ᠢᠪᠷᠠᠢ ᠳᠣᠯᠣᠭᠠ
ᠶᠣᠰᠣ ᠶᠢ ᠨᠡᠩ ᠰᠠᠢᠨ ᠳᠠᠭᠠᠭᠰᠠᠨ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠢᠰᠦ᠋ᠰ
1 ᠮᠧᠯᠬᠢᠽᠧᠳᠧᠺ ᠪᠣᠯ ᠰᠠᠯᠧᠮ ᠤᠨ ᠬᠠᠭᠠᠨ᠂ ᠳᠡᠭᠡᠳᠦ ᠶᠢᠨ ᠳᠡᠭᠡᠳᠦ ᠪᠤᠷᠬᠠᠨ ᠤ ᠲᠠᠬᠢᠯᠴᠢ ᠮᠥᠨ ᠪᠥᠭᠡᠳ ᠬᠠᠭᠠᠳ ᠢ ᠢᠯᠠᠭᠠᠳ ᠪᠤᠴᠠᠵᠤ ᠪᠤᠢ ᠠᠪᠷᠠᠬᠠᠮ ᠲᠠᠢ ᠤᠴᠠᠷᠠᠵᠤ ᠲᠡᠭᠦᠨ ᠢ ᠢᠷᠥᠭᠡᠭᠰᠡᠨ ᠬᠥᠮᠦᠨ ᠪᠢᠯᠡ᠃ 2 ᠲᠡᠭᠦᠨ ᠳᠦ ᠠᠪᠷᠠᠬᠠᠮ ᠪᠦᠬᠦ ᠶᠠᠭᠤᠮᠠᠨ ᠤ ᠪᠠᠨ ᠠᠷᠪᠠᠨ ᠤ ᠨᠢᠭᠡ ᠶᠢ ᠬᠤᠪᠢᠶᠠᠵᠤ ᠥᠭᠭᠥᠭᠰᠡᠨ᠃ ᠲᠡᠭᠦᠨ ᠦ ᠨᠡᠷᠡ ᠶᠢᠨ ᠠᠩ᠋ᠬᠠᠨ ᠤ ᠤᠳᠬᠠ ᠨᠢ 《ᠵᠥᠪ ᠦᠨ ᠬᠠᠭᠠᠨ》᠂ ᠳᠠᠷᠠᠭᠠ ᠶᠢᠨ ᠬᠢᠨᠢ 《ᠰᠠᠯᠧᠮ ᠤᠨ ᠬᠠᠭᠠᠨ》 ᠪᠤᠶᠤ 《ᠠᠮᠤᠭᠤᠯᠠᠩ ᠤᠨ ᠬᠠᠭᠠᠨ》 ᠪᠢᠯᠡ᠃ 3 ᠲᠡᠷᠡ ᠡᠴᠢᠭᠡ ᠦᠭᠡᠢ᠂ ᠡᠬᠡ ᠦᠭᠡᠢ᠂ ᠭᠡᠷ ᠦᠨ ᠴᠠᠳᠢᠭ ᠦᠭᠡᠢ᠃ ᠲᠡᠭᠦᠨ ᠳᠦ ᠠᠮᠢ ᠶᠢᠨ ᠡᠬᠢᠯᠡᠯ ᠴᠤ ᠦᠭᠡᠢ᠂ ᠲᠡᠭᠦᠰᠬᠡᠯ ᠴᠤ ᠦᠭᠡᠢ᠃ ᠲᠡᠷᠡ ᠬᠥᠮᠦᠨ ᠪᠤᠷᠬᠠᠨ ᠤ ᠬᠦᠦ ᠰᠢᠭ ᠡᠭᠦᠷᠢᠳᠡ ᠶᠢᠨ ᠲᠠᠬᠢᠯᠴᠢ ᠪᠠᠷ ᠪᠠᠢᠳᠠᠭ᠃
4 ᠬᠢᠷᠢ ᠵᠡᠷᠭᠡ ᠠᠭᠤᠤ ᠶᠡᠬᠡ ᠶᠢ ᠨᠢ ᠪᠣᠳᠣᠵᠠᠭᠠ᠃ ᠡᠪᠦᠭᠡ ᠠᠪᠷᠠᠬᠠᠮ ᠴᠤ ᠲᠡᠭᠦᠨ ᠳᠦ ᠳᠡᠭᠡᠵᠢ ᠶᠢᠨ ᠢᠶᠠᠨ ᠠᠷᠪᠠᠨ ᠤ ᠨᠢᠭᠡ ᠶᠢ ᠥᠭᠭᠥᠭᠰᠡᠨ᠃ 5 ᠲᠠᠬᠢᠯᠴᠢ ᠶᠢᠨ ᠲᠤᠰᠢᠶᠠᠯ ᠢ ᠬᠦᠯᠢᠶᠡᠳᠡᠭ ᠯᠧᠸᠢᠴᠦᠳ ᠲᠦ ᠴᠤ ᠠᠪᠷᠠᠬᠠᠮ ᠠᠴᠠ ᠦᠷᠡᠵᠢᠭᠰᠡᠨ ᠠᠷᠠᠳ ᠪᠤᠶᠤ ᠠᠬᠠ ᠳᠡᠭᠦᠦᠰ ᠡᠴᠡ ᠪᠡᠨ ᠬᠠᠤᠯᠢ ᠶᠢᠨ ᠶᠣᠰᠣᠭᠠᠷ ᠠᠷᠪᠠᠨ ᠤ ᠨᠢᠭᠡ ᠶᠢ ᠨᠢ ᠠᠪ ᠭᠡᠰᠡᠨ ᠵᠠᠷᠯᠢᠭ ᠪᠤᠢ᠃ 6 ᠡᠨᠡ ᠬᠥᠮᠦᠨ ᠯᠧᠸᠢ ᠭᠠᠷᠤᠯ ᠲᠠᠢ ᠪᠢᠰᠢ ᠪᠣᠯᠪᠠᠴᠤ ᠠᠪᠷᠠᠬᠠᠮ ᠠᠴᠠ ᠠᠷᠪᠠᠨ ᠤ ᠨᠢᠭᠡ ᠶᠢ ᠨᠢ ᠬᠦᠷᠲᠡᠭᠰᠡᠨ ᠪᠥᠭᠡᠳ ᠠᠮᠠᠯᠠᠯᠲᠠ ᠶᠢ ᠠᠪᠤᠭᠰᠠᠨ ᠠᠪᠷᠠᠬᠠᠮ ᠢ ᠲᠡᠷᠡ ᠢᠷᠥᠭᠡᠭᠰᠡᠨ ᠪᠠᠢᠳᠠᠭ᠃ 7 ᠪᠠᠭᠠ ᠨᠢ ᠶᠡᠬᠡ ᠳᠡᠭᠡᠨ ᠢᠷᠥᠭᠡᠭᠳᠡᠳᠡᠭ ᠨᠢ ᠶᠠᠷᠢᠶᠠᠨ ᠦᠭᠡᠢ ᠬᠡᠷᠡᠭ᠃ 8 ᠨᠠᠭᠠᠳᠤ ᠲᠠᠯᠠ ᠳᠤ ᠦᠬᠦᠬᠦ ᠲᠠᠪᠢᠯᠠᠩ ᠲᠠᠢ ᠬᠥᠮᠦᠰ ᠠᠷᠪᠠᠨ ᠤ ᠨᠢᠭᠡ ᠶᠢ ᠠᠪᠤᠭᠰᠠᠨ ᠪᠠᠢᠬᠤ ᠳᠤ᠂ ᠴᠠᠭᠠᠲᠤ ᠲᠠᠯᠠ ᠳᠤ ᠠᠮᠢᠳᠤ ᠪᠤᠢ ᠭᠡᠵᠦ ᠭᠡᠷᠡᠴᠢᠯᠡᠭᠳᠡᠭᠰᠡᠨ ᠨᠢᠭᠡᠨ ᠨᠢ ᠴᠤ ᠠᠪᠤᠭᠰᠠᠨ ᠪᠢᠯᠡ᠃ 9 ᠲᠡᠢᠮᠦ ᠡᠴᠡ ᠠᠷᠪᠠᠨ ᠤ ᠨᠢᠭᠡ ᠶᠢ ᠠᠪᠤᠭᠴᠢ ᠯᠧᠸᠢ ᠴᠤ ᠠᠷᠪᠠᠨ ᠤ ᠨᠢᠭᠡ ᠪᠡᠨ ᠠᠪᠷᠠᠬᠠᠮ ᠢᠶᠠᠷ ᠥᠭᠭᠥᠭᠦᠯᠦᠭᠰᠡᠨ ᠭᠡᠰᠡᠨ ᠦᠭᠡ᠃ 10 ᠤᠴᠢᠷ ᠨᠢ᠂ ᠮᠧᠯᠬᠢᠽᠧᠳᠧᠺ ᠠᠪᠷᠠᠬᠠᠮ ᠲᠠᠢ ᠤᠴᠠᠷᠠᠬᠤ ᠦᠶᠡ ᠳᠦ᠂ ᠯᠧᠸᠢ ᠨᠢ ᠡᠪᠦᠭᠡ ᠠᠪᠷᠠᠬᠠᠮ ᠤᠨ ᠢᠶᠠᠨ ᠪᠡᠶᠡ ᠶᠢᠨ ᠳᠣᠲᠣᠷᠠ ᠪᠠᠢᠭᠰᠠᠨ᠃
11 ᠢᠰᠷᠧᠯ ᠠᠷᠠᠳ ᠤᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠬᠠᠤᠯᠢ ᠨᠢ ᠯᠧᠸᠢᠴᠦᠳ ᠦᠨ ᠲᠠᠬᠢᠯᠭᠠ ᠳᠤ ᠲᠤᠯᠭᠠᠭᠤᠷᠢᠯᠠᠳᠠᠭ ᠪᠠᠢᠵᠠᠢ᠃ ᠬᠡᠷᠪᠡ ᠲᠡᠳᠡᠨ ᠦ ᠲᠠᠬᠢᠯᠭᠠ ᠪᠠᠷ ᠲᠡᠭᠦᠯᠳᠡᠷ ᠪᠠᠢᠭᠰᠠᠨ ᠪᠣᠯ᠂ ᠠᠷᠣᠨ ᠤ ᠶᠣᠰᠣ ᠶᠢ ᠪᠢᠰᠢ᠂ ᠬᠠᠷᠢᠨ ᠮᠧᠯᠬᠢᠽᠧᠳᠧᠺ ᠤᠨ ᠶᠣᠰᠣ ᠶᠢ ᠳᠠᠭᠠᠬᠤ ᠥᠭᠡᠷᠡ ᠲᠠᠬᠢᠯᠴᠢ ᠭᠠᠷᠬᠤ ᠱᠠᠭᠠᠷᠳᠠᠯᠭᠠ ᠪᠠᠢᠨᠠ ᠤᠤ︖ 12 ᠲᠠᠬᠢᠯᠭᠠ ᠥᠭᠡᠷᠡᠴᠢᠯᠡᠭᠳᠡᠬᠦ ᠳᠦ᠂ ᠬᠠᠤᠯᠢ ᠴᠤ ᠥᠭᠡᠷᠡᠴᠢᠯᠡᠭᠳᠡᠬᠦ ᠱᠠᠭᠠᠷᠳᠠᠯᠭᠠ ᠲᠠᠢ ᠪᠣᠯᠳᠠᠭ᠃ 13 ᠡ᠊ᠨᠳᠡ ᠶᠠᠷᠢᠭᠳᠠᠵᠤ ᠪᠠᠢᠭᠠ ᠲᠡᠷᠡ ᠪᠣᠯ ᠥᠭᠡᠷᠡ ᠣᠪᠣᠭ ᠤᠨ ᠬᠢᠨ ᠪᠥᠭᠡᠳ ᠲᠡᠷᠡ ᠣᠪᠣᠭ ᠤᠨ ᠬᠡᠨ ᠨᠢ ᠴᠤ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠦ ᠦᠢᠯᠡᠴᠢᠯᠡᠵᠦ ᠪᠠᠢᠭᠠ ᠦᠭᠡᠢ᠃ 14 ᠪᠢᠳᠡᠨ ᠦ ᠡᠵᠡᠨ ᠪᠣᠯ ᠶᠦᠳᠠ ᠭᠠᠷᠤᠯ ᠲᠠᠢ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ᠃ ᠬᠠᠷᠢᠨ ᠮᠣᠰᠧ ᠡᠨᠡ ᠣᠪᠣᠭ ᠢ ᠲᠠᠬᠢᠯᠭᠠ ᠲᠠᠢ ᠬᠣᠯᠪᠣᠭᠳᠠᠭᠤᠯᠤᠨ ᠶᠠᠭᠤ ᠴᠤ ᠶᠠᠷᠢᠭᠰᠠᠨ ᠦᠭᠡᠢ᠃
15 ᠮᠧᠯᠬᠢᠽᠧᠳᠧᠺ ᠰᠢᠭ ᠥᠭᠡᠷᠡ ᠲᠠᠬᠢᠯᠴᠢ ᠭᠠᠷᠬᠤ ᠶᠤᠮ ᠪᠣᠯ᠂ ᠡᠨᠡ ᠨᠢ ᠨᠡᠩ ᠲᠣᠳᠣᠷᠬᠠᠢ ᠪᠣᠯᠣᠯᠠ᠃ 16 ᠲᠡᠷᠡ ᠮᠢᠬᠠᠨ ᠪᠡᠶᠡᠲᠦ ᠬᠥᠮᠦᠨ ᠦ ᠬᠠᠤᠯᠢ ᠪᠠᠷ ᠲᠣᠭᠲᠠᠭᠠᠭᠳᠠᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠰᠥᠨᠥᠰᠢ ᠦᠭᠡᠢ ᠠᠮᠢ ᠶᠢᠨ ᠬᠦᠴᠦ ᠪᠡᠷ ᠲᠠᠬᠢᠯᠴᠢ ᠪᠣᠯᠣᠭᠰᠠᠨ ᠶᠤᠮ᠃
17 ᠤᠴᠢᠷ ᠨᠢ᠂ ᠲᠡᠷᠡ᠄ 《ᠴᠢ ᠪᠣᠯ ᠮᠧᠯᠬᠢᠽᠧᠳᠧᠺ ᠤᠨ ᠶᠣᠰᠣ ᠶᠢ ᠳᠠᠭᠠᠳᠠᠭ ᠮᠥᠩᠬᠡ ᠶᠢᠨ ᠲᠠᠬᠢᠯᠴᠢ》
ᠭᠡᠵᠦ ᠭᠡᠷᠡᠴᠢᠯᠡᠭᠳᠡᠭᠰᠡᠨ ᠶᠤᠮ᠃ 18 ᠤᠷᠢᠳᠤ ᠶᠢᠨ ᠵᠠᠷᠯᠢᠭ ᠢᠳᠡ ᠦᠭᠡᠢ᠂ ᠲᠤᠰᠠ ᠦᠭᠡᠢ ᠪᠣᠯᠬᠣᠷ ᠬᠦᠴᠦᠨ ᠦᠭᠡᠢ ᠪᠣᠯᠵᠤ 19 (ᠬᠠᠤᠯᠢ ᠶᠠᠭᠤ ᠶᠢ ᠴᠤ ᠲᠡᠭᠦᠯᠳᠡᠷᠵᠢᠭᠦᠯᠦᠭᠰᠡᠨ ᠦᠭᠡᠢ᠃) ᠨᠡᠩ ᠰᠠᠢᠨ ᠡᠷᠡᠮᠡᠯᠵᠡᠯ ᠢ ᠠᠪᠴᠢᠷᠠᠯᠠ᠃ ᠡᠨᠡ ᠡᠷᠡᠮᠡᠯᠵᠡᠯ ᠪᠢᠳᠡᠨ ᠢ ᠪᠤᠷᠬᠠᠨ ᠳᠤ ᠣᠢᠷᠠᠲᠤᠭᠤᠯᠳᠠᠭ᠃
20 ᠪᠠᠰᠠ ᠪᠤᠷᠬᠠᠨ ᠤ ᠲᠠᠩ᠋ᠭᠠᠷᠢᠭ ᠴᠤ ᠪᠤᠢ᠃ ᠯᠧᠸᠢᠴᠦᠳ ᠦᠨ ᠬᠤᠪᠢ ᠳᠤ ᠲᠠᠩ᠋ᠭᠠᠷᠢᠭ ᠦᠭᠡᠢ ᠪᠠᠷ ᠲᠠᠬᠢᠯᠴᠢ ᠪᠣᠯᠣᠭᠰᠠᠨ ᠪᠣᠯ᠂ 21 ᠢᠰᠦ᠋ᠰ ᠤᠨ ᠬᠤᠪᠢ ᠳᠤ᠂ 《〈ᠴᠢ ᠪᠣᠯ ᠮᠥᠩᠬᠡ ᠶᠢᠨ ᠲᠠᠬᠢᠯᠴᠢ〉 ᠬᠡᠮᠡᠨ ᠡᠵᠡᠨ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠪᠥᠭᠡᠳ ᠡᠵᠡᠨ ᠰᠠᠨᠠᠭᠠ ᠪᠠᠨ ᠥᠭᠡᠷᠡᠴᠢᠯᠡᠬᠦ ᠦᠭᠡᠢ》 ᠭᠡᠵᠦ ᠥᠪᠡᠷ ᠲᠤᠨᠢ ᠠᠢᠯᠠᠳᠤᠭᠰᠠᠨ ᠨᠢᠭᠡᠨ ᠦ ᠲᠠᠩ᠋ᠭᠠᠷᠢᠭ ᠢᠶᠠᠷ ᠲᠠᠬᠢᠯᠴᠢ ᠪᠣᠯᠣᠯᠠ᠃ 22 ᠡᠢᠨ ᠬᠦ ᠢᠰᠦ᠋ᠰ ᠨᠡᠩ ᠰᠠᠢᠨ ᠭᠡᠷᠡ ᠶᠢᠨ ᠪᠠᠲᠤᠯᠠᠭᠴᠢ ᠪᠣᠯᠣᠭᠰᠠᠨ᠃
23 ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠤᠷᠢᠳᠤ ᠶᠢᠨ ᠲᠠᠬᠢᠯᠴᠢ ᠪᠣᠯᠭᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠠᠴᠠ ᠪᠣᠯᠵᠤ ᠲᠤᠰᠢᠶᠠᠯ ᠢᠶᠠᠨ ᠦᠷᠭᠦᠯᠵᠢᠯᠡᠭᠦᠯᠵᠦ ᠳᠡᠢᠯᠬᠦ ᠦᠭᠡᠢ ᠲᠤᠯᠠ ᠲᠡᠳᠡᠨ ᠦ ᠲᠣᠭᠠ ᠣᠯᠠᠰᠢᠷᠠᠭᠰᠠᠨ ᠪᠣᠯ᠂ 24 ᠬᠠᠷᠢᠨ ᠢᠰᠦ᠋ᠰ ᠥᠨᠢ ᠮᠥᠩᠬᠡᠳᠡ ᠪᠠᠢᠳᠠᠭ ᠲᠤᠯᠠ ᠬᠤᠪᠢᠷᠠᠰᠢ ᠦᠭᠡᠢ ᠲᠠᠬᠢᠯᠴᠢ ᠶᠢᠨ ᠲᠤᠰᠢᠶᠠᠯ ᠲᠠᠢ ᠪᠠᠢᠳᠠᠭ᠃ 25 ᠥᠪᠡᠷ ᠢᠶᠡᠷ ᠨᠢ ᠳᠠᠮᠵᠢᠭᠤᠯᠵᠤ ᠪᠤᠷᠬᠠᠨ ᠳᠤ ᠣᠢᠷᠠᠲᠤᠭᠰᠠᠳ ᠢ ᠢᠰᠦ᠋ᠰ ᠪᠦᠷᠢᠮᠦᠰᠦᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠶᠢᠨ ᠤᠴᠢᠷ ᠨᠢ ᠡᠨᠡ ᠶᠤᠮ᠂ ᠲᠡᠷᠡ ᠬᠡᠵᠢᠶᠡᠳᠡ ᠠᠮᠢᠳᠤ ᠪᠠᠢᠵᠤ᠂ ᠲᠡᠳᠡᠨ ᠦ ᠡᠮᠦᠨᠡ ᠡᠴᠡ ᠵᠠᠭᠤᠴᠢᠯᠠᠨ ᠳᠠᠭᠠᠳᠬᠠᠳᠠᠭ᠃
26 ᠡᠢᠮᠦᠷᠬᠦ ᠲᠠᠬᠢᠯᠴᠢ ᠪᠢᠳᠡᠨ ᠳᠦ ᠲᠣᠬᠢᠷᠠᠮᠵᠢᠲᠠᠢ᠂ ᠲᠡᠷᠡ ᠪᠣᠯ ᠠᠷᠢᠭᠤᠨ᠂ ᠭᠡᠮ ᠦᠭᠡᠢ᠂ ᠪᠤᠵᠠᠷᠲᠤᠰᠢ ᠦᠭᠡᠢ᠂ ᠨᠢᠭᠦᠯᠲᠡᠳ ᠡᠴᠡ ᠠᠩᠭᠢᠳᠠ ᠪᠠᠢᠳᠠᠭ ᠪᠥᠭᠡᠳ ᠲᠩᠷᠢ ᠡᠴᠡ ᠥᠨᠳᠥᠷ ᠲᠦ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠶᠤᠮ᠃ 27 ᠲᠡᠷᠡ ᠪᠤᠰᠤᠳ ᠲᠡᠷᠢᠭᠦᠨ ᠲᠠᠬᠢᠯᠴᠢᠳ ᠠᠴᠠ ᠥᠭᠡᠷᠡ᠂ ᠲᠡᠳᠡᠨ ᠰᠢᠭ ᠡᠬᠢᠯᠡᠭᠡᠳ ᠥᠪᠡᠷ ᠦᠨ ᠢᠶᠠᠨ ᠭᠡᠮ ᠨᠢᠭᠦᠯ᠂ ᠳᠠᠷᠠᠭᠠ ᠨᠢ ᠠᠷᠠᠳ ᠲᠦᠮᠡᠨ ᠦ ᠭᠡᠮ ᠨᠢᠭᠦᠯ ᠦᠨ ᠲᠥᠯᠥᠭᠡ ᠡᠳᠦᠷ ᠪᠦᠷᠢ ᠲᠠᠬᠢᠯ ᠡᠷᠭᠦᠬᠦ ᠱᠠᠭᠠᠷᠳᠠᠯᠭᠠ ᠦᠭᠡᠢ᠃ ᠤᠴᠢᠷ ᠨᠢ᠂ ᠲᠡᠷᠡ ᠥᠪᠡᠷ ᠢ ᠪᠠᠨ ᠡᠷᠭᠦᠭᠰᠡᠨ ᠢᠶᠡᠷ ᠢᠶᠠᠨ ᠡᠳᠡᠭᠡᠷ ᠢ ᠨᠢᠭᠡ ᠯᠠ ᠤᠳᠠᠭᠠ ᠳᠤ ᠪᠦᠷᠢᠮᠦᠰᠦᠨ ᠪᠡᠶᠡᠯᠡᠭᠦᠯᠦᠭᠰᠡᠨ ᠶᠤᠮ᠃ 28 ᠬᠠᠤᠯᠢ ᠨᠢ ᠰᠤᠯᠠ ᠳᠣᠷᠣᠢ ᠬᠥᠮᠦᠰ ᠢ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠪᠠᠷ ᠲᠣᠮᠢᠯᠠᠳᠠᠭ ᠪᠣᠯ᠂ ᠬᠠᠤᠯᠢ ᠶᠢᠨ ᠳᠠᠷᠠᠭᠠ ᠢᠷᠡᠭᠰᠡᠨ ᠲᠠᠩ᠋ᠭᠠᠷᠢᠭ ᠤᠨ ᠦᠭᠡ ᠨᠢ ᠬᠠᠷᠢᠨ ᠮᠥᠩᠬᠡ ᠲᠡᠭᠦᠯᠳᠡᠷᠵᠢᠭᠰᠡᠨ ᠬᠦᠦ ᠶᠢ ᠲᠣᠮᠢᠯᠠᠭᠰᠠᠨ᠃