ᠨᠢᠭᠡᠳᠦᠭᠡᠷ ᠺᠣᠷᠢᠨᠲ ᠭᠤᠷᠪᠠ
ᠾᠷᠢᠰᠲ᠋ᠣᠰ ᠠᠴᠠ ᠥᠭᠡᠷᠡ ᠰᠠᠭᠤᠷᠢ ᠦᠭᠡᠢ
1 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢ ᠰᠦᠨᠡᠰᠦᠯᠢᠭ ᠬᠥᠮᠦᠨ ᠳᠦ ᠶᠠᠷᠢᠳᠠᠭ ᠲᠠᠢ ᠪᠠᠨ ᠠᠳᠠᠯᠢ ᠲᠠ ᠨᠠᠷ ᠲᠤ ᠶᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠤᠴᠢᠷ ᠠᠴᠠ ᠮᠢᠬᠠᠨ ᠪᠡᠶᠡ ᠶᠢᠨ ᠬᠠᠷᠢᠶᠠᠲᠤ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠾᠷᠢᠰᠲ᠋ᠣᠰ ᠳᠣᠲᠣᠷᠠᠬᠢ ᠪᠠᠯᠴᠢᠷ ᠬᠡᠦᠬᠡᠳ ᠲᠡᠢ ᠶᠠᠷᠢᠳᠠᠭ ᠰᠢᠭ᠋ ᠢᠶᠠᠨ ᠶᠠᠷᠢᠪᠠ᠃ 2 ᠪᠢ ᠲᠠ ᠨᠠᠷ ᠲᠤ ᠰᠦ᠋ ᠥᠭᠭᠥᠭᠰᠡᠨ᠂ ᠪᠣᠷᠣ ᠬᠣᠭᠣᠯᠠ ᠥᠭᠭᠥᠭᠡ ᠦᠭᠡᠢ᠃ ᠲᠠ ᠨᠠᠷ ᠪᠣᠷᠣ ᠬᠣᠭᠣᠯᠠ ᠶᠢ ᠳᠠᠭᠠᠭᠠᠬᠤ ᠦᠭᠡᠢ ᠪᠠᠢᠭᠰᠠᠨ᠂ ᠣᠳᠣ ᠴᠤ ᠳᠠᠭᠠᠭᠠᠬᠤ ᠦᠭᠡᠢ ᠪᠠᠢᠨᠠ᠃ 3 ᠲᠠ ᠨᠠᠷ ᠣᠳᠣ ᠴᠤ ᠮᠢᠬᠠᠨ ᠪᠡᠶᠡ ᠶᠢᠨ ᠬᠠᠷᠢᠶᠠᠲᠤ ᠪᠠᠢᠨᠠ᠃ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠲᠠᠭᠠᠷᠬᠠᠯ᠂ ᠬᠡᠷᠡᠭᠦᠯ ᠪᠠᠢᠬᠤ ᠨᠢ ᠲᠠ ᠨᠠᠷ ᠮᠢᠬᠠᠨ ᠪᠡᠶᠡ ᠶᠢᠨ ᠬᠠᠷᠢᠶᠠᠲᠤ ᠪᠠᠢᠵᠤ᠂ ᠬᠥᠮᠦᠨ ᠦ ᠶᠣᠰᠣᠭᠠᠷ ᠶᠠᠪᠤᠵᠤ ᠪᠠᠢᠭᠠ ᠶᠢᠨ ᠴᠢᠨᠢ ᠰᠢᠨᠵᠢ ᠪᠢᠰᠢ ᠤᠤ︖ 4 ᠵᠠᠷᠢᠮ ᠨᠢ᠄ 《ᠪᠢ ᠫᠠᠦ᠋ᠯ ᠤᠨ ᠬᠢ》 ᠭᠡᠵᠦ᠂ ᠵᠠᠷᠢᠮ ᠨᠢ᠄ 《ᠪᠢ ᠠᠫᠣᠯᠣ᠋ ᠶᠢᠨ ᠬᠢ》 ᠭᠡᠯᠴᠡᠬᠦ ᠨᠢ ᠲᠠ ᠨᠠᠷ ᠪᠤᠰᠤᠳ ᠬᠥᠮᠦᠨ ᠲᠡᠢ ᠠᠳᠠᠯᠢ ᠪᠠᠢᠭᠠ ᠪᠢᠰᠢ ᠶᠤᠮ ᠤᠤ︖
5 ᠬᠠᠷᠢᠨ ᠠᠫᠣᠯᠣ᠋ ᠭᠡᠵᠦ ᠬᠡᠨ ᠪᠤᠢ︖ ᠫᠠᠦ᠋ᠯ ᠭᠡᠵᠦ ᠬᠡᠨ ᠪᠤᠢ︖ ᠪᠢᠳᠡ ᠵᠥᠪᠬᠡᠨ ᠡᠵᠡᠨ ᠦ ᠵᠠᠷᠤᠴᠠ ᠪᠥᠭᠡᠳ ᠡᠵᠡᠨ ᠦ ᠰᠣᠶᠣᠷᠬᠠᠭᠰᠠᠨ ᠶᠣᠰᠣᠭᠠᠷ ᠲᠠ ᠨᠠᠷ ᠢ ᠢᠲᠡᠭᠡᠭᠦᠯᠦᠯᠡ᠃ 6 ᠪᠢ ᠲᠠᠷᠢᠵᠤ᠂ ᠠᠫᠣᠯᠣ᠋ ᠤᠰᠤᠯᠠᠭᠰᠠᠨ᠂ ᠬᠠᠷᠢᠨ ᠪᠤᠷᠬᠠᠨ ᠤᠷᠭᠤᠭᠤᠯᠵᠤ ᠪᠠᠢᠭᠰᠠᠨ ᠶᠤᠮ᠃ 7 ᠲᠡᠢᠮᠦ ᠡᠴᠡ ᠲᠠᠷᠢᠭᠴᠢ ᠪᠤᠶᠤ ᠤᠰᠤᠯᠠᠭᠴᠢ ᠨᠢ ᠶᠠᠭᠤ ᠴᠤ ᠪᠢᠰᠢ᠂ ᠤᠷᠭᠤᠭᠤᠯᠤᠭᠴᠢ ᠪᠤᠷᠬᠠᠨ ᠯᠠ ᠡᠷᠬᠢᠮ ᠶᠤᠮ᠃ 8 ᠲᠠᠷᠢᠭᠴᠢ ᠪᠠ ᠤᠰᠤᠯᠠᠭᠴᠢ ᠨᠢᠭᠡᠨ ᠠᠳᠠᠯᠢ ᠪᠥᠭᠡᠳ ᠬᠥᠳᠡᠯᠮᠦᠷᠢᠯᠡᠭᠰᠡᠨ ᠦ ᠪᠠᠨ ᠶᠣᠰᠣᠭᠠᠷ ᠲᠤᠰ ᠲᠤᠰ ᠤᠨ ᠱᠠᠩᠨᠠᠯ ᠢᠶᠠᠨ ᠬᠦᠷᠲᠡᠬᠦ ᠪᠣᠯᠣᠨᠠ᠃ 9 ᠪᠢᠳᠡ ᠪᠣᠯ ᠪᠤᠷᠬᠠᠨ ᠯᠤᠭᠠ ᠬᠠᠮᠲᠤᠷᠠᠨ ᠠᠵᠢᠯᠯᠠᠭᠴᠢᠳ᠂ ᠲᠠ ᠨᠠᠷ ᠪᠣᠯ ᠪᠤᠷᠬᠠᠨ ᠤ ᠲᠠᠷᠢᠶᠠᠯᠠᠩ᠂ ᠪᠤᠷᠬᠠᠨ ᠤ ᠪᠠᠷᠢᠯᠭᠠ ᠮᠥᠨ᠃
10 ᠪᠤᠷᠬᠠᠨ ᠤ ᠰᠣᠶᠣᠷᠬᠠᠭᠰᠠᠨ ᠢᠪᠡᠭᠡᠯ ᠦᠨ ᠠᠴᠢ ᠪᠠᠷ ᠪᠢ ᠤᠷᠠᠨ ᠪᠠᠷᠢᠯᠭᠠᠴᠢᠨ ᠮᠡᠲᠦ ᠰᠠᠭᠤᠷᠢ ᠶᠢ ᠲᠠᠯᠪᠢᠭᠰᠠᠨ ᠳᠤ ᠲᠡᠷᠡ ᠬᠥᠮᠦᠨ ᠳᠡᠭᠡᠷᠡ ᠨᠢ ᠪᠠᠷᠢᠵᠤ ᠪᠤᠢ᠃ ᠬᠠᠷᠢᠨ ᠲᠡᠭᠦᠨ ᠳᠡᠭᠡᠷᠡ ᠶᠠᠭᠠᠬᠢᠵᠤ ᠪᠠᠷᠢᠬᠤ ᠪᠠᠨ ᠬᠥᠮᠦᠨ ᠪᠦᠷᠢ ᠠᠩ᠋ᠬᠠᠷᠬᠤ ᠶᠣᠰᠣᠲᠠᠢ᠃ 11 ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠭᠡᠰᠡᠨ ᠰᠠᠭᠤᠷᠢ ᠲᠠᠯᠪᠢᠭᠳᠠᠭᠰᠠᠨ ᠤᠴᠢᠷ ᠠᠴᠠ ᠬᠡᠨ ᠴᠤ ᠥᠭᠡᠷᠡ ᠰᠠᠭᠤᠷᠢ ᠶᠢ ᠲᠠᠯᠪᠢᠵᠤ ᠴᠢᠳᠠᠬᠤ ᠦᠭᠡᠢ᠃ 12 ᠬᠡᠨ ᠴᠤ ᠪᠠᠢᠲᠤᠭᠠᠢ᠂ ᠡᠨᠡ ᠰᠠᠭᠤᠷᠢ ᠶᠢᠨ ᠳᠡᠭᠡᠷᠡ ᠠᠯᠲᠠ᠂ ᠮᠥᠩᠭᠥ᠂ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ᠂ ᠮᠣᠳᠣ ᠡᠪᠡᠰᠦ᠂ ᠡᠰᠡᠬᠦᠯᠡ ᠰᠦᠷᠡᠯ ᠢᠶᠡᠷ ᠪᠠᠢᠭᠤᠯᠪᠠᠯ 13 ᠲᠡᠭᠦᠨ ᠦ ᠠᠵᠢᠯ ᠬᠣᠵᠢᠮ ᠲᠣᠳᠣᠷᠠᠬᠤ ᠪᠣᠯᠣᠨᠠ᠃ ᠪᠦᠬᠦᠨ ᠢ ᠦᠵᠡᠭᠦᠯᠬᠦ ᠲᠡᠷᠡ ᠡᠳᠦᠷ ᠬᠢᠭᠰᠡᠨ ᠠᠵᠢᠯ ᠢ ᠨᠢ ᠭᠠᠯ ᠢᠶᠠᠷ ᠲᠣᠳᠣᠷᠠᠭᠤᠯᠬᠤ ᠪᠥᠭᠡᠳ ᠲᠡᠷᠡ ᠭᠠᠯ ᠬᠥᠮᠦᠨ ᠪᠣᠯᠭᠠᠨ ᠤ ᠠᠵᠢᠯ ᠤᠨ ᠶᠠᠮᠠᠷ ᠪᠠᠢᠬᠤ ᠶᠢ ᠰᠢᠯᠭᠠᠨᠠ᠃ 14 ᠲᠡᠷᠡ ᠰᠠᠭᠤᠷᠢᠨ ᠳᠡᠭᠡᠷᠡ ᠪᠠᠢᠭᠤᠯᠤᠭᠰᠠᠨ ᠬᠡᠨ ᠨᠢᠭᠡᠨ ᠦ ᠪᠠᠷᠢᠯᠭᠠ ᠬᠡᠪ ᠢᠶᠡᠷ ᠢᠶᠠᠨ ᠦᠯᠡᠳᠡᠪᠡᠯ ᠲᠡᠷᠡ ᠬᠥᠮᠦᠨ ᠱᠠᠩᠨᠠᠯ ᠢᠶᠠᠨ ᠣᠯᠣᠨᠠ᠃ 15 ᠬᠡᠷᠪᠡ ᠰᠢᠲᠠᠪᠠᠯ ᠲᠡᠷᠡ ᠬᠥᠮᠦᠨ ᠬᠣᠬᠢᠷᠠᠨᠠ᠂ ᠠᠪᠤᠷᠠᠭᠳᠠᠪᠠᠴᠤ ᠭᠠᠯ ᠳᠤᠮᠳᠠᠭᠤᠷ ᠶᠠᠪᠤᠭᠰᠠᠨ ᠮᠡᠲᠦ ᠪᠣᠯᠣᠨᠠ᠃
16 ᠲᠠ ᠨᠠᠷ ᠪᠣᠯ ᠪᠤᠷᠬᠠᠨ ᠤ ᠥᠷᠭᠥᠭᠡ ᠪᠥᠭᠡᠳ ᠪᠤᠷᠬᠠᠨ ᠤ ᠰᠦᠨᠡᠰᠦ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠣᠷᠣᠰᠢᠵᠤ ᠪᠠᠢᠬᠤ ᠶᠢ ᠮᠡᠳᠡᠳᠡᠭ ᠦᠭᠡᠢ ᠶᠤᠮ ᠤᠤ︖ 17 ᠬᠡᠨ ᠬᠡᠷᠪᠡ ᠪᠤᠷᠬᠠᠨ ᠤ ᠥᠷᠭᠥᠭᠡ ᠶᠢ ᠤᠰᠠᠳᠬᠠᠪᠠᠯ ᠪᠤᠷᠬᠠᠨ ᠴᠤ ᠲᠡᠭᠦᠨ ᠢ ᠤᠰᠠᠳᠬᠠᠨᠠ᠃ ᠤᠴᠢᠷ ᠨᠢ᠂ ᠪᠤᠷᠬᠠᠨ ᠤ ᠥᠷᠭᠥᠭᠡ ᠪᠣᠯ ᠠᠷᠢᠭᠤᠨ ᠪᠥᠭᠡᠳ ᠲᠡᠷᠡ ᠥᠷᠭᠥᠭᠡ ᠪᠣᠯ ᠲᠠ ᠨᠠᠷ ᠮᠥᠨ᠃
18 ᠬᠡᠨ ᠴᠤ ᠪᠡᠶᠡ ᠪᠡᠨ ᠪᠦᠦ ᠮᠡᠬᠡᠯᠡᠭᠲᠦᠨ᠃ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠬᠡᠨ ᠨᠢᠭᠡ ᠨᠢ ᠪᠡᠶᠡ ᠪᠡᠨ ᠡᠨᠡ ᠦᠶᠡ ᠶᠢᠨ ᠮᠡᠷᠭᠡᠨ ᠤᠬᠠᠭᠠᠨᠲᠠᠨ ᠭᠡᠵᠦ ᠦᠵᠡᠪᠡᠯ᠂ ᠲᠡᠷᠡ ᠬᠥᠮᠦᠨ ᠨᠡᠩ ᠮᠡᠷᠭᠡᠨ ᠤᠬᠠᠭᠠᠨᠲᠠᠨ ᠪᠣᠯᠬᠤ ᠶᠢᠨ ᠲᠤᠯᠠᠳᠠ ᠮᠤᠩ᠋ᠬᠠᠭ ᠪᠣᠯᠬᠤ ᠬᠡᠷᠡᠭᠲᠡᠢ᠃ 19 ᠤᠴᠢᠷ ᠨᠢ᠂ ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠮᠡᠷᠭᠡᠨ ᠨᠢ ᠪᠤᠷᠬᠠᠨ ᠤ ᠳᠡᠷᠭᠡᠳᠡ ᠮᠤᠩ᠋ᠬᠠᠭ ᠶᠤᠮ᠃ ᠡᠢᠮᠦ ᠳᠦ 《ᠮᠡᠷᠭᠡᠨ ᠢ ᠮᠡᠬᠡ ᠪᠡᠷ ᠨᠢ ᠪᠠᠷᠢᠭᠴᠢ ᠨᠢ ᠲᠡᠷᠡ》 ᠭᠡᠰᠡᠨ ᠪᠥᠭᠡᠳ 20 ᠪᠠᠰᠠ 《ᠮᠡᠷᠭᠡᠳ ᠦᠨ ᠪᠣᠳᠣᠯ ᠬᠣᠭᠣᠰᠣᠨ ᠭᠡᠳᠡᠭ ᠢ ᠡᠵᠡᠨ ᠮᠡᠳᠡᠨᠡ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ᠃ 21 ᠲᠡᠢᠮᠦ ᠡᠴᠡ ᠬᠡᠨ ᠴᠤ ᠬᠥᠮᠦᠨ ᠢᠶᠡᠷ ᠪᠦᠦ ᠰᠠᠢᠷᠬᠠᠭᠲᠤᠨ᠃ ᠬᠠᠮᠤᠭ ᠶᠠᠭᠤᠮᠠ ᠲᠠ ᠨᠠᠷ ᠤᠨ ᠬᠢ᠃ 22 ᠫᠠᠦ᠋ᠯ ᠴᠤ᠂ ᠠᠫᠣᠯᠣ᠋ ᠴᠤ᠂ ᠺᠧᠹᠠ 3 ᠴᠤ᠂ ᠶᠢᠷᠲᠢᠨᠴᠦ ᠴᠤ᠂ ᠠᠮᠢ ᠴᠤ᠂ ᠦᠬᠦᠯ ᠴᠤ᠂ ᠣᠳᠣ ᠶᠢᠨ ᠶᠠᠪᠤᠳᠠᠯ ᠴᠤ᠂ ᠢᠷᠡᠭᠡᠳᠦᠢ ᠶᠢᠨ ᠶᠠᠪᠤᠳᠠᠯ ᠴᠤ ᠴᠥᠮ ᠲᠠ ᠨᠠᠷ ᠤᠨ ᠬᠢ᠂ 23 ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠤᠨ ᠬᠢ ᠪᠥᠭᠡᠳ ᠾᠷᠢᠰᠲ᠋ᠣᠰ ᠪᠣᠯ ᠪᠤᠷᠬᠠᠨ ᠤ ᠬᠢ᠃