ᠨᠢᠭᠡᠳᠦᠭᠡᠷ ᠺᠣᠷᠢᠨᠲ ᠳᠣᠯᠣᠭᠠ
ᠭᠡᠷᠯᠡᠯᠲᠡ ᠶᠢᠨ ᠲᠤᠬᠠᠢ ᠵᠥᠪᠯᠡᠯᠭᠡ
1 ᠲᠠ ᠨᠠᠷ ᠤᠨ ᠪᠢᠴᠢᠵᠦ ᠶᠠᠪᠤᠭᠤᠯᠤᠭᠰᠠᠨ ᠠᠰᠠᠭᠤᠯᠲᠠ ᠶᠢᠨ ᠲᠤᠬᠠᠢ ᠶᠠᠷᠢᠶᠠ᠃ ᠡᠷᠡ ᠬᠥᠮᠦᠨ ᠡᠮᠡᠭᠲᠡᠢ ᠬᠥᠮᠦᠨ ᠳᠦ ᠬᠠᠪᠢᠳᠠᠬᠤ ᠦᠭᠡᠢ ᠨᠢ ᠰᠠᠢᠨ᠃ 2 ᠬᠠᠷᠢᠨ ᠰᠠᠳᠤᠷ ᠰᠠᠮᠠᠭᠤᠨ ᠢ ᠪᠠᠢᠯᠭᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠡᠷᠡᠭᠲᠡᠢ ᠬᠥᠮᠦᠨ ᠪᠣᠯᠭᠠᠨ ᠭᠡᠷᠭᠡᠢ ᠲᠡᠢ᠂ ᠡᠮᠡᠭᠲᠡᠢ ᠬᠥᠮᠦᠨ ᠪᠣᠯᠭᠠᠨ ᠨᠥᠬᠥᠷ ᠲᠡᠢ ᠪᠠᠢᠭᠠᠷᠠᠢ᠃ 3 ᠨᠥᠬᠥᠷ ᠨᠢ ᠭᠡᠷᠭᠡᠢ ᠳᠡᠭᠡᠨ ᠡᠭᠦᠷᠭᠡ ᠪᠡᠨ ᠭᠦᠢᠴᠡᠳᠬᠡᠨ᠂ ᠭᠡᠷᠭᠡᠢ ᠨᠢ ᠴᠤ ᠨᠥᠬᠥᠷ ᠲᠡᠭᠡᠨ ᠲᠡᠭᠦᠨᠴᠢᠯᠡᠨ ᠬᠢᠭᠡᠷᠡᠢ᠃ 4 ᠭᠡᠷᠭᠡᠢ ᠳᠦᠨᠢ ᠥᠪᠡᠷ ᠦᠨ ᠪᠡᠶᠡ ᠳᠡᠭᠡᠨ ᠡᠵᠡᠨ ᠪᠣᠯᠬᠤ ᠡᠷᠬᠡ ᠦᠭᠡᠢ᠂ ᠬᠠᠷᠢᠨ ᠨᠥᠬᠥᠷ ᠲᠤᠨᠢ ᠪᠤᠢ᠃ ᠲᠡᠭᠦᠨᠴᠢᠯᠡᠨ ᠨᠥᠬᠥᠷ ᠲᠤᠨᠢ ᠥᠪᠡᠷ ᠦᠨ ᠪᠡᠶᠡ ᠳᠡᠭᠡᠨ ᠡᠵᠡᠨ ᠪᠣᠯᠬᠤ ᠡᠷᠬᠡ ᠦᠭᠡᠢ᠂ ᠬᠠᠷᠢᠨ ᠭᠡᠷᠭᠡᠢ ᠳᠦᠨᠢ ᠪᠤᠢ᠃ 5 ᠬᠠᠨᠢ ᠲᠠᠢ ᠪᠠᠨ ᠬᠠᠷᠢᠯᠴᠠᠬᠤ ᠡᠷᠬᠡ ᠶᠢ ᠪᠦᠦ ᠣᠭᠣᠷ᠂ ᠳᠠᠭᠠᠳᠬᠠᠯ ᠳᠤ ᠵᠣᠷᠢᠭᠤᠯᠤᠨ ᠳᠠᠬᠢᠨ ᠨᠡᠢᠯᠡᠬᠦ ᠪᠡᠷ ᠲᠣᠬᠢᠷᠠᠭᠰᠠᠨ ᠦᠶᠡ ᠳᠦ ᠯᠠ ᠲᠦᠷ ᠴᠠᠭ ᠠᠰ ᠠᠰᠳᠠᠭᠠᠨ ᠪᠠᠢᠵᠤ ᠪᠣᠯᠣᠨᠠ᠃ ᠳᠠᠬᠢᠨ ᠨᠡᠢᠯᠡᠬᠦ ᠦᠭᠡᠢ ᠪᠣᠯ ᠲᠠ ᠨᠠᠷ ᠪᠡᠶᠡ ᠪᠡᠨ ᠪᠠᠷᠢᠵᠤ ᠳᠡᠢᠯᠬᠦ ᠦᠭᠡᠢ ᠪᠣᠯᠬᠣᠷ ᠰᠠᠲ᠋ᠠᠨ ᠳᠤ ᠲᠡᠩᠰᠡᠭᠳᠡᠬᠦ ᠪᠤᠢ᠃ 6 ᠬᠠᠷᠢᠨ ᠡᠳᠡᠭᠡᠷ ᠦᠭᠡ ᠮᠢᠨᠢ ᠵᠠᠷᠯᠢᠭ ᠪᠢᠰᠢ᠂ ᠵᠥᠪᠯᠡᠯᠭᠡ ᠪᠢᠯᠡ᠃ 7 ᠬᠠᠮᠤᠭ ᠬᠥᠮᠦᠨ ᠨᠠᠳᠠ ᠲᠠᠢ ᠠᠳᠠᠯᠢ ᠪᠠᠢᠭᠠᠰᠠᠢ ᠭᠡᠵᠦ ᠪᠢ ᠬᠦᠰᠡᠨᠡ᠃ ᠭᠡᠬᠦ ᠳᠦ ᠬᠥᠮᠦᠨ ᠪᠣᠯᠭᠠᠨ ᠳᠤ ᠪᠤᠷᠬᠠᠨ ᠠᠴᠠ ᠬᠦᠷᠲᠡᠭᠡᠭᠰᠡᠨ ᠲᠤᠰ ᠲᠤᠰ ᠤᠨ ᠰᠣᠶᠣᠷᠬᠠᠯ ᠪᠤᠢ᠂ ᠨᠢᠭᠡ ᠨᠢ ᠡᠢᠮᠦ ᠪᠠᠢᠬᠤ ᠳᠤ᠂ ᠨᠥᠭᠥᠭᠡ ᠨᠢ ᠲᠡᠢᠮᠦ ᠪᠠᠢᠳᠠᠭ᠃
8 ᠭᠡᠷᠯᠡᠭᠡ ᠦᠭᠡᠢ ᠬᠥᠮᠦᠨ ᠪᠠ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠲᠤᠬᠠᠢ ᠭᠡᠪᠡᠯ᠂ ᠲᠡᠳᠡ ᠨᠠᠳᠠ ᠲᠠᠢ ᠠᠳᠠᠯᠢ᠂ ᠪᠠᠢᠭᠠ ᠬᠡᠪ ᠢᠶᠡᠷ ᠢᠶᠠᠨ ᠪᠠᠢᠬᠤ ᠨᠢ ᠰᠠᠢᠨ᠃ 9 ᠬᠡᠷᠪᠡ ᠪᠡᠶᠡ ᠪᠡᠨ ᠪᠠᠷᠢᠵᠤ ᠳᠡᠢᠯᠬᠦ ᠦᠭᠡᠢ ᠪᠣᠯ ᠭᠡᠷᠯᠡᠭᠡᠷᠡᠢ᠃ ᠲᠠᠴᠢᠶᠠᠬᠤ ᠠᠴᠠ ᠭᠡᠷᠯᠡᠭᠰᠡᠨ ᠨᠢ ᠳᠡᠭᠡᠷᠡ᠃
10 ᠭᠡᠷᠯᠡᠭᠰᠡᠨ ᠬᠥᠮᠦᠰ ᠲᠦ ᠲᠤᠰᠢᠶᠠᠶᠠ (ᠡᠨᠡ ᠪᠣᠯ ᠮᠢᠨᠦ ᠦᠭᠡ ᠪᠢᠰᠢ᠂ ᠡᠵᠡᠨ ᠦ ᠦᠭᠡ ᠶᠤᠮ᠃)᠃ ᠭᠡᠷᠭᠡᠢ ᠨᠢ ᠨᠥᠬᠥᠷ ᠡᠴᠡ ᠪᠡᠨ ᠰᠠᠯᠵᠤ ᠪᠣᠯᠬᠤ ᠦᠭᠡᠢ 11 (ᠬᠡᠷᠪᠡ ᠰᠠᠯᠤᠭᠰᠠᠨ ᠪᠣᠯ ᠳᠠᠬᠢᠨ ᠭᠡᠷᠯᠡᠬᠦ ᠦᠭᠡᠢ ᠬᠡᠪ ᠢᠶᠡᠷ ᠪᠠᠢ᠂ ᠡᠰᠡᠪᠡᠯ ᠨᠥᠬᠥᠷ ᠲᠡᠢ ᠪᠡᠨ ᠡᠪᠰᠡᠭᠲᠦᠨ)᠂ ᠨᠥᠬᠥᠷ ᠨᠢ ᠴᠤ ᠭᠡᠷᠭᠡᠢ ᠪᠡᠨ ᠬᠠᠶᠠᠵᠤ ᠪᠣᠯᠬᠤ ᠦᠭᠡᠢ᠃
12 ᠪᠤᠰᠤᠳ ᠬᠥᠮᠦᠰ ᠲᠦ ᠬᠡᠯᠡᠶᠡ (ᠡᠨᠡ ᠪᠣᠯ ᠡᠵᠡᠨ ᠦ ᠦᠭᠡ ᠪᠢᠰᠢ᠂ ᠮᠢᠨᠦ ᠦᠭᠡ ᠶᠤᠮ᠃)᠃ ᠬᠡᠷᠪᠡ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠨᠢᠭᠡ ᠨᠢ ᠢᠲᠡᠭᠡᠭᠴᠢ ᠪᠤᠰᠤ ᠭᠡᠷᠭᠡᠢ ᠲᠡᠢ ᠪᠥᠭᠡᠳ ᠲᠡᠷᠡ ᠭᠡᠷᠭᠡᠢ ᠨᠢ ᠨᠥᠬᠥᠷ ᠲᠡᠢ ᠪᠡᠨ ᠬᠠᠮᠲᠤ ᠰᠠᠭᠤᠬᠤ ᠶᠢ ᠬᠦᠰᠡᠪᠡᠯ ᠲᠡᠭᠦᠨ ᠢ ᠬᠠᠶᠠᠵᠤ ᠪᠣᠯᠬᠤ ᠦᠭᠡᠢ᠃ 13 ᠮᠥᠨ ᠨᠢᠭᠡ ᠡᠮᠡᠭᠲᠡᠢ ᠢᠲᠡᠭᠡᠭᠴᠢ ᠪᠤᠰᠤ ᠨᠥᠬᠥᠷ ᠲᠡᠢ ᠪᠥᠭᠡᠳ ᠨᠥᠬᠥᠷ ᠨᠢ ᠲᠡᠭᠦᠨ ᠲᠡᠢ ᠬᠠᠮᠲᠤ ᠰᠠᠭᠤᠬᠤ ᠶᠢ ᠬᠦᠰᠡᠪᠡᠯ ᠲᠡᠭᠦᠨ ᠢ ᠬᠠᠶᠠᠵᠤ ᠪᠣᠯᠬᠤ ᠦᠭᠡᠢ᠃ 14 ᠤᠴᠢᠷ ᠨᠢ᠂ ᠢᠲᠡᠭᠡᠭᠴᠢ ᠪᠢᠰᠢ ᠨᠥᠬᠥᠷ ᠨᠢ ᠭᠡᠷᠭᠡᠢ ᠡᠴᠡ ᠪᠡᠨ ᠪᠣᠯᠵᠤ ᠠᠷᠢᠭᠤᠳᠬᠠᠭᠳᠠᠨ᠂ ᠢᠲᠡᠭᠡᠭᠴᠢ ᠪᠢᠰᠢ ᠭᠡᠷᠭᠡᠢ ᠨᠢ ᠢᠲᠡᠭᠡᠭᠴᠢ ᠨᠥᠬᠥᠷ ᠡᠴᠡ ᠪᠡᠨ ᠪᠣᠯᠵᠤ ᠠᠷᠢᠭᠤᠳᠬᠠᠭᠳᠠᠭᠰᠠᠨ ᠪᠠᠢᠳᠠᠭ᠃ ᠲᠡᠢᠮᠦ ᠪᠢᠰᠢ ᠪᠣᠯ ᠲᠠ ᠨᠠᠷ ᠤᠨ ᠬᠡᠦᠬᠡᠳ ᠤᠳ ᠴᠡᠪᠡᠷ ᠪᠤᠰᠤ ᠪᠠᠢᠬᠤ ᠰᠠᠨ᠂ ᠬᠠᠷᠢᠨ ᠡᠳᠦᠭᠡ ᠠᠷᠢᠭᠤᠨ ᠪᠠᠢᠨᠠ᠃ 15 ᠬᠡᠷᠪᠡ ᠢᠲᠡᠭᠡᠭᠴᠢ ᠪᠢᠰᠢ ᠬᠥᠮᠦᠨ ᠰᠠᠯᠵᠤ ᠶᠠᠪᠤᠶᠠ ᠭᠡᠪᠡᠯ ᠶᠠᠪᠤᠭ᠃ ᠠᠬᠠ ᠳᠡᠭᠦᠦ ᠴᠤ ᠭᠡᠰᠡᠨ᠂ ᠡᠭᠡᠴᠢ ᠳᠡᠭᠦᠦ ᠴᠤ ᠭᠡᠰᠡᠨ᠂ ᠡᠢᠮᠦ ᠲᠣᠬᠢᠶᠠᠯᠳᠤᠯ ᠳᠤ ᠬᠦᠯᠢᠶᠡᠰᠦᠯᠡᠭᠳᠡᠭᠰᠡᠨ ᠦ ᠬᠡᠷᠡᠭ ᠦᠭᠡᠢ᠂ ᠪᠤᠷᠬᠠᠨ ᠲᠠ ᠨᠠᠷ ᠢ ᠠᠮᠤᠷ ᠠᠮᠤᠭᠤᠯᠠᠩ ᠪᠠᠢᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠳᠠᠭᠤᠳᠠᠭᠰᠠᠨ ᠶᠤᠮ᠃ 16 ᠭᠡᠷᠭᠡᠢ ᠪᠣᠯᠣᠭᠰᠠᠨ ᠴᠢ ᠨᠥᠬᠥᠷ ᠢᠶᠡᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠡᠰᠡᠬᠦ ᠪᠡᠨ ᠬᠡᠷᠬᠢᠨ ᠮᠡᠳᠡᠬᠦ ᠪᠢᠯᠡ︖ ᠨᠥᠬᠥᠷ ᠪᠣᠯᠣᠭᠰᠠᠨ ᠴᠢ ᠭᠡᠷᠭᠡᠢ ᠪᠡᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠡᠰᠡᠬᠦ ᠪᠡᠨ ᠬᠡᠷᠬᠢᠨ ᠮᠡᠳᠡᠬᠦ ᠪᠢᠯᠡ︖
17 ᠡᠵᠡᠨ ᠦ ᠬᠥᠮᠦᠨ ᠪᠦᠷᠢ ᠳᠤ ᠬᠤᠪᠢᠶᠠᠭᠰᠠᠨ ᠶᠣᠰᠣᠭᠠᠷ᠂ ᠪᠤᠷᠬᠠᠨ ᠤ ᠬᠥᠮᠦᠨ ᠪᠦᠷᠢ ᠶᠢ ᠳᠠᠭᠤᠳᠠᠭᠰᠠᠨ ᠢᠶᠠᠷ ᠶᠠᠪᠤᠭᠠᠷᠠᠢ᠃ ᠪᠢ ᠪᠦᠬᠦ ᠴᠢᠭᠤᠯᠭᠠᠨ ᠳᠤ ᠢᠩᠭᠢᠵᠦ ᠵᠠᠬᠢᠳᠠᠭ ᠶᠤᠮ᠃ 18 ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ ᠳᠠᠭᠤᠳᠠᠭᠳᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠢᠮᠦ ᠬᠥᠮᠦᠨ ᠬᠥᠨᠳᠡᠭᠦᠯᠦᠭᠰᠡᠨ ᠢᠶᠡᠨ ᠠᠷᠢᠯᠭᠠᠬᠤ ᠬᠡᠷᠡᠭ ᠦᠭᠡᠢ᠃ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠪᠠᠷ ᠳᠠᠭᠤᠳᠠᠭᠳᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠢᠮᠦ ᠬᠥᠮᠦᠨ ᠬᠥᠨᠳᠡᠭᠦᠯᠬᠦ ᠬᠡᠷᠡᠭ ᠦᠭᠡᠢ᠃ 19 ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠬᠦ ᠨᠢ ᠶᠠᠭᠤ ᠴᠤ ᠪᠢᠰᠢ᠂ ᠬᠥᠨᠳᠡᠭᠦᠯᠬᠦ ᠦᠭᠡᠢ ᠨᠢ ᠴᠤ ᠶᠠᠭᠤ ᠴᠤ ᠪᠢᠰᠢ᠂ ᠪᠤᠷᠬᠠᠨ ᠤ ᠵᠠᠷᠯᠢᠭ ᠢ ᠯᠠ ᠰᠠᠬᠢᠪᠠᠯ ᠪᠣᠯᠣᠨᠠ᠃ 20 ᠬᠥᠮᠦᠨ ᠪᠣᠯᠭᠠᠨ ᠳᠠᠭᠤᠳᠠᠭᠳᠠᠭᠰᠠᠨ ᠦᠶᠡ ᠶᠢᠨ ᠪᠠᠢᠳᠠᠯ ᠢᠶᠠᠷ ᠢᠶᠠᠨ ᠪᠠᠢᠵᠤ ᠪᠠᠢᠭᠠᠷᠠᠢ᠃
21 ᠴᠢ ᠳᠠᠭᠤᠳᠠᠭᠳᠠᠬᠤ ᠳᠠᠭᠠᠨ ᠪᠣᠭᠣᠯ ᠪᠠᠢᠭᠰᠠᠨ ᠤᠤ︖ ᠪᠦᠦ ᠰᠠᠨᠠᠭᠠ ᠵᠣᠪᠠ᠃ ᠭᠡᠪᠡᠴᠦ ᠴᠢ ᠡᠷᠬᠡ ᠴᠢᠯᠥᠭᠡ ᠲᠠᠢ ᠪᠣᠯᠬᠤ ᠵᠠᠪᠰᠢᠶᠠᠨ ᠪᠠᠢᠪᠠᠯ ᠠᠰᠢᠭᠯᠠᠵᠤ ᠪᠣᠯᠣᠨᠠ᠃ 22 ᠤᠴᠢᠷ ᠨᠢ᠂ ᠪᠣᠭᠣᠯ ᠪᠠᠢᠬᠤ ᠳᠠᠭᠠᠨ ᠡᠵᠡᠨ ᠦ ᠳᠣᠲᠣᠷᠠ ᠳᠠᠭᠤᠳᠠᠭᠳᠠᠭᠰᠠᠨ ᠬᠥᠮᠦᠨ ᠡᠵᠡᠨ ᠦ ᠴᠢᠯᠥᠭᠡᠲᠦ ᠬᠥᠮᠦᠨ ᠮᠥᠨ᠂ ᠡᠭᠦᠨ ᠲᠡᠢ ᠠᠳᠠᠯᠢ ᠪᠠᠷ ᠡᠵᠡᠨ ᠳᠦ ᠳᠠᠭᠤᠳᠠᠭᠳᠠᠬᠤ ᠳᠤ ᠴᠢᠯᠥᠭᠡᠲᠦ ᠪᠠᠢᠭᠰᠠᠨ ᠬᠥᠮᠦᠨ ᠾᠷᠢᠰᠲ᠋ᠣᠰ ᠤᠨ ᠪᠣᠭᠣᠯ ᠶᠤᠮ᠃ 23 ᠪᠤᠷᠬᠠᠨ ᠲᠠ ᠨᠠᠷ ᠢ ᠦᠨᠡ ᠲᠥᠯᠥᠪᠥᠷᠢ ᠲᠠᠢ ᠪᠠᠷ ᠬᠤᠳᠠᠯᠳᠤᠨ ᠠᠪᠤᠭᠰᠠᠨ᠂ ᠬᠥᠮᠦᠨ ᠦ ᠪᠣᠭᠣᠯ ᠪᠦᠦ ᠪᠣᠯᠣᠭᠲᠤᠨ᠃ 24 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠪᠦᠬᠦᠨ ᠳᠠᠭᠤᠳᠠᠭᠳᠠᠭᠰᠠᠨ ᠦᠶᠡ ᠶᠢᠨ ᠪᠠᠢᠳᠠᠯ ᠢᠶᠠᠷ ᠢᠶᠠᠨ ᠪᠤᠷᠬᠠᠨ ᠤ ᠡᠮᠦᠨᠡ ᠪᠠᠢᠭᠠᠷᠠᠢ᠃
25 ᠣᠩ᠋ᠭᠣᠨ ᠥᠬᠢᠨ ᠤ ᠲᠤᠬᠠᠢ ᠶᠠᠷᠢᠶᠠ᠃ ᠡᠵᠡᠨ ᠦ ᠵᠠᠷᠯᠢᠭ ᠨᠠᠳᠠ ᠳᠤ ᠦᠭᠡᠢ ᠪᠣᠯᠪᠠᠴᠤ ᠡᠵᠡᠨ ᠦ ᠡᠨᠡᠷᠢᠯ ᠢᠶᠠᠷ ᠢᠲᠡᠭᠡᠮᠵᠢᠲᠦ ᠪᠣᠯᠣᠭᠰᠠᠨ ᠪᠢ ᠰᠠᠨᠠᠯ ᠢᠶᠠᠨ ᠳᠤᠷᠠᠳᠤᠶᠠ᠃ 26 ᠵᠣᠪᠠᠯᠠᠩ ᠢᠷᠡᠬᠦ ᠤᠴᠢᠷ ᠠᠴᠠ ᠬᠥᠮᠦᠨ ᠣᠳᠣ ᠶᠢᠨ ᠪᠠᠢᠳᠠᠯ ᠢᠶᠠᠷ ᠢᠶᠠᠨ ᠪᠠᠢᠪᠠᠯ ᠰᠠᠢᠨ ᠭᠡᠵᠦ ᠪᠢ ᠪᠣᠳᠣᠳᠠᠭ᠃ 27 ᠴᠢ ᠭᠡᠷᠭᠡᠢ ᠲᠡᠢ ᠤᠤ︖ ᠰᠠᠯᠬᠤ ᠭᠡᠵᠦ ᠪᠦᠦ ᠣᠷᠣᠯᠳᠤ᠃ ᠴᠢ ᠭᠡᠷᠭᠡᠢ ᠦᠭᠡᠢ ᠤᠤ︖ ᠭᠡᠷᠭᠡᠢ ᠲᠡᠢ ᠪᠣᠯᠬᠤ ᠭᠡᠵᠦ ᠪᠦᠦ ᠣᠷᠣᠯᠳᠤ᠃ 28 ᠬᠠᠷᠢᠨ ᠡᠬᠡᠨᠡᠷ ᠠᠪᠤᠭᠰᠠᠨ ᠴᠤ ᠨᠢᠭᠦᠯ ᠦᠢᠯᠡᠳᠬᠦ ᠪᠢᠰᠢ᠂ ᠣᠩ᠋ᠭᠣᠨ ᠥᠬᠢᠨ ᠬᠠᠷᠢ ᠳᠤ ᠮᠣᠷᠳᠠᠭᠰᠠᠨ ᠴᠤ ᠨᠢᠭᠦᠯ ᠦᠢᠯᠡᠳᠬᠦ ᠪᠢᠰᠢ᠂ ᠭᠡᠬᠦ ᠳᠡᠭᠡᠨ ᠡᠳᠡᠭᠡᠷ ᠬᠥᠮᠦᠨ ᠠᠮᠢᠳᠤᠷᠠᠯ ᠳᠠᠭᠠᠨ ᠵᠣᠪᠠᠯᠠᠩ ᠠᠮᠰᠠᠬᠤ ᠪᠣᠯᠣᠨᠠ᠃ ᠪᠢ ᠲᠠ ᠨᠠᠷ ᠢ ᠡᠭᠦᠨ ᠡᠴᠡ ᠬᠠᠮᠠᠭᠠᠯᠠᠬᠤ ᠭᠡᠵᠦ ᠪᠠᠢᠨᠠ᠃ 29 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠴᠠᠭ ᠤᠬᠤᠷᠬᠠᠨ ᠪᠣᠯᠣᠭᠰᠠᠨ ᠢ ᠲᠠ ᠨᠠᠷ ᠲᠤ ᠰᠠᠨᠠᠭᠤᠯᠤᠶᠠ᠃ ᠴᠢᠨᠠᠭᠰᠢᠳᠠ ᠭᠡᠷᠭᠡᠢ ᠲᠡᠢ ᠨᠢ ᠭᠡᠷᠭᠡᠢ ᠦᠭᠡᠢ ᠮᠡᠲᠦ᠂ 30 ᠭᠠᠰᠢᠭᠤᠳᠠᠯ ᠲᠠᠢ ᠨᠢ ᠭᠠᠰᠢᠭᠤᠳᠠᠯ ᠦᠭᠡᠢ ᠮᠡᠲᠦ᠂ ᠪᠠᠶᠠᠰᠬᠤᠯᠠᠩ ᠲᠠᠢ ᠨᠢ ᠪᠠᠶᠠᠰᠬᠤᠯᠠᠩ ᠦᠭᠡᠢ ᠮᠡᠲᠦ᠂ ᠶᠠᠭᠤᠮᠠ ᠬᠤᠳᠠᠯᠳᠤᠨ ᠠᠪᠤᠭᠰᠠᠳ ᠨᠢ ᠶᠠᠭᠤᠮᠠ ᠦᠭᠡᠢ ᠮᠡᠲᠦ᠂ 31 ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠶᠠᠭᠤᠮᠠ ᠶᠢ ᠠᠰᠢᠭᠯᠠᠭᠴᠢ ᠨᠢ ᠠᠰᠢᠭᠯᠠᠳᠠᠭ ᠦᠭᠡᠢ ᠮᠡᠲᠦ ᠠᠮᠢᠳᠤᠷᠠ᠃ ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠠᠯᠢᠪᠠ ᠪᠠᠢᠳᠠᠯ ᠥᠩᠭᠡᠷᠡᠵᠦ ᠪᠠᠢᠨᠠ᠃
32 ᠲᠠ ᠨᠠᠷ ᠤᠨ ᠰᠠᠨᠠᠭᠠ ᠵᠣᠪᠠᠬᠤ ᠦᠭᠡᠢ ᠪᠠᠢᠬᠤ ᠶᠢ ᠬᠦᠰᠡᠶᠡ᠃ ᠭᠡᠷᠯᠡᠭᠡ ᠦᠭᠡᠢ ᠡᠷᠡᠭᠲᠡᠢ ᠨᠢ ᠡᠵᠡᠨ ᠢ ᠬᠡᠷᠬᠢᠨ ᠪᠠᠶᠠᠷᠯᠠᠭᠤᠯᠬᠤ ᠪᠤᠢ ᠬᠡᠮᠡᠨ ᠡᠵᠡᠨ ᠦ ᠶᠠᠪᠤᠳᠠᠯ ᠤᠳ ᠲᠤ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠪᠣᠯ᠂ 33 ᠭᠡᠷᠯᠡᠭᠰᠡᠨ ᠡᠷᠡᠭᠲᠡᠢ ᠨᠢ ᠭᠡᠷᠭᠡᠢ ᠪᠡᠨ ᠬᠡᠷᠬᠢᠨ ᠪᠠᠶᠠᠷᠯᠠᠭᠤᠯᠬᠤ ᠪᠤᠢ ᠬᠡᠮᠡᠨ ᠶᠢᠷᠲᠢᠨᠴᠦ ᠶᠢᠨ ᠶᠠᠪᠤᠳᠠᠯ ᠤᠳ ᠲᠤ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠪᠣᠯᠬᠣᠷ 34 ᠰᠡᠳᠬᠢᠯ ᠨᠢ ᠬᠤᠪᠢᠶᠠᠭᠳᠠᠳᠠᠭ᠃ ᠭᠡᠷᠯᠡᠭᠡ ᠦᠭᠡᠢ ᠡᠮᠡᠭᠲᠡᠢ ᠪᠤᠶᠤ ᠣᠩ᠋ᠭᠣᠨ ᠥᠬᠢᠨ᠂ ᠪᠡᠶᠡ ᠪᠠ ᠰᠦᠨᠡᠰᠦ ᠪᠡᠨ ᠠᠷᠢᠭᠤᠨ ᠪᠠᠢᠯᠭᠠᠬᠤ ᠭᠡᠵᠦ ᠡᠵᠡᠨ ᠦ ᠶᠠᠪᠤᠳᠠᠯ ᠳᠤ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠪᠣᠯ᠂ ᠭᠡᠷᠯᠡᠭᠰᠡᠨ ᠡᠮᠡᠭᠲᠡᠢ ᠨᠢ ᠨᠥᠬᠥᠷ ᠢᠶᠡᠨ ᠬᠡᠷᠬᠢᠨ ᠪᠠᠶᠠᠷᠯᠠᠭᠤᠯᠬᠤ ᠪᠤᠢ ᠬᠡᠮᠡᠨ ᠶᠢᠷᠲᠢᠨᠴᠦ ᠶᠢᠨ ᠶᠠᠪᠤᠳᠠᠯ ᠳᠤ ᠰᠠᠨᠠᠭᠠ ᠲᠠᠯᠪᠢᠳᠠᠭ᠃ 35 ᠲᠠ ᠨᠠᠷ ᠲᠤ ᠲᠤᠱᠠ ᠪᠢᠰᠢ᠂ ᠬᠠᠷᠢᠨ ᠲᠤᠰᠠ ᠪᠣᠯᠵᠤ ᠲᠠ ᠨᠠᠷ ᠢ ᠵᠠᠮᠪᠠᠷᠠᠭᠠ ᠲᠠᠢ᠂ ᠰᠡᠳᠬᠢᠯ ᠬᠤᠪᠢᠶᠠᠭᠳᠠᠬᠤ ᠦᠭᠡᠢ ᠪᠠᠷ ᠡᠵᠡᠨ ᠳᠦ ᠦᠢᠯᠡᠴᠢᠯᠡᠭᠡᠰᠡᠢ ᠭᠡᠰᠡᠨ ᠳᠡᠭᠡᠨ ᠪᠢ ᠡᠭᠦᠨ ᠢ ᠬᠡᠯᠡᠵᠦ ᠪᠠᠢᠨᠠ᠃
36 ᠬᠡᠷᠪᠡ ᠬᠡᠨ ᠨᠢᠭᠡ ᠨᠢ ᠭᠡᠷᠯᠡᠬᠦ ᠱᠠᠭᠠᠷᠳᠠᠯᠭᠠ ᠲᠠᠢ᠂ ᠰᠦᠢᠲᠦ ᠪᠦᠰᠡᠭᠦᠢ ᠨᠢ ᠴᠤ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠪᠥᠭᠡᠳ ᠭᠡᠷᠯᠡᠬᠦ ᠡᠴᠡ ᠪᠤᠴᠠᠬᠤ ᠨᠢ ᠵᠦᠢ ᠪᠤᠰᠤ ᠭᠡᠵᠦ ᠪᠣᠳᠣᠪᠠᠯ ᠲᠡᠷᠡ ᠬᠥᠮᠦᠨ ᠬᠦᠰᠡᠭᠰᠡᠨ ᠢᠶᠡᠷ ᠢᠶᠠᠨ ᠬᠢᠭᠲᠦᠨ᠂ ᠢᠩᠭᠢᠬᠦ ᠨᠢ ᠨᠢᠭᠦᠯ ᠦᠢᠯᠡᠳᠴᠦ ᠪᠠᠢᠭᠠ ᠪᠢᠰᠢ ᠲᠤᠯᠠ ᠭᠡᠷᠯᠡᠵᠦ ᠪᠣᠯᠣᠨᠠ᠃ 37 ᠬᠠᠷᠢᠨ ᠲᠡᠷᠡ ᠬᠥᠮᠦᠨ ᠰᠡᠳᠬᠢᠯ ᠳᠡᠭᠡᠨ ᠪᠠᠲᠤ ᠵᠣᠭᠰᠣᠯᠲᠠ ᠲᠠᠢ᠂ ᠵᠠᠪᠠᠯ ᠭᠡᠷᠯᠡᠬᠦ ᠱᠠᠭᠠᠷᠳᠠᠯᠭᠠ ᠦᠭᠡᠢ᠂ ᠬᠦᠰᠡᠯ ᠢᠶᠡᠨ ᠪᠠᠷᠢᠬᠤ ᠴᠢᠳᠠᠪᠤᠷᠢ ᠲᠠᠢ ᠪᠣᠯ ᠥᠪᠡᠷ ᠦᠨ ᠰᠠᠨᠠᠭᠠ ᠪᠠᠨ ᠵᠠᠬᠢᠷᠴᠤ ᠰᠦᠢᠲᠦ ᠪᠦᠰᠡᠭᠦᠢ ᠪᠡᠨ ᠬᠡᠪ ᠢᠶᠡᠷ ᠨᠢ ᠪᠠᠢᠯᠭᠠᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠴᠤ ᠵᠥᠪ ᠶᠤᠮ᠃ 38 ᠡᠢᠨ ᠬᠦ ᠰᠦᠢᠲᠦ ᠪᠦᠰᠡᠭᠦᠢ ᠲᠡᠢ ᠪᠠᠨ ᠭᠡᠷᠯᠡᠬᠦ ᠨᠢ ᠰᠠᠢᠨ᠂ ᠡᠰᠡ ᠭᠡᠷᠯᠡᠬᠦ ᠨᠢ ᠨᠡᠩ ᠰᠠᠢᠨ᠃
39 ᠨᠥᠬᠥᠷ ᠢᠶᠡᠨ ᠠᠮᠢᠳᠤ ᠪᠠᠢᠭᠠ ᠦᠶᠡ ᠳᠦ ᠭᠡᠷᠭᠡᠢ ᠨᠢ ᠬᠦᠯᠢᠶᠡᠰᠦᠯᠡᠭᠳᠡᠵᠦ ᠪᠠᠢᠳᠠᠭ᠃ ᠨᠥᠬᠥᠷ ᠨᠢ ᠨᠠᠰᠤ ᠪᠠᠷᠠᠪᠠᠯ ᠲᠡᠷᠡ ᠬᠦᠰᠡᠭᠰᠡᠨ ᠬᠥᠮᠦᠨ ᠲᠡᠢ ᠪᠡᠨ ᠭᠡᠷᠯᠡᠬᠦ ᠡᠷᠬᠡ ᠴᠢᠯᠥᠭᠡᠲᠡᠢ᠂ ᠭᠡᠬᠦ ᠳᠡᠭᠡᠨ ᠵᠥᠪᠬᠡᠨ ᠡᠵᠡᠨ ᠦ ᠳᠣᠲᠣᠷᠠᠬᠢ ᠬᠥᠮᠦᠨ ᠲᠡᠢ ᠯᠠ ᠭᠡᠷᠯᠡᠵᠦ ᠪᠣᠯᠣᠨᠠ᠃ 40 ᠬᠠᠷᠢᠨ ᠮᠢᠨᠦ ᠪᠣᠳᠣᠯ ᠢᠶᠠᠷ ᠨᠥᠭᠥᠭᠡ ᠪᠦᠰᠡᠭᠦᠢ ᠬᠡᠪ ᠢᠶᠡᠷ ᠢᠶᠠᠨ ᠠᠮᠢᠳᠤᠷᠠᠪᠠᠯ ᠢᠯᠡᠭᠦᠦ ᠪᠤᠶᠠᠨ ᠲᠠᠢ᠃ ᠨᠠᠳᠠ ᠳᠤ ᠴᠤ ᠪᠤᠷᠬᠠᠨ ᠤ ᠰᠦᠨᠡᠰᠦ ᠪᠠᠢᠳᠠᠭ ᠭᠡᠵᠦ ᠪᠢ ᠪᠣᠳᠣᠳᠠᠭ᠃