ᠨᠢᠭᠡᠳᠦᠭᠡᠷ ᠺᠣᠷᠢᠨᠲ ᠵᠢᠷᠭᠤᠭᠠ
ᠦᠯᠦ ᠢᠲᠡᠭᠡᠭᠴᠢ ᠳᠤ ᠵᠠᠭᠠᠯᠳᠤᠬᠤ ᠲᠤᠬᠠᠢ
1 ᠲᠠ ᠨᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠵᠥᠷᠢᠴᠡᠯᠳᠦᠬᠦ ᠳᠡᠭᠡᠨ ᠶᠠᠭᠠᠬᠢᠵᠤ ᠠᠷᠢᠭᠤᠨ ᠬᠥᠮᠦᠰ ᠲᠦ ᠪᠢᠰᠢ᠂ ᠬᠠᠷᠢᠨ ᠵᠥᠪᠲᠦ ᠪᠤᠰᠤ ᠬᠥᠮᠦᠰ ᠲᠦ ᠵᠠᠭᠠᠯᠳᠤᠬᠤ ᠵᠣᠷᠢᠭ ᠣᠷᠣᠪᠠ︖ 2 ᠠᠷᠢᠭᠤᠨ ᠬᠥᠮᠦᠰ ᠶᠢᠷᠲᠢᠨᠴᠦ ᠶᠢ ᠰᠢᠭᠦᠬᠦ ᠪᠣᠯᠣᠨᠠ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠲᠠ ᠨᠠᠷ ᠶᠢᠷᠲᠢᠨᠴᠦ ᠶᠢ ᠰᠢᠭᠦᠬᠦ ᠪᠠᠢᠲᠠᠯᠠ ᠡᠢᠮᠦ ᠥᠴᠦᠬᠡᠨ ᠬᠡᠷᠡᠭ ᠢ ᠴᠤ ᠰᠢᠭᠦᠬᠦ ᠴᠢᠳᠠᠯ ᠦᠭᠡᠢ ᠭᠡᠵᠢ ᠤᠤ︖ 3 ᠪᠢᠳᠡ ᠲᠩᠷᠢ ᠡᠯᠴᠢ ᠶᠢ ᠴᠤ ᠰᠢᠭᠦᠬᠦ ᠪᠣᠯᠣᠨᠠ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠲᠡᠢᠮᠦ ᠪᠣᠯ ᠡᠨᠡ ᠨᠠᠰᠤᠨ ᠤ ᠬᠡᠷᠡᠭ ᠢ ᠰᠢᠭᠦᠬᠦ ᠨᠢ ᠨᠡᠩ ᠶᠠᠭᠤ ᠶᠤᠮ ᠪᠤᠢ︖ 4 ᠲᠡᠢᠮᠦ ᠪᠠᠢᠲᠠᠯᠠ ᠲᠠ ᠨᠠᠷ ᠡᠨᠡ ᠨᠠᠰᠤᠨ ᠤ ᠬᠡᠷᠡᠭ ᠢᠶᠡᠨ ᠴᠢᠭᠤᠯᠭᠠᠨ ᠢ ᠬᠦᠨᠳᠦᠳᠬᠡᠳᠡᠭ ᠦᠭᠡᠢ ᠬᠥᠮᠦᠰ ᠢᠶᠡᠷ ᠰᠢᠭᠦᠯᠭᠡᠬᠦ ᠨᠢ ᠤᠤ︖ 5 ᠪᠢ ᠲᠠ ᠨᠠᠷ ᠢ ᠢᠴᠢᠭᠡᠬᠦ ᠭᠡᠵᠦ ᠡᠭᠦᠨ ᠢ ᠬᠡᠯᠡᠵᠦ ᠪᠠᠢᠨᠠ᠂ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠢᠶᠠᠨ ᠬᠣᠭᠣᠷᠣᠨᠳᠣᠬᠢ ᠬᠡᠷᠡᠭ ᠢ ᠰᠢᠭᠦᠬᠦ ᠴᠢᠳᠠᠪᠤᠷᠢ ᠲᠠᠢ ᠮᠡᠷᠭᠡᠨ ᠬᠥᠮᠦᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠭᠠᠭᠴᠠ ᠴᠤ ᠦᠭᠡᠢ ᠭᠡᠵᠦ 6 ᠠᠬᠠ ᠳᠡᠭᠦᠦ ᠨᠢ ᠠᠬᠠ ᠳᠡᠭᠦᠦ ᠪᠡᠨ ᠵᠠᠭᠠᠯᠳᠤᠬᠤ ᠨᠢ ᠤᠤ︖ ᠪᠠᠰᠠ ᠢᠲᠡᠭᠡᠭᠴᠢ ᠪᠤᠰᠤ ᠬᠥᠮᠦᠰ ᠦᠨ ᠡᠮᠦᠨᠡ ᠰᠢᠦ᠃
7 ᠲᠠ ᠨᠠᠷ ᠪᠡᠶᠡ ᠪᠡᠶᠡ ᠪᠡᠨ ᠵᠠᠭᠠᠯᠳᠤᠭᠰᠠᠨ ᠢᠶᠠᠷ ᠢᠶᠠᠨ ᠨᠢᠭᠡᠨᠲᠡ ᠵᠠᠢᠯᠠᠰᠢ ᠦᠭᠡᠢ ᠠᠯᠳᠠᠭᠠ ᠲᠠᠢ ᠪᠣᠯᠣᠭᠰᠠᠨ᠃ ᠢᠩᠭᠢᠬᠦ ᠶᠢᠨ ᠣᠷᠣᠨ ᠳᠤ ᠬᠢᠯᠢᠰᠳᠡᠬᠦ ᠨᠢ ᠳᠡᠭᠡᠷᠡ ᠪᠢᠰᠢ ᠤᠤ︖ ᠬᠣᠬᠢᠷᠠᠬᠤ ᠨᠢ ᠳᠡᠭᠡᠷᠡ ᠪᠢᠰᠢ ᠤᠤ︖ 8 ᠬᠠᠷᠢᠨ ᠲᠠ ᠨᠠᠷ ᠥᠪᠡᠷᠰᠡᠳ ᠢᠶᠡᠨ ᠠᠬᠠ ᠳᠡᠭᠦᠦ ᠨᠠᠷ ᠲᠡᠭᠡᠨ ᠵᠥᠪ ᠪᠤᠰᠤ ᠶᠢ ᠠᠮᠰᠠᠭᠤᠯᠵᠤ ᠲᠡᠳᠡᠨ ᠢ ᠪᠠᠨ ᠮᠡᠬᠡᠯᠡᠵᠦ ᠪᠠᠢᠨᠠ᠃
9 ᠵᠥᠪᠲᠦ ᠪᠤᠰᠤ ᠬᠥᠮᠦᠨ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠥᠪᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠤᠤ︖ ᠪᠦᠦ ᠠᠨᠳᠠᠭᠤᠷᠠ᠃ ᠰᠠᠳᠤᠷᠯᠠᠭᠴᠢ᠂ ᠰᠢᠲᠦᠭᠡᠨᠲᠡᠨ᠂ ᠵᠠᠪᠬᠠᠢᠷᠠᠭᠴᠢ᠂ ᠶᠠᠩ᠋ᠬᠠᠨ ᠡᠷᠡ᠂ ᠢᠵᠢᠯ ᠬᠦᠢᠰᠦᠲᠡᠨ ᠲᠡᠢ ᠪᠡᠨ ᠬᠤᠷᠢᠴᠠᠭᠴᠢ᠂ 10 ᠬᠤᠯᠠᠭᠠᠢᠴᠢ᠂ ᠰᠢᠨᠤᠬᠠᠢᠷᠠᠭᠴᠢ᠂ ᠠᠷᠢᠬᠢᠴᠢᠨ᠂ ᠭᠦᠳᠬᠡᠭᠴᠢ᠂ ᠮᠥᠯᠵᠢᠭ᠍ᠴᠢ ᠴᠥᠮ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠥᠪᠯᠡᠵᠦ ᠴᠢᠳᠠᠬᠤ ᠦᠭᠡᠢ᠃ 11 ᠲᠠ ᠨᠠᠷ ᠤᠨ ᠵᠠᠷᠢᠮ ᠨᠢ ᠡᠢᠮᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠨᠡᠷᠡ ᠪᠣᠯᠣᠨ ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠰᠦᠨᠡᠰᠦ ᠪᠡᠷ ᠤᠬᠢᠶᠠᠭᠳᠠᠭᠠᠳ ᠠᠷᠢᠭᠤᠳᠬᠠᠭᠳᠠᠨ ᠵᠥᠪᠲᠥᠭᠡᠭᠳᠡᠭᠰᠡᠨ ᠶᠤᠮ᠃
ᠰᠠᠳᠤᠷ ᠰᠠᠮᠠᠭᠤᠨ ᠠᠴᠠ ᠵᠠᠢᠯᠠ
12 《ᠪᠢ ᠶᠠᠭᠤ ᠶᠢ ᠴᠤ ᠬᠢᠵᠦ ᠪᠣᠯᠣᠨᠠ》 ᠭᠡᠳᠡᠭ ᠪᠣᠯᠪᠠᠴᠤ ᠴᠥᠮ ᠲᠤᠰᠠ ᠲᠠᠢ ᠪᠢᠰᠢ᠃ 《ᠪᠢ ᠶᠠᠭᠤ ᠶᠢ ᠴᠤ ᠬᠢᠵᠦ ᠪᠣᠯᠣᠨᠠ》 ᠭᠡᠳᠡᠭ ᠪᠣᠯᠪᠠᠴᠤ ᠪᠢ ᠶᠠᠭᠤᠨ ᠳᠤ ᠴᠤ ᠡᠷᠬᠡᠰᠢᠶᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ᠃ 13 ᠬᠣᠭᠣᠯᠠ ᠤᠮᠳᠠ ᠪᠣᠯ ᠬᠣᠳᠣᠭᠣᠳᠣᠨ ᠤ ᠲᠥᠯᠥᠭᠡ᠂ ᠬᠣᠳᠣᠭᠣᠳᠣ ᠪᠣᠯ ᠬᠣᠭᠣᠯᠠ ᠤᠮᠳᠠ ᠶᠢᠨ ᠲᠥᠯᠥᠭᠡ ᠪᠠᠢᠳᠠᠭ᠃ ᠬᠠᠷᠢᠨ ᠪᠤᠷᠬᠠᠨ ᠡᠭᠦᠨ ᠢ ᠨᠢ ᠴᠤ᠂ ᠲᠡᠭᠦᠨ ᠢ ᠨᠢ ᠴᠤ ᠤᠰᠠᠳᠬᠠᠨᠠ᠃ ᠪᠡᠶᠡ ᠮᠠᠬᠠᠪᠣᠳ ᠪᠣᠯ ᠰᠠᠳᠤᠷ ᠰᠠᠮᠠᠭᠤᠨ ᠤ ᠲᠥᠯᠥᠭᠡ ᠪᠢᠰᠢ᠂ ᠬᠠᠷᠢᠨ ᠡᠵᠡᠨ ᠦ ᠲᠥᠯᠥᠭᠡ᠂ ᠡᠵᠡᠨ ᠴᠤ ᠪᠡᠶᠡ ᠮᠠᠬᠠᠪᠣᠳ ᠤᠨ ᠲᠥᠯᠥᠭᠡ ᠪᠠᠢᠳᠠᠭ᠃ 14 ᠪᠤᠷᠬᠠᠨ ᠪᠡᠷ ᠡᠵᠡᠨ ᠢ ᠠᠮᠢᠯᠠᠭᠤᠯᠤᠭᠰᠠᠨ ᠲᠠᠢ ᠠᠳᠠᠯᠢ ᠪᠢᠳᠡᠨ ᠢ ᠴᠤ ᠥᠪᠡᠷ ᠦᠨ ᠢᠶᠠᠨ ᠬᠦᠴᠦ ᠪᠡᠷ ᠠᠮᠢᠯᠠᠭᠤᠯᠤᠨᠠ᠃ 15 ᠪᠡᠶᠡ ᠮᠠᠬᠠᠪᠣᠳ ᠴᠢᠨᠢ ᠾᠷᠢᠰᠲ᠋ᠣᠰ ᠤᠨ ᠡᠷᠬᠡᠲᠡᠨ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠡᠰᠡᠬᠦᠯᠡ ᠪᠢ ᠾᠷᠢᠰᠲ᠋ᠣᠰ ᠤᠨ ᠡᠷᠬᠡᠲᠡᠨ ᠡᠴᠡ ᠠᠪᠴᠤ ᠶᠠᠩ᠋ᠬᠠᠨ ᠤ ᠡᠷᠬᠡᠲᠡᠨ ᠪᠣᠯᠭᠠᠨᠠ ᠤᠤ︖ ᠣᠭᠲᠣ ᠲᠡᠢᠮᠦ ᠪᠢᠰᠢ᠃ 16 ᠶᠠᠩ᠋ᠬᠠᠨ ᠲᠠᠢ ᠨᠡᠢᠯᠡᠭᠰᠡᠨ ᠬᠥᠮᠦᠨ ᠲᠡᠭᠦᠨ ᠲᠡᠢ ᠨᠢᠭᠡ ᠪᠡᠶᠡ ᠪᠣᠯᠣᠭᠰᠠᠨ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠤᠤ︖ 《ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠮᠢᠬᠠᠨ ᠪᠡᠶᠡ ᠪᠣᠯᠣᠨᠠ》 ᠭᠡᠰᠡᠨ ᠶᠤᠮ᠃ 17 ᠬᠠᠷᠢᠨ ᠡᠵᠡᠨ ᠲᠡᠢ ᠨᠡᠢᠯᠡᠭᠰᠡᠨ ᠬᠥᠮᠦᠨ ᠲᠡᠭᠦᠨ ᠲᠡᠢ ᠰᠦᠨᠡᠰᠦ ᠨᠢᠭᠡᠲᠡᠢ ᠶᠤᠮ᠃ 18 ᠰᠠᠳᠤᠷ ᠰᠠᠮᠠᠭᠤᠨ ᠠᠴᠠ ᠵᠠᠢᠯᠠᠭᠲᠤᠨ᠃ ᠬᠥᠮᠦᠨ ᠠᠯᠢᠪᠠ ᠨᠢᠭᠦᠯ ᠢ ᠪᠡᠶᠡ ᠶᠢᠨ ᠢᠶᠠᠨ ᠭᠠᠳᠠᠨᠠ ᠦᠢᠯᠡᠳᠳᠡᠭ ᠪᠣᠯ᠂ ᠰᠠᠳᠤᠷᠯᠠᠭᠴᠢ ᠨᠢ ᠥᠪᠡᠷ ᠦᠨ ᠢᠶᠠᠨ ᠪᠡᠶᠡ ᠳᠡᠭᠡᠷᠡ ᠨᠢᠭᠦᠯ ᠦᠢᠯᠡᠳᠳᠡᠭ᠃ 19 ᠪᠡᠶᠡ ᠴᠢᠨᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠᠬᠢ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠥᠷᠭᠥᠭᠡ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠲᠠ ᠨᠠᠷ ᠪᠤᠷᠬᠠᠨ ᠠᠴᠠ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠬᠦᠷᠲᠡᠭᠰᠡᠨ᠂ ᠲᠠ ᠨᠠᠷ ᠤᠨ ᠪᠡᠶᠡ ᠪᠣᠯ ᠥᠪᠡᠷᠰᠡᠳ ᠦᠨ ᠬᠢ ᠴᠢᠨᠢ ᠪᠢᠰᠢ᠂ 20 ᠪᠤᠷᠬᠠᠨ ᠲᠠ ᠨᠠᠷ ᠢ ᠦᠨᠡ ᠲᠥᠯᠥᠪᠥᠷᠢ ᠲᠠᠢ ᠪᠠᠷ ᠬᠤᠳᠠᠯᠳᠤᠨ ᠠᠪᠤᠭᠰᠠᠨ ᠪᠣᠯᠬᠣᠷ ᠪᠡᠶᠡ ᠪᠡᠷ ᠢᠶᠠᠨ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠤᠭᠲᠤᠨ᠃