠨ ᠤᠴᠢᠷ ᠠᠴᠠ ᠾᠷᠢᠰᠲ᠋ᠣᠰ ᠤᠨ ᠵᠢᠪᠬᠤᠯᠠᠩᠲᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢᠨ ᠭᠡᠷᠡᠯ ᠲᠡᠳᠡᠨ ᠳᠦ ᠲᠤᠰᠬᠤ ᠦᠭᠡᠢ ᠪᠣᠯᠣᠯᠠ᠃ ᠾᠷᠢᠰᠲ᠋ᠣᠰ ᠪᠣᠯ ᠪᠤᠷᠬᠠᠨ ᠤ ᠳᠦᠷᠢ ᠲᠥᠷᠬᠥ ᠮᠥᠨ᠃ 5 ᠪᠢᠳᠡ ᠥᠪᠡᠷᠰᠡᠳ ᠢ ᠪᠠᠨ ᠲᠤᠩ᠋ᠬᠠᠭᠯᠠᠳᠠᠭ ᠪᠤᠰᠤ᠂ ᠬᠠᠷᠢᠨ ᠡᠵᠡᠨ ᠾᠷᠢᠰᠲ᠋ᠣᠰ ᠢᠰᠦ᠋ᠰ᠂ ᠮᠥᠨ ᠢᠰᠦ᠋ᠰ ᠤᠨ ᠤᠯᠠᠮ ᠢᠶᠠᠷ ᠲᠠ ᠨᠠᠷ ᠤᠨ ᠵᠠᠷᠤᠴᠠ ᠪᠣᠯᠣᠭᠰᠠᠨ ᠥᠪᠡᠷᠰᠡᠳ ᠢ ᠪᠠᠨ ᠲᠤᠩ᠋ᠬᠠᠭᠯᠠᠳᠠᠭ ᠶᠤᠮ᠃ 6 《ᠬᠠᠷᠠᠩ᠋ᠭᠤᠢ ᠳᠤ ᠭᠡᠷᠡᠯ ᠭᠡᠷᠡᠯᠲᠦᠲᠦᠭᠡᠢ》 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠪᠤᠷᠬᠠᠨ ᠪᠢᠳᠡᠨ ᠦ ᠰᠡᠳᠬᠢᠯ ᠢ ᠭᠡᠷᠡᠯᠲᠦᠭᠦᠯᠵᠦ᠂ ᠾᠷᠢᠰᠲ᠋ᠣᠰ ᠤᠨ ᠨᠢᠭᠤᠷ ᠳᠡᠭᠡᠷᠡᠬᠢ ᠪᠤᠷᠬᠠᠨ ᠤ ᠰᠦᠷ ᠵᠢᠪᠬᠤᠯᠠᠩ ᠤᠨ ᠮᠡᠳᠡᠯᠭᠡ ᠶᠢᠨ ᠲᠤᠶᠠᠭᠠ ᠶᠢ ᠰᠣᠶᠣᠷᠬᠠᠵᠠᠢ᠃
7 ᠪᠢᠳᠡᠨ ᠦ ᠰᠢᠪᠠᠷ ᠰᠠᠪᠠ ᠳᠣᠲᠣᠷᠠ ᠡᠷᠳᠡᠨᠢ ᠪᠠᠢᠨᠠ᠃ ᠡᠨᠡ ᠨᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠶᠡᠬᠡ ᠴᠢᠳᠠᠯ ᠪᠣᠯ ᠪᠢᠳᠡᠨ ᠦ ᠬᠢ ᠪᠢᠰᠢ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠬᠢ ᠭᠡᠳᠡᠭ ᠢ ᠢᠯᠡᠷᠬᠡᠶᠢᠯᠡᠳᠡᠭ᠌ ᠶᠤᠮ᠃ 8 ᠪᠢᠳᠡ ᠲᠠᠯᠠ ᠪᠦᠷᠢ ᠡᠴᠡ ᠪᠡᠨ ᠳᠠᠷᠤᠯᠠᠭᠳᠠᠪᠠᠴᠤ ᠨᠢᠴᠠᠷᠠᠳᠠᠭ ᠦᠭᠡᠢ᠂ ᠭᠠᠴᠢᠭᠳᠠᠪᠠᠴᠤ ᠴᠥᠬᠥᠷᠡᠳᠡᠭ ᠦᠭᠡᠢ᠂ 9 ᠬᠠᠪᠴᠢᠭᠳᠠᠪᠠᠴᠤ ᠬᠠᠶᠠᠭᠳᠠᠳᠠᠭ ᠦᠭᠡᠢ᠂ ᠤᠨᠠᠪᠠᠴᠤ ᠤᠰᠠᠳᠬᠠᠭᠳᠠᠳᠠᠭ ᠦᠭᠡᠢ᠂ 10 ᠬᠠᠷᠢᠨ ᠦᠷᠭᠦᠯᠵᠢ ᠢᠰᠦ᠋ᠰ ᠤᠨ ᠦᠬᠦᠯ ᠢ ᠪᠡᠶᠡ ᠳᠡᠭᠡᠨ ᠡᠭᠦᠷᠴᠦ᠂ ᠢᠰᠦ᠋ᠰ ᠤᠨ ᠠᠮᠢ ᠶᠢ ᠪᠡᠶᠡ ᠳᠡᠭᠡᠷᠡ ᠪᠡᠨ ᠢᠯᠡᠷᠡᠭᠦᠯᠬᠦ ᠭᠡᠵᠦ ᠪᠠᠢᠳᠠᠭ᠃ 11 ᠪᠢᠳᠡ ᠠᠮᠢᠳᠤ ᠪᠠᠢᠪᠠᠴᠤ ᠢᠰᠦ᠋ᠰ ᠤᠨ ᠤᠯᠠᠮ ᠢᠶᠠᠷ ᠦᠷᠭᠦᠯᠵᠢ ᠦᠬᠦᠯ ᠳᠦ ᠲᠤᠰᠢᠶᠠᠭᠳᠠᠳᠠᠭ᠃ ᠡᠢᠮᠦ ᠡᠴᠡ ᠢᠰᠦ᠋ᠰ ᠤᠨ ᠠᠮᠢ ᠴᠤ ᠪᠢᠳᠡᠨ ᠦ ᠦᠬᠦᠬᠦ ᠮᠢᠬᠠᠨ ᠪᠡᠶᠡ ᠳᠡᠭᠡᠷᠡ ᠢᠯᠡᠷᠡᠭᠦᠯᠦᠭᠳᠡᠬᠦ ᠪᠣᠯᠣᠨᠠ᠃ 12 ᠡᠢᠨ ᠬᠦ ᠦᠬᠦᠯ ᠨᠢ ᠪᠢᠳᠡᠨ ᠦ ᠳᠣᠲᠣᠷᠠ᠂ ᠠᠮᠢ ᠨᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠠᠵᠢᠯᠯᠠᠵᠤ ᠪᠠᠢᠨᠠ᠃
13 《ᠪᠢ ᠢᠲᠡᠭᠡᠳᠡᠭ ᠪᠣᠯᠬᠣᠷ ᠶᠠᠷᠢᠳᠠᠭ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠲᠡᠢ ᠠᠳᠠᠯᠢ᠂ ᠢᠲᠡᠭᠡᠯ ᠦᠨ ᠬᠤᠪᠢ ᠳᠤ ᠠᠳᠠᠯᠢᠬᠠᠨ ᠰᠦᠨᠡᠰᠦ ᠲᠠᠢ ᠪᠢᠳᠡ ᠴᠤ ᠢᠲᠡᠭᠡᠳᠡᠭ ᠪᠣᠯᠬᠣᠷ ᠶᠠᠷᠢᠳᠠᠭ ᠶᠤᠮ᠃ 14 ᠤᠴᠢᠷ ᠨᠢ᠂ ᠡᠵᠡᠨ ᠢᠰᠦ᠋ᠰ ᠢ ᠠᠮᠢᠯᠠᠭᠤᠯᠤᠭᠰᠠᠨ ᠨᠢᠭᠡᠨ ᠨᠢ ᠪᠢᠳᠡᠨ ᠢ ᠴᠤ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠠᠮᠢᠯᠠᠭᠤᠯᠵᠤ ᠲᠠ ᠨᠠᠷ ᠤᠨ ᠬᠠᠮᠲᠤ ᠬᠠᠵᠠᠭᠤ ᠳᠠᠭᠠᠨ ᠪᠠᠢᠯᠭᠠᠬᠤ ᠶᠢ ᠪᠢᠳᠡ ᠮᠡᠳᠡᠨᠡ᠃ 15 ᠡᠨᠡ ᠪᠦᠬᠦᠨ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠪᠢᠯᠡ᠃ ᠡᠢᠮᠦ ᠡᠴᠡ ᠢᠪᠡᠭᠡᠯ ᠨᠢ ᠨᠡᠩ ᠣᠯᠠᠨ ᠬᠥᠮᠦᠨ ᠳᠦ ᠳᠡᠯᠭᠡᠷᠡᠨ᠂ ᠲᠠᠯᠠᠷᠬᠠᠯ ᠢᠶᠠᠷ ᠳᠦᠭᠦᠷᠴᠦ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠬᠤ ᠪᠣᠯᠲᠤᠭᠠᠢ᠃
ᠮᠥᠩᠬᠡ ᠶᠢᠨ ᠭᠡᠷᠡ
16 ᠡᠢᠮᠦ ᠡᠴᠡ ᠪᠢᠳᠡ ᠰᠢᠨᠲᠠᠷᠠᠬᠤ ᠦᠭᠡᠢ᠂ ᠪᠢᠳᠡᠨ ᠦ ᠭᠠᠳᠠᠨᠠ ᠪᠠᠢᠳᠠᠯ ᠮᠠᠭᠤᠳᠠᠵᠤ ᠪᠠᠢᠨᠠ᠂ ᠬᠠᠷᠢᠨ ᠪᠢᠳᠡᠨ ᠦ ᠳᠣᠲᠣᠷᠠ ᠪᠠᠢᠳᠠᠯ ᠡᠳᠦᠷ ᠡᠴᠡ ᠡᠳᠦᠷ ᠰᠢᠨᠡᠴᠢᠯᠡᠭᠳᠡᠵᠦ ᠪᠠᠢᠨᠠ᠃ 17 ᠤᠴᠢᠷ ᠨᠢ᠂ ᠪᠢᠳᠡᠨ ᠦ ᠲᠦᠷ ᠵᠠᠭᠤᠷᠠ ᠶᠢᠨ ᠶᠠᠯᠢᠭᠦᠢ ᠵᠣᠪᠠᠯᠠᠩ ᠨᠢ ᠬᠢᠵᠠᠭᠠᠷ ᠦᠭᠡᠢ ᠶᠡᠬᠡ ᠮᠥᠩᠬᠡ ᠶᠢᠨ ᠠᠯᠳᠠᠷ ᠰᠤᠤ ᠶᠢ ᠪᠢᠳᠡᠨ ᠦ ᠳᠣᠲᠣᠷᠠ ᠪᠡᠶᠡᠯᠡᠭᠦᠯᠵᠦ ᠪᠠᠢᠭᠠ ᠶᠤᠮ᠃ 18 ᠲᠡᠢᠮᠦ ᠡᠴᠡ ᠪᠢᠳᠡ ᠬᠠᠷᠠᠭᠳᠠᠳᠠᠭ ᠵᠦᠢᠯᠡᠰ ᠢ ᠪᠤᠰᠤ᠂ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠵᠦᠢᠯᠡᠰ ᠢ ᠠᠩ᠋ᠬᠠᠷᠳᠠᠭ᠃ ᠶᠠᠭᠤ ᠭᠡᠪᠡᠯ᠂ ᠬᠠᠷᠠᠭᠳᠠᠳᠠᠭ ᠵᠦᠢᠯᠡᠰ ᠨᠢ ᠲᠦᠷ ᠵᠠᠭᠤᠷᠠ ᠶᠢᠨ ᠬᠢ᠂ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠵᠦᠢᠯᠡᠰ ᠨᠢ ᠡᠭᠦᠷᠢᠳᠡ ᠶᠢᠨ ᠬᠢ ᠪᠢᠯᠡ᠃