ᠽᠧᠺᠠᠷᠢᠶᠠ ᠠᠷᠪᠠᠨ ᠬᠣᠶᠠᠷ
ᠶᠧᠷᠦ᠋ᠰᠠᠯᠧᠮ ᠤᠨ ᠢᠯᠠᠯᠲᠠ
1 ᠢᠰᠷᠧᠯ ᠤᠨ ᠲᠠᠯᠠ ᠪᠠᠷ ᠬᠢ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢᠨ ᠰᠡᠷᠡᠮᠵᠢᠯᠡᠭᠦᠯᠦᠯᠭᠡ᠄ ᠲᠩᠷᠢ ᠶᠢ ᠳᠡᠯᠭᠡᠵᠦ᠂ ᠳᠡᠯᠡᠬᠡᠢ ᠶᠢᠨ ᠰᠠᠭᠤᠷᠢ ᠶᠢ ᠲᠠᠯᠪᠢᠵᠤ᠂ ᠬᠥᠮᠦᠨ ᠦ ᠳᠣᠲᠣᠷᠠ ᠰᠦᠨᠡᠰᠦ ᠶᠢ ᠬᠡᠯᠪᠡᠷᠢᠵᠢᠭᠦᠯᠦᠭᠴᠢ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 2 《ᠬᠠᠷᠠ᠂ ᠶᠦᠳᠠ ᠴᠤ ᠶᠧᠷᠦ᠋ᠰᠠᠯᠧᠮ ᠲᠠᠢ ᠬᠠᠮᠲᠤ ᠪᠦᠰᠡᠯᠡᠭᠳᠡᠬᠦ ᠳᠦ᠂ ᠪᠢ ᠶᠧᠷᠦ᠋ᠰᠠᠯᠧᠮ ᠢ ᠡᠷᠭᠢᠨ ᠲᠣᠭᠣᠷᠢᠨ ᠤ ᠪᠦᠬᠦ ᠦᠨᠳᠦᠰᠦᠲᠡᠨ ᠢ ᠭᠤᠢᠪᠢᠭᠤᠯᠬᠤ ᠠᠶᠠᠭᠠ ᠪᠣᠯᠭᠠᠨᠠ᠂ 3 ᠳᠡᠯᠡᠬᠡᠢ ᠶᠢᠨ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠲᠡᠭᠦᠨ ᠤᠷᠤᠭᠤ ᠴᠤᠭᠯᠠᠷᠠᠭᠰᠠᠨ ᠴᠤ ᠲᠡᠷᠡ ᠡᠳᠦᠷ ᠪᠢ ᠶᠧᠷᠦ᠋ᠰᠠᠯᠧᠮ ᠢ ᠪᠦᠬᠦ ᠦᠨᠳᠦᠰᠦᠲᠡᠨ ᠦ ᠡᠷᠭᠦᠵᠦ ᠳᠡᠢᠯᠦᠰᠢ ᠦᠭᠡᠢ ᠴᠢᠯᠠᠭᠤ ᠪᠣᠯᠭᠠᠨᠠ᠃ ᠲᠡᠭᠦᠨ ᠢ ᠡᠷᠭᠦᠬᠦ ᠭᠡᠭᠴᠢᠳ ᠯᠠᠪᠲᠠᠢ ᠭᠡᠮᠲᠦᠬᠦ ᠪᠣᠯᠣᠨᠠ᠃ 4 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠂ ᠲᠡᠷᠡ ᠡᠳᠦᠷ ᠪᠢ ᠮᠣᠷᠢᠳ ᠢ ᠨᠢ ᠴᠣᠬᠢᠵᠤ ᠥᠷᠭᠥᠭᠡᠨ᠂ ᠮᠣᠷᠢᠲᠠᠳ ᠢ ᠨᠢ ᠴᠣᠬᠢᠵᠤ ᠰᠠᠮᠭᠠᠷᠳᠠᠭᠤᠯᠤᠨᠠ᠃ ᠪᠢ ᠢᠰᠷᠧᠯ ᠤᠨ ᠭᠡᠷ ᠳᠡᠭᠡᠷᠡ ᠨᠢᠳᠦ ᠲᠠᠯᠪᠢᠵᠤ᠂ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠠᠮᠤᠭ ᠮᠣᠷᠢ ᠶᠢ ᠴᠣᠬᠢᠵᠤ ᠰᠣᠬᠣᠯᠠᠨᠠ᠃ 5 ᠲᠡᠭᠡᠬᠦ ᠳᠦ ᠶᠦᠳᠠ ᠶᠢᠨ ᠤᠳᠤᠷᠢᠳᠤᠭᠴᠢᠳ ᠵᠢᠷᠦᠬᠡᠨ ᠳᠡᠭᠡᠨ᠄ 《ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠤᠷᠬᠠᠨ᠂ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠠᠴᠢ ᠪᠠᠷ ᠬᠦᠴᠦᠷᠬᠡᠭ ᠪᠣᠯᠳᠠᠭ》 ᠭᠡᠯᠴᠡᠨᠡ᠃
6 ᠲᠡᠷᠡ ᠡᠳᠦᠷ ᠪᠢ ᠶᠦᠳᠠ ᠶᠢᠨ ᠤᠳᠤᠷᠢᠳᠤᠭᠴᠢᠳ ᠢ ᠵᠡᠷᠭᠡᠯᠡᠭᠰᠡᠨ ᠮᠣᠳᠣᠨ ᠳᠤᠮᠳᠠᠬᠢ ᠭᠠᠯᠲᠤ ᠵᠤᠤᠬᠠ᠂ ᠶᠡᠦᠵᠢᠯᠡᠭᠰᠡᠨ ᠲᠠᠷᠢᠶᠠᠨ ᠳᠤᠮᠳᠠᠬᠢ ᠭᠠᠯᠲᠤ ᠪᠠᠮᠪᠠᠷ ᠮᠡᠲᠦ ᠪᠠᠢᠯᠭᠠᠨᠠ᠂ ᠲᠡᠳᠡ ᠪᠠᠷᠠᠭᠤᠨ᠂ ᠵᠡᠭᠦᠨ ᠲᠠᠯᠠ ᠶᠢᠨ ᠢᠶᠠᠨ ᠪᠦᠰᠡᠯᠡᠭᠰᠡᠨ ᠦᠨᠳᠦᠰᠦᠲᠡᠨ ᠢ ᠪᠦᠭᠦᠳᠡ ᠶᠢ ᠴᠥᠯᠮᠥᠬᠦ ᠳᠦ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠥᠪᠡᠷᠰᠡᠳ ᠦᠨ ᠢᠶᠠᠨ ᠨᠤᠲᠤᠭ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠬᠤ ᠪᠣᠯᠣᠨᠠ᠃
7 ᠭᠡᠪᠡᠴᠦ ᠶᠣᠬᠣᠸᠠ ᠶᠦᠳᠠ ᠶᠢᠨ ᠭᠡᠷ ᠦᠨ ᠬᠢᠨ ᠢ ᠲᠦᠷᠦᠭᠦᠨ ᠳᠦᠨᠢ ᠠᠪᠤᠷᠠᠬᠤ ᠲᠤᠯᠠ ᠳ᠋ᠠᠸᠢᠳ᠋ ᠤᠨ ᠭᠡᠷ ᠦᠨ ᠠᠯᠳᠠᠷ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠤᠨ ᠠᠯᠳᠠᠷ ᠨᠢ ᠶᠦᠳᠠ ᠶᠢᠨ ᠬᠢᠨ ᠡᠴᠡ ᠳᠠᠪᠠᠬᠤ ᠦᠭᠡᠢ᠃ 8 ᠲᠡᠷᠡ ᠡᠳᠦᠷ ᠶᠣᠬᠣᠸᠠ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠬᠠᠮᠠᠭᠠᠯᠠᠨᠠ᠂ ᠲᠡᠷᠡ ᠡᠳᠦᠷ ᠲᠡᠳᠡᠨ ᠦ ᠳᠣᠷᠣᠢ ᠨᠢᠭᠡ ᠨᠢ ᠴᠤ ᠳ᠋ᠠᠸᠢᠳ᠋ ᠰᠢᠭ᠋ ᠪᠣᠯᠵᠤ᠂ ᠳ᠋ᠠᠸᠢᠳ᠋ ᠤᠨ ᠭᠡᠷ ᠦᠨ ᠬᠢᠨ ᠨᠢ ᠪᠤᠷᠬᠠᠨ ᠰᠢᠭ᠋᠂ ᠲᠡᠳᠡᠨ ᠦ ᠡᠮᠦᠨᠡ ᠶᠠᠪᠤᠳᠠᠭ ᠶᠣᠬᠣᠸᠠ ᠶᠢᠨ ᠡᠯᠴᠢ ᠰᠢᠭ ᠪᠠᠢᠬᠤ ᠪᠣᠯᠣᠨᠠ᠃ 9 ᠶᠧᠷᠦ᠋ᠰᠠᠯᠧᠮ ᠢ ᠳᠣᠪᠲᠣᠯᠣᠭᠴᠢ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠢ ᠪᠢ ᠲᠡᠷᠡ ᠡᠳᠦᠷ ᠤᠰᠠᠳᠬᠠᠬᠤ ᠶᠢ ᠵᠣᠷᠢᠨᠠ᠃
ᠴᠣᠭᠣᠴᠢᠭᠰᠠᠨ ᠨᠢᠭᠡᠨ ᠢᠶᠡᠨ ᠬᠠᠷᠠᠨᠠ
10 ᠪᠢ ᠳ᠋ᠠᠸᠢᠳ᠋ ᠤᠨ ᠭᠡᠷ ᠳᠡᠭᠡᠷᠡ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠳᠡᠭᠡᠷᠡ ᠢᠪᠡᠭᠡᠯ ᠪᠠ ᠳᠠᠭᠠᠳᠬᠠᠯ ᠤᠨ ᠰᠦᠨᠡᠰᠦ ᠶᠢ ᠴᠢᠳᠬᠤᠨᠠ᠃ ᠲᠡᠳᠡ ᠨᠠᠮᠠᠶᠢ᠂ ᠥᠪᠡᠷᠰᠡᠳ ᠦᠨ ᠢᠶᠠᠨ ᠵᠢᠳᠠᠯᠠᠭᠰᠠᠨ ᠨᠢᠭᠡᠨ ᠢ ᠬᠠᠷᠠᠵᠤ᠂ ᠴᠣᠷ ᠤᠨ ᠭᠠᠭᠴᠠ ᠬᠦᠦ ᠶᠢᠨ ᠢᠶᠠᠨ ᠲᠥᠯᠥᠭᠡ ᠭᠠᠰᠢᠭᠤᠳᠠᠬᠤ ᠮᠡᠲᠦ ᠲᠡᠭᠦᠨ ᠦ ᠲᠥᠯᠥᠭᠡ ᠭᠠᠰᠢᠭᠤᠳᠠᠨᠠ᠂ ᠤᠤᠭᠠᠨ ᠬᠦᠦ ᠶᠢᠨ ᠢᠶᠠᠨ ᠲᠥᠯᠥᠭᠡ ᠭᠠᠰᠠᠯᠬᠤ ᠰᠢᠭ᠋ ᠭᠠᠰᠠᠯᠬᠤ ᠪᠣᠯᠣᠨᠠ᠃ 11 ᠲᠡᠷᠡ ᠡᠳᠦᠷ ᠶᠧᠷᠦ᠋ᠰᠠᠯᠧᠮ ᠳᠤ ᠠᠰᠤᠷᠤ ᠶᠡᠬᠡ ᠭᠠᠰᠢᠭᠤᠳᠠᠯ᠂ ᠮᠧᠭᠢᠳᠣ᠋ ᠶᠢᠨ ᠲᠠᠯᠠ ᠳᠠᠬᠢ ᠬᠠᠳᠠᠳ᠋ ᠷᠢᠮᠣᠨ ᠳᠤ ᠲᠣᠬᠢᠶᠠᠯᠳᠤᠭᠰᠠᠨ ᠰᠢᠭ᠋ ᠭᠠᠰᠢᠭᠤᠳᠠᠯ ᠪᠠᠢᠬᠤ ᠪᠣᠯᠣᠨᠠ᠃ 12 ᠨᠤᠲᠤᠭ ᠤᠨ ᠬᠢᠨ ᠠᠢᠮᠠᠭ ᠠᠢᠮᠠᠭ ᠢᠶᠠᠷ ᠢᠶᠠᠨ ᠭᠠᠰᠢᠭᠤᠳᠠᠨᠠ᠂ ᠳ᠋ᠠᠸᠢᠳ᠋ ᠤᠨ ᠭᠡᠷ ᠦᠨ ᠬᠢᠨ ᠲᠤᠰ ᠲᠠᠭᠠᠨ᠂ ᠲᠡᠳᠡᠨ ᠦ ᠡᠬᠡᠨᠡᠷ ᠤᠳ ᠲᠤᠰ ᠲᠠᠭᠠᠨ᠂ ᠨᠠᠲ᠋ᠠᠨ ᠤ ᠭᠡᠷ ᠦᠨ ᠬᠢᠨ ᠲᠤᠰ ᠲᠠᠭᠠᠨ᠂ ᠲᠡᠳᠡᠨ ᠦ ᠡᠬᠡᠨᠡᠷ ᠤᠳ ᠲᠤᠰ ᠲᠠᠭᠠᠨ᠂ 13 ᠯᠧᠸᠢ ᠶᠢᠨ ᠭᠡᠷ ᠦᠨ ᠬᠢᠨ ᠲᠤᠰ ᠲᠠᠭᠠᠨ᠂ ᠲᠡᠳᠡᠨ ᠦ ᠡᠬᠡᠨᠡᠷ ᠤᠳ ᠲᠤᠰ ᠲᠠᠭᠠᠨ᠂ ᠱᠢᠮᠧᠶᠢ ᠶᠢᠨ ᠠᠢᠮᠠᠭ ᠲᠤᠰ ᠲᠠᠭᠠᠨ᠂ ᠲᠡᠳᠡᠨ ᠦ ᠡᠬᠡᠨᠡᠷ ᠤᠳ ᠲᠤᠰ ᠲᠠᠭᠠᠨ᠂ 14 ᠪᠤᠰᠤᠳ ᠪᠦᠬᠦ ᠠᠢᠮᠠᠭ ᠴᠤ ᠲᠤᠰ ᠲᠤᠰ ᠲᠠᠭᠠᠨ᠂ ᠡᠬᠡᠨᠡᠷ ᠤᠳ ᠨᠢ ᠴᠤ ᠲᠤᠰ ᠲᠤᠰ ᠲᠠᠭᠠᠨ ᠭᠠᠰᠢᠭᠤᠳᠠᠨᠠ᠃