ᠽᠧᠺᠠᠷᠢᠶᠠ ᠠᠷᠪᠠᠨ ᠳᠥᠷᠪᠡ
ᠡᠵᠡᠨ ᠵᠠᠬᠢᠷᠤᠨᠠ
1 ᠬᠠᠷᠠ᠂ ᠶᠣᠬᠣᠸᠠ ᠶᠢᠨ ᠡᠳᠦᠷ ᠢᠷᠡᠵᠦ ᠪᠠᠢᠨᠠ᠂ ᠲᠠᠨ ᠤ ᠪᠤᠯᠢᠶᠠᠭᠳᠠᠭᠰᠠᠨ ᠶᠠᠭᠤᠮᠠ ᠶᠢ ᠲᠠᠨ ᠤ ᠨᠢᠳᠦᠨ ᠳᠡᠭᠡᠷᠡ ᠬᠤᠪᠢᠶᠠᠨᠠ᠃ 2 ᠪᠢ ᠪᠦᠬᠦ ᠦᠨᠳᠦᠰᠦᠲᠡᠨ ᠢ ᠴᠤᠭᠯᠠᠭᠤᠯᠵᠤ ᠶᠧᠷᠦ᠋ᠰᠠᠯᠧᠮ ᠤᠨ ᠡᠰᠡᠷᠭᠦ ᠲᠤᠯᠤᠯᠳᠤᠭᠤᠯᠤᠨᠠ᠃ ᠬᠣᠲᠠ ᠡᠵᠡᠯᠡᠭᠳᠡᠵᠦ᠂ ᠭᠡᠷ ᠤᠳ ᠲᠣᠨᠣᠭᠳᠠᠨ᠂ ᠡᠮᠡᠭᠲᠡᠢᠴᠦᠳ ᠬᠦᠴᠦᠷᠬᠡᠭᠯᠡᠭᠳᠡᠨᠡ᠂ ᠬᠣᠲᠠ ᠶᠢᠨ ᠬᠢᠨ ᠤ ᠬᠠᠭᠠᠰ ᠨᠢ ᠴᠥᠯᠡᠭᠳᠡᠵᠦ᠂ ᠦᠯᠡᠳᠡᠭᠰᠡᠳ ᠨᠢ ᠬᠣᠲᠠ ᠠᠴᠠ ᠠᠪᠠᠴᠢᠭᠳᠠᠯ ᠦᠭᠡᠢ ᠦᠯᠡᠳᠡᠨᠡ᠃ 3 ᠬᠠᠷᠢᠨ ᠶᠣᠬᠣᠸᠠ ᠤᠷᠤᠭᠰᠢᠯᠠᠨ᠂ ᠲᠤᠯᠤᠯᠳᠤᠭᠠᠨ ᠤ ᠡᠳᠦᠷ ᠲᠦ ᠳᠠᠢᠲᠤᠳᠠᠭ ᠰᠢᠭ᠋ ᠢᠶᠠᠨ ᠲᠡᠳᠡᠭᠡᠷ ᠦᠨᠳᠦᠰᠦᠲᠡᠨ ᠲᠡᠢ ᠳᠠᠢᠲᠤᠨᠠ᠃ 4 ᠲᠡᠷᠡ ᠡᠳᠦᠷ ᠲᠡᠭᠦᠨ ᠦ ᠬᠥᠯ ᠶᠧᠷᠦ᠋ᠰᠠᠯᠧᠮ ᠤᠨ ᠤᠷᠳᠤ ᠲᠠᠯᠠ᠂ ᠲᠤᠬᠠᠢᠯᠠᠪᠠᠯ ᠳᠣᠷᠣᠨᠠ ᠵᠦᠭ ᠲᠦ᠂ ᠴᠢᠳᠦᠨ ᠠᠭᠤᠯᠠᠨ ᠳᠡᠭᠡᠷᠡ ᠵᠣᠭᠰᠣᠬᠤ ᠪᠣᠯᠣᠨᠠ᠃ ᠴᠢᠳᠦᠨ ᠠᠭᠤᠯᠠ ᠭᠣᠣᠯ ᠢᠶᠠᠷ ᠢᠶᠠᠨ ᠬᠤᠪᠢᠶᠠᠭᠳᠠᠨ ᠵᠡᠭᠦᠨ ᠡᠴᠡ ᠪᠠᠷᠠᠭᠤᠨ ᠲᠡᠰᠢ ᠴᠢᠭᠯᠡᠭᠰᠡᠨ ᠬᠥᠨᠳᠡᠢ ᠭᠠᠷᠬᠤ ᠪᠥᠭᠡᠳ ᠠᠭᠤᠯᠠ ᠶᠢᠨ ᠨᠢᠭᠡ ᠲᠠᠯᠠ ᠨᠢ ᠤᠮᠠᠷᠠ ᠲᠡᠰᠢ᠂ ᠨᠥᠭᠥᠭᠡ ᠲᠠᠯᠠ ᠨᠢ ᠡᠮᠦᠨᠡ ᠲᠡᠰᠢ ᠨᠡᠭᠦᠵᠦ᠂ 5 ᠠᠭᠤᠯᠠᠰ ᠤᠨ ᠬᠥᠨᠳᠡᠢ ᠨᠢ ᠠᠽᠧᠯ ᠳᠤ ᠬᠦᠷᠬᠦ ᠤᠴᠢᠷ ᠠᠴᠠ ᠲᠠ ᠨᠠᠷ ᠮᠢᠨᠦ ᠠᠭᠤᠯᠠ ᠶᠢᠨ ᠬᠥᠨᠳᠡᠢ ᠪᠠᠷ ᠵᠢᠭᠤᠲᠠᠬᠤ ᠪᠣᠯᠣᠨᠠ᠂ ᠲᠠ ᠨᠠᠷ ᠶᠦᠳᠠ ᠶᠢᠨ ᠬᠠᠭᠠᠨ ᠦᠽᠢᠶᠠ ᠶᠢᠨ ᠡᠳᠦᠷ ᠤᠳ ᠲᠤ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠡᠴᠡ ᠵᠢᠭᠤᠲᠠᠭᠰᠠᠨ ᠰᠢᠭ᠋ ᠢᠶᠠᠨ ᠵᠢᠭᠤᠲᠠᠨᠠ᠂ ᠮᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠢᠷᠡᠵᠦ᠂ ᠠᠷᠢᠭᠤᠨ ᠪᠦᠭᠦᠳᠡ ᠲᠠᠢ ᠬᠠᠮᠲᠤ ᠢᠷᠡᠨᠡ᠃
6 ᠲᠡᠷᠡ ᠡᠳᠦᠷ ᠭᠡᠷᠡᠯ ᠦᠭᠡᠢ᠂ ᠬᠦᠢᠲᠡᠨ ᠴᠤ᠂ ᠬᠢᠷᠠᠭᠤ ᠴᠤ ᠠᠯᠠᠭᠠ᠃ 7 ᠡᠳᠦᠷ ᠰᠥᠨᠢ ᠭᠡᠵᠦ ᠦᠭᠡᠢ᠂ ᠵᠥᠪᠬᠡᠨ ᠡᠳᠦᠷ ᠪᠠᠢᠭᠰᠠᠭᠠᠷ (ᠶᠣᠬᠣᠸᠠ ᠡᠭᠦᠨ ᠢ ᠮᠡᠳᠡᠨᠡ᠃) ᠦᠳᠡᠰᠢ ᠶᠢᠨ ᠴᠠᠭ ᠲᠤ ᠴᠤ ᠭᠡᠷᠡᠯ ᠲᠡᠢ ᠪᠠᠢᠬᠤ ᠪᠣᠯᠣᠨᠠ᠃
8 ᠲᠡᠷᠡ ᠡᠳᠦᠷ ᠠᠮᠢ ᠶᠢᠨ ᠤᠰᠤ ᠶᠧᠷᠦ᠋ᠰᠠᠯᠧᠮ ᠡᠴᠡ ᠤᠨᠳᠤᠷᠴᠤ᠂ ᠬᠠᠭᠠᠰ ᠨᠢ ᠳᠣᠷᠣᠨᠠ ᠶᠢᠨ ᠲᠠᠩᠭᠢᠰ ᠤᠷᠤᠭᠤ᠂ ᠬᠠᠭᠠᠰ ᠨᠢ ᠥᠷᠥᠨᠡ ᠶᠢᠨ ᠲᠠᠩᠭᠢᠰ ᠤᠷᠤᠭᠤ ᠡᠪᠦᠯ ᠵᠤᠨ ᠦᠭᠡᠢ ᠤᠷᠤᠰᠤᠨᠠ᠂ 9 ᠶᠣᠬᠣᠸᠠ ᠪᠦᠬᠦ ᠳᠡᠯᠡᠬᠡᠢ ᠶᠢᠨ ᠬᠠᠭᠠᠨ ᠪᠣᠯᠣᠨᠠ᠂ ᠲᠡᠷᠡ ᠡᠳᠦᠷ ᠭᠠᠭᠴᠠ ᠬᠦ ᠶᠣᠬᠣᠸᠠ᠂ ᠭᠠᠭᠴᠠ ᠬᠦ ᠲᠡᠭᠦᠨ ᠦ ᠨᠡᠷᠡ ᠪᠠᠢᠬᠤ ᠪᠣᠯᠣᠨᠠ᠃
10 ᠭᠧᠪᠠ ᠠᠴᠠ ᠶᠧᠷᠦ᠋ᠰᠠᠯᠧᠮ ᠤᠨ ᠡᠮᠦᠨᠡ ᠳᠠᠬᠢ ᠷᠢᠮᠣᠨ ᠬᠦᠷᠲᠡᠯᠡᠬᠢ ᠪᠦᠬᠦ ᠨᠤᠲᠤᠭ ᠲᠠᠯᠠ ᠪᠣᠯᠣᠨ ᠬᠤᠪᠢᠷᠠᠨᠠ᠂ ᠬᠠᠷᠢᠨ ᠶᠧᠷᠦ᠋ᠰᠠᠯᠧᠮ ᠥᠨᠳᠥᠷ ᠳᠡᠭᠡᠷᠡ ᠬᠡᠪ ᠢᠶᠡᠷ ᠢᠶᠠᠨ᠂ ᠪᠢᠨᠶᠠᠮᠢᠨ ᠤ ᠬᠠᠭᠠᠯᠭᠠᠨ ᠠᠴᠠ ᠨᠢᠭᠡᠳᠦᠭᠡᠷ ᠬᠠᠭᠠᠯᠭᠠ ᠪᠤᠶᠤ ᠪᠤᠯᠤᠩ ᠤᠨ ᠬᠠᠭᠠᠯᠭᠠ ᠬᠦᠷᠲᠡᠯᠡ᠂ ᠬᠠᠨᠠᠨᠧᠯ ᠤᠨ ᠴᠠᠮᠬᠠᠭ ᠠᠴᠠ ᠬᠠᠭᠠᠨ ᠤ ᠦᠵᠦᠮ ᠦᠨ ᠰᠢᠬᠠᠭᠤᠷᠭᠠ ᠬᠦᠷᠲᠡᠯᠡᠬᠢ ᠪᠠᠢᠷᠢᠯᠠᠯ ᠳᠡᠭᠡᠷᠡ ᠪᠡᠨ ᠦᠯᠡᠳᠡᠨᠡ᠃ 11 ᠬᠥᠮᠦᠰ ᠲᠡᠨᠳᠡ ᠰᠠᠭᠤᠷᠢᠰᠢᠨᠠ᠂ ᠬᠣᠲᠠ ᠳᠠᠬᠢᠨ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠭᠳᠠᠬᠤ ᠦᠭᠡᠢ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠬᠢᠨ ᠠᠮᠤᠷ ᠰᠠᠭᠤᠬᠤ ᠪᠣᠯᠣᠨᠠ᠃
12 ᠶᠧᠷᠦ᠋ᠰᠠᠯᠧᠮ ᠢ ᠴᠣᠬᠢᠬᠤ ᠪᠠᠷ ᠭᠠᠷᠬᠤ ᠪᠦᠬᠦ ᠦᠨᠳᠦᠰᠦᠲᠡᠨ ᠳᠦ ᠶᠣᠬᠣᠸᠠ ᠶᠢᠨ ᠪᠠᠭᠤᠯᠭᠠᠬᠤ ᠭᠠᠮᠰᠢᠭ ᠡᠨᠡ᠄ ᠲᠡᠳᠡ ᠬᠥᠯ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠵᠤ ᠪᠠᠢᠬᠤ ᠳᠤ᠂ ᠲᠡᠳᠡᠨ ᠦ ᠮᠢᠬᠠᠨ ᠪᠡᠶᠡ ᠢᠯᠵᠠᠷᠠᠨᠠ᠂ ᠨᠢᠳᠦ ᠨᠢ ᠤᠬᠤᠷᠬᠠᠢ ᠳᠠᠭᠠᠨ᠂ ᠬᠡᠯᠡ ᠨᠢ ᠠᠮᠠᠨ ᠳᠠᠭᠠᠨ ᠢᠯᠵᠠᠷᠠᠨᠠ᠃ 13 ᠲᠡᠷᠡ ᠡᠳᠦᠷ ᠶᠣᠬᠣᠸᠠ ᠲᠡᠳᠡᠨ ᠢ ᠶᠡᠬᠡᠳᠡ ᠰᠠᠮᠭᠠᠷᠳᠠᠭᠤᠯᠤᠨᠠ᠃ ᠲᠡᠳᠡ ᠨᠢᠭᠡ ᠨᠢᠭᠡ ᠪᠡᠨ ᠪᠠᠷᠢᠪᠴᠢᠯᠠᠨ᠂ ᠨᠢᠭᠡ ᠨᠢᠭᠡᠨ ᠦ ᠪᠠᠨ ᠥᠭᠡᠳᠡ ᠡᠴᠡ ᠨᠢᠳᠤᠷᠭᠠ ᠳᠠᠯᠠᠢᠬᠤ ᠪᠣᠯᠣᠨᠠ᠃ 14 ᠶᠦᠳᠠ ᠴᠤ ᠶᠧᠷᠦ᠋ᠰᠠᠯᠧᠮ ᠳᠤ ᠳᠠᠢᠲᠤᠨᠠ᠂ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠦ ᠠᠯᠲᠠ ᠮᠥᠩᠭᠥ᠂ ᠡᠳ᠋ ᠪᠠᠶᠠᠯᠢᠭ ᠪᠠ ᠬᠤᠪᠴᠠᠰᠤ ᠬᠤᠨᠠᠷ ᠠᠰᠤᠷᠤ ᠶᠡᠬᠡ ᠪᠡᠷ ᠴᠤᠭᠯᠠᠭᠤᠯᠤᠭᠳᠠᠨᠠ᠃ 15 ᠨᠥᠭᠥᠭᠡ ᠭᠠᠮᠰᠢᠭ ᠲᠠᠢ ᠠᠳᠠᠯᠢᠬᠠᠨ ᠭᠠᠮᠰᠢᠭ ᠮᠣᠷᠢ᠂ ᠯᠠᠭᠤᠰᠠ᠂ ᠲᠡᠮᠡᠭᠡ᠂ ᠡᠯᠵᠢᠭᠡ ᠵᠡᠷᠭᠡ ᠬᠤᠸᠠᠷᠠᠨ ᠳᠠᠬᠢ ᠪᠦᠬᠦ ᠮᠠᠯ ᠢ ᠨᠢ ᠴᠣᠬᠢᠨᠠ᠃
16 ᠬᠠᠷᠢᠨ ᠶᠧᠷᠦ᠋ᠰᠠᠯᠧᠮ ᠢ ᠴᠣᠬᠢᠬᠤ ᠪᠠᠷ ᠢᠷᠡᠭᠰᠡᠨ ᠠᠯᠢᠪᠠ ᠦᠨᠳᠦᠰᠦᠲᠡᠨ ᠡᠴᠡ ᠦᠯᠡᠳᠡᠭᠰᠡᠳ ᠨᠢ ᠵᠢᠯ ᠪᠦᠷᠢ ᠢᠷᠡᠵᠦ᠂ ᠬᠠᠭᠠᠨ ᠪᠣᠯᠬᠤ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠳᠤ ᠮᠥᠷᠭᠥᠨ᠂ ᠮᠠᠢᠬᠠᠨ ᠤ ᠪᠠᠶᠠᠷ ᠢ ᠲᠡᠮᠳᠡᠭᠯᠡᠨᠡ᠃ 17 ᠳᠡᠯᠡᠬᠡᠢ ᠳᠠᠶᠠᠭᠠᠷ ᠤᠨ ᠠᠯᠢ ᠨᠢᠭᠡ ᠭᠡᠷ ᠪᠦᠯᠢ ᠶᠧᠷᠦ᠋ᠰᠠᠯᠧᠮ ᠳᠤ ᠢᠷᠡᠵᠦ ᠬᠠᠭᠠᠨ ᠪᠣᠯᠬᠤ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠳᠤ ᠮᠥᠷᠭᠥᠬᠦ ᠦᠭᠡᠢ ᠪᠣᠯ᠂ ᠲᠡᠳᠡᠨ ᠦ ᠳᠡᠭᠡᠷᠡ ᠪᠣᠷᠣᠭᠠᠨ ᠬᠤᠷᠠ ᠣᠷᠣᠬᠤ ᠦᠭᠡᠢ᠃ 18 ᠬᠡᠷᠪᠡ ᠶᠧᠵᠢᠫᠲ ᠤᠨ ᠭᠡᠷ ᠪᠦᠯᠢ ᠢᠷᠡᠬᠦ ᠦᠭᠡᠢ᠂ ᠣᠷᠣᠯᠴᠠᠬᠤ ᠦᠭᠡᠢ ᠪᠣᠯ᠂ ᠲᠡᠳᠡᠨ ᠦ ᠳᠡᠭᠡᠷᠡ ᠪᠣᠷᠣᠭᠠᠨ ᠬᠤᠷᠠ ᠣᠷᠣᠬᠤ ᠦᠭᠡᠢ᠃ ᠶᠣᠬᠣᠸᠠ ᠮᠠᠢᠬᠠᠨ ᠤ ᠪᠠᠶᠠᠷ ᠢ ᠲᠡᠮᠳᠡᠭᠯᠡᠬᠦ ᠪᠡᠷ ᠢᠷᠡᠳᠡᠭ ᠦᠭᠡᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠴᠣᠬᠢᠬᠤ ᠭᠠᠮᠰᠢᠭ ᠢ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠯᠭᠠᠨᠠ᠃ 19 ᠮᠠᠢᠬᠠᠨ ᠤ ᠪᠠᠶᠠᠷ ᠢ ᠲᠡᠮᠳᠡᠭᠯᠡᠬᠦ ᠪᠡᠷ ᠢᠷᠡᠳᠡᠭ ᠦᠭᠡᠢ ᠶᠧᠵᠢᠫᠲ ᠪᠣᠯᠣᠨ ᠠᠯᠢᠪᠠ ᠦᠨᠳᠦᠰᠦᠲᠡᠨ ᠦ ᠬᠦᠯᠢᠶᠡᠬᠦ ᠰᠢᠳᠬᠡᠯ ᠨᠢ ᠡᠨᠡ ᠶᠤᠮ᠃
20 ᠲᠡᠷᠡ ᠡᠳᠦᠷ ᠮᠣᠷᠢᠳ ᠤᠨ ᠬᠣᠩ᠋ᠭᠣᠨ ᠳᠡᠭᠡᠷᠡ ᠴᠤ᠄ 《ᠶᠣᠬᠣᠸᠠ ᠳᠤ ᠠᠷᠢᠭᠤᠨ》 ᠭᠡᠵᠦ ᠰᠡᠢᠯᠦᠭᠳᠡᠭᠰᠡᠨ ᠪᠠᠢᠬᠤ ᠪᠣᠯᠣᠨᠠ᠃ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠠᠬᠢ ᠲᠣᠭᠣᠭᠠ ᠨᠤᠭᠤᠳ ᠨᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠡᠮᠦᠨᠡᠬᠢ ᠠᠶᠠᠭᠠ ᠨᠤᠭᠤᠳ ᠮᠡᠲᠦ ᠠᠷᠢᠭᠤᠨ᠃ 21 ᠶᠧᠷᠦ᠋ᠰᠠᠯᠧᠮ ᠪᠤᠶᠤ ᠶᠦᠳᠠ ᠶᠢᠨ ᠲᠣᠭᠣᠭᠠ ᠪᠦᠷᠢ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠳᠤ ᠠᠷᠢᠭᠤᠨ ᠪᠠᠢᠬᠤ ᠪᠣᠯᠣᠨᠠ᠃ ᠲᠠᠬᠢᠯ ᠡᠷᠭᠦᠬᠦ ᠪᠡᠷ ᠢᠷᠡᠭᠴᠢ ᠪᠣᠯᠭᠠᠨ ᠲᠡᠳᠡᠭᠡᠷ ᠢ ᠠᠪᠴᠤ᠂ ᠳᠣᠲᠣᠷᠠ ᠨᠢ ᠮᠢᠬᠠ ᠶᠢ ᠴᠢᠨᠠᠨᠠ᠂ ᠲᠡᠷᠡ ᠡᠳᠦᠷ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠬᠤᠳᠠᠯᠳᠤᠭᠠᠴᠢᠳ 9 ᠠᠯᠠᠭᠠ ᠪᠣᠯᠣᠨᠠ᠃