ᠶᠣᠬᠠᠨ ᠬᠣᠶᠠᠷ
ᠺᠠᠨᠠ ᠳᠤ ᠪᠣᠯᠣᠭᠰᠠᠨ ᠭᠠᠢᠬᠠᠮᠰᠢᠭ
1 ᠭᠤᠷᠪᠠᠳᠤᠭᠠᠷ ᠡᠳᠦᠷ ᠨᠢ ᠭᠠᠯᠢᠯᠠᠶᠠ ᠶᠢᠨ ᠺᠠᠨᠠ ᠳᠤ ᠬᠤᠷᠢᠮ ᠪᠣᠯᠵᠠᠢ᠃ ᠢᠰᠦ᠋ᠰ ᠤᠨ ᠡᠵᠢ ᠲᠡᠨᠳᠡ ᠪᠠᠢᠭᠰᠠᠨ ᠪᠥᠭᠡᠳ 2 ᠢᠰᠦ᠋ᠰ ᠴᠤ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠬᠤᠷᠢᠮ ᠳᠤ ᠤᠷᠢᠭᠳᠠᠭᠰᠠᠨ ᠪᠠᠢᠪᠠ᠃ 3 ᠦᠵᠦᠮ ᠦᠨ ᠳᠠᠷᠠᠰᠤ ᠨᠢ ᠳᠤᠲᠠᠭᠰᠠᠨ ᠳᠤ᠂ ᠡᠵᠢ ᠨᠢ ᠢᠰᠦ᠋ᠰ ᠲᠤ᠄ 《ᠲᠡᠳᠡᠨ ᠳᠦ ᠦᠵᠦᠮ ᠦᠨ ᠳᠠᠷᠠᠰᠤ ᠦᠭᠡᠢ ᠪᠣᠯᠪᠠ》 ᠭᠡᠯᠡ᠃ 4 ᠢᠰᠦ᠋ᠰ᠄ 《ᠬᠠᠲᠤᠭᠲᠠᠢ ᠡ᠂ ᠲᠠ ᠶᠠᠭᠤᠨ ᠳᠤ ᠨᠠᠮᠠᠶᠢ ᠬᠣᠯᠪᠣᠭᠳᠠᠭᠤᠯᠤᠨᠠ ᠪᠤᠢ︖ ᠮᠢᠨᠦ ᠴᠠᠭ ᠪᠣᠯᠣᠭᠠ ᠦᠭᠡᠢ ᠪᠠᠢᠨᠠ》 ᠭᠡᠪᠡ᠃ 5 ᠡᠵᠢ ᠨᠢ ᠵᠠᠷᠤᠴᠠ ᠨᠠᠷ ᠲᠤ᠄ 《ᠲᠡᠷᠡ ᠲᠠ ᠨᠠᠷ ᠲᠤ ᠶᠠᠭᠤ ᠭᠡᠰᠡᠨ ᠪᠣᠯ ᠲᠡᠭᠦᠨ ᠢ ᠨᠢ ᠬᠢ》 ᠭᠡᠵᠦ ᠬᠡᠯᠡᠪᠡ᠃ 6 ᠶᠦᠳᠠᠢᠴᠤᠳ ᠤᠨ ᠠᠷᠢᠭᠤᠳᠬᠠᠯ ᠤᠨ ᠶᠣᠰᠣ ᠪᠠᠷ ᠲᠤᠰ ᠪᠦᠷᠢ ᠬᠣᠶᠠᠷ ᠭᠤᠷᠪᠠᠨ ᠰᠠᠭᠤᠯᠠᠭᠠ ᠤᠰᠤᠨ ᠤ ᠪᠠᠭᠲᠠᠭᠠᠮᠵᠢ ᠲᠠᠢ 5 ᠵᠢᠷᠭᠤᠭᠠᠨ ᠴᠢᠯᠠᠭᠤᠨ ᠲᠣᠷᠬᠠ ᠲᠡᠨᠳᠡ ᠲᠠᠯᠪᠢᠭᠠᠰᠤᠲᠠᠢ ᠪᠠᠢᠵᠠᠢ᠃ 7 ᠢᠰᠦ᠋ᠰ ᠵᠠᠷᠤᠴᠠ ᠨᠠᠷ ᠲᠤ᠄ 《ᠲᠣᠷᠬᠠ ᠨᠤᠭᠤᠳ ᠢ ᠤᠰᠤ ᠪᠠᠷ ᠳᠦᠭᠦᠷᠭᠡ》 ᠭᠡᠵᠦ ᠬᠡᠯᠡᠭᠰᠡᠨ ᠳᠦ᠂ ᠲᠡᠳᠡ ᠲᠣᠷᠬᠠ ᠨᠤᠭᠤᠳ ᠢ ᠪᠢᠯᠬᠠᠲᠠᠯᠠ ᠳᠦᠭᠦᠷᠭᠡᠪᠡ᠃ 8 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠣᠳᠣ ᠤᠳᠬᠤᠵᠤ ᠠᠪᠤᠨ ᠨᠠᠢᠷ ᠤᠨ ᠳᠠᠭᠠᠭᠠᠮᠠᠯ ᠳᠤ ᠠᠪᠠᠴᠢᠵᠤ ᠥᠭ》 ᠭᠡᠰᠡᠨ ᠳᠦ᠂ ᠲᠡᠳᠡ ᠠᠪᠠᠴᠢᠵᠤ ᠥᠭᠪᠡ᠃ 9 ᠨᠠᠢᠷ ᠤᠨ ᠳᠠᠭᠠᠭᠠᠮᠠᠯ ᠳᠠᠷᠠᠰᠤ ᠪᠣᠯᠣᠭᠰᠠᠨ ᠤᠰᠤ ᠶᠢ ᠠᠮᠰᠠᠭᠠᠳ ᠬᠠᠮᠢᠭᠠ ᠠᠴᠠ ᠠᠪᠴᠢᠷᠠᠭᠰᠠᠨ ᠢ ᠮᠡᠳᠡᠯ ᠦᠭᠡᠢ ᠪᠠᠷ (ᠤᠰᠤ ᠤᠳᠬᠤᠭᠰᠠᠨ ᠵᠠᠷᠤᠴᠠ ᠨᠠᠷ ᠬᠠᠷᠢᠨ ᠮᠡᠳᠡᠪᠡ) ᠰᠢᠨᠡ ᠬᠦᠷᠭᠡᠨ ᠢ ᠳᠠᠭᠤᠳᠠᠵᠤ᠂ 10 ᠲᠡᠭᠦᠨ ᠳᠦ᠄ 《ᠶᠡᠷᠦ ᠨᠢ ᠬᠥᠮᠦᠰ ᠡᠬᠢᠯᠡᠭᠡᠳ ᠰᠠᠢᠨ ᠳᠠᠷᠠᠰᠤ ᠪᠠᠨ ᠭᠠᠷᠭᠠᠨ᠂ ᠵᠣᠴᠢᠳ ᠰᠣᠭᠲᠣᠬᠤ ᠳᠤ ᠮᠠᠭᠤᠬᠠᠨ ᠢᠶᠠᠨ ᠭᠠᠷᠭᠠᠳᠠᠭ ᠪᠠᠢᠲᠠᠯᠠ ᠬᠠᠷᠢᠨ ᠴᠢ ᠰᠠᠢᠨ ᠳᠠᠷᠠᠰᠤ ᠪᠠᠨ ᠣᠳᠣ ᠪᠣᠯᠲᠠᠯᠠ ᠬᠠᠳᠠᠭᠠᠯᠠᠭᠰᠠᠨ ᠪᠠᠢᠵᠠᠢ》 ᠭᠡᠪᠡ᠃ 11 ᠢᠰᠦ᠋ᠰ ᠠᠩ᠋ᠬᠠᠨ ᠤ ᠡᠨᠡ ᠬᠦ ᠰᠢᠳᠢ ᠲᠡᠮᠳᠡᠭ ᠢᠶᠡᠨ ᠭᠠᠯᠢᠯᠠᠶᠠ ᠶᠢᠨ ᠺᠠᠨᠠ ᠳᠤ ᠦᠢᠯᠡᠳᠴᠦ ᠠᠯᠳᠠᠷ ᠰᠤᠤ ᠪᠠᠨ ᠢᠯᠡᠷᠡᠭᠦᠯᠦᠭᠰᠡᠨ ᠪᠥᠭᠡᠳ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠳᠦ ᠢᠲᠡᠭᠡᠪᠡ᠃
12 ᠡᠭᠦᠨ ᠦ ᠳᠠᠷᠠᠭᠠ ᠢᠰᠦ᠋ᠰ ᠡᠵᠢ᠂ ᠳᠡᠭᠦᠦ ᠨᠠᠷ ᠪᠣᠯᠣᠨ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠺᠠᠹᠠᠷᠨᠠᠦ᠋ᠮ ᠳᠤ ᠣᠴᠢᠵᠤ᠂ ᠲᠡᠨᠳᠡ ᠬᠡᠳᠦ ᠬᠣᠨᠣᠪᠠ᠃
ᠠᠷᠢᠭᠤᠨ ᠣᠷᠳᠣᠨ ᠢ ᠴᠡᠪᠡᠷᠰᠢᠭᠦᠯᠦᠭᠰᠡᠨ ᠨᠢ
13 ᠶᠦᠳᠠᠢᠴᠤᠳ ᠤᠨ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠣᠢᠷᠠᠲᠤᠵᠤ ᠪᠠᠢᠬᠤ ᠳᠤ᠂ ᠢᠰᠦ᠋ᠰ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠣᠴᠢᠵᠠᠢ᠃ 14 ᠠᠷᠢᠭᠤᠨ ᠣᠷᠳᠣᠨ ᠳᠣᠲᠣᠷᠠ ᠦᠬᠡᠷ᠂ ᠬᠣᠨᠢ᠂ ᠲᠠᠭᠲᠠᠭᠠ ᠬᠤᠳᠠᠯᠳᠤᠭᠠᠯᠠᠭᠴᠢᠳ ᠪᠠ ᠵᠣᠭᠣᠰ ᠰᠣᠯᠢᠭᠴᠢᠳ ᠤᠨ ᠰᠠᠭᠤᠭᠠ ᠶᠢ ᠢᠰᠦ᠋ᠰ ᠠᠵᠢᠭᠠᠳ᠂ 15 ᠳᠡᠭᠡᠰᠦ ᠪᠡᠷ ᠲᠠᠰᠢᠭᠤᠷ ᠬᠢᠵᠦ᠂ ᠬᠣᠨᠢ᠂ ᠦᠬᠡᠷ ᠲᠡᠢ ᠬᠠᠮᠲᠤ ᠪᠦᠭᠦᠳᠡ ᠶᠢ ᠨᠢ ᠣᠷᠳᠣᠨ ᠠᠴᠠ ᠬᠥᠭᠡᠭᠡᠨ ᠭᠠᠷᠭᠠᠵᠤ ᠵᠣᠭᠣᠰ ᠰᠣᠯᠢᠭᠴᠢᠳ ᠤᠨ ᠵᠣᠭᠣᠰ ᠤᠳ ᠢ ᠪᠤᠲᠠᠷᠠᠭᠠᠨ᠂ ᠰᠢᠷᠡᠭᠡ ᠶᠢ ᠨᠢ ᠬᠥᠷᠪᠡᠭᠦᠯᠵᠦ᠂ 16 ᠲᠠᠭᠲᠠᠭᠠ ᠬᠤᠳᠠᠯᠳᠤᠭᠴᠢᠳ ᠲᠤ᠄ 《ᠡᠳᠡᠭᠡᠷ ᠶᠠᠭᠤᠮᠠ ᠪᠠᠨ ᠡ᠊ᠨᠳᠡ ᠡᠴᠡ ᠠᠪᠠᠴᠢᠵᠠᠭᠠ᠃ ᠮᠢᠨᠦ ᠡᠴᠢᠭᠡ ᠶᠢᠨ ᠭᠡᠷ ᠢ ᠬᠤᠳᠠᠯᠳᠤᠭᠠᠨ ᠤ ᠭᠠᠵᠠᠷ ᠪᠣᠯᠭᠠᠬᠤ ᠪᠠᠨ ᠪᠣᠯᠢᠵᠠᠭᠠ》 ᠭᠡᠯᠡ᠃ 17 ᠱᠠᠪᠢ ᠨᠠᠷ ᠨᠢ 《ᠲᠠᠨ ᠤ ᠥᠷᠭᠥᠭᠡᠨ ᠦ ᠲᠥᠯᠥᠭᠡᠬᠢ ᠬᠠᠯᠠᠭᠤᠨ ᠰᠡᠳᠬᠢᠯ ᠨᠠᠮᠠᠶᠢ ᠵᠠᠯᠭᠢᠨᠠ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠢ ᠰᠠᠨᠠᠪᠠ᠃ 18 ᠶᠦᠳᠠᠢᠴᠤᠳ ᠲᠡᠭᠦᠨ ᠳᠦ᠄ 《ᠲᠠ ᠡᠨᠡ ᠪᠦᠬᠦᠨ ᠢ ᠦᠢᠯᠡᠳᠦᠭᠰᠡᠨ ᠳᠡᠭᠡᠨ ᠪᠢᠳᠡᠨ ᠳᠦ ᠶᠠᠮᠠᠷ ᠲᠡᠮᠳᠡᠭ ᠦᠵᠡᠭᠦᠯᠬᠦ ᠪᠤᠢ︖》 ᠭᠡᠰᠡᠨ ᠳᠦ᠂ 19 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠡᠨᠡ ᠥᠷᠭᠥᠭᠡ ᠶᠢ ᠨᠤᠷᠠᠭᠠ᠂ ᠪᠢ ᠲᠡᠭᠦᠨ ᠢ ᠭᠤᠷᠪᠠ ᠬᠣᠨᠣᠭ ᠤᠨ ᠳᠣᠲᠣᠷᠠ ᠪᠣᠰᠬᠠᠶᠠ》 ᠭᠡᠪᠡ᠃ 20 ᠶᠦᠳᠠᠢᠴᠤᠳ᠄ 《ᠡᠨᠡ ᠥᠷᠭᠥᠭᠡ ᠶᠢ ᠪᠠᠷᠢᠬᠤ ᠳᠤ ᠳᠥᠴᠢᠨ ᠵᠢᠷᠭᠤᠭᠠᠨ ᠵᠢᠯ ᠬᠡᠷᠡᠭᠯᠡᠭᠰᠡᠨ ᠪᠠᠢᠲᠠᠯᠠ ᠲᠠ ᠭᠤᠷᠪᠠ ᠬᠣᠨᠣᠭ ᠤᠨ ᠳᠣᠲᠣᠷᠠ ᠪᠣᠰᠬᠠᠨᠠ ᠭᠡᠵᠢ ᠤᠤ︖》 ᠭᠡᠪᠡ᠃ 21 ᠬᠠᠷᠢᠨ ᠢᠰᠦ᠋ᠰ ᠥᠪᠡᠷ ᠦᠨ ᠪᠡᠶᠡ ᠪᠡᠨ ᠥᠷᠭᠥᠭᠡ ᠭᠡᠳᠡᠭ ᠪᠠᠢᠵᠠᠢ᠃ 22 ᠲᠡᠢᠮᠦ ᠡᠴᠡ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠰᠠᠨ ᠤ ᠬᠢᠨᠢ ᠳᠠᠷᠠᠭᠠ᠂ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠦ ᠶᠠᠷᠢᠭᠰᠠᠨ ᠢ ᠰᠠᠨᠠᠭᠠᠳ᠂ ᠠᠷᠢᠭᠤᠨ ᠨᠣᠮ ᠪᠠ ᠢᠰᠦ᠋ᠰ ᠤᠨ ᠬᠡᠯᠡᠭᠰᠡᠨ ᠦᠭᠡ ᠶᠢ ᠢᠲᠡᠭᠡᠵᠡᠭᠡᠪᠡ᠃
23 ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠢᠶᠠᠷ ᠢᠰᠦ᠋ᠰ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠢᠬᠤ ᠳᠤ᠂ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠦ ᠦᠢᠯᠡᠳᠴᠦ ᠪᠤᠢ ᠰᠢᠳᠢ ᠲᠡᠮᠳᠡᠭ ᠢ ᠦᠵᠡᠭᠡᠳ ᠲᠡᠭᠦᠨ ᠦ ᠨᠡᠷᠡ ᠶᠢ ᠢᠲᠡᠭᠡᠵᠡᠢ 6 ᠃ 24 ᠬᠠᠷᠢᠨ ᠢᠰᠦ᠋ᠰ ᠪᠡᠶᠡ ᠪᠡᠨ ᠲᠡᠳᠡᠨ ᠳᠦ ᠨᠠᠢᠳᠠᠳᠠᠭ ᠦᠭᠡᠢ ᠪᠠᠢᠯᠠ᠃ ᠤᠴᠢᠷ ᠨᠢ ᠲᠡᠷᠡ ᠬᠠᠮᠤᠭ ᠬᠥᠮᠦᠨ ᠢ ᠮᠡᠳᠡᠳᠡᠭ᠃ 25 ᠬᠥᠮᠦᠨ ᠦ ᠲᠤᠬᠠᠢ ᠬᠡᠨ ᠨᠢᠭᠡᠨ ᠦ ᠭᠡᠷᠡᠴᠢᠯᠡᠯ ᠲᠡᠭᠦᠨ ᠳᠦ ᠬᠡᠷᠡᠭ ᠦᠭᠡᠢ ᠪᠠᠢᠪᠠ᠃ ᠬᠥᠮᠦᠨ ᠦ ᠳᠣᠲᠣᠷᠠ ᠶᠠᠭᠤ ᠪᠠᠢᠭᠠ ᠶᠢ ᠲᠡᠷᠡ ᠥᠪᠡᠷ ᠢᠶᠡᠨ ᠮᠡᠳᠡᠵᠦ ᠪᠠᠢᠯᠠ᠃