ᠽᠧᠺᠠᠷᠢᠶᠠ ᠵᠢᠷᠭᠤᠭᠠ
ᠳᠥᠷᠪᠡᠨ ᠲᠡᠷᠭᠡ
1 ᠪᠢ ᠳᠠᠬᠢᠨ ᠨᠢᠳᠦ ᠡᠷᠭᠦᠨ ᠦᠵᠡᠪᠡ᠃ ᠬᠠᠷᠠ᠂ ᠬᠣᠶᠠᠷ ᠠᠭᠤᠯᠠ ᠶᠢᠨ ᠬᠣᠭᠣᠷᠣᠨᠳᠣ ᠠᠴᠠ ᠳᠥᠷᠪᠡᠨ ᠲᠡᠷᠭᠡ ᠭᠠᠷᠴᠤ ᠢᠷᠡᠵᠦ ᠪᠠᠢᠪᠠ᠃ ᠠᠭᠤᠯᠠᠰ ᠨᠢ ᠬᠦᠷᠡᠯ ᠠᠭᠤᠯᠠᠰ ᠠᠵᠢ᠃ 2 ᠡᠬᠢᠨ ᠤ ᠲᠡᠷᠭᠡᠨ ᠳᠦ ᠤᠯᠠᠭᠠᠨ ᠮᠣᠷᠢᠳ᠂ ᠬᠣᠶᠠᠳᠠᠬᠢ ᠲᠡᠷᠭᠡᠨ ᠳᠦ ᠬᠠᠷᠠ ᠮᠣᠷᠢᠳ᠂ 3 ᠭᠤᠷᠪᠠᠳᠠᠬᠢ ᠲᠡᠷᠭᠡᠨ ᠳᠦ ᠴᠠᠭᠠᠨ ᠮᠣᠷᠢᠳ᠂ ᠳᠥᠷᠪᠡᠳᠡᠬᠢ ᠲᠡᠷᠭᠡᠨ ᠳᠦ ᠴᠣᠬᠣᠷ ᠮᠣᠷᠢᠳ ᠬᠥᠯᠯᠡᠭᠰᠡᠨ ᠠᠵᠢ᠂ ᠲᠡᠳᠡ ᠪᠦᠭᠦᠳᠡ ᠬᠦᠴᠦᠷᠬᠡᠭ ᠪᠠᠢᠪᠠ᠃ 4 ᠪᠢ ᠨᠠᠳᠠ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠲᠩᠷᠢ ᠡᠯᠴᠢ ᠳᠤ᠄ 《ᠡᠳᠡᠭᠡᠷ ᠨᠢ ᠶᠠᠭᠤ ᠪᠤᠢ︖ ᠡᠵᠡᠨ ᠮᠢᠨᠢ》 ᠭᠡᠬᠦ ᠳᠦ᠂ 5 ᠲᠩᠷᠢ ᠡᠯᠴᠢ ᠨᠠᠳᠠ ᠳᠤ᠄ 《ᠡᠳᠡᠭᠡᠷ ᠨᠢ ᠪᠦᠬᠦ ᠳᠡᠯᠡᠬᠡᠢ ᠶᠢᠨ ᠡᠵᠡᠨ ᠳᠦ ᠪᠠᠷᠠᠭᠠᠯᠬᠠᠭᠰᠠᠨ ᠤ ᠳᠠᠷᠠᠭᠠ ᠭᠠᠷᠴᠤ ᠪᠤᠢ ᠲᠩᠷᠢ ᠶᠢᠨ ᠳᠥᠷᠪᠡᠨ ᠰᠦᠨᠡᠰᠦ 4 ᠶᠤᠮ᠃ 6 ᠬᠠᠷᠠ ᠮᠣᠷᠢᠳ ᠬᠥᠯᠯᠡᠭᠰᠡᠨ ᠨᠢ ᠤᠮᠠᠷᠠᠲᠤ ᠣᠷᠣᠨ ᠲᠡᠰᠢ᠂ ᠴᠠᠭᠠᠨ ᠨᠤᠭᠤᠳ ᠨᠢ ᠥᠷᠥᠨᠡᠲᠦ ᠣᠷᠣᠨ ᠲᠡᠰᠢ᠂ ᠴᠣᠬᠣᠷ ᠤᠳ ᠨᠢ ᠡᠮᠦᠨᠡᠲᠦ ᠣᠷᠣᠨ ᠲᠡᠰᠢ ᠶᠠᠪᠤᠬᠤ ᠭᠡᠵᠦ ᠪᠠᠢᠨᠠ》 ᠭᠡᠪᠡ᠃ 7 ᠡᠳᠡᠭᠡᠷ ᠬᠦᠴᠦᠲᠦ ᠮᠣᠷᠢᠳ ᠭᠠᠷᠴᠤ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠬᠠᠢᠭᠤᠯ ᠬᠢᠬᠦ ᠭᠡᠵᠦ ᠲᠡᠮᠡᠦᠯᠵᠦ ᠪᠠᠢᠪᠠ᠂ ᠲᠩᠷᠢ ᠡᠯᠴᠢ᠄ 《ᠶᠠᠪᠤ᠂ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠬᠠᠢᠭᠤᠯ ᠬᠢ》 ᠭᠡᠰᠡᠨ ᠳᠦ᠂ ᠲᠡᠳᠡ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠬᠠᠢᠭᠤᠯ ᠬᠢᠪᠡ᠃ 8 ᠳᠠᠷᠠᠭᠠ ᠨᠢ ᠲᠡᠷᠡ ᠨᠠᠳᠠ ᠳᠤ ᠥᠨᠳᠥᠷ ᠳᠠᠭᠤ ᠪᠠᠷ᠄ 《ᠬᠠᠷᠠ᠂ ᠤᠮᠠᠷᠠᠲᠤ ᠣᠷᠣᠨ ᠲᠡᠰᠢ ᠶᠠᠪᠤᠭᠰᠠᠳ ᠨᠢ ᠤᠮᠠᠷᠠᠲᠤ ᠣᠷᠣᠨ ᠳᠤ ᠰᠡᠳᠬᠢᠯ ᠢ ᠮᠢᠨᠢ ᠠᠭᠤᠵᠢᠷᠠᠭᠤᠯᠤᠯᠠ》 ᠭᠡᠪᠡ᠃
ᠵᠠᠬᠢᠷᠬᠤ ᠲᠠᠬᠢᠯᠴᠢ 《ᠨᠠᠬᠢᠶᠠ》
9 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠭᠰᠡᠨ ᠨᠢ᠄ 10 《ᠴᠥᠯᠡᠭᠳᠡᠭᠰᠡᠳ ᠦᠨ ᠳᠤᠮᠳᠠ ᠪᠠᠪᠢᠯᠣᠨ ᠠᠴᠠ ᠪᠤᠴᠠᠵᠤ ᠢᠷᠡᠭᠰᠡᠨ ᠾᠧᠯᠳᠠᠢ᠂ ᠲᠣᠪᠢᠶᠠ᠂ ᠶᠧᠳᠠᠢᠶᠠ ᠨᠠᠷ ᠠᠴᠠ ᠬᠠᠨᠳᠢᠪ ᠠᠪᠴᠤ᠂ ᠲᠡᠷᠡ ᠡᠳᠦᠷ ᠲᠡᠭᠡᠨ ᠽᠧᠹᠠᠨᠢᠶᠠ ᠶᠢᠨ ᠬᠥᠪᠡᠭᠦᠨ ᠶᠣᠰᠢᠶᠠ ᠶᠢᠨ ᠭᠡᠷ ᠲᠦ ᠣᠴᠢᠭᠠᠳ 11 ᠲᠡᠷᠡ ᠠᠯᠲᠠ ᠮᠥᠩᠭᠥ ᠪᠡᠷ ᠲᠢᠲᠢᠮ ᠬᠢ᠃ ᠲᠡᠭᠦᠨ ᠢ ᠶᠧᠬᠣᠽᠠᠳᠠᠺ ᠤᠨ ᠬᠥᠪᠡᠭᠦᠨ᠂ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠶᠣᠱᠦ᠋ᠶᠠ ᠶᠢᠨ ᠲᠣᠯᠣᠭᠠᠢ ᠳᠤ ᠵᠡᠭᠦᠯᠭᠡᠭᠡᠳ᠂ 12 ᠲᠡᠭᠦᠨ ᠳᠦ ᠡᠢᠨ ᠬᠦ ᠶᠠᠷᠢ᠄ 〈ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠠᠩ᠋ᠬᠠᠷᠤᠭᠲᠤᠨ︕ 〈ᠨᠠᠬᠢᠶᠠ〉 ᠭᠡᠭᠳᠡᠳᠡᠭ ᠬᠥᠮᠦᠨ ᠪᠠᠢᠨᠠ᠃ ᠲᠡᠷᠡ ᠪᠡᠷ ᠳᠣᠣᠷᠠ ᠠᠴᠠ ᠪᠠᠨ ᠨᠠᠬᠢᠶᠠᠯᠠᠵᠤ ᠶᠣᠬᠣᠸᠠ ᠶᠢᠨ ᠣᠷᠳᠣᠨ ᠢ ᠪᠠᠷᠢᠬᠤ ᠪᠣᠯᠣᠨᠠ᠂ 13 ᠶᠣᠬᠣᠸᠠ ᠶᠢᠨ ᠣᠷᠳᠣᠨ ᠢ ᠪᠠᠷᠢᠬᠤ ᠬᠥᠮᠦᠨ ᠨᠢ ᠲᠡᠷᠡ ᠶᠤᠮ᠃ ᠲᠡᠷᠡ ᠠᠯᠳᠠᠷ ᠬᠦᠨᠳᠦ ᠶᠢ ᠬᠦᠷᠲᠡᠵᠦ᠂ ᠥᠪᠡᠷ ᠦᠨ ᠢᠶᠠᠨ ᠰᠡᠨᠲᠢ ᠳᠡᠭᠡᠷᠡ ᠰᠠᠭᠤᠵᠤ ᠬᠠᠭᠠᠨᠴᠢᠯᠠᠨᠠ᠃ ᠡᠢᠨ ᠬᠦ ᠲᠡᠷᠡ ᠥᠪᠡᠷ ᠦᠨ ᠢᠶᠠᠨ ᠰᠡᠨᠲᠢ ᠳᠤ ᠵᠠᠯᠠᠷᠠᠬᠤ ᠲᠠᠬᠢᠯᠴᠢ ᠪᠣᠯᠵᠤ᠂ ᠬᠣᠶᠠᠷ ᠠᠯᠪᠠ ᠶᠢᠨ ᠬᠣᠭᠣᠷᠣᠨᠳᠣᠬᠢ ᠡᠶᠡ ᠡᠪ ᠪᠣᠯᠣᠨᠠ᠃ 14 ᠲᠢᠲᠢᠮ ᠨᠢ ᠾᠧᠯᠳᠠᠢ᠂ ᠲᠣᠪᠢᠶᠠ᠂ ᠶᠧᠳᠠᠢᠶᠠ ᠪᠣᠯᠣᠨ ᠽᠧᠹᠠᠨᠢᠶᠠ ᠶᠢᠨ ᠬᠥᠪᠡᠭᠦᠨ ᠾᠧᠨ ᠤ ᠳᠤᠷᠠᠰᠬᠠᠯ ᠪᠣᠯᠵᠤ ᠶᠣᠬᠣᠸᠠ ᠶᠢᠨ ᠣᠷᠳᠣᠨ ᠳᠤ ᠪᠠᠢᠬᠤ ᠪᠣᠯᠣᠨᠠ᠃
15 ᠠᠯᠤᠰ ᠬᠣᠯᠠ ᠶᠢᠨ ᠬᠢᠨ ᠴᠤ ᠢᠷᠡᠵᠦ ᠶᠣᠬᠣᠸᠠ ᠶᠢᠨ ᠣᠷᠳᠣᠨ ᠢ ᠪᠣᠰᠬᠠᠨᠠ᠃ ᠲᠡᠭᠡᠬᠦ ᠳᠦ ᠲᠠ ᠨᠠᠷ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠨᠠᠮᠠᠶᠢ ᠥᠪᠡᠷ ᠤᠷᠤᠭᠤ ᠴᠢᠨᠢ ᠢᠯᠡᠭᠡᠭᠰᠡᠨ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ ᠲᠠ ᠨᠠᠷ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠳᠠᠭᠤ ᠬᠣᠭᠣᠯᠠᠢ ᠶᠢ ᠦᠨᠡᠨᠴᠢ ᠪᠠᠷ ᠳᠠᠭᠠᠪᠠᠯ᠂ ᠡᠨᠡ ᠪᠦᠭᠦᠳᠡ ᠪᠡᠶᠡᠯᠡᠭᠳᠡᠬᠦ ᠪᠣᠯᠣᠨᠠ〉》 ᠭᠡᠪᠡ᠃