ᠮᠠᠷᠺ ᠶᠢᠰᠦ
ᠢᠰᠦ᠋ᠰ ᠤᠨ ᠲᠥᠷᠬᠥ ᠬᠤᠪᠢᠷᠠᠭᠰᠠᠨ ᠨᠢ
1 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠡ᠊ᠨᠳᠡ ᠵᠣᠭᠰᠣᠵᠤ ᠪᠤᠢ ᠬᠥᠮᠦᠰ ᠦᠨ ᠵᠠᠷᠢᠮ ᠨᠢ ᠬᠥᠮᠦᠨ ᠦ ᠬᠦᠦ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠠᠭᠠᠨ ᠬᠦᠴᠦᠲᠡᠢ ᠪᠠᠷ ᠢᠷᠡᠬᠦ ᠶᠢ ᠦᠵᠡᠬᠦ ᠡᠴᠡ ᠨᠠᠰᠢ ᠦᠬᠦᠯ ᠢ ᠶᠡᠷᠦ ᠠᠮᠰᠠᠬᠤ ᠦᠭᠡᠢ》 ᠭᠡᠪᠡ᠃
2 ᠵᠢᠷᠭᠤᠭᠠᠨ ᠡᠳᠦᠷ ᠦᠨ ᠳᠠᠷᠠᠭᠠ᠂ ᠢᠰᠦ᠋ᠰ ᠫᠧᠲ᠋ᠧᠷ᠂ ᠶᠠᠺᠣᠪ᠂ ᠶᠣᠬᠠᠨ ᠢ ᠯᠠ ᠳᠠᠭᠠᠭᠤᠯᠤᠨ ᠥᠨᠳᠥᠷ ᠠᠭᠤᠯᠠᠨ ᠳᠤ ᠭᠠᠷᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠲᠡᠳᠡᠨ ᠦ ᠡᠮᠦᠨᠡ ᠬᠤᠪᠢᠯᠤᠭᠰᠠᠨ ᠳᠤ᠂ 3 ᠬᠤᠪᠴᠠᠰᠤ ᠨᠢ ᠭᠢᠯᠲᠠᠭᠠᠨᠠᠵᠤ ᠡᠨᠡ ᠳᠡᠯᠡᠬᠡᠢ ᠶᠢᠨ ᠶᠠᠮᠠᠷ ᠴᠤ ᠴᠠᠢᠷᠠᠭᠤᠯᠤᠭᠴᠢ ᠴᠠᠢᠷᠠᠭᠤᠯᠵᠤ ᠴᠢᠳᠠᠬᠤ ᠪᠠᠷ ᠦᠭᠡᠢ ᠴᠠᠪ ᠴᠠᠭᠠᠨ ᠪᠣᠯᠪᠠ᠃ 4 ᠲᠡᠭᠡᠲᠡᠯᠡ ᠧᠯᠢᠶᠠ ᠮᠣᠰᠧ ᠲᠠᠢ ᠬᠠᠮᠲᠤ ᠦᠵᠡᠭᠳᠡᠵᠡᠢ᠃ ᠲᠡᠳᠡ ᠢᠰᠦ᠋ᠰ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠯᠠ᠃ 5 ᠫᠧᠲ᠋ᠧᠷ ᠢᠰᠦ᠋ᠰ ᠲᠤ᠄ 《ᠪᠠᠭᠰᠢ ᠡ᠂ ᠡ᠊ᠨᠳᠡ ᠪᠠᠢᠬᠤ ᠨᠢ ᠰᠠᠢᠨ ᠪᠠᠢᠨᠠ᠃ ᠪᠢᠳᠡ ᠭᠤᠷᠪᠠᠨ ᠮᠠᠢᠬᠠᠨ ᠪᠣᠰᠬᠠᠭᠠᠳ ᠨᠢᠭᠡ ᠶᠢ ᠨᠢ ᠲᠠᠨ ᠳᠤ᠂ ᠨᠢᠭᠡ ᠶᠢ ᠨᠢ ᠧᠯᠢᠶᠠ ᠳᠤ᠂ ᠨᠢᠭᠡ ᠶᠢ ᠨᠢ ᠮᠣᠰᠧ ᠳᠤ ᠥᠭᠭᠥᠮᠡᠷ ᠪᠠᠢᠨᠠ》 ᠬᠡᠮᠡᠨ᠂ 6 ᠶᠠᠭᠤ ᠬᠡᠯᠡᠬᠦ ᠪᠡᠨ ᠮᠡᠳᠡᠯ ᠦᠭᠡᠢ ᠪᠠᠷ ᠬᠡᠯᠡᠴᠢᠬᠡᠪᠡ᠃ ᠤᠴᠢᠷ ᠨᠢ᠂ ᠲᠡᠳᠡ ᠠᠶᠤᠵᠠᠭᠠᠭᠰᠠᠨ ᠠᠵᠢ᠃ 7 ᠢᠩᠭᠢᠲᠡᠯᠡ ᠡᠭᠦᠯᠡ ᠭᠠᠷᠴᠤ ᠲᠡᠳᠡᠨ ᠢ ᠪᠦᠷᠬᠦᠭᠰᠡᠨ ᠪᠥᠭᠡᠳ ᠡᠭᠦᠯᠡᠨ ᠦ ᠳᠣᠲᠣᠷᠠ ᠠᠴᠠ᠄ 《ᠡᠨᠡ ᠪᠣᠯ ᠮᠢᠨᠦ ᠬᠠᠢᠷᠠᠲᠠᠢ ᠬᠦᠦ ᠮᠥᠨ᠂ ᠲᠡᠭᠦᠨ ᠦ ᠦᠭᠡ ᠶᠢ ᠰᠣᠨᠣᠰᠣᠭᠲᠤᠨ》 ᠭᠡᠬᠦ ᠳᠠᠭᠤ ᠭᠠᠷᠪᠠ᠃ 8 ᠲᠡᠳᠡ ᠳᠠᠷᠤᠢᠬᠠᠨ ᠡᠷᠭᠢᠨ ᠲᠣᠭᠣᠷᠢᠨ ᠢᠶᠠᠨ ᠬᠠᠷᠠᠬᠤ ᠳᠤ᠂ ᠬᠡᠨ ᠴᠤ ᠦᠵᠡᠭᠳᠡᠭᠰᠡᠨ ᠦᠭᠡᠢ᠂ ᠵᠥᠪᠬᠡᠨ ᠢᠰᠦ᠋ᠰ ᠲᠡᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠵᠠᠢ᠃
9 ᠠᠭᠤᠯᠠᠨ ᠠᠴᠠ ᠪᠠᠭᠤᠬᠤ ᠳᠠᠭᠠᠨ ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠬᠥᠮᠦᠨ ᠦ ᠬᠦᠦ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠬᠤ ᠪᠣᠯᠲᠠᠯᠠ ᠦᠵᠡᠭᠰᠡᠨ ᠢᠶᠡᠨ ᠬᠡᠨ ᠳᠦ ᠴᠤ ᠪᠦᠦ ᠶᠠᠷᠢ》 ᠭᠡᠵᠦ ᠵᠠᠬᠢᠭᠰᠠᠨ ᠳᠤ᠂ 10 ᠲᠡᠳᠡ ᠡᠨᠡ ᠦᠭᠡ ᠶᠢ ᠰᠡᠳᠬᠢᠯ ᠳᠡᠭᠡᠨ ᠬᠠᠳᠠᠭᠠᠯᠠᠭᠠᠳ 《ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠬᠤ》 ᠭᠡᠳᠡᠭ ᠨᠢ ᠶᠠᠮᠠᠷ ᠤᠳᠬᠠ ᠲᠠᠢ ᠪᠣᠯᠬᠤ ᠶᠢ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠢᠶᠠᠨ 11 ᠢᠰᠦ᠋ᠰ ᠡᠴᠡ᠄ 《ᠶᠠᠭᠠᠬᠢᠭᠠᠳ ᠪᠢᠴᠢᠭᠲᠡᠳ ᠧᠯᠢᠶᠠ ᠶᠢ ᠤᠷᠢᠳᠠᠪᠠᠷ ᠢᠷᠡᠬᠦ ᠶᠣᠰᠣᠲᠠᠢ ᠭᠡᠳᠡᠭ ᠶᠤᠮ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 12 ᠲᠡᠷᠡ᠄ 《ᠧᠯᠢᠶᠠ ᠨᠡᠭᠡᠷᠡᠨ ᠤᠷᠢᠳᠠᠪᠠᠷ ᠢᠷᠡᠵᠦ ᠠᠯᠢᠪᠠ ᠶᠢ ᠰᠡᠷᠭᠦᠭᠡᠨᠡ᠂ ᠬᠠᠷᠢᠨ ᠬᠥᠮᠦᠨ ᠦ ᠬᠦᠦ ᠶᠢᠨ ᠲᠤᠬᠠᠢ᠄ 〈ᠲᠡᠷᠡ ᠪᠡᠷ ᠣᠯᠠᠨ ᠵᠣᠪᠠᠯᠠᠩ ᠠᠮᠰᠠᠵᠤ ᠵᠢᠭ᠍ᠰᠢᠭᠳᠡᠬᠦ ᠪᠣᠯᠣᠨᠠ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠨᠢ ᠶᠠᠭᠤᠨ ᠤ ᠤᠴᠢᠷ ᠪᠤᠢ︖ 13 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠧᠯᠢᠶᠠ ᠢᠷᠡᠴᠢᠬᠡᠭᠰᠡᠨ᠃ ᠲᠡᠭᠦᠨ ᠦ ᠲᠤᠬᠠᠢ ᠪᠢᠴᠢᠭᠳᠡᠭᠰᠡᠨᠴᠢᠯᠡᠨ ᠲᠡᠳᠡ ᠲᠡᠭᠦᠨ ᠳᠦ ᠬᠦᠰᠡᠭᠰᠡᠨ ᠪᠣᠯᠭᠠᠨ ᠢᠶᠠᠨ ᠬᠢᠭᠰᠡᠨ》 ᠭᠡᠯᠡ᠃
ᠪᠦᠬᠦ ᠶᠠᠭᠤᠮᠠ ᠪᠣᠯᠣᠮᠵᠢ ᠲᠠᠢ
14 ᠢᠰᠦ᠋ᠰ ᠪᠤᠰᠤᠳ ᠱᠠᠪᠢ ᠨᠠᠷ ᠳᠡᠭᠡᠷᠡ ᠪᠡᠨ ᠪᠤᠴᠠᠵᠤ ᠢᠷᠡᠭᠡᠳ ᠬᠠᠷᠠᠬᠤ ᠳᠤ᠂ ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠦ ᠳᠤᠮᠳᠠ ᠪᠢᠴᠢᠭᠲᠡᠳ ᠲᠡᠳᠡᠨ ᠲᠡᠢ ᠨᠢ ᠮᠠᠷᠭᠤᠯᠳᠤᠵᠤ ᠪᠠᠢᠪᠠ᠃ 15 ᠴᠤᠭᠯᠠᠷᠠᠭᠰᠠᠨ ᠪᠦᠭᠦᠳᠡᠭᠡᠷ ᠢᠰᠦ᠋ᠰ ᠢ ᠬᠠᠷᠠᠩ᠋ᠭᠤᠲᠠ ᠮᠠᠰᠢᠳᠠ ᠭᠠᠢᠬᠠᠭᠰᠠᠨ ᠪᠥᠭᠡᠳ ᠭᠦᠶᠦᠨ ᠢᠷᠡᠭᠡᠳ ᠮᠡᠨᠳᠦᠴᠢᠯᠡᠵᠦ ᠪᠠᠢᠪᠠ᠃ 16 ᠢᠰᠦ᠋ᠰ ᠲᠡᠳᠡ ᠨᠠᠷ ᠠᠴᠠ᠄ 《ᠲᠠ ᠨᠠᠷ ᠶᠠᠭᠤᠨ ᠤ ᠲᠤᠬᠠᠢ ᠲᠡᠳᠡᠨ ᠲᠡᠢ ᠮᠠᠷᠭᠤᠯᠳᠤᠵᠤ ᠪᠠᠢᠨᠠ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 17 ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠤ ᠳᠤᠮᠳᠠ ᠠᠴᠠ ᠨᠢᠭᠡ ᠬᠥᠮᠦᠨ ᠭᠠᠷᠴᠤ ᠲᠡᠭᠦᠨ ᠳᠦ᠄ 《ᠪᠠᠭᠰᠢ ᠡ᠂ ᠬᠡᠯᠡ ᠦᠭᠡᠢ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠬᠦᠦ ᠪᠡᠨ ᠪᠢ ᠲᠠᠨ ᠳᠤ ᠠᠪᠴᠢᠷᠠᠭᠰᠠᠨ᠃ 18 ᠴᠢᠳᠬᠥᠷ ᠬᠦᠦ ᠶᠢ ᠮᠢᠨᠢ ᠬᠠᠮᠢᠭᠠ ᠪᠠᠢᠭᠰᠠᠨ ᠴᠤ ᠪᠠᠷᠢᠪᠠᠯ ᠲᠡᠭᠦᠨ ᠢ ᠤᠨᠠᠭᠠᠳᠠᠭ᠃ ᠲᠡᠭᠡᠪᠡᠯ ᠬᠦᠦ ᠮᠢᠨᠢ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ᠂ ᠰᠢᠳᠦ ᠪᠡᠨ ᠬᠠᠪᠢᠷᠴᠤ ᠪᠡᠶᠡ ᠨᠢ ᠬᠥᠰᠢᠴᠢᠭᠡᠳᠡᠭ ᠶᠤᠮ᠃ ᠴᠢᠳᠬᠥᠷ ᠢ ᠬᠥᠭᠡᠭᠡᠬᠦ ᠶᠢ ᠪᠢ ᠲᠠᠨ ᠤ ᠱᠠᠪᠢ ᠨᠠᠷ ᠠᠴᠠ ᠭᠤᠶᠤᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠴᠢᠳᠠᠭᠰᠠᠨ ᠦᠭᠡᠢ》 ᠭᠡᠪᠡ᠃ 19 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠠᠢ᠂ ᠢᠲᠡᠭᠡᠯ ᠦᠭᠡᠢ ᠦᠶᠡ ᠶᠢᠨ ᠬᠢᠨ᠂ ᠬᠡᠳᠦᠢ ᠪᠣᠯᠲᠠᠯᠠ ᠪᠢ ᠲᠠ ᠨᠠᠷ ᠤᠨ ᠳᠡᠷᠭᠡᠳᠡ ᠪᠠᠢᠵᠤ᠂ ᠬᠡᠳᠦᠢ ᠪᠣᠯᠲᠠᠯᠠ ᠲᠠ ᠨᠠᠷ ᠢ ᠲᠡᠰᠪᠦᠷᠢᠯᠡᠬᠦ ᠪᠢᠯᠡ︖ ᠬᠦᠦ ᠶᠢ ᠨᠠᠳᠠ ᠤᠷᠤᠭᠤ ᠠᠪᠴᠢᠷᠠ》 ᠭᠡᠪᠡ᠃ 20 ᠲᠡᠳᠡ ᠬᠦᠦ ᠶᠢ ᠠᠪᠴᠢᠷᠠᠬᠤ ᠳᠤ᠂ ᠴᠢᠳᠬᠥᠷ ᠢᠰᠦ᠋ᠰ ᠢ ᠬᠠᠷᠠᠮᠠᠭᠴᠠ ᠬᠦᠦ ᠶᠢ ᠲᠠᠲᠠᠪᠠᠯᠵᠠᠭᠤᠯᠤᠭᠰᠠᠨ ᠪᠥᠭᠡᠳ ᠬᠦᠦ ᠭᠠᠵᠠᠷ ᠲᠤ ᠤᠨᠠᠵᠤ᠂ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ ᠥᠩᠬᠥᠷᠢᠵᠦ ᠪᠠᠢᠯᠠ᠃ 21 ᠢᠰᠦ᠋ᠰ ᠡᠴᠢᠭᠡ ᠡᠴᠡ ᠨᠢ᠄ 《ᠲᠡᠷᠡ ᠬᠡᠵᠢᠶᠡ ᠡᠴᠡ ᠡᠢᠮᠦ ᠪᠣᠯᠣᠭᠰᠠᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 《ᠪᠠᠭᠠ ᠠᠴᠠ ᠪᠠᠨ ᠶᠤᠮ᠂ 22 ᠡᠨᠡ ᠴᠢᠳᠬᠥᠷ ᠬᠦᠦ ᠶᠢ ᠮᠢᠨᠢ ᠦᠭᠡᠢ ᠬᠢᠬᠦ ᠭᠡᠵᠦ ᠭᠠᠯ᠂ ᠤᠰᠤᠨ ᠳᠤ ᠴᠤ ᠪᠠᠢᠩ᠋ᠭᠤ ᠰᠢᠳᠡᠳᠡᠭ ᠪᠠᠢᠯᠠ᠃ ᠬᠡᠷᠪᠡ ᠲᠠ ᠴᠢᠳᠠᠳᠠᠭ ᠪᠣᠯ ᠪᠢᠳᠡᠨ ᠢ ᠥᠷᠥᠪᠳᠥᠵᠦ ᠲᠤᠰᠠᠯᠠᠭᠠᠴᠢ》 ᠭᠡᠪᠡ᠃ 23 ᠢᠰᠦ᠋ᠰ ᠲᠡᠭᠦᠨ ᠳᠦ᠄ 《ᠬᠡᠷᠪᠡ ᠲᠠ ᠴᠢᠳᠠᠳᠠᠭ ᠪᠣᠯ ᠭᠡᠨᠡ ᠤᠤ︖ ᠢᠲᠡᠭᠡᠭᠴᠢ ᠳᠤ ᠪᠦᠬᠦ ᠶᠠᠭᠤᠮᠠ ᠪᠣᠯᠣᠮᠵᠢ ᠲᠠᠢ》 ᠭᠡᠵᠦ ᠬᠡᠯᠡᠩᠭᠦᠲᠡ ᠨᠢ 24 ᠥᠨᠥᠬᠢ ᠬᠡᠦᠬᠡᠳ ᠦᠨ ᠠᠪᠤ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠪᠢ ᠢᠲᠡᠭᠡᠵᠦ ᠪᠠᠢᠨᠠ᠂ ᠢᠲᠡᠭᠡᠯ ᠦᠭᠡᠢ ᠳᠦ ᠮᠢᠨᠢ ᠲᠤᠰᠠᠯᠠᠭᠠᠴᠢ》 ᠭᠡᠪᠡ᠃ 25 ᠢᠰᠦ᠋ᠰ ᠣᠯᠠᠨ ᠬᠥᠮᠦᠨ ᠦ ᠭᠦᠶᠦᠯᠳᠦᠨ ᠢᠷᠡᠬᠦ ᠶᠢ ᠬᠠᠷᠠᠭᠠᠳ ᠪᠤᠵᠠᠷ ᠴᠢᠳᠬᠥᠷ ᠢ ᠵᠢᠮᠡᠯᠡᠨ᠄ 《ᠬᠡᠯᠡ ᠦᠭᠡᠢ ᠳᠦᠯᠡᠢ ᠴᠢᠳᠬᠥᠷ︕ ᠪᠢ ᠴᠢᠮᠠ ᠳᠤ ᠵᠠᠷᠯᠢᠭᠳᠠᠵᠤ ᠪᠠᠢᠨᠠ᠃ ᠲᠡᠭᠦᠨ ᠡᠴᠡ ᠭᠠᠷ᠂ ᠳᠠᠬᠢᠵᠤ ᠲᠡᠭᠦᠨ ᠳᠦ ᠪᠦᠦ ᠣᠷᠣᠰᠢ︕》 ᠭᠡᠪᠡ᠃ 26 ᠴᠢᠳᠬᠥᠷ ᠬᠠᠰᠬᠢᠷᠴᠤ᠂ ᠬᠦᠦ ᠶᠢ ᠶᠡᠬᠡᠳᠡ ᠲᠠᠲᠠᠪᠠᠯᠵᠠᠭᠤᠯᠤᠨ ᠲᠡᠭᠦᠨ ᠡᠴᠡ ᠭᠠᠷᠪᠠ᠃ ᠬᠦᠦ ᠦᠬᠦᠭᠰᠡᠨ ᠮᠡᠲᠦ ᠪᠣᠯᠣᠭᠰᠠᠨ ᠳᠤ᠂ ᠣᠯᠠᠨ ᠬᠥᠮᠦᠨ᠄ 《ᠲᠡᠷᠡ ᠨᠠᠰᠤ ᠪᠠᠷᠠᠴᠢᠬᠠᠵᠠᠢ》 ᠭᠡᠵᠡᠭᠡᠪᠡ᠃ 27 ᠢᠰᠦ᠋ᠰ ᠭᠠᠷ ᠠᠴᠠ ᠨᠢ ᠪᠠᠷᠢᠵᠤ ᠥᠨᠳᠡᠢᠯᠭᠡᠬᠦ ᠳᠦ᠂ ᠬᠦᠦ ᠪᠣᠰᠪᠠ᠃ 28 ᠢᠰᠦ᠋ᠰ ᠭᠡᠷ ᠲᠦ ᠣᠷᠣᠭᠰᠠᠨ ᠤ ᠳᠠᠷᠠᠭᠠ᠂ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠡᠴᠡ᠄ 《ᠪᠢᠳᠡ ᠶᠠᠭᠠᠬᠢᠭᠠᠳ ᠬᠥᠭᠡᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠪᠤᠢ︖》 ᠭᠡᠵᠦ ᠠᠮᠢᠨᠴᠢᠯᠠᠨ ᠠᠰᠠᠭᠤᠬᠤ ᠳᠤ᠂ 29 ᠢᠰᠦ᠋ᠰ᠄ 《ᠡᠢᠮᠦ ᠲᠥᠷᠥᠯ ᠢ ᠳᠠᠭᠠᠳᠬᠠᠬᠤ ᠠᠴᠠ ᠥᠭᠡᠷᠡ ᠠᠷᠭᠠ ᠪᠠᠷ ᠬᠥᠭᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ》 ᠭᠡᠪᠡ᠃
ᠠᠯᠠᠭᠳᠠᠵᠤ ᠠᠮᠢᠯᠠᠬᠤ ᠲᠤᠬᠠᠢ ᠪᠠᠨ (2)
30 ᠲᠡᠳᠡ ᠲᠡᠨᠳᠡ ᠡᠴᠡ ᠶᠠᠪᠤᠵᠤ ᠭᠠᠯᠢᠯᠠᠶᠠ ᠪᠠᠷ ᠥᠩᠭᠡᠷᠡᠪᠡ᠂ ᠢᠰᠦ᠋ᠰ ᠬᠡᠨ ᠳᠦ ᠴᠤ ᠮᠡᠳᠡᠭᠳᠡᠬᠦ ᠶᠢ ᠬᠦᠰᠡᠭᠰᠡᠨ ᠦᠭᠡᠢ᠃ 31 ᠤᠴᠢᠷ ᠨᠢ᠂ ᠢᠰᠦ᠋ᠰ ᠱᠠᠪᠢ ᠨᠠᠷ ᠢᠶᠠᠨ ᠰᠤᠷᠭᠠᠵᠤ ᠪᠠᠢᠯᠠ᠃ ᠲᠡᠷᠡ᠄ 《ᠬᠥᠮᠦᠨ ᠦ ᠬᠦᠦ ᠬᠥᠮᠦᠰ ᠦᠨ ᠭᠠᠷ ᠲᠤ ᠲᠤᠰᠢᠶᠠᠭᠳᠠᠨᠠ᠂ ᠲᠡᠳᠡ ᠲᠡᠭᠦᠨ ᠢ ᠠᠯᠠᠬᠤ ᠪᠥᠭᠡᠳ ᠲᠡᠷᠡ ᠪᠡᠷ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠳᠡᠭᠡᠷᠡ ᠪᠡᠨ ᠠᠮᠢᠯᠠᠬᠤ ᠪᠣᠯᠣᠨᠠ》 ᠭᠡᠵᠦ ᠶᠠᠷᠢᠭᠰᠠᠨ ᠪᠣᠯᠪᠠᠴᠤ 32 ᠱᠠᠪᠢ ᠨᠠᠷ ᠨᠢ ᠡᠨᠡ ᠦᠭᠡ ᠶᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ ᠪᠥᠭᠡᠳ ᠠᠰᠠᠭᠤᠬᠤ ᠠᠴᠠ ᠪᠠᠨ ᠴᠤ ᠠᠶᠤᠵᠤ ᠪᠠᠢᠯᠠ᠃
33 ᠲᠡᠳᠡ ᠺᠠᠹᠠᠷᠨᠠᠦ᠋ᠮ ᠳᠤ ᠬᠦᠷᠪᠡ᠃ ᠢᠰᠦ᠋ᠰ ᠨᠥᠭᠥᠭᠡ ᠭᠡᠷ ᠲᠦ ᠣᠷᠣᠭᠰᠠᠨ ᠤ ᠳᠠᠷᠠᠭᠠ᠄ 《ᠲᠠ ᠨᠠᠷ ᠵᠠᠮ ᠳᠠᠭᠠᠨ ᠶᠠᠭᠤᠨ ᠤ ᠲᠤᠬᠠᠢ ᠮᠠᠷᠭᠤᠯᠳᠤᠭᠠᠳ ᠪᠠᠢᠪᠠ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 34 ᠱᠠᠪᠢ ᠨᠠᠷ ᠨᠢ ᠳᠠᠭᠤ ᠦᠭᠡᠢ ᠪᠠᠢᠯᠠ᠃ ᠤᠤᠯ ᠨᠢ ᠲᠡᠳᠡ ᠵᠠᠮ ᠳᠠᠭᠠᠨ ᠬᠡᠨ ᠨᠢ ᠬᠠᠮᠤᠭ ᠤᠨ ᠠᠭᠤᠤ ᠪᠣᠯᠬᠤ ᠲᠤᠬᠠᠢ ᠬᠣᠭᠣᠷᠣᠨᠳᠣ ᠪᠠᠨ ᠮᠠᠷᠭᠤᠯᠳᠤᠭᠰᠠᠨ ᠠᠵᠢ᠃ 35 ᠢᠰᠦ᠋ᠰ ᠰᠠᠭᠤᠭᠠᠳ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠪᠠᠨ ᠳᠠᠭᠤᠳᠠᠵᠤ᠄ 《ᠬᠡᠷᠪᠡ ᠬᠡᠨ ᠲᠡᠷᠢᠭᠦᠨ ᠪᠣᠯᠬᠤ ᠶᠢ ᠬᠦᠰᠡᠪᠡᠯ ᠲᠡᠷᠡ ᠬᠥᠮᠦᠨ ᠪᠦᠭᠦᠳᠡ ᠶᠢᠨ ᠠᠳᠠᠭ᠂ ᠪᠦᠭᠦᠳᠡ ᠶᠢᠨ ᠦᠢᠯᠡᠴᠢᠯᠡᠭᠴᠢ ᠪᠣᠯᠣᠭ》 ᠭᠡᠳ 36 ᠨᠢᠭᠡᠨ ᠬᠡᠦᠬᠡᠳ ᠢ ᠠᠪᠴᠢᠷᠠᠵᠤ ᠲᠡᠳᠡᠨ ᠦ ᠳᠤᠮᠳᠠ ᠵᠣᠭᠰᠣᠭᠠᠪᠠ᠃ ᠢᠰᠦ᠋ᠰ ᠲᠡᠭᠦᠨ ᠢ ᠲᠡᠪᠡᠷᠢᠵᠦ ᠱᠠᠪᠢ ᠨᠠᠷ ᠲᠠᠭᠠᠨ᠄ 37 《ᠬᠡᠨ ᠮᠢᠨᠦ ᠨᠡᠷᠡ ᠪᠡᠷ ᠡᠢᠮᠦ ᠬᠡᠦᠬᠡᠳ ᠤᠳ ᠤᠨ ᠨᠢᠭᠡ ᠶᠢ ᠬᠦᠯᠢᠶᠡᠨ ᠠᠪᠤᠪᠠᠯ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠤᠨᠠ᠂ ᠬᠡᠨ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠤᠪᠠᠯ ᠲᠡᠷᠡ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠬᠤ ᠪᠤᠰᠤ᠂ ᠬᠠᠷᠢᠨ ᠨᠠᠮᠠᠶᠢ ᠢᠯᠡᠭᠡᠭᠴᠢ ᠶᠢ ᠬᠦᠯᠢᠶᠡᠨ ᠠᠪᠤᠨᠠ》 ᠭᠡᠪᠡ᠃
ᠴᠢᠩᠭ᠍ᠠ ᠰᠠᠨᠠᠭᠤᠯᠭᠠ
38 ᠶᠣᠬᠠᠨ᠄ 《ᠪᠠᠭᠰᠢ ᠡ᠂ ᠲᠠᠨ ᠤ ᠨᠡᠷᠡ ᠪᠡᠷ ᠴᠢᠳᠬᠥᠷ ᠬᠥᠭᠡᠭᠡᠵᠦ ᠪᠠᠢᠭᠰᠠᠨ ᠬᠥᠮᠦᠨ ᠢ ᠪᠢᠳᠡ ᠬᠠᠷᠠᠯᠠ᠂ ᠬᠠᠷᠢᠨ ᠲᠡᠷᠡ ᠪᠢᠳᠡᠨ ᠢ ᠳᠠᠭᠠᠳᠠᠭ ᠦᠭᠡᠢ ᠲᠤᠯᠠ ᠪᠢᠳᠡ ᠬᠣᠷᠢᠭᠯᠠᠭᠰᠠᠨ》 ᠭᠡᠰᠡᠨ ᠳᠦ᠂ 39 ᠢᠰᠦ᠋ᠰ᠄ 《ᠲᠡᠭᠦᠨ ᠢ ᠪᠦᠦ ᠬᠣᠷᠢᠭᠯᠠ᠃ ᠮᠢᠨᠦ ᠨᠡᠷᠡ ᠪᠡᠷ ᠬᠦᠴᠦᠲᠦ ᠦᠢᠯᠡᠰ ᠦᠢᠯᠡᠳᠦᠭᠡᠳ ᠲᠡᠷᠡ ᠳᠣᠣᠷᠠ ᠪᠠᠨ ᠨᠠᠮᠠᠶᠢ ᠮᠠᠭᠤᠯᠠᠬᠤ ᠬᠥᠮᠦᠨ ᠭᠡᠵᠦ ᠪᠠᠢᠬᠤ ᠦᠭᠡᠢ ᠶᠤᠮ᠃ 40 ᠪᠢᠳᠡᠨ ᠢ ᠦᠯᠦ ᠡᠰᠡᠷᠭᠦᠴᠡᠭᠴᠢ ᠨᠢ ᠪᠢᠳᠡᠨ ᠦ ᠲᠠᠯᠠ ᠳᠤ ᠪᠠᠢᠨᠠ᠃ 41 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠲᠠ ᠨᠠᠷ ᠢ ᠾᠷᠢᠰᠲ᠋ᠣᠰᠲᠠᠨ ᠭᠡᠵᠦ ᠮᠢᠨᠦ ᠨᠡᠷᠡ ᠪᠡᠷ ᠠᠶᠠᠭᠠ ᠤᠰᠤ ᠥᠭᠴᠦ ᠤᠤᠭᠤᠯᠭᠠᠭᠴᠢ ᠨᠢ ᠱᠠᠩᠨᠠᠯ ᠢᠶᠠᠨ ᠯᠠᠪ ᠠᠯᠳᠠᠬᠤ ᠦᠭᠡᠢ᠃
42 ᠨᠠᠳᠠ ᠳᠤ ᠢᠲᠡᠭᠡᠳᠡᠭ ᠡᠳᠡᠭᠡᠷ ᠵᠢᠭᠠᠯ ᠤᠳ ᠤᠨ ᠨᠢᠭᠡᠨ ᠢ ᠪᠦᠳᠦᠷᠢᠭᠦᠯᠬᠦ ᠡᠴᠡ ᠲᠡᠭᠡᠷᠮᠡ ᠶᠢᠨ ᠴᠢᠯᠠᠭᠤ ᠶᠢ ᠬᠦᠵᠦᠭᠦᠨ ᠳᠡᠭᠡᠨ ᠳᠡᠭᠦᠵᠢᠯᠡᠵᠦ ᠳᠠᠯᠠᠢ ᠳᠤ ᠬᠠᠶᠠᠭᠳᠠᠬᠤ ᠨᠢ ᠳᠡᠭᠡᠷᠡ᠃ 43 ᠭᠠᠷ ᠴᠢᠨᠢ ᠴᠢᠮᠠᠶᠢ ᠪᠦᠳᠦᠷᠢᠭᠦᠯᠪᠡᠯ ᠭᠠᠷ ᠢᠶᠠᠨ ᠲᠠᠰᠤᠳᠠᠵᠤ ᠬᠠᠶᠠ᠃ ᠬᠣᠶᠠᠷ ᠭᠠᠷ ᠲᠠᠢ ᠪᠠᠷ ᠲᠠᠮᠤ ᠶᠢᠨ ᠤᠨᠲᠠᠷᠠᠰᠢ ᠦᠭᠡᠢ ᠭᠠᠯ ᠳᠤ ᠤᠨᠠᠬᠤ ᠠᠴᠠ ᠵᠡᠮᠳᠡᠭ ᠢᠶᠡᠷ ᠮᠥᠩᠬᠡ ᠠᠮᠢ ᠳᠤ ᠣᠷᠣᠬᠤ ᠨᠢ ᠳᠡᠭᠡᠷᠡ᠃ 44 7 45 ᠬᠥᠯ ᠴᠢᠨᠢ ᠴᠢᠮᠠᠶᠢ ᠪᠦᠳᠦᠷᠢᠭᠦᠯᠪᠡᠯ ᠬᠥᠯ ᠢᠶᠡᠨ ᠲᠠᠰᠤᠳᠠᠵᠤ ᠬᠠᠶᠠ᠃ ᠬᠣᠶᠠᠷ ᠬᠥᠯ ᠲᠡᠢ ᠪᠠᠷ ᠲᠠᠮᠤ ᠳᠤ ᠬᠠᠶᠠᠭᠳᠠᠬᠤ ᠠᠴᠠ ᠳᠣᠭᠣᠯᠠᠩ ᠢᠶᠠᠷ ᠮᠥᠩᠬᠡ ᠠᠮᠢ ᠳᠤ ᠣᠷᠣᠬᠤ ᠨᠢ ᠳᠡᠭᠡᠷᠡ᠃
46 8 47 ᠨᠢᠳᠦ ᠴᠢᠨᠢ ᠴᠢᠮᠠᠶᠢ ᠪᠦᠳᠦᠷᠢᠭᠦᠯᠪᠡᠯ ᠨᠢᠳᠦ ᠪᠡᠨ ᠤᠬᠤᠵᠤ ᠬᠠᠶᠠ᠃ ᠬᠣᠶᠠᠷ ᠨᠢᠳᠦ ᠲᠠᠢ ᠪᠠᠷ ᠲᠠᠮᠤ ᠳᠤ ᠬᠠᠶᠠᠭᠳᠠᠬᠤ ᠠᠴᠠ ᠥᠷᠥᠭᠡᠰᠦᠨ ᠨᠢᠳᠦ ᠲᠠᠢ ᠪᠠᠷ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠬᠤ ᠨᠢ ᠳᠡᠭᠡᠷᠡ᠃ 48 ᠲᠡᠨᠳᠡ ᠥᠲᠥ ᠬᠣᠷᠣᠬᠠᠢ ᠨᠢ ᠦᠬᠦᠬᠦ ᠦᠭᠡᠢ᠂ ᠭᠠᠯ ᠨᠢ ᠤᠨᠲᠠᠷᠠᠬᠤ ᠦᠭᠡᠢ ᠪᠠᠢᠳᠠᠭ᠃
49 ᠬᠥᠮᠦᠨ ᠪᠣᠯᠭᠠᠨ ᠭᠠᠯ ᠢᠶᠠᠷ ᠳᠠᠪᠤᠰᠤᠯᠠᠭᠳᠠᠨᠠ 9 ᠃ 50 ᠳᠠᠪᠤᠰᠤ ᠪᠣᠯ ᠰᠠᠢᠨ᠃ ᠭᠡᠪᠡᠴᠦ ᠳᠠᠪᠤᠰᠤ ᠠᠮᠲᠠ ᠪᠠᠨ ᠠᠯᠳᠠᠪᠠᠯ ᠲᠠ ᠨᠠᠷ ᠲᠡᠭᠦᠨ ᠢ ᠳᠠᠬᠢᠵᠤ ᠶᠠᠭᠤ ᠪᠠᠷ ᠳᠠᠪᠤᠰᠤᠯᠢᠭ ᠪᠣᠯᠭᠠᠬᠤ ᠪᠢᠯᠡ︖ ᠲᠠ ᠨᠠᠷ ᠳᠣᠲᠣᠷᠠ ᠪᠠᠨ ᠳᠠᠪᠤᠰᠤ ᠲᠠᠢ᠂ ᠬᠣᠭᠣᠷᠣᠨᠳᠣ ᠪᠠᠨ ᠡᠪ ᠲᠡᠢ ᠪᠠᠢᠭᠲᠤᠨ》 ᠭᠡᠪᠡ᠃