ᠮᠠᠷᠺ ᠠᠷᠪᠠᠨ ᠲᠠᠪᠤ
ᠢᠰᠦ᠋ᠰ ᠪᠠᠢᠴᠠᠭᠠᠭᠳᠠᠭᠰᠠᠨ ᠨᠢ
1 ᠦᠷ ᠢᠶᠡᠷ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠨᠢ ᠠᠬᠠᠯᠠᠭᠴᠢᠳ᠂ ᠪᠢᠴᠢᠭᠲᠡᠳ ᠪᠣᠯᠣᠨ ᠪᠦᠬᠦ ᠰᠢᠭᠦᠬᠦ ᠵᠥᠪᠯᠡᠯ ᠦᠨ ᠬᠢᠨ ᠲᠠᠢ ᠲᠡᠷᠡ ᠳᠠᠷᠤᠢ ᠵᠥᠪᠯᠡᠯᠳᠦᠭᠰᠡᠨ ᠦ ᠳᠠᠷᠠᠭᠠ᠂ ᠢᠰᠦ᠋ᠰ ᠢ ᠬᠦᠯᠢᠵᠦ ᠠᠪᠠᠴᠢᠭᠠᠳ ᠫᠢᠯᠠᠲ ᠲᠤ ᠲᠤᠰᠢᠶᠠᠪᠠ᠃ 2 ᠫᠢᠯᠠᠲ ᠢᠰᠦ᠋ᠰ ᠡᠴᠡ᠄ 《ᠴᠢ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠮᠥᠨ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠷᠡ᠄ 《ᠴᠢ ᠥᠪᠡᠷ ᠢᠶᠡᠨ ᠬᠡᠯᠡᠵᠦ ᠪᠠᠢᠨᠠ》 ᠭᠡᠯᠡ᠃ 3 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠢᠰᠦ᠋ᠰ ᠢ ᠣᠯᠠᠨ ᠵᠦᠢᠯ ᠢᠶᠠᠷ ᠵᠠᠭᠠᠯᠳᠤᠵᠤ ᠪᠠᠢᠪᠠ᠃ 4 ᠫᠢᠯᠠᠲ᠄ 《ᠬᠠᠷᠠᠭᠠᠴᠢ︕ ᠲᠡᠳᠡ ᠬᠡᠴᠢᠨᠡᠨ ᠣᠯᠠᠨ ᠵᠦᠢᠯ ᠢᠶᠠᠷ ᠴᠢᠮᠠ ᠶᠢ ᠵᠠᠭᠠᠯᠳᠤᠵᠤ ᠪᠠᠢᠨᠠ᠂ ᠴᠢ ᠶᠠᠭᠤ ᠴᠤ ᠬᠠᠷᠢᠭᠤᠯᠬᠤ ᠦᠭᠡᠢ ᠶᠤᠮ ᠤᠤ︖》 ᠭᠡᠵᠦ ᠢᠰᠦ᠋ᠰ ᠡᠴᠡ ᠳᠠᠬᠢᠨ ᠠᠰᠠᠭᠤᠭᠰᠠᠨ ᠪᠣᠯᠪᠠᠴᠤ 5 ᠲᠡᠷᠡ ᠮᠥᠨ ᠯᠠ ᠶᠠᠭᠤ ᠴᠤ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ ᠳᠦ᠂ ᠫᠢᠯᠠᠲ ᠭᠠᠢᠬᠠᠪᠠ᠃
6 ᠪᠠᠶᠠᠷ ᠤᠨ ᠦᠶᠡ ᠳᠦ᠂ ᠫᠢᠯᠠᠲ ᠠᠷᠠᠳ ᠤᠨ ᠭᠤᠶᠤᠭᠰᠠᠨ ᠢᠶᠠᠷ ᠨᠢᠭᠡ ᠬᠣᠷᠢᠭᠳᠠᠯ ᠢ ᠰᠤᠯᠠᠯᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠢᠵᠠᠢ᠃ 7 ᠶᠠᠭ ᠲᠡᠷᠡ ᠦᠶᠡ ᠳᠦ᠂ ᠪᠠᠷᠠᠪ ᠭᠡᠭᠴᠢ ᠬᠥᠮᠦᠨ ᠦᠢᠮᠡᠭᠡᠨ ᠳᠡᠭᠳᠡᠭᠡᠭᠰᠡᠨ ᠬᠠᠮᠰᠠᠭᠠᠲᠠᠳ ᠲᠠᠢ ᠪᠠᠨ ᠬᠣᠷᠢᠭᠳᠠᠵᠤ ᠪᠠᠢᠭᠰᠠᠨ ᠪᠠᠢᠵᠠᠢ᠃ ᠲᠡᠳᠡ ᠦᠢᠮᠡᠭᠡᠨ ᠦ ᠦᠶᠡ ᠳᠦ ᠬᠥᠮᠦᠨ ᠠᠯᠠᠭᠰᠠᠨ ᠠᠵᠢ᠃ 8 ᠠᠷᠠᠳ ᠣᠯᠠᠨ ᠫᠢᠯᠠᠲ ᠲᠤ ᠣᠴᠢᠵᠤ᠂ ᠤᠷᠢᠳᠤ ᠶᠢᠨ ᠶᠣᠰᠣᠭᠠᠷ ᠲᠡᠳᠡᠨ ᠳᠦ ᠬᠢᠵᠦ ᠥᠭᠬᠦ ᠶᠢ ᠭᠤᠶᠤᠭᠰᠠᠨ ᠳᠤ᠂ 9 ᠫᠢᠯᠠᠲ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠨᠠᠷ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠢ ᠰᠤᠯᠠᠯᠠᠭᠤᠯᠬᠤ ᠪᠠᠷ ᠨᠠᠳᠠ ᠠᠴᠠ ᠭᠤᠶᠤᠵᠤ ᠪᠠᠢᠨᠠ ᠤᠤ︖》 ᠭᠡᠪᠡ᠃ 10 ᠤᠴᠢᠷ ᠨᠢ᠂ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠠᠲᠠᠭᠠᠷᠬᠠᠬᠤ ᠳᠠᠭᠠᠨ ᠢᠰᠦ᠋ᠰ ᠢ ᠲᠤᠰᠢᠶᠠᠭᠰᠠᠨ ᠢ ᠫᠢᠯᠠᠲ ᠮᠡᠳᠡᠵᠦ ᠪᠠᠢᠯᠠ᠃ 11 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠬᠤᠷᠠᠭᠰᠠᠨ ᠣᠯᠠᠨ ᠢ ᠥᠳᠥᠭᠡᠨ᠄ 《ᠪᠠᠷᠠᠪ ᠢ ᠰᠤᠯᠠᠯᠠ》 ᠭᠡᠵᠦ ᠭᠤᠶᠤᠭᠤᠯᠪᠠ᠃ 12 ᠫᠢᠯᠠᠲ ᠳᠠᠬᠢᠨ ᠬᠠᠷᠢᠭᠤ ᠳᠤᠨᠢ᠄ 《ᠲᠡᠭᠡᠪᠡᠯ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠭᠡᠵᠦ ᠲᠠ ᠨᠠᠷ ᠤᠨ ᠬᠡᠯᠡᠳᠡᠭ ᠲᠡᠷᠡ ᠬᠥᠮᠦᠨ ᠢ ᠪᠢ ᠶᠠᠭᠠᠬᠢᠬᠤ ᠪᠤᠢ︖》 ᠭᠡᠬᠦ ᠳᠦ᠂ 13 ᠲᠡᠳᠡ ᠳᠠᠬᠢᠨ᠄ 《ᠲᠡᠭᠦᠨ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃ 14 ᠬᠠᠷᠢᠨ ᠫᠢᠯᠠᠲ᠄ 《ᠶᠠᠭᠤᠨ ᠳᠤ ᠪᠤᠢ︖ ᠲᠡᠷᠡ ᠶᠠᠮᠠᠷ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠳᠡ ᠤᠯᠠᠮ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠲᠡᠭᠦᠨ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠭᠰᠠᠨ ᠲᠤᠯᠠ 15 ᠫᠢᠯᠠᠲ ᠬᠤᠷᠠᠭᠰᠠᠨ ᠣᠯᠠᠨ ᠤ ᠲᠠᠭᠠᠯᠠᠯ ᠳᠤ ᠨᠡᠢᠴᠡᠭᠦᠯᠬᠦ ᠭᠡᠵᠦ ᠪᠠᠷᠠᠪ ᠢ ᠰᠤᠯᠠᠯᠠᠭᠰᠠᠨ ᠪᠥᠭᠡᠳ ᠢᠰᠦ᠋ᠰ ᠢ ᠲᠠᠰᠢᠭᠤᠷᠳᠠᠭᠤᠯᠤᠭᠰᠠᠨ ᠤ ᠳᠠᠷᠠᠭᠠ᠂ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠤᠯᠬᠤ ᠪᠠᠷ ᠲᠤᠰᠢᠶᠠᠪᠠ᠃
ᠢᠰᠦ᠋ᠰ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠨᠢ
16 ᠴᠡᠷᠢᠭ ᠤᠳ ᠢᠰᠦ᠋ᠰ ᠢ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶᠢᠨ ᠣᠷᠳᠣᠨ ᠤ ᠬᠦᠷᠢᠶᠡᠨ ᠳᠦ ᠠᠪᠠᠴᠢᠯᠠ᠃ ᠲᠡᠳᠡ ᠪᠦᠬᠦ ᠬᠤᠸᠠᠷᠠᠨ ᠤ ᠬᠢᠨ ᠢᠶᠠᠨ ᠴᠤᠭᠯᠠᠭᠤᠯᠤᠭᠠᠳ 17 ᠢᠰᠦ᠋ᠰ ᠲᠤ ᠨᠢᠯ ᠶᠠᠭᠠᠨ ᠨᠥᠮᠥᠷᠭᠡ ᠨᠥᠮᠥᠷᠭᠡᠵᠦ᠂ ᠥᠷᠭᠡᠰᠦᠲᠦ ᠮᠥᠴᠢᠷ ᠢᠶᠠᠷ ᠲᠢᠲᠢᠮ ᠰᠦᠯᠵᠢᠨ ᠡᠮᠦᠰᠬᠡᠭᠰᠡᠨ ᠦ ᠳᠠᠷᠠᠭᠠ᠂ 18 《ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠮᠠᠨᠳᠤᠲᠤᠭᠠᠢ︕》 ᠭᠡᠵᠦ ᠮᠡᠨᠳᠦᠴᠢᠯᠡᠵᠦ ᠡᠬᠢᠯᠡᠪᠡ᠃ 19 ᠲᠡᠳᠡ ᠢᠰᠦ᠋ᠰ ᠤᠨ ᠲᠡᠷᠢᠭᠦᠨ ᠢ ᠵᠡᠭᠡᠰᠦᠨ ᠰᠠᠪᠠᠭᠠ ᠪᠠᠷ ᠴᠣᠬᠢᠨ ᠲᠡᠭᠦᠨ ᠦ ᠳᠡᠭᠡᠷᠡ ᠨᠤᠯᠮᠤᠵᠤ᠂ ᠡᠪᠦᠳᠦᠭ ᠰᠥᠬᠥᠷᠡᠨ ᠮᠥᠷᠭᠥᠵᠦ ᠪᠠᠢᠯᠠ᠃ 20 ᠲᠡᠳᠡ ᠢᠰᠦ᠋ᠰ ᠢ ᠳᠣᠭᠣᠭᠢᠯᠠᠭᠰᠠᠨ ᠤ ᠳᠠᠷᠠᠭᠠ᠂ ᠨᠢᠯ ᠶᠠᠭᠠᠨ ᠨᠥᠮᠥᠷᠭᠡ ᠶᠢ ᠨᠢ ᠲᠠᠢᠯᠵᠤ᠂ ᠬᠤᠪᠴᠠᠰᠤ ᠬᠤᠨᠠᠷ ᠢ ᠨᠢ ᠡᠮᠦᠰᠬᠡᠭᠡᠳ ᠲᠡᠭᠦᠨ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠬᠤ ᠪᠠᠷ ᠭᠠᠳᠠᠭᠰᠢ ᠪᠠᠨ ᠠᠪᠠᠴᠢᠪᠠ᠃
ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠨᠢ
21 ᠲᠡᠷᠡ ᠦᠶᠡ ᠳᠦ ᠰᠢᠮᠣᠨ (ᠠᠯᠧᠺᠰᠠᠨᠳᠧᠷ᠂ ᠷᠦᠹ ᠬᠣᠶᠠᠭᠤᠯᠠ ᠶᠢᠨ ᠡᠴᠢᠭᠡ) ᠭᠡᠭᠴᠢ ᠺᠦᠷᠧᠨᠠᠢ ᠬᠥᠮᠦᠨ ᠬᠥᠳᠡᠭᠡ ᠡᠴᠡ ᠢᠷᠡᠭᠡᠳ ᠲᠡᠷᠡᠭᠦᠷ ᠥᠩᠭᠡᠷᠡᠵᠦ ᠪᠠᠢᠵᠠᠢ᠃ ᠴᠡᠷᠢᠭ ᠤᠳ ᠲᠡᠭᠦᠨ ᠢ ᠠᠯᠪᠠᠳᠠᠨ ᠢᠰᠦ᠋ᠰ ᠤᠨ ᠵᠠᠭᠠᠯᠮᠠᠢ ᠶᠢ ᠡᠭᠦᠷᠦᠭᠦᠯᠵᠦ᠂ 22 ᠢᠰᠦ᠋ᠰ ᠢ ᠭᠣᠯᠭᠣᠲ᠋ᠠ (ᠣᠷᠴᠢᠭᠤᠯᠪᠠᠯ᠄ ᠭᠠᠪᠠᠯᠠ ᠶᠢᠨ ᠭᠠᠵᠠᠷ) ᠬᠡᠮᠡᠬᠦ ᠭᠠᠵᠠᠷ ᠲᠤ ᠠᠪᠠᠴᠢᠯᠠ᠃ 23 ᠲᠡᠳᠡ ᠢᠰᠦ᠋ᠰ ᠲᠤ ᠮᠢᠷᠷᠠ ᠲᠠᠢ ᠦᠵᠦᠮ ᠦᠨ ᠳᠠᠷᠠᠰᠤ ᠥᠭᠬᠦ ᠭᠡᠰᠡᠨ ᠴᠤ ᠲᠡᠷᠡ ᠠᠪᠤᠭᠰᠠᠨ ᠦᠭᠡᠢ᠃ 24 ᠲᠡᠳᠡ ᠢᠰᠦ᠋ᠰ ᠢ ᠴᠣᠪᠳᠣᠯᠠᠭᠠᠳ ᠬᠤᠪᠴᠠᠰᠤ ᠬᠤᠨᠠᠷ ᠢ ᠨᠢ ᠬᠤᠪᠢᠶᠠᠬᠤ ᠭᠡᠵᠦ ᠬᠡᠨ ᠨᠢ ᠶᠠᠭᠤ ᠠᠪᠬᠤ ᠪᠠᠨ ᠱᠣᠳᠠᠪᠠ᠃
25 ᠲᠡᠭᠦᠨ ᠢ ᠴᠣᠪᠳᠣᠯᠠᠬᠤ ᠳᠤ᠂ ᠦᠳᠡ ᠶᠢᠨ ᠡᠮᠦᠨᠡᠬᠢ ᠶᠢᠰᠦᠨ ᠴᠠᠭ ᠪᠣᠯᠵᠤ ᠪᠠᠢᠪᠠ᠃ 26 ᠶᠠᠯᠠ ᠶᠢᠨ ᠬᠢᠨᠢ ᠫᠠᠢᠰᠠᠨ ᠳᠡᠭᠡᠷᠡ 《ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ》 ᠭᠡᠬᠦ ᠪᠢᠴᠢᠭᠡᠰᠦ ᠲᠠᠢ ᠪᠠᠢᠯᠠ᠃ 27 ᠲᠡᠳᠡ ᠢᠰᠦ᠋ᠰ ᠤᠨ ᠬᠠᠮᠲᠤ ᠬᠣᠶᠠᠷ ᠳᠡᠭᠡᠷᠡᠮᠴᠢᠨ ᠤ ᠨᠢᠭᠡ ᠶᠢ ᠪᠠᠷᠠᠭᠤᠨ ᠲᠠᠯᠠ ᠳᠤᠨᠢ᠂ ᠨᠥᠭᠥᠭᠡ ᠶᠢ ᠵᠡᠭᠦᠨ ᠲᠠᠯᠠ ᠳᠤᠨᠢ ᠴᠣᠪᠳᠣᠯᠠᠵᠠᠢ᠃ 28 16 29 ᠳᠡᠷᠭᠡᠳᠡᠭᠦᠷ ᠨᠢ ᠶᠠᠪᠤᠭᠰᠠᠳ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ᠂ ᠢᠰᠦ᠋ᠰ ᠢ ᠳᠣᠷᠣᠮᠵᠢᠯᠠᠵᠤ᠄ 《ᠬᠥᠱᠢ᠂ ᠥᠷᠭᠥᠭᠡ ᠶᠢ ᠨᠤᠷᠠᠭᠠᠵᠤ ᠭᠤᠷᠪᠠᠨ ᠡᠳᠦᠷ ᠦᠨ ᠳᠣᠲᠣᠷᠠ ᠪᠣᠰᠬᠠᠭᠴᠢ ᠡ᠂ 30 ᠥᠪᠡᠷ ᠢ ᠪᠠᠨ ᠠᠪᠤᠷᠠᠭᠠᠴᠢ ᠳᠠ᠂ ᠵᠠᠭᠠᠯᠮᠠᠢ ᠠᠴᠠ ᠪᠠᠭᠤᠵᠤ ᠦᠵᠡ︕》 ᠭᠡᠵᠦ ᠪᠠᠢᠯᠠ᠃ 31 ᠡᠭᠦᠨᠴᠢᠯᠡᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠴᠤ ᠪᠢᠴᠢᠭᠲᠡᠳ ᠲᠡᠢ ᠬᠠᠮᠲᠤ ᠲᠡᠭᠦᠨ ᠢ ᠳᠣᠭᠣᠭᠢᠯᠠᠵᠤ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠲᠡᠷᠡ ᠪᠤᠰᠤᠳ ᠢ ᠠᠪᠤᠷᠠᠭᠰᠠᠨ ᠬᠢᠷᠢ ᠨᠢ ᠥᠪᠡᠷ ᠢ ᠪᠠᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠶᠤᠮ ᠪᠠᠢᠨᠠ᠂ 32 ᠢᠰᠷᠧᠯ ᠤᠨ ᠬᠠᠭᠠᠨ ᠾᠷᠢᠰᠲ᠋ᠣᠰ᠂ ᠣᠳᠣ ᠵᠠᠭᠠᠯᠮᠠᠢ ᠠᠴᠠ ᠪᠠᠭᠤ ᠯᠠ ᠳᠠ︕ ᠲᠡᠭᠡᠪᠡᠯ ᠪᠢᠳᠡ ᠬᠠᠷᠠᠭᠠᠳ ᠢᠲᠡᠭᠡᠨᠡ》 ᠭᠡᠵᠡᠭᠡᠪᠡ᠃ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠴᠣᠪᠳᠣᠯᠠᠭᠳᠠᠭᠰᠠᠳ ᠴᠤ ᠲᠡᠭᠦᠨ ᠢ ᠲᠠᠪᠠᠯᠠᠵᠤ ᠪᠠᠢᠯᠠ᠃
33 ᠦᠳᠡ ᠪᠣᠯᠬᠤ ᠳᠤ᠂ ᠪᠦᠬᠦ ᠭᠠᠵᠠᠷ ᠬᠠᠷᠠᠩ᠋ᠭᠤᠢᠯᠠᠵᠤ ᠦᠳᠡ ᠶᠢᠨ ᠬᠣᠢᠨᠠᠬᠢ ᠭᠤᠷᠪᠠᠨ ᠴᠠᠭ ᠬᠦᠷᠲᠡᠯᠡ ᠬᠠᠷᠠᠩ᠋ᠭᠤᠢ ᠳᠤ ᠬᠤᠴᠢᠭᠳᠠᠵᠠᠢ᠃ 34 ᠭᠤᠷᠪᠠᠨ ᠴᠠᠭ ᠲᠤ ᠢᠰᠦ᠋ᠰ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠧᠯᠢ᠂ ᠧᠯᠢ᠂ ᠯᠧᠮᠠ ᠰᠠᠪᠠᠺᠲ᠋ᠠᠨᠢ (ᠣᠷᠴᠢᠭᠤᠯᠪᠠᠯ᠄ ᠪᠤᠷᠬᠠᠨ ᠮᠢᠨᠢ᠂ ᠪᠤᠷᠬᠠᠨ ᠮᠢᠨᠢ᠂ ᠶᠠᠭᠤᠨ ᠳᠤ ᠲᠠ ᠨᠠᠮᠠᠶᠢ ᠣᠷᠬᠢᠪᠠ︖)》 ᠭᠡᠵᠦ ᠬᠠᠰᠬᠢᠷᠤᠯᠠ᠃ 35 ᠬᠠᠵᠠᠭᠤ ᠳᠤᠨᠢ ᠵᠣᠭᠰᠣᠵᠤ ᠪᠤᠢ ᠵᠠᠷᠢᠮ ᠨᠢ ᠰᠣᠨᠣᠰᠣᠭᠠᠳ᠄ 《ᠬᠠᠷᠠᠭᠠᠴᠢ᠂ ᠲᠡᠷᠡ ᠧᠯᠢᠶᠠ ᠶᠢ ᠳᠠᠭᠤᠳᠠᠵᠤ ᠪᠠᠢᠨᠠ》 ᠭᠡᠵᠦ ᠪᠠᠢᠪᠠ᠃ 36 ᠨᠢᠭᠡ ᠨᠢ ᠭᠦᠶᠦᠨ ᠣᠴᠢᠵᠤ ᠳᠠᠯᠠᠢ ᠶᠢᠨ ᠬᠥᠪᠥᠩ ᠢ ᠢᠰᠭᠦᠯᠡᠩ ᠳᠠᠷᠠᠰᠤᠨ ᠳᠤ ᠨᠣᠷᠭᠠᠵᠤ ᠵᠡᠭᠡᠰᠦᠨ ᠦ ᠰᠠᠪᠠᠭᠠᠨ ᠳᠤ ᠡᠯᠭᠦᠭᠡᠳ᠂ ᠲᠡᠭᠦᠨ ᠳᠦ ᠤᠤᠭᠤᠯᠭᠠᠬᠤ ᠭᠡᠰᠡᠨ ᠢᠶᠡᠨ᠄ 《ᠪᠠᠢᠵᠠ᠂ ᠧᠯᠢᠶᠠ ᠶᠢᠨ ᠲᠡᠭᠦᠨ ᠢ ᠪᠠᠭᠤᠯᠭᠠᠵᠤ ᠠᠪᠬᠤ ᠪᠠᠷ ᠢᠷᠡᠬᠦ ᠡᠰᠡᠬᠦ ᠶᠢ ᠬᠠᠷᠠᠵᠠᠭᠠᠶᠠ》 ᠭᠡᠯᠡ᠃ 37 ᠢᠰᠦ᠋ᠰ ᠴᠢᠩᠭ᠍ᠠ ᠬᠠᠰᠬᠢᠷᠤᠭᠠᠳ ᠠᠮᠢᠰᠬᠤᠯ ᠬᠤᠷᠢᠶᠠᠪᠠ᠃ 38 ᠲᠡᠭᠡᠬᠦ ᠳᠦ᠂ ᠥᠷᠭᠥᠭᠡᠨ ᠦ ᠬᠥᠰᠢᠭᠡ ᠳᠡᠭᠡᠷᠡ ᠡᠴᠡ ᠪᠡᠨ ᠳᠣᠭᠣᠭᠰᠢ ᠬᠣᠶᠠᠷ ᠬᠡᠰᠡᠭ ᠪᠣᠯᠣᠨ ᠴᠤᠤᠷᠠᠪᠠ᠃ 39 ᠡᠰᠡᠷᠭᠦ ᠲᠠᠯᠠ ᠳᠤᠨᠢ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠢᠰᠦ᠋ᠰ ᠤᠨ ᠢᠩᠭᠢᠵᠦ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠢ ᠦᠵᠡᠭᠡᠳ᠄ 《ᠡᠨᠡ ᠴᠢᠨᠢ ᠨᠡᠭᠡᠷᠡᠨ ᠪᠤᠷᠬᠠᠨ ᠤ ᠬᠦᠦ ᠪᠠᠢᠵᠠᠢ》 ᠭᠡᠪᠡ᠃
40 ᠡᠮᠡᠭᠲᠡᠢᠴᠦᠳ ᠴᠤ ᠬᠣᠯᠠ ᠠᠴᠠ ᠠᠵᠢᠭᠯᠠᠵᠤ ᠪᠠᠢᠯᠠ᠃ ᠲᠡᠳᠡᠨ ᠦ ᠳᠤᠮᠳᠠ ᠮᠠᠭᠳᠠᠯ ᠤᠨ ᠮᠠᠷᠢᠶᠠ ᠪᠣᠯᠣᠨ ᠪᠠᠭᠠ ᠶᠠᠺᠣᠪ᠂ ᠶᠣᠰᠧᠹ ᠬᠣᠶᠠᠭᠤᠯᠠ ᠶᠢᠨ ᠡᠬᠡ ᠮᠠᠷᠢᠶᠠ᠂ ᠰᠠᠯᠣᠮᠧ ᠨᠠᠷ ᠪᠠᠢᠪᠠ᠃ 41 ᠲᠡᠳᠡ ᠢᠰᠦ᠋ᠰ ᠢ ᠭᠠᠯᠢᠯᠠᠶᠠ ᠳᠤ ᠪᠠᠢᠬᠤ ᠳᠤᠨᠢ ᠳᠠᠩᠳᠠ ᠪᠠᠨ ᠳᠠᠭᠠᠵᠤ ᠲᠡᠭᠦᠨ ᠳᠦ ᠦᠢᠯᠡᠴᠢᠯᠡᠳᠡᠭ᠌ ᠪᠠᠢᠭᠰᠠᠨ ᠶᠤᠮ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠲᠡᠭᠦᠨ ᠲᠡᠢ ᠬᠠᠮᠲᠤ ᠶᠧᠷᠦ᠋ᠰᠠᠯᠧᠮ ᠳᠤ ᠢᠷᠡᠭᠰᠡᠨ ᠥᠭᠡᠷᠡ ᠣᠯᠠᠨ ᠡᠮᠡᠭᠲᠡᠢ ᠴᠤ ᠲᠡᠨᠳᠡ ᠪᠠᠢᠭᠰᠠᠨ ᠪᠢᠯᠡ᠃
ᠢᠰᠦ᠋ᠰ ᠪᠤᠯᠠᠰᠢᠯᠠᠭᠳᠠᠭᠰᠠᠨ ᠨᠢ
42 ᠲᠡᠷᠡ ᠡᠳᠦᠷ ᠨᠢ ᠪᠡᠯᠡᠳᠬᠡᠯ ᠦᠨ ᠡᠳᠦᠷ᠂ ᠲᠤᠬᠠᠢᠯᠠᠪᠠᠯ ᠠᠮᠠᠷᠠᠯ ᠤᠨ ᠡᠮᠦᠨᠡᠬᠢ ᠡᠳᠦᠷ ᠪᠠᠢᠭᠰᠠᠨ ᠲᠤᠯᠠ ᠣᠷᠣᠢ ᠪᠣᠯᠬᠤ ᠳᠤ᠂ 43 ᠠᠷᠢᠮᠠᠲ᠋ᠠ ᠶᠢᠨ ᠬᠥᠮᠦᠨ ᠶᠣᠰᠧᠹ ᠫᠢᠯᠠᠲ ᠲᠤ ᠵᠣᠷᠢᠭᠯᠠᠨ ᠣᠴᠢᠪᠠ᠃ ᠲᠡᠷᠡ ᠪᠣᠯ ᠰᠢᠭᠦᠬᠦ ᠵᠥᠪᠯᠡᠯ ᠦᠨ ᠬᠦᠨᠳᠦᠲᠦ ᠭᠡᠰᠢᠭᠦᠨ ᠪᠥᠭᠡᠳ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠬᠦᠯᠢᠶᠡᠳᠡᠭ ᠬᠥᠮᠦᠨ ᠶᠤᠮ᠃ ᠲᠡᠷᠡ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠭᠤᠶᠤᠭᠰᠠᠨ ᠳᠤ᠂ 44 ᠫᠢᠯᠠᠲ ᠢᠰᠦ᠋ᠰ ᠤᠨ ᠨᠢᠭᠡᠨᠲᠡ ᠨᠥᠭᠴᠢᠭᠰᠡᠨ ᠡᠰᠡᠬᠦ ᠳᠦ ᠡᠷᠡᠭᠡᠯᠵᠡᠵᠦ᠂ ᠥᠨᠥᠬᠢ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠶᠢ ᠳᠠᠭᠤᠳᠠᠭᠠᠳ ᠢᠰᠦ᠋ᠰ ᠤᠨ ᠨᠠᠰᠤ ᠪᠠᠷᠠᠭᠠᠳ ᠤᠳᠠᠭᠰᠠᠨ ᠡᠰᠡᠬᠦ ᠶᠢ ᠠᠰᠠᠭᠤᠭᠰᠠᠨ ᠪᠥᠭᠡᠳ 45 ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠠᠴᠠ ᠣᠯᠵᠤ ᠮᠡᠳᠡᠭᠡᠳ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠶᠣᠰᠧᠹ ᠲᠤ ᠥᠭᠪᠡ᠃ 46 ᠶᠣᠰᠧᠹ ᠥᠷᠮᠥᠭ ᠬᠤᠳᠠᠯᠳᠤᠨ ᠠᠪᠤᠭᠰᠠᠨ ᠪᠥᠭᠡᠳ ᠢᠰᠦ᠋ᠰ ᠢ ᠪᠠᠭᠤᠯᠭᠠᠵᠤ ᠥᠷᠮᠥᠭ ᠢᠶᠡᠷ ᠢᠶᠠᠨ ᠤᠷᠢᠶᠠᠭᠰᠠᠨ ᠤ ᠳᠠᠷᠠᠭᠠ᠂ ᠬᠠᠳᠠ ᠤᠬᠤᠵᠤ ᠪᠡᠯᠡᠳᠬᠡᠭᠰᠡᠨ ᠪᠤᠯᠠᠰᠢᠨ ᠳᠤ ᠲᠠᠯᠪᠢᠵᠠᠢ᠃ ᠲᠡᠭᠡᠭᠡᠳ ᠴᠢᠯᠠᠭᠤ ᠥᠩᠬᠥᠷᠢᠭᠦᠯᠦᠨ ᠪᠤᠯᠠᠰᠢᠨ ᠤ ᠠᠮᠠ ᠶᠢ ᠲᠠᠭᠯᠠᠵᠠᠢ᠃ 47 ᠲᠡᠭᠦᠨ ᠢ ᠬᠠᠮᠢᠭᠠ ᠲᠠᠯᠪᠢᠭᠰᠠᠨ ᠢ ᠮᠠᠭᠳᠠᠯ ᠤᠨ ᠮᠠᠷᠢᠶᠠ ᠪᠣᠯᠣᠨ ᠶᠣᠰᠧᠹ ᠤᠨ ᠡᠬᠡ ᠮᠠᠷᠢᠶᠠ ᠠᠵᠢᠵᠤ ᠪᠠᠢᠯᠠ᠃