ᠶᠣᠬᠠᠨ ᠳᠥᠷᠪᠡ
ᠢᠰᠦ᠋ᠰ ᠭᠠᠯᠢᠯᠠᠶᠠ ᠤᠷᠤᠭᠤ ᠴᠢᠭᠯᠡᠭᠰᠡᠨ ᠨᠢ
1 ᠢᠰᠦ᠋ᠰ ᠶᠣᠬᠠᠨ ᠠᠴᠠ ᠢᠯᠡᠭᠦᠦ ᠣᠯᠠᠨ ᠱᠠᠪᠢ ᠣᠯᠵᠤ᠂ ᠤᠬᠢᠶᠠᠯ ᠬᠦᠷᠲᠡᠭᠡᠵᠦ ᠪᠠᠢᠭᠠ ᠭᠡᠵᠦ ᠹᠠᠷᠢᠰᠠᠢᠴᠤᠳ ᠳᠤᠭᠤᠯᠵᠠᠢ᠃ ᠢᠰᠦ᠋ᠰ ᠡᠭᠦᠨ ᠢ ᠮᠡᠳᠡᠭᠡᠳ᠂ 2 (ᠢᠰᠦ᠋ᠰ ᠥᠪᠡᠷ ᠢᠶᠡᠨ ᠪᠢᠰᠢ᠂ ᠬᠠᠷᠢᠨ ᠲᠡᠭᠦᠨ ᠦ ᠱᠠᠪᠢ ᠨᠠᠷ ᠤᠬᠢᠶᠠᠯ ᠬᠦᠷᠲᠡᠭᠡᠭᠰᠡᠨ ᠪᠠᠢᠵᠠᠢ᠃) 3 ᠶᠦᠳᠠᠢ ᠠᠴᠠ ᠭᠠᠷᠴᠤ᠂ ᠭᠠᠯᠢᠯᠠᠶᠠ ᠤᠷᠤᠭᠤ ᠳᠠᠬᠢᠨ ᠶᠠᠪᠤᠪᠠ᠃ 4 ᠭᠡᠬᠦ ᠳᠡᠭᠡᠨ᠂ ᠰᠠᠮᠠᠷᠢᠶᠠ ᠪᠠᠷ ᠳᠠᠭᠠᠷᠢᠵᠤ ᠭᠠᠷᠬᠤ ᠶᠣᠰᠣᠲᠠᠢ ᠪᠠᠢᠯᠠ᠃ 5 ᠢᠰᠦ᠋ᠰ ᠰᠠᠮᠠᠷᠢᠶᠠ ᠳᠠᠬᠢ ᠰᠦᠺᠠᠷ ᠭᠡᠳᠡᠭ ᠨᠢᠭᠡᠨ ᠲᠣᠰᠬᠣᠨ ᠳᠤ ᠬᠦᠷᠦᠯᠡ᠃ ᠶᠠᠺᠣᠪ ᠤᠨ ᠬᠦᠦ ᠶᠣᠰᠧᠹ ᠲᠡᠭᠡᠨ ᠥᠭᠭᠥᠭᠰᠡᠨ ᠭᠠᠵᠠᠷ ᠲᠡᠨᠳᠡ ᠡᠴᠡ ᠬᠣᠯᠠ ᠦᠭᠡᠢ ᠪᠠᠢᠪᠠ᠃ 6 ᠶᠠᠺᠣᠪ ᠤᠨ ᠬᠤᠳᠳᠤᠭ ᠲᠡᠨᠳᠡ ᠪᠠᠢᠵᠠᠢ᠃ ᠠᠶᠠᠨ ᠳᠤ ᠶᠠᠳᠠᠷᠠᠭᠰᠠᠨ ᠢᠰᠦ᠋ᠰ ᠬᠤᠳᠳᠤᠭ ᠤᠨ ᠳᠡᠷᠭᠡᠳᠡ ᠰᠠᠭᠤᠪᠠ᠃ ᠲᠡᠷᠡ ᠨᠢ ᠦᠳᠡ ᠶᠢᠨ ᠦᠶᠡ ᠪᠠᠢᠯᠠ᠃
ᠰᠠᠮᠠᠷᠢᠶᠠ ᠪᠦᠰᠡᠭᠦᠢ
7 ᠰᠠᠮᠠᠷᠢᠶᠠ ᠶᠢᠨ ᠨᠢᠭᠡᠨ ᠡᠮᠡᠭᠲᠡᠢ ᠤᠰᠤ ᠠᠪᠬᠤ ᠪᠠᠷ ᠢᠷᠡᠭᠰᠡᠨ ᠳᠦ᠂ ᠢᠰᠦ᠋ᠰ᠄ 《ᠤᠮᠳᠠ ᠥᠭᠭᠥᠭᠡᠴᠢ》 ᠭᠡᠪᠡ᠃ 8 ᠱᠠᠪᠢ ᠨᠠᠷ ᠨᠢ ᠬᠦᠨᠡᠰᠦ ᠬᠤᠳᠠᠯᠳᠤᠨ ᠠᠪᠬᠤ ᠪᠠᠷ ᠲᠣᠰᠬᠣᠨ ᠤᠷᠤᠭᠤ ᠶᠠᠪᠤᠭᠰᠠᠨ ᠪᠠᠢᠵᠠᠢ᠃ 9 ᠰᠠᠮᠠᠷᠢᠶᠠ ᠡᠮᠡᠭᠲᠡᠢ᠄ 《ᠲᠠ ᠶᠦᠳᠠᠢ ᠬᠥᠮᠦᠨ ᠪᠠᠢᠲᠠᠯᠠ ᠪᠠᠨ ᠶᠠᠭᠠᠬᠢᠭᠠᠳ ᠰᠠᠮᠠᠷᠢᠶᠠ ᠡᠮᠡᠭᠲᠡᠢ ᠨᠠᠳᠠ ᠠᠴᠠ ᠤᠮᠳᠠ ᠭᠤᠶᠤᠨᠠ ᠪᠤᠢ︖》 ᠭᠡᠪᠡ᠃ (ᠤᠴᠢᠷ ᠨᠢ ᠶᠦᠳᠠᠢᠴᠤᠳ ᠰᠠᠮᠠᠷᠢᠶᠠᠴᠤᠳ ᠲᠠᠢ ᠬᠠᠷᠢᠴᠠᠳᠠᠭ ᠦᠭᠡᠢ ᠪᠠᠢᠵᠠᠢ᠃) 10 ᠢᠰᠦ᠋ᠰ ᠲᠡᠭᠦᠨ ᠳᠦ᠄ 《ᠬᠡᠷᠪᠡ ᠴᠢ ᠪᠤᠷᠬᠠᠨ ᠤ ᠰᠣᠶᠣᠷᠬᠠᠯ ᠢ ᠮᠡᠳᠡᠭᠡᠳ 〈ᠤᠮᠳᠠ ᠥᠭᠭᠥᠭᠡᠴᠢ〉 ᠭᠡᠰᠡᠨ ᠨᠢᠭᠡᠨ ᠦ ᠬᠡᠨ ᠪᠣᠯᠬᠤ ᠶᠢ ᠲᠠᠨᠢᠭᠰᠠᠨ ᠪᠣᠯ᠂ ᠴᠢ ᠥᠪᠡᠷ ᠢᠶᠡᠨ ᠲᠡᠭᠦᠨ ᠡᠴᠡ ᠭᠤᠶᠤᠬᠤ ᠪᠥᠭᠡᠳ ᠲᠡᠷᠡ ᠴᠤ ᠴᠢᠮᠠ ᠳᠤ ᠠᠮᠢᠳᠤ ᠶᠢᠨ ᠤᠰᠤ ᠥᠭᠬᠦ ᠪᠠᠢᠭᠰᠠᠨ》 ᠭᠡᠵᠦ ᠬᠡᠯᠡᠪᠡ᠃ 11 ᠲᠡᠷᠡ ᠡᠮᠡᠭᠲᠡᠢ᠄ 《ᠠᠪᠤᠭᠠᠢ ᠡ᠂ ᠲᠠᠨ ᠳᠤ ᠤᠳᠬᠤᠭᠤᠷ ᠠᠯᠠᠭᠠ᠂ ᠬᠤᠳᠳᠤᠭ ᠴᠤ ᠭᠦᠨ᠂ ᠲᠠ ᠠᠮᠢᠳᠤ ᠶᠢᠨ ᠤᠰᠤ ᠶᠢ ᠬᠠᠮᠢᠭᠠ ᠠᠴᠠ ᠣᠯᠬᠤ ᠪᠤᠢ︖ 12 ᠲᠠ ᠪᠢᠳᠡᠨ ᠦ ᠳᠡᠭᠡᠳᠦᠰ ᠶᠠᠺᠣᠪ ᠠᠴᠠ ᠠᠭᠤᠤ ᠶᠤᠮ ᠤᠤ︖ ᠲᠡᠷᠡ ᠡᠨᠡ ᠬᠤᠳᠳᠤᠭ ᠢ ᠪᠢᠳᠡᠨ ᠳᠦ ᠥᠭᠭᠥᠭᠰᠡᠨ᠂ ᠡᠨᠡ ᠤᠰᠤᠨ ᠠᠴᠠ ᠥᠪᠡᠷ ᠢᠶᠡᠨ ᠤᠤᠭᠤᠳᠠᠭ᠂ ᠲᠡᠭᠦᠨ ᠦ ᠦᠷᠡ ᠬᠡᠦᠬᠡᠳ᠂ ᠮᠠᠯ ᠰᠦᠷᠦᠭ ᠴᠤ ᠤᠤᠭᠤᠳᠠᠭ ᠪᠠᠢᠭᠰᠠᠨ》 ᠭᠡᠬᠦ ᠳᠦ᠂ 13 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠡᠨᠡ ᠤᠰᠤᠨ ᠠᠴᠠ ᠤᠤᠭᠤᠭᠴᠢ ᠪᠦᠬᠦᠨ ᠳᠠᠬᠢᠨ ᠴᠠᠩ᠋ᠭᠠᠬᠤ ᠪᠣᠯᠣᠨᠠ᠃ 14 ᠬᠠᠷᠢᠨ ᠮᠢᠨᠦ ᠥᠭᠬᠦ ᠤᠰᠤᠨ ᠠᠴᠠ ᠤᠤᠭᠤᠭᠴᠢ ᠨᠢ ᠶᠡᠷᠦ ᠬᠡᠵᠢᠶᠡ ᠴᠤ ᠴᠠᠩ᠋ᠭᠠᠬᠤ ᠦᠭᠡᠢ ᠪᠥᠭᠡᠳ ᠮᠢᠨᠦ ᠥᠭᠬᠦ ᠤᠰᠤ ᠲᠡᠭᠦᠨ ᠦ ᠳᠣᠲᠣᠷᠠ ᠮᠥᠩᠬᠡ ᠠᠮᠢᠨ ᠳᠤ ᠬᠦᠷᠲᠡᠯᠡ ᠣᠷᠭᠢᠯᠬᠤ ᠪᠤᠯᠠᠭ ᠪᠣᠯᠬᠤ ᠶᠤᠮ》 ᠭᠡᠬᠦ ᠳᠦ᠂ 15 ᠡᠮᠡᠭᠲᠡᠢ᠄ 《ᠠᠪᠤᠭᠠᠢ ᠡ᠂ ᠲᠡᠢᠮᠦ ᠤᠰᠤ ᠪᠠᠨ ᠨᠠᠳᠠ ᠳᠤ ᠥᠭᠭᠥᠭᠡᠴᠢ᠃ ᠲᠡᠭᠡᠪᠡᠯ ᠪᠢ ᠴᠠᠩ᠋ᠭᠠᠬᠤ ᠦᠭᠡᠢ᠂ ᠤᠰᠤ ᠠᠪᠬᠤ ᠪᠠᠷ ᠨᠠᠰᠢ ᠢᠷᠡᠬᠦ ᠬᠡᠷᠡᠭ ᠦᠭᠡᠢ ᠪᠣᠯᠣᠨᠠ》 ᠭᠡᠪᠡ᠃
16 ᠢᠰᠦ᠋ᠰ᠄ 《ᠡ᠊ᠨᠳᠡ ᠡᠴᠡ ᠶᠠᠪᠤᠵᠤ ᠨᠥᠬᠥᠷ ᠢᠶᠡᠨ ᠳᠠᠭᠤᠳᠠᠭᠠᠳ ᠢᠷᠡ》 ᠭᠡᠰᠡᠨ ᠳᠦ᠂ 17 ᠡᠮᠡᠭᠲᠡᠢ ᠬᠠᠷᠢᠭᠤ ᠳᠤᠨᠢ᠄ 《ᠨᠠᠳᠠ ᠳᠤ ᠨᠥᠬᠥᠷ ᠠᠯᠠᠭᠠ》 ᠭᠡᠯᠡ᠃ ᠢᠰᠦ᠋ᠰ᠄ 《〈ᠨᠠᠳᠠ ᠳᠤ ᠨᠥᠬᠥᠷ ᠠᠯᠠᠭᠠ〉 ᠭᠡᠰᠡᠨ ᠴᠢᠨᠢ ᠵᠥᠪ ᠡ᠃ 18 ᠴᠢ ᠲᠠᠪᠤᠨ ᠨᠥᠬᠥᠷ ᠲᠡᠢ ᠪᠠᠢᠭᠰᠠᠨ ᠪᠥᠭᠡᠳ ᠣᠳᠣ ᠶᠢᠨ ᠴᠢᠮᠠ ᠲᠠᠢ ᠪᠠᠢᠭᠠ ᠡᠷᠡ ᠴᠤ ᠨᠥᠬᠥᠷ ᠴᠢᠨᠢ ᠪᠢᠰᠢ ᠲᠤᠯᠠ᠂ ᠦᠨᠡᠨ ᠢᠶᠡᠨ ᠬᠡᠯᠡᠪᠡ ᠴᠢ》 ᠭᠡᠪᠡ᠃ 19 ᠡᠮᠡᠭᠲᠡᠢ᠄ 《ᠠᠪᠤᠭᠠᠢ ᠡ᠂ ᠲᠠ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠤᠮ ᠪᠠᠢᠨᠠ᠃ 20 ᠪᠢᠳᠡᠨ ᠦ ᠳᠡᠭᠡᠳᠦᠰ ᠡᠨᠡ ᠠᠭᠤᠯᠠᠨ ᠳᠡᠭᠡᠷᠡ ᠮᠥᠷᠭᠥᠯ ᠬᠢᠳᠡᠭ ᠪᠠᠢᠭᠰᠠᠨ᠃ ᠬᠠᠷᠢᠨ ᠲᠠ ᠨᠠᠷ ᠮᠥᠷᠭᠥᠬᠦ ᠶᠣᠰᠣᠲᠠᠢ ᠣᠷᠣᠨ ᠢᠶᠠᠨ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠢᠨᠠ ᠭᠡᠵᠡᠭᠡᠳᠡᠭ》 ᠭᠡᠰᠡᠨ ᠳᠦ᠂ 21 ᠢᠰᠦ᠋ᠰ᠄ 《ᠪᠦᠰᠡᠭᠦᠢ᠂ ᠨᠠᠮᠠᠶᠢ ᠢᠲᠡᠭᠡᠭᠡᠴᠢ᠃ ᠲᠠ ᠨᠠᠷ ᠡᠨᠡ ᠠᠭᠤᠯᠠᠨ ᠳᠡᠭᠡᠷᠡ ᠴᠤ ᠪᠢᠰᠢ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠴᠤ ᠪᠢᠰᠢ᠂ ᠡᠴᠢᠭᠡ ᠳᠦ ᠯᠠ ᠮᠥᠷᠭᠥᠬᠦ ᠴᠠᠭ ᠢᠷᠡᠨᠡ᠃ 22 ᠲᠠ ᠨᠠᠷ ᠮᠡᠳᠡᠳᠡᠭ ᠦᠭᠡᠢ ᠵᠦᠢᠯ ᠳᠡᠭᠡᠨ ᠮᠥᠷᠭᠥᠳᠡᠭ ᠪᠣᠯ ᠪᠢᠳᠡ ᠮᠡᠳᠡᠳᠡᠭ ᠵᠦᠢᠯ ᠳᠡᠭᠡᠨ ᠮᠥᠷᠭᠥᠳᠡᠭ᠃ ᠤᠴᠢᠷ ᠨᠢ ᠠᠪᠤᠷᠠᠯ ᠶᠦᠳᠠᠢᠴᠤᠳ ᠠᠴᠠ ᠢᠷᠡᠳᠡᠭ᠃ 23 ᠬᠠᠷᠢᠨ ᠵᠢᠩᠬᠢᠨᠢ ᠮᠥᠷᠭᠥᠭᠴᠢᠳ ᠰᠦᠨᠡᠰᠦ ᠪᠡᠷ ᠢᠶᠠᠨ᠂ ᠴᠢᠩ ᠦᠨᠡᠨ ᠢᠶᠡᠷ ᠡᠴᠢᠭᠡ ᠪᠤᠷᠬᠠᠨ ᠳᠤ ᠮᠥᠷᠭᠥᠬᠦ ᠴᠠᠭ ᠢᠷᠡᠵᠦ ᠪᠠᠢᠭᠠ ᠪᠥᠭᠡᠳ ᠣᠳᠣ ᠢᠷᠡᠴᠢᠬᠡᠭᠡᠳ ᠪᠠᠢᠨᠠ᠃ ᠡᠴᠢᠭᠡ ᠪᠤᠷᠬᠠᠨ ᠥᠪᠡᠷ ᠲᠤᠨᠢ ᠢᠩᠭᠢᠵᠦ ᠮᠥᠷᠭᠥᠭᠴᠢᠳ ᠢ ᠬᠠᠢᠳᠠᠭ ᠶᠤᠮ᠃ 24 ᠪᠤᠷᠬᠠᠨ ᠪᠣᠯ ᠰᠦᠨᠡᠰᠦ᠃ ᠲᠡᠭᠦᠨ ᠳᠦ ᠮᠥᠷᠭᠥᠭᠴᠢᠳ ᠨᠢ ᠰᠦᠨᠡᠰᠦ ᠪᠡᠷ ᠢᠶᠠᠨ᠂ ᠴᠢᠩ ᠦᠨᠡᠨ ᠢᠶᠡᠷ ᠮᠥᠷᠭᠥᠬᠦ ᠶᠣᠰᠣᠲᠠᠢ》 ᠭᠡᠵᠦ ᠬᠡᠯᠡᠯᠡ᠃ 25 ᠡᠮᠡᠭᠲᠡᠢ᠄ 《ᠮᠧᠰᠢᠶᠠ (ᠾᠷᠢᠰᠲ᠋ᠣᠰ) ᠢᠷᠡᠬᠦ ᠶᠢ ᠪᠢ ᠮᠡᠳᠡᠨᠡ᠃ ᠲᠡᠷᠡ ᠢᠷᠡᠪᠡᠯ ᠠᠯᠢᠪᠠ ᠪᠦᠬᠦᠨ ᠢ ᠪᠢᠳᠡᠨ ᠳᠦ ᠲᠠᠢᠯᠪᠤᠷᠢᠯᠠᠨᠠ》 ᠭᠡᠬᠦ ᠳᠦ᠂ 26 ᠢᠰᠦ᠋ᠰ ᠲᠡᠭᠦᠨ ᠳᠦ᠄ 《ᠴᠢᠮᠠ ᠲᠠᠢ ᠶᠠᠷᠢᠵᠤ ᠪᠠᠢᠭᠠ ᠪᠢ ᠪᠣᠯ ᠲᠡᠷᠡ ᠮᠥᠨ》 ᠭᠡᠯᠡ᠃
27 ᠲᠡᠭᠡᠲᠡᠯᠡ ᠱᠠᠪᠢ ᠨᠠᠷ ᠨᠢ ᠬᠦᠷᠴᠦ ᠢᠷᠡᠭᠡᠳ᠂ ᠢᠰᠦ᠋ᠰ ᠤᠨ ᠨᠢᠭᠡᠨ ᠡᠮᠡᠭᠲᠡᠢ ᠲᠡᠢ ᠶᠠᠷᠢᠯᠴᠠᠵᠤ ᠪᠠᠢᠭᠠ ᠳᠤ ᠭᠠᠢᠬᠠᠭᠰᠠᠨ ᠪᠣᠯᠪᠠᠴᠤ ᠬᠡᠨ ᠨᠢ ᠴᠤ᠄ 《ᠲᠠ ᠶᠠᠭᠤ ᠭᠡᠰᠡᠨ ᠪᠤᠢ︖》 ᠭᠡᠬᠦ ᠪᠤᠶᠤ 《ᠲᠡᠭᠦᠨ ᠲᠡᠢ ᠶᠠᠭᠤᠨ ᠳᠤ ᠶᠠᠷᠢᠯᠴᠠᠵᠤ ᠪᠠᠢᠭᠠ ᠪᠤᠢ︖》 ᠬᠡᠮᠡᠨ ᠠᠰᠠᠭᠤᠭᠰᠠᠨ ᠦᠭᠡᠢ᠃ 28 ᠲᠡᠷᠡ ᠡᠮᠡᠭᠲᠡᠢ ᠤᠰᠤᠨ ᠤ ᠪᠠᠨ ᠰᠠᠪᠠ ᠶᠢ ᠣᠷᠬᠢᠨ ᠲᠣᠰᠬᠣᠨ ᠤᠷᠤᠭᠤ ᠪᠠᠨ ᠶᠠᠪᠤᠵᠤ᠂ ᠬᠥᠮᠦᠰ ᠲᠦ᠄ 29 《ᠮᠢᠨᠦ ᠦᠢᠯᠡᠳᠦᠭᠰᠡᠨ ᠪᠦᠬᠦᠨ ᠢ ᠨᠠᠳᠠ ᠳᠤ ᠬᠡᠯᠡᠭᠰᠡᠨ ᠬᠥᠮᠦᠨ ᠢ ᠢᠷᠡᠵᠦ ᠦᠵᠡᠭᠡᠴᠢ᠂ ᠡᠨᠡ ᠴᠢᠨᠢ ᠾᠷᠢᠰᠲ᠋ᠣᠰ ᠪᠢᠰᠢ ᠤᠤ︖》 ᠭᠡᠵᠦ ᠬᠡᠯᠡᠬᠦ ᠳᠦ᠂ 30 ᠬᠥᠮᠦᠰ ᠲᠣᠰᠬᠣᠨ ᠠᠴᠠ ᠭᠠᠷᠴᠤ᠂ ᠢᠰᠦ᠋ᠰ ᠤᠷᠤᠭᠤ ᠣᠴᠢᠵᠠᠭᠠᠪᠠ᠃
31 ᠡᠨᠡ ᠬᠣᠭᠣᠷᠣᠨᠳᠣ ᠱᠠᠪᠢ ᠨᠠᠷ ᠨᠢ᠄ 《ᠪᠠᠭᠰᠢ ᠡ᠂ ᠬᠣᠭᠣᠯᠠᠯᠠᠭᠠᠴᠢ》 ᠭᠡᠬᠦ ᠳᠦ᠂ 32 ᠢᠰᠦ᠋ᠰ᠄ 《ᠲᠠ ᠨᠠᠷ ᠤᠨ ᠮᠡᠳᠡᠬᠦ ᠦᠭᠡᠢ ᠬᠣᠭᠣᠯᠠ ᠨᠠᠳᠠ ᠳᠤ ᠪᠤᠢ》 ᠭᠡᠪᠡ᠃ 33 ᠱᠠᠪᠢ ᠨᠠᠷ ᠨᠢ᠄ 《ᠬᠡᠨ ᠲᠡᠭᠦᠨ ᠳᠦ ᠢᠳᠡᠬᠦ ᠶᠠᠭᠤᠮᠠ ᠠᠪᠴᠢᠷᠠᠵᠤ ᠥᠭᠭᠥᠭᠰᠡᠨ ᠪᠣᠯ︖》 ᠭᠡᠵᠦ ᠶᠠᠷᠢᠯᠴᠠᠵᠠᠢ᠃ 34 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠮᠢᠨᠦ ᠬᠣᠭᠣᠯᠠ ᠪᠣᠯ ᠨᠠᠮᠠᠶᠢ ᠢᠯᠡᠭᠡᠭᠴᠢ ᠶᠢᠨ ᠰᠠᠨᠠᠭᠠ ᠶᠢ ᠪᠡᠶᠡᠯᠡᠭᠦᠯᠦᠨ ᠠᠵᠢᠯ ᠢ ᠨᠢ ᠭᠦᠢᠴᠡᠳᠬᠡᠬᠦ ᠶᠠᠪᠤᠳᠠᠯ ᠮᠥᠨ᠃ 35 ᠲᠠ ᠨᠠᠷ᠄ 〈ᠬᠤᠷᠢᠶᠠᠯᠲᠠ ᠪᠣᠯᠲᠠᠯᠠ ᠳᠥᠷᠪᠡᠨ ᠰᠠᠷᠠ ᠪᠠᠢᠨᠠ〉 ᠭᠡᠵᠡᠭᠡᠳᠡᠭ ᠪᠢᠵᠡ᠃ ᠠᠩ᠋ᠬᠠᠷᠤᠭᠲᠤᠨ︕ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠨᠢᠳᠦ ᠪᠡᠨ ᠡᠷᠭᠦᠨ ᠲᠠᠷᠢᠶᠠ ᠤᠷᠤᠭᠤ ᠬᠠᠷᠠ᠃ ᠲᠠᠷᠢᠶᠠ ᠪᠣᠯᠪᠠᠰᠤᠷᠠᠵᠤ ᠬᠤᠷᠢᠶᠠᠬᠤ ᠳᠤ ᠪᠡᠯᠡᠨ ᠪᠣᠯᠵᠠᠢ᠃ 36 ᠬᠠᠳᠤᠭᠴᠢ ᠨᠢ ᠬᠥᠯᠥᠰᠥ ᠪᠡᠨ ᠬᠦᠷᠲᠡᠵᠦ᠂ ᠮᠥᠩᠬᠡ ᠠᠮᠢ ᠤᠷᠤᠭᠤ ᠦᠷᠡ ᠲᠠᠷᠢᠶᠠ ᠬᠤᠷᠢᠶᠠᠨᠠ᠃ ᠲᠡᠢᠨ ᠬᠦ ᠲᠠᠷᠢᠭᠴᠢ ᠨᠢ ᠬᠠᠳᠤᠭᠴᠢ ᠲᠠᠢ ᠬᠠᠮᠲᠤ ᠪᠠᠶᠠᠷᠯᠠᠬᠤ ᠪᠣᠯᠣᠨᠠ᠃ 37 ᠡᠢᠮᠦ ᠡᠴᠡ 〈ᠨᠢᠭᠡ ᠨᠢ ᠲᠠᠷᠢᠵᠤ᠂ ᠨᠥᠭᠥᠭᠡ ᠨᠢ ᠬᠤᠷᠢᠶᠠᠨᠠ〉 ᠭᠡᠰᠡᠨ ᠦᠭᠡ ᠦᠨᠡᠨ ᠪᠠᠢᠨᠠ᠃ 38 ᠥᠪᠡᠷᠰᠡᠳ ᠦᠨ ᠴᠢᠨᠢ ᠵᠦᠳᠡᠷᠡᠭᠡ ᠦᠭᠡᠢ ᠵᠦᠢᠯ ᠢ ᠬᠤᠷᠢᠶᠠᠯᠭᠠᠬᠤ ᠪᠠᠷ ᠪᠢ ᠲᠠ ᠨᠠᠷ ᠢ ᠢᠯᠡᠭᠡᠪᠡ᠂ ᠪᠤᠰᠤᠳ ᠬᠥᠮᠦᠨ ᠵᠦᠳᠡᠷᠡᠭᠰᠡᠨ ᠪᠥᠭᠡᠳ᠂ ᠵᠦᠳᠡᠷᠡᠭᠰᠡᠨ ᠦ ᠬᠢᠨᠢ ᠠᠰᠢᠭ ᠢ ᠲᠠ ᠨᠠᠷ ᠬᠤᠷᠢᠶᠠᠭᠰᠠᠨ》 ᠭᠡᠪᠡ᠃
ᠰᠠᠮᠠᠷᠢᠶᠠᠴᠤᠳ ᠣᠯᠠᠨ ᠢᠶᠠᠷ ᠢᠲᠡᠭᠡᠭᠰᠡᠨ ᠨᠢ
39 《ᠮᠢᠨᠦ ᠦᠢᠯᠡᠳᠦᠭᠰᠡᠨ ᠪᠦᠬᠦᠨ ᠢ ᠲᠡᠷᠡ ᠨᠠᠳᠠ ᠳᠤ ᠬᠡᠯᠡᠭᠰᠡᠨ》 ᠭᠡᠵᠦ ᠥᠨᠥᠬᠢ ᠡᠮᠡᠭᠲᠡᠢ ᠶᠢᠨ ᠭᠡᠷᠡᠴᠢᠯᠡᠭᠰᠡᠨ ᠦᠭᠡᠨ ᠡᠴᠡ ᠪᠣᠯᠵᠤ᠂ ᠲᠡᠷᠡ ᠲᠣᠰᠬᠣᠨ ᠤ ᠰᠠᠮᠠᠷᠢᠶᠠᠴᠤᠳ ᠣᠯᠠᠨ ᠢᠶᠠᠷ ᠢᠰᠦ᠋ᠰ ᠢ ᠢᠲᠡᠭᠡᠵᠡᠢ᠃ 40 ᠰᠠᠮᠠᠷᠢᠶᠠᠴᠤᠳ ᠢᠰᠦ᠋ᠰ ᠤᠷᠤᠭᠤ ᠢᠷᠡᠵᠦ᠂ ᠥᠪᠡᠷᠰᠡᠳ ᠲᠡᠢ ᠨᠢ ᠬᠠᠮᠲᠤ ᠪᠠᠢᠬᠤ ᠶᠢ ᠭᠤᠶᠤᠭᠠᠳ ᠪᠠᠢᠬᠤ ᠳᠤ᠂ ᠢᠰᠦ᠋ᠰ ᠲᠡᠨᠳᠡ ᠬᠣᠶᠠᠷ ᠬᠣᠨᠣᠪᠠ᠃ 41 ᠢᠰᠦ᠋ᠰ ᠤᠨ ᠦᠭᠡᠨ ᠡᠴᠡ ᠪᠣᠯᠵᠤ᠂ ᠨᠡᠩ ᠣᠯᠠᠨ ᠬᠥᠮᠦᠨ ᠢᠲᠡᠭᠡᠵᠡᠭᠡᠪᠡ᠃ 42 ᠲᠡᠳᠡ ᠥᠨᠥᠬᠢ ᠡᠮᠡᠭᠲᠡᠢ ᠳᠦ᠄ 《ᠪᠢᠳᠡ ᠴᠢᠨᠦ ᠶᠠᠷᠢᠭᠰᠠᠨ ᠢᠶᠠᠷ ᠢᠲᠡᠭᠡᠬᠦ ᠪᠢᠰᠢ᠂ ᠬᠠᠷᠢᠨ ᠥᠪᠡᠷᠰᠡᠳ ᠢᠶᠡᠨ ᠰᠣᠨᠣᠰᠣᠭᠠᠳ ᠡᠨᠡ ᠬᠥᠮᠦᠨ ᠦᠨᠡᠬᠡᠷ ᠶᠢᠷᠲᠢᠨᠴᠦ ᠶᠢᠨ ᠠᠪᠤᠷᠠᠭᠴᠢ ᠶᠤᠮ ᠭᠡᠰᠡᠨ ᠢ ᠮᠡᠳᠡᠯᠡ》 ᠭᠡᠵᠡᠭᠡᠪᠡ᠃
43 ᠬᠣᠶᠠᠷ ᠬᠣᠨᠣᠭ ᠤᠨ ᠳᠠᠷᠠᠭᠠ᠂ ᠢᠰᠦ᠋ᠰ ᠲᠡᠨᠳᠡ ᠡᠴᠡ ᠭᠠᠷᠴᠤ ᠭᠠᠯᠢᠯᠠᠶᠠ ᠳᠤ ᠬᠦᠷᠴᠡᠢ᠃ 44 (ᠡᠰᠢ ᠦᠵᠡᠭᠦᠯᠦᠭᠴᠢ ᠨᠤᠲᠤᠭ ᠲᠠᠭᠠᠨ ᠬᠦᠨᠳᠦ ᠦᠭᠡᠢ ᠶᠢ ᠢᠰᠦ᠋ᠰ ᠥᠪᠡᠷ ᠢᠶᠡᠨ ᠭᠡᠷᠡᠴᠢᠯᠡᠭᠰᠡᠨ ᠪᠢᠯᠡ᠃) 45 ᠭᠠᠯᠢᠯᠠᠶᠠ ᠳᠤ ᠢᠷᠡᠬᠦ ᠳᠦᠨᠢ ᠭᠠᠯᠢᠯᠠᠴᠤᠳ ᠲᠡᠭᠦᠨ ᠢ ᠤᠭᠲᠤᠨ ᠠᠪᠤᠯᠠ᠃ ᠲᠡᠳᠡ ᠪᠠᠰᠠ ᠪᠠᠶᠠᠷ ᠢᠶᠠᠷ ᠶᠧᠷᠦ᠋ᠰᠠᠯᠧᠮ ᠳᠤ ᠣᠴᠢᠭᠠᠳ ᠢᠰᠦ᠋ᠰ ᠤᠨ ᠲᠡᠨᠳᠡ ᠦᠢᠯᠡᠳᠦᠭᠰᠡᠨ ᠪᠦᠬᠦᠨ ᠢ ᠬᠠᠷᠠᠭᠰᠠᠨ ᠪᠠᠢᠵᠠᠢ᠃
ᠲᠦᠰᠢᠮᠡᠯ ᠦᠨ ᠬᠦᠦ ᠶᠢ ᠡᠳᠡᠭᠡᠭᠡᠭᠰᠡᠨ ᠨᠢ
46 ᠢᠰᠦ᠋ᠰ ᠤᠰᠤ ᠶᠢ ᠦᠵᠦᠮ ᠦᠨ ᠳᠠᠷᠠᠰᠤ ᠪᠣᠯᠭᠠᠭᠰᠠᠨ ᠭᠠᠯᠢᠯᠠᠶᠠ ᠶᠢᠨ ᠺᠠᠨᠠ ᠳᠤ ᠳᠠᠬᠢᠨ ᠣᠴᠢᠪᠠ᠃ ᠬᠠᠨ ᠤ ᠨᠢᠭᠡᠨ ᠲᠦᠰᠢᠮᠡᠯ ᠲᠡᠨᠳᠡ ᠪᠠᠢᠭᠰᠠᠨ ᠪᠥᠭᠡᠳ ᠬᠦᠦ ᠨᠢ ᠺᠠᠹᠠᠷᠨᠠᠦ᠋ᠮ ᠳᠤ ᠡᠪᠡᠳᠴᠢᠯᠡᠭᠰᠡᠨ ᠪᠠᠢᠯᠠ᠃ 47 ᠲᠡᠷᠡ ᠲᠦᠰᠢᠮᠡᠯ ᠢᠰᠦ᠋ᠰ ᠤᠨ ᠶᠦᠳᠠᠢ ᠠᠴᠠ ᠭᠠᠯᠢᠯᠠᠶᠠ ᠳᠤ ᠢᠷᠡᠭᠰᠡᠨ ᠢ ᠰᠣᠨᠣᠰᠣᠭᠠᠳ ᠲᠡᠭᠦᠨ ᠳᠦ ᠣᠴᠢᠵᠤ᠄ 《ᠺᠠᠹᠠᠷᠨᠠᠦ᠋ᠮ ᠳᠤ ᠬᠦᠷᠴᠦ ᠮᠢᠨᠦ ᠬᠦᠦ ᠶᠢ ᠡᠳᠡᠭᠡᠭᠡᠭᠡᠳ ᠥᠭᠭᠥᠭᠡᠴᠢ》 ᠭᠡᠵᠦ ᠭᠤᠶᠤᠪᠠ᠃ ᠲᠡᠭᠡᠬᠦ ᠳᠦ ᠬᠦᠦ ᠨᠢ ᠦᠬᠦᠮᠡᠷ ᠪᠠᠢᠭᠰᠠᠨ ᠠᠵᠢ᠃ 48 ᠢᠰᠦ᠋ᠰ᠄ 《ᠲᠠ ᠨᠠᠷ ᠰᠢᠳᠢ ᠲᠡᠮᠳᠡᠭ ᠪᠠ ᠭᠠᠢᠬᠠᠮᠰᠢᠭ ᠢ ᠦᠵᠡᠬᠦ ᠦᠭᠡᠢ ᠪᠣᠯ ᠶᠡᠷᠦ ᠢᠲᠡᠭᠡᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠬᠦ ᠳᠦ᠂ 49 ᠲᠦᠰᠢᠮᠡᠯ᠄ 《ᠡᠵᠡᠨ ᠡ᠂ ᠬᠡᠦᠬᠡᠳ ᠢ ᠮᠢᠨᠢ ᠦᠬᠦᠬᠦ ᠡᠴᠡ ᠨᠢ ᠡᠮᠦᠨᠡ ᠣᠴᠢᠭᠠᠴᠢ》 ᠭᠡᠯᠡ᠃ 50 ᠢᠰᠦ᠋ᠰ᠄ 《ᠶᠠᠪᠤ᠂ ᠬᠦᠦ ᠴᠢᠨᠢ ᠠᠮᠢᠳᠤᠷᠠᠨᠠ》 ᠭᠡᠬᠦ ᠳᠦ᠂ ᠲᠡᠷᠡ ᠬᠥᠮᠦᠨ ᠢᠰᠦ᠋ᠰ ᠤᠨ ᠬᠡᠯᠡᠭᠰᠡᠨ ᠦᠭᠡ ᠶᠢ ᠢᠲᠡᠭᠡᠵᠦ ᠬᠠᠷᠢᠪᠠ᠃ 51 ᠲᠡᠢᠨ ᠬᠦ ᠶᠠᠪᠤᠲᠠᠯᠠ ᠪᠣᠭᠣᠯ ᠤᠳ ᠨᠢ ᠢᠷᠡᠵᠦ᠂ ᠬᠦᠦ ᠶᠢᠨ ᠬᠢᠨᠢ ᠠᠮᠢᠳᠤ ᠪᠠᠢᠬᠤ ᠶᠢ ᠳᠤᠭᠤᠯᠭᠠᠯᠠ᠃ 52 ᠲᠦᠰᠢᠮᠡᠯ ᠬᠦᠦ ᠶᠢᠨ ᠢᠶᠠᠨ ᠠᠯᠢ ᠴᠠᠭ ᠲᠤ ᠰᠠᠢᠵᠢᠷᠠᠵᠤ ᠡᠬᠢᠯᠡᠭᠰᠡᠨ ᠢ ᠠᠰᠠᠭᠤᠭᠰᠠᠨ ᠳᠤ᠂ 《ᠥᠴᠥᠭᠡᠳᠦᠷ ᠦᠳᠡ ᠶᠢᠨ ᠬᠣᠢᠨᠠᠬᠢ ᠨᠢᠭᠡ ᠴᠠᠭ ᠲᠤ ᠬᠠᠯᠠᠭᠤᠨ ᠨᠢ ᠬᠠᠷᠢᠭᠰᠠᠨ》 ᠭᠡᠪᠡ᠃ 53 ᠢᠰᠦ᠋ᠰ ᠶᠠᠭ ᠲᠡᠷᠡ ᠴᠠᠭ ᠲᠤ᠄ 《ᠬᠦᠦ ᠴᠢᠨᠢ ᠠᠮᠢᠳᠤᠷᠠᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠢ ᠡᠴᠢᠭᠡ ᠨᠢ ᠤᠬᠠᠮᠰᠠᠷᠯᠠᠭᠠᠳ ᠪᠦᠬᠦ ᠭᠡᠷ ᠢᠶᠡᠷ ᠢᠶᠠᠨ ᠢᠲᠡᠭᠡᠵᠡᠢ᠃ 54 ᠢᠰᠦ᠋ᠰ ᠤᠨ ᠶᠦᠳᠠᠢ ᠠᠴᠠ ᠭᠠᠯᠢᠯᠠᠶᠠ ᠳᠤ ᠢᠷᠡᠭᠡᠳ ᠦᠢᠯᠡᠳᠦᠭᠰᠡᠨ ᠬᠣᠶᠠᠳᠠᠬᠢ ᠰᠢᠳᠢ ᠲᠡᠮᠳᠡᠭ ᠨᠢ ᠡᠨᠡ ᠶᠤᠮ᠃