ᠮᠠᠷᠺ ᠳᠥᠷᠪᠡ
 ᠦᠷ᠎ᠡ ᠰᠠᠴᠤᠭᠴᠢ ᠪᠠ ᠬᠥᠷᠥᠰᠥ ᠶᠢᠨ ᠦᠯᠢᠭᠡᠷᠯᠡᠯ

1 ᠢᠰᠦ᠋ᠰ ᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠳᠦ ᠳᠠᠬᠢᠨ ᠰᠤᠷᠭᠠᠯ ᠵᠢᠭᠠᠵᠤ ᠡᠬᠢᠯᠡᠪᠡ᠃ ᠲᠡᠭᠦᠨ ᠦ ᠳᠡᠷᠭᠡᠳᠡ ᠦᠢ ᠲᠦᠮᠡᠨ ᠬᠥᠮᠦᠨ ᠴᠤᠭᠯᠠᠷᠠᠭᠰᠠᠨ ᠲᠤᠯᠠ ᠲᠡᠷᠡ ᠨᠠᠭᠤᠷ ᠳᠠᠬᠢ ᠵᠠᠪᠢᠨ ᠳᠤ ᠭᠠᠷᠴᠤ ᠰᠠᠭᠤᠪᠠ᠃ ᠬᠤᠷᠠᠭᠰᠠᠨ ᠣᠯᠠᠨ ᠴᠥᠮ ᠢᠶᠡᠷ ᠢᠶᠠᠨ ᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠳᠦ ᠪᠠᠢᠯ᠎ᠠ᠃ 2 ᠢᠰᠦ᠋ᠰ ᠦᠯᠢᠭᠡᠷᠯᠡᠯ ᠢᠶᠡᠷ ᠲᠡᠳᠡᠨ ᠳᠦ ᠣᠯᠠᠨ ᠵᠦᠢᠯ ᠢ ᠵᠢᠭᠠᠭᠰᠠᠨ ᠶᠤᠮ᠃ ᠲᠡᠷᠡ ᠰᠤᠷᠭᠠᠬᠤ ᠳᠠᠭᠠᠨ᠄ 3 《ᠰᠣᠨᠣᠰᠣᠭᠲᠤᠨ᠂ ᠲᠠᠷᠢᠶᠠᠴᠢᠨ ᠦᠷ᠎ᠡ ᠰᠠᠴᠤᠬᠤ ᠪᠠᠷ ᠭᠠᠷᠴᠠᠢ᠃ 4 ᠲᠡᠷᠡ ᠪᠡᠷ ᠦᠷ᠎ᠡ ᠶᠢ ᠰᠠᠴᠤᠬᠤ ᠳᠤ᠂ ᠵᠠᠷᠢᠮ ᠨᠢ ᠵᠠᠮ ᠢᠶᠠᠷ ᠤᠨᠠᠭᠰᠠᠨ ᠳᠤ ᠰᠢᠪᠠᠭᠤᠳ ᠢᠷᠡᠭᠡᠳ ᠢᠳᠡᠴᠢᠬᠡᠵᠡᠢ᠃ 5 ᠵᠠᠷᠢᠮ ᠨᠢ ᠬᠥᠷᠥᠰᠥ ᠨᠢᠮᠭᠡᠨ ᠴᠢᠯᠠᠭᠤᠷᠬᠠᠭ ᠭᠠᠵᠠᠷ ᠲᠤ ᠤᠨᠠᠵᠤ ᠲᠦᠳᠡᠬᠡᠨ ᠰᠣᠶᠣᠭᠠᠯᠠᠭᠰᠠᠨ ᠪᠣᠯᠪᠠᠴᠤ ᠬᠥᠷᠥᠰᠥ ᠨᠢ ᠭᠦᠨ ᠪᠢᠰᠢ ᠪᠥᠭᠡᠳ 6 ᠦᠨᠳᠦᠰᠦ ᠦᠭᠡᠢ ᠤᠴᠢᠷ ᠠᠴᠠ ᠨᠠᠷᠠ ᠮᠠᠨᠳᠤᠬᠤ ᠳᠤ ᠬᠣᠷᠪᠣᠢᠨ ᠬᠠᠲᠠᠵᠠᠢ᠃ 7 ᠵᠠᠷᠢᠮ ᠨᠢ ᠥᠷᠭᠡᠰᠦᠲᠦ ᠪᠤᠲᠠ ᠶᠢᠨ ᠳᠤᠮᠳᠠ ᠤᠨᠠᠭᠰᠠᠨ ᠳᠤ᠂ ᠥᠷᠭᠡᠰᠦ ᠰᠠᠴᠠᠭᠤ ᠤᠷᠭᠤᠭᠠᠳ ᠲᠡᠭᠦᠨ ᠢ ᠪᠣᠭᠣᠴᠢᠬᠠᠭᠰᠠᠨ ᠲᠤᠯᠠ ᠦᠷ᠎ᠡ ᠵᠢᠮᠢᠰ ᠰᠠᠭᠤᠭᠰᠠᠨ ᠦᠭᠡᠢ᠃ 8 ᠬᠠᠷᠢᠨ ᠵᠠᠷᠢᠮ ᠨᠢ ᠰᠠᠢᠨ ᠬᠥᠷᠥᠰᠥᠨ ᠳᠤ ᠤᠨᠠᠵᠤ᠂ ᠤᠷᠭᠤᠵᠤ ᠥᠰᠥᠭᠡᠳ ᠭᠤᠴᠢ᠂ ᠵᠢᠷᠠ᠂ ᠵᠠᠭᠤ ᠳᠠᠬᠢᠨ ᠦᠷ᠎ᠡ ᠵᠢᠮᠢᠰ ᠰᠠᠭᠤᠵᠠᠢ》 ᠭᠡᠪᠡ᠃ 9 ᠲᠡᠷᠡ᠄ 《ᠰᠣᠨᠣᠰᠬᠤ ᠴᠢᠬᠢ ᠲᠠᠢ ᠨᠢ ᠰᠣᠨᠣᠰᠣᠭᠲᠤᠨ》 ᠭᠡᠯ᠎ᠡ᠃

10 ᠢᠰᠦ᠋ᠰ ᠭᠠᠭᠴᠠᠭᠠᠷ ᠢᠶᠠᠨ ᠪᠠᠢᠬᠤ ᠳᠤ᠂ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠪᠣᠯᠣᠨ ᠬᠠᠮᠲᠤ ᠪᠠᠢᠭᠰᠠᠨ ᠬᠥᠮᠦᠰ ᠨᠢ ᠡᠳᠡᠭᠡᠷ ᠦᠯᠢᠭᠡᠷᠯᠡᠯ ᠦᠨ ᠲᠤᠬᠠᠢ ᠲᠡᠭᠦᠨ ᠡᠴᠡ ᠠᠰᠠᠭᠤᠭᠰᠠᠨ ᠳᠤ᠂ 11 ᠲᠡᠷᠡ᠄ 《ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠨᠢᠭᠤᠴᠠ ᠨᠢ ᠲᠠ ᠨᠠᠷ ᠲᠤ ᠰᠣᠶᠣᠷᠬᠠᠭᠳᠠᠭᠰᠠᠨ᠃ ᠬᠠᠷᠢᠨ ᠭᠠᠳᠠᠨ᠎ᠠ ᠶᠢᠨ ᠬᠥᠮᠦᠰ ᠲᠦ ᠪᠦᠬᠦ ᠶᠠᠭᠤᠮ᠎ᠠ ᠶᠢ ᠦᠯᠢᠭᠡᠷᠯᠡᠯ ᠢᠶᠡᠷ ᠯᠠ ᠶᠠᠷᠢᠳᠠᠭ᠃ 12 ᠡᠢᠨ ᠬᠦ 〈ᠲᠡᠳᠡ ᠬᠠᠷᠠᠨ ᠬᠠᠷᠠᠪᠠᠴᠤ ᠦᠵᠡᠬᠦ ᠦᠭᠡᠢ᠂ ᠰᠣᠨᠣᠰᠣᠨ ᠰᠣᠨᠣᠰᠪᠠᠴᠤ ᠣᠢᠯᠠᠭᠠᠬᠤ ᠦᠭᠡᠢ᠃ ᠲᠡᠳᠡ ᠡᠷᠭᠢᠵᠦ ᠢᠷᠡᠬᠦ᠂ ᠠᠭᠤᠴᠢᠯᠠᠭᠳᠠᠬᠤ ᠤᠴᠢᠷ ᠦᠭᠡᠢ〉》 ᠭᠡᠪᠡ᠃
 ᠲᠠᠢᠯᠪᠤᠷᠢ

13 ᠢᠰᠦ᠋ᠰ᠄ 《ᠲᠠ ᠨᠠᠷ ᠡᠨᠡ ᠦᠯᠢᠭᠡᠷᠯᠡᠯ ᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠵᠤ ᠠᠯᠢᠪᠠ ᠦᠯᠢᠭᠡᠷᠯᠡᠯ ᠢ ᠮᠡᠳᠡᠬᠦ ᠪᠢᠯᠡ᠂ 14 ᠲᠠᠷᠢᠶᠠᠴᠢᠨ ᠦᠭᠡ ᠶᠢ ᠲᠠᠷᠢᠵᠤ ᠪᠠᠢᠨ᠎ᠠ᠃ 15 ᠦᠭᠡ ᠵᠠᠮ ᠢᠶᠠᠷ ᠰᠠᠴᠤᠭᠳᠠᠭᠰᠠᠨ ᠭᠡᠳᠡᠭ ᠨᠢ᠂ ᠬᠥᠮᠦᠰ ᠦᠭᠡ ᠶᠢ ᠰᠣᠨᠣᠰᠣᠮᠠᠭᠴᠠ ᠰᠠᠲ᠋ᠠᠨ ᠢᠷᠡᠭᠡᠳ ᠲᠡᠳᠡᠨ ᠦ ᠳᠣᠲᠣᠷ᠎ᠠ ᠰᠠᠴᠤᠭᠳᠠᠭᠰᠠᠨ ᠦᠭᠡ ᠶᠢ ᠪᠤᠯᠢᠶᠠᠬᠤ ᠶᠢ ᠬᠡᠯᠡᠨ᠎ᠡ᠃ 16 ᠴᠢᠯᠠᠭᠤᠷᠬᠠᠭ ᠭᠠᠵᠠᠷ ᠰᠠᠴᠤᠭᠳᠠᠭᠰᠠᠨ ᠭᠡᠳᠡᠭ ᠨᠢ᠂ ᠬᠥᠮᠦᠰ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠳᠠᠷᠤᠢᠬᠠᠨ ᠪᠠᠶᠠᠷ ᠲᠠᠢ ᠪᠠᠷ ᠬᠦᠯᠢᠶᠡᠨ ᠠᠪᠳᠠᠭ ᠪᠣᠯᠪᠠᠴᠤ 17 ᠳᠣᠲᠣᠷ᠎ᠠ ᠨᠢ ᠦᠨᠳᠦᠰᠦ ᠦᠭᠡᠢ ᠪᠣᠯᠬᠣᠷ ᠲᠦᠷ ᠵᠠᠭᠤᠷ᠎ᠠ ᠪᠠᠢᠭᠰᠠᠨ ᠢᠶᠠᠨ ᠦᠭᠡᠨ ᠡᠴᠡ ᠪᠣᠯᠵᠤ ᠵᠣᠪᠠᠯᠠᠩ ᠬᠠᠪᠴᠢᠯᠭ᠎ᠠ ᠲᠣᠬᠢᠶᠠᠯᠳᠤᠮᠠᠭᠴᠠ ᠪᠦᠳᠦᠷᠢᠬᠦ ᠶᠢ ᠬᠡᠯᠡᠨ᠎ᠡ᠃ 18 ᠥᠷᠭᠡᠰᠦᠲᠦ ᠪᠤᠲᠠ ᠶᠢᠨ ᠳᠤᠮᠳᠠ ᠰᠠᠴᠤᠭᠳᠠᠭᠰᠠᠨ ᠭᠡᠳᠡᠭ ᠨᠢ᠂ ᠬᠥᠮᠦᠰ ᠦᠭᠡ ᠶᠢ ᠰᠣᠨᠣᠰᠣᠭᠰᠠᠨ ᠤ ᠳᠠᠷᠠᠭ᠎ᠠ᠂ 19 ᠠᠮᠢᠳᠤᠷᠠᠯ ᠤᠨ ᠵᠣᠪᠠᠭᠤᠷᠢ᠂ ᠡᠳ᠋ ᠪᠠᠶᠠᠯᠢᠭ ᠤᠨ ᠥᠭᠡᠰᠢ ᠪᠠ ᠡᠯᠳᠡᠪ ᠵᠦᠢᠯ ᠤᠨ ᠰᠢᠨᠤᠯ ᠣᠷᠣᠵᠤ ᠢᠷᠡᠭᠡᠳ ᠦᠭᠡ ᠶᠢ ᠪᠣᠭᠣᠵᠤ ᠦᠷ᠎ᠡ ᠵᠢᠮᠢᠰ ᠦᠭᠡᠢ ᠪᠣᠯᠭᠠᠬᠤ ᠶᠢ ᠬᠡᠯᠡᠨ᠎ᠡ᠃ 20 ᠰᠠᠢᠨ ᠬᠥᠷᠥᠰᠥᠨ ᠳᠤ ᠰᠠᠴᠤᠭᠳᠠᠭᠰᠠᠨ ᠭᠡᠳᠡᠭ ᠨᠢ᠂ ᠬᠥᠮᠦᠰ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠬᠦᠯᠢᠶᠡᠨ ᠠᠪᠴᠤ ᠭᠤᠴᠢ᠂ ᠵᠢᠷᠠ᠂ ᠵᠠᠭᠤ ᠳᠠᠬᠢᠨ ᠢᠶᠠᠷ ᠦᠷ᠎ᠡ ᠵᠢᠮᠢᠰ ᠲᠠᠢ ᠪᠣᠯᠬᠤ ᠶᠢ ᠬᠡᠯᠡᠨ᠎ᠡ》 ᠭᠡᠪᠡ᠃

21 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠳ᠋ᠧᠩ ᠢ ᠠᠪᠴᠢᠷᠠᠭᠠᠳ ᠰᠠᠪᠠ ᠶᠢᠨ ᠳᠣᠣᠷ᠎ᠠ ᠪᠤᠶᠤ ᠣᠷᠣ ᠶᠢᠨ ᠳᠣᠣᠷ᠎ᠠ ᠲᠠᠯᠪᠢᠳᠠᠭ ᠤᠤ︖ ᠲᠡᠭᠦᠨ ᠢ ᠲᠠᠯᠪᠢᠭᠤᠷ ᠳᠡᠭᠡᠷ᠎ᠡ ᠲᠠᠯᠪᠢᠳᠠᠭ ᠪᠢᠰᠢ ᠤᠤ︖ 22 ᠢᠯᠡᠴᠢᠯᠡᠭᠳᠡᠬᠦ ᠦᠭᠡᠢ ᠨᠢᠭᠤᠴᠠ ᠭᠡᠵᠦ ᠦᠭᠡᠢ᠂ ᠢᠯᠡ ᠭᠠᠷᠬᠤ ᠦᠭᠡᠢ ᠳᠠᠯᠳᠠᠯᠠᠯᠲᠠ ᠭᠡᠵᠦ ᠦᠭᠡᠢ᠃ 23 ᠰᠣᠨᠣᠰᠬᠤ ᠴᠢᠬᠢ ᠲᠠᠢ ᠨᠢ ᠰᠣᠨᠣᠰᠣᠭᠲᠤᠨ》 ᠭᠡᠪᠡ᠃ 24 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠰᠣᠨᠣᠰᠴᠤ ᠪᠠᠢᠭ᠎ᠠ ᠪᠠᠨ ᠠᠩ᠋ᠬᠠᠷᠤᠭᠲᠤᠨ᠂ ᠲᠠ ᠨᠠᠷ ᠬᠡᠮᠵᠢᠭᠰᠡᠨ ᠬᠡᠮᠵᠢᠭᠦᠷ ᠢᠶᠡᠷ ᠢᠶᠠᠨ ᠬᠡᠮᠵᠢᠭᠦᠯᠵᠦ ᠣᠯᠬᠤ ᠪᠥᠭᠡᠳ ᠢᠯᠡᠭᠦᠦ ᠶᠢ ᠴᠤ ᠣᠯᠣᠨ᠎ᠠ᠃ 25 ᠬᠡᠨ ᠳᠦ ᠪᠠᠢᠪᠠᠯ᠂ ᠲᠡᠭᠦᠨ ᠳᠦ ᠥᠭᠭᠥᠭᠳᠡᠨ᠎ᠡ᠃ ᠬᠡᠨ ᠳᠦ ᠪᠠᠢᠬᠤ ᠦᠭᠡᠢ ᠪᠣᠯ᠂ ᠪᠠᠢᠭ᠎ᠠ ᠨᠢ ᠴᠤ ᠪᠤᠯᠢᠶᠠᠭᠳᠠᠨ᠎ᠠ》 ᠭᠡᠪᠡ᠃
 ᠦᠷ᠎ᠡ ᠶᠢᠨ ᠦᠯᠢᠭᠡᠷᠯᠡᠯ

26 ᠲᠡᠷᠡ ᠪᠠᠰᠠ᠄ 《ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠪᠣᠯ ᠬᠥᠮᠦᠨ ᠭᠠᠵᠠᠷ ᠲᠤ ᠦᠷ᠎ᠡ ᠰᠠᠴᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ 27 ᠰᠥᠨᠢ ᠨᠢ ᠤᠨᠲᠠᠵᠤ ᠡᠳᠦᠷ ᠨᠢ ᠪᠣᠰᠣᠭᠰᠠᠭᠠᠷ ᠥᠪᠡᠷ ᠢᠶᠡᠨ ᠴᠤ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠤ ᠳᠤ ᠦᠷ᠎ᠡ ᠰᠣᠶᠣᠭᠠᠯᠠᠨ ᠤᠷᠭᠤᠬᠤ ᠲᠠᠢ ᠠᠳᠠᠯᠢ ᠶᠤᠮ᠃ 28 ᠭᠠᠵᠠᠷ ᠥᠪᠡᠷ ᠢᠶᠡᠨ ᠲᠠᠷᠢᠶ᠎ᠠ ᠤᠷᠭᠤᠭᠤᠯᠬᠤ ᠳᠠᠭᠠᠨ᠂ ᠡᠬᠢᠯᠡᠭᠡᠳ ᠰᠣᠶᠣᠭ᠎ᠠ ᠶᠢ᠂ ᠳᠠᠷᠠᠭ᠎ᠠ ᠨᠢ ᠲᠦᠷᠦᠭᠦᠦ ᠶᠢ᠂ ᠡᠴᠦᠰ ᠲᠤᠨᠢ ᠲᠦᠷᠦᠭᠦᠦ ᠡᠴᠡ ᠪᠣᠯᠪᠠᠰᠤᠷᠠᠭᠰᠠᠨ ᠲᠠᠷᠢᠶ᠎ᠠ ᠶᠢ ᠪᠤᠢ ᠪᠣᠯᠭᠠᠳᠠᠭ᠃ 29 ᠬᠤᠷᠢᠶᠠᠯᠲᠠ ᠶᠢᠨ ᠴᠠᠭ ᠪᠣᠯᠣᠭᠰᠠᠨ ᠲᠤᠯᠠ ᠦᠷ᠎ᠡ ᠪᠣᠯᠪᠠᠰᠤᠷᠠᠮᠠᠭᠴᠠ ᠬᠥᠮᠦᠨ ᠬᠠᠳᠤᠭᠤᠷ ᠢᠶᠠᠷ ᠬᠠᠳᠤᠨ᠎ᠠ》 ᠭᠡᠪᠡ᠃
 ᠭᠠᠢᠮᠤ ᠶᠢᠨ ᠦᠷ᠎ᠡ ᠶᠢᠨ ᠦᠯᠢᠭᠡᠷᠯᠡᠯ

30 ᠢᠰᠦ᠋ᠰ᠄ 《ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠪᠢᠳᠡ ᠶᠠᠭᠤ ᠲᠠᠢ ᠠᠳᠠᠯᠢᠳᠬᠠᠵᠤ᠂ ᠶᠠᠮᠠᠷ ᠦᠯᠢᠭᠡᠷᠯᠡᠯ ᠢᠶᠡᠷ ᠢᠯᠡᠳᠬᠡᠬᠦ ᠪᠢᠯᠡ︖ 31 ᠲᠡᠷᠡ ᠪᠣᠯ ᠭᠠᠢᠮᠤ ᠶᠢᠨ ᠦᠷ᠎ᠡ ᠲᠠᠢ ᠠᠳᠠᠯᠢ ᠶᠤᠮ᠃ ᠭᠠᠵᠠᠷ ᠲᠤ ᠰᠠᠭᠤᠯᠭᠠᠬᠤ ᠦᠶ᠎ᠡ ᠳᠦ ᠭᠠᠵᠠᠷ ᠳᠡᠭᠡᠷᠡᠬᠢ ᠶᠠᠮᠠᠷ ᠴᠤ ᠦᠷ᠎ᠡ ᠡᠴᠡ ᠵᠢᠵᠢᠭᠬᠡᠨ ᠪᠣᠯᠪᠠᠴᠤ 32 ᠰᠠᠭᠤᠯᠭᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠥᠰᠳᠡᠭ ᠪᠥᠭᠡᠳ ᠠᠯᠢᠪᠠ ᠨᠣᠭᠣᠭ᠎ᠠ ᠠᠴᠠ ᠢᠯᠡᠭᠦᠦ ᠤᠷᠭᠤᠵᠤ᠂ ᠲᠣᠮᠣ ᠰᠠᠯᠠᠭ᠎ᠠ ᠭᠠᠷᠤᠭᠠᠳ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ ᠰᠡᠭᠦᠳᠡᠷ ᠲᠤᠨᠢ ᠡᠭᠦᠷ ᠢᠶᠡᠨ ᠵᠠᠰᠠᠳᠠᠭ》 ᠭᠡᠵᠦ ᠬᠡᠯᠡᠪᠡ᠃

33 ᠢᠰᠦ᠋ᠰ ᠡᠢᠮᠦᠷᠬᠦ ᠣᠯᠠᠨ ᠦᠯᠢᠭᠡᠷᠯᠡᠯ ᠢᠶᠡᠷ᠂ ᠲᠡᠳᠡᠨ ᠦ ᠣᠢᠯᠠᠭᠠᠬᠤ ᠴᠢᠨᠡᠭᠡ ᠪᠡᠷ ᠨᠢ ᠦᠭᠡ ᠶᠢ ᠵᠢᠭᠠᠳᠠᠭ ᠪᠥᠭᠡᠳ 34 ᠦᠯᠢᠭᠡᠷᠯᠡᠯ ᠦᠭᠡᠢ ᠪᠠᠷ ᠵᠢᠭᠠᠳᠠᠭ ᠦᠭᠡᠢ ᠪᠠᠢᠪᠠ᠃ ᠬᠠᠷᠢᠨ ᠱᠠᠪᠢ ᠨᠠᠷ ᠲᠠᠭᠠᠨ ᠪᠦᠭᠦᠳᠡ ᠶᠢ ᠲᠤᠰ ᠲᠤᠨᠢ ᠲᠠᠢᠯᠪᠤᠷᠢᠯᠠᠳᠠᠭ ᠪᠠᠢᠵᠠᠢ᠃
 ᠢᠰᠦ᠋ᠰ ᠨᠠᠭᠤᠷ ᠢ ᠨᠠᠮᠳᠠᠭᠠᠭᠰᠠᠨ ᠨᠢ

35 ᠲᠡᠷᠡ ᠡᠳᠦᠷ ᠦᠨ ᠣᠷᠣᠢ ᠪᠣᠯᠬᠤ ᠳᠤ᠂ ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠨᠠᠭᠤᠷ ᠤᠨ ᠨᠥᠭᠥᠭᠡ ᠲᠠᠯ᠎ᠠ ᠳᠤ ᠣᠴᠢᠵᠠᠭᠠᠶ᠎ᠠ》 ᠭᠡᠪᠡ᠃ 36 ᠲᠡᠳᠡ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠢ ᠣᠷᠬᠢᠨ ᠢᠰᠦ᠋ᠰ ᠢ ᠵᠠᠪᠢ ᠳᠡᠭᠡᠷ᠎ᠡ ᠪᠠᠢᠭᠰᠠᠨ ᠴᠢᠭ ᠢᠶᠠᠷ ᠨᠢ ᠠᠪᠴᠤ ᠶᠠᠪᠤᠬᠤ ᠳᠤ᠂ ᠥᠭᠡᠷ᠎ᠡ ᠵᠠᠪᠢ ᠨᠤᠭᠤᠳ ᠲᠡᠭᠦᠨ ᠢ ᠳᠠᠭᠠᠪᠠ᠃ 37 ᠠᠰᠤᠷᠤ ᠳᠣᠭᠰᠢᠨ ᠰᠠᠯᠬᠢ ᠡᠭᠦᠰᠴᠦ ᠳᠠᠪᠠᠯᠭᠠᠨ ᠵᠠᠪᠢ ᠶᠢ ᠨᠥᠮᠥᠷᠥᠨ ᠢᠷᠡᠵᠦ ᠵᠠᠪᠢ ᠤᠰᠤᠨ ᠳᠤ ᠠᠪᠲᠠᠵᠠᠢ᠃ 38 ᠢᠰᠦ᠋ᠰ ᠵᠠᠪᠢᠨ ᠤ ᠬᠢᠲᠦᠭᠡ ᠳᠦ ᠳᠡᠷ᠎ᠡ ᠳᠡᠷᠡᠯᠡᠭᠡᠳ ᠤᠨᠲᠠᠵᠤ ᠪᠠᠢᠯ᠎ᠠ᠃ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠢ ᠰᠡᠷᠢᠭᠡᠵᠦ᠄ 《ᠪᠠᠭᠰᠢ ᠡ᠂ ᠪᠢᠳᠡᠨ ᠦ ᠦᠬᠦᠬᠦ ᠶᠢ ᠬᠠᠢᠬᠤᠷᠬᠤ ᠦᠭᠡᠢ ᠶᠤᠮ ᠤᠤ︖》 ᠭᠡᠯ᠎ᠡ᠃ 39 ᠢᠰᠦ᠋ᠰ ᠰᠡᠷᠢᠭᠡᠳ ᠰᠠᠯᠬᠢ ᠶᠢ ᠵᠢᠮᠡᠯᠡᠨ᠂ ᠨᠠᠭᠤᠷ ᠲᠤ᠄ 《ᠴᠢᠮᠡᠭᠡ ᠦᠭᠡᠢ ᠪᠠᠢ︕ ᠨᠠᠮᠳᠠ︕》 ᠭᠡᠬᠦ ᠳᠦ᠂ ᠰᠠᠯᠬᠢ ᠵᠣᠭᠰᠣᠵᠤ ᠶᠡᠬᠡᠳᠡ ᠨᠠᠮ ᠭᠦᠮ ᠪᠣᠯᠪᠠ᠃ 40 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠶᠠᠭᠤᠨ ᠳᠤ ᠠᠶᠤᠨ᠎ᠠ ᠪᠤᠢ︖ ᠲᠠ ᠨᠠᠷ ᠲᠤ ᠢᠲᠡᠭᠡᠯ ᠦᠭᠡᠢ ᠪᠠᠢᠭᠰᠠᠭᠠᠷ ᠤᠤ︖》 ᠭᠡᠪᠡ᠃ 41 ᠲᠡᠳᠡ ᠮᠠᠰᠢ ᠶᠡᠬᠡ ᠡᠮᠢᠶᠡᠵᠦ᠂ ᠪᠡᠶ᠎ᠡ ᠪᠡᠶ᠎ᠡ ᠳᠡᠭᠡᠨ᠄ 《ᠡᠨᠡ ᠬᠡᠨ ᠪᠣᠯᠴᠢᠬᠠᠪᠠ︖ ᠰᠠᠯᠬᠢ ᠪᠣᠯᠣᠨ ᠨᠠᠭᠤᠷ ᠬᠦᠷᠲᠡᠯ᠎ᠡ ᠲᠡᠭᠦᠨ ᠦ ᠦᠭᠡᠨ ᠳᠦ ᠣᠷᠣᠵᠤ ᠪᠠᠢᠨ᠎ᠠ》 ᠭᠡᠵᠡᠭᠡᠵᠦ ᠪᠠᠢᠯ᠎ᠠ᠃