ᠽᠧᠺᠠᠷᠢᠶᠠ ᠬᠣᠶᠠᠷ
ᠬᠡᠷᠡᠮ ᠬᠡᠷᠡᠭ ᠦᠭᠡᠢ ᠬᠣᠲᠠ
1 ᠪᠢ ᠨᠢᠳᠦ ᠪᠡᠨ ᠡᠷᠭᠦᠭᠡᠳ ᠦᠵᠡᠪᠡ᠃ ᠬᠠᠷᠠ᠂ ᠭᠠᠷ ᠲᠠᠭᠠᠨ ᠬᠡᠮᠵᠢᠭᠦᠷ ᠪᠠᠷᠢᠭᠰᠠᠨ ᠬᠥᠮᠦᠨ ᠪᠠᠢᠯᠠ᠃ 2 ᠪᠢ᠄ 《ᠴᠢ ᠬᠠᠮᠢᠭᠠ ᠶᠠᠪᠤᠬᠤ ᠭᠡᠵᠦ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠶᠧᠷᠦ᠋ᠰᠠᠯᠧᠮ ᠢ ᠬᠡᠮᠵᠢᠵᠦ᠂ ᠤᠷᠲᠤ ᠥᠷᠭᠡᠨ ᠢ ᠨᠢ ᠦᠵᠡᠬᠦ ᠭᠡᠵᠦ ᠪᠠᠢᠨᠠ》 ᠭᠡᠯᠡ᠃ 3 ᠬᠠᠷᠠ᠂ ᠨᠠᠳᠠ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠲᠩᠷᠢ ᠡᠯᠴᠢ ᠭᠠᠷᠤᠭᠠᠳ ᠶᠠᠪᠤᠵᠤ ᠪᠠᠢᠬᠤ ᠳᠤ᠂ ᠥᠭᠡᠷᠡ ᠨᠢᠭᠡ ᠲᠩᠷᠢ ᠡᠯᠴᠢ ᠭᠠᠷᠴᠤ ᠢᠷᠡᠭᠡᠳ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠨ 4 ᠲᠡᠭᠦᠨ ᠳᠦ᠄ 《ᠭᠦᠶᠦ᠂ ᠲᠡᠷᠡ ᠵᠠᠯᠠᠭᠤ ᠳᠤ᠄ 〈ᠶᠧᠷᠦ᠋ᠰᠠᠯᠧᠮ ᠳᠤ ᠬᠥᠮᠦᠨ᠂ ᠮᠠᠯ ᠣᠯᠠᠨ ᠪᠠᠢᠭᠠ ᠪᠣᠯᠪᠠᠴᠤ ᠲᠡᠷᠡ ᠬᠣᠲᠠ ᠬᠡᠷᠡᠮ ᠦᠭᠡᠢ ᠵᠠᠳᠠᠭᠠᠢ ᠪᠣᠯᠣᠨᠠ〉 ᠭᠡᠵᠦ ᠬᠡᠯᠡ᠃ 5 〈ᠤᠴᠢᠷ ᠨᠢ ᠪᠢ ᠥᠪᠡᠷ ᠢᠶᠡᠨ ᠬᠣᠲᠠ ᠶᠢ ᠬᠦᠷᠢᠶᠡᠯᠡᠨ ᠭᠠᠯᠲᠤ ᠬᠠᠨᠠ ᠪᠣᠯᠵᠤ᠂ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠰᠦᠷ ᠵᠢᠪᠬᠤᠯᠠᠩ ᠪᠣᠯᠣᠨᠠ᠂〉 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ》 ᠭᠡᠪᠡ᠃
6 《ᠪᠢ ᠲᠠ ᠨᠠᠷ ᠢ ᠲᠩᠷᠢ ᠶᠢᠨ ᠳᠥᠷᠪᠡᠨ ᠰᠠᠯᠬᠢ ᠮᠡᠲᠦ ᠪᠤᠲᠠᠷᠠᠭᠠᠭᠰᠠᠨ ᠪᠢᠯᠡ᠂ ᠲᠠ ᠨᠠᠷ ᠣᠳᠣ ᠢᠷᠡ᠂ ᠢᠷᠡ᠂ ᠤᠮᠠᠷᠠᠲᠤ ᠶᠢᠨ ᠭᠠᠵᠠᠷ ᠠᠴᠠ ᠵᠢᠭᠤᠲᠠᠵᠤ ᠢᠷᠡ᠃》 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 7 《ᠢᠷᠡ᠂ ᠽᠢᠶᠣᠨ︕ ᠪᠠᠪᠢᠯᠣᠨ ᠥᠬᠢᠨ ᠤ ᠳᠤ ᠰᠠᠭᠤᠭᠴᠢᠳ ᠡ᠂ ᠲᠡᠨᠳᠡ ᠡᠴᠡ ᠵᠠᠢᠯᠠ᠂》 8 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠪᠠ᠃ 《ᠲᠡᠷᠡ ᠨᠠᠮᠠᠶᠢ ᠠᠯᠳᠠᠷᠰᠢᠭᠤᠯᠵᠤ᠂ ᠲᠠ ᠨᠠᠷ ᠢ ᠲᠣᠨᠣᠭᠰᠠᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠰᠢᠳᠬᠡᠭᠦᠯᠬᠦ ᠪᠡᠷ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ᠃ ᠲᠠ ᠨᠠᠷ ᠲᠤ ᠬᠦᠷᠦᠭᠴᠢ ᠨᠢ ᠲᠡᠭᠦᠨ ᠦ ᠮᠡᠯᠮᠡᠢ ᠶᠢᠨ ᠴᠡᠴᠡᠭᠡᠢ ᠳᠦ ᠬᠦᠷᠦᠭᠴᠢ ᠶᠤᠮ᠃ 9 ᠬᠠᠷᠠ᠂ ᠪᠢ ᠲᠡᠳᠡᠨ ᠦ ᠳᠡᠭᠡᠭᠦᠷ ᠨᠢᠳᠤᠷᠭᠠ ᠪᠠᠨ ᠳᠠᠯᠠᠢᠬᠤ ᠳᠤ᠂ ᠲᠡᠳᠡ ᠪᠣᠭᠣᠯᠴᠤᠳ ᠲᠠᠭᠠᠨ ᠲᠣᠨᠣᠭᠳᠠᠨᠠ᠃ ᠲᠡᠭᠡᠬᠦ ᠳᠦ ᠲᠠ ᠨᠠᠷ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 10 ᠽᠢᠶᠣᠨ ᠥᠬᠢᠨ ᠡ︕ ᠤᠤᠬᠠᠢᠯᠠᠨ ᠪᠠᠶᠠᠰᠤᠭᠲᠤᠨ᠃ ᠬᠠᠷᠠ᠂ ᠪᠢ ᠢᠷᠡᠵᠦ ᠪᠠᠢᠨᠠ᠂ ᠪᠢ ᠴᠢᠨᠦ ᠳᠣᠲᠣᠷᠠ ᠣᠷᠣᠰᠢᠬᠤ ᠪᠣᠯᠣᠨᠠ᠂ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ 11 ᠲᠡᠷᠡ ᠡᠳᠦᠷ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠶᠣᠬᠣᠸᠠ ᠲᠠᠢ ᠬᠣᠯᠪᠣᠭᠳᠠᠵᠤ᠂ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠣᠯᠣᠨᠠ᠃ ᠪᠢ ᠴᠢᠨᠦ ᠳᠣᠲᠣᠷᠠ ᠣᠷᠣᠰᠢᠵᠤ᠂ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠨᠠᠮᠠᠶᠢ ᠥᠪᠡᠷ ᠤᠷᠤᠭᠤ ᠴᠢᠨᠢ ᠢᠯᠡᠭᠡᠭᠰᠡᠨ ᠭᠡᠳᠡᠭ ᠢ ᠴᠢ ᠮᠡᠳᠡᠬᠦ ᠪᠣᠯᠣᠨᠠ᠃ 12 ᠶᠣᠬᠣᠸᠠ ᠶᠦᠳᠠ ᠶᠢ ᠠᠷᠢᠭᠤᠨ ᠭᠠᠵᠠᠷ ᠳᠠᠬᠢ ᠥᠪᠡᠷ ᠦᠨ ᠢᠶᠠᠨ ᠥᠮᠴᠢ ᠪᠣᠯᠭᠠᠨ ᠡᠵᠡᠮᠰᠢᠵᠦ᠂ ᠶᠧᠷᠦ᠋ᠰᠠᠯᠧᠮ ᠢ ᠳᠠᠬᠢᠨ ᠰᠣᠩ᠋ᠭᠣᠵᠤ ᠠᠪᠤᠨᠠ᠃ 13 ᠶᠣᠬᠣᠸᠠ ᠥᠪᠡᠷ ᠦᠨ ᠠᠷᠢᠭᠤᠨ ᠣᠷᠣᠰᠢᠬᠤᠢ ᠠᠴᠠ ᠪᠣᠰᠣᠯᠠ᠂ ᠮᠢᠬᠠᠨ ᠪᠡᠶᠡᠲᠦ ᠪᠦᠬᠦᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠳᠠᠭᠤ ᠦᠭᠡᠢ ᠪᠠᠢ᠃》