ᠨᠢᠭᠡᠳᠦᠭᠡᠷ ᠺᠣᠷᠢᠨᠲ ᠠᠷᠪᠠᠨ ᠵᠢᠷᠭᠤᠭᠠ
ᠠᠷᠢᠭᠤᠨ ᠰᠦᠨᠡᠰᠦ ᠰᠣᠶᠣᠷᠬᠠᠬᠤ ᠠᠮᠠᠯᠠᠯᠲᠠ ᠵᠠᠬᠢᠶᠠᠰᠤ ᠪᠠ ᠮᠡᠨᠳᠦᠴᠢᠯᠡᠭᠡ
1 ᠠᠷᠢᠭᠤᠨ ᠬᠥᠮᠦᠰ ᠦᠨ ᠲᠥᠯᠥᠭᠡ ᠴᠤᠭᠯᠠᠭᠤᠯᠳᠠᠭ ᠡᠷᠭᠦᠯ ᠦᠨ ᠲᠤᠬᠠᠢ ᠶᠠᠷᠢᠶᠠ᠃ ᠭᠠᠯᠠᠲ᠋ᠢᠶᠠ ᠶᠢᠨ ᠴᠢᠭᠤᠯᠭᠠᠨ ᠨᠤᠭᠤᠳ ᠲᠤ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠮᠢᠨᠢ ᠲᠠ ᠨᠠᠷ ᠬᠢᠭᠡᠷᠡᠢ᠃ 2 ᠭᠠᠷᠠᠭ ᠪᠦᠷᠢ ᠶᠢᠨ ᠡᠬᠢᠨ ᠤ ᠡᠳᠦᠷ ᠬᠥᠮᠦᠨ ᠪᠦᠷᠢ ᠢᠪᠡᠭᠡᠭᠳᠡᠭᠰᠡᠨ ᠦ ᠪᠠᠨ ᠶᠣᠰᠣᠭᠠᠷ ᠣᠷᠣᠯᠭᠠ ᠪᠠᠨ ᠴᠤᠭᠯᠠᠭᠤᠯᠤᠨ ᠠᠰ ᠲᠤᠨᠢ ᠬᠠᠳᠠᠭᠠᠯᠠᠵᠤ ᠪᠠᠢᠭᠠᠷᠠᠢ᠃ ᠢᠩᠭᠢᠪᠡᠯ ᠨᠠᠮᠠᠶᠢ ᠣᠴᠢᠩ᠋ᠭᠤᠲᠠ ᠴᠤᠭᠯᠠᠭᠤᠯᠬᠤ ᠬᠡᠷᠡᠭ ᠦᠭᠡᠢ ᠪᠣᠯᠣᠨᠠ᠃ 3 ᠪᠢ ᠣᠴᠢᠭᠠᠳ ᠲᠠ ᠨᠠᠷ ᠤᠨ ᠰᠣᠩ᠋ᠭᠣᠨ ᠪᠠᠲᠤᠯᠠᠭᠰᠠᠨ ᠬᠥᠮᠦᠰ ᠢᠶᠡᠷ ᠵᠠᠬᠢᠳᠠᠯ ᠪᠠ ᠡᠷᠭᠦᠯ ᠢ ᠴᠢᠨᠢ ᠶᠧᠷᠦ᠋ᠰᠠᠯᠧᠮ ᠳᠤ ᠬᠦᠷᠭᠡᠯᠭᠡᠶᠡ᠃ 4 ᠬᠡᠷᠪᠡ ᠪᠢ ᠴᠤ ᠶᠠᠪᠤᠬᠤ ᠵᠣᠬᠢᠰᠲᠠᠢ ᠪᠣᠯ ᠲᠡᠳᠡ ᠨᠠᠷ ᠲᠠᠢ ᠬᠠᠮᠲᠤ ᠶᠠᠪᠤᠶᠠ᠃
5 ᠭᠡᠬᠦ ᠳᠡᠭᠡᠨ ᠪᠢ ᠮᠠᠺᠧᠳᠣᠨᠢᠶᠠ ᠪᠠᠷ ᠣᠷᠣᠭᠠᠳ ᠳᠠᠷᠠᠭᠠ ᠨᠢ ᠲᠠ ᠨᠠᠷ ᠤᠷᠤᠭᠤ ᠣᠴᠢᠨᠠ᠃ ᠪᠢ ᠮᠠᠺᠧᠳᠣᠨᠢᠶᠠ ᠪᠠᠷ ᠳᠠᠭᠠᠷᠢᠬᠤ ᠶᠤᠮ᠃ 6 ᠪᠢ ᠪᠠᠷᠤᠭ ᠲᠠ ᠨᠠᠷ ᠲᠠᠢ ᠬᠡᠰᠡᠭ ᠬᠤᠭᠤᠴᠠᠭᠠ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ᠂ ᠬᠠᠮᠲᠤ ᠡᠪᠦᠯᠵᠢᠬᠦ ᠴᠤ ᠮᠠᠭᠠᠳ᠃ ᠢᠩᠭᠢᠪᠡᠯ ᠨᠠᠮᠠᠶᠢ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠳᠤ ᠴᠤ ᠲᠠ ᠨᠠᠷ ᠦᠳᠡᠵᠦ ᠪᠣᠯᠣᠨᠠ᠃ 7 ᠡᠨᠡ ᠤᠳᠠᠭᠠ ᠪᠢ ᠵᠠᠮ ᠳᠠᠭᠠᠷᠢᠭᠤ ᠲᠠ ᠨᠠᠷ ᠢ ᠦᠵᠡᠭᠡᠳ ᠯᠠ ᠭᠠᠷᠬᠤ ᠶᠢ ᠬᠦᠰᠡᠬᠦ ᠦᠭᠡᠢ᠂ ᠡᠵᠡᠨ ᠵᠥᠪᠰᠢᠶᠡᠷᠡᠪᠡᠯ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠬᠡᠰᠡᠭ ᠬᠤᠭᠤᠴᠠᠭᠠ ᠰᠠᠭᠤᠬᠤ ᠪᠣᠳᠣᠯ ᠲᠠᠢ ᠪᠠᠢᠨᠠ᠃ 8 ᠭᠡᠬᠦ ᠳᠦ᠂ ᠲᠠᠪᠢᠨ ᠡᠳᠦᠷ ᠦᠨ ᠪᠠᠶᠠᠷ ᠪᠣᠯᠲᠠᠯᠠ ᠪᠢ ᠧᠹᠧᠰ ᠲᠤ ᠪᠠᠢᠬᠤ ᠪᠣᠯᠣᠨᠠ᠃ 9 ᠤᠴᠢᠷ ᠨᠢ᠂ ᠥᠷᠭᠡᠨ ᠶᠡᠬᠡ ᠪᠥᠭᠡᠳ ᠦᠷᠡ ᠳ᠋ᠦᠩ ᠭᠠᠷᠬᠤ ᠡᠭᠦᠳᠡ ᠨᠠᠳᠠ ᠳᠤ ᠨᠡᠭᠡᠭᠡᠭᠳᠡᠭᠰᠡᠨ ᠪᠥᠭᠡᠳ ᠡᠰᠡᠷᠭᠦᠴᠡᠭᠴᠢᠳ ᠴᠤ ᠣᠯᠠᠨ ᠪᠤᠢ᠃
10 ᠬᠡᠷᠪᠡ ᠲᠢᠮᠣᠲ ᠣᠴᠢᠪᠠᠯ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠳᠤ ᠠᠢᠳᠠᠰ ᠦᠭᠡᠢ ᠪᠠᠢᠬᠤ ᠶᠢᠨ ᠬᠢᠨᠢ ᠲᠥᠯᠥᠭᠡ ᠰᠠᠨᠠᠭᠠ ᠲᠠᠯᠪᠢᠵᠤ ᠪᠠᠢᠭᠠᠷᠠᠢ᠃ ᠲᠡᠷᠡ ᠡᠵᠡᠨ ᠦ ᠠᠵᠢᠯ ᠢ ᠨᠠᠳᠠ ᠲᠠᠢ ᠠᠳᠠᠯᠢ ᠪᠠᠷ ᠬᠢᠵᠦ ᠪᠠᠢᠨᠠ᠃ 11 ᠡᠢᠮᠦ ᠡᠴᠡ ᠬᠡᠨ ᠴᠤ ᠲᠡᠭᠦᠨ ᠢ ᠬᠥᠩᠭᠡᠪᠴᠢᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠲᠡᠭᠦᠨ ᠢ ᠠᠮᠤᠷ ᠲᠠᠢᠪᠤᠩ ᠢᠶᠠᠷ ᠶᠠᠪᠤᠭᠤᠯᠵᠤ ᠨᠠᠳᠠ ᠤᠷᠤᠭᠤ ᠢᠷᠡᠭᠦᠯᠦᠭᠡᠷᠡᠢ᠂ ᠲᠡᠭᠦᠨ ᠦ ᠢᠷᠡᠬᠦ ᠶᠢ ᠪᠢ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠬᠠᠮᠲᠤ ᠬᠦᠯᠢᠶᠡᠵᠦ ᠪᠠᠢᠨᠠ᠃
12 ᠪᠢᠳᠡᠨ ᠦ ᠳᠡᠭᠦᠦ ᠠᠫᠣᠯᠣ᠋ ᠶᠢᠨ ᠲᠤᠬᠠᠢ ᠶᠠᠷᠢᠶᠠ᠃ ᠲᠠᠨ ᠤ ᠲᠡᠨᠳᠡ ᠣᠴᠢ ᠭᠡᠵᠦ ᠪᠢ ᠪᠤᠰᠤᠳ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠬᠠᠮᠲᠤ ᠶᠡᠬᠡᠳᠡ ᠢᠳᠬᠠᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠣᠳᠣ ᠳᠡᠭᠡᠷᠡ ᠪᠡᠨ ᠣᠴᠢᠬᠤ ᠰᠠᠨᠠᠭᠠ ᠣᠭᠲᠣ ᠦᠭᠡᠢ ᠪᠠᠢᠨᠠ᠂ ᠳᠣᠬᠢᠶᠠᠯ ᠲᠠᠭᠠᠷᠠᠪᠠᠯ ᠣᠴᠢᠬᠤ ᠪᠣᠯᠣᠨᠠ᠃
13 ᠰᠡᠷᠡᠮᠵᠢᠲᠡᠢ ᠪᠠᠢ᠂ ᠢᠲᠡᠭᠡᠯ ᠳᠣᠲᠣᠷᠠ ᠪᠠᠲᠤ ᠵᠣᠭᠰᠣ᠃ ᠡᠷᠡ ᠵᠣᠷᠢᠭᠲᠠᠢ ᠪᠠᠢ᠂ ᠬᠦᠴᠦ ᠲᠠᠢ ᠪᠠᠢ᠃ 14 ᠪᠦᠬᠦᠨ ᠢ ᠬᠠᠢᠷᠠ ᠪᠠᠷ ᠬᠢᠭᠡᠷᠡᠢ᠃
15 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠢ ᠢᠳᠬᠠᠶᠠ᠂ ᠰᠲ᠋ᠧᠹᠠᠨᠠ ᠶᠢᠨ ᠭᠡᠷ ᠦᠨ ᠬᠢᠨ ᠪᠣᠯ ᠠᠺᠠᠢᠶᠠ ᠨᠤᠲᠤᠭ ᠤᠨ ᠤᠤᠭᠠᠨ ᠦᠷᠡ ᠵᠢᠮᠢᠰ ᠪᠥᠭᠡᠳ ᠠᠷᠢᠭᠤᠨ ᠬᠥᠮᠦᠰ ᠲᠦ ᠦᠢᠯᠡᠴᠢᠯᠡᠬᠦ ᠪᠡᠷ ᠥᠪᠡᠷᠰᠡᠳ ᠢ ᠪᠠᠨ ᠵᠣᠷᠢᠭᠤᠯᠤᠭᠰᠠᠨ ᠢ ᠨᠢ ᠲᠠ ᠨᠠᠷ ᠮᠡᠳᠡᠨᠡ᠂ 16 ᠲᠡᠢᠮᠦ ᠬᠥᠮᠦᠰ ᠪᠠ ᠲᠡᠳᠡ ᠨᠠᠷ ᠲᠠᠢ ᠬᠠᠮᠲᠤ ᠠᠵᠢᠯᠯᠠᠵᠤ᠂ ᠵᠦᠳᠡᠷᠡᠳᠡᠭ ᠬᠥᠮᠦᠨ ᠪᠦᠬᠦᠨ ᠳᠦ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠭᠠᠷᠠᠢ᠃ 17 ᠰᠲ᠋ᠧᠹᠠᠨᠠ᠂ ᠹᠣᠷᠲ᠋ᠦ᠋ᠨᠠᠲ᠂ ᠠᠬᠠᠢᠺ ᠨᠠᠷ ᠤᠨ ᠢᠷᠡᠭᠰᠡᠨ ᠳᠦ ᠪᠢ ᠪᠠᠶᠠᠷᠯᠠᠵᠤ ᠪᠠᠢᠨᠠ᠂ ᠲᠡᠳᠡ ᠲᠠ ᠨᠠᠷ ᠤᠨ ᠳᠤᠲᠠᠭᠤ ᠶᠢ ᠨᠥᠬᠥᠪᠡ᠃ 18 ᠲᠡᠳᠡ ᠮᠢᠨᠦ ᠪᠠ ᠲᠠ ᠨᠠᠷ ᠤᠨ ᠰᠡᠳᠬᠢᠯ ᠢ ᠠᠮᠤᠷᠠᠭᠤᠯᠤᠭᠰᠠᠨ ᠶᠤᠮ᠃ ᠡᠢᠮᠦᠷᠬᠦ ᠬᠥᠮᠦᠰ ᠢ ᠲᠠᠨᠢᠨ ᠮᠡᠳᠡᠷᠡᠭᠲᠦᠨ᠃
19 ᠠᠽᠢᠶᠠ ᠨᠤᠲᠤᠭ ᠤᠨ ᠴᠢᠭᠤᠯᠭᠠᠨ ᠨᠤᠭᠤᠳ ᠲᠠ ᠨᠠᠷ ᠲᠤ ᠮᠡᠨᠳᠦ ᠬᠦᠷᠭᠡᠵᠦ ᠪᠠᠢᠨᠠ᠃ ᠠᠺᠦ᠋ᠯᠠ ᠪᠠ ᠫᠷᠢᠰᠺᠢᠯᠠ᠂ ᠪᠠᠰᠠ ᠲᠡᠳᠡᠨ ᠦ ᠭᠡᠷ ᠦᠨ ᠴᠢᠭᠤᠯᠭᠠᠨ ᠡᠵᠡᠨ ᠦ ᠳᠣᠲᠣᠷᠠ ᠲᠠ ᠨᠠᠷ ᠲᠤ ᠬᠠᠯᠠᠭᠤᠨ ᠮᠡᠨᠳᠦ ᠬᠦᠷᠭᠡᠵᠦ ᠪᠠᠢᠨᠠ᠃ 20 ᠪᠤᠢ ᠪᠦᠬᠦᠢ ᠠᠬᠠ ᠳᠡᠭᠦᠦ ᠲᠠ ᠨᠠᠷ ᠲᠤ ᠮᠡᠨᠳᠦ ᠬᠦᠷᠭᠡᠵᠦ ᠪᠠᠢᠨᠠ᠃ ᠲᠠ ᠨᠠᠷ ᠠᠷᠢᠭᠤᠨ ᠦᠨᠦᠰᠦᠯᠲᠡ ᠪᠡᠷ ᠨᠢᠭᠡ ᠨᠢᠭᠡᠨ ᠳᠡᠭᠡᠨ ᠮᠡᠨᠳᠦ ᠬᠦᠷᠭᠡᠭᠡᠷᠡᠢ᠃
21 ᠡᠨᠡ ᠬᠦ ᠮᠡᠨᠳᠦᠴᠢᠯᠡᠭᠡ ᠶᠢ ᠫᠠᠦ᠋ᠯ ᠪᠢ ᠥᠪᠡᠷ ᠦᠨ ᠭᠠᠷ ᠢᠶᠠᠷ ᠪᠢᠴᠢᠵᠦ ᠪᠠᠢᠨᠠ᠃ 22 ᠡᠵᠡᠨ ᠢ ᠦᠯᠦ ᠬᠠᠢᠷᠠᠯᠠᠭᠴᠢ ᠨᠢ ᠵᠦᠬᠡᠭᠳᠡᠬᠦ ᠪᠣᠯᠲᠤᠭᠠᠢ᠃ ᠮᠠᠷᠠᠨᠠᠲ᠋ᠠ 13 ᠃ 23 ᠡᠵᠡᠨ ᠢᠰᠦ᠋ᠰ ᠤᠨ ᠢᠪᠡᠭᠡᠯ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃ 24 ᠮᠢᠨᠦ ᠬᠠᠢᠷᠠ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠲᠠ ᠪᠦᠬᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃