ᠨᠢᠭᠡᠳᠦᠭᠡᠷ ᠺᠣᠷᠢᠨᠲ ᠨᠠᠢ᠌ᠮᠠ
ᠡᠷᠬᠡ ᠴᠢᠯᠥᠭᠡ ᠬᠢᠭᠡᠳ ᠪᠣᠯᠭᠣᠮᠵᠢᠯᠠᠯ
1 ᠰᠢᠲᠦᠭᠡᠨ ᠳᠦ ᠡᠷᠭᠦᠭᠰᠡᠨ ᠮᠢᠬᠠᠨ ᠤ ᠲᠤᠬᠠᠢ ᠶᠠᠷᠢᠶᠠ᠃ ᠪᠢᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠥᠪᠡᠷ ᠢ ᠪᠠᠨ ᠮᠡᠳᠡᠯᠭᠡ ᠲᠠᠢ ᠭᠡᠵᠦ ᠦᠵᠡᠳᠡᠭ᠂ ᠬᠠᠷᠢᠨ ᠮᠡᠳᠡᠯᠭᠡ ᠬᠥᠮᠦᠨ ᠢ ᠣᠮᠣᠷᠬᠠᠭᠯᠠᠭᠤᠯᠳᠠᠭ ᠪᠣᠯ᠂ ᠬᠠᠢᠷᠠ ᠪᠣᠰᠬᠠᠨ ᠪᠠᠢᠭᠤᠯᠳᠠᠭ᠃ 2 ᠶᠠᠭᠤᠮᠠ ᠮᠡᠳᠡᠨᠡ ᠬᠡᠮᠡᠭᠴᠢ ᠨᠢ ᠮᠡᠳᠡᠬᠦ ᠶᠣᠰᠣᠲᠠᠢ ᠪᠠᠨ ᠴᠤ ᠬᠠᠷᠠᠬᠠᠨ ᠮᠡᠳᠡᠭᠡ ᠦᠭᠡᠢ ᠪᠠᠢᠬᠤ ᠳᠤ᠂ 3 ᠪᠤᠷᠬᠠᠨ ᠢ ᠬᠠᠢᠷᠠᠯᠠᠭᠴᠢ ᠨᠢ ᠪᠤᠷᠬᠠᠨ ᠳᠤ ᠲᠠᠨᠢᠭᠳᠠᠭᠰᠠᠨ ᠪᠠᠢᠳᠠᠭ᠃
4 ᠰᠢᠲᠦᠭᠡᠨ ᠳᠦ ᠡᠷᠭᠦᠭᠰᠡᠨ ᠮᠢᠬᠠ ᠶᠢ ᠢᠳᠡᠬᠦ ᠶᠢᠨ ᠲᠤᠬᠠᠢ ᠶᠠᠷᠢᠶᠠ᠃ ᠶᠢᠷᠲᠢᠨᠴᠦ ᠳᠠᠬᠢ ᠰᠢᠲᠦᠭᠡᠨ ᠶᠠᠭᠤ ᠴᠤ ᠪᠢᠰᠢ᠂ ᠴᠣᠷ ᠤᠨ ᠭᠠᠭᠴᠠ ᠪᠤᠷᠬᠠᠨ ᠠᠴᠠ ᠥᠭᠡᠷᠡ ᠪᠤᠷᠬᠠᠳ ᠪᠠᠢᠬᠤ ᠦᠭᠡᠢ ᠶᠢ ᠪᠢᠳᠡ ᠮᠡᠳᠡᠳᠡᠭ᠃ 5 ᠬᠡᠳᠦᠢᠪᠡᠷ ᠪᠤᠷᠬᠠᠨ ᠭᠡᠭᠳᠡᠭᠴᠢᠳ ᠲᠩᠷᠢ ᠪᠠ ᠭᠠᠵᠠᠷ ᠲᠤ ᠣᠷᠣᠰᠢᠵᠤ ᠪᠠᠢᠭᠰᠠᠨ ᠴᠤ᠂ ᠣᠯᠠᠨ ᠪᠤᠷᠬᠠᠨ ᠣᠯᠠᠨ ᠡᠵᠡᠨ ᠪᠠᠢᠭᠰᠠᠨ ᠴᠤ᠂ 6 ᠪᠢᠳᠡᠨ ᠳᠦ ᠪᠣᠯ ᠴᠣᠷ ᠤᠨ ᠭᠠᠭᠴᠠ ᠡᠴᠢᠭᠡ ᠪᠤᠷᠬᠠᠨ ᠪᠠᠢᠳᠠᠭ᠃ ᠪᠦᠬᠦ ᠶᠠᠭᠤᠮᠠ ᠲᠡᠭᠦᠨ ᠡᠴᠡ ᠭᠠᠷᠤᠭᠰᠠᠨ ᠪᠥᠭᠡᠳ ᠪᠢᠳᠡ ᠲᠡᠭᠦᠨ ᠤᠷᠤᠭᠤ ᠡᠷᠭᠢᠨᠡ᠃ ᠪᠠᠰᠠ ᠭᠠᠭᠴᠠ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠪᠠᠢᠳᠠᠭ ᠪᠥᠭᠡᠳ ᠪᠦᠬᠦ ᠶᠠᠭᠤᠮᠠ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠨ᠂ ᠪᠢᠳᠡ ᠴᠤ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠨ ᠠᠮᠢᠳᠤᠷᠠᠳᠠᠭ ᠪᠢᠯᠡ᠃
7 ᠭᠡᠪᠡᠴᠦ ᠬᠥᠮᠦᠨ ᠪᠦᠬᠦᠨ ᠡᠢᠮᠦᠷᠬᠦ ᠮᠡᠳᠡᠯᠭᠡ ᠲᠠᠢ ᠪᠢᠰᠢ᠂ ᠵᠠᠷᠢᠮ ᠨᠢ ᠡᠳᠦᠭᠡ ᠪᠣᠯᠲᠠᠯᠠ ᠰᠢᠲᠦᠭᠡᠨ ᠳᠦ ᠳᠠᠳᠴᠤ᠂ ᠮᠢᠬᠠ ᠶᠢ ᠰᠢᠲᠦᠭᠡᠨ ᠳᠦ ᠡᠷᠭᠦᠭᠰᠡᠨ ᠢᠳᠡᠭᠡᠨ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠢᠳᠡᠳᠡᠭ ᠤᠴᠢᠷ ᠠᠴᠠ ᠰᠤᠯᠠ ᠳᠣᠷᠣᠢ ᠮᠥᠰᠥ ᠴᠢᠨᠠᠷ ᠢᠶᠠᠨ ᠪᠤᠵᠠᠷᠯᠠᠳᠠᠭ᠃ 8 ᠦᠨᠡᠨ ᠳᠡᠭᠡᠨ ᠬᠣᠭᠣᠯᠠ ᠤᠮᠳᠠ ᠪᠢᠳᠡᠨ ᠢ ᠪᠤᠷᠬᠠᠨ ᠳᠤ ᠣᠢᠷᠠᠲᠤᠭᠤᠯᠳᠠᠭ ᠪᠢᠰᠢ ᠶᠤᠮ᠃ ᠪᠢᠳᠡ ᠢᠳᠡᠬᠦ ᠦᠭᠡᠢ ᠴᠤ ᠭᠡᠰᠡᠨ ᠠᠯᠳᠠᠬᠤ ᠦᠭᠡᠢ᠂ ᠢᠳᠡᠭᠰᠡᠨ ᠴᠤ ᠣᠯᠬᠤ ᠦᠭᠡᠢ᠃ 9 ᠬᠠᠷᠢᠨ ᠡᠨᠡ ᠬᠦ ᠡᠷᠬᠡ ᠴᠢᠯᠥᠭᠡ ᠴᠢᠨᠢ ᠰᠤᠯᠠ ᠳᠣᠷᠣᠢ ᠬᠥᠮᠦᠨ ᠳᠦ ᠪᠦᠳᠦᠷᠢᠭᠦᠯᠦᠯᠭᠡ ᠪᠣᠯᠬᠤ ᠠᠴᠠ ᠪᠣᠯᠭᠣᠮᠵᠢᠯᠠᠭᠲᠤᠨ᠃ 10 ᠰᠤᠯᠠ ᠳᠣᠷᠣᠢ ᠢᠲᠡᠭᠡᠭᠴᠢ ᠬᠡᠷᠪᠡ ᠡᠢᠮᠦ ᠮᠡᠳᠡᠯᠭᠡ ᠲᠠᠢ ᠴᠢᠮᠠᠶᠢ ᠰᠢᠲᠦᠭᠡᠨ ᠦ ᠰᠦᠮᠡ ᠳᠦ ᠬᠣᠭᠣᠯᠠ ᠢᠳᠡᠵᠦ ᠰᠠᠭᠤᠬᠤ ᠶᠢ ᠬᠠᠷᠠᠪᠠᠯ᠂ ᠲᠡᠷᠡ ᠪᠡᠷ ᠰᠢᠲᠦᠭᠡᠨ ᠳᠦ ᠡᠷᠭᠦᠭᠰᠡᠨ ᠮᠢᠬᠠ ᠶᠢ ᠢᠳᠡᠬᠦ ᠵᠣᠷᠢᠭ ᠣᠷᠣᠬᠤ ᠪᠤᠰᠤ ᠤᠤ︖ 11 ᠲᠡᠳᠡᠨ ᠦ ᠲᠥᠯᠥᠭᠡ ᠾᠷᠢᠰᠲ᠋ᠣᠰ ᠨᠥᠭᠴᠢᠭᠰᠡᠨ ᠪᠠᠢᠬᠤ ᠳᠤ᠂ ᠲᠠ ᠥᠪᠡᠷ ᠦᠨ ᠢᠶᠠᠨ ᠮᠡᠳᠡᠯᠭᠡ ᠪᠡᠷ ᠰᠤᠯᠠ ᠳᠣᠷᠣᠢ ᠠᠬᠠ ᠳᠡᠭᠦᠦ ᠪᠡᠨ ᠮᠥᠬᠥᠭᠡᠵᠦ ᠪᠠᠢᠨᠠ᠃ 12 ᠲᠠ ᠨᠠᠷ ᠡᠨᠡ ᠮᠡᠲᠦ ᠪᠡᠷ ᠠᠬᠠ ᠳᠡᠭᠦᠦ ᠳᠡᠭᠡᠨ ᠨᠢᠭᠦᠯ ᠬᠢᠵᠦ᠂ ᠲᠡᠳᠡᠨ ᠦ ᠰᠤᠯᠠ ᠳᠣᠷᠣᠢ ᠮᠥᠰᠥ ᠴᠢᠨᠠᠷ ᠢ ᠰᠢᠷᠬᠠᠲᠤᠭᠤᠯᠬᠤ ᠨᠢ ᠾᠷᠢᠰᠲ᠋ᠣᠰ ᠲᠤ ᠨᠢᠭᠦᠯ ᠬᠢᠭᠰᠡᠨ ᠶᠠᠪᠤᠳᠠᠯ ᠪᠣᠯᠣᠨᠠ᠃ 13 ᠲᠡᠢᠮᠦ ᠡᠴᠡ ᠢᠳᠡᠬᠦ ᠶᠠᠭᠤᠮᠠ ᠮᠢᠨᠦ ᠠᠬᠠ ᠳᠡᠭᠦᠦ ᠶᠢ ᠪᠦᠳᠦᠷᠢᠭᠦᠯᠬᠦ ᠶᠤᠮ ᠪᠣᠯ᠂ ᠠᠬᠠ ᠳᠡᠭᠦᠦ ᠪᠡᠨ ᠪᠦᠳᠦᠷᠢᠭᠦᠯᠬᠦ ᠦᠭᠡᠢ ᠶᠢᠨ ᠲᠤᠯᠠᠳᠠ ᠪᠢ ᠮᠢᠬᠠ ᠶᠠᠭ ᠢᠳᠡᠬᠦ ᠦᠭᠡᠢ᠃