ᠬᠣᠶᠠᠳᠤᠭᠠᠷ ᠺᠣᠷᠢᠨᠲ ᠠᠷᠪᠠᠨ ᠬᠣᠶᠠᠷ
ᠡᠵᠡᠨ ᠦ ᠦᠵᠡᠭᠳᠡᠯ ᠪᠠ ᠢᠯᠡᠷᠬᠡᠶᠢᠯᠡᠯᠭᠡ
1 ᠲᠤᠰᠠ ᠦᠭᠡᠢ ᠪᠣᠯᠪᠠᠴᠤ ᠰᠠᠢᠷᠬᠠᠬᠤ ᠠᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠨᠠ᠂ ᠣᠳᠣ ᠪᠢ ᠡᠵᠡᠨ ᠦ ᠦᠵᠡᠭᠳᠡᠯ ᠪᠠ ᠢᠯᠡᠷᠬᠡᠶᠢᠯᠡᠯᠭᠡ ᠶᠢᠨ ᠲᠤᠬᠠᠢ ᠬᠡᠯᠡᠶᠡ᠃ 2 ᠪᠢ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠᠬᠢ ᠨᠢᠭᠡ ᠬᠥᠮᠦᠨ ᠢ ᠲᠠᠨᠢᠨᠠ᠂ ᠲᠡᠷᠡ ᠠᠷᠪᠠᠨ ᠳᠥᠷᠪᠡᠨ ᠵᠢᠯ ᠤᠨ ᠡᠮᠦᠨᠡ ᠭᠤᠷᠪᠠᠳᠤᠭᠠᠷ ᠲᠩᠷᠢ ᠳᠤ ᠠᠪᠠᠴᠢᠭᠳᠠᠭᠰᠠᠨ᠃ (ᠲᠡᠭᠡᠬᠦ ᠳᠦ ᠲᠡᠷᠡ ᠪᠡᠶᠡ ᠶᠢᠨ ᠢᠶᠠᠨ ᠳᠣᠲᠣᠷᠠ ᠪᠤᠶᠤ ᠭᠠᠳᠠᠨᠠ ᠪᠠᠢᠭᠰᠠᠨ ᠢ ᠨᠢ ᠪᠢ ᠮᠡᠳᠡᠬᠦ ᠦᠭᠡᠢ᠂ ᠪᠤᠷᠬᠠᠨ ᠮᠡᠳᠡᠨᠡ᠃) 3 ᠡᠨᠡ ᠬᠥᠮᠦᠨ ᠳ᠋ᠧᠪᠠᠵᠠᠨ ᠳᠤ ᠠᠪᠠᠴᠢᠭᠳᠠᠵᠤ (ᠲᠡᠭᠡᠬᠦ ᠳᠦ ᠲᠡᠷᠡ ᠪᠡᠶᠡ ᠶᠢᠨ ᠢᠶᠠᠨ ᠳᠣᠲᠣᠷᠠ ᠪᠤᠶᠤ ᠭᠠᠳᠠᠨᠠ ᠪᠠᠢᠭᠰᠠᠨ ᠢ ᠨᠢ ᠪᠢ ᠮᠡᠳᠡᠬᠦ ᠦᠭᠡᠢ᠂ ᠪᠤᠷᠬᠠᠨ ᠮᠡᠳᠡᠨᠡ)᠂ 4 ᠬᠥᠮᠦᠨ ᠦ ᠶᠠᠷᠢᠵᠤ ᠪᠣᠯᠣᠰᠢ ᠦᠭᠡᠢ᠂ ᠥᠭᠦᠯᠡᠰᠢ ᠦᠭᠡᠢ ᠦᠭᠡᠰ ᠢ ᠰᠣᠨᠣᠰᠣᠭᠰᠠᠨ ᠢ ᠪᠢ ᠮᠡᠳᠡᠨᠡ᠃ 5 ᠪᠢ ᠡᠢᠮᠦ ᠬᠥᠮᠦᠨ ᠦ ᠡᠮᠦᠨᠡ ᠡᠴᠡ ᠰᠠᠢᠷᠬᠠᠶᠠ᠃ ᠬᠠᠷᠢᠨ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠡᠴᠡ ᠭᠡᠪᠡᠯ ᠳᠣᠷᠣᠢ ᠠᠴᠠ ᠪᠠᠨ ᠣᠨᠳᠣᠣ ᠪᠠᠷ ᠰᠠᠢᠷᠬᠠᠬᠤ ᠦᠭᠡᠢ᠂ 6 ᠰᠠᠢᠷᠬᠠᠵᠤ ᠪᠤᠢ ᠮᠢᠨᠢ ᠴᠤ ᠦᠨᠡᠨ ᠢ ᠬᠡᠯᠡᠵᠦ ᠪᠠᠢᠭᠠ ᠲᠤᠯᠠ ᠮᠤᠩ᠋ᠬᠠᠭᠯᠠᠯ ᠪᠢᠰᠢ ᠶᠤᠮ᠃ ᠭᠡᠪᠡᠴᠦ ᠬᠥᠮᠦᠨ ᠨᠠᠮᠠ ᠶᠢ ᠮᠢᠨᠦ ᠪᠡᠶᠡ ᠳᠡᠭᠡᠷᠡ ᠡᠴᠡ ᠦᠵᠡᠭᠰᠡᠨ ᠰᠣᠨᠣᠰᠣᠭᠰᠠᠨ ᠠᠴᠠ ᠪᠠᠨ ᠢᠯᠡᠭᠦᠦ ᠪᠡᠷ ᠦᠨᠡᠯᠡᠬᠦ ᠪᠣᠯᠣᠭᠤᠵᠠᠢ ᠬᠡᠮᠡᠨ ᠪᠢ ᠰᠠᠢᠷᠬᠠᠬᠤ ᠪᠠᠨ ᠪᠣᠯᠢᠶᠠ᠃ 7 ᠦᠯᠡᠮᠵᠢ ᠶᠡᠬᠡ ᠢᠯᠡᠷᠬᠡᠶᠢᠯᠡᠯᠭᠡ ᠨᠦᠭᠦᠳ ᠡᠴᠡ ᠪᠣᠯᠵᠤ᠂ ᠶᠡᠬᠡᠷᠬᠡᠬᠦ ᠪᠣᠯᠣᠭᠤᠵᠠᠢ ᠭᠡᠵᠦ ᠮᠢᠬᠠᠨ ᠪᠡᠶᠡ ᠶᠢᠨ ᠥᠷᠭᠡᠰᠦ᠂ ᠲᠤᠬᠠᠢᠯᠠᠪᠠᠯ ᠶᠡᠬᠡᠷᠬᠡᠭᠯᠡᠭᠦᠯᠬᠦ ᠦᠭᠡᠢ ᠶᠢᠨ ᠲᠤᠯᠠᠳᠠ ᠨᠠᠮᠠᠶᠢ ᠴᠣᠬᠢᠳᠠᠭ ᠰᠠᠲ᠋ᠠᠨ ᠤ ᠡᠯᠴᠢ ᠨᠠᠳᠠ ᠳᠤ ᠰᠣᠶᠣᠷᠬᠠᠭᠳᠠᠵᠠᠢ᠃ 8 ᠲᠡᠭᠦᠨ ᠢ ᠨᠠᠳᠠ ᠠᠴᠠ ᠰᠠᠯᠭᠠᠭᠠᠴᠢ ᠭᠡᠵᠦ ᠪᠢ ᠡᠵᠡᠨ ᠡᠴᠡ ᠭᠤᠷᠪᠠᠨᠲᠠ ᠭᠤᠶᠤᠭᠰᠠᠨ ᠳᠤ᠂ 9 ᠡᠵᠡᠨ᠄ 《ᠬᠠᠢᠷᠠ ᠢᠪᠡᠭᠡᠯ ᠮᠢᠨᠢ ᠴᠢᠮᠠ ᠳᠤ ᠬᠠᠩ᠋ᠭᠠᠯᠲᠠᠲᠠᠢ᠂ ᠮᠢᠨᠦ ᠬᠦᠴᠦ ᠪᠣᠯ ᠳᠣᠷᠣᠢ ᠳᠤ ᠲᠡᠭᠦᠯᠳᠡᠷᠵᠢᠳᠡᠭ᠌》 ᠭᠡᠵᠦ ᠠᠢᠯᠠᠳᠪᠠ᠃ ᠢᠩᠭᠢᠭᠡᠳ ᠪᠢ ᠾᠷᠢᠰᠲ᠋ᠣᠰ ᠤᠨ ᠬᠦᠴᠦ ᠶᠢ ᠪᠡᠶᠡ ᠳᠡᠭᠡᠨ ᠣᠷᠣᠩᠨᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠲᠤᠢᠯ ᠤᠨ ᠪᠠᠶᠠᠷ ᠲᠠᠢ ᠪᠠᠷ ᠳᠣᠷᠣᠢ ᠪᠠᠷ ᠢᠶᠠᠨ ᠰᠠᠢᠷᠬᠠᠨᠠ᠃ 10 ᠲᠡᠢᠮᠦ ᠡᠴᠡ ᠪᠢ ᠾᠷᠢᠰᠲ᠋ᠣᠰ ᠤᠨ ᠲᠥᠯᠥᠭᠡ ᠳᠣᠷᠣᠢ ᠪᠠᠢᠳᠠᠯ᠂ ᠳᠣᠷᠣᠮᠵᠢᠯᠠᠯ᠂ ᠭᠠᠴᠢᠭᠳᠠᠯ᠂ ᠬᠠᠪᠴᠢᠯᠭᠠ ᠪᠠ ᠪᠡᠷᠬᠡᠰᠢᠶᠡᠯ ᠢ ᠲᠠᠭᠠᠰᠢᠶᠠᠳᠠᠭ᠂ ᠤᠴᠢᠷ ᠨᠢ᠂ ᠪᠢ ᠰᠤᠯᠠ ᠳᠣᠷᠣᠢ ᠳᠠᠭᠠᠨ ᠬᠦᠴᠦᠲᠡᠢ ᠪᠠᠢᠳᠠᠭ᠃
ᠢᠲᠡᠭᠡᠭᠴᠢ ᠶᠢᠨ ᠲᠥᠯᠥᠭᠡᠬᠢ ᠰᠠᠨᠠᠭᠠᠰᠢᠷᠠᠯ
11 ᠪᠢ ᠮᠤᠩ᠋ᠬᠠᠷᠠᠵᠠᠢ᠂ ᠨᠠᠮᠠᠶᠢ ᠠᠯᠪᠠᠳᠠᠵᠤ ᠡᠢᠮᠦ ᠪᠣᠯᠭᠠᠭᠰᠠᠨ ᠨᠢ ᠲᠠ ᠨᠠᠷ ᠰᠢᠦ ᠳᠠ᠃ ᠦᠨᠡᠨ ᠳᠡᠭᠡᠨ ᠲᠠ ᠨᠠᠷ ᠨᠠᠮᠠᠶᠢ ᠰᠠᠢᠰᠢᠶᠠᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ᠃ ᠤᠴᠢᠷ ᠨᠢ᠂ ᠪᠢ ᠶᠠᠭᠤ ᠴᠤ ᠪᠢᠰᠢ ᠪᠣᠯᠪᠠᠴᠤ ᠲᠡᠳᠡᠭᠡᠷ ᠠᠭᠤᠤ ᠶᠡᠬᠡ ᠰᠢᠳᠠᠷ ᠱᠠᠪᠢ ᠭᠡᠭᠴᠢ ᠡᠴᠡ ᠶᠠᠭᠤ ᠪᠠᠷ ᠴᠤ ᠳᠤᠲᠠᠭᠰᠠᠨ ᠦᠭᠡᠢ ᠶᠤᠮ᠃ 12 ᠪᠢ ᠲᠠ ᠨᠠᠷ ᠤᠨ ᠳᠤᠮᠳᠠ ᠪᠠᠢᠬᠤ ᠳᠠᠭᠠᠨ ᠦᠨᠡᠨ ᠰᠢᠳᠠᠷ ᠱᠠᠪᠢ ᠶᠢᠨ ᠲᠡᠮᠳᠡᠭ ᠤᠳ᠂ ᠲᠤᠬᠠᠢᠯᠠᠪᠠᠯ ᠰᠢᠳᠢ ᠲᠡᠮᠳᠡᠭ᠂ ᠭᠠᠢᠬᠠᠮᠰᠢᠭ ᠪᠠ ᠬᠦᠴᠦᠲᠦ ᠦᠢᠯᠡᠰ ᠢ ᠬᠠᠮᠤᠭ ᠲᠡᠪᠴᠢᠶᠡᠷᠢ ᠪᠠᠷ ᠦᠵᠡᠭᠦᠯᠦᠭᠰᠡᠨ᠃ 13 ᠲᠠ ᠨᠠᠷ ᠪᠤᠰᠤᠳ ᠴᠢᠭᠤᠯᠭᠠᠨ ᠠᠴᠠ ᠶᠠᠭᠤ ᠪᠠᠷ ᠢᠶᠠᠨ ᠳᠤᠲᠠᠭᠤᠳᠠᠭᠰᠠᠨ ᠶᠤᠮ ᠪᠤᠢ︖ ᠲᠠ ᠨᠠᠷ ᠲᠤ ᠲᠡᠭᠡᠭᠡᠷᠡ ᠪᠣᠯᠣᠭᠠ ᠦᠭᠡᠢ ᠪᠠᠷ ᠮᠢᠨᠢ ᠳᠤᠲᠠᠭᠤᠳᠠᠭᠰᠠᠨ ᠶᠤᠮ ᠪᠣᠯ᠂ ᠲᠡᠷᠡ ᠵᠥᠪ ᠪᠤᠰᠤ ᠶᠢ ᠥᠷᠥᠰᠢᠶᠡᠭᠡᠴᠢ︕
14 ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠲᠠᠨ ᠤ ᠲᠡᠨᠳᠡ ᠣᠴᠢᠬᠤ ᠪᠠᠷ ᠪᠡᠯᠡᠬᠡᠨ ᠪᠠᠢᠨᠠ᠃ ᠭᠡᠪᠡᠴᠦ ᠲᠠ ᠨᠠᠷ ᠲᠤ ᠲᠡᠭᠡᠭᠡᠷᠡ ᠪᠣᠯᠬᠤ ᠦᠭᠡᠢ᠂ ᠤᠴᠢᠷ ᠨᠢ᠂ ᠡᠷᠢᠵᠦ ᠪᠠᠢᠭᠠ ᠮᠢᠨᠢ ᠲᠠ ᠨᠠᠷ ᠤᠨ ᠶᠠᠭᠤᠮᠠᠰ ᠪᠢᠰᠢ᠂ ᠬᠠᠷᠢᠨ ᠲᠠ ᠨᠠᠷ ᠪᠢᠯᠡ᠃ ᠬᠡᠦᠬᠡᠳ ᠤᠳ ᠨᠢ ᠡᠴᠢᠭᠡ ᠡᠬᠡ ᠳᠡᠭᠡᠨ ᠪᠢᠰᠢ᠂ ᠬᠠᠷᠢᠨ ᠡᠴᠢᠭᠡ ᠡᠬᠡ ᠨᠢ ᠬᠡᠦᠬᠡᠳ ᠤᠳ ᠲᠡᠭᠡᠨ ᠨᠥᠭᠡᠴᠡᠯᠡᠳᠡᠭ᠃ 15 ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠪᠢ ᠪᠦᠬᠦᠨ ᠢᠶᠡᠨ ᠳᠤᠷᠠᠲᠠᠶᠠ ᠵᠠᠷᠤᠴᠠᠭᠤᠯᠤᠶᠠ᠂ ᠪᠡᠶᠡ ᠪᠡᠨ ᠴᠤ ᠵᠣᠷᠢᠭᠤᠯᠤᠶᠠ᠃ ᠪᠢ ᠲᠠ ᠨᠠᠷ ᠢ ᠬᠠᠢᠷᠠᠯᠠᠬᠤ ᠲᠤᠰᠤᠮ ᠲᠠ ᠨᠠᠷ ᠤᠯᠠᠮ ᠬᠠᠢᠷᠠ ᠦᠭᠡᠢ ᠪᠣᠯᠬᠤ ᠨᠢ ᠤᠤ︖ 16 ᠶᠠᠭᠤ ᠴᠤ ᠭᠡᠰᠡᠨ ᠪᠢ ᠲᠠ ᠨᠠᠷ ᠤᠨ ᠠᠴᠢᠶᠠᠯᠠᠯ ᠪᠣᠯᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠪᠢ ᠵᠠᠯᠢᠲᠠᠢ ᠬᠥᠮᠦᠨ ᠪᠣᠯᠵᠤ ᠠᠷᠭᠠ ᠮᠡᠬᠡ ᠪᠡᠷ ᠲᠠ ᠨᠠᠷ ᠢ ᠠᠳᠬᠤᠭᠰᠠᠨ ᠭᠡᠨᠡ᠂ 17 ᠲᠠ ᠨᠠᠷ ᠲᠤ ᠢᠯᠡᠭᠡᠭᠰᠡᠨ ᠬᠥᠮᠦᠰ ᠦᠨ ᠢᠶᠠᠨ ᠬᠡᠨ ᠢᠶᠡᠷ ᠨᠢ ᠪᠢ ᠲᠠ ᠨᠠᠷ ᠢ ᠮᠥᠯᠵᠢᠭᠦᠯᠬᠦ ᠭᠡᠰᠡᠨ ᠪᠤᠢ︖ 18 ᠪᠢ ᠲᠢᠲ ᠢ ᠢᠳᠬᠠᠵᠤ ᠨᠢᠭᠡ ᠳᠡᠭᠦᠦ ᠲᠠᠢ ᠬᠠᠮᠲᠤ ᠶᠠᠪᠤᠭᠤᠯᠤᠭᠰᠠᠨ ᠯᠠ ᠳᠠ᠃ ᠲᠢᠲ ᠲᠠ ᠨᠠᠷ ᠢ ᠮᠥᠯᠵᠢᠭᠰᠡᠨ ᠤᠤ︖ ᠲᠡᠷᠡ ᠪᠢᠳᠡ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠰᠡᠳᠬᠢᠯ ᠲᠠᠢ ᠪᠠᠢᠭᠰᠠᠨ ᠪᠢᠰᠢ ᠤᠤ︖ ᠨᠢᠭᠡ ᠮᠥᠷ ᠢᠶᠡᠷ ᠶᠠᠪᠤᠭᠰᠠᠨ ᠪᠢᠰᠢ ᠤᠤ︖
19 ᠲᠠ ᠨᠠᠷ ᠪᠢᠳᠡᠨ ᠢ ᠪᠡᠶᠡ ᠪᠡᠨ ᠥᠮᠥᠭᠯᠡᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠪᠠᠢᠨᠠ ᠤᠤ︖ ᠬᠠᠢᠷᠠᠲᠤ ᠨᠤᠭᠤᠳ ᠡ᠂ ᠪᠢᠳᠡ ᠪᠤᠷᠬᠠᠨ ᠤ ᠡᠮᠦᠨᠡ᠂ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠶᠠᠷᠢᠵᠤ ᠪᠠᠢᠨᠠ᠃ ᠡᠨᠡ ᠪᠦᠬᠦᠨ ᠲᠠ ᠨᠠᠷ ᠢ ᠪᠣᠰᠬᠠᠨ ᠪᠠᠢᠭᠤᠯᠬᠤ ᠶᠢᠨ ᠲᠥᠯᠥᠭᠡ ᠶᠤᠮ᠃ 20 ᠪᠢ ᠣᠴᠢᠭᠠᠳ ᠲᠠ ᠨᠠᠷ ᠢ ᠮᠢᠨᠦ ᠬᠦᠰᠡᠭᠰᠡᠨ ᠢᠶᠡᠷ ᠪᠣᠯᠣᠭᠠ ᠦᠭᠡᠢ ᠶᠢ ᠬᠠᠷᠠᠵᠤ᠂ ᠲᠠ ᠨᠠᠷ ᠲᠤ ᠴᠤ ᠬᠦᠰᠡᠭᠰᠡᠨ ᠡᠴᠡ ᠴᠢᠨᠢ ᠣᠨᠳᠣᠣ ᠪᠠᠷ ᠬᠠᠷᠠᠭᠳᠠᠬᠤ ᠠᠴᠠ ᠠᠶᠤᠵᠤ ᠪᠠᠢᠨᠠ᠃ ᠮᠥᠨ ᠬᠠᠭᠠᠷᠠᠯ᠂ ᠠᠲᠠᠭᠠᠷᠬᠠᠯ᠂ ᠠᠭᠤᠷ ᠬᠢᠯᠢᠩ᠂ ᠪᠦᠯᠦᠭᠯᠡᠯ᠂ ᠭᠦᠳᠬᠡᠯ᠂ ᠬᠣᠪ ᠵᠢᠪ᠂ ᠣᠮᠣᠷᠬᠠᠭ ᠪᠠ ᠦᠢᠮᠡᠭᠡᠨ ᠪᠠᠢᠬᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠠᠶᠤᠵᠤ ᠪᠠᠢᠨᠠ᠃ 21 ᠮᠥᠨ ᠳᠠᠬᠢᠨ ᠣᠴᠢᠬᠤ ᠦᠶᠡ ᠳᠡᠭᠡᠨ ᠮᠢᠨᠦ ᠪᠤᠷᠬᠠᠨ ᠨᠠᠮᠠᠶᠢ ᠲᠠ ᠨᠠᠷ ᠤᠨ ᠡᠮᠦᠨᠡ ᠢᠴᠢᠭᠡᠬᠦ ᠡᠴᠡ᠂ ᠪᠠᠰᠠ ᠥᠩᠭᠡᠷᠡᠭᠰᠡᠨ ᠳᠦ ᠭᠡᠮ ᠨᠢᠭᠦᠯ ᠬᠢᠭᠰᠡᠨ ᠣᠯᠠᠨ ᠬᠥᠮᠦᠨ ᠦ ᠦᠢᠯᠡᠳᠦᠭᠰᠡᠨ ᠴᠡᠪᠡᠷ ᠪᠤᠰᠤ ᠶᠠᠪᠤᠳᠠᠯ ᠪᠠ ᠵᠠᠪᠬᠠᠢᠷᠠᠯ᠂ ᠢᠴᠢᠭᠦᠷᠢ ᠪᠠᠨ ᠭᠡᠮᠰᠢᠭᠡ ᠦᠭᠡᠢ ᠳᠦ ᠭᠠᠰᠢᠭᠤᠳᠠᠬᠤ ᠠᠴᠠ ᠪᠠᠨ ᠪᠢ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠨᠠ᠃