ᠽᠧᠺᠠᠷᠢᠶᠠ ᠠᠷᠪᠠᠨ ᠨᠢᠭᠡ
1 ᠬᠠᠭᠠᠯᠭᠠ ᠪᠠᠨ ᠨᠡᠭᠡᠭᠡ᠂ ᠯᠧᠪᠠᠨᠣᠨ ᠡ᠂ ᠬᠤᠱᠢ ᠮᠣᠳᠣ ᠶᠢ ᠴᠢᠨᠢ ᠭᠠᠯ ᠵᠠᠯᠭᠢᠨᠠ᠃
2 ᠠᠭᠠᠷᠤ ᠮᠣᠳᠣᠳ ᠡ᠂ ᠤᠬᠢᠯᠠᠭᠲᠤᠨ ᠬᠤᠱᠢ ᠮᠣᠳᠣ ᠤᠨᠠᠵᠤ ᠰᠠᠭᠯᠠᠭᠠᠷ ᠮᠣᠳᠣᠳ ᠰᠦᠢᠷᠡᠵᠡᠢ ᠪᠠᠱᠠᠨ ᠤ ᠴᠠᠷᠠᠰᠤᠨ ᠮᠣᠳᠣᠳ ᠡ᠂ ᠤᠬᠢᠯᠠᠭᠲᠤᠨ ᠥᠳᠬᠡᠨ ᠣᠢ ᠴᠠᠪᠴᠢᠭᠳᠠᠵᠠᠢ᠃
3 ᠬᠣᠨᠢᠴᠢᠳ ᠤᠨ ᠤᠬᠢᠯᠠᠬᠤ ᠳᠠᠭᠤ ᠶᠢ ᠰᠣᠨᠣᠰ᠂ ᠲᠡᠳᠡᠨ ᠦ ᠰᠦᠷ ᠵᠢᠪᠬᠤᠯᠠᠩ ᠰᠦᠢᠷᠡᠵᠡᠢ ᠠᠷᠰᠯᠠᠨ ᠨᠤᠭᠤᠳ ᠤᠨ ᠠᠷᠬᠢᠷᠠᠬᠤ ᠳᠠᠭᠤ ᠶᠢ ᠰᠣᠨᠣᠰ᠂ ᠶᠣᠷᠳᠠᠨ ᠤ ᠰᠦᠷ ᠬᠦᠴᠦ ᠰᠦᠢᠷᠡᠵᠡᠢ᠃
ᠬᠣᠶᠠᠷ ᠲᠥᠷᠥᠯ ᠦᠨ ᠬᠣᠨᠢᠴᠢᠨ
4 ᠮᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠤᠯᠠ᠄ 《ᠴᠢ ᠨᠢᠳᠤᠯᠤᠭᠳᠠᠬᠤ ᠬᠣᠨᠢᠨ ᠰᠦᠷᠦᠭ ᠢ ᠬᠠᠷᠢᠭᠤᠯ᠃ 5 ᠲᠡᠳᠡᠨ ᠢ ᠬᠤᠳᠠᠯᠳᠤᠨ ᠠᠪᠤᠭᠴᠢᠳ ᠨᠢ ᠲᠡᠳᠡᠨ ᠢ ᠨᠢᠳᠤᠯᠤᠭᠰᠠᠨ ᠴᠤ ᠰᠢᠳᠬᠡᠭᠦᠯᠦᠯ ᠦᠭᠡᠢ ᠥᠩᠭᠡᠷᠡᠵᠦ᠂ ᠲᠡᠳᠡᠨ ᠢ ᠬᠤᠳᠠᠯᠳᠤᠭᠴᠢᠳ ᠨᠢ᠄ 〈ᠶᠣᠬᠣᠸᠠ ᠶᠢ ᠮᠠᠭᠲᠠᠶᠠ᠂ ᠪᠢ ᠪᠠᠶᠠᠵᠢᠯᠠ〉 ᠭᠡᠯᠴᠡᠨᠡ᠃ ᠲᠡᠳᠡᠨ ᠦ ᠬᠣᠨᠢᠴᠢᠳ ᠴᠤ ᠲᠡᠳᠡᠨ ᠢ ᠥᠷᠥ ᠡᠪᠡᠳᠬᠦ ᠦᠭᠡᠢ᠃ 6 ᠤᠴᠢᠷ ᠨᠢ ᠪᠢ ᠡᠨᠡ ᠨᠤᠲᠤᠭ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠥᠷᠥ ᠡᠪᠡᠳᠬᠦ ᠪᠡᠨ ᠪᠣᠯᠢᠨᠠ᠂ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠬᠠᠷᠠ᠂ ᠪᠢ ᠥᠪᠡᠷ ᠢᠶᠡᠨ ᠲᠡᠳᠡᠨ ᠦ ᠬᠥᠮᠦᠨ ᠪᠦᠷᠢ ᠶᠢ ᠬᠥᠷᠰᠢ ᠶᠢᠨ ᠬᠢᠨᠢ ᠭᠠᠷ ᠲᠤ᠂ ᠮᠥᠨ ᠬᠠᠭᠠᠨ ᠤ ᠬᠢᠨᠢ ᠭᠠᠷ ᠲᠤ ᠣᠷᠣᠭᠤᠯᠤᠨᠠ᠃ ᠡᠨᠡ ᠨᠤᠲᠤᠭ ᠤᠨ ᠬᠢᠨ ᠲᠡᠳᠡᠨ ᠳᠦ ᠴᠣᠬᠢᠭᠳᠠᠭᠰᠠᠨ ᠴᠤ᠂ ᠪᠢ ᠲᠡᠳᠡᠨ ᠦ ᠭᠠᠷ ᠠᠴᠠ ᠠᠪᠤᠷᠠᠬᠤ ᠦᠭᠡᠢ》 ᠭᠡᠪᠡ᠃
7 ᠢᠩᠭᠢᠭᠡᠳ ᠪᠢ ᠨᠢᠳᠤᠯᠤᠭᠳᠠᠬᠤ ᠰᠦᠷᠦᠭ᠂ ᠢᠯᠠᠩ᠋ᠭᠤᠶᠠ ᠲᠡᠷᠡ ᠰᠦᠷᠦᠭ ᠦᠨ ᠪᠠᠭᠤᠷᠠᠢ ᠶᠢ ᠨᠢ ᠬᠠᠷᠢᠭᠤᠯᠵᠠᠢ᠃ ᠪᠢ ᠬᠣᠶᠠᠷ ᠲᠠᠶᠠᠭ ᠠᠪᠴᠤ᠂ ᠨᠢᠭᠡ ᠶᠢ ᠨᠢ 《ᠲᠠᠭᠠᠯᠠᠯ》᠂ ᠨᠥᠭᠥᠭᠡ ᠶᠢ ᠨᠢ 《ᠨᠢᠭᠡᠳᠦᠯ》 ᠭᠡᠵᠦ ᠨᠡᠷᠡᠯᠡᠪᠡ᠃ 8 ᠪᠢ ᠰᠦᠷᠦᠭ ᠢᠶᠡᠨ ᠬᠠᠷᠢᠭᠤᠯᠬᠤ ᠳᠠᠭᠠᠨ ᠰᠠᠷᠠ ᠶᠢᠨ ᠳᠣᠲᠣᠷᠠ ᠭᠤᠷᠪᠠᠨ ᠬᠣᠨᠢᠴᠢᠨ ᠬᠠᠯᠠᠪᠠ᠂ ᠪᠢ ᠲᠡᠷᠡ ᠰᠦᠷᠦᠭ ᠡᠴᠡ ᠵᠠᠯᠬᠠᠵᠤ᠂ ᠲᠡᠳᠡ ᠴᠤ ᠨᠠᠮᠠᠶᠢ ᠵᠢᠭ᠍ᠰᠢᠵᠡᠢ᠃ 9 ᠢᠩᠭᠢᠭᠡᠳ ᠪᠢ᠄ 《ᠲᠠ ᠨᠠᠷ ᠢ ᠬᠠᠷᠢᠭᠤᠯᠬᠤ ᠪᠠᠨ ᠪᠣᠯᠢᠶᠠ》 ᠭᠡᠳ 《ᠦᠬᠦᠬᠦ ᠶᠣᠰᠣᠲᠠᠢ ᠨᠢ ᠦᠬᠦᠭ᠂ ᠮᠥᠬᠥᠬᠦ ᠶᠣᠰᠣᠲᠠᠢ ᠨᠢ ᠮᠥᠬᠥᠭ᠂ ᠦᠯᠡᠳᠡᠭᠰᠡᠳ ᠨᠢ ᠨᠢᠭᠡ ᠨᠢᠭᠡᠨ ᠦ ᠪᠠᠨ ᠮᠢᠬᠠ ᠶᠢ ᠢᠳᠡᠭ》 ᠭᠡᠪᠡ᠃ 10 ᠪᠢ 《ᠲᠠᠭᠠᠯᠠᠯ》 ᠭᠡᠰᠡᠨ ᠲᠠᠶᠠᠭ ᠢᠶᠠᠨ ᠬᠤᠭᠤᠯᠵᠤ᠂ ᠪᠦᠬᠦ ᠦᠨᠳᠦᠰᠦᠲᠡᠨ ᠲᠡᠢ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠪᠡᠨ ᠴᠤᠴᠠᠯᠪᠠ᠃ 11 ᠲᠡᠷᠡ ᠡᠳᠦᠷ ᠲᠡᠢᠨ ᠬᠦ ᠴᠤᠴᠠᠯᠤᠭᠰᠠᠨ ᠳᠤ᠂ ᠨᠠᠮᠠᠶᠢ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠰᠦᠷᠦᠭ ᠦᠨ ᠪᠠᠭᠤᠷᠠᠢ ᠨᠢ ᠡᠨᠡ ᠪᠣᠯ ᠶᠣᠬᠣᠸᠠ ᠶᠢᠨ ᠦᠭᠡ ᠪᠠᠢᠭᠰᠠᠨ ᠢ ᠣᠢᠯᠠᠭᠠᠪᠠ᠃ 12 ᠪᠢ ᠲᠡᠨᠳᠡᠬᠢ ᠶᠢᠨ ᠬᠢᠨ ᠳᠤ᠄ 《ᠬᠡᠷᠪᠡ ᠲᠠ ᠨᠠᠷ ᠰᠠᠢᠨ ᠭᠡᠵᠦ ᠦᠵᠡᠪᠡᠯ ᠨᠠᠳᠠ ᠳᠤ ᠬᠥᠯᠥᠰᠥ ᠶᠢ ᠮᠢᠨᠢ ᠥᠭ᠂ ᠲᠡᠭᠡᠬᠦ ᠦᠭᠡᠢ ᠪᠣᠯ ᠪᠣᠯᠢ》 ᠭᠡᠬᠦ ᠳᠦ᠂ ᠲᠡᠳᠡ ᠮᠢᠨᠦ ᠬᠥᠯᠥᠰᠥ ᠭᠡᠵᠦ ᠭᠤᠴᠢᠨ ᠮᠥᠩᠭᠥᠨ ᠱᠧᠺᠧᠯ 8 ᠬᠡᠮᠵᠢᠵᠦ ᠥᠭᠪᠡ᠃ 13 ᠨᠠᠮᠠᠶᠢ ᠦᠨᠡᠯᠡᠭᠰᠡᠨ ᠡᠨᠡ ᠬᠦ ᠭᠠᠢᠬᠠᠯᠲᠠᠢ ᠦᠨᠡ ᠶᠢᠨ ᠬᠢᠨᠢ ᠲᠤᠬᠠᠢ ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠸᠠᠭᠠᠷᠴᠢᠨ ᠤ ᠬᠢᠨ ᠤ ᠤᠷᠤᠭᠤ ᠰᠢᠳᠡ》 ᠭᠡᠰᠡᠨ ᠳᠦ᠂ ᠪᠢ ᠭᠤᠴᠢᠨ ᠮᠥᠩᠭᠥᠨ ᠱᠧᠺᠧᠯ ᠠᠪᠴᠤ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠤᠷᠤᠭᠤ᠂ ᠸᠠᠭᠠᠷᠴᠢᠨ ᠤ ᠬᠢᠨ ᠤ ᠤᠷᠤᠭᠤ ᠰᠢᠳᠡᠪᠡ᠃ 14 ᠲᠡᠭᠡᠭᠡᠳ ᠪᠢ 《ᠨᠢᠭᠡᠳᠦᠯ》 ᠭᠡᠭᠳᠡᠳᠡᠭ ᠨᠥᠭᠥᠭᠡ ᠲᠠᠶᠠᠭ ᠢᠶᠠᠨ ᠬᠤᠭᠤᠯᠵᠤ᠂ ᠶᠦᠳᠠ ᠪᠠ ᠢᠰᠷᠧᠯ ᠤᠨ ᠬᠣᠭᠣᠷᠣᠨᠳᠣᠬᠢ ᠠᠬᠠ ᠳᠡᠭᠦᠦᠰ ᠦᠨ ᠪᠠᠷᠢᠯᠳᠤᠯᠭᠠ ᠶᠢ ᠴᠤᠴᠠᠯᠪᠠ᠃
15 ᠲᠡᠭᠡᠬᠦ ᠳᠦ ᠶᠣᠬᠣᠸᠠ ᠨᠠᠳᠠ ᠳᠤ ᠠᠢᠯᠠᠳᠤᠭᠰᠠᠨ ᠨᠢ᠄ 《ᠴᠢ ᠪᠠᠰᠠ ᠮᠤᠩ᠋ᠬᠠᠭ ᠬᠣᠨᠢᠴᠢᠨ ᠤ ᠡᠳ᠋ᠯᠡᠯ ᠢ ᠠᠪᠤᠭᠠᠳ ᠢᠷᠡ᠂ 16 ᠬᠠᠷᠠ︕ ᠪᠢ ᠡᠨᠡ ᠭᠠᠵᠠᠷ ᠲᠤ ᠨᠢᠭᠡᠨ ᠬᠣᠨᠢᠴᠢᠨ ᠢ ᠪᠣᠰᠬᠠᠨᠠ᠂ ᠲᠡᠷᠡ ᠮᠥᠬᠥᠵᠦ ᠪᠤᠢ ᠶᠢ ᠨᠢ ᠬᠠᠯᠠᠮᠵᠢᠯᠠᠬᠤ ᠦᠭᠡᠢ᠂ ᠲᠡᠨᠦᠵᠦ ᠪᠤᠢ ᠶᠢ ᠨᠢ ᠬᠠᠢᠬᠤ ᠦᠭᠡᠢ᠂ ᠭᠡᠮᠲᠦᠭᠰᠡᠨ ᠢ ᠨᠢ ᠡᠮᠴᠢᠯᠡᠬᠦ ᠦᠭᠡᠢ᠂ ᠬᠦᠴᠦ ᠲᠠᠢ ᠶᠢ ᠨᠢ ᠲᠡᠵᠢᠭᠡᠬᠦ ᠦᠭᠡᠢ᠂ ᠬᠠᠷᠢᠨ ᠲᠠᠷᠭᠤᠨ ᠤ ᠬᠢᠨᠢ ᠮᠢᠬᠠ ᠶᠢ ᠢᠳᠡᠵᠦ᠂ ᠲᠤᠭᠤᠷᠠᠢ ᠶᠢ ᠨᠢ ᠲᠠᠰᠤᠳᠠᠬᠤ ᠪᠣᠯᠣᠨᠠ᠃
17 ᠭᠠᠰᠠᠯᠠᠩᠲᠠᠶᠠ᠂ ᠰᠦᠷᠦᠭ ᠢᠶᠡᠨ ᠣᠷᠬᠢᠭᠰᠠᠨ ᠬᠡᠷᠡᠭ ᠦᠭᠡᠢ ᠬᠣᠨᠢᠴᠢᠨ ᠡ︕ ᠢᠯᠳᠦ ᠲᠡᠭᠦᠨ ᠦ ᠭᠠᠷ᠂ ᠲᠡᠭᠦᠨ ᠦ ᠪᠠᠷᠠᠭᠤᠨ ᠨᠢᠳᠦᠨ ᠳᠡᠭᠡᠷᠡ ᠪᠠᠢᠬᠤ ᠪᠣᠯᠣᠨᠠ︕ ᠲᠡᠭᠦᠨ ᠦ ᠭᠠᠷ ᠪᠦᠬᠦᠯᠢ ᠪᠠᠷ ᠢᠶᠠᠨ ᠬᠠᠲᠠᠵᠤ ᠪᠠᠷᠠᠭᠤᠨ ᠨᠢᠳᠦ ᠨᠢ ᠪᠦᠷᠢᠮᠦᠰᠦᠨ ᠬᠠᠷᠠᠩ᠋ᠭᠤᠢᠯᠠᠨᠠ᠃》