ᠨᠢᠭᠡᠳᠦᠭᠡᠷ ᠺᠣᠷᠢᠨᠲ ᠠᠷᠪᠠᠨ ᠭᠤᠷᠪᠠ
ᠬᠠᠮᠤᠭ ᠤᠨ ᠠᠭᠤᠤ ᠨᠢ ᠬᠠᠢᠷᠠ
1 ᠪᠢ ᠬᠥᠮᠦᠨ ᠪᠠ ᠲᠩᠷᠢ ᠶᠢᠨ ᠡᠯᠴᠢᠳ ᠤᠨ ᠬᠡᠯᠡ ᠨᠦᠭᠦᠳ ᠢᠶᠡᠷ ᠶᠠᠷᠢᠭᠰᠠᠨ ᠴᠤ ᠨᠠᠳᠠ ᠳᠤ ᠬᠠᠢᠷᠠ ᠪᠠᠢᠬᠤ ᠦᠭᠡᠢ ᠪᠣᠯ ᠳᠤᠤᠭᠠᠷᠬᠤ ᠬᠠᠷᠠᠩ᠋ᠭᠠ᠂ ᠴᠠᠩᠭᠢᠨᠠᠬᠤ ᠴᠠᠩ ᠲᠠᠢ ᠠᠳᠠᠯᠢ᠃ 2 ᠪᠢ ᠡᠰᠢ ᠦᠵᠡᠭᠦᠯᠵᠦ ᠪᠦᠬᠦ ᠨᠢᠭᠤᠴᠠ᠂ ᠪᠦᠬᠦ ᠮᠡᠳᠡᠯᠭᠡ ᠶᠢ ᠮᠡᠳᠡᠭᠰᠡᠨ ᠴᠤ᠂ ᠠᠭᠤᠯᠠᠰ ᠢ ᠨᠡᠭᠦᠯᠭᠡᠮᠡ ᠪᠦᠷᠢᠨ ᠢᠲᠡᠭᠡᠯ ᠲᠡᠢ ᠪᠠᠢᠭᠰᠠᠨ ᠴᠤ ᠨᠠᠳᠠ ᠳᠤ ᠬᠠᠢᠷᠠ ᠦᠭᠡᠢ ᠪᠣᠯ ᠶᠠᠭᠤ ᠴᠤ ᠪᠢᠰᠢ᠃ 3 ᠪᠢ ᠪᠠᠢᠭᠠ ᠪᠦᠬᠦᠨ ᠢᠶᠡᠷ ᠢᠶᠠᠨ ᠶᠠᠳᠠᠭᠤᠰ ᠢ ᠲᠡᠵᠢᠭᠡᠵᠦ᠂ ᠪᠡᠶᠡ ᠪᠡᠨ ᠵᠣᠷᠢᠭᠤᠯᠤᠭᠰᠠᠨ ᠴᠤ ᠨᠠᠳᠠ ᠳᠤ ᠬᠠᠢᠷᠠ ᠦᠭᠡᠢ ᠪᠣᠯ ᠶᠠᠮᠠᠷ ᠴᠤ ᠬᠦᠷᠲᠡᠭᠡᠯ ᠦᠭᠡᠢ᠃
4 ᠬᠠᠢᠷᠠ ᠲᠡᠪᠴᠢᠶᠡᠷᠢ ᠲᠠᠢ᠂ ᠬᠠᠢᠷᠠ ᠡᠨᠡᠷᠢᠩᠭᠦᠢ᠂ ᠠᠲᠠᠭᠠᠷᠬᠠᠯ ᠦᠭᠡᠢ᠂ ᠬᠠᠢᠷᠠ ᠣᠩᠭᠢᠷᠠᠬᠤ ᠦᠭᠡᠢ᠂ ᠶᠡᠬᠡᠷᠬᠡᠬᠦ ᠦᠭᠡᠢ᠂ 5 ᠶᠣᠰᠣ ᠠᠯᠳᠠᠬᠤ ᠦᠭᠡᠢ᠂ ᠬᠤᠪᠢ ᠪᠠᠨ ᠪᠣᠳᠣᠬᠤ ᠦᠭᠡᠢ᠂ ᠠᠮᠠᠷᠬᠠᠨ ᠠᠭᠤᠷᠯᠠᠬᠤ ᠦᠭᠡᠢ᠂ ᠥᠰ ᠪᠣᠳᠣᠬᠤ ᠦᠭᠡᠢ᠂ 6 ᠵᠥᠪ ᠪᠤᠰᠤ ᠳᠤ ᠪᠠᠶᠠᠷᠯᠠᠬᠤ ᠦᠭᠡᠢ᠂ ᠬᠠᠷᠢᠨ ᠦᠨᠡᠨ ᠳᠦ ᠪᠠᠶᠠᠷᠯᠠᠵᠤ᠂ 7 ᠠᠯᠢᠪᠠ ᠶᠢ ᠪᠠᠭᠲᠠᠭᠠᠵᠤ᠂ ᠠᠯᠢᠪᠠ ᠶᠢ ᠢᠲᠡᠭᠡᠵᠦ᠂ ᠠᠯᠢᠪᠠ ᠶᠢ ᠡᠷᠡᠮᠡᠯᠵᠡᠵᠦ᠂ ᠠᠯᠢᠪᠠ ᠶᠢ ᠲᠡᠰᠪᠦᠷᠢᠯᠡᠳᠡᠭ᠌᠃
8 ᠬᠠᠢᠷᠠ ᠪᠣᠯ ᠮᠥᠬᠥᠰᠢ ᠦᠭᠡᠢ᠃ ᠬᠠᠷᠢᠨ ᠡᠰᠢ ᠦᠵᠡᠭᠦᠯᠦᠯᠭᠡ ᠨᠢ ᠤᠰᠠᠳᠴᠤ ᠥᠭᠡᠷᠡ ᠬᠡᠯᠡ ᠨᠦᠭᠦᠳ ᠴᠤ ᠲᠡᠭᠦᠰᠴᠦ᠂ ᠮᠡᠳᠡᠯᠭᠡ ᠴᠤ ᠤᠰᠠᠲᠤᠨᠠ᠃ 9 ᠪᠢᠳᠡ ᠬᠡᠰᠡᠭᠬᠡᠨ ᠢ ᠯᠠ ᠮᠡᠳᠡᠨ᠂ ᠬᠡᠰᠡᠭᠬᠡᠨ ᠢ ᠯᠠ ᠡᠰᠢ ᠦᠵᠡᠭᠦᠯᠳᠡᠭ ᠪᠣᠯᠪᠠᠴᠤ 10 ᠪᠦᠷᠢᠨ ᠲᠡᠭᠦᠰ ᠨᠢ ᠢᠷᠡᠬᠦ ᠳᠦ ᠬᠡᠰᠡᠭᠬᠡᠨ ᠨᠢ ᠤᠰᠠᠲᠤᠨᠠ᠃ 11 ᠪᠢ ᠬᠡᠦᠬᠡᠳ ᠪᠠᠢᠬᠤ ᠳᠠᠭᠠᠨ ᠬᠡᠦᠬᠡᠳ ᠮᠡᠲᠦ ᠥᠭᠦᠯᠡᠨ ᠬᠡᠦᠬᠡᠳ ᠮᠡᠲᠦ ᠣᠢᠯᠠᠭᠠᠵᠤ᠂ ᠬᠡᠦᠬᠡᠳ ᠮᠡᠲᠦ ᠪᠣᠳᠣᠳᠠᠭ ᠪᠠᠢᠭᠰᠠᠨ᠃ ᠡᠷᠡ ᠶᠢᠨ ᠴᠡᠭᠡᠯ ᠳᠦ ᠬᠦᠷᠦᠭᠡᠳ ᠬᠡᠦᠬᠡᠳ ᠦᠨ ᠶᠠᠪᠤᠳᠠᠯ ᠤᠳ ᠢᠶᠠᠨ ᠣᠷᠬᠢᠭᠰᠠᠨ ᠪᠠᠢᠨᠠ᠃ 12 ᠣᠳᠣ ᠪᠢᠳᠡ ᠲᠣᠯᠢ 10 ᠪᠠᠷ ᠬᠠᠷᠠᠳᠠᠭ ᠪᠣᠯᠪᠠᠴᠤ ᠲᠡᠷᠡ ᠦᠶᠡ ᠳᠦ ᠨᠢᠭᠤᠷ ᠨᠢᠭᠤᠷ ᠢᠶᠠᠷ ᠢᠶᠠᠨ ᠬᠠᠷᠠᠬᠤ ᠪᠣᠯᠣᠨᠠ᠃ ᠣᠳᠣ ᠪᠢ ᠬᠡᠰᠡᠭᠬᠡᠨ ᠢ ᠮᠡᠳᠡᠳᠡᠭ ᠪᠣᠯᠪᠠᠴᠤ ᠡᠵᠡᠨ ᠨᠠᠮᠠᠶᠢ ᠲᠡᠭᠦᠰ ᠮᠡᠳᠡᠭᠰᠡᠨ ᠰᠢᠭ ᠢᠶᠠᠷ ᠲᠡᠷᠡ ᠦᠶᠡ ᠳᠦ ᠪᠢ ᠴᠤ ᠲᠡᠭᠦᠰ ᠮᠡᠳᠡᠬᠦ ᠪᠣᠯᠣᠨᠠ᠃ 13 ᠡᠢᠮᠦ ᠡᠴᠡ ᠢᠲᠡᠭᠡᠯ᠂ ᠡᠷᠡᠮᠡᠯᠵᠡᠯ᠂ ᠬᠠᠢᠷᠠ ᠭᠤᠷᠪᠠ ᠦᠯᠡᠳᠡᠬᠦ ᠪᠥᠭᠡᠳ ᠡᠳᠡᠭᠡᠷ ᠦᠨ ᠬᠠᠮᠤᠭ ᠤᠨ ᠠᠭᠤᠤ ᠨᠢ ᠬᠠᠢᠷᠠ ᠪᠢᠯᠡ᠃