ᠮᠠᠷᠺ ᠠᠷᠪᠠᠨ ᠳᠥᠷᠪᠡ
ᠬᠣᠣᠷᠲᠤ ᠬᠤᠤᠪᠢᠯᠳᠤᠯᠭᠠ ᠪᠠ ᠦᠨᠡᠲᠦ ᠲᠣᠰᠣᠯᠠᠯᠭᠠ
1 ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠪᠠ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠶᠢᠨ ᠪᠠᠶᠠᠷ ᠠᠴᠠ ᠬᠣᠶᠠᠷ ᠬᠣᠨᠣᠭ ᠤᠨ ᠡᠮᠦᠨᠡ ᠪᠠᠢᠵᠠᠢ᠃ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠪᠢᠴᠢᠭᠲᠡᠳ ᠢᠰᠦ᠋ᠰ ᠢ ᠪᠠᠷᠢᠪᠴᠢᠯᠠᠵᠤ ᠬᠥᠨᠥᠭᠡᠬᠦ ᠵᠠᠯᠢᠬᠠᠢ ᠠᠷᠭᠠ ᠰᠦᠪᠡᠭᠴᠢᠯᠡᠵᠦ ᠪᠠᠢᠪᠠ᠃ 2 ᠭᠡᠪᠡᠴᠦ ᠲᠡᠳᠡ᠄ 《ᠪᠠᠶᠠᠷ ᠤᠨ ᠦᠶᠡ ᠪᠡᠷ ᠪᠣᠯᠬᠤ ᠦᠭᠡᠢ᠂ ᠠᠷᠠᠳ ᠣᠯᠠᠨ ᠤ ᠳᠤᠮᠳᠠ ᠦᠢᠮᠡᠭᠡᠨ ᠭᠠᠷᠤᠭᠤᠵᠠᠢ》 ᠭᠡᠵᠡᠭᠡᠪᠡ᠃
3 ᠢᠰᠦ᠋ᠰ ᠪᠧᠲ᠋ᠠᠨᠢᠶᠠ ᠳᠤ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠡᠢ ᠰᠢᠮᠣᠨ ᠤ ᠭᠡᠷ ᠲᠦ ᠬᠣᠭᠣᠯᠠ ᠢᠳᠡᠭᠡᠳ ᠰᠠᠭᠤᠵᠤ ᠪᠠᠢᠲᠠᠯᠠ᠂ ᠨᠢᠭᠡᠨ ᠡᠮᠡᠭᠲᠡᠢ ᠬᠠᠰ ᠰᠠᠪᠠ ᠲᠠᠢ ᠴᠡᠪᠡᠷ᠂ ᠮᠠᠰᠢ ᠦᠨᠡ ᠲᠠᠢ᠂ ᠨᠠᠷᠳ᠋ ᠭᠡᠬᠦ ᠠᠩᠬᠢᠯᠤᠭᠤᠨ ᠲᠣᠰᠣ ᠠᠪᠴᠢᠷᠠᠭᠠᠳ ᠰᠠᠪᠠ ᠪᠠᠨ ᠬᠠᠭᠠᠯᠤᠨ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠴᠢᠳᠬᠤᠪᠠ᠃ 4 ᠬᠠᠷᠢᠨ ᠲᠡᠨᠳᠡ ᠪᠠᠢᠭᠰᠠᠨ ᠵᠠᠷᠢᠮ ᠨᠢ ᠠᠭᠤᠷᠯᠠᠵᠤ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠶᠠᠭᠤᠨ ᠳᠤ ᠠᠩᠬᠢᠯᠤᠭᠤᠨ ᠲᠣᠰᠣ ᠪᠠᠨ ᠢᠩᠭᠢᠵᠦ ᠪᠦᠷᠢᠯᠭᠡᠨᠡ ᠪᠤᠢ︖ 5 ᠡᠨᠡ ᠲᠣᠰᠣ ᠶᠢ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠳ᠋ᠧᠨᠠᠷ 14 ᠢᠶᠠᠷ ᠬᠤᠳᠠᠯᠳᠤᠭᠠᠳ ᠶᠠᠳᠠᠭᠤᠴᠤᠳ ᠢ ᠲᠤᠰᠠᠯᠠᠵᠤ ᠪᠣᠯᠬᠤ ᠪᠠᠢᠭᠰᠠᠨ》 ᠭᠡᠵᠦ ᠬᠡᠯᠡᠭᠡᠳ ᠪᠦᠰᠡᠭᠦᠢ ᠶᠢ ᠵᠠᠩᠨᠠᠵᠤ ᠡᠬᠢᠯᠡᠭᠰᠡᠨ ᠳᠦ᠂ 6 ᠢᠰᠦ᠋ᠰ᠄ 《ᠪᠣᠯᠢ᠂ ᠲᠡᠭᠦᠨ ᠢ ᠶᠠᠭᠤᠨ ᠳᠤ ᠵᠣᠪᠠᠭᠠᠨᠠ ᠪᠤᠢ︖ ᠲᠡᠷᠡ ᠨᠠᠳᠠ ᠳᠤ ᠰᠠᠢᠨ ᠢ ᠦᠢᠯᠡᠳᠦᠭᠰᠡᠨ᠃ 7 ᠶᠠᠳᠠᠭᠤᠴᠤᠳ ᠲᠠ ᠨᠠᠷ ᠲᠠᠢ ᠦᠷᠭᠦᠯᠵᠢ ᠬᠠᠮᠲᠤ ᠪᠠᠢᠳᠠᠭ ᠤᠴᠢᠷ ᠠᠴᠠ ᠬᠦᠰᠡᠭᠰᠡᠨ ᠴᠠᠭ ᠲᠠᠭᠠᠨ ᠪᠤᠶᠠᠨ ᠦᠢᠯᠡᠳᠴᠦ ᠪᠣᠯᠣᠨᠠ᠃ ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠠᠢ ᠦᠷᠭᠦᠯᠵᠢ ᠬᠠᠮᠲᠤ ᠪᠠᠢᠬᠤ ᠪᠢᠰᠢ᠃ 8 ᠡᠨᠡ ᠪᠦᠰᠡᠭᠦᠢ ᠴᠢᠳᠠᠯ ᠤᠨ ᠢᠶᠠᠨ ᠬᠢᠷᠢ ᠪᠠᠷ ᠬᠢᠭᠰᠡᠨ ᠪᠥᠭᠡᠳ ᠮᠢᠨᠦ ᠪᠡᠶᠡ ᠶᠢ ᠲᠣᠰᠣᠯᠠᠨ ᠣᠷᠣᠰᠢᠭᠤᠯᠭᠠ ᠳᠤ ᠮᠠᠨᠢ ᠪᠡᠯᠡᠳᠬᠡᠵᠡᠢ᠃ 9 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠳᠠᠶᠠᠩ ᠳᠡᠯᠡᠬᠡᠢ ᠶᠢᠨ ᠬᠠᠮᠢᠭᠠ ᠲᠤᠩ᠋ᠬᠠᠭᠯᠠᠭᠰᠠᠨ ᠴᠤ ᠡᠨᠡ ᠡᠮᠡᠭᠲᠡᠢ ᠶᠢᠨ ᠦᠢᠯᠡᠳᠦᠭᠰᠡᠨ ᠢ ᠪᠠᠰᠠ ᠶᠠᠷᠢᠵᠤ ᠲᠡᠭᠦᠨ ᠢ ᠳᠤᠷᠠᠰᠬᠤ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠪᠡ᠃
10 ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠶᠢᠨ ᠨᠢᠭᠡ᠂ ᠢᠰᠺᠠᠷᠢᠣᠲ ᠤᠨ ᠶᠦᠳᠠ ᠢᠰᠦ᠋ᠰ ᠢ ᠲᠤᠰᠢᠶᠠᠵᠤ ᠪᠠᠷᠢᠭᠤᠯᠬᠤ ᠪᠠᠷ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠤᠷᠤᠭᠤ ᠶᠠᠪᠤᠯᠠ᠃ 11 ᠲᠡᠳᠡ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠪᠠᠶᠠᠷᠯᠠᠵᠤ᠂ ᠲᠡᠭᠦᠨ ᠳᠦ ᠮᠥᠩᠭᠥ ᠥᠭᠬᠦ ᠪᠡᠷ ᠠᠮᠠᠯᠠᠪᠠ᠃ ᠢᠩᠭᠢᠭᠡᠳ ᠶᠦᠳᠠ ᠢᠰᠦ᠋ᠰ ᠢ ᠶᠠᠭᠠᠬᠢᠵᠤ ᠪᠠᠷᠢᠭᠤᠯᠬᠤ ᠪᠤᠢ ᠬᠡᠮᠡᠨ ᠵᠠᠪᠰᠢᠶᠠᠨ ᠡᠷᠢᠵᠦ ᠪᠠᠢᠯᠠ᠃
ᠡᠴᠦᠰ ᠦᠨ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ
12 ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠶᠢᠨ ᠪᠠᠶᠠᠷ ᠤᠨ ᠡᠬᠢᠨ ᠤ ᠡᠳᠦᠷ ᠪᠣᠯᠵᠠᠢ᠃ ᠲᠡᠷᠡ ᠡᠳᠦᠷ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠬᠤᠷᠠᠭᠠ ᠶᠢ ᠨᠢᠳᠤᠯᠤᠨᠠ᠃ ᠱᠠᠪᠢ ᠨᠠᠷ ᠨᠢ᠄ 《ᠪᠢᠳᠡ ᠬᠠᠮᠢᠭᠠ ᠣᠴᠢᠵᠤ᠂ ᠲᠠᠨ ᠤ ᠵᠣᠭᠣᠭᠯᠠᠬᠤ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠬᠣᠭᠣᠯᠠ ᠶᠢ ᠪᠡᠯᠡᠳᠬᠡᠬᠦ ᠪᠤᠢ︖》 ᠭᠡᠪᠡ᠃ 13 ᠢᠰᠦ᠋ᠰ ᠱᠠᠪᠢ ᠨᠠᠷ ᠠᠴᠠ ᠪᠠᠨ ᠬᠣᠶᠠᠷ ᠢ ᠶᠠᠪᠤᠭᠤᠯᠬᠤ ᠳᠠᠭᠠᠨ ᠲᠡᠳᠡᠨ ᠳᠦ᠄ 《ᠬᠣᠲᠠ ᠳᠤ ᠣᠴᠢ᠃ ᠰᠠᠪᠠ ᠲᠠᠢ ᠤᠰᠤ ᠠᠪᠴᠤ ᠶᠠᠪᠤᠭᠠ ᠬᠥᠮᠦᠨ ᠲᠠ ᠨᠠᠷ ᠲᠠᠢ ᠲᠠᠭᠠᠷᠠᠯᠳᠤᠨᠠ᠃ ᠲᠡᠭᠦᠨ ᠢ ᠳᠠᠭᠠᠭᠠᠷᠠᠢ᠃ 14 ᠲᠡᠷᠡ ᠬᠠᠮᠢᠭᠠᠰᠢ ᠪᠠᠨ ᠣᠷᠣᠪᠠᠯ ᠲᠡᠷᠡ ᠠᠢᠯ ᠤᠨ ᠡᠵᠡᠨ ᠳᠦ ᠲᠠ ᠨᠠᠷ᠄ 〈ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠬᠣᠭᠣᠯᠠ ᠢᠳᠡᠬᠦ ᠵᠣᠴᠢᠳ ᠤᠨ ᠥᠷᠥᠭᠡ ᠮᠢᠨᠢ ᠬᠠᠮᠢᠭᠠ ᠪᠠᠢᠨᠠ︖〉 ᠭᠡᠵᠦ ᠪᠠᠭᠰᠢ ᠮᠠᠨᠢ ᠬᠡᠯᠡᠭᠦᠯᠵᠦ ᠪᠠᠢᠨᠠ ᠭᠡᠭᠡᠷᠡᠢ᠃ 15 ᠲᠡᠭᠡᠪᠡᠯ ᠲᠡᠷᠡ ᠵᠠᠰᠠᠵᠤ ᠪᠡᠯᠡᠳᠬᠡᠴᠢᠬᠡᠭᠰᠡᠨ ᠳᠡᠭᠡᠳᠦ ᠳᠠᠪᠬᠤᠷ ᠤᠨ ᠲᠣᠮᠣ ᠥᠷᠥᠭᠡ ᠶᠢ ᠲᠠ ᠨᠠᠷ ᠲᠤ ᠦᠵᠡᠭᠦᠯᠦᠨᠡ᠃ ᠲᠡᠨᠳᠡ ᠪᠢᠳᠡᠨ ᠦ ᠲᠥᠯᠥᠭᠡ ᠪᠡᠯᠡᠳᠬᠡ》 ᠭᠡᠵᠦ ᠬᠡᠯᠡᠪᠡ᠃ 16 ᠲᠡᠭᠡᠭᠡᠳ ᠬᠣᠶᠠᠷ ᠱᠠᠪᠢ ᠨᠢ ᠬᠣᠲᠠ ᠣᠷᠣᠵᠤ᠂ ᠢᠰᠦ᠋ᠰ ᠤᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠣᠯᠵᠤ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠲᠤ ᠪᠡᠯᠡᠳᠬᠡᠪᠡ᠃
17 ᠣᠷᠣᠢ ᠪᠣᠯᠬᠤ ᠳᠤ᠂ ᠢᠰᠦ᠋ᠰ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠲᠠᠢ ᠪᠠᠨ ᠬᠠᠮᠲᠤ ᠣᠴᠢᠯᠠ᠃ 18 ᠲᠡᠳᠡ ᠰᠠᠭᠤᠭᠠᠳ ᠢᠳᠡᠵᠦ ᠪᠠᠢᠬᠤ ᠳᠤ ᠢᠰᠦ᠋ᠰ᠄ 《ᠪᠢ ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠴᠠ ᠨᠢᠭᠡ ᠨᠢ ᠨᠠᠳᠠ ᠠᠴᠠ ᠤᠷᠪᠠᠨᠠ᠂ ᠲᠡᠷᠡ ᠨᠠᠳᠠ ᠲᠠᠢ ᠬᠠᠮᠲᠤ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠨᠠ》 ᠭᠡᠵᠦ ᠬᠡᠯᠡᠪᠡ᠃ 19 ᠲᠡᠳᠡ ᠭᠤᠨᠢᠭᠲᠠᠢ ᠪᠣᠯᠵᠤ ᠨᠢᠭᠡ ᠨᠢᠭᠡ ᠪᠡᠷ ᠢᠶᠠᠨ ᠢᠰᠦ᠋ᠰ ᠲᠤ᠄ 《ᠪᠢ ᠪᠢᠰᠢ ᠪᠢᠵᠡ ᠳᠠ︖》 ᠭᠡᠵᠡᠭᠡᠵᠦ ᠪᠠᠢᠯᠠ᠃ 20 ᠢᠰᠦ᠋ᠰ᠄ 《ᠲᠠᠨ ᠤ ᠠᠷᠪᠠᠨ ᠬᠣᠶᠠᠷ ᠤᠨ ᠨᠢᠭᠡ᠂ ᠲᠡᠷᠡ ᠨᠠᠳᠠ ᠲᠠᠢ ᠨᠢᠭᠡ ᠲᠠᠪᠠᠭ ᠲᠤ ᠪᠣᠣᠪᠣ ᠪᠠᠨ ᠳᠦᠷᠦᠵᠦ ᠪᠠᠢᠨᠠ᠃ 21 ᠬᠥᠮᠦᠨ ᠦ ᠬᠦᠦ ᠥᠪᠡᠷ ᠦᠨ ᠬᠢᠨᠢ ᠲᠤᠬᠠᠢ ᠪᠢᠴᠢᠭᠳᠡᠭᠰᠡᠨ ᠶᠣᠰᠣᠭᠠᠷ ᠶᠠᠪᠤᠨᠠ᠃ ᠬᠥᠮᠦᠨ ᠦ ᠬᠦᠦ ᠡᠴᠡ ᠤᠷᠪᠠᠬᠤ ᠲᠡᠷᠡ ᠬᠥᠮᠦᠨ ᠳᠦ ᠬᠠᠷᠢᠨ ᠭᠠᠢ ᠪᠣᠯᠣᠨᠠ︕ ᠲᠡᠷᠡ ᠬᠥᠮᠦᠨ ᠲᠥᠷᠥᠭᠰᠡᠨ ᠦᠭᠡᠢ ᠪᠣᠯ ᠳᠡᠭᠡᠷᠡ ᠰᠠᠨ》 ᠭᠡᠵᠦ ᠬᠡᠯᠡᠪᠡ᠃
ᠠᠩ᠋ᠬᠠᠨ ᠤ ᠠᠷᠢᠭᠤᠨ ᠵᠣᠭᠣᠭ
22 ᠲᠡᠳᠡ ᠢᠳᠡᠵᠦ ᠪᠠᠢᠬᠤ ᠳᠤ᠂ ᠢᠰᠦ᠋ᠰ ᠪᠣᠣᠪᠣ ᠠᠪᠴᠤ ᠢᠷᠥᠭᠡᠨ ᠱᠠᠪᠢ ᠨᠠᠷ ᠲᠠᠭᠠᠨ ᠬᠤᠪᠢᠶᠠᠵᠤ ᠥᠭᠭᠥᠭᠡᠳ᠄ 《ᠠᠪᠤᠭᠠᠷᠠᠢ᠂ ᠡᠨᠡ ᠪᠣᠯ ᠮᠢᠨᠦ ᠪᠡᠶᠡ ᠶᠤᠮ》 ᠭᠡᠯᠡ᠃ 23 ᠲᠡᠭᠡᠭᠡᠳ ᠴᠣᠮᠣ ᠠᠪᠴᠤ ᠲᠠᠯᠠᠷᠬᠠᠨ ᠲᠡᠳᠡᠨ ᠳᠦ ᠥᠭᠭᠥᠭᠰᠡᠨ ᠳᠦ᠂ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠤᠤᠭᠤᠯᠠ᠃ 24 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠡᠨᠡ ᠪᠣᠯ ᠣᠯᠠᠨ ᠤ ᠲᠥᠯᠥᠭᠡ ᠤᠷᠤᠰᠬᠠᠬᠤ ᠮᠢᠨᠦ ᠴᠢᠰᠤ᠂ ᠭᠡᠷᠡ ᠶᠢᠨ ᠪᠠᠲᠤᠯᠠᠭᠠ ᠶᠤᠮ᠃ 25 ᠪᠢ ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠰᠢᠨᠡ ᠶᠢ ᠤᠤᠭᠤᠬᠤ ᠲᠡᠷᠡ ᠡᠳᠦᠷ ᠪᠣᠯᠲᠠᠯᠠ ᠪᠢ ᠦᠵᠦᠮ ᠦᠨ ᠮᠣᠳᠣᠨ ᠠᠴᠠ ᠭᠠᠷᠤᠭᠰᠠᠨ ᠢ ᠳᠠᠬᠢᠵᠤ ᠤᠤᠭᠤᠬᠤ ᠦᠭᠡᠢ ᠶᠤᠮ》 ᠭᠡᠵᠦ ᠬᠡᠯᠡᠪᠡ᠃ 26 ᠲᠡᠳᠡ ᠮᠠᠭᠲᠠᠭᠠᠯ ᠳᠠᠭᠤᠤ ᠳᠠᠭᠤᠯᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠴᠢᠳᠦᠨ ᠠᠭᠤᠯᠠ ᠥᠭᠡᠳᠡ ᠶᠠᠪᠤᠵᠠᠭᠠᠪᠠ᠃ 27 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠦᠳᠦᠷᠢᠬᠦ ᠪᠣᠯᠣᠨᠠ᠂ ᠡᠨᠡ ᠲᠤᠬᠠᠢ᠄ 〈ᠪᠢ ᠬᠣᠨᠢᠴᠢᠨ ᠢ ᠴᠣᠬᠢᠨᠠ᠂ ᠬᠣᠨᠢᠳ ᠪᠤᠲᠠᠷᠠᠨᠠ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ᠃ 28 ᠭᠡᠪᠡᠴᠦ ᠪᠢ ᠠᠮᠢᠯᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠲᠠ ᠨᠠᠷ ᠠᠴᠠ ᠤᠷᠢᠳᠠᠪᠠᠷ ᠭᠠᠯᠢᠯᠠᠶᠠ ᠳᠤ ᠣᠴᠢᠨᠠ》 ᠭᠡᠵᠦ ᠬᠡᠯᠡᠲᠡᠯᠡ᠂ 29 ᠫᠧᠲ᠋ᠧᠷ᠄ 《ᠬᠠᠮᠤᠭ ᠬᠥᠮᠦᠨ ᠪᠦᠳᠦᠷᠢᠭᠰᠡᠨ ᠴᠤ ᠪᠢ ᠪᠦᠳᠦᠷᠢᠬᠦ ᠦᠭᠡᠢ ᠶᠤᠮ》 ᠭᠡᠵᠦ ᠥᠭᠦᠯᠡᠪᠡ᠃ 30 ᠢᠰᠦ᠋ᠰ᠄ 《ᠴᠢᠮᠠ ᠳᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠥᠨᠥ ᠰᠥᠨᠢ ᠲᠠᠬᠢᠶᠠ ᠬᠣᠶᠠᠷ ᠳᠤᠤᠭᠠᠷᠬᠤ ᠠᠴᠠ ᠡᠮᠦᠨᠡ᠂ ᠴᠢ ᠨᠠᠮᠠᠶᠢ ᠲᠠᠨᠢᠬᠤ ᠦᠭᠡᠢ ᠭᠡᠵᠦ ᠭᠤᠷᠪᠠᠨᠲᠠ ᠮᠡᠯᠵᠢᠬᠦ ᠪᠣᠯᠣᠨᠠ》 ᠭᠡᠪᠡ᠃ 31 ᠫᠧᠲ᠋ᠧᠷ ᠰᠢᠭᠤᠷᠬᠠᠢ ᠪᠠᠷ᠄ 《ᠪᠢ ᠲᠠᠨ ᠲᠠᠢ ᠬᠠᠮᠲᠤ ᠦᠬᠦᠭᠰᠡᠨ ᠴᠤ ᠲᠠᠨ ᠢ ᠶᠡᠷᠦ ᠮᠡᠯᠵᠢᠬᠦ ᠦᠭᠡᠢ》 ᠭᠡᠵᠦ ᠳᠠᠪᠲᠠᠨ ᠶᠠᠷᠢᠬᠤ ᠳᠤ᠂ ᠪᠤᠰᠤᠳ ᠨᠢ ᠴᠤ ᠨᠢᠭᠡ ᠳᠠᠭᠤ ᠪᠠᠷ ᠲᠡᠭᠡᠵᠦ ᠬᠡᠯᠡᠵᠡᠭᠡᠯᠡ᠃
ᠭᠧᠲ᠋ᠰᠧᠮᠨᠧ ᠳᠠᠬᠢ ᠳᠠᠭᠠᠳᠬᠠᠯ
32 ᠲᠡᠳᠡ ᠭᠧᠲ᠋ᠰᠧᠮᠨᠧ ᠭᠡᠳᠡᠭ ᠭᠠᠵᠠᠷ ᠬᠦᠷᠬᠦ ᠳᠦ᠂ ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠭᠠᠨ᠄ 《ᠨᠠᠮᠠᠶᠢ ᠳᠠᠭᠠᠳᠬᠠᠬᠤ ᠬᠣᠭᠣᠷᠣᠨᠳᠣ ᠡ᠊ᠨᠳᠡ ᠰᠠᠭᠤᠵᠠᠭᠠᠵᠤ ᠪᠠᠢ》 ᠬᠡᠮᠡᠨ 33 ᠫᠧᠲ᠋ᠧᠷ᠂ ᠶᠠᠺᠣᠪ᠂ ᠶᠣᠬᠠᠨ ᠨᠠᠷ ᠢ ᠳᠠᠭᠠᠭᠤᠯᠵᠤ ᠶᠠᠪᠤᠯᠠ᠃ ᠢᠰᠦ᠋ᠰ ᠴᠣᠴᠢᠷᠳᠠᠵᠤ ᠰᠢᠨᠠᠯᠵᠤ ᠡᠬᠢᠯᠡᠪᠡ᠃ 34 ᠲᠡᠭᠡᠭᠡᠳ ᠲᠡᠷᠡ᠄ 《ᠮᠢᠨᠦ ᠰᠡᠳᠬᠢᠯ ᠵᠣᠪᠠᠭᠠᠳ ᠦᠬᠦᠬᠦ ᠨᠢ᠂ ᠲᠠ ᠨᠠᠷ ᠡ᠊ᠨᠳᠡ ᠦᠯᠡᠳᠡᠭᠡᠳ ᠰᠡᠷᠭᠡᠭ ᠪᠠᠢᠭᠲᠤᠨ》 ᠭᠡᠳ 35 ᠲᠡᠨᠳᠡ ᠡᠴᠡ ᠵᠢᠭᠠᠬᠠᠨ ᠴᠠᠰᠢᠯᠠᠨ ᠭᠠᠵᠠᠷ ᠲᠤ ᠤᠨᠠᠵᠤ᠂ ᠪᠣᠯᠣᠮᠵᠢ ᠲᠠᠢ ᠪᠣᠯ ᠲᠡᠷᠡ ᠴᠠᠭ ᠥᠪᠡᠷ ᠡᠴᠡ ᠨᠢ ᠵᠠᠢᠯᠠᠭᠠᠰᠠᠢ ᠭᠡᠵᠦ ᠳᠠᠭᠠᠳᠬᠠᠬᠤ ᠳᠠᠭᠠᠨ᠄ 36 《ᠠᠪᠪᠠ 15 ᠡ᠂ ᠠᠪᠤ ᠮᠢᠨᠢ ᠡ︕ ᠲᠠ ᠪᠦᠬᠦᠨ ᠢ ᠴᠢᠳᠠᠳᠠᠭ᠃ ᠡᠨᠡ ᠴᠣᠮᠣ ᠶᠢ ᠨᠠᠳᠠ ᠠᠴᠠ ᠵᠠᠢᠯᠠᠭᠤᠯᠤᠭᠠᠴᠢ᠂ ᠭᠡᠪᠡᠴᠦ ᠮᠢᠨᠦ ᠰᠠᠨᠠᠭᠠ ᠪᠠᠷ ᠪᠢᠰᠢ᠂ ᠲᠠᠨ ᠤ ᠰᠠᠨᠠᠭᠠ ᠪᠠᠷ ᠪᠣᠯᠲᠤᠭᠠᠢ》 ᠭᠡᠵᠦ ᠪᠠᠢᠯᠠ᠃ 37 ᠢᠰᠦ᠋ᠰ ᠪᠤᠴᠠᠨ ᠢᠷᠡᠵᠦ ᠱᠠᠪᠢ ᠨᠠᠷ ᠤᠨ ᠢᠶᠠᠨ ᠤᠨᠲᠠᠵᠤ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠫᠧᠲ᠋ᠧᠷ ᠲᠤ᠄ 《ᠰᠢᠮᠣᠨ ᠡ᠂ ᠤᠨᠲᠠᠵᠤ ᠪᠠᠢᠨᠠ ᠤᠤ︖ ᠴᠢ ᠨᠢᠭᠡᠯᠬᠡᠨ ᠴᠠᠭ ᠴᠤ ᠰᠡᠷᠡᠮᠵᠢᠲᠡᠢ ᠪᠠᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠤᠤ︖ 38 ᠲᠡᠩᠰᠡᠯᠲᠡ ᠳᠦ ᠤᠴᠠᠷᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠰᠡᠷᠡᠮᠵᠢᠯᠡᠨ ᠳᠠᠭᠠᠳᠬᠠᠵᠠᠭᠠ᠃ ᠰᠦᠨᠡᠰᠦ ᠨᠢ ᠪᠡᠯᠡᠬᠡᠨ ᠪᠠᠢᠪᠠᠴᠤ ᠪᠡᠶᠡ ᠨᠢ ᠳᠣᠷᠣᠢ ᠪᠠᠢᠨᠠ》 ᠭᠡᠯᠡ᠃ 39 ᠢᠰᠦ᠋ᠰ ᠳᠠᠬᠢᠨ ᠶᠠᠪᠤᠵᠤ᠂ ᠮᠥᠨ ᠤᠤᠯ ᠤᠨ ᠦᠭᠡ ᠪᠡᠷ ᠢᠶᠠᠨ ᠳᠠᠭᠠᠳᠬᠠᠪᠠ᠃ 40 ᠲᠡᠷᠡ ᠳᠠᠬᠢᠨ ᠪᠤᠴᠠᠭᠠᠳ ᠬᠠᠷᠠᠬᠤ ᠳᠤ᠂ ᠲᠡᠳᠡ ᠤᠨᠲᠠᠭᠰᠠᠭᠠᠷ ᠪᠠᠢᠯᠠ᠃ ᠲᠡᠳᠡ ᠵᠣᠪᠬᠢ ᠪᠠᠨ ᠳᠠᠭᠠᠭᠠᠬᠤ ᠪᠠᠨ ᠪᠣᠯᠢᠵᠠᠢ᠃ ᠲᠡᠳᠡ ᠢᠰᠦ᠋ᠰ ᠲᠤ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃ 41 ᠢᠰᠦ᠋ᠰ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠢᠷᠡᠵᠦ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠤᠨᠲᠠᠵᠤ ᠠᠮᠠᠷᠠᠭᠰᠠᠭᠠᠷ ᠪᠠᠢᠨᠠ ᠤᠤ︖ ᠵᠠ᠂ ᠴᠠᠭ ᠪᠣᠯᠣᠯᠠ᠃ ᠠᠩ᠋ᠬᠠᠷᠤᠭᠲᠤᠨ᠂ ᠬᠥᠮᠦᠨ ᠦ ᠬᠦᠦ ᠨᠢᠭᠦᠯᠲᠡᠳ ᠦᠨ ᠭᠠᠷ ᠲᠤ ᠲᠤᠰᠢᠶᠠᠭᠳᠠᠬᠤ ᠭᠡᠵᠦ ᠪᠠᠢᠨᠠ᠃ 42 ᠪᠣᠰ᠂ ᠶᠠᠪᠤᠵᠠᠭᠠᠶᠠ᠃ ᠠᠩ᠋ᠬᠠᠷᠤᠭᠲᠤᠨ᠂ ᠨᠠᠮᠠᠶᠢ ᠲᠤᠰᠢᠶᠠᠭᠴᠢ ᠨᠢ ᠳᠥᠭᠥᠵᠦ ᠢᠷᠡᠯᠡ》 ᠭᠡᠯᠡ᠃
ᠤᠷᠪᠠᠯᠲᠠ ᠬᠢᠭᠡᠳ ᠪᠠᠷᠢᠪᠴᠢᠯᠠᠯᠲᠠ
43 ᠲᠡᠷᠡ ᠡᠢᠨ ᠬᠦ ᠶᠠᠷᠢᠵᠤ ᠪᠠᠢᠲᠠᠯᠠ᠂ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠶᠢᠨ ᠬᠢᠨᠢ ᠨᠢᠭᠡ ᠪᠣᠯᠬᠤ ᠶᠦᠳᠠ ᠢᠯᠳᠦ ᠰᠢᠳᠠᠮ ᠲᠠᠢ ᠣᠯᠠᠨ ᠬᠥᠮᠦᠨ ᠢ ᠳᠠᠭᠠᠭᠤᠯᠤᠨ ᠬᠦᠷᠴᠦ ᠢᠷᠡᠪᠡ᠃ ᠲᠡᠳᠡᠨ ᠢ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ᠂ ᠪᠢᠴᠢᠭᠲᠡᠳ ᠪᠣᠯᠣᠨ ᠠᠬᠠᠯᠠᠭᠴᠢᠳ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ᠃ 44 ᠪᠠᠷᠢᠭᠤᠯᠤᠭᠴᠢ ᠨᠢ ᠲᠡᠳᠡᠨ ᠲᠡᠢ ᠳᠣᠬᠢᠶᠠ ᠪᠣᠯᠵᠣᠵᠤ᠄ 《ᠪᠢ ᠬᠡᠨ ᠢ ᠦᠨᠦᠰᠪᠡᠯ᠂ ᠲᠡᠷᠡ ᠨᠢ ᠢᠰᠦ᠋ᠰ ᠮᠥᠨ᠂ ᠲᠡᠭᠦᠨ ᠢ ᠪᠠᠷᠢᠭᠠᠳ ᠪᠣᠯᠭᠣᠮᠵᠢᠯᠠᠨ ᠠᠪᠴᠤ ᠶᠠᠪᠤᠭᠠᠷᠠᠢ》 ᠭᠡᠰᠡᠨ ᠪᠠᠢᠯᠠ᠃ 45 ᠶᠦᠳᠠ ᠢᠷᠡᠩᠭᠦᠲᠡ ᠪᠡᠨ ᠢᠰᠦ᠋ᠰ ᠲᠤ ᠳᠥᠭᠥᠵᠦ᠄ 《ᠪᠠᠭᠰᠢ ᠡ︕》 ᠭᠡᠳ ᠲᠡᠭᠦᠨ ᠢ ᠦᠨᠦᠰᠬᠦ ᠳᠦ᠂ 46 ᠬᠥᠮᠦᠰ ᠭᠠᠷ ᠬᠥᠳᠡᠯᠵᠦ ᠢᠰᠦ᠋ᠰ ᠢ ᠪᠠᠷᠢᠪᠴᠢᠯᠠᠯᠠ᠃ 47 ᠢᠰᠦ᠋ᠰ ᠤᠨ ᠬᠠᠵᠠᠭᠤ ᠳᠠᠬᠢ ᠬᠥᠮᠦᠰ ᠦᠨ ᠳᠣᠲᠣᠷᠠ ᠠᠴᠠ ᠨᠢᠭᠡ ᠨᠢ ᠢᠯᠳᠦ ᠪᠡᠨ ᠰᠤᠭᠤᠯᠵᠤ᠂ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠶᠢᠨ ᠵᠠᠷᠤᠴᠠ ᠶᠢ ᠴᠠᠪᠴᠢᠬᠤ ᠳᠤ ᠴᠢᠬᠢ ᠨᠢ ᠤᠨᠠᠵᠠᠢ᠃ 48 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠳᠡᠭᠡᠷᠡᠮ ᠪᠠᠷᠢᠪᠴᠢᠯᠠᠬᠤ ᠰᠢᠭ᠋ ᠢᠯᠳᠦ ᠰᠢᠳᠠᠮ ᠠᠳᠬᠤᠵᠤ ᠨᠠᠮᠠᠶᠢ ᠪᠠᠷᠢᠪᠴᠢᠯᠠᠬᠤ ᠪᠠᠷ ᠢᠷᠡᠪᠡ ᠤᠤ︖ 49 ᠪᠢ ᠠᠷᠢᠭᠤᠨ ᠣᠷᠳᠣᠨ ᠳᠤ ᠰᠤᠷᠭᠠᠯ ᠵᠢᠭᠠᠨ ᠡᠳᠦᠷ ᠪᠦᠷᠢ ᠲᠠ ᠨᠠᠷ ᠲᠠᠢ ᠣᠢᠷᠠᠬᠠᠨ ᠪᠠᠢᠬᠤ ᠳᠤ᠂ ᠨᠠᠮᠠᠶᠢ ᠪᠠᠷᠢᠪᠴᠢᠯᠠᠭᠰᠠᠨ ᠦᠭᠡᠢ᠃ ᠭᠡᠬᠦ ᠳᠦ ᠪᠢᠴᠢᠭᠳᠡᠭᠰᠡᠨ ᠡᠰᠢᠯᠡᠯ ᠤᠳ ᠪᠡᠶᠡᠯᠡᠭᠳᠡᠬᠦ ᠶᠣᠰᠣᠲᠠᠢ》 ᠭᠡᠵᠦ ᠬᠡᠯᠡᠪᠡ᠃ 50 ᠱᠠᠪᠢ ᠨᠠᠷ ᠨᠢ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠰᠦ᠋ᠰ ᠢ ᠣᠷᠬᠢᠨ ᠵᠢᠭᠤᠲᠠᠪᠠ᠃
51 ᠨᠢᠭᠡᠨ ᠵᠠᠯᠠᠭᠤ ᠨᠢᠴᠦᠭᠦᠨ ᠪᠡᠶᠡ ᠳᠡᠭᠡᠨ ᠥᠷᠮᠥᠭ ᠨᠥᠮᠥᠷᠥᠨ ᠢᠰᠦ᠋ᠰ ᠢ ᠳᠠᠭᠠᠵᠤ ᠪᠠᠢᠯᠠ᠃ ᠬᠥᠮᠦᠰ ᠲᠡᠭᠦᠨ ᠢ ᠪᠠᠷᠢᠬᠤ ᠳᠤ᠂ 52 ᠲᠡᠷᠡ ᠥᠷᠮᠥᠭ ᠢᠶᠡᠨ ᠬᠠᠶᠠᠭᠠᠳ ᠨᠢᠴᠦᠭᠦᠨ ᠢᠶᠡᠷ ᠢᠶᠠᠨ ᠳᠤᠲᠠᠭᠠᠵᠠᠢ᠃
ᠢᠰᠦ᠋ᠰ ᠶᠦᠳᠠᠢᠴᠤᠳ ᠲᠤ ᠰᠢᠭᠦᠭᠳᠡᠭᠰᠡᠨ ᠨᠢ
53 ᠲᠡᠳᠡ ᠢᠰᠦ᠋ᠰ ᠢ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠳᠤ ᠬᠦᠷᠭᠡᠪᠡ᠃ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ᠂ ᠠᠬᠠᠯᠠᠭᠴᠢᠳ ᠪᠣᠯᠣᠨ ᠪᠢᠴᠢᠭᠲᠡᠳ ᠪᠦᠭᠦᠳᠡᠭᠡᠷ ᠴᠤᠭ ᠢᠷᠡᠯᠡ᠃ 54 ᠫᠧᠲ᠋ᠧᠷ ᠢᠰᠦ᠋ᠰ ᠢ ᠬᠣᠯᠠᠭᠤᠷ ᠳᠠᠭᠠᠵᠤ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠶᠢᠨ ᠬᠦᠷᠢᠶᠡᠨ ᠳᠦ ᠣᠷᠣᠭᠠᠳ᠂ ᠬᠠᠷᠠᠭᠤᠯ ᠤᠳ ᠲᠠᠢ ᠨᠢ ᠬᠠᠮᠲᠤ ᠰᠠᠭᠤᠵᠤ ᠭᠠᠯ ᠳᠤ ᠳᠤᠯᠠᠭᠠᠴᠠᠵᠤ ᠪᠠᠢᠯᠠ᠃ 55 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠬᠢᠭᠡᠳ ᠪᠦᠬᠦ ᠰᠢᠭᠦᠬᠦ ᠵᠥᠪᠯᠡᠯ ᠢᠰᠦ᠋ᠰ ᠢ ᠠᠯᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠲᠡᠭᠦᠨ ᠦ ᠡᠰᠡᠷᠭᠦ ᠭᠡᠷᠡᠴᠢᠯᠡᠯ ᠬᠠᠢᠭᠰᠠᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ᠃ 56 ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠦ ᠡᠰᠡᠷᠭᠦ ᠬᠤᠳᠠᠯ ᠢᠶᠠᠷ ᠭᠡᠷᠡᠴᠢᠯᠡᠭᠰᠡᠨ ᠪᠣᠯᠪᠠᠴᠤ ᠭᠡᠷᠡᠴᠢᠯᠡᠯ ᠤᠳ ᠨᠢ ᠨᠡᠢᠴᠡᠬᠦ ᠦᠭᠡᠢ ᠪᠠᠢᠯᠠ᠃ 57 ᠵᠠᠷᠢᠮ ᠨᠢ ᠪᠣᠰᠣᠭᠠᠳ ᠲᠡᠭᠦᠨ ᠦ ᠡᠰᠡᠷᠭᠦ ᠬᠤᠳᠠᠯ ᠢᠶᠠᠷ ᠭᠡᠷᠡᠴᠢᠯᠡᠨ᠄ 58 《〈ᠬᠥᠮᠦᠨ ᠦ ᠭᠠᠷ ᠢᠶᠠᠷ ᠪᠦᠲᠦᠭᠡᠭᠰᠡᠨ ᠡᠨᠡ ᠥᠷᠭᠥᠭᠡ ᠶᠢ ᠪᠢ ᠨᠤᠷᠠᠭᠠᠵᠤ᠂ ᠬᠥᠮᠦᠨ ᠦ ᠭᠠᠷ ᠢᠶᠠᠷ ᠪᠦᠲᠦᠭᠡᠭᠰᠡᠨ ᠦᠭᠡᠢ ᠥᠭᠡᠷᠡ ᠥᠷᠭᠥᠭᠡ ᠶᠢ ᠭᠤᠷᠪᠠᠨ ᠡᠳᠦᠷ ᠦᠨ ᠳᠣᠲᠣᠷᠠ ᠪᠣᠰᠬᠠᠶᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠢ ᠨᠢ ᠪᠢᠳᠡ ᠰᠣᠨᠣᠰᠣᠭᠰᠠᠨ ᠪᠢᠯᠡ》 ᠭᠡᠵᠦ ᠬᠡᠯᠡᠪᠡ᠃ 59 ᠡᠨᠡ ᠬᠦ ᠭᠡᠷᠡᠴᠢᠯᠡᠯ ᠨᠢ ᠴᠤ ᠨᠡᠢᠯᠡᠯᠴᠡᠬᠦ ᠦᠭᠡᠢ ᠪᠠᠢᠯᠠ᠃ 60 ᠲᠡᠷᠢᠭᠦᠨ ᠲᠠᠬᠢᠯᠴᠢ ᠪᠣᠰᠴᠤ ᠲᠡᠳᠡᠨ ᠦ ᠳᠤᠮᠳᠠ ᠵᠣᠭᠰᠣᠭᠠᠳ ᠢᠰᠦ᠋ᠰ ᠡᠴᠡ᠄ 《ᠶᠠᠭᠤ ᠴᠤ ᠬᠠᠷᠢᠭᠤᠯᠬᠤ ᠦᠭᠡᠢ ᠤᠤ︖ ᠡᠨᠡ ᠬᠥᠮᠦᠰ ᠦᠨ ᠴᠢᠨᠦ ᠡᠰᠡᠷᠭᠦ ᠭᠡᠷᠡᠴᠢᠯᠡᠵᠦ ᠪᠠᠢᠭᠠ ᠨᠢ ᠶᠠᠭᠤ ᠶᠤᠮ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 61 ᠢᠰᠦ᠋ᠰ ᠳᠠᠭᠤ ᠦᠭᠡᠢ ᠪᠠᠢᠭᠰᠠᠭᠠᠷ ᠶᠠᠭᠤ ᠴᠤ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠃ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠳᠠᠬᠢᠨ ᠲᠡᠭᠦᠨ ᠡᠴᠡ᠄ 《ᠴᠢ ᠮᠠᠭᠲᠠᠭᠳᠠᠭᠴᠢ ᠶᠢᠨ ᠬᠦᠦ ᠾᠷᠢᠰᠲ᠋ᠣᠰ ᠮᠥᠨ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 62 ᠢᠰᠦ᠋ᠰ᠄ 《ᠪᠢ ᠮᠥᠨ᠂ ᠬᠥᠮᠦᠨ ᠦ ᠬᠦᠦ ᠬᠦᠴᠦᠲᠦ ᠨᠢᠭᠡᠨ ᠦ ᠪᠠᠷᠠᠭᠤᠨ ᠲᠠᠯᠠ ᠳᠤ ᠰᠠᠭᠤᠬᠤ ᠪᠠ ᠪᠠᠰᠠ ᠲᠩᠷᠢ ᠶᠢᠨ ᠡᠭᠦᠯᠡᠰ ᠲᠡᠢ ᠬᠠᠮᠲᠤ ᠢᠷᠡᠬᠦ ᠶᠢ ᠲᠠ ᠨᠠᠷ ᠬᠠᠷᠠᠬᠤ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠪᠡ᠃ 63 ᠲᠡᠭᠡᠬᠦ ᠳᠦ᠂ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠬᠤᠪᠴᠠᠰᠤ ᠪᠠᠨ ᠤᠷᠠᠭᠠᠳ᠄ 《ᠡᠭᠦᠨ ᠡᠴᠡ ᠢᠯᠡᠭᠦᠦ ᠥᠭᠡᠷᠡ ᠶᠠᠮᠠᠷ ᠭᠡᠷᠡᠴᠢᠯᠡᠭᠴᠢ ᠬᠡᠷᠡᠭ ᠲᠡᠢ ᠪᠤᠢ︖ 64 ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠬᠤ ᠶᠢ ᠨᠢ ᠲᠠ ᠨᠠᠷ ᠰᠣᠨᠣᠰᠣᠯᠠ᠂ ᠲᠠ ᠨᠠᠷ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ︖》 ᠭᠡᠬᠦ ᠳᠦ᠂ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠰᠦ᠋ᠰ ᠲᠤ ᠦᠬᠦᠬᠦ ᠶᠠᠯᠠ ᠲᠣᠭᠲᠠᠭᠠᠪᠠ᠃ 65 ᠲᠡᠭᠡᠭᠡᠳ ᠵᠠᠷᠢᠮ ᠨᠢ ᠲᠡᠭᠦᠨ ᠦ ᠳᠡᠭᠡᠷᠡ ᠨᠤᠯᠮᠤᠨ ᠨᠢᠭᠤᠷ ᠢ ᠨᠢ ᠪᠦᠲᠡᠭᠡᠵᠦ᠂ ᠨᠢᠳᠤᠷᠭᠠᠳᠠᠨ᠄ 《ᠡᠰᠢ ᠦᠵᠡᠭᠦᠯ ᠳᠠ》 ᠭᠡᠵᠦ ᠡᠬᠢᠯᠡᠯᠡ᠃ ᠬᠠᠷᠠᠭᠤᠯ ᠤᠳ ᠨᠢ ᠲᠡᠭᠦᠨ ᠢ ᠲᠠᠲᠠᠨ ᠠᠪᠠᠴᠢᠵᠤ ᠠᠯᠠᠭᠠᠳᠠᠪᠠ᠃
ᠫᠧᠲ᠋ᠧᠷ ᠮᠡᠯᠵᠢᠭᠰᠡᠨ ᠨᠢ
66 ᠫᠧᠲ᠋ᠧᠷ ᠳᠣᠣᠷᠠ ᠬᠦᠷᠢᠶᠡᠨ ᠳᠦ ᠪᠠᠢᠬᠤ ᠳᠤ᠂ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠶᠢᠨ ᠨᠢᠭᠡ ᠰᠢᠪᠡᠭᠴᠢᠨ ᠢᠷᠡᠵᠦ᠂ 67 ᠫᠧᠲ᠋ᠧᠷ ᠤᠨ ᠳᠤᠯᠠᠭᠠᠴᠠᠵᠤ ᠪᠠᠢᠬᠤ ᠶᠢ ᠬᠠᠷᠠᠭᠰᠠᠨ ᠢᠶᠠᠨ᠂ ᠲᠡᠭᠦᠨ ᠢ ᠰᠢᠷᠲᠡᠵᠦ᠄ 《ᠲᠠ ᠴᠤ ᠨᠠᠽᠠᠷᠧᠲ ᠬᠥᠮᠦᠨ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠨ ᠪᠢᠵᠡ》 ᠭᠡᠰᠡᠨ ᠳᠦ᠂ 68 ᠫᠧᠲ᠋ᠧᠷ᠄ 《ᠴᠢᠨᠦ ᠶᠠᠭᠤ ᠶᠠᠷᠢᠵᠤ ᠪᠠᠢᠭᠠ ᠶᠢ ᠪᠢ ᠮᠡᠳᠡᠬᠦ ᠴᠤ ᠦᠭᠡᠢ᠂ ᠣᠢᠯᠠᠭᠠᠬᠤ ᠴᠤ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠮᠡᠯᠵᠢᠭᠡᠳ᠂ ᠲᠡᠨᠳᠡ ᠡᠴᠡ ᠭᠠᠷᠴᠤ ᠬᠦᠷᠢᠶᠡᠨ ᠦ ᠡᠭᠦᠳᠡ ᠤᠷᠤᠭᠤ ᠶᠠᠪᠤᠬᠤ ᠭᠡᠲᠡᠯᠡ [ᠲᠠᠬᠢᠶᠠ ᠳᠤᠤᠭᠠᠷᠤᠯᠠ]᠃ 69 ᠥᠨᠥᠬᠢ ᠰᠢᠪᠡᠭᠴᠢᠨ ᠲᠡᠭᠦᠨ ᠢ ᠬᠠᠷᠠᠵᠤ ᠬᠠᠵᠠᠭᠤ ᠳᠠᠬᠢ ᠬᠥᠮᠦᠰ ᠲᠦ ᠳᠠᠬᠢᠨ᠄ 《ᠡᠨᠡ ᠬᠥᠮᠦᠨ ᠪᠣᠯ ᠲᠡᠳᠡᠨ ᠦ ᠨᠢᠭᠡ ᠨᠢ ᠰᠢᠦ》 ᠬᠡᠮᠡᠨ ᠶᠠᠷᠢᠵᠤ ᠡᠬᠢᠯᠡᠭᠰᠡᠨ ᠳᠦ᠂ 70 ᠫᠧᠲ᠋ᠧᠷ ᠳᠠᠬᠢᠨ ᠮᠡᠯᠵᠢᠪᠡ᠃ ᠬᠡᠰᠡᠭ ᠬᠣᠷᠣᠮ ᠤᠨ ᠳᠠᠷᠠᠭᠠ᠂ ᠬᠠᠵᠠᠭᠤ ᠳᠠᠬᠢ ᠬᠥᠮᠦᠰ ᠨᠢ ᠳᠠᠬᠢᠨ ᠫᠧᠲ᠋ᠧᠷ ᠲᠤ᠄ 《ᠴᠢ ᠭᠠᠯᠢᠯᠠᠶᠠ ᠶᠢᠨ ᠬᠢ ᠶᠤᠮ ᠴᠢᠨᠢ ᠯᠠᠪ ᠲᠡᠳᠡᠨ ᠦ ᠨᠢᠭᠡ ᠨᠢ ᠮᠥᠨ》 ᠭᠡᠯᠴᠡᠵᠦ ᠪᠠᠢᠯᠠ᠃ 71 ᠲᠡᠭᠡᠲᠡᠯᠡ ᠫᠧᠲ᠋ᠧᠷ ᠬᠠᠷᠢᠶᠠᠯ ᠢᠶᠠᠷ ᠲᠠᠩ᠋ᠭᠠᠷᠢᠭᠯᠠᠵᠤ ᠡᠬᠢᠯᠡᠨ᠄ 《ᠲᠠ ᠨᠠᠷ ᠤᠨ ᠶᠠᠷᠢᠭᠠᠳ ᠪᠠᠢᠭᠠ ᠲᠡᠷᠡ ᠬᠥᠮᠦᠨ ᠢ ᠪᠢ ᠲᠠᠨᠢᠬᠤ ᠦᠭᠡᠢ》 ᠭᠡᠵᠦ ᠬᠡᠯᠡᠲᠡᠯᠡ᠂ 72 ᠲᠠᠬᠢᠶᠠ ᠬᠣᠶᠠᠳᠠᠬᠢ ᠤᠳᠠᠭᠠ ᠳᠤᠤᠭᠠᠷᠤᠯᠠ᠃ ᠲᠡᠭᠡᠭᠡᠳ ᠲᠡᠷᠡ 《ᠲᠠᠬᠢᠶᠠ ᠬᠣᠶᠠᠳᠠᠬᠢ ᠤᠳᠠᠭᠠ ᠳᠤᠤᠭᠠᠷᠬᠤ ᠠᠴᠠ ᠡᠮᠦᠨᠡ ᠴᠢ ᠨᠠᠮᠠᠶᠢ ᠲᠠᠨᠢᠬᠤ ᠦᠭᠡᠢ ᠭᠡᠵᠦ ᠭᠤᠷᠪᠠᠨᠲᠠ ᠮᠡᠯᠵᠢᠬᠦ ᠪᠣᠯᠣᠨᠠ》 ᠭᠡᠰᠡᠨ ᠢᠰᠦ᠋ᠰ ᠤᠨ ᠦᠭᠡ ᠶᠢ ᠰᠠᠨᠠᠭᠠᠳ ᠤᠬᠢᠯᠠᠵᠤ ᠪᠠᠢᠯᠠ᠃