ᠮᠠᠷᠺ ᠵᠢᠷᠭᠤᠭᠠ
ᠨᠤᠲᠤᠭ ᠲᠠᠭᠠᠨ ᠵᠢᠭᠠᠭᠰᠠᠨ ᠨᠢ
1 ᠢᠰᠦ᠋ᠰ ᠲᠡᠨᠳᠡ ᠡᠴᠡ ᠰᠠᠯᠵᠤ ᠨᠤᠲᠤᠭ ᠲᠠᠭᠠᠨ ᠣᠴᠢᠪᠠ᠃ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠢ ᠳᠠᠭᠠᠵᠤ ᠪᠠᠢᠯᠠ᠃ 2 ᠠᠮᠠᠷᠠᠯ ᠤᠨ ᠡᠳᠦᠷ ᠪᠣᠯᠬᠤ ᠳᠤ᠂ ᠢᠰᠦ᠋ᠰ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠰᠤᠷᠭᠠᠵᠤ ᠡᠬᠢᠯᠡᠭᠰᠡᠨ ᠳᠦ᠂ ᠣᠯᠠᠨ ᠬᠥᠮᠦᠨ ᠰᠣᠨᠣᠰᠣᠭᠠᠳ ᠴᠣᠴᠢᠷᠳᠠᠨ᠄ 《ᠡᠨᠡ ᠬᠥᠮᠦᠨ ᠡᠳᠡᠭᠡᠷ ᠢ ᠬᠠᠮᠢᠭᠠ ᠠᠴᠠ ᠣᠯᠣᠭᠰᠠᠨ ᠪᠣᠯ︖ ᠲᠡᠭᠦᠨ ᠳᠦ ᠥᠭᠭᠥᠭᠳᠡᠭᠰᠡᠨ ᠮᠡᠷᠭᠡᠨ ᠤᠬᠠᠭᠠᠨ᠂ ᠲᠡᠭᠦᠨ ᠦ ᠭᠠᠷ ᠢᠶᠠᠷ ᠪᠦᠲᠦᠭᠡᠭᠳᠡᠭᠰᠡᠨ ᠡᠳᠡᠭᠡᠷ ᠬᠦᠴᠦᠲᠦ ᠦᠢᠯᠡᠰ ᠨᠢ ᠶᠠᠭᠤ ᠶᠤᠮ ᠪᠤᠢ︖ 3 ᠡᠨᠡ ᠴᠢᠨᠢ ᠮᠣᠳᠣᠴᠢᠨ ᠪᠢᠰᠢ ᠤᠤ︖ ᠮᠠᠷᠢᠶᠠ ᠶᠢᠨ ᠬᠦᠦ ᠪᠥᠭᠡᠳ ᠶᠠᠺᠣᠪ᠂ ᠶᠣᠰᠧ᠂ ᠶᠦᠳᠠ᠂ ᠰᠢᠮᠣᠨ ᠨᠠᠷ ᠤᠨ ᠠᠬᠠ ᠪᠢᠰᠢ ᠤᠤ︖ ᠥᠬᠢᠨ ᠳᠡᠭᠦᠦ ᠨᠠᠷ ᠨᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠡ᠊ᠨᠳᠡ ᠪᠠᠢᠭᠠ ᠪᠢᠰᠢ ᠤᠤ︖》 ᠭᠡᠵᠡᠭᠡᠵᠦ ᠢᠰᠦ᠋ᠰ ᠲᠤ ᠳᠤᠷᠠ ᠦᠭᠡᠶᠢᠴᠡᠵᠦ ᠪᠠᠢᠯᠠ᠃ 4 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠡᠰᠢ ᠦᠵᠡᠭᠦᠯᠦᠭᠴᠢ ᠨᠤᠲᠤᠭ ᠲᠠᠭᠠᠨ᠂ ᠲᠥᠷᠥᠯ ᠰᠠᠳᠤᠨ ᠳᠠᠭᠠᠨ᠂ ᠭᠡᠷ ᠣᠷᠣᠨ ᠳᠠᠭᠠᠨ ᠬᠦᠨᠳᠦᠯᠡᠭᠳᠡᠬᠦ ᠦᠭᠡᠢ ᠪᠠᠢᠳᠠᠭ》 ᠭᠡᠵᠦ ᠬᠡᠯᠡᠪᠡ᠃ 5 ᠢᠰᠦ᠋ᠰ ᠲᠡᠨᠳᠡ ᠴᠥᠭᠡᠨ ᠡᠪᠡᠳᠴᠢᠲᠡᠨ ᠳᠡᠭᠡᠷᠡ ᠯᠠ ᠮᠤᠲᠤᠷ ᠢᠶᠠᠨ ᠲᠠᠯᠪᠢᠵᠤ ᠡᠳᠡᠭᠡᠭᠡᠭᠰᠡᠨ ᠡᠴᠡ ᠥᠭᠡᠷᠡ ᠬᠦᠴᠦᠲᠦ ᠦᠢᠯᠡᠰ ᠦᠢᠯᠡᠳᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠪᠥᠭᠡᠳ 6 ᠲᠡᠳᠡᠨ ᠦ ᠢᠲᠡᠭᠡᠯ ᠦᠭᠡᠢ ᠳᠦ ᠭᠠᠢᠬᠠᠵᠤ ᠪᠠᠢᠯᠠ᠃
ᠠᠷᠪᠠᠨ ᠬᠣᠶᠠᠷ ᠢᠶᠠᠨ ᠢᠯᠡᠭᠡᠭᠰᠡᠨ ᠨᠢ
7 ᠲᠡᠷᠡ ᠠᠷᠪᠠᠨ ᠬᠣᠶᠠᠷ ᠢᠶᠠᠨ ᠬᠠᠵᠠᠭᠤ ᠳᠠᠭᠠᠨ ᠳᠠᠭᠤᠳᠠᠵᠤ ᠪᠤᠵᠠᠷ ᠴᠢᠳᠬᠥᠷ ᠤᠳ ᠢ ᠡᠷᠬᠡᠰᠢᠶᠡᠬᠦ ᠡᠷᠬᠡ ᠮᠡᠳᠡᠯ ᠥᠭᠭᠥᠭᠡᠳ ᠬᠣᠶᠠᠷ ᠬᠣᠶᠠᠷ ᠢᠶᠠᠷ ᠢᠯᠡᠭᠡᠵᠦ ᠡᠬᠢᠯᠡᠪᠡ᠃ 8 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠵᠠᠮ ᠳᠠᠭᠠᠨ ᠲᠠᠶᠠᠭ ᠠᠴᠠ ᠥᠭᠡᠷᠡ ᠶᠠᠭᠤ ᠴᠤ ᠪᠦᠦ ᠠᠪ᠂ ᠬᠦᠨᠡᠰᠦ᠂ ᠪᠣᠭᠴᠣ᠂ ᠲᠦᠷᠡᠢᠪᠴᠢᠨ ᠳᠡᠭᠡᠨ ᠵᠣᠭᠣᠰ ᠴᠤ ᠪᠦᠦ ᠠᠪ᠂ 9 ᠱᠠᠬᠠᠢ ᠪᠠᠨ ᠡᠮᠦᠰ᠂ ᠢᠯᠡᠭᠦᠦ ᠬᠤᠪᠴᠠᠰᠤ ᠪᠦᠦ ᠠᠪ》 ᠭᠡᠵᠦ ᠵᠠᠬᠢᠵᠠᠢ᠃ 10 ᠢᠰᠦ᠋ᠰ ᠪᠠᠰᠠ᠄ 《ᠲᠠ ᠨᠠᠷ ᠬᠠᠮᠢᠭᠠ ᠬᠦᠷᠦᠭᠰᠡᠨ ᠴᠤ ᠶᠠᠮᠠᠷ ᠠᠢᠯ ᠳᠤ ᠣᠷᠣᠪᠠᠯ᠂ ᠲᠡᠷᠡ ᠲᠣᠰᠬᠣᠨ ᠠᠴᠠ ᠶᠠᠪᠤᠲᠠᠯᠠ ᠪᠠᠨ ᠲᠡᠨᠳᠡ ᠪᠠᠢᠭᠠᠷᠠᠢ᠃ 11 ᠶᠠᠮᠠᠷ ᠭᠠᠵᠠᠷ ᠤᠨ ᠬᠢᠨ ᠲᠠ ᠨᠠᠷ ᠢ ᠬᠦᠯᠢᠶᠡᠵᠦ ᠠᠪᠬᠤ ᠦᠭᠡᠢ᠂ ᠦᠭᠡ ᠶᠢ ᠴᠢᠨᠢ ᠣᠢᠰᠢᠶᠠᠬᠤ ᠦᠭᠡᠢ ᠪᠠᠢᠪᠠᠯ ᠲᠡᠨᠳᠡ ᠡᠴᠡ ᠶᠠᠪᠤᠬᠤ ᠳᠠᠭᠠᠨ ᠬᠥᠯ ᠦᠨ ᠢᠶᠠᠨ ᠲᠣᠭᠣᠰᠣ ᠶᠢ ᠭᠦᠪᠢᠵᠦ ᠲᠡᠳᠡᠨ ᠳᠦ ᠭᠡᠷᠡᠴᠢᠯᠡᠯ ᠪᠣᠯᠭᠠ》 ᠭᠡᠪᠡ᠃ 12 ᠱᠠᠪᠢ ᠨᠠᠷ ᠨᠢ ᠶᠠᠪᠤᠵᠤ᠄ 《ᠭᠡᠮᠰᠢᠵᠡᠭᠡ》 ᠭᠡᠵᠦ ᠲᠤᠩ᠋ᠬᠠᠭᠯᠠᠭᠰᠠᠨ ᠪᠥᠭᠡᠳ 13 ᠪᠠᠰᠠ ᠣᠯᠠᠨ ᠴᠢᠳᠬᠥᠷ ᠢ ᠬᠥᠭᠡᠭᠡᠵᠦ᠂ ᠣᠯᠠᠨ ᠡᠪᠡᠳᠴᠢᠲᠡᠨ ᠢ ᠲᠣᠰᠣᠯᠠᠨ ᠡᠳᠡᠭᠡᠭᠡᠵᠦ ᠪᠠᠢᠯᠠ᠃
ᠶᠣᠬᠠᠨ ᠴᠠᠭᠠᠵᠠᠯᠠᠭᠳᠠᠭᠰᠠᠨ ᠨᠢ
14 ᠢᠰᠦ᠋ᠰ ᠤᠨ ᠨᠡᠷᠡ ᠳᠠᠭᠤᠷᠢᠰᠤᠭᠠᠳ ᠾᠧᠷᠣᠳ᠋ ᠬᠠᠨ ᠤ ᠰᠣᠨᠣᠷ ᠲᠤ ᠬᠦᠷᠪᠡ᠃ ᠵᠠᠷᠢᠮ ᠬᠥᠮᠦᠨ᠄ 《ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠰᠠᠨ᠃ ᠡᠢᠮᠦ ᠡᠴᠡ ᠲᠡᠢᠮᠦ ᠬᠦᠴᠦ ᠲᠡᠭᠦᠨ ᠦ ᠳᠣᠲᠣᠷᠠ ᠠᠵᠢᠯᠯᠠᠵᠤ ᠪᠠᠢᠨᠠ》 ᠭᠡᠵᠦ᠂ 15 ᠵᠠᠷᠢᠮ ᠨᠢ᠄ 《ᠲᠡᠷᠡ ᠪᠣᠯ ᠧᠯᠢᠶᠠ》 ᠭᠡᠵᠦ᠂ ᠵᠠᠷᠢᠮ ᠨᠢ᠄ 《ᠡᠷᠲᠡᠨ ᠦ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠢᠭᠡ ᠲᠠᠢ ᠨᠢ ᠠᠳᠠᠯᠢ ᠡᠰᠢ ᠦᠵᠡᠭᠦᠯᠦᠭᠴᠢ》 ᠭᠡᠵᠦ ᠪᠠᠢᠯᠠ᠃ 16 ᠬᠠᠷᠢᠨ ᠾᠧᠷᠣᠳ᠋ ᠡᠳᠡᠭᠡᠷ ᠢ ᠳᠤᠭᠤᠯᠤᠭᠠᠳ᠄ 《ᠮᠢᠨᠦ ᠴᠠᠪᠴᠢᠵᠤ ᠠᠯᠠᠭᠰᠠᠨ ᠶᠣᠬᠠᠨ ᠮᠥᠨ᠂ ᠲᠡᠷᠡ ᠠᠮᠢᠯᠠᠵᠠᠢ》 ᠭᠡᠪᠡ᠃
17 ᠤᠤᠯ ᠨᠢ ᠾᠧᠷᠣᠳ᠋ ᠬᠥᠮᠦᠰ ᠢ ᠶᠠᠪᠤᠭᠤᠯᠤᠨ ᠶᠣᠬᠠᠨ ᠢ ᠪᠠᠷᠢᠭᠤᠯᠵᠤ ᠬᠦᠯᠢᠭᠡᠳ ᠭᠢᠨᠳᠠᠨ ᠳᠤ ᠬᠣᠷᠢᠭᠤᠯᠤᠭᠰᠠᠨ ᠪᠠᠢᠯᠠ᠂ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠾᠧᠷᠣᠳ᠋ ᠳᠡᠭᠦᠦ ᠹᠢᠯᠢᠫ ᠤᠨ ᠢᠶᠠᠨ ᠡᠬᠡᠨᠡᠷ ᠾᠧᠷᠣᠳᠢᠶᠠ ᠲᠠᠢ ᠭᠡᠷᠯᠡᠭᠰᠡᠨ ᠳᠦ᠂ 18 ᠶᠣᠬᠠᠨ᠄ 《ᠳᠡᠭᠦᠦ ᠶᠢᠨ ᠢᠶᠠᠨ ᠡᠬᠡᠨᠡᠷ ᠢ ᠠᠪᠬᠤ ᠴᠢᠨᠢ ᠶᠣᠰᠣ ᠪᠤᠰᠤ ᠬᠡᠷᠡᠭ》 ᠭᠡᠵᠦ ᠬᠡᠯᠡᠳᠡᠭ ᠪᠠᠢᠪᠠ᠃ 19 ᠾᠧᠷᠣᠳᠢᠶᠠ ᠶᠣᠬᠠᠨ ᠢ ᠵᠠᠨᠤᠵᠤ᠂ ᠠᠯᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ 20 ᠤᠴᠢᠷ ᠨᠢ᠂ ᠾᠧᠷᠣᠳ᠋ ᠶᠣᠬᠠᠨ ᠢ ᠵᠥᠪᠲᠦ᠂ ᠠᠷᠢᠭᠤᠨ ᠬᠥᠮᠦᠨ ᠭᠡᠵᠦ ᠦᠵᠡᠭᠡᠳ ᠲᠡᠭᠦᠨ ᠡᠴᠡ ᠡᠮᠢᠶᠡᠵᠦ ᠲᠡᠭᠦᠨ ᠢ ᠬᠠᠮᠠᠭᠠᠯᠠᠳᠠᠭ ᠪᠠᠢᠪᠠ᠃ ᠾᠧᠷᠣᠳ᠋ ᠶᠣᠬᠠᠨ ᠤ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠲᠡᠭᠡᠨᠡᠭᠡᠯᠵᠡᠳᠡᠭ᠌ ᠪᠣᠯᠪᠠᠴᠤ ᠳᠤᠷᠠᠲᠠᠶᠠ ᠰᠣᠨᠣᠰᠴᠤ ᠪᠠᠢᠯᠠ᠃ 21 ᠲᠡᠭᠡᠵᠦ ᠪᠠᠢᠲᠠᠯᠠ ᠵᠠᠪᠰᠢᠶᠠᠨ ᠪᠣᠯᠵᠠᠢ᠃ ᠾᠧᠷᠣᠳ᠋ ᠲᠥᠷᠥᠭᠰᠡᠨ ᠡᠳᠦᠷ ᠦᠨ ᠪᠠᠶᠠᠷ ᠲᠠᠭᠠᠨ ᠨᠣᠶᠠᠳ ᠲᠦᠰᠢᠮᠡᠳ᠂ ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠨᠠᠷ ᠪᠣᠯᠣᠨ ᠭᠠᠯᠢᠯᠠᠶᠠ ᠶᠢᠨ ᠲᠣᠯᠣᠭᠠᠢᠯᠠᠭᠴᠢᠳ ᠢ ᠤᠷᠢᠵᠦ ᠳᠠᠢᠯᠠᠯᠭᠠ ᠬᠢᠬᠦ ᠳᠦ᠂ 22 ᠾᠧᠷᠣᠳᠢᠶᠠ ᠶᠢᠨ ᠥᠬᠢᠨ ᠣᠷᠣᠵᠤ ᠢᠷᠡᠨ ᠪᠥᠵᠢᠭᠯᠡᠭᠡᠳ ᠾᠧᠷᠣᠳ᠋ ᠪᠣᠯᠣᠨ ᠵᠣᠴᠢᠳ ᠢ ᠨᠢ ᠪᠠᠶᠠᠷᠯᠠᠭᠤᠯᠪᠠ᠃ ᠬᠠᠨ ᠥᠬᠢᠨ ᠳᠤ᠄ 《ᠴᠢ ᠶᠠᠭᠤ ᠬᠦᠰᠡᠭᠰᠡᠨ ᠢᠶᠡᠨ ᠨᠠᠳᠠ ᠠᠴᠠ ᠭᠤᠶᠤ᠂ ᠪᠢ ᠴᠢᠮᠠ ᠳᠤ ᠥᠭᠭᠥᠶᠡ》 ᠭᠡᠪᠡ᠃ 23 ᠪᠠᠰᠠ ᠲᠡᠭᠦᠨ ᠳᠦ ᠪᠠᠲᠤᠲᠠᠢ ᠲᠠᠩ᠋ᠭᠠᠷᠢᠭᠯᠠᠨ᠄ 《ᠴᠢ ᠨᠠᠳᠠ ᠠᠴᠠ ᠶᠠᠭᠤ ᠬᠦᠰᠡᠭᠰᠡᠨ ᠴᠤ ᠴᠢᠮᠠ ᠳᠤ ᠥᠭᠭᠥᠶᠡ᠂ ᠤᠯᠤᠰ ᠤᠨ ᠢᠶᠠᠨ ᠬᠠᠭᠠᠰ ᠢ ᠴᠤ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠪᠡ᠃ 24 ᠥᠬᠢᠨ ᠭᠠᠷᠴᠤ ᠡᠬᠡ ᠡᠴᠡ ᠪᠡᠨ᠄ 《ᠪᠢ ᠶᠠᠭᠤ ᠭᠤᠶᠤᠬᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠡᠬᠡ ᠨᠢ᠄ 《ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠤ ᠲᠣᠯᠣᠭᠠᠢ ᠶᠢ ᠭᠤᠶᠤᠭᠲᠤᠨ》 ᠭᠡᠵᠡᠢ᠃ 25 ᠥᠬᠢᠨ ᠬᠠᠨ ᠤ ᠡᠮᠦᠨᠡ ᠱᠠᠯᠠᠪᠬᠠᠨ ᠬᠦᠷᠴᠦ᠄ 《ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠤ ᠲᠣᠯᠣᠭᠠᠢ ᠶᠢ ᠲᠠᠪᠠᠭᠯᠠᠵᠤ ᠨᠠᠳᠠ ᠳᠤ ᠬᠤᠷᠳᠤᠬᠠᠨ ᠥᠭᠬᠦ ᠶᠢ ᠬᠦᠰᠡᠵᠦ ᠪᠠᠢᠨᠠ》 ᠭᠡᠵᠦ ᠭᠤᠶᠤᠪᠠ᠃ 26 ᠬᠠᠨ ᠮᠠᠰᠢ ᠵᠣᠪᠠᠨᠢᠭᠰᠠᠨ ᠪᠣᠯᠪᠠᠴᠤ ᠥᠪᠡᠷ ᠢᠶᠡᠨ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠪᠥᠭᠡᠳ ᠵᠣᠴᠢᠳ ᠪᠠᠢᠭᠠ ᠪᠣᠯᠬᠣᠷ ᠲᠠᠲᠠᠭᠠᠯᠵᠠᠬᠤ ᠶᠢ ᠬᠦᠰᠡᠭᠰᠡᠨ ᠦᠭᠡᠢ᠃ 27 ᠬᠠᠨ ᠲᠡᠷᠡ ᠳᠠᠷᠤᠢ ᠶᠠᠷᠭᠠᠴᠢᠨ ᠢᠶᠠᠨ ᠶᠠᠪᠤᠭᠤᠯᠵᠤ ᠶᠣᠬᠠᠨ ᠤ ᠲᠣᠯᠣᠭᠠᠢ ᠶᠢ ᠠᠪᠴᠢᠷᠠᠬᠤ ᠶᠢ ᠲᠤᠰᠢᠶᠠᠭᠰᠠᠨ ᠳᠤ᠂ ᠴᠠᠭᠠᠲᠤᠬᠢ ᠨᠢ ᠭᠢᠨᠳᠠᠨ ᠳᠤ ᠣᠴᠢᠵᠤ ᠶᠣᠬᠠᠨ ᠤ ᠲᠣᠯᠣᠭᠠᠢ ᠶᠢ ᠴᠠᠪᠴᠢᠨ᠂ 28 ᠲᠠᠪᠠᠭᠯᠠᠵᠤ ᠠᠪᠴᠢᠷᠠᠭᠠᠳ ᠥᠬᠢᠨ ᠳᠤ ᠥᠭᠬᠦ ᠳᠦ᠂ ᠥᠬᠢᠨ ᠡᠬᠡ ᠳᠡᠭᠡᠨ ᠥᠭᠪᠡ᠃ 29 ᠶᠣᠬᠠᠨ ᠤ ᠱᠠᠪᠢ ᠨᠠᠷ ᠡᠭᠦᠨ ᠢ ᠳᠤᠭᠤᠯᠤᠭᠠᠳ ᠢᠷᠡᠵᠦ ᠱᠠᠷᠢᠯ ᠢ ᠨᠢ ᠠᠪᠠᠴᠢᠨ ᠪᠤᠯᠠᠰᠢᠨ ᠳᠤ ᠣᠷᠣᠰᠢᠭᠤᠯᠤᠭᠰᠠᠨ ᠪᠠᠢᠨᠠ᠃
ᠲᠠᠪᠤᠨ ᠮᠢᠩ᠋ᠭᠠ ᠶᠢ ᠬᠣᠭᠣᠯᠠᠯᠠᠭᠤᠯᠤᠭᠰᠠᠨ ᠨᠢ
30 ᠰᠢᠳᠠᠷ ᠱᠠᠪᠢ ᠨᠠᠷ ᠢᠰᠦ᠋ᠰ ᠤᠨ ᠳᠡᠷᠭᠡᠳᠡ ᠴᠤᠭᠯᠠᠷᠠᠭᠠᠳ ᠬᠢᠭᠰᠡᠨ ᠵᠢᠭᠠᠭᠰᠠᠨ ᠪᠦᠬᠦᠨ ᠢᠶᠡᠨ ᠲᠡᠭᠦᠨ ᠳᠦ ᠳᠤᠭᠤᠯᠭᠠᠯᠠ᠃ 31 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠠᠰ ᠲᠠᠭᠠᠨ ᠢᠷᠡᠭᠡᠳ᠂ ᠡᠵᠡᠭᠦᠢ ᠭᠠᠵᠠᠷ ᠲᠤ ᠲᠦᠷ ᠠᠮᠠᠷᠠᠭᠲᠤᠨ》 ᠭᠡᠵᠡᠢ᠃ ᠤᠴᠢᠷ ᠨᠢ᠂ ᠢᠷᠡᠵᠦ ᠶᠠᠪᠤᠬᠤ ᠬᠥᠮᠦᠨ ᠣᠯᠠᠨ ᠲᠤᠯᠠ ᠲᠡᠳᠡᠨ ᠳᠦ ᠬᠣᠭᠣᠯᠠ ᠢᠳᠡᠬᠦ ᠵᠠᠪ ᠴᠤ ᠪᠠᠢᠭᠰᠠᠨ ᠦᠭᠡᠢ᠃ 32 ᠡᠢᠨ ᠬᠦ ᠲᠡᠳᠡ ᠵᠠᠪᠢ ᠪᠠᠷ ᠡᠵᠡᠭᠦᠢ ᠭᠠᠵᠠᠷ ᠢ ᠴᠢᠭᠯᠡᠨ ᠠᠰ ᠳᠠᠭᠠᠨ ᠶᠠᠪᠤᠬᠤ ᠳᠤ᠂ 33 ᠲᠡᠳᠡᠨ ᠦ ᠶᠠᠪᠤᠵᠤ ᠪᠤᠢ ᠶᠢ ᠣᠯᠠᠨ ᠬᠥᠮᠦᠨ ᠮᠡᠳᠡᠭᠰᠡᠨ ᠪᠥᠭᠡᠳ ᠬᠥᠮᠦᠰ ᠪᠦᠬᠦ ᠬᠣᠲᠠ ᠲᠣᠰᠬᠣᠨ ᠠᠴᠠ ᠭᠠᠷᠴᠤ᠂ ᠶᠠᠪᠠᠭᠠᠨ ᠢᠶᠠᠷ ᠭᠦᠶᠦᠯᠳᠦᠭᠰᠡᠭᠡᠷ ᠲᠡᠳᠡᠨ ᠡᠴᠡ ᠤᠷᠢᠳᠠᠪᠠᠷ ᠬᠦᠷᠪᠡ᠃ 34 ᠢᠰᠦ᠋ᠰ ᠪᠠᠭᠤᠵᠤ᠂ ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠢ ᠬᠠᠷᠠᠭᠰᠠᠨ ᠢᠶᠠᠨ ᠥᠷᠥᠪᠳᠥᠵᠡᠢ᠃ ᠤᠴᠢᠷ ᠨᠢ᠂ ᠲᠡᠳᠡ ᠬᠣᠨᠢᠴᠢᠨ ᠦᠭᠡᠢ ᠬᠣᠨᠢᠳ ᠮᠡᠲᠦ ᠪᠠᠢᠯᠠ᠃ ᠢᠰᠦ᠋ᠰ ᠲᠡᠳᠡᠨ ᠳᠦ ᠣᠯᠠᠨ ᠵᠦᠢᠯ ᠢ ᠵᠢᠭᠠᠵᠤ ᠡᠬᠢᠯᠡᠵᠡᠢ᠃ 35 ᠣᠷᠣᠢ ᠪᠣᠯᠬᠤ ᠳᠤ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠳᠦ ᠢᠷᠡᠵᠦ᠄ 《ᠡᠨᠡ ᠭᠠᠵᠠᠷ ᠵᠡᠯᠢᠭᠦᠳ ᠳᠡᠭᠡᠷᠡ ᠪᠡᠨ ᠣᠷᠣᠢ ᠴᠤ ᠪᠣᠯᠴᠢᠬᠠᠯᠠ᠃ 36 ᠲᠡᠳᠡᠨ ᠢ ᠲᠠᠷᠬᠠᠭᠠᠭᠠᠷᠠᠢ᠂ ᠲᠡᠳᠡ ᠣᠢᠷᠠ ᠬᠠᠪᠢ ᠶᠢᠨ ᠬᠥᠳᠡᠭᠡ ᠭᠠᠴᠠᠭᠠ ᠪᠠᠷ ᠶᠠᠪᠤᠵᠤ ᠢᠳᠡᠬᠦ ᠶᠠᠭᠤᠮᠠ ᠪᠠᠨ ᠬᠤᠳᠠᠯᠳᠤᠨ ᠠᠪᠤᠭ》 ᠭᠡᠪᠡ᠃ 37 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠨᠠᠷ ᠲᠡᠳᠡᠨ ᠳᠦ ᠢᠳᠡᠬᠦ ᠶᠠᠭᠤᠮᠠ ᠥᠭ》 ᠭᠡᠬᠦ ᠳᠦ᠂ ᠱᠠᠪᠢ ᠨᠠᠷ ᠨᠢ᠄ 《ᠪᠢᠳᠡ ᠶᠠᠪᠤᠵᠤ ᠬᠣᠶᠠᠷ ᠵᠠᠭᠤᠨ ᠳ᠋ᠧᠨᠠᠷ 4 ᠢᠶᠠᠷ ᠪᠣᠣᠪᠣ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ ᠲᠡᠳᠡᠨ ᠳᠦ ᠢᠳᠡᠭᠦᠯᠬᠦ ᠭᠡᠵᠢ ᠤᠤ︖》 ᠭᠡᠪᠡ᠃ 38 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠲᠤ ᠬᠡᠳᠦᠨ ᠪᠣᠣᠪᠣ ᠪᠠᠢᠨᠠ ᠪᠤᠢ︖ ᠣᠴᠢᠵᠤ ᠦᠵᠡ》 ᠭᠡᠬᠦ ᠳᠦ᠂ ᠲᠡᠳᠡ ᠦᠵᠡᠵᠦ ᠢᠷᠡᠭᠡᠳ᠄ 《ᠲᠠᠪᠤ ᠪᠠᠢᠨᠠ᠂ ᠪᠠᠰᠠ ᠬᠣᠶᠠᠷ ᠵᠢᠭᠠᠰᠤ ᠪᠠᠢᠨᠠ》 ᠭᠡᠯᠡ᠃ 39 ᠢᠰᠦ᠋ᠰ ᠪᠦᠬᠦ ᠬᠥᠮᠦᠨ ᠢ ᠨᠣᠭᠣᠭᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠪᠦᠯᠦᠭ ᠪᠦᠯᠦᠭ ᠢᠶᠡᠷ ᠨᠢ ᠰᠠᠭᠤᠯᠭᠠᠬᠤ ᠶᠢ ᠱᠠᠪᠢ ᠨᠠᠷ ᠲᠠᠭᠠᠨ ᠵᠠᠬᠢᠭᠰᠠᠨ ᠳᠤ᠂ 40 ᠬᠥᠮᠦᠰ ᠵᠠᠭᠤ ᠵᠠᠭᠤ᠂ ᠲᠠᠪᠢ ᠲᠠᠪᠢ ᠪᠠᠷ ᠰᠠᠭᠤᠵᠠᠭᠠᠯᠠ᠃ 41 ᠢᠰᠦ᠋ᠰ ᠲᠠᠪᠤᠨ ᠪᠣᠣᠪᠣ᠂ ᠬᠣᠶᠠᠷ ᠵᠢᠭᠠᠰᠤ ᠶᠢ ᠠᠪᠴᠤ ᠲᠩᠷᠢ ᠥᠭᠡᠳᠡ ᠬᠠᠷᠠᠨ ᠢᠷᠥᠭᠡᠭᠡᠳ ᠪᠣᠣᠪᠣ ᠶᠢ ᠬᠠᠭᠠᠯᠪᠠ᠃ ᠲᠡᠷᠡ ᠱᠠᠪᠢ ᠨᠠᠷ ᠲᠠᠭᠠᠨ ᠥᠭᠴᠦ ᠪᠠᠢᠬᠤ ᠳᠤ᠂ ᠲᠡᠳᠡ ᠨᠠᠷ ᠨᠢ ᠬᠥᠮᠦᠰ ᠦᠨ ᠡᠮᠦᠨᠡ ᠲᠠᠯᠪᠢᠵᠤ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠬᠣᠶᠠᠷ ᠵᠢᠭᠠᠰᠤ ᠶᠢ ᠴᠤ ᠪᠦᠬᠦ ᠬᠥᠮᠦᠨ ᠳᠦ ᠬᠤᠪᠢᠶᠠᠨ ᠥᠭᠪᠡ᠃ 42 ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠳᠡᠵᠦ ᠴᠠᠳᠤᠭᠰᠠᠨ ᠪᠥᠭᠡᠳ 43 ᠪᠣᠣᠪᠣ ᠪᠠ ᠵᠢᠭᠠᠰᠤᠨ ᠤ ᠦᠯᠡᠳᠡᠪᠦᠷᠢ ᠶᠢ ᠴᠤᠭᠯᠠᠭᠤᠯᠬᠤ ᠳᠤ᠂ ᠠᠷᠪᠠᠨ ᠬᠣᠶᠠᠷ ᠰᠠᠭᠰᠤ ᠳᠦᠭᠦᠷᠴᠡᠢ᠃ 44 ᠪᠣᠣᠪᠣ ᠢᠳᠡᠭᠰᠡᠨ ᠡᠷᠡᠴᠦᠳ ᠲᠠᠪᠤᠨ ᠮᠢᠩ᠋ᠭᠠ ᠪᠠᠢᠭᠰᠠᠨ ᠶᠤᠮ᠃
ᠢᠰᠦ᠋ᠰ ᠤᠰᠤᠨ ᠳᠡᠭᠡᠷᠡ ᠠᠯᠬᠤᠭᠰᠠᠨ ᠨᠢ
45 ᠲᠡᠷᠡ ᠳᠠᠷᠤᠢ ᠢᠰᠦ᠋ᠰ ᠱᠠᠪᠢ ᠨᠠᠷ ᠢᠶᠠᠨ ᠰᠢᠪᠠᠳᠠᠨ ᠵᠠᠪᠢᠨ ᠳᠤ ᠰᠠᠭᠤᠯᠭᠠᠵᠤ ᠨᠠᠭᠤᠷ ᠤᠨ ᠨᠥᠭᠥᠭᠡ ᠲᠠᠯᠠ ᠳᠠᠬᠢ ᠪᠧᠲ᠋ᠰᠠᠢᠳᠠ ᠤᠷᠤᠭᠤ ᠶᠠᠪᠤᠭᠤᠯᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠵᠠᠪᠰᠠᠷ ᠥᠪᠡᠷ ᠢᠶᠡᠨ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠢ ᠲᠠᠷᠬᠠᠭᠠᠪᠠ᠃ 46 ᠲᠡᠳᠡᠨ ᠢ ᠶᠠᠪᠤᠭᠤᠯᠤᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠲᠡᠷᠡ ᠳᠠᠭᠠᠳᠬᠠᠬᠤ ᠪᠠᠷ ᠠᠭᠤᠯᠠ ᠥᠭᠡᠳᠡ ᠶᠠᠪᠤᠭᠰᠠᠨ ᠪᠠᠢᠨᠠ᠃
47 ᠣᠷᠣᠢ ᠪᠣᠯᠬᠤ ᠳᠤ ᠵᠠᠪᠢ ᠨᠢ ᠨᠠᠭᠤᠷ ᠤᠨ ᠳᠤᠮᠳᠠ᠂ ᠢᠰᠦ᠋ᠰ ᠬᠠᠷᠢᠨ ᠭᠠᠭᠴᠠᠭᠠᠷ ᠢᠶᠠᠨ ᠬᠠᠭᠤᠷᠠᠢ ᠳᠡᠭᠡᠷᠡ ᠪᠠᠢᠪᠠ᠃ 48 ᠢᠰᠦ᠋ᠰ ᠱᠠᠪᠢ ᠨᠠᠷ ᠤᠨ ᠢᠶᠠᠨ ᠰᠠᠯᠬᠢ ᠰᠥᠷᠥᠨ ᠬᠦᠴᠢᠷᠳᠡᠨ ᠰᠡᠯᠢᠭᠦᠷᠳᠡᠵᠦ ᠪᠠᠢᠭᠠ ᠶᠢ ᠦᠵᠡᠪᠡ᠃ ᠲᠡᠷᠡ ᠪᠡᠷ ᠦᠷ ᠢᠶᠡᠷ ᠲᠡᠳᠡᠨ ᠢ ᠵᠦᠭᠯᠡᠨ ᠨᠠᠭᠤᠷ ᠤᠨ ᠳᠡᠭᠡᠭᠦᠷ ᠠᠯᠬᠤᠨ ᠢᠷᠡᠭᠡᠳ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠶᠡ ᠭᠡᠵᠦ ᠪᠠᠢᠲᠠᠯᠠ᠂ 49 ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠦ ᠨᠠᠭᠤᠷ ᠳᠡᠭᠡᠭᠦᠷ ᠠᠯᠬᠤᠬᠤ ᠶᠢ ᠬᠠᠷᠠᠭᠰᠠᠨ ᠢᠶᠠᠨ ᠠᠯᠪᠢᠨ ᠭᠡᠵᠦ ᠪᠣᠳᠣᠭᠠᠳ ᠬᠠᠰᠬᠢᠷᠤᠯᠳᠤᠪᠠ᠃ 50 ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠭᠦᠨ ᠢ ᠬᠠᠷᠠᠭᠠᠳ ᠪᠠᠯᠠᠮᠠᠭᠳᠠᠵᠠᠢ᠃ ᠢᠰᠦ᠋ᠰ ᠲᠡᠷᠡ ᠳᠠᠷᠤᠢ ᠲᠡᠳᠡᠨ ᠳᠦ᠄ 《ᠵᠣᠷᠢᠭᠲᠠᠢ ᠪᠠᠢ᠂ ᠪᠢ ᠪᠠᠢᠨᠠ᠂ ᠪᠦᠦ ᠠᠶᠤ》 ᠭᠡᠵᠦ ᠬᠡᠯᠡᠪᠡ᠃ 51 ᠢᠰᠦ᠋ᠰ ᠲᠡᠳᠡᠨ ᠦ ᠪᠠᠢᠭᠠ ᠵᠠᠪᠢᠨ ᠳᠤ ᠭᠠᠷᠬᠤ ᠳᠤ ᠰᠠᠯᠬᠢ ᠵᠣᠭᠰᠣᠵᠠᠢ᠃ ᠱᠠᠪᠢ ᠨᠠᠷ ᠨᠢ ᠲᠤᠢᠯ ᠢᠶᠠᠷ ᠭᠠᠢᠬᠠᠵᠤ ᠪᠠᠢᠯᠠ᠃ 52 ᠲᠡᠳᠡ ᠪᠣᠣᠪᠣ ᠶᠢᠨ ᠶᠠᠪᠤᠳᠠᠯ ᠢ ᠤᠬᠠᠭᠰᠠᠨ ᠦᠭᠡᠢ᠂ ᠤᠤᠯ ᠨᠢ ᠲᠡᠳᠡᠨ ᠦ ᠤᠬᠠᠭᠠᠨ ᠮᠣᠬᠣᠭᠰᠠᠨ ᠪᠠᠢᠵᠠᠢ᠃
ᠭᠧᠨᠧᠰᠠᠷᠧᠲ ᠲᠤ ᠡᠳᠡᠭᠡᠭᠡᠭᠰᠡᠨ ᠨᠢ
53 ᠲᠡᠳᠡ ᠭᠠᠲᠤᠯᠤᠭᠠᠳ ᠭᠧᠨᠧᠰᠠᠷᠧᠲ ᠨᠤᠲᠤᠭ ᠲᠤ ᠬᠦᠷᠴᠦ ᠵᠠᠩ᠋ᠭᠤᠤ ᠪᠠᠨ ᠪᠠᠭᠤᠯᠭᠠᠪᠠ᠃ 54 ᠲᠡᠳᠡ ᠵᠠᠪᠢᠨ ᠠᠴᠠ ᠪᠠᠭᠤᠮᠠᠭᠴᠠ ᠬᠥᠮᠦᠰ ᠢᠰᠦ᠋ᠰ ᠢ ᠲᠠᠨᠢᠭᠠᠳ 55 ᠪᠦᠬᠦ ᠨᠤᠲᠤᠭ ᠢᠶᠠᠷ ᠢᠶᠠᠨ ᠭᠦᠶᠦᠯᠳᠦᠵᠦ᠂ ᠡᠪᠡᠳᠴᠢᠲᠡᠳ ᠢᠶᠡᠨ ᠳᠡᠪᠢᠰᠬᠡᠷ ᠲᠡᠢ ᠨᠢ ᠠᠪᠤᠭᠠᠳ ᠢᠰᠦ᠋ᠰ ᠬᠠᠮᠢᠭᠠ ᠪᠠᠢᠨᠠ ᠭᠡᠪᠡᠯ ᠲᠡᠰᠢ ᠣᠴᠢᠵᠤ ᠡᠬᠢᠯᠡᠯᠡ᠃ 56 ᠲᠡᠷᠡ ᠭᠠᠴᠠᠭᠠ᠂ ᠲᠣᠰᠬᠣᠨ᠂ ᠬᠥᠳᠡᠭᠡ ᠶᠢᠨ ᠬᠠᠮᠢᠭᠠ ᠣᠴᠢᠭᠰᠠᠨ ᠴᠤ ᠬᠥᠮᠦᠰ ᠵᠡᠭᠡᠯᠢ ᠳᠡᠭᠡᠷᠡ ᠡᠪᠡᠳᠴᠢᠲᠡᠳ ᠢᠶᠡᠨ ᠲᠠᠯᠪᠢᠭᠠᠳ᠂ ᠭᠠᠷ ᠢ ᠨᠢ ᠬᠤᠪᠴᠠᠰᠤᠨ ᠤ ᠪᠠᠨ ᠬᠣᠷᠮᠣᠢ ᠳᠤ ᠴᠤ ᠭᠡᠰᠡᠨ ᠨᠢᠭᠡ ᠬᠦᠷᠭᠡᠭᠦᠯᠦᠭᠡᠴᠢ ᠭᠡᠵᠦ ᠲᠡᠭᠦᠨ ᠡᠴᠡ ᠭᠤᠶᠤᠵᠠᠭᠠᠵᠤ ᠪᠠᠢᠪᠠ᠃ ᠡᠢᠨ ᠬᠦ ᠭᠠᠷ ᠢᠶᠠᠨ ᠬᠦᠷᠭᠡᠭᠰᠡᠨ ᠪᠦᠬᠦᠨ ᠡᠳᠡᠭᠡᠷᠡᠯᠡ᠃