ᠮᠠᠷᠺ ᠨᠠᠢ᠌ᠮᠠ
ᠳᠥᠷᠪᠡᠨ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠬᠣᠭᠣᠯᠠᠯᠠᠭᠤᠯᠤᠭᠰᠠᠨ ᠨᠢ
1 ᠲᠡᠷᠡ ᠦᠶᠡ ᠳᠦ ᠪᠠᠰᠠ ᠯᠠ ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠭᠠᠳ ᠢᠳᠡᠬᠦ ᠶᠠᠭᠤᠮᠠ ᠦᠭᠡᠢ ᠪᠠᠢᠵᠠᠢ᠃ ᠢᠰᠦ᠋ᠰ ᠱᠠᠪᠢ ᠨᠠᠷ ᠢᠶᠠᠨ ᠬᠠᠵᠠᠭᠤ ᠳᠠᠭᠠᠨ ᠳᠠᠭᠤᠳᠠᠵᠤ᠄ 2 《ᠪᠢ ᠡᠨᠡ ᠣᠯᠠᠨ ᠬᠥᠮᠦᠨ ᠢ ᠥᠷᠥᠪᠳᠥᠵᠦ ᠪᠠᠢᠨᠠ᠃ ᠲᠡᠳᠡ ᠨᠠᠳᠠ ᠲᠠᠢ ᠭᠤᠷᠪᠠᠨ ᠡᠳᠦᠷ ᠬᠠᠮᠲᠤ ᠪᠠᠢᠵᠤ ᠢᠳᠡᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯᠣᠯᠠ᠃ 3 ᠬᠡᠷᠪᠡ ᠪᠢ ᠲᠡᠳᠡᠨ ᠢ ᠭᠡᠷ ᠲᠤᠨᠢ ᠥᠯᠥᠰᠬᠥᠯᠡᠩ ᠪᠤᠴᠠᠭᠠᠪᠠᠯ ᠲᠡᠳᠡ ᠵᠠᠮ ᠳᠠᠭᠠᠨ ᠬᠠᠷᠠᠩ᠋ᠭᠤᠳᠤᠨ ᠤᠨᠠᠬᠤ ᠪᠣᠯᠣᠨᠠ᠃ ᠲᠡᠳᠡᠨ ᠦ ᠵᠠᠷᠢᠮ ᠨᠢ ᠬᠣᠯᠠ ᠠᠴᠠ ᠢᠷᠡᠭᠰᠡᠨ》 ᠭᠡᠵᠦ ᠬᠡᠯᠡᠪᠡ᠃ 4 ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠳᠦ᠄ 《ᠡᠢᠮᠦ ᠵᠡᠯᠢᠭᠦᠳ ᠭᠠᠵᠠᠷ ᠲᠤ ᠡᠨᠡ ᠬᠥᠮᠦᠰ ᠢ ᠴᠠᠳᠬᠠᠬᠤ ᠪᠣᠣᠪᠣ ᠶᠢ ᠬᠠᠮᠢᠭᠠ ᠠᠴᠠ ᠣᠯᠵᠤ ᠴᠢᠳᠠᠬᠤ ᠪᠢᠯᠡ︖》 ᠭᠡᠯᠡ᠃ 5 ᠢᠰᠦ᠋ᠰ᠄ 《ᠲᠠ ᠨᠠᠷ ᠲᠤ ᠬᠡᠳᠦᠨ ᠪᠣᠣᠪᠣ ᠪᠠᠢᠨᠠ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠳᠡ᠄ 《ᠳᠣᠯᠣᠭᠠ》 ᠭᠡᠪᠡ᠃ 6 ᠢᠰᠦ᠋ᠰ ᠬᠤᠷᠠᠭᠰᠠᠨ ᠣᠯᠠᠨ ᠳᠤ ᠭᠠᠵᠠᠷ ᠳᠡᠭᠡᠷᠡ ᠰᠠᠭᠤ ᠭᠡᠵᠦ ᠵᠠᠬᠢᠭᠠᠳ ᠳᠣᠯᠣᠭᠠᠨ ᠪᠣᠣᠪᠣ ᠶᠢ ᠠᠪᠴᠤ ᠲᠠᠯᠠᠷᠬᠠᠭᠰᠠᠨ ᠤ ᠳᠠᠷᠠᠭᠠ᠂ ᠬᠠᠭᠠᠯᠤᠭᠰᠠᠨ ᠪᠥᠭᠡᠳ ᠱᠠᠪᠢ ᠨᠠᠷ ᠲᠠᠭᠠᠨ ᠥᠭᠭᠥᠭᠰᠡᠭᠡᠷ ᠣᠯᠠᠨ ᠤ ᠡᠮᠦᠨᠡ ᠲᠠᠯᠪᠢᠭᠤᠯᠬᠤ ᠳᠤ᠂ ᠱᠠᠪᠢ ᠨᠠᠷ ᠨᠢ ᠲᠡᠳᠡᠨ ᠦ ᠡᠮᠦᠨᠡ ᠲᠠᠯᠪᠢᠪᠠ᠃ 7 ᠲᠡᠳᠡᠨ ᠳᠦ ᠪᠠᠰᠠ ᠬᠡᠳᠦᠨ ᠵᠢᠵᠢᠭ ᠵᠢᠭᠠᠰᠤ ᠪᠠᠢᠯᠠ᠃ ᠢᠰᠦ᠋ᠰ ᠢᠷᠥᠭᠡᠭᠡᠳ ᠲᠡᠳᠡᠭᠡᠷ ᠢ ᠴᠤ ᠬᠥᠮᠦᠰ ᠦᠨ ᠡᠮᠦᠨᠡ ᠲᠠᠯᠪᠢ ᠭᠡᠵᠦ ᠬᠡᠯᠡᠪᠡ᠃ 8 ᠡᠢᠨ ᠬᠦ ᠬᠥᠮᠦᠰ ᠢᠳᠡᠵᠦ ᠴᠠᠳᠤᠭᠰᠠᠨ ᠪᠥᠭᠡᠳ ᠦᠯᠡᠳᠡᠪᠦᠷᠢ ᠶᠢ ᠴᠤᠭᠯᠠᠭᠤᠯᠬᠤ ᠳᠤ᠂ ᠳᠣᠯᠣᠭᠠᠨ ᠲᠣᠮᠣ ᠰᠠᠭᠰᠤ ᠪᠠᠢᠪᠠ᠃ 9 ᠲᠡᠨᠳᠡ ᠳᠥᠷᠪᠡᠨ ᠮᠢᠩ᠋ᠭᠠ ᠰᠢᠬᠠᠮ ᠬᠥᠮᠦᠨ ᠪᠠᠢᠯᠠ᠃ ᠢᠰᠦ᠋ᠰ ᠲᠡᠳᠡᠨ ᠢ ᠲᠠᠷᠬᠠᠭᠠᠭᠰᠠᠨ ᠢᠶᠠᠨ᠂ 10 ᠳᠠᠷᠤᠢᠬᠠᠨ ᠱᠠᠪᠢ ᠨᠠᠷ ᠤᠨ ᠢᠶᠠᠨ ᠬᠠᠮᠲᠤ ᠵᠠᠪᠢᠨ ᠳᠤ ᠰᠠᠭᠤᠭᠠᠳ ᠳ᠋ᠠᠯᠮᠠᠨᠦ᠋ᠲ᠋ᠠ ᠤᠷᠤᠭᠤ ᠶᠠᠪᠤᠯᠠ᠃
11 ᠹᠠᠷᠢᠰᠠᠢᠴᠤᠳ ᠢᠷᠡᠭᠡᠳ ᠢᠰᠦ᠋ᠰ ᠲᠠᠢ ᠮᠠᠷᠭᠤᠵᠤ ᠡᠬᠢᠯᠡᠪᠡ᠃ ᠲᠡᠳᠡ ᠲᠡᠭᠦᠨ ᠢ ᠲᠡᠩᠰᠡᠬᠦ ᠭᠡᠵᠦ ᠲᠩᠷᠢ ᠶᠢᠨ ᠰᠢᠳᠢ ᠲᠡᠮᠳᠡᠭ ᠢ ᠱᠠᠭᠠᠷᠳᠠᠵᠤ ᠪᠠᠢᠯᠠ᠃ 12 ᠢᠰᠦ᠋ᠰ ᠰᠡᠳᠬᠢᠯ ᠳᠡᠭᠡᠨ ᠭᠦᠨ ᠰᠡᠭᠦᠷᠡᠰᠦ ᠠᠯᠳᠠᠭᠠᠳ᠄ 《ᠡᠨᠡ ᠦᠶᠡ ᠶᠢᠨ ᠬᠢᠨ ᠶᠠᠭᠤᠨ ᠳᠤ ᠰᠢᠳᠢ ᠲᠡᠮᠳᠡᠭ ᠢ ᠱᠠᠭᠠᠷᠳᠠᠨᠠ ᠪᠤᠢ︖ ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠡᠨᠡ ᠦᠶᠡ ᠶᠢᠨ ᠬᠢᠨ ᠳᠤ ᠰᠢᠳᠢ ᠲᠡᠮᠳᠡᠭ ᠥᠭᠭᠥᠭᠳᠡᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠪᠡ᠃ 13 ᠲᠡᠭᠡᠭᠡᠳ ᠲᠡᠳᠡᠨ ᠢ ᠣᠷᠬᠢᠨ ᠵᠠᠪᠢᠨ ᠳᠠᠭᠠᠨ ᠪᠤᠴᠠᠨ ᠰᠠᠭᠤᠵᠤ ᠨᠠᠭᠤᠷ ᠤᠨ ᠨᠥᠭᠥᠭᠡ ᠲᠠᠯᠠ ᠤᠷᠤᠭᠤ ᠶᠠᠪᠤᠪᠠ᠃
14 ᠱᠠᠪᠢ ᠨᠠᠷ ᠨᠢ ᠪᠣᠣᠪᠣ ᠠᠪᠴᠢᠷᠠᠬᠤ ᠪᠠᠨ ᠮᠠᠷᠲᠠᠵᠠᠢ᠂ ᠵᠠᠪᠢᠨ ᠳᠤᠨᠢ ᠨᠢᠭᠡᠯᠬᠡᠨ ᠪᠣᠣᠪᠣ ᠪᠠᠢᠯᠠ᠃ 15 ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠭᠠᠨ᠄ 《ᠠᠩ᠋ᠬᠠᠷᠤᠭᠲᠤᠨ᠂ ᠹᠠᠷᠢᠰᠠᠢᠴᠤᠳ ᠤᠨ ᠢᠰᠭᠡᠭᠦᠷ ᠪᠣᠯᠣᠨ ᠾᠧᠷᠣᠳ᠋ ᠤᠨ ᠢᠰᠭᠡᠭᠦᠷ ᠡᠴᠡ ᠪᠣᠯᠭᠣᠮᠵᠢᠯᠠ》 ᠭᠡᠵᠦ ᠰᠠᠨᠠᠭᠤᠯᠬᠤ ᠳᠤ᠂ 16 ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠪᠢᠳᠡᠨ ᠢ ᠪᠣᠣᠪᠣ ᠪᠠᠢᠬᠤ ᠦᠭᠡᠢ ᠭᠡᠵᠦ ᠪᠠᠢᠨᠠ》 ᠭᠡᠯᠴᠡᠵᠦ ᠪᠠᠢᠪᠠ᠃ 17 ᠢᠰᠦ᠋ᠰ ᠡᠭᠦᠨ ᠢ ᠮᠡᠳᠡᠭᠡᠳ᠄ 《ᠲᠠ ᠨᠠᠷ ᠶᠠᠭᠤᠨ ᠳᠤ ᠪᠣᠣᠪᠣ ᠪᠠᠢᠬᠤ ᠦᠭᠡᠢ ᠭᠡᠵᠦ ᠶᠠᠷᠢᠯᠴᠠᠨᠠ ᠪᠤᠢ︖ ᠲᠠ ᠨᠠᠷ ᠬᠠᠷᠠᠬᠠᠨ ᠣᠢᠯᠠᠭᠠᠭᠠ ᠦᠭᠡᠢ᠂ ᠤᠬᠠᠭᠠᠷᠠᠭᠠ ᠦᠭᠡᠢ ᠤᠤ︖ ᠤᠬᠠᠭᠠᠨ ᠴᠢᠨᠢ ᠮᠣᠬᠣᠴᠢᠬᠠᠭᠰᠠᠨ ᠤᠤ︖ 18 ᠨᠢᠳᠦ ᠲᠠᠢ ᠪᠠᠢᠲᠠᠯᠠ ᠪᠠᠨ ᠬᠠᠷᠠᠬᠤ ᠦᠭᠡᠢ᠂ ᠴᠢᠬᠢ ᠲᠠᠢ ᠪᠠᠢᠲᠠᠯᠠ ᠪᠠᠨ ᠰᠣᠨᠣᠰᠬᠤ ᠦᠭᠡᠢ ᠪᠠᠢᠨᠠ ᠤᠤ︖ ᠲᠠ ᠨᠠᠷ ᠪᠣᠣᠪᠣ ᠶᠢᠨ ᠦᠯᠡᠳᠡᠪᠦᠷᠢ ᠶᠢ ᠬᠤᠷᠢᠶᠠᠵᠤ ᠬᠡᠳᠦᠨ ᠰᠠᠭᠰᠤ ᠳᠦᠭᠦᠷᠭᠡᠭᠰᠡᠨ ᠢᠶᠡᠨ ᠰᠠᠨᠠᠬᠤ ᠦᠭᠡᠢ ᠪᠠᠢᠨᠠ ᠤᠤ︖ 19 ᠲᠠᠪᠤᠨ ᠮᠢᠩ᠋ᠭᠠᠨ ᠬᠥᠮᠦᠨ ᠳᠦ ᠲᠠᠪᠤᠨ ᠪᠣᠣᠪᠣ ᠬᠠᠭᠠᠯᠤᠨ ᠥᠭᠬᠦ ᠳᠦ ᠮᠢᠨᠢ᠂ ᠪᠣᠣᠪᠣ ᠶᠢᠨ ᠦᠯᠡᠳᠡᠪᠦᠷᠢ ᠶᠢ ᠬᠡᠳᠦᠨ ᠰᠠᠭᠰᠤ ᠳᠦᠭᠦᠷᠡᠩ ᠬᠤᠷᠢᠶᠠᠪᠠ︖》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠠᠷᠪᠠᠨ ᠬᠣᠶᠠᠷ》 ᠭᠡᠪᠡ᠃ 20 《ᠮᠥᠨ ᠳᠥᠷᠪᠡᠨ ᠮᠢᠩ᠋ᠭᠠᠨ ᠬᠥᠮᠦᠨ ᠳᠦ ᠳᠣᠯᠣᠭᠠᠨ ᠪᠣᠣᠪᠣ ᠥᠭᠬᠦ ᠳᠦ᠂ ᠲᠠ ᠨᠠᠷ ᠦᠯᠡᠳᠡᠪᠦᠷᠢ ᠶᠢ ᠨᠢ ᠬᠡᠳᠦᠨ ᠰᠠᠭᠰᠤ ᠳᠦᠭᠦᠷᠡᠩ ᠬᠤᠷᠢᠶᠠᠪᠠ︖》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠳᠣᠯᠣᠭᠠ》 ᠭᠡᠯᠡ᠃ 21 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠬᠠᠷᠠᠬᠠᠨ ᠤᠬᠠᠭᠠᠷᠠᠭᠠ ᠦᠭᠡᠢ ᠤᠤ︖》 ᠭᠡᠪᠡ᠃
22 ᠲᠡᠳᠡ ᠪᠧᠲ᠋ᠰᠠᠢᠳᠠ ᠳᠤ ᠬᠦᠷᠬᠦ ᠳᠦ᠂ ᠬᠥᠮᠦᠰ ᠨᠢᠭᠡᠨ ᠰᠣᠬᠣᠷ ᠬᠥᠮᠦᠨ ᠢ ᠠᠪᠴᠢᠷᠠᠵᠤ ᠢᠰᠦ᠋ᠰ ᠡᠴᠡ ᠮᠤᠲᠤᠷ ᠢᠶᠠᠨ ᠲᠠᠯᠪᠢᠭᠠᠴᠢ ᠭᠡᠵᠦ ᠭᠤᠶᠤᠪᠠ᠃ 23 ᠢᠰᠦ᠋ᠰ ᠲᠡᠷᠡ ᠬᠥᠮᠦᠨ ᠦ ᠭᠠᠷ ᠠᠴᠠ ᠬᠥᠲᠥᠯᠵᠦ ᠲᠣᠰᠬᠣᠨ ᠠᠴᠠ ᠭᠠᠷᠤᠯᠠ᠃ ᠨᠢᠳᠦᠨ ᠳᠦᠨᠢ ᠨᠤᠯᠮᠤᠵᠤ᠂ ᠲᠡᠭᠦᠨ ᠦ ᠳᠡᠭᠡᠷᠡ ᠮᠤᠲᠤᠷ ᠢᠶᠠᠨ ᠲᠠᠯᠪᠢᠭᠰᠠᠨ ᠤ ᠳᠠᠷᠠᠭᠠ᠄ 《ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠬᠠᠷᠠᠭᠳᠠᠵᠤ ᠪᠠᠢᠨᠠ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 24 ᠲᠡᠷᠡ ᠬᠥᠮᠦᠨ ᠳᠡᠭᠡᠭᠰᠢ ᠬᠠᠷᠠᠭᠠᠳ᠄ 《ᠪᠢ ᠬᠥᠮᠦᠰ ᠢ ᠬᠠᠷᠠᠵᠤ ᠪᠠᠢᠨᠠ᠂ ᠮᠣᠳᠣ ᠶᠠᠪᠤᠬᠤ ᠰᠢᠭ᠋ ᠬᠠᠷᠠᠭᠳᠠᠵᠤ ᠪᠠᠢᠨᠠ》 ᠭᠡᠯᠡ᠃ 25 ᠢᠰᠦ᠋ᠰ ᠳᠠᠬᠢᠭᠠᠳ ᠨᠢᠳᠦᠨ ᠳᠡᠭᠡᠷᠡ ᠨᠢ ᠮᠤᠲᠤᠷ ᠢᠶᠠᠨ ᠲᠠᠯᠪᠢᠪᠠ᠃ ᠲᠡᠷᠡ ᠬᠥᠮᠦᠨ ᠰᠢᠷᠲᠡᠵᠦ᠂ ᠬᠠᠷᠠᠭᠠ ᠣᠷᠣᠭᠠᠳ ᠪᠦᠬᠦᠨ ᠢ ᠲᠣᠳᠣ ᠦᠵᠡᠬᠦ ᠪᠣᠯᠵᠠᠢ᠃ 26 ᠢᠰᠦ᠋ᠰ ᠲᠡᠭᠦᠨ ᠢ ᠭᠡᠷ ᠤᠷᠤᠭᠤ ᠨᠢ ᠶᠠᠪᠤᠭᠤᠯᠬᠤ ᠳᠠᠭᠠᠨ᠄ 《ᠲᠣᠰᠬᠣᠨ ᠳᠤ ᠪᠦᠦ ᠣᠷᠣ》 ᠭᠡᠪᠡ᠃
ᠫᠧᠲ᠋ᠧᠷ ᠢᠰᠦ᠋ᠰ ᠢ ᠠᠪᠤᠷᠠᠭᠴᠢ ᠭᠡᠵᠦ ᠢᠯᠡᠷᠬᠡᠶᠢᠯᠡᠭᠰᠡᠨ ᠨᠢ
27 ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠹᠢᠯᠢᠫᠣᠢ ᠶᠢᠨ ᠺᠠᠶᠧᠰᠠᠷᠢᠶᠠ ᠶᠢᠨ ᠲᠣᠰᠬᠣᠨ ᠨᠤᠭᠤᠳ ᠤᠷᠤᠭᠤ ᠶᠠᠪᠤᠬᠤ ᠵᠠᠮ ᠳᠠᠭᠠᠨ ᠱᠠᠪᠢ ᠨᠠᠷ ᠠᠴᠠ ᠪᠠᠨ᠄ 《ᠬᠥᠮᠦᠰ ᠨᠠᠮᠠᠶᠢ ᠬᠡᠨ ᠭᠡᠵᠦ ᠶᠠᠷᠢᠳᠠᠭ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 28 ᠲᠡᠳᠡ᠄ 《ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠭᠡᠳᠡᠭ᠂ ᠵᠠᠷᠢᠮ ᠨᠢ ᠧᠯᠢᠶᠠ ᠭᠡᠵᠦ᠂ ᠵᠠᠷᠢᠮ ᠨᠢ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠢᠭᠡ ᠭᠡᠳᠡᠭ》 ᠭᠡᠪᠡ᠃ 29 ᠢᠰᠦ᠋ᠰ᠄ 《ᠬᠠᠷᠢᠨ ᠲᠠ ᠨᠠᠷ ᠨᠠᠮᠠᠶᠢ ᠬᠡᠨ ᠭᠡᠳᠡᠭ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠫᠧᠲ᠋ᠧᠷ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠪᠣᠯ ᠾᠷᠢᠰᠲ᠋ᠣᠰ ᠮᠥᠨ》 ᠭᠡᠯᠡ᠃ 30 ᠢᠰᠦ᠋ᠰ᠄ 《ᠡᠭᠦᠨ ᠢ ᠬᠡᠨ ᠳᠦ ᠴᠤ ᠪᠦᠦ ᠬᠡᠯᠡ》 ᠭᠡᠵᠦ ᠲᠡᠳᠡᠨ ᠳᠦ ᠬᠠᠲᠠᠭᠤ ᠰᠠᠨᠠᠭᠤᠯᠪᠠ᠃
ᠠᠯᠠᠭᠳᠠᠵᠤ ᠠᠮᠢᠯᠠᠬᠤ ᠲᠤᠬᠠᠢ ᠪᠠᠨ (1)
31 ᠢᠰᠦ᠋ᠰ᠄ 《ᠬᠥᠮᠦᠨ ᠦ ᠬᠦᠦ ᠯᠠᠪᠲᠠᠢ ᠶᠡᠬᠡ ᠵᠣᠪᠠᠯᠠᠩ ᠠᠮᠰᠠᠬᠤ ᠪᠥᠭᠡᠳ ᠠᠬᠠᠯᠠᠭᠴᠢᠳ᠂ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠪᠢᠴᠢᠭᠲᠡᠳ ᠲᠦ ᠭᠠᠳᠠᠭᠤᠷᠴᠢᠯᠠᠭᠳᠠᠨ ᠠᠯᠠᠭᠳᠠᠭᠠᠳ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠳᠡᠭᠡᠷᠡ ᠪᠡᠨ ᠠᠮᠢᠯᠠᠬᠤ ᠶᠣᠰᠣᠲᠠᠢ》 ᠭᠡᠵᠦ ᠲᠡᠳᠡᠨ ᠳᠦ ᠵᠢᠭᠠᠵᠤ ᠡᠬᠢᠯᠡᠪᠡ᠃ 32 ᠲᠡᠷᠡ ᠪᠡᠷ ᠡᠨᠡ ᠦᠭᠡ ᠶᠢ ᠢᠯᠡ ᠶᠠᠷᠢᠭᠰᠠᠨ ᠳᠤ᠂ ᠫᠧᠲ᠋ᠧᠷ ᠲᠡᠭᠦᠨ ᠢ ᠬᠠᠵᠠᠭᠤ ᠲᠡᠰᠢ ᠠᠪᠠᠴᠢᠭᠠᠳ ᠵᠢᠮᠡᠯᠡᠵᠦ ᠡᠬᠢᠯᠡᠪᠡ᠃ 33 ᠢᠰᠦ᠋ᠰ ᠡᠷᠭᠢᠵᠦ ᠬᠠᠨᠳᠤᠨ ᠱᠠᠪᠢ ᠨᠠᠷ ᠢᠶᠠᠨ ᠬᠠᠷᠠᠭᠠᠳ᠂ ᠫᠧᠲ᠋ᠧᠷ ᠢ ᠵᠢᠮᠡᠯᠡᠨ᠄ 《ᠮᠢᠨᠦ ᠠᠷᠤ ᠠᠴᠠ ᠵᠠᠢᠯᠠ᠂ ᠰᠠᠲ᠋ᠠᠨ︕ ᠴᠢ ᠪᠤᠷᠬᠠᠨ ᠤ ᠬᠢ ᠶᠢ ᠪᠤᠰᠤ᠂ ᠬᠠᠷᠢᠨ ᠬᠥᠮᠦᠨ ᠦ ᠬᠢ ᠶᠢ ᠪᠣᠳᠣᠵᠤ ᠪᠠᠢᠨᠠ》 ᠭᠡᠪᠡ᠃
34 ᠢᠰᠦ᠋ᠰ ᠬᠤᠷᠠᠭᠰᠠᠨ ᠣᠯᠠᠨ ᠢ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠬᠠᠵᠠᠭᠤ ᠳᠠᠭᠠᠨ ᠳᠠᠭᠤᠳᠠᠨ᠄ 《ᠬᠡᠨ ᠨᠠᠮᠠᠶᠢ ᠳᠠᠭᠠᠶᠠ ᠭᠡᠪᠡᠯ ᠥᠪᠡᠷ ᠢ ᠪᠠᠨ ᠣᠭᠣᠷᠴᠤ᠂ ᠵᠠᠭᠠᠯᠮᠠᠢ ᠪᠠᠨ ᠡᠭᠦᠷᠦᠨ ᠨᠠᠮᠠᠶᠢ ᠳᠠᠭᠠ᠃ 35 ᠤᠴᠢᠷ ᠨᠢ᠂ ᠠᠮᠢ ᠪᠠᠨ ᠠᠪᠤᠷᠠᠶᠠ ᠭᠡᠭᠴᠢ ᠨᠢ ᠠᠮᠢ ᠪᠠᠨ ᠠᠯᠳᠠᠨᠠ᠂ ᠮᠢᠨᠦ ᠲᠥᠯᠥᠭᠡ ᠪᠣᠯᠣᠨ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠲᠥᠯᠥᠭᠡ ᠠᠮᠢ ᠪᠠᠨ ᠠᠯᠳᠠᠭᠴᠢ ᠨᠢ ᠠᠮᠢ ᠪᠠᠨ ᠠᠪᠤᠷᠠᠬᠤ ᠪᠣᠯᠣᠨᠠ᠃ 36 ᠬᠥᠮᠦᠨ ᠪᠦᠬᠦ ᠳᠡᠯᠡᠬᠡᠢ ᠶᠢ ᠣᠯᠣᠭᠰᠠᠨ ᠴᠤ ᠠᠮᠢ ᠪᠠᠨ ᠠᠯᠳᠠᠪᠠᠯ ᠶᠠᠮᠠᠷ ᠠᠰᠢᠭ ᠪᠠᠢᠬᠤ ᠪᠢᠯᠡ︖ 37 ᠬᠥᠮᠦᠨ ᠶᠠᠭᠤ ᠪᠠᠨ ᠥᠭᠴᠦ ᠠᠮᠢ ᠪᠠᠨ ᠰᠣᠯᠢᠵᠤ ᠠᠪᠬᠤ ᠪᠢᠯᠡ︖ 38 ᠵᠠᠪᠬᠠᠢ ᠨᠢᠭᠦᠯᠲᠦ ᠡᠨᠡ ᠦᠶᠡ ᠳᠦ᠂ ᠬᠡᠨ ᠨᠢ ᠨᠠᠳᠠ ᠠᠴᠠ ᠪᠣᠯᠣᠨ ᠮᠢᠨᠦ ᠦᠭᠡᠨ ᠡᠴᠡ ᠢᠴᠢᠪᠡᠯ᠂ ᠬᠥᠮᠦᠨ ᠦ ᠬᠦᠦ ᠴᠤ ᠡᠴᠢᠭᠡ ᠶᠢᠨ ᠢᠶᠠᠨ ᠵᠢᠪᠬᠤᠯᠠᠩ ᠢᠶᠠᠷ ᠲᠩᠷᠢ ᠶᠢᠨ ᠠᠷᠢᠭᠤᠨ ᠡᠯᠴᠢᠳ ᠲᠠᠢ ᠬᠠᠮᠲᠤ ᠢᠷᠡᠬᠦ ᠳᠡᠭᠡᠨ ᠮᠥᠨ ᠲᠡᠭᠦᠨ ᠡᠴᠡ ᠢᠴᠢᠬᠦ ᠪᠣᠯᠣᠨᠠ》 ᠭᠡᠪᠡ᠃