ᠨᠢᠭᠡᠳᠦᠭᠡᠷ ᠺᠣᠷᠢᠨᠲ ᠳᠥᠷᠪᠡ
ᠾᠷᠢᠰᠲ᠋ᠣᠰ ᠤᠨ ᠵᠠᠷᠤᠴᠠ
1 ᠲᠡᠢᠮᠦ ᠡᠴᠡ ᠬᠥᠮᠦᠰ ᠪᠢᠳᠡᠨ ᠢ ᠾᠷᠢᠰᠲ᠋ᠣᠰ ᠤᠨ ᠵᠠᠷᠤᠴᠠ ᠪᠠ ᠪᠤᠷᠬᠠᠨ ᠤ ᠨᠢᠭᠤᠴᠠ ᠶᠢᠨ ᠨᠢᠷᠪᠠ ᠭᠡᠵᠦ ᠪᠣᠳᠣᠭ᠃ 2 ᠨᠡᠮᠡᠵᠦ ᠬᠡᠯᠡᠶᠡ᠂ ᠨᠢᠷᠪᠠ ᠨᠢ ᠦᠨᠡᠨᠴᠢ ᠪᠠᠢᠬᠤ ᠱᠠᠭᠠᠷᠳᠠᠯᠭᠠ ᠲᠠᠢ᠃ 3 ᠲᠠ ᠨᠠᠷ ᠢᠶᠠᠷ ᠰᠢᠭᠦᠮᠵᠢᠯᠡᠭᠦᠯᠬᠦ᠂ ᠡᠰᠡᠪᠡᠯ ᠬᠥᠮᠦᠨ ᠦ ᠰᠢᠭᠦᠬᠦ ᠲᠠᠩᠬᠢᠮ ᠳᠤ ᠰᠢᠭᠦᠭᠳᠡᠬᠦ ᠨᠢ ᠮᠢᠨᠦ ᠬᠤᠪᠢ ᠳᠤ ᠥᠴᠦᠬᠡᠨ ᠵᠦᠢᠯ ᠪᠢᠯᠡ᠂ ᠪᠢ ᠥᠪᠡᠷ ᠢᠶᠡᠨ ᠴᠤ ᠭᠡᠰᠡᠨ ᠥᠪᠡᠷ ᠢ ᠪᠠᠨ ᠰᠢᠭᠦᠮᠵᠢᠯᠡᠳᠡᠭ᠌ ᠦᠭᠡᠢ᠃ 4 ᠪᠢ ᠥᠪᠡᠷ ᠢ ᠪᠠᠨ ᠦᠵᠡᠬᠦ ᠳᠦ ᠪᠤᠷᠤᠭᠤ ᠦᠭᠡᠢ᠂ ᠬᠠᠷᠢᠨ ᠡᠭᠦᠨ ᠢᠶᠡᠷ ᠯᠠ ᠵᠥᠪᠲᠥᠭᠡᠭᠳᠡᠳᠡᠭ᠌ ᠪᠢᠰᠢ᠃ ᠮᠢᠨᠦ ᠰᠢᠭᠦᠭᠴᠢ ᠪᠣᠯ ᠡᠵᠡᠨ ᠮᠥᠨ᠃ 5 ᠡᠢᠮᠦ ᠡᠴᠡ ᠴᠠᠭ ᠪᠣᠯᠬᠤ ᠠᠴᠠ ᠡᠮᠦᠨᠡ᠂ ᠡᠵᠡᠨ ᠢᠷᠡᠲᠡᠯᠡ ᠲᠠ ᠨᠠᠷ ᠪᠦᠦ ᠰᠢᠭᠦᠮᠵᠢᠯᠡᠭᠲᠦᠨ᠃ ᠡᠵᠡᠨ ᠬᠠᠷᠠᠩ᠋ᠭᠤᠢ ᠳᠤ ᠨᠢᠭᠤᠭᠳᠠᠭᠰᠠᠨ ᠵᠦᠢᠯᠡᠰ ᠢ ᠭᠡᠷᠡᠯ ᠳᠦ ᠭᠠᠷᠭᠠᠵᠤ ᠰᠡᠳᠬᠢᠯ ᠳᠣᠲᠣᠷᠠᠬᠢ ᠶᠢ ᠢᠯᠡᠷᠡᠭᠦᠯᠦᠨᠡ᠃ ᠲᠡᠷᠡ ᠦᠶᠡ ᠳᠦ ᠬᠥᠮᠦᠨ ᠪᠣᠯᠭᠠᠨ ᠪᠤᠷᠬᠠᠨ ᠠᠴᠠ ᠮᠠᠭᠲᠠᠭᠠᠯ ᠣᠯᠬᠤ ᠪᠣᠯᠣᠨᠠ᠃ 6 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠡᠳᠡᠭᠡᠷ ᠢᠶᠡᠷ ᠥᠪᠡᠷ ᠦᠨ ᠪᠡᠶᠡ ᠪᠣᠯᠣᠨ ᠠᠫᠣᠯᠣ᠋ ᠶᠢ ᠵᠦᠢᠷᠯᠡᠭᠰᠡᠨ ᠪᠢᠯᠡ᠃ ᠢᠩᠭᠢᠭᠰᠡᠨ ᠨᠢ 《ᠪᠢᠴᠢᠭᠳᠡᠭᠰᠡᠨ ᠡᠴᠡ ᠪᠦᠦ ᠬᠡᠲᠦᠷᠡ》 ᠭᠡᠰᠡᠨ ᠢ ᠲᠠ ᠨᠠᠷ ᠪᠢᠳᠡᠨ ᠡᠴᠡ ᠰᠤᠷᠤᠭᠠᠳ᠂ ᠪᠢᠲᠡᠭᠡᠢ ᠨᠢᠭᠡ ᠶᠢ ᠨᠢ ᠬᠦᠨᠳᠦᠳᠬᠡᠨ ᠨᠥᠭᠥᠭᠡ ᠶᠢ ᠨᠢ ᠬᠥᠩᠭᠡᠪᠴᠢᠯᠡᠭᠡᠰᠡᠢ᠂ ᠪᠢᠲᠡᠭᠡᠢ ᠣᠩ᠋ᠭᠢᠷᠠᠭᠠᠰᠠᠢ ᠭᠡᠰᠡᠨ ᠳᠡᠭᠡᠨ ᠶᠤᠮ᠃ 7 ᠬᠡᠨ ᠴᠢᠮᠠᠶᠢ ᠪᠤᠰᠤᠳ ᠠᠴᠠ ᠣᠨᠴᠠᠭᠠᠢ ᠭᠡᠵᠦ ᠦᠵᠡᠵᠦ ᠪᠠᠢᠭᠠ ᠪᠤᠢ︖ ᠬᠦᠯᠢᠶᠡᠵᠦ ᠠᠪᠤᠭᠠ ᠦᠭᠡᠢ ᠵᠦᠢᠯ ᠴᠢᠮᠠ ᠳᠤ ᠪᠠᠢᠨᠠ ᠤᠤ︖ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠶᠤᠮ ᠪᠣᠯ ᠶᠠᠭᠤᠨ ᠳᠤ ᠬᠦᠯᠢᠶᠡᠵᠦ ᠠᠪᠤᠭᠠ ᠦᠭᠡᠢ ᠮᠡᠲᠦ ᠰᠠᠢᠷᠬᠠᠨᠠ ᠪᠤᠢ︖
8 ᠲᠠ ᠨᠠᠷ ᠬᠡᠳᠦᠢᠨᠡᠢ ᠬᠠᠨᠤᠴᠢᠬᠠᠵᠠᠢ᠂ ᠬᠡᠳᠦᠢᠨᠡᠢ ᠪᠠᠶᠠᠵᠢᠴᠢᠬᠠᠵᠠᠢ︕ ᠪᠢᠳᠡᠨ ᠢ ᠦᠭᠡᠢ ᠪᠠᠷ ᠬᠠᠭᠠᠨ ᠪᠣᠯᠴᠢᠬᠠᠵᠠᠢ᠃ ᠲᠠ ᠨᠠᠷ ᠢ ᠦᠨᠡᠬᠡᠷ ᠬᠠᠭᠠᠨ ᠪᠣᠯᠣᠭᠠᠰᠠᠢ ᠭᠡᠵᠦ ᠬᠦᠰᠡᠶᠡ᠂ ᠲᠡᠭᠡᠪᠡᠯ ᠪᠢᠳᠡ ᠪᠠᠰᠠ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠬᠠᠭᠠᠨᠴᠢᠯᠠᠨᠠ ᠳᠠ᠃ 9 ᠪᠤᠷᠬᠠᠨ ᠰᠢᠳᠠᠷ ᠱᠠᠪᠢ ᠪᠢᠳᠡᠨ ᠢ ᠦᠬᠦᠬᠦ ᠶᠠᠯᠠᠲᠠᠨ ᠰᠢᠭ᠋ ᠬᠥᠮᠦᠰ ᠦᠨ ᠰᠡᠭᠦᠯ ᠳᠦ ᠵᠢᠭᠰᠠᠭᠠᠭᠰᠠᠨ ᠭᠡᠵᠦ ᠪᠢ ᠪᠣᠳᠣᠳᠠᠭ᠃ ᠪᠢᠳᠡ ᠶᠢᠷᠲᠢᠨᠴᠦ᠂ ᠲᠩᠷᠢ ᠡᠯᠴᠢᠳ ᠪᠠ ᠬᠥᠮᠦᠰ ᠲᠦ ᠦᠵᠡᠮᠦᠷᠢ ᠪᠣᠯᠣᠭᠰᠠᠨ ᠪᠢᠯᠡ᠃ 10 ᠪᠢᠳᠡ ᠾᠷᠢᠰᠲ᠋ᠣᠰ ᠠᠴᠠ ᠪᠣᠯᠵᠤ ᠮᠤᠩ᠋ᠬᠠᠭ᠂ ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠰᠡᠴᠡᠨ ᠪᠠᠢᠵᠠᠢ᠃ ᠪᠢᠳᠡ ᠰᠤᠯᠠ ᠳᠣᠷᠣᠢ᠂ ᠲᠠ ᠨᠠᠷ ᠬᠦᠴᠦᠲᠡᠢ᠃ ᠲᠠ ᠨᠠᠷ ᠠᠯᠳᠠᠷ ᠬᠦᠨᠳᠦ ᠲᠠᠢ᠂ ᠬᠠᠷᠢᠨ ᠪᠢᠳᠡ ᠠᠯᠳᠠᠷ ᠬᠦᠨᠳᠦ ᠦᠭᠡᠢ᠃ 11 ᠶᠠᠭ ᠡᠨᠡ ᠴᠠᠭ ᠬᠦᠷᠲᠡᠯᠡ ᠪᠢᠳᠡ ᠥᠯᠥᠰᠴᠦ ᠤᠮᠳᠠᠭᠠᠰᠤᠨ᠂ ᠨᠣᠣᠷᠬᠠᠢ ᠬᠤᠪᠴᠠᠰᠤᠯᠠᠵᠤ᠂ ᠵᠣᠳᠣᠭᠳᠠᠨ᠂ ᠣᠷᠣᠬᠤ ᠭᠡᠷ ᠦᠭᠡᠢ ᠶᠠᠪᠤᠵᠤ᠂ 12 ᠥᠪᠡᠷ ᠦᠨ ᠭᠠᠷ ᠢᠶᠠᠷ ᠢᠶᠠᠨ ᠠᠵᠢᠯᠯᠠᠨ ᠵᠦᠳᠡᠷᠡᠵᠦ ᠪᠠᠢᠨᠠ᠃ ᠪᠢᠳᠡ ᠬᠠᠷᠢᠶᠠᠭᠳᠠᠪᠠᠴᠤ ᠢᠷᠥᠭᠡᠵᠦ᠂ ᠬᠠᠪᠴᠢᠭᠳᠠᠪᠠᠴᠤ ᠲᠡᠰᠪᠦᠷᠢᠯᠡᠵᠦ᠂ 13 ᠭᠦᠳᠬᠡᠭᠳᠡᠪᠡᠴᠦ ᠰᠠᠢᠨ ᠢᠶᠠᠷ ᠬᠠᠷᠢᠭᠤᠯᠤᠨᠠ᠃ ᠣᠳᠣ ᠪᠣᠯᠲᠠᠯᠠ ᠪᠢᠳᠡ ᠶᠢᠷᠲᠢᠨᠴᠦ ᠶᠢᠨ ᠬᠣᠭ᠂ ᠪᠦᠬᠦᠨ ᠦ ᠰᠢᠭᠠᠷᠤ ᠮᠡᠲᠦ ᠪᠣᠯᠵᠠᠢ᠃
14 ᠪᠢ ᠲᠠ ᠨᠠᠷ ᠢ ᠢᠴᠢᠭᠡᠬᠦ ᠶᠢᠨ ᠲᠤᠯᠠᠳᠠ ᠪᠢᠰᠢ᠂ ᠬᠠᠷᠢᠨ ᠥᠪᠡᠷ ᠦᠨ ᠢᠶᠠᠨ ᠬᠠᠢᠷᠠᠲᠠᠢ ᠬᠡᠦᠬᠡᠳ ᠤᠳ ᠲᠤ ᠬᠠᠨᠳᠤᠬᠤ ᠮᠡᠲᠦ ᠰᠡᠷᠡᠮᠵᠢᠯᠡᠭᠦᠯᠬᠦ ᠶᠢᠨ ᠲᠥᠯᠥᠭᠡ ᠡᠳᠡᠭᠡᠷ ᠢ ᠪᠢᠴᠢᠵᠦ ᠪᠠᠢᠨᠠ᠃ 15 ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠲᠠ ᠨᠠᠷ ᠲᠤ ᠲᠦᠮᠡᠨ ᠪᠠᠭᠰᠢ ᠪᠠᠢᠯᠠ ᠴᠤ ᠡᠴᠢᠭᠡ ᠪᠣᠯ ᠣᠯᠠᠨ ᠦᠭᠡᠢ᠂ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠪᠠᠶᠠᠷ ᠤᠨ ᠮᠡᠳᠡᠭᠡ ᠪᠡᠷ ᠳᠠᠮᠵᠢᠭᠤᠯᠤᠨ ᠪᠢ ᠲᠠ ᠨᠠᠷ ᠢ ᠲᠥᠷᠥᠭᠦᠯᠦᠭᠰᠡᠨ᠃ 16 ᠲᠡᠢᠮᠦ ᠡᠴᠡ ᠪᠢ ᠲᠠ ᠨᠠᠷ ᠢ ᠢᠳᠬᠠᠶᠠ᠂ ᠨᠠᠮᠠᠶᠢ ᠳᠠᠭᠤᠷᠢᠶᠠᠭᠴᠢᠳ ᠪᠣᠯᠣᠭᠠᠷᠠᠢ᠃ 17 ᠶᠠᠭ ᠡᠢᠮᠦ ᠤᠴᠢᠷ ᠠᠴᠠ ᠡᠵᠡᠨ ᠦ ᠳᠣᠲᠣᠷᠠᠬᠢ ᠮᠢᠨᠦ ᠬᠠᠢᠷᠠᠲᠠᠢ᠂ ᠦᠨᠡᠨᠴᠢ ᠬᠦᠦ ᠲᠢᠮᠣᠲ ᠢ ᠪᠢ ᠲᠠᠨ ᠤ ᠲᠡᠨᠳᠡ ᠢᠯᠡᠭᠡᠭᠰᠡᠨ᠃ ᠭᠠᠵᠠᠷ ᠪᠣᠯᠭᠠᠨ ᠤ ᠴᠢᠭᠤᠯᠭᠠᠨ ᠪᠦᠷᠢ ᠳᠤ ᠵᠢᠭᠠᠳᠠᠭ ᠲᠠᠢ ᠪᠠᠨ ᠠᠳᠠᠯᠢ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠬᠡᠷᠬᠢᠨ ᠶᠠᠪᠤᠳᠠᠭ ᠢ ᠮᠢᠨᠢ ᠲᠡᠷᠡ ᠲᠠ ᠨᠠᠷ ᠲᠤ ᠰᠠᠨᠠᠭᠤᠯᠬᠤ ᠪᠣᠯᠣᠨᠠ᠃ 18 ᠬᠠᠷᠢᠨ ᠨᠠᠮᠠᠶᠢ ᠢᠷᠡᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠭᠠᠳ ᠣᠩᠭᠢᠷᠠᠳᠠᠭ ᠬᠥᠮᠦᠰ ᠲᠠ ᠨᠠᠷ ᠤᠨ ᠳᠤᠮᠳᠠ ᠪᠤᠢ᠃ 19 ᠬᠡᠷᠪᠡ ᠡᠵᠡᠨ ᠦ ᠰᠠᠨᠠᠭᠠ ᠮᠥᠨ ᠪᠣᠯ ᠪᠢ ᠤᠳᠠᠯ ᠦᠭᠡᠢ ᠲᠠᠨ ᠤ ᠲᠡᠨᠳᠡ ᠣᠴᠢᠭᠠᠳ ᠲᠡᠳᠡᠭᠡᠷ ᠣᠩᠭᠢᠷᠠᠭᠴᠢ ᠶᠢᠨ ᠶᠠᠷᠢᠶᠠ ᠶᠢ ᠨᠢ ᠪᠢᠰᠢ᠂ ᠬᠦᠴᠦ ᠶᠢ ᠨᠢ ᠮᠡᠳᠡᠶᠡ᠃ 20 ᠤᠴᠢᠷ ᠨᠢ᠂ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠶᠠᠷᠢᠶᠠᠨ ᠳᠤ ᠪᠢᠰᠢ᠂ ᠬᠠᠷᠢᠨ ᠬᠦᠴᠦᠨ ᠳᠦ ᠪᠠᠢᠳᠠᠭ᠃ 21 ᠲᠠ ᠨᠠᠷ ᠠᠯᠢᠨ ᠳᠤᠨᠢ ᠳᠤᠷᠠᠲᠠᠢ ᠪᠤᠢ︖ ᠪᠢ ᠲᠠ ᠨᠠᠷ ᠤᠷᠤᠭᠤ ᠲᠠᠰᠢᠭᠤᠷ ᠲᠠᠢ ᠣᠴᠢᠬᠤ ᠤᠤ︖ ᠡᠰᠡᠬᠦᠯᠡ ᠬᠠᠢᠷᠠ ᠪᠠ ᠡᠶᠡᠯᠳᠡᠭ ᠰᠡᠳᠬᠢᠯ ᠢᠶᠠᠷ ᠣᠴᠢᠬᠤ ᠤᠤ︖