ᠮᠠᠷᠺ ᠠᠷᠪᠠᠨ ᠵᠢᠷᠭᠤᠭᠠ
ᠢᠰᠦ᠋ᠰ ᠠᠮᠢᠯᠠᠭᠰᠠᠨ ᠨᠢ
1 ᠠᠮᠠᠷᠠᠯ ᠤᠨ ᠡᠳᠦᠷ ᠪᠦᠷᠦᠢ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠮᠠᠭᠳᠠᠯ ᠤᠨ ᠮᠠᠷᠢᠶᠠ᠂ ᠶᠠᠺᠣᠪ ᠤᠨ ᠡᠬᠡ ᠮᠠᠷᠢᠶᠠ ᠪᠣᠯᠣᠨ ᠰᠠᠯᠣᠮᠧ ᠨᠠᠷ ᠢᠰᠦ᠋ᠰ ᠢ ᠲᠣᠰᠣᠯᠠᠬᠤ ᠪᠠᠷ ᠣᠴᠢᠬᠤ ᠶᠢᠨ ᠲᠤᠯᠠᠳᠠ ᠠᠩᠬᠢᠯᠤᠮᠠ ᠦᠨᠦᠷᠲᠡᠨ ᠢ ᠬᠤᠳᠠᠯᠳᠤᠨ ᠠᠪᠤᠯᠠ᠃ 2 ᠠᠮᠠᠷᠠᠯ ᠤᠨ ᠳᠠᠷᠠᠭᠠᠬᠢ ᠡᠳᠦᠷ ᠦᠨ ᠥᠷᠯᠥᠭᠡ ᠡᠷᠲᠡ ᠨᠠᠷᠠ ᠮᠠᠨᠳᠤᠮᠠᠭᠴᠠ ᠲᠡᠳᠡ ᠪᠤᠯᠠᠰᠢ ᠤᠷᠤᠭᠤ ᠶᠠᠪᠤᠪᠠ᠃ 3 ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠪᠤᠯᠠᠰᠢᠨ ᠤ ᠠᠮᠠᠨ ᠠᠴᠠ ᠲᠡᠷᠡ ᠴᠢᠯᠠᠭᠤ ᠶᠢ ᠬᠡᠨ ᠪᠢᠳᠡᠨ ᠳᠦ ᠥᠩᠬᠥᠷᠢᠭᠦᠯᠵᠦ ᠥᠭᠬᠦ ᠪᠢᠯᠡ︖》 ᠭᠡᠵᠦ ᠶᠠᠷᠢᠯᠴᠠᠭᠰᠠᠨ ᠢᠶᠠᠨ᠂ 4 ᠳᠡᠭᠡᠭᠰᠢ ᠪᠠᠨ ᠬᠠᠷᠠᠬᠤ ᠳᠤ᠂ ᠥᠨᠥᠬᠢ ᠮᠤᠨᠳᠠᠭ ᠲᠣᠮᠣ ᠴᠢᠯᠠᠭᠤ ᠥᠩᠬᠥᠷᠢᠭᠦᠯᠦᠭᠳᠡᠴᠢᠭᠡᠭᠰᠡᠨ ᠪᠠᠢᠯᠠ᠃ 5 ᠲᠡᠳᠡ ᠪᠤᠯᠠᠰᠢᠨ ᠳᠤ ᠣᠷᠣᠭᠠᠳ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠳᠤᠨᠢ ᠴᠠᠭᠠᠨ ᠨᠥᠮᠥᠷᠭᠡ ᠲᠠᠢ ᠵᠠᠯᠠᠭᠤ ᠰᠠᠭᠤᠵᠤ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠴᠣᠴᠢᠷᠳᠠᠪᠠ᠃ 6 ᠲᠡᠷᠡ ᠵᠠᠯᠠᠭᠤ᠄ 《ᠪᠦᠦ ᠴᠣᠴᠢᠷᠳᠠ᠂ ᠲᠠ ᠨᠠᠷ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ ᠢ ᠡᠷᠢᠵᠦ ᠪᠠᠢᠭᠠ ᠪᠢᠵᠡ᠂ ᠲᠡᠷᠡ ᠠᠮᠢᠯᠠᠭᠰᠠᠨ᠂ ᠡ᠊ᠨᠳᠡ ᠪᠠᠢᠬᠤ ᠦᠭᠡᠢ᠃ ᠬᠠᠷᠠᠭᠠᠴᠢ᠂ ᠲᠡᠭᠦᠨ ᠢ ᠲᠠᠯᠪᠢᠭᠰᠠᠨ ᠭᠠᠵᠠᠷ ᠪᠣᠯ ᠡᠨᠡ᠃ 7 ᠬᠠᠷᠢᠨ ᠲᠠ ᠨᠠᠷ ᠲᠡᠭᠦᠨ ᠦ ᠱᠠᠪᠢ ᠨᠠᠷ ᠪᠣᠯᠣᠨ ᠫᠧᠲ᠋ᠧᠷ ᠲᠤ ᠣᠴᠢᠵᠤ᠄ 〈ᠢᠰᠦ᠋ᠰ ᠲᠠ ᠨᠠᠷ ᠠᠴᠠ ᠤᠷᠢᠳᠠᠪᠠᠷ ᠭᠠᠯᠢᠯᠠᠶᠠ ᠳᠤ ᠣᠴᠢᠨᠠ᠃ ᠲᠡᠭᠦᠨ ᠦ ᠲᠠ ᠨᠠᠷ ᠲᠤ ᠬᠡᠯᠡᠭᠰᠡᠨᠴᠢᠯᠡᠨ ᠲᠠ ᠨᠠᠷ ᠲᠡᠭᠦᠨ ᠢ ᠲᠡᠨᠳᠡ ᠬᠠᠷᠠᠬᠤ ᠪᠣᠯᠣᠨᠠ〉 ᠭᠡᠵᠦ ᠬᠡᠯᠡᠭᠡᠷᠡᠢ》 ᠭᠡᠪᠡ᠃ 8 ᠡᠮᠡᠭᠲᠡᠢᠴᠦᠳ ᠴᠡᠴᠡᠷᠡᠨ ᠰᠦᠷᠳᠡᠵᠦ ᠪᠤᠯᠠᠰᠢᠨ ᠠᠴᠠ ᠭᠠᠷᠴᠤ ᠳᠤᠲᠠᠭᠠᠪᠠ᠃ ᠲᠡᠳᠡ ᠠᠶᠤᠭᠰᠠᠨ ᠠᠴᠠ ᠪᠣᠯᠵᠤ ᠬᠡᠨ ᠳᠦ ᠴᠤ᠂ ᠶᠠᠭᠤ ᠴᠤ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
9 [ᠠᠮᠠᠷᠠᠯ ᠤᠨ ᠳᠠᠷᠠᠭᠠᠬᠢ ᠡᠳᠦᠷ ᠦᠨ ᠥᠷᠯᠥᠭᠡ᠂ ᠢᠰᠦ᠋ᠰ ᠠᠮᠢᠯᠠᠵᠤ ᠠᠩᠬᠠ ᠮᠠᠭᠳᠠᠯ ᠤᠨ ᠮᠠᠷᠢᠶᠠ (ᠤᠷᠢᠳᠤ ᠨᠢ ᠢᠰᠦ᠋ᠰ ᠲᠡᠭᠦᠨ ᠡᠴᠡ ᠳᠣᠯᠣᠭᠠᠨ ᠴᠢᠳᠬᠥᠷ ᠢ ᠬᠥᠭᠡᠭᠡᠵᠦ ᠥᠭᠭᠥᠭᠰᠡᠨ ᠶᠤᠮ᠃) ᠳᠤ ᠢᠯᠡᠷᠡᠵᠡᠢ᠃ 10 ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠨ ᠬᠥᠮᠦᠰ ᠭᠠᠰᠢᠭᠤᠳᠠᠨ ᠤᠬᠢᠯᠠᠵᠤ ᠪᠠᠢᠬᠤ ᠳᠤ᠂ ᠮᠠᠷᠢᠶᠠ ᠲᠡᠳᠡᠨ ᠳᠡᠭᠡᠷᠡ ᠣᠴᠢᠵᠤ ᠲᠡᠷᠡ ᠮᠡᠳᠡᠭᠡ ᠶᠢ ᠬᠦᠷᠭᠡᠭᠰᠡᠨ ᠪᠣᠯᠪᠠᠴᠤ ᠲᠡᠳᠡ 11 ᠢᠰᠦ᠋ᠰ ᠤᠨ ᠠᠮᠢᠳᠤ ᠪᠠᠢᠭᠠ ᠪᠠ ᠮᠠᠷᠢᠶᠠ ᠳᠤ ᠦᠵᠡᠭᠳᠡᠭᠰᠡᠨ ᠢ ᠰᠣᠨᠣᠰᠣᠭᠠᠳ ᠢᠲᠡᠭᠡᠭᠰᠡᠨ ᠦᠭᠡᠢ᠃
12 ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠲᠡᠳᠡᠨ ᠦ ᠬᠣᠶᠠᠷ ᠨᠢ ᠬᠥᠳᠡᠭᠡ ᠤᠷᠤᠭᠤ ᠶᠠᠪᠠᠭᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠢᠰᠦ᠋ᠰ ᠥᠭᠡᠷᠡ ᠳᠦᠷᠢ ᠪᠠᠷ ᠢᠯᠡᠷᠡᠵᠡᠢ᠃ 13 ᠲᠡᠳᠡ ᠬᠣᠶᠠᠭᠤᠯᠠ ᠪᠠᠨ ᠪᠤᠴᠠᠵᠤ ᠪᠤᠰᠤᠳ ᠲᠠᠭᠠᠨ ᠳᠤᠭᠤᠯᠭᠠᠭᠰᠠᠨ ᠳᠤ᠂ ᠬᠡᠨ ᠴᠤ ᠲᠡᠳᠡᠨ ᠦ ᠦᠭᠡ ᠶᠢ ᠢᠲᠡᠭᠡᠭᠰᠡᠨ ᠦᠭᠡᠢ᠃
ᠱᠠᠪᠢ ᠨᠠᠷ ᠡᠭᠦᠷᠭᠡ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠨᠢ
14 ᠡᠭᠦᠨ ᠦ ᠳᠠᠷᠠᠭᠠ᠂ ᠠᠷᠪᠠᠨ ᠨᠢᠭᠡᠨ ᠱᠠᠪᠢ ᠨᠢ ᠬᠣᠭᠣᠯᠠᠯᠠᠵᠤ ᠪᠠᠢᠬᠤ ᠳᠤ᠂ ᠢᠰᠦ᠋ᠰ ᠢᠯᠡᠷᠡᠭᠡᠳ ᠲᠡᠳᠡᠨ ᠦ ᠢᠲᠡᠭᠡᠯ ᠦᠭᠡᠢ ᠪᠠ ᠤᠬᠠᠭᠠᠨ ᠮᠣᠬᠣᠭᠣ ᠶᠢ ᠵᠢᠮᠡᠯᠡᠪᠡ᠃ ᠤᠴᠢᠷ ᠨᠢ᠂ ᠲᠡᠳᠡ ᠢᠰᠦ᠋ᠰ ᠤᠨ ᠠᠮᠢᠯᠠᠭᠰᠠᠨ ᠢ ᠬᠠᠷᠠᠭᠰᠠᠨ ᠬᠥᠮᠦᠰ ᠦᠨ ᠦᠭᠡᠨ ᠳᠦ ᠢᠲᠡᠭᠡᠭᠰᠡᠨ ᠦᠭᠡᠢ ᠠᠵᠢ᠃ 15 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠳᠡᠯᠡᠬᠡᠢ ᠳᠠᠶᠠᠭᠠᠷ ᠶᠠᠪᠤᠵᠤ᠂ ᠪᠦᠲᠦᠭᠡᠭᠳᠡᠭᠰᠡᠨ ᠪᠦᠬᠦᠨ ᠳᠦ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠳᠡᠯᠭᠡᠷᠡᠭᠦᠯᠦᠭᠲᠦᠨ︕ 16 ᠢᠲᠡᠭᠡᠵᠦ ᠤᠬᠢᠶᠠᠯ ᠬᠦᠷᠲᠡᠭᠰᠡᠨ ᠬᠥᠮᠦᠨ ᠠᠪᠤᠷᠠᠭᠳᠠᠨᠠ᠃ ᠢᠲᠡᠭᠡᠬᠦ ᠦᠭᠡᠢ ᠬᠥᠮᠦᠨ ᠶᠠᠯᠠᠯᠠᠭᠳᠠᠨᠠ᠃ 17 ᠢᠲᠡᠭᠡᠭᠴᠢᠳ ᠢ ᠳᠠᠷᠠᠭᠠᠬᠢ ᠲᠡᠮᠳᠡᠭ ᠤᠳ ᠳᠠᠭᠠᠯᠳᠤᠬᠤ ᠪᠣᠯᠣᠨᠠ᠄ ᠲᠡᠳᠡ ᠮᠢᠨᠦ ᠨᠡᠷᠡ ᠪᠡᠷ ᠴᠢᠳᠬᠥᠷ ᠤᠳ ᠢ ᠬᠥᠭᠡᠭᠡᠨ᠂ ᠰᠢᠨᠡ ᠬᠡᠯᠡ ᠨᠦᠭᠦᠳ ᠢᠶᠡᠷ ᠶᠠᠷᠢᠵᠤ᠂ 18 ᠭᠠᠷ ᠢᠶᠠᠷ ᠢᠶᠠᠨ ᠮᠣᠭᠠᠢ ᠪᠠᠷᠢᠬᠤ ᠪᠥᠭᠡᠳ ᠬᠣᠣᠷᠲᠠᠢ ᠶᠠᠭᠤᠮᠠ ᠶᠢ ᠤᠤᠭᠤᠭᠰᠠᠨ ᠴᠤ ᠶᠡᠷᠦ ᠬᠣᠣᠷᠳᠠᠬᠤ ᠦᠭᠡᠢ᠂ ᠡᠪᠡᠳᠴᠢᠲᠡᠨ ᠦ ᠳᠡᠭᠡᠷᠡ ᠭᠠᠷ ᠢᠶᠠᠨ ᠲᠠᠯᠪᠢᠪᠠᠯ ᠡᠳᠡᠭᠡᠭᠡᠨᠡ》 ᠭᠡᠵᠦ ᠬᠡᠯᠡᠪᠡ᠃
19 ᠢᠩᠭᠢᠵᠦ ᠡᠵᠡᠨ ᠢᠰᠦ᠋ᠰ ᠲᠡᠳᠡᠨ ᠳᠦ ᠶᠠᠷᠢᠭᠰᠠᠨ ᠤ ᠳᠠᠷᠠᠭᠠ᠂ ᠲᠩᠷᠢ ᠳᠤ ᠠᠪᠠᠴᠢᠭᠳᠠᠵᠤ ᠪᠤᠷᠬᠠᠨ ᠤ ᠪᠠᠷᠠᠭᠤᠨ ᠲᠠᠯᠠ ᠳᠤ ᠰᠠᠭᠤᠪᠠ᠃ 20 ᠲᠡᠳᠡ ᠭᠠᠵᠠᠷ ᠰᠠᠢ ᠦᠭᠡᠢ ᠶᠠᠪᠤᠵᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠤᠯᠠᠮᠵᠢᠯᠠᠪᠠ᠃ ᠡᠵᠡᠨ ᠲᠡᠳᠡᠨ ᠲᠡᠢ ᠬᠠᠮᠲᠤ ᠠᠵᠢᠯᠯᠠᠵᠤ᠂ ᠦᠭᠡ ᠪᠡᠨ ᠳᠠᠭᠠᠯᠳᠤᠬᠤ ᠲᠡᠮᠳᠡᠭ ᠤᠳ ᠢᠶᠠᠷ ᠢᠶᠠᠨ ᠪᠠᠲᠤᠯᠠᠵᠠᠢ᠃]