ᠮᠠᠷᠺ ᠭᠤᠷᠪᠠ
ᠠᠮᠠᠷᠠᠯ ᠤᠨ ᠡᠳᠦᠷ ᠢᠶᠡᠷ ᠡᠳᠡᠭᠡᠭᠡᠬᠦ
1 ᠢᠰᠦ᠋ᠰ ᠳᠠᠬᠢᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠷᠣᠬᠤ ᠳᠤ᠂ ᠥᠷᠥᠭᠡᠰᠦᠨ ᠭᠠᠷ ᠨᠢ ᠲᠠᠲᠠᠩ᠋ᠬᠠᠢ ᠨᠢᠭᠡ ᠬᠥᠮᠦᠨ ᠲᠡᠨᠳᠡ ᠪᠠᠢᠵᠠᠢ᠃ 2 ᠵᠠᠷᠢᠮ ᠨᠢ ᠢᠰᠦ᠋ᠰ ᠢ ᠵᠠᠭᠠᠯᠳᠤᠬᠤ ᠶᠢᠨ ᠲᠤᠯᠠᠳᠠ᠂ ᠠᠮᠠᠷᠠᠯ ᠤᠨ ᠡᠳᠦᠷ ᠲᠡᠷᠡ ᠬᠥᠮᠦᠨ ᠢ ᠡᠳᠡᠭᠡᠭᠡᠬᠦ ᠡᠰᠡᠬᠦ ᠶᠢ ᠨᠢ ᠠᠵᠢᠭᠯᠠᠵᠤ ᠪᠠᠢᠯᠠ᠃ 3 ᠢᠰᠦ᠋ᠰ ᠲᠠᠲᠠᠩ᠋ᠬᠠᠢ ᠭᠠᠷ ᠲᠠᠢ ᠬᠥᠮᠦᠨ ᠳᠦ᠄ 《ᠪᠣᠰᠣᠭᠠᠳ ᠣᠯᠠᠨ ᠤ ᠳᠤᠮᠳᠠ ᠢᠷᠡ︕》 ᠭᠡᠰᠡᠨ ᠢᠶᠡᠨ 4 ᠲᠡᠳᠡᠨ ᠳᠦ᠄ 《ᠠᠮᠠᠷᠠᠯ ᠤᠨ ᠡᠳᠦᠷ ᠰᠠᠢᠨ ᠢ ᠦᠢᠯᠡᠳᠬᠦ᠂ ᠡᠰᠡᠪᠡᠯ ᠮᠠᠭᠤ ᠶᠢ ᠦᠢᠯᠡᠳᠬᠦ᠂ ᠠᠮᠢ ᠠᠪᠤᠷᠠᠬᠤ᠂ ᠡᠰᠡᠪᠡᠯ ᠠᠮᠢ ᠬᠥᠨᠥᠭᠡᠬᠦ ᠶᠢᠨ ᠠᠯᠢ ᠨᠢ ᠵᠦᠢ ᠲᠡᠢ ᠪᠤᠢ︖》 ᠭᠡᠰᠡᠨ ᠳᠦ᠂ ᠲᠡᠳᠡ ᠳᠠᠭᠤ ᠦᠭᠡᠢ ᠪᠠᠢᠯᠠ᠃ 5 ᠢᠰᠦ᠋ᠰ ᠠᠭᠤᠷ ᠲᠠᠢ ᠪᠠᠷ ᠲᠡᠳᠡᠨ ᠢ ᠰᠢᠷᠪᠢᠨ ᠬᠠᠷᠠᠭᠰᠠᠨ ᠢᠶᠠᠨ ᠰᠡᠳᠬᠢᠯ ᠤᠨ ᠬᠢᠨᠢ ᠬᠠᠲᠠᠭᠤ ᠳᠤ ᠭᠤᠨᠢᠭᠯᠠᠵᠤ᠂ ᠨᠥᠭᠥᠭᠡ ᠬᠥᠮᠦᠨ ᠳᠦ᠄ 《ᠭᠠᠷ ᠢᠶᠠᠨ ᠰᠤᠩ᠋ᠭᠠ》 ᠭᠡᠪᠡ᠃ ᠥᠨᠥᠬᠢ ᠬᠥᠮᠦᠨ ᠭᠠᠷ ᠢᠶᠠᠨ ᠰᠤᠩ᠋ᠭᠠᠭᠰᠠᠨ ᠳᠤ᠂ ᠢᠯᠠᠷᠢᠰᠢᠭᠰᠠᠨ ᠪᠠᠢᠯᠠ᠃ 6 ᠹᠠᠷᠢᠰᠠᠢᠴᠤᠳ ᠭᠠᠷᠴᠤ ᠢᠰᠦ᠋ᠰ ᠢ ᠬᠡᠷᠬᠢᠨ ᠬᠥᠨᠥᠭᠡᠬᠦ ᠲᠤᠬᠠᠢ ᠾᠧᠷᠣᠳ᠋ ᠤᠨ ᠬᠢᠨ ᠲᠠᠢ ᠲᠡᠷᠡ ᠳᠠᠷᠤᠢ ᠬᠤᠤᠪᠢᠯᠳᠤᠵᠠᠢ᠃
7 ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠨᠠᠭᠤᠷ ᠵᠦᠭ ᠤᠬᠤᠷᠢᠬᠤ ᠳᠤ᠂ ᠭᠠᠯᠢᠯᠠᠶᠠ ᠠᠴᠠ ᠦᠢ ᠲᠦᠮᠡᠨ ᠬᠥᠮᠦᠨ ᠳᠠᠭᠠᠪᠠ᠃ 8 ᠢᠰᠦ᠋ᠰ ᠤᠨ ᠬᠢᠭᠰᠡᠨ ᠪᠦᠬᠦᠨ ᠢ ᠰᠣᠨᠣᠰᠣᠭᠠᠳ ᠶᠦᠳᠠᠢ᠂ ᠶᠧᠷᠦ᠋ᠰᠠᠯᠧᠮ᠂ ᠢᠳᠦ᠋ᠮᠠᠶᠠ ᠪᠠ ᠶᠣᠷᠳᠠᠨ ᠭᠣᠣᠯ ᠤᠨ ᠲᠡᠷᠲᠡᠭᠡ ᠡᠴᠡ᠂ ᠲᠢᠷ ᠪᠣᠯᠣᠨ ᠰᠢᠢᠳᠣᠨ ᠤ ᠬᠠᠪᠢ ᠡᠴᠡ ᠮᠠᠰᠢ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠦ ᠳᠡᠷᠭᠡᠳᠡ ᠢᠷᠡᠵᠡᠢ᠃ 9 ᠢᠰᠦ᠋ᠰ ᠬᠤᠷᠠᠭᠰᠠᠨ ᠣᠯᠠᠨ ᠳᠤ ᠰᠢᠬᠠᠭᠳᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠵᠠᠪᠢ ᠪᠡᠯᠡᠳᠬᠡᠬᠦ ᠶᠢ ᠱᠠᠪᠢ ᠨᠠᠷ ᠲᠠᠭᠠᠨ ᠵᠠᠬᠢᠪᠠ᠃ 10 ᠤᠴᠢᠷ ᠨᠢ᠂ ᠢᠰᠦ᠋ᠰ ᠣᠯᠠᠨ ᠬᠥᠮᠦᠨ ᠢ ᠡᠳᠡᠭᠡᠭᠡᠭᠰᠡᠨ ᠲᠤᠯᠠ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠪᠣᠯᠭᠠᠨ ᠲᠡᠭᠦᠨ ᠳᠦ ᠭᠠᠷ ᠢᠶᠠᠨ ᠬᠦᠷᠭᠡᠬᠦ ᠭᠡᠵᠦ ᠢᠪᠡᠯᠴᠡᠨ ᠢᠷᠡᠵᠦ ᠪᠠᠢᠯᠠ᠃ 11 ᠪᠤᠵᠠᠷ ᠴᠢᠳᠬᠥᠷ ᠤᠳ ᠢᠰᠦ᠋ᠰ ᠢ ᠬᠠᠷᠠᠬᠤ ᠪᠣᠯᠭᠠᠨ ᠳᠠᠭᠠᠨ ᠡᠮᠦᠨᠡ ᠨᠢ ᠤᠨᠠᠵᠤ᠄ 《ᠲᠠ ᠪᠣᠯ ᠪᠤᠷᠬᠠᠨ ᠤ ᠬᠦᠦ ᠮᠥᠨ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠳᠠᠭ ᠪᠠᠢᠪᠠ᠃ 12 ᠬᠠᠷᠢᠨ ᠢᠰᠦ᠋ᠰ᠄ 《ᠮᠢᠨᠦ ᠲᠤᠬᠠᠢ ᠪᠢᠲᠡᠭᠡᠢ ᠦᠭᠡ ᠭᠠᠷᠭᠠ》 ᠭᠡᠵᠦ ᠬᠠᠲᠠᠭᠤ ᠰᠠᠨᠠᠭᠤᠯᠪᠠ᠃
ᠢᠰᠦ᠋ᠰ ᠠᠷᠪᠠᠨ ᠬᠣᠶᠠᠷ ᠢᠶᠠᠨ ᠰᠣᠩ᠋ᠭᠣᠭᠰᠠᠨ ᠨᠢ
13 ᠢᠰᠦ᠋ᠰ ᠠᠭᠤᠯᠠᠨ ᠳᠤ ᠭᠠᠷᠴᠤ ᠥᠪᠡᠷ ᠦᠨ ᠬᠦᠰᠡᠭᠰᠡᠨ ᠬᠥᠮᠦᠰ ᠢᠶᠡᠨ ᠳᠠᠭᠤᠳᠠᠭᠰᠠᠨᠠ᠂ ᠲᠡᠳᠡ ᠲᠡᠭᠦᠨ ᠤᠷᠤᠭᠤ ᠢᠷᠡᠵᠡᠭᠡᠭᠰᠡᠨ ᠳᠦ᠂ 14 [ᠠᠷᠪᠠᠨ ᠬᠣᠶᠠᠷ ᠢ ᠲᠣᠮᠢᠯᠠᠨ ᠰᠢᠳᠠᠷ ᠱᠠᠪᠢ ᠭᠡᠵᠦ ᠨᠡᠷᠡᠯᠡᠪᠡ᠃] ᠲᠡᠷᠡ ᠲᠡᠳᠡᠨ ᠢ ᠥᠪᠡᠷ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠯᠭᠠᠵᠤ᠂ ᠦᠭᠡ ᠶᠢ ᠲᠤᠩ᠋ᠬᠠᠭᠯᠠᠭᠤᠯᠬᠤ ᠪᠠᠷ ᠢᠯᠡᠭᠡᠨ᠂ 15 ᠴᠢᠳᠬᠥᠷ ᠤᠳ ᠢ ᠬᠥᠭᠡᠭᠡᠬᠦ ᠡᠷᠬᠡ ᠮᠡᠳᠡᠯ ᠲᠡᠢ ᠪᠣᠯᠭᠠᠬᠤ ᠭᠡᠰᠡᠨ ᠶᠤᠮ᠃ 16 ᠲᠡᠭᠦᠨ ᠦ ᠲᠣᠮᠢᠯᠠᠭᠰᠠᠨ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠪᠣᠯ ᠰᠢᠮᠣᠨ (ᠲᠡᠭᠦᠨ ᠳᠦ ᠫᠧᠲ᠋ᠧᠷ ᠭᠡᠳᠡᠭ ᠨᠡᠷᠡ ᠰᠣᠶᠣᠷᠬᠠᠪᠠ)᠂ 17 ᠽᠧᠪᠧᠳᠠᠢ ᠶᠢᠨ ᠬᠦᠦ ᠶᠠᠺᠣᠪ ᠪᠣᠯᠣᠨ ᠲᠡᠭᠦᠨ ᠦ ᠳᠡᠭᠦᠦ ᠶᠣᠬᠠᠨ (ᠲᠡᠳᠡ ᠬᠣᠶᠠᠭᠤᠯᠠ ᠳᠤ ᠠᠶᠤᠩ᠋ᠭᠠ ᠶᠢᠨ ᠬᠥᠪᠡᠭᠦᠨ ᠭᠡᠰᠡᠨ ᠤᠳᠬᠠ ᠲᠠᠢ ᠪᠤᠸᠠᠨᠧᠷᠭᠧᠰ ᠭᠡᠳᠡᠭ ᠨᠡᠷᠡ ᠰᠣᠶᠣᠷᠬᠠᠪᠠ)᠂ 18 ᠠᠨᠳ᠋ᠷᠧ᠂ ᠹᠢᠯᠢᠫ᠂ ᠪᠠᠷᠲ᠋ᠣᠯᠣᠮᠠᠢ᠂ ᠮᠠᠲ᠋ᠠᠢ᠂ ᠲᠣᠮᠠ᠂ ᠠᠯᠹᠠᠢ ᠶᠢᠨ ᠬᠦᠦ ᠶᠠᠺᠣᠪ᠂ ᠲᠠᠳᠠᠢ᠂ ᠬᠡᠲᠦᠷᠡᠮᠡᠭᠡᠢ ᠪᠦᠯᠦᠭ ᠦᠨ ᠰᠢᠮᠣᠨ ᠪᠣᠯᠣᠨ 19 ᠢᠰᠦ᠋ᠰ ᠢ ᠪᠠᠷᠢᠭᠤᠯᠤᠭᠰᠠᠨ ᠢᠰᠺᠠᠷᠢᠣᠲ ᠤᠨ ᠶᠦᠳᠠ ᠪᠠᠢᠯᠠ᠃
20 ᠢᠰᠦ᠋ᠰ ᠨᠥᠭᠥᠭᠡ ᠭᠡᠷ ᠲᠦ ᠣᠷᠣᠪᠠ᠃ ᠪᠠᠰᠠ ᠯᠠ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠭᠰᠠᠨ ᠲᠤᠯᠠ ᠲᠡᠳᠡ ᠬᠣᠭᠣᠯᠠ ᠢᠳᠡᠬᠦ ᠵᠠᠪ ᠴᠤ ᠦᠭᠡᠢ ᠪᠠᠢᠯᠠ᠃ 21 ᠢᠰᠦ᠋ᠰ ᠤᠨ ᠭᠡᠷ ᠦᠨ ᠬᠢᠨ ᠡᠳᠡᠭᠡᠷ ᠢ ᠰᠣᠨᠣᠰᠣᠭᠠᠳ ᠲᠡᠭᠦᠨ ᠢ ᠠᠪᠠᠴᠢᠬᠤ ᠪᠠᠷ ᠭᠠᠷᠴᠤ ᠢᠷᠡᠪᠡ᠃ ᠤᠴᠢᠷ ᠨᠢ᠂ ᠬᠥᠮᠦᠰ ᠲᠡᠭᠦᠨ ᠢ ᠰᠣᠯᠢᠶᠠᠷᠠᠵᠠᠢ ᠭᠡᠰᠡᠨ ᠪᠠᠢᠵᠠᠢ᠃ 22 ᠶᠧᠷᠦ᠋ᠰᠠᠯᠧᠮ ᠡᠴᠡ ᠢᠷᠡᠭᠰᠡᠨ ᠪᠢᠴᠢᠭᠲᠡᠳ᠄ 《ᠲᠡᠭᠦᠨ ᠳᠦ ᠪᠧᠯᠽᠧᠪᠦ᠋ᠯ ᠣᠷᠣᠰᠢᠭᠰᠠᠨ》᠂ 《ᠲᠡᠷᠡ ᠪᠡᠷ ᠴᠢᠳᠬᠥᠷ ᠤᠳ ᠤᠨ ᠲᠣᠯᠣᠭᠠᠢᠯᠠᠭᠴᠢ ᠶᠢ ᠲᠦᠰᠢᠵᠦ ᠴᠢᠳᠬᠥᠷ ᠤᠳ ᠢ ᠬᠥᠭᠡᠭᠡᠳᠡᠭ》 ᠭᠡᠵᠡᠭᠡᠵᠦ ᠪᠠᠢᠯᠠ᠃ 23 ᠢᠰᠦ᠋ᠰ ᠲᠡᠳᠡᠨ ᠢ ᠳᠠᠭᠤᠳᠠᠵᠤ ᠦᠯᠢᠭᠡᠷᠯᠡᠯ ᠢᠶᠡᠷ᠄ 《ᠰᠠᠲ᠋ᠠᠨ ᠰᠠᠲ᠋ᠠᠨ ᠢᠶᠠᠨ ᠬᠡᠷᠬᠢᠨ ᠬᠥᠭᠡᠭᠡᠵᠦ ᠴᠢᠳᠠᠬᠤ ᠪᠢᠯᠡ︖ 24 ᠤᠯᠤᠰ ᠳᠣᠲᠣᠷᠠ ᠪᠠᠨ ᠬᠠᠭᠠᠷᠠᠪᠠᠯ᠂ ᠲᠡᠷᠡ ᠤᠯᠤᠰ ᠲᠣᠭᠲᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ᠃ 25 ᠭᠡᠷ ᠳᠣᠲᠣᠷᠠ ᠪᠠᠨ ᠬᠠᠭᠠᠷᠠᠪᠠᠯ᠂ ᠲᠡᠷᠡ ᠭᠡᠷ ᠲᠣᠭᠲᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ᠃ 26 ᠬᠡᠷᠪᠡ ᠰᠠᠲ᠋ᠠᠨ ᠥᠪᠡᠷ ᠦᠨ ᠢᠶᠠᠨ ᠡᠰᠡᠷᠭᠦ ᠪᠣᠰᠴᠤ ᠬᠠᠭᠠᠷᠠᠯ ᠭᠠᠷᠪᠠᠯ ᠮᠥᠨ ᠲᠣᠭᠲᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠳᠠᠭᠤᠰᠤᠨᠠ᠃ 27 ᠬᠦᠴᠦᠲᠡᠨ ᠢ ᠤᠷᠢᠳᠠᠪᠠᠷ ᠬᠦᠯᠢᠬᠦ ᠡᠴᠡ ᠨᠠᠰᠢ᠂ ᠬᠡᠨ ᠴᠤ ᠭᠡᠷ ᠲᠤᠨᠢ ᠣᠷᠣᠭᠠᠳ ᠡᠳ᠋ ᠬᠥᠷᠥᠩᠭᠡ ᠶᠢ ᠨᠢ ᠲᠣᠨᠣᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠬᠦᠯᠢᠴᠢᠭᠡᠭᠡᠳ ᠯᠠ ᠭᠡᠷ ᠢ ᠨᠢ ᠲᠣᠨᠣᠬᠤ ᠪᠣᠯᠣᠨᠠ᠃
28 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠬᠥᠮᠦᠨ ᠦ ᠪᠦᠬᠦ ᠭᠡᠮ ᠨᠢᠭᠦᠯ᠂ ᠳᠣᠷᠣᠮᠵᠢᠯᠠᠯ ᠠᠭᠤᠴᠢᠯᠠᠭᠳᠠᠨᠠ᠃ 29 ᠬᠠᠷᠢᠨ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠳᠣᠷᠣᠮᠵᠢᠯᠠᠭᠴᠢ ᠨᠢ ᠬᠡᠵᠢᠶᠡ ᠴᠤ ᠠᠭᠤᠴᠢᠯᠠᠭᠳᠠᠬᠤ ᠦᠭᠡᠢ ᠪᠥᠭᠡᠳ ᠡᠭᠦᠷᠢᠳᠡ ᠨᠢᠭᠦᠯ ᠲᠡᠢ ᠪᠠᠢᠳᠠᠭ》 ᠭᠡᠪᠡ᠃ 30 《ᠲᠡᠭᠦᠨ ᠳᠦ ᠪᠤᠵᠠᠷ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ》 ᠭᠡᠵᠦ ᠬᠥᠮᠦᠰ ᠬᠡᠯᠡᠭᠰᠡᠨ ᠤᠴᠢᠷ ᠠᠴᠠ ᠲᠡᠷᠡ ᠢᠩᠭᠢᠵᠦ ᠶᠠᠷᠢᠵᠠᠢ᠃
31 ᠲᠡᠷᠡ ᠦᠶᠡ ᠳᠦ ᠢᠰᠦ᠋ᠰ ᠤᠨ ᠡᠵᠢ ᠪᠣᠯᠣᠨ ᠳᠡᠭᠦᠦ ᠨᠠᠷ ᠨᠢ ᠢᠷᠡᠭᠡᠳ ᠭᠠᠳᠠᠨᠠ ᠵᠣᠭᠰᠣᠵᠤ ᠲᠡᠭᠦᠨ ᠢ ᠳᠠᠭᠤᠳᠠᠭᠤᠯᠪᠠ᠃ 32 ᠢᠰᠦ᠋ᠰ ᠢ ᠲᠣᠭᠣᠷᠢᠨ ᠰᠠᠭᠤᠵᠤ ᠪᠤᠢ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠳᠦ᠄ 《ᠬᠠᠷᠠᠭᠠᠴᠢ᠂ ᠲᠠᠨ ᠤ ᠡᠵᠢ ᠪᠣᠯᠣᠨ ᠳᠡᠭᠦᠦ ᠨᠠᠷ ᠭᠠᠳᠠᠨᠠ ᠲᠠᠨ ᠢ ᠬᠠᠢᠵᠤ ᠪᠠᠢᠨᠠ》 ᠭᠡᠬᠦ ᠳᠦ᠂ 33 ᠢᠰᠦ᠋ᠰ ᠬᠠᠷᠢᠭᠤᠯᠤᠨ᠄ 《ᠬᠡᠨ ᠮᠢᠨᠦ ᠡᠵᠢ᠂ ᠬᠡᠨ ᠮᠢᠨᠦ ᠳᠡᠭᠦᠦ ᠨᠠᠷ ᠶᠤᠮ ᠪᠤᠢ︖》 ᠭᠡᠰᠡᠨ ᠢᠶᠡᠨ᠂ 34 ᠬᠦᠷᠢᠶᠡᠯᠡᠨ ᠰᠠᠭᠤᠭᠴᠢᠳ ᠢ ᠬᠠᠷᠠᠭᠠᠳ᠄ 《ᠠᠩ᠋ᠬᠠᠷᠤᠭᠲᠤᠨ᠂ ᠮᠢᠨᠦ ᠡᠵᠢ ᠪᠣᠯᠣᠨ ᠮᠢᠨᠦ ᠳᠡᠭᠦᠦ ᠨᠠᠷ ᠡᠨᠡ ᠪᠠᠢᠨᠠ — 35 ᠪᠤᠷᠬᠠᠨ ᠤ ᠰᠠᠨᠠᠭᠠ ᠶᠢ ᠪᠡᠶᠡᠯᠡᠭᠦᠯᠦᠭᠴᠢ ᠪᠣᠯᠭᠠᠨ ᠮᠢᠨᠦ ᠬᠦᠦ ᠳᠡᠭᠦᠦ᠂ ᠥᠬᠢᠨ ᠳᠡᠭᠦᠦ ᠪᠣᠯᠣᠨ ᠡᠵᠢ ᠮᠥᠨ》 ᠭᠡᠪᠡ᠃