ᠽᠧᠺᠠᠷᠢᠶᠠ ᠳᠥᠷᠪᠡ
ᠵᠥᠪᠬᠡᠨ ᠡᠵᠡᠨ ᠦ ᠰᠦᠨᠡᠰᠦ ᠪᠡᠷ
1 ᠲᠡᠭᠡᠭᠡᠳ ᠨᠠᠳᠠ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠲᠩᠷᠢ ᠡᠯᠴᠢ ᠪᠤᠴᠠᠵᠤ ᠢᠷᠡᠭᠡᠳ ᠨᠠᠮᠠᠶᠢ ᠰᠡᠷᠢᠭᠡᠪᠡ᠂ ᠪᠢ ᠨᠣᠢᠷ ᠠᠴᠠ ᠪᠠᠨ ᠰᠡᠷᠢᠭᠰᠡᠨ ᠬᠥᠮᠦᠨ ᠮᠡᠲᠦ ᠪᠣᠯᠵᠠᠢ᠃ 2 ᠲᠡᠷᠡ᠄ 《ᠴᠢ ᠶᠠᠭᠤ ᠬᠠᠷᠠᠵᠤ ᠪᠠᠢᠨᠠ ᠪᠤᠢ︖》 ᠭᠡᠰᠡᠨ ᠳᠦ᠂ ᠪᠢ᠄ 《ᠠᠯᠲᠠᠨ ᠳ᠋ᠧᠩ ᠤᠨ ᠰᠠᠭᠤᠷᠢ ᠶᠢ ᠬᠠᠷᠠᠵᠤ ᠪᠠᠢᠨᠠ᠃ ᠣᠷᠣᠢ ᠳᠤᠨᠢ ᠰᠠᠪᠠ ᠲᠠᠢ᠂ ᠲᠡᠭᠦᠨ ᠦ ᠳᠡᠭᠡᠷᠡ ᠠᠰ ᠠᠰ ᠲᠠᠭᠠᠨ ᠬᠣᠭᠣᠯᠠᠢ ᠲᠠᠢ ᠳᠣᠯᠣᠭᠠᠨ ᠳ᠋ᠧᠩ ᠪᠠᠢᠨᠠ᠃ 3 ᠮᠥᠨ ᠳᠡᠷᠭᠡᠳᠡ ᠨᠢ ᠬᠣᠶᠠᠷ ᠴᠢᠳᠦᠨ ᠮᠣᠳᠣ ᠪᠠᠢᠨᠠ᠃ ᠨᠢᠭᠡ ᠨᠢ ᠰᠠᠪᠠᠨ ᠤ ᠪᠠᠷᠠᠭᠤᠨ ᠲᠠᠯᠠ ᠳᠤ᠂ ᠨᠥᠭᠥᠭᠡ ᠨᠢ ᠵᠡᠭᠦᠨ ᠲᠠᠯᠠ ᠳᠤᠨᠢ ᠪᠠᠢᠨᠠ》 ᠭᠡᠰᠡᠨ ᠢᠶᠡᠨ 4 ᠨᠠᠳᠠ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠲᠩᠷᠢ ᠡᠯᠴᠢ ᠡᠴᠡ᠄ 《ᠡᠳᠡᠭᠡᠷ ᠨᠢ ᠶᠠᠭᠤ ᠪᠤᠢ︖ ᠡᠵᠡᠨ ᠮᠢᠨᠢ》 ᠭᠡᠵᠦ ᠠᠰᠠᠭᠤᠪᠠ᠃ 5 ᠨᠠᠳᠠ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠲᠩᠷᠢ ᠡᠯᠴᠢ᠄ 《ᠡᠳᠡᠭᠡᠷ ᠨᠢ ᠶᠠᠭᠤ ᠪᠣᠯᠬᠤ ᠶᠢ ᠴᠢ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖》 ᠭᠡᠬᠦ ᠳᠦ᠂ ᠪᠢ᠄ 《ᠮᠡᠳᠡᠬᠦ ᠦᠭᠡᠢ᠂ ᠡᠵᠡᠨ ᠮᠢᠨᠢ》 ᠭᠡᠪᠡ᠃ 6 ᠲᠡᠷᠡ ᠨᠠᠳᠠ ᠳᠤ᠄ 《ᠽᠣᠷᠣᠪᠠᠪᠧᠯ ᠳᠤ ᠠᠢᠯᠠᠳᠬᠤ ᠶᠣᠬᠣᠸᠠ ᠶᠢᠨ ᠦᠭᠡ ᠡᠨᠡ ᠪᠠᠢᠨᠠ᠄ 〈ᠬᠦᠴᠦ ᠪᠡᠷ ᠴᠤ ᠪᠤᠰᠤ᠂ ᠴᠢᠳᠠᠯ ᠢᠶᠠᠷ ᠴᠤ ᠪᠤᠰᠤ᠂ ᠬᠠᠷᠢᠨ ᠮᠢᠨᠦ ᠰᠦᠨᠡᠰᠦ ᠪᠡᠷ︕〉 ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 7 ᠰᠦᠷᠯᠢᠭ ᠠᠭᠤᠯᠠ ᠡ᠂ ᠴᠢ ᠶᠠᠭᠤ ᠶᠤᠮ ᠪᠤᠢ︖ ᠽᠣᠷᠣᠪᠠᠪᠧᠯ ᠤᠨ ᠡᠮᠦᠨᠡ ᠴᠢ ᠲᠠᠯᠠ ᠪᠣᠯᠣᠨᠠ᠃ ᠲᠡᠷᠡ ᠪᠡᠷ ᠲᠤᠯᠭᠠᠭᠤᠷᠢ ᠴᠢᠯᠠᠭᠤ ᠶᠢ ᠠᠪᠴᠢᠷᠠᠬᠤ ᠪᠠ ᠠᠷᠠᠳ ᠣᠯᠠᠨ᠄ 〈ᠪᠤᠷᠬᠠᠨ ᠢᠪᠡᠭᠡᠭ᠂ ᠪᠤᠷᠬᠠᠨ ᠢᠪᠡᠭᠡᠭ︕〉 ᠭᠡᠵᠦ ᠬᠠᠰᠬᠢᠷᠬᠤ ᠪᠣᠯᠣᠨᠠ》 ᠭᠡᠪᠡ᠃
8 ᠲᠡᠭᠡᠬᠦ ᠳᠦ ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ ᠠᠢᠯᠠᠳᠤᠨ᠄ 9 《ᠽᠣᠷᠣᠪᠠᠪᠧᠯ ᠤᠨ ᠭᠠᠷ ᠡᠨᠡ ᠥᠷᠭᠥᠭᠡᠨ ᠦ ᠰᠠᠭᠤᠷᠢ ᠶᠢ ᠲᠠᠯᠪᠢᠭᠰᠠᠨ᠂ ᠲᠡᠭᠦᠨ ᠦ ᠭᠠᠷ ᠡᠭᠦᠨ ᠢ ᠳᠠᠭᠤᠰᠬᠠᠬᠤ ᠪᠣᠯᠣᠨᠠ᠃ ᠲᠡᠭᠡᠪᠡᠯ ᠲᠠ ᠨᠠᠷ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠨᠠᠮᠠᠶᠢ ᠥᠪᠡᠷ ᠤᠷᠤᠭᠤ ᠴᠢᠨᠢ ᠢᠯᠡᠭᠡᠭᠰᠡᠨ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 10 ᠥᠨᠥᠳᠥᠷ ᠢ ᠥᠴᠦᠬᠡᠨ ᠭᠡᠵᠦ ᠬᠡᠨ ᠪᠠᠰᠤᠮᠵᠢᠯᠠᠨᠠ ᠪᠤᠢ︖ ᠲᠡᠳᠡ ᠽᠣᠷᠣᠪᠠᠪᠧᠯ ᠤᠨ ᠭᠠᠷ ᠳᠠᠬᠢ ᠡᠭᠴᠡᠯᠡᠭᠦᠷ ᠢ ᠬᠠᠷᠠᠭᠠᠳ ᠪᠠᠶᠠᠰᠤᠭ᠃
11 ᠪᠢ ᠲᠩᠷᠢ ᠡᠯᠴᠢ ᠳᠤ᠄ 《ᠳ᠋ᠧᠩ ᠤᠨ ᠰᠠᠭᠤᠷᠢ ᠶᠢᠨ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠳᠠᠬᠢ ᠡᠨᠡ ᠬᠣᠶᠠᠷ ᠴᠢᠳᠦᠨ ᠮᠣᠳᠣ ᠨᠢ ᠶᠠᠭᠤ ᠪᠤᠢ︖》 ᠭᠡᠰᠡᠨ ᠢᠶᠡᠨ 12 ᠳᠠᠬᠢᠨ᠄ 《ᠠᠯᠲᠠᠨ ᠲᠣᠰᠣ ᠶᠢ ᠶᠡᠭᠦᠯᠡᠬᠦ ᠬᠣᠶᠠᠷ ᠠᠯᠲᠠᠨ ᠬᠣᠭᠣᠯᠠᠢ ᠶᠢᠨ ᠳᠡᠷᠭᠡᠳᠡᠬᠢ ᠬᠣᠶᠠᠷ ᠴᠢᠳᠦᠨ ᠦ ᠮᠥᠴᠢᠷ ᠨᠢ ᠶᠠᠭᠤ ᠪᠤᠢ︖》 ᠭᠡᠰᠡᠨ ᠳᠦ᠂ 13 ᠲᠡᠷᠡ᠄ 《ᠡᠳᠡᠭᠡᠷ ᠨᠢ ᠶᠠᠭᠤ ᠪᠣᠯᠬᠤ ᠶᠢ ᠴᠢ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖》 ᠭᠡᠯᠡ᠃ ᠪᠢ᠄ 《ᠦᠭᠡᠢ᠂ ᠡᠵᠡᠨ ᠮᠢᠨᠢ》 ᠭᠡᠬᠦ ᠳᠦ᠂ 14 ᠲᠡᠷᠡ᠄ 《ᠡᠳᠡᠭᠡᠷ ᠨᠢ ᠪᠦᠬᠦ ᠳᠡᠯᠡᠬᠡᠢ ᠶᠢᠨ ᠡᠵᠡᠨ ᠦ ᠳᠡᠷᠭᠡᠳᠡ ᠵᠣᠭᠰᠣᠭᠴᠢ ᠲᠣᠰᠣᠯᠠᠭᠳᠠᠭᠰᠠᠨ ᠬᠣᠶᠠᠷ ᠪᠢᠯᠡ》 ᠭᠡᠪᠡ᠃