ᠮᠠᠷᠺ ᠬᠣᠶᠠᠷ
ᠰᠠ ᠡᠪᠡᠳᠴᠢᠲᠡᠨ ᠢ ᠡᠳᠡᠭᠡᠭᠡᠭᠰᠡᠨ ᠨᠢ
1 ᠬᠡᠳᠦ ᠬᠣᠨᠣᠭ ᠤᠨ ᠳᠠᠷᠠᠭᠠ᠂ ᠢᠰᠦ᠋ᠰ ᠺᠠᠹᠠᠷᠨᠠᠦ᠋ᠮ ᠳᠤ ᠪᠤᠴᠠᠨ ᠢᠷᠡᠵᠦ ᠨᠢᠭᠡᠨ ᠭᠡᠷ ᠲᠦ ᠪᠠᠢᠭᠠ ᠶᠢ ᠨᠢ ᠬᠥᠮᠦᠰ ᠲᠤᠭᠤᠯᠪᠠ᠃ 2 ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠭᠠᠳ ᠡᠭᠦᠳᠡᠨ ᠳᠦᠨᠢ ᠴᠤ ᠵᠠᠢ ᠦᠭᠡᠢ ᠪᠣᠯᠣᠭᠰᠠᠨ ᠪᠠᠢᠪᠠ᠃ ᠢᠰᠦ᠋ᠰ ᠲᠡᠳᠡᠨ ᠳᠦ ᠦᠭᠡ ᠶᠠᠷᠢᠵᠤ ᠪᠠᠢᠬᠤ ᠳᠤ᠂ 3 ᠬᠥᠮᠦᠰ ᠳᠥᠷᠪᠡᠨ ᠬᠥᠮᠦᠨ ᠢᠶᠡᠷ ᠨᠢᠭᠡᠨ ᠰᠠ ᠡᠪᠡᠳᠴᠢᠲᠡᠨ ᠢ ᠳᠠᠮᠨᠠᠭᠤᠯᠤᠨ ᠠᠪᠴᠢᠷᠠᠵᠠᠢ᠃ 4 ᠬᠠᠷᠢᠨ ᠬᠥᠮᠦᠨ ᠣᠯᠠᠨ᠂ ᠢᠰᠦ᠋ᠰ ᠲᠤ ᠬᠦᠷᠬᠦ ᠪᠣᠯᠣᠮᠵᠢ ᠦᠭᠡᠢ ᠲᠤᠯᠠ ᠲᠡᠳᠡ ᠢᠰᠦ᠋ᠰ ᠤᠨ ᠳᠡᠭᠡᠷᠡ ᠡᠴᠡ ᠳᠡᠭᠡᠪᠦᠷ ᠢ ᠬᠠᠭᠤᠯᠵᠤ ᠴᠤᠭᠤᠯᠤᠭᠠᠳ ᠰᠠ ᠡᠪᠡᠳᠴᠢᠲᠡᠨ ᠢ ᠳᠡᠪᠢᠰᠬᠡᠷ ᠲᠡᠢ ᠨᠢ ᠳᠣᠷᠣᠭᠰᠢ ᠪᠠᠭᠤᠯᠭᠠᠵᠠᠢ᠃ 5 ᠢᠰᠦ᠋ᠰ ᠲᠡᠳᠡᠨ ᠦ ᠢᠲᠡᠭᠡᠯ ᠢ ᠬᠠᠷᠠᠭᠠᠳ ᠰᠠ ᠡᠪᠡᠳᠴᠢᠲᠡᠨ ᠳᠦ᠄ 《ᠬᠦᠦ ᠮᠢᠨᠢ᠂ ᠭᠡᠮ ᠨᠢᠭᠦᠯ ᠴᠢᠨᠢ ᠠᠭᠤᠴᠢᠯᠠᠭᠲᠠᠯᠠ》 ᠭᠡᠪᠡ᠃ 6 ᠬᠠᠷᠢᠨ ᠲᠡᠨᠳᠡ ᠪᠢᠴᠢᠭᠲᠡᠳ ᠦᠨ ᠵᠠᠷᠢᠮ ᠨᠢ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠳᠡ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ 7 《ᠡᠨᠡ ᠬᠥᠮᠦᠨ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠶᠠᠷᠢᠨᠠ ᠪᠤᠢ︖ ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠵᠤ ᠪᠠᠢᠨᠠ᠃ ᠭᠠᠭᠴᠠ ᠬᠦ ᠪᠤᠷᠬᠠᠨ ᠠᠴᠠ ᠥᠭᠡᠷᠡ ᠬᠡᠨ ᠭᠡᠮ ᠨᠢᠭᠦᠯ ᠢ ᠠᠭᠤᠴᠢᠯᠠᠵᠤ ᠴᠢᠳᠠᠬᠤ ᠪᠢᠯᠡ︖》 ᠭᠡᠵᠦ ᠪᠣᠳᠣᠲᠠᠯᠠ᠂ 8 ᠲᠡᠷᠡ ᠳᠠᠷᠤᠢ ᠢᠰᠦ᠋ᠰ ᠰᠦᠨᠡᠰᠦ ᠪᠡᠷ ᠢᠶᠠᠨ ᠲᠡᠳᠡᠨ ᠦ ᠪᠣᠳᠣᠯ ᠢ ᠮᠡᠳᠡᠭᠡᠳ᠄ 《ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠳᠣᠲᠣᠷᠠ ᠪᠠᠨ ᠲᠡᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠪᠤᠢ︖ 9 ᠰᠠ ᠡᠪᠡᠳᠴᠢᠲᠡᠨ ᠳᠦ 〈ᠭᠡᠮ ᠨᠢᠭᠦᠯ ᠴᠢᠨᠢ ᠠᠭᠤᠴᠢᠯᠠᠭᠲᠠᠯᠠ〉 ᠭᠡᠬᠦ᠂ ᠡᠰᠡᠪᠡᠯ 〈ᠪᠣᠰ︕ ᠳᠡᠪᠢᠰᠬᠡᠷ ᠢᠶᠡᠨ ᠠᠪᠤᠭᠠᠳ ᠠᠯᠬᠤ〉 ᠭᠡᠬᠦ ᠶᠢᠨ ᠠᠯᠢ ᠨᠢ ᠠᠮᠠᠷᠬᠠᠨ ᠪᠤᠢ︖ 10 ᠬᠠᠷᠢᠨ ᠬᠥᠮᠦᠨ ᠦ ᠬᠦᠦ ᠭᠠᠵᠠᠷ ᠳᠡᠭᠡᠷᠡ ᠭᠡᠮ ᠨᠢᠭᠦᠯ ᠢ ᠠᠭᠤᠴᠢᠯᠠᠬᠤ ᠡᠷᠬᠡ ᠮᠡᠳᠡᠯ ᠲᠡᠢ ᠶᠢ ᠲᠠ ᠨᠠᠷ ᠲᠤ ᠮᠡᠳᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ᠁》 ᠭᠡᠳ ᠰᠠ ᠡᠪᠡᠳᠴᠢᠲᠡᠨ ᠳᠦ᠄ 11 《ᠴᠢᠮᠠ ᠳᠤ ᠬᠡᠯᠡᠶᠡ᠂ ᠪᠣᠰ︕ ᠳᠡᠪᠢᠰᠬᠡᠷ ᠢᠶᠡᠨ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢ》 ᠭᠡᠵᠦ ᠬᠡᠯᠡᠭᠰᠡᠨ ᠳᠦ᠂ 12 ᠲᠡᠷᠡ ᠬᠥᠮᠦᠨ ᠪᠣᠰᠴᠤ᠂ ᠳᠠᠷᠤᠢᠬᠠᠨ ᠳᠡᠪᠢᠰᠬᠡᠷ ᠢᠶᠡᠨ ᠠᠪᠤᠭᠠᠳ ᠪᠦᠬᠦ ᠬᠥᠮᠦᠨ ᠦ ᠡᠮᠦᠨᠡᠭᠦᠷ ᠭᠠᠷᠴᠤ ᠶᠠᠪᠤᠯᠠ᠃ ᠪᠦᠬᠦ ᠬᠥᠮᠦᠨ ᠮᠡᠯ ᠭᠠᠢᠬᠠᠨ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠵᠤ᠄ 《ᠪᠢᠳᠡ ᠡᠢᠮᠦ ᠶᠠᠪᠤᠳᠠᠯ ᠢ ᠶᠡᠷᠦ ᠦᠵᠡᠭᠰᠡᠨ ᠦᠭᠡᠢ》 ᠭᠡᠯᠴᠡᠪᠡ᠃
ᠯᠧᠸᠢ ᠶᠢ ᠳᠠᠭᠤᠳᠠᠭᠰᠠᠨ ᠨᠢ
13 ᠢᠰᠦ᠋ᠰ ᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠳᠦ ᠳᠠᠬᠢᠭᠠᠳ ᠣᠴᠢᠪᠠ᠃ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠦ ᠳᠡᠷᠭᠡᠳᠡ ᠴᠤᠭᠯᠠᠷᠠᠵᠤ ᠪᠠᠢᠬᠤ ᠳᠤ᠂ ᠲᠡᠷᠡ ᠰᠤᠷᠭᠠᠵᠤ ᠡᠬᠢᠯᠡᠪᠡ᠃ 14 ᠢᠰᠦ᠋ᠰ ᠴᠠᠰᠢ ᠪᠠᠨ ᠶᠠᠪᠤᠬᠤ ᠳᠠᠭᠠᠨ ᠠᠯᠹᠠᠢ ᠶᠢᠨ ᠬᠦᠦ ᠯᠧᠸᠢ ᠶᠢᠨ ᠭᠠᠢᠯᠢ ᠶᠢᠨ ᠭᠠᠵᠠᠷ ᠲᠤ ᠰᠠᠭᠤᠭᠠ ᠶᠢ ᠬᠠᠷᠠᠭᠠᠳ ᠲᠡᠭᠦᠨ ᠳᠦ᠄ 《ᠨᠠᠮᠠᠶᠢ ᠳᠠᠭᠠ》 ᠭᠡᠬᠦ ᠳᠦ᠂ ᠲᠡᠷᠡ ᠪᠣᠰᠴᠤ ᠳᠠᠭᠠᠯᠠ᠃
15 ᠢᠰᠦ᠋ᠰ ᠯᠧᠸᠢ ᠶᠢᠨ ᠭᠡᠷ ᠲᠦ ᠬᠣᠭᠣᠯᠠᠯᠠᠵᠤ ᠪᠠᠢᠪᠠ᠃ ᠲᠡᠭᠡᠬᠦ ᠳᠦ ᠣᠯᠠᠨ ᠭᠠᠢᠯᠢᠴᠢᠨ ᠪᠠ 《ᠨᠢᠭᠦᠯᠲᠡᠨ》 ᠴᠤ ᠢᠰᠦ᠋ᠰ ᠪᠣᠯᠣᠨ ᠱᠠᠪᠢ ᠨᠠᠷ ᠤᠨ ᠬᠢᠨᠢ ᠬᠠᠮᠲᠤ ᠰᠠᠭᠤᠨ ᠢᠳᠡᠵᠦ ᠪᠠᠢᠯᠠ᠃ ᠲᠡᠳᠡ ᠣᠯᠠᠭᠤᠯᠠ ᠪᠠᠨ ᠢᠰᠦ᠋ᠰ ᠢ ᠳᠠᠭᠠᠵᠤ ᠪᠠᠢᠭᠰᠠᠨ ᠠᠵᠢ᠃ 16 ᠹᠠᠷᠢᠰᠠᠢᠴᠤᠳ ᠤᠨ ᠪᠢᠴᠢᠭᠲᠡᠳ ᠢᠰᠦ᠋ᠰ ᠤᠨ 《ᠨᠢᠭᠦᠯᠲᠡᠳ》 ᠪᠣᠯᠣᠨ ᠭᠠᠢᠯᠢᠴᠢᠳ ᠲᠠᠢ ᠬᠠᠮᠲᠤ ᠬᠣᠭᠣᠯᠠᠯᠠᠵᠤ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠱᠠᠪᠢ ᠨᠠᠷ ᠲᠤᠨᠢ᠄ 《ᠲᠡᠷᠡ ᠶᠠᠭᠠᠬᠢᠭᠠᠳ ᠭᠠᠢᠯᠢᠴᠢᠳ ᠪᠣᠯᠣᠨ 〈ᠨᠢᠭᠦᠯᠲᠡᠳ〉 ᠲᠠᠢ ᠬᠠᠮᠲᠤ ᠢᠳᠡᠵᠦ ᠪᠠᠢᠳᠠᠭ ᠪᠤᠢ︖》 ᠭᠡᠬᠦ ᠳᠦ᠂ 17 ᠢᠰᠦ᠋ᠰ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠲᠡᠳᠡᠨ ᠳᠦ᠄ 《ᠡᠷᠡᠭᠦᠯ ᠬᠥᠮᠦᠨ ᠳᠦ ᠡᠮᠴᠢ ᠬᠡᠷᠡᠭ ᠦᠭᠡᠢ᠂ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠳᠦ ᠬᠡᠷᠡᠭ ᠲᠡᠢ᠃ ᠪᠢ ᠵᠥᠪᠲᠡᠨ ᠢ ᠪᠤᠰᠤ᠂ ᠬᠠᠷᠢᠨ ᠨᠢᠭᠦᠯᠲᠡᠨ ᠢ ᠳᠠᠭᠤᠳᠠᠬᠤ ᠪᠠᠷ ᠢᠷᠡᠭᠰᠡᠨ ᠶᠤᠮ》 ᠭᠡᠯᠡ᠃
18 ᠶᠣᠬᠠᠨ ᠤ ᠱᠠᠪᠢ ᠨᠠᠷ ᠪᠣᠯᠣᠨ ᠹᠠᠷᠢᠰᠠᠢᠴᠤᠳ ᠪᠠᠴᠠᠭ ᠪᠠᠷᠢᠵᠤ ᠪᠠᠢᠬᠤ ᠳᠤ᠂ ᠬᠥᠮᠦᠰ ᠢᠰᠦ᠋ᠰ ᠲᠤ ᠢᠷᠡᠵᠦ᠄ 《ᠶᠣᠬᠠᠨ ᠤ ᠱᠠᠪᠢ ᠨᠠᠷ ᠪᠣᠯᠣᠨ ᠹᠠᠷᠢᠰᠠᠢᠴᠤᠳ ᠤᠨ ᠱᠠᠪᠢ ᠨᠠᠷ ᠪᠠᠴᠠᠭ ᠪᠠᠷᠢᠳᠠᠭ ᠪᠠᠢᠬᠤ ᠳᠤ᠂ ᠶᠠᠭᠠᠬᠢᠭᠠᠳ ᠲᠠᠨ ᠤ ᠱᠠᠪᠢ ᠨᠠᠷ ᠪᠠᠴᠠᠭ ᠪᠠᠷᠢᠳᠠᠭ ᠦᠭᠡᠢ ᠪᠤᠢ︖》 ᠭᠡᠪᠡ᠃ 19 ᠢᠰᠦ᠋ᠰ᠄ 《ᠬᠤᠷᠢᠮ ᠤᠨ ᠵᠣᠴᠢᠳ ᠰᠢᠨᠡ ᠬᠦᠷᠭᠡᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠳᠠᠭᠠᠨ ᠪᠠᠴᠠᠭ ᠪᠠᠷᠢᠵᠤ ᠪᠣᠯᠣᠨᠠ ᠤᠤ︖ ᠲᠡᠳᠡ ᠰᠢᠨᠡ ᠬᠦᠷᠭᠡᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠵᠠᠭᠤᠷᠠ ᠪᠠᠨ ᠪᠠᠴᠠᠭ ᠪᠠᠷᠢᠵᠤ ᠪᠣᠯᠬᠤ ᠦᠭᠡᠢ᠃ 20 ᠬᠠᠷᠢᠨ ᠰᠢᠨᠡ ᠬᠦᠷᠭᠡᠨ ᠲᠡᠳᠡᠨ ᠡᠴᠡ ᠠᠪᠠᠴᠢᠭᠳᠠᠬᠤ ᠡᠳᠦᠷ ᠤᠳ ᠢᠷᠡᠨᠡ᠂ ᠲᠡᠷᠡ ᠡᠳᠦᠷ ᠪᠠᠴᠠᠭ ᠪᠠᠷᠢᠨᠠ᠃
21 ᠬᠡᠨ ᠴᠤ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠶᠢ ᠰᠢᠨᠡ ᠥᠭᠡᠳᠡᠰᠦ ᠪᠡᠷ ᠨᠥᠬᠥᠳᠡᠭ ᠦᠭᠡᠢ᠃ ᠲᠡᠭᠡᠪᠡᠯ ᠰᠢᠨᠡ ᠨᠥᠬᠥᠭᠡᠰᠦ ᠨᠢ ᠠᠪᠴᠢᠵᠤ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠶᠢ ᠪᠦᠷ ᠶᠡᠬᠡ ᠪᠡᠷ ᠤᠷᠠᠨᠠ᠃ 22 ᠮᠥᠨ ᠬᠡᠨ ᠴᠤ ᠰᠢᠨᠡ ᠦᠵᠦᠮ ᠦᠨ ᠳᠠᠷᠠᠰᠤ ᠶᠢ ᠬᠠᠭᠤᠴᠢᠨ ᠲᠤᠯᠤᠮ ᠳᠤ ᠬᠢᠳᠡᠭ ᠦᠭᠡᠢ᠃ ᠲᠡᠭᠡᠪᠡᠯ ᠳᠠᠷᠠᠰᠤ ᠲᠤᠯᠤᠮ ᠢ ᠬᠠᠭᠠ ᠲᠠᠯᠪᠢᠵᠤ ᠳᠠᠷᠠᠰᠤ ᠴᠤ ᠦᠭᠡᠢ᠂ ᠲᠤᠯᠤᠮ ᠴᠤ ᠦᠭᠡᠢ ᠬᠣᠴᠣᠷᠣᠨᠠ᠃ ᠬᠠᠷᠢᠨ ᠰᠢᠨᠡ ᠳᠠᠷᠠᠰᠤ ᠶᠢ ᠰᠢᠨᠡ ᠲᠤᠯᠤᠮ ᠳᠤ ᠯᠠ ᠬᠢᠳᠡᠭ》 ᠭᠡᠯᠡ᠃
ᠠᠮᠠᠷᠠᠯ ᠤᠨ ᠡᠳᠦᠷ ᠦᠨ ᠠᠰᠠᠭᠤᠳᠠᠯ
23 ᠨᠢᠭᠡᠨ ᠠᠮᠠᠷᠠᠯ ᠤᠨ ᠡᠳᠦᠷ ᠢᠰᠦ᠋ᠰ ᠲᠠᠷᠢᠶᠠ ᠪᠠᠷ ᠳᠠᠭᠠᠷᠢᠨ ᠥᠩᠭᠡᠷᠡᠬᠦ ᠳᠦ᠂ ᠱᠠᠪᠢ ᠨᠠᠷ ᠨᠢ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠰᠢᠪᠲᠤᠷᠴᠤ ᠡᠬᠢᠯᠡᠯᠡ᠃ 24 ᠹᠠᠷᠢᠰᠠᠢᠴᠤᠳ ᠢᠰᠦ᠋ᠰ ᠲᠤ᠄ 《ᠬᠠᠷᠠᠭᠠᠴᠢ᠂ ᠲᠡᠳᠡ ᠶᠠᠭᠤᠨ ᠳᠤ ᠠᠮᠠᠷᠠᠯ ᠤᠨ ᠡᠳᠦᠷ ᠬᠢᠵᠦ ᠪᠣᠯᠬᠤ ᠦᠭᠡᠢ ᠵᠦᠢᠯ ᠢ ᠬᠢᠵᠦ ᠪᠠᠢᠨᠠ ᠪᠤᠢ︖》 ᠭᠡᠰᠡᠨ ᠳᠦ᠂ 25 ᠢᠰᠦ᠋ᠰ᠄ 《ᠳ᠋ᠠᠸᠢᠳ᠋ ᠪᠣᠯᠣᠨ ᠬᠠᠮᠲᠤ ᠪᠠᠢᠭᠰᠠᠳ ᠨᠢ ᠥᠯᠥᠰᠴᠦ ᠭᠠᠴᠢᠭᠳᠠᠬᠤ ᠳᠠᠭᠠᠨ ᠶᠠᠭᠠᠬᠢᠭᠰᠠᠨ ᠢ ᠲᠠ ᠨᠠᠷ ᠬᠠᠷᠠᠬᠠᠨ ᠤᠩ᠋ᠰᠢᠭᠠ ᠦᠭᠡᠢ ᠭᠡᠵᠢ ᠤᠤ︖ 26 ᠠᠪᠢᠶᠠᠲ᠋ᠠᠷ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠪᠠᠢᠬᠤ ᠦᠶᠡ ᠳᠦ᠂ ᠲᠡᠷᠡ ᠪᠤᠷᠬᠠᠨ ᠤ ᠭᠡᠷ ᠲᠦ ᠣᠷᠣᠭᠠᠳ ᠲᠠᠬᠢᠯᠴᠢ ᠡᠴᠡ ᠥᠭᠡᠷᠡ ᠬᠡᠨ ᠴᠤ ᠢᠳᠡᠵᠦ ᠪᠣᠯᠳᠠᠭ ᠦᠭᠡᠢ ᠲᠠᠪᠢᠭ ᠪᠣᠣᠪᠣ ᠶᠢ ᠢᠳᠡᠵᠦ᠂ ᠬᠠᠮᠲᠤ ᠪᠠᠢᠭᠰᠠᠳ ᠲᠠᠭᠠᠨ ᠴᠤ ᠥᠭᠭᠥᠭᠰᠡᠨ ᠰᠢᠦ ᠳᠠ》 ᠭᠡᠵᠦ ᠬᠡᠯᠡᠪᠡ᠃ 27 ᠪᠠᠰᠠ ᠲᠡᠳᠡᠨ ᠳᠦ᠄ 《ᠬᠥᠮᠦᠨ ᠠᠮᠠᠷᠠᠯ ᠤᠨ ᠡᠳᠦᠷ ᠦᠨ ᠲᠥᠯᠥᠭᠡ ᠪᠢᠰᠢ᠂ ᠬᠠᠷᠢᠨ ᠠᠮᠠᠷᠠᠯ ᠤᠨ ᠡᠳᠦᠷ ᠨᠢ ᠬᠥᠮᠦᠨ ᠦ ᠲᠥᠯᠥᠭᠡ ᠪᠤᠢ ᠪᠣᠯᠣᠭᠰᠠᠨ ᠶᠤᠮ᠃ 28 ᠲᠡᠢᠮᠦ ᠡᠴᠡ ᠬᠥᠮᠦᠨ ᠦ ᠬᠦᠦ ᠮᠥᠨ ᠴᠤ ᠠᠮᠠᠷᠠᠯ ᠤᠨ ᠡᠳᠦᠷ ᠦᠨ ᠡᠵᠡᠨ ᠶᠤᠮ》 ᠭᠡᠵᠦ ᠬᠡᠯᠡᠪᠡ᠃