ᠶᠣᠬᠠᠨ ᠠᠷᠪᠠᠨ ᠭᠤᠷᠪᠠ
ᠢᠰᠦ᠋ᠰ ᠱᠠᠪᠢ ᠨᠠᠷ ᠤᠨ ᠢᠶᠠᠨ ᠬᠥᠯ ᠢ ᠤᠬᠢᠶᠠᠭᠰᠠᠨ ᠨᠢ
1 ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠠᠴᠠ ᠡᠮᠦᠨᠡ ᠢᠰᠦ᠋ᠰ ᠡᠨᠡ ᠶᠢᠷᠲᠢᠨᠴᠦ ᠡᠴᠡ ᠰᠠᠯᠵᠤ ᠡᠴᠢᠭᠡ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠴᠠᠭ ᠨᠢ ᠪᠣᠯᠣᠭᠰᠠᠨ ᠢᠶᠠᠨ ᠮᠡᠳᠡᠪᠡ᠃ ᠲᠡᠷᠡ ᠶᠢᠷᠲᠢᠨᠴᠦ ᠳᠦ ᠪᠠᠢᠭᠠ ᠥᠪᠡᠷ ᠦᠨ ᠬᠢᠨ ᠢᠶᠠᠨ ᠬᠠᠢᠷᠠᠯᠠᠨ ᠲᠡᠳᠡᠨ ᠢ ᠡᠴᠦᠰ ᠲᠤᠨᠢ ᠲᠤᠯᠲᠠᠯᠠ ᠬᠠᠢᠷᠠᠯᠠᠪᠠ᠃ 2 ᠣᠷᠣᠢ ᠶᠢᠨ ᠵᠣᠭᠣᠭ ᠪᠣᠯᠪᠠ᠃ ᠢᠰᠦ᠋ᠰ ᠢ ᠪᠠᠷᠢᠭᠤᠯᠬᠤ ᠪᠣᠳᠣᠯ ᠢ ᠰᠠᠲ᠋ᠠᠨ ᠰᠢᠮᠣᠨ ᠤ ᠬᠦᠦ ᠢᠰᠺᠠᠷᠢᠣᠲ ᠤᠨ ᠶᠦᠳᠠ ᠶᠢᠨ ᠰᠡᠳᠬᠢᠯ ᠳᠤ ᠬᠡᠳᠦᠢᠨᠡᠢ ᠣᠷᠣᠭᠤᠯᠤᠭᠰᠠᠨ ᠪᠠᠢᠯᠠ᠃ 3 ᠡᠴᠢᠭᠡ ᠨᠢ ᠪᠦᠬᠦ ᠶᠠᠭᠤᠮᠠ ᠪᠠᠨ ᠥᠪᠡᠷ ᠦᠨ ᠬᠢᠨᠢ ᠭᠠᠷ ᠲᠤ ᠥᠭᠭᠥᠭᠰᠡᠨ ᠢ᠂ ᠮᠥᠨ ᠪᠤᠷᠬᠠᠨ ᠠᠴᠠ ᠢᠷᠡᠭᠡᠳ ᠪᠤᠷᠬᠠᠨ ᠤᠷᠤᠭᠤ ᠪᠤᠴᠠᠨ ᠶᠠᠪᠤᠬᠤ ᠪᠠᠨ ᠢᠰᠦ᠋ᠰ ᠮᠡᠳᠡᠭᠡᠳ 4 ᠵᠣᠭᠣᠭ ᠤᠨ ᠰᠢᠷᠡᠭᠡᠨ ᠡᠴᠡ ᠪᠣᠰᠴᠤ᠂ ᠭᠠᠳᠠᠭᠤᠷ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠤᠨ ᠠᠯᠴᠢᠭᠤᠷ ᠠᠪᠴᠤ ᠪᠦᠰᠡᠯᠡᠪᠡ᠃ 5 ᠲᠡᠭᠡᠭᠡᠳ ᠭᠠᠳᠤᠷᠠ ᠳᠤ ᠤᠰᠤ ᠬᠢᠵᠦ᠂ ᠱᠠᠪᠢ ᠨᠠᠷ ᠤᠨ ᠢᠶᠠᠨ ᠬᠥᠯ ᠢ ᠤᠭᠢᠶᠠᠭᠠᠳ᠂ ᠪᠦᠰᠡᠯᠡᠭᠰᠡᠨ ᠠᠯᠴᠢᠭᠤᠷ ᠢᠶᠠᠷ ᠢᠶᠠᠨ ᠠᠷᠴᠢᠵᠤ ᠡᠬᠢᠯᠡᠪᠡ᠃ 6 ᠰᠢᠮᠣᠨ ᠫᠧᠲ᠋ᠧᠷ ᠲᠤ ᠬᠦᠷᠬᠦ ᠳᠦ ᠲᠡᠷᠡ᠄ 《ᠡᠵᠡᠨ ᠡ᠂ ᠲᠠ ᠮᠢᠨᠦ ᠬᠥᠯ ᠢ ᠤᠭᠢᠶᠠᠬᠤ ᠨᠢ ᠤᠤ︖》 ᠭᠡᠬᠦ ᠳᠦ᠂ 7 ᠢᠰᠦ᠋ᠰ᠄ 《ᠴᠢ ᠮᠢᠨᠦ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠢ ᠣᠳᠣ ᠮᠡᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠬᠣᠵᠢᠮ ᠣᠢᠯᠠᠭᠠᠨᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 8 ᠫᠧᠲ᠋ᠧᠷ᠄ 《ᠪᠢ ᠶᠡᠷᠦ ᠲᠠᠨ ᠢᠶᠠᠷ ᠬᠥᠯ ᠢᠶᠡᠨ ᠤᠬᠢᠶᠠᠯᠭᠠᠬᠤ ᠦᠭᠡᠢ》 ᠭᠡᠰᠡᠨ ᠳᠦ᠂ ᠢᠰᠦ᠋ᠰ᠄ 《ᠪᠢ ᠴᠢᠮᠠᠶᠢ ᠤᠭᠢᠶᠠᠬᠤ ᠦᠭᠡᠢ ᠪᠣᠯ ᠴᠢ ᠨᠠᠳᠠ ᠲᠠᠢ ᠬᠤᠪᠢ ᠦᠭᠡᠢ》 ᠭᠡᠯᠡ᠃ 9 ᠲᠡᠭᠡᠲᠡᠯᠡ ᠰᠢᠮᠣᠨ ᠫᠧᠲ᠋ᠧᠷ᠄ 《ᠡᠵᠡᠨ ᠡ᠂ ᠵᠥᠪᠬᠡᠨ ᠬᠥᠯ ᠢ ᠪᠢᠰᠢ᠂ ᠪᠠᠰᠠ ᠭᠠᠷ᠂ ᠲᠣᠯᠣᠭᠠᠢ ᠶᠢ ᠮᠢᠨᠢ ᠴᠤ ᠤᠭᠢᠶᠠᠭᠠᠴᠢ》 ᠭᠡᠵᠦ ᠬᠡᠯᠡᠭᠰᠡᠨ ᠳᠦ᠂ 10 ᠢᠰᠦ᠋ᠰ᠄ 《ᠪᠡᠶᠡ ᠪᠡᠨ ᠤᠭᠢᠶᠠᠭᠰᠠᠨ ᠬᠥᠮᠦᠨ ᠪᠦᠬᠦ ᠪᠡᠶᠡ ᠨᠢ ᠴᠡᠪᠡᠷ ᠤᠴᠢᠷ ᠠᠴᠠ ᠬᠥᠯ ᠢᠶᠡᠨ ᠯᠠ ᠤᠭᠢᠶᠠᠪᠠᠯ ᠪᠣᠯᠣᠨᠠ᠃ ᠲᠠ ᠨᠠᠷ ᠴᠡᠪᠡᠷ ᠪᠠᠢᠨᠠ᠂ ᠭᠡᠬᠦ ᠳᠡᠭᠡᠨ ᠴᠥᠮ ᠢᠶᠡᠷ ᠢᠶᠠᠨ ᠪᠢᠰᠢ ᠰᠢᠦ》 ᠭᠡᠯᠡ᠃ 11 ᠢᠰᠦ᠋ᠰ ᠥᠪᠡᠷ ᠢ ᠨᠢ ᠪᠠᠷᠢᠭᠤᠯᠬᠤ ᠬᠥᠮᠦᠨ ᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠤᠴᠢᠷ ᠠᠴᠠ 《ᠴᠥᠮ ᠢᠶᠡᠷ ᠢᠶᠠᠨ ᠴᠡᠪᠡᠷ ᠭᠡᠰᠡᠨ ᠪᠢᠰᠢ》 ᠭᠡᠵᠦ ᠬᠡᠯᠡᠵᠡᠢ᠃
12 ᠢᠰᠦ᠋ᠰ ᠲᠡᠳᠡᠨ ᠦ ᠬᠥᠯ ᠢ ᠤᠭᠢᠶᠠᠭᠰᠠᠨ ᠤ ᠳᠠᠷᠠᠭᠠ᠂ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ ᠳᠠᠬᠢᠨ ᠣᠷᠣᠨ ᠳᠠᠭᠠᠨ ᠰᠠᠭᠤᠭᠠᠳ᠄ 《ᠲᠠ ᠨᠠᠷ ᠲᠤ ᠶᠠᠭᠤ ᠬᠢᠵᠦ ᠥᠭᠭᠥᠭᠰᠡᠨ ᠢ ᠮᠢᠨᠢ ᠣᠢᠯᠠᠭᠠᠵᠤ ᠪᠠᠢᠨᠠ ᠤᠤ︖ 13 ᠲᠠ ᠨᠠᠷ ᠨᠠᠮᠠᠶᠢ ᠪᠠᠭᠰᠢ᠂ ᠡᠵᠡᠨ ᠭᠡᠵᠦ ᠳᠠᠭᠤᠳᠠᠳᠠᠭ ᠴᠢᠨᠢ ᠵᠥᠪ᠂ ᠪᠢ ᠮᠥᠨ ᠪᠠᠢᠨᠠ᠃ 14 ᠡᠵᠡᠨ ᠪᠥᠭᠡᠳ ᠪᠠᠭᠰᠢ ᠴᠢᠨᠢ ᠪᠢ ᠲᠠ ᠨᠠᠷ ᠤᠨ ᠬᠥᠯ ᠢ ᠤᠭᠢᠶᠠᠭᠰᠠᠨ᠂ ᠲᠠ ᠨᠠᠷ ᠴᠤ ᠨᠢᠭᠡ ᠨᠢᠭᠡᠨ ᠦ ᠪᠠᠨ ᠬᠥᠯ ᠢ ᠤᠭᠢᠶᠠᠬᠤ ᠶᠣᠰᠣᠲᠠᠢ᠃ 15 ᠮᠢᠨᠦ ᠲᠠ ᠨᠠᠷ ᠲᠤ ᠬᠢᠭᠰᠡᠨ ᠶᠣᠰᠣᠭᠠᠷ ᠲᠠ ᠨᠠᠷ ᠢ ᠴᠤ ᠬᠢᠭᠡᠰᠡᠢ ᠭᠡᠵᠦ ᠪᠢ ᠵᠢᠱᠢᠶᠡ ᠦᠵᠡᠭᠦᠯᠦᠭᠰᠡᠨ ᠶᠤᠮ᠃ 16 ᠲᠠ ᠨᠠᠷ ᠲᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠪᠣᠭᠣᠯ ᠨᠢ ᠡᠵᠡᠨ ᠡᠴᠡ ᠪᠡᠨ ᠠᠭᠤᠤ ᠪᠠᠢᠳᠠᠭ ᠦᠭᠡᠢ᠂ ᠮᠥᠨ ᠢᠯᠡᠭᠡᠭᠳᠡᠭᠴᠢ ᠨᠢ ᠢᠯᠡᠭᠡᠭᠴᠢ ᠡᠴᠡ ᠪᠡᠨ ᠠᠭᠤᠤ ᠪᠢᠰᠢ ᠶᠤᠮ᠃ 17 ᠲᠠ ᠨᠠᠷ ᠡᠳᠡᠭᠡᠷ ᠢ ᠮᠡᠳᠡᠵᠦ᠂ ᠦᠢᠯᠡᠳᠪᠡᠯ ᠢᠪᠡᠭᠡᠭᠳᠡᠨᠡ᠃ 18 ᠪᠢ ᠲᠠ ᠪᠦᠭᠦᠳᠡ ᠶᠢᠨ ᠲᠤᠬᠠᠢ ᠶᠠᠷᠢᠭᠰᠠᠨ ᠪᠢᠰᠢ᠂ ᠰᠣᠩ᠋ᠭᠣᠭᠳᠠᠭᠰᠠᠳ ᠢᠶᠠᠨ ᠪᠢ ᠮᠡᠳᠡᠨᠡ᠃ ᠬᠠᠷᠢᠨ 〈ᠮᠢᠨᠦ ᠪᠣᠣᠪᠣ ᠶᠢ ᠢᠳᠡᠭᠴᠢ ᠮᠢᠨᠦ ᠥᠭᠡᠳᠡ ᠡᠴᠡ ᠢᠰᠭᠦᠯᠪᠡ〉 ᠭᠡᠰᠡᠨ ᠡᠰᠢᠯᠡᠯ ᠲᠡᠢᠨ ᠬᠦ ᠪᠡᠶᠡᠯᠡᠭᠳᠡᠨᠡ᠃ 19 ᠡᠨᠡ ᠶᠠᠪᠤᠳᠠᠯ ᠪᠡᠶᠡᠯᠡᠭᠳᠡᠬᠦ ᠡᠴᠡ ᠡᠮᠦᠨᠡ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠯᠡ᠂ ᠡᠢᠮᠦ ᠡᠴᠡ ᠶᠠᠪᠤᠳᠠᠯ ᠪᠡᠶᠡᠯᠡᠭᠳᠡᠭᠰᠡᠨ ᠦ ᠳᠠᠷᠠᠭᠠ᠂ ᠲᠠ ᠨᠠᠷ ᠨᠠᠮᠠᠶᠢ ᠲᠡᠷᠡ ᠮᠥᠨ ᠭᠡᠵᠦ ᠢᠲᠡᠭᠡᠬᠦ ᠪᠣᠯᠣᠨᠠ᠃ 20 ᠲᠠ ᠨᠠᠷ ᠲᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠮᠢᠨᠦ ᠢᠯᠡᠭᠡᠭᠰᠡᠨ ᠬᠥᠮᠦᠨ ᠢ ᠬᠦᠯᠢᠶᠡᠨ ᠠᠪᠤᠭᠴᠢ ᠨᠢ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠤᠨᠠ᠂ ᠨᠠᠮᠠᠶᠢ ᠬᠦᠯᠢᠶᠡᠨ ᠠᠪᠤᠭᠴᠢ ᠨᠢ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠨᠢᠭᠡᠨ ᠢ ᠬᠦᠯᠢᠶᠡᠨ ᠠᠪᠤᠨᠠ》 ᠭᠡᠯᠡ᠃
ᠢᠰᠦ᠋ᠰ ᠬᠤᠳᠠᠯᠳᠤᠭᠳᠠᠬᠤ ᠪᠠᠨ ᠬᠡᠯᠡᠭᠰᠡᠨ ᠨᠢ
21 ᠢᠰᠦ᠋ᠰ ᠡᠳᠡᠭᠡᠷ ᠢ ᠬᠡᠯᠡᠭᠡᠳ᠂ ᠰᠦᠨᠡᠰᠦ ᠨᠢ ᠰᠢᠨᠠᠯᠵᠤ᠄ 《ᠲᠠ ᠨᠠᠷ ᠲᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠠᠴᠠ ᠨᠢᠭᠡ ᠨᠢ ᠨᠠᠮᠠᠶᠢ ᠪᠠᠷᠢᠭᠤᠯᠤᠨᠠ》 ᠭᠡᠵᠦ ᠲᠣᠳᠣᠷᠬᠠᠢ ᠬᠡᠯᠡᠪᠡ᠃ 22 ᠱᠠᠪᠢ ᠨᠠᠷ ᠨᠢ ᠬᠡᠨ ᠦ ᠲᠤᠬᠠᠢ ᠬᠡᠯᠡᠵᠦ ᠪᠠᠢᠭᠠ ᠶᠢ ᠨᠢ ᠮᠡᠳᠡᠵᠦ ᠶᠠᠳᠠᠨ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠰᠢᠷᠲᠡᠯᠴᠡᠵᠦ ᠪᠠᠢᠯᠠ᠃ 23 ᠲᠡᠭᠡᠬᠦ ᠳᠦ ᠢᠰᠦ᠋ᠰ ᠤᠨ ᠬᠠᠢᠷᠠᠲᠠᠢ ᠲᠡᠷᠡ ᠱᠠᠪᠢ ᠲᠡᠭᠦᠨ ᠦ ᠡᠪᠦᠷ ᠦᠨ ᠳᠡᠷᠭᠡᠳᠡ ᠬᠠᠵᠠᠭᠤᠯᠠᠨ ᠰᠠᠭᠤᠵᠤ ᠪᠠᠢᠪᠠ᠃ 24 ᠰᠢᠮᠣᠨ ᠫᠧᠲ᠋ᠧᠷ ᠲᠡᠭᠦᠨ ᠤᠷᠤᠭᠤ ᠳᠣᠬᠢᠵᠤ᠄ 《ᠬᠡᠨ ᠦ ᠲᠤᠬᠠᠢ ᠬᠡᠯᠡᠵᠦ ᠪᠠᠢᠭᠠ ᠶᠢ ᠨᠢ ᠠᠰᠠᠭᠤᠭᠠᠳᠠᠬᠠ》 ᠭᠡᠰᠡᠨ ᠳᠦ᠂ 25 ᠲᠡᠷᠡ ᠢᠰᠦ᠋ᠰ ᠤᠨ ᠴᠡᠭᠡᠵᠢ ᠶᠢ ᠨᠠᠯᠠᠨ᠄ 《ᠡᠵᠡᠨ ᠡ᠂ ᠲᠡᠷᠡ ᠨᠢ ᠬᠡᠨ ᠪᠤᠢ︖》 ᠭᠡᠪᠡ᠃ 26 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠪᠢ ᠡᠨᠡ ᠪᠣᠣᠪᠣ ᠶᠢ ᠳᠦᠷᠦᠭᠡᠳ ᠬᠡᠨ ᠳᠦ ᠥᠭᠪᠡᠯ ᠲᠡᠷᠡ ᠮᠥᠨ》 ᠭᠡᠵᠦ ᠬᠡᠯᠡᠭᠡᠳ ᠪᠣᠣᠪᠣ ᠶᠢᠨ ᠬᠡᠯᠲᠡᠷᠬᠡᠢ ᠶᠢ ᠳᠦᠷᠦᠵᠦ᠂ ᠢᠰᠺᠠᠷᠢᠣᠲ ᠤᠨ ᠰᠢᠮᠣᠨ ᠤ ᠬᠦᠦ ᠶᠦᠳᠠ ᠳᠤ ᠥᠭᠪᠡ᠃ 27 ᠲᠡᠷᠡ ᠪᠡᠷ ᠪᠣᠣᠪᠣ ᠶᠢ ᠠᠪᠤᠭᠰᠠᠨ ᠤ ᠳᠠᠷᠠᠭᠠ᠂ ᠰᠠᠲ᠋ᠠᠨ ᠲᠡᠭᠦᠨ ᠦ ᠳᠣᠲᠣᠷᠠ ᠣᠷᠣᠪᠠ᠃ ᠢᠰᠦ᠋ᠰ ᠶᠦᠳᠠ ᠳᠤ᠄ 《ᠴᠢ ᠬᠢᠬᠦ ᠭᠡᠵᠦ ᠪᠠᠢᠭᠠ ᠪᠠᠨ ᠲᠦᠷᠭᠡᠨ ᠬᠢ》 ᠭᠡᠯᠡ᠃ 28 ᠭᠡᠪᠡᠴᠦ ᠢᠰᠦ᠋ᠰ ᠶᠠᠭᠤᠨ ᠤ ᠤᠴᠢᠷ ᠠᠴᠠ ᠲᠡᠭᠦᠨ ᠳᠦ ᠲᠡᠭᠡᠵᠦ ᠬᠡᠯᠡᠭᠰᠡᠨ ᠢ ᠬᠠᠮᠲᠤ ᠰᠠᠭᠤᠭᠰᠠᠳ ᠤᠨ ᠬᠡᠨ ᠨᠢ ᠴᠤ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ 29 ᠵᠣᠭᠣᠰᠣᠨ ᠤ ᠬᠠᠢᠷᠴᠠᠭ ᠶᠦᠳᠠ ᠳᠤ ᠪᠠᠢᠳᠠᠭ ᠪᠣᠯᠬᠣᠷ ᠢᠰᠦ᠋ᠰ ᠲᠡᠭᠦᠨ ᠳᠦ 《ᠪᠠᠶᠠᠷ ᠲᠤ ᠵᠣᠷᠢᠭᠤᠯᠤᠨ ᠪᠢᠳᠡᠨ ᠳᠦ ᠬᠡᠷᠡᠭ ᠲᠡᠢ ᠶᠠᠭᠤᠮᠠ ᠶᠢ ᠬᠤᠳᠠᠯᠳᠤᠨ ᠠᠪ》᠂ ᠡᠰᠡᠪᠡᠯ 《ᠶᠠᠳᠠᠭᠤᠴᠤᠳ ᠲᠤ ᠶᠠᠭᠤᠮᠠ ᠥᠭ》 ᠭᠡᠵᠦ ᠬᠡᠯᠡᠭᠰᠡᠨ ᠬᠡᠮᠡᠨ ᠵᠠᠷᠢᠮ ᠨᠢ ᠪᠣᠳᠣᠵᠠᠢ᠃ 30 ᠶᠦᠳᠠ ᠪᠣᠣᠪᠣ ᠶᠢᠨ ᠬᠡᠯᠲᠡᠷᠬᠡᠢ ᠶᠢ ᠠᠪᠤᠮᠠᠭᠴᠠ ᠪᠠᠨ ᠭᠠᠷᠴᠤ ᠶᠠᠪᠤᠪᠠ᠃ ᠲᠡᠭᠡᠬᠦ ᠳᠦ ᠰᠥᠨᠢ ᠪᠣᠯᠣᠭᠰᠠᠨ ᠪᠠᠢᠯᠠ᠃
31 ᠶᠦᠳᠠ ᠭᠠᠷᠤᠭᠰᠠᠨ ᠤ ᠳᠠᠷᠠᠭᠠ᠂ ᠢᠰᠦ᠋ᠰ᠄ 《ᠣᠳᠣ ᠬᠥᠮᠦᠨ ᠦ ᠬᠦᠦ ᠠᠯᠳᠠᠷ ᠰᠤᠤ ᠶᠢ ᠣᠯᠵᠤ᠂ ᠪᠤᠷᠬᠠᠨ ᠴᠤ ᠲᠡᠭᠦᠨ ᠡᠴᠡ ᠪᠣᠯᠵᠤ ᠠᠯᠳᠠᠷ ᠰᠤᠤ ᠶᠢ ᠣᠯᠣᠯᠠ᠃ 32 ᠪᠤᠷᠬᠠᠨ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠨ ᠠᠯᠳᠠᠷ ᠰᠤᠤ ᠣᠯᠣᠭᠰᠠᠨ ᠪᠣᠯ᠂ ᠪᠤᠷᠬᠠᠨ ᠴᠤ ᠥᠪᠡᠷ ᠡᠴᠡ ᠪᠡᠨ ᠪᠣᠯᠵᠤ ᠲᠡᠭᠦᠨ ᠢ ᠠᠯᠳᠠᠷᠰᠢᠭᠤᠯᠬᠤ ᠪᠥᠭᠡᠳ ᠳᠠᠷᠤᠢ ᠲᠦᠷᠭᠡᠨ ᠠᠯᠳᠠᠷᠰᠢᠭᠤᠯᠤᠨᠠ᠃ 33 ᠬᠡᠦᠬᠡᠳ ᠤᠳ ᠮᠢᠨᠢ ᠡ 19 ᠂ ᠪᠢ ᠲᠠ ᠨᠠᠷ ᠲᠠᠢ ᠲᠦᠷ ᠴᠠᠭ ᠯᠠ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ᠃ ᠲᠠ ᠨᠠᠷ ᠨᠠᠮᠠᠶᠢ ᠡᠷᠢᠬᠦ ᠪᠣᠯᠣᠨᠠ᠃ ᠬᠠᠷᠢᠨ ᠪᠢ ᠶᠦᠳᠠᠢᠴᠤᠳ ᠲᠤ ᠬᠡᠯᠡᠭᠰᠡᠨᠴᠢᠯᠡᠨ ᠣᠳᠣ ᠲᠠ ᠨᠠᠷ ᠲᠤ ᠴᠤ ᠬᠡᠯᠡᠶᠡ᠂ 〈ᠮᠢᠨᠦ ᠣᠴᠢᠬᠤ ᠭᠠᠵᠠᠷ ᠲᠤ ᠲᠠ ᠨᠠᠷ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ᠃〉 34 ᠪᠢ ᠲᠠ ᠨᠠᠷ ᠲᠤ ᠰᠢᠨᠡ ᠵᠠᠷᠯᠢᠭ ᠥᠭᠭᠥᠶᠡ᠂ ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠭᠲᠤᠨ᠂ ᠲᠠ ᠨᠠᠷ ᠢ ᠬᠠᠢᠷᠠᠯᠠᠳᠠᠭ ᠲᠠᠢ ᠮᠢᠨᠢ ᠠᠳᠠᠯᠢ ᠲᠠ ᠨᠠᠷ ᠴᠤ ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠭᠲᠤᠨ᠃ 35 ᠬᠡᠷᠪᠡ ᠲᠠ ᠨᠠᠷ ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠳᠠᠭ ᠶᠤᠮ ᠪᠣᠯ᠂ ᠪᠦᠬᠦ ᠬᠥᠮᠦᠨ ᠡᠭᠦᠨ ᠢᠶᠡᠷ ᠴᠢᠨᠢ ᠲᠠ ᠨᠠᠷ ᠢ ᠮᠢᠨᠦ ᠱᠠᠪᠢ ᠨᠠᠷ ᠭᠡᠵᠦ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠯᠡ᠃
36 ᠰᠢᠮᠣᠨ ᠫᠧᠲ᠋ᠧᠷ ᠲᠡᠭᠦᠨ ᠳᠦ᠄ 《ᠡᠵᠡᠨ ᠡ᠂ ᠲᠠ ᠬᠠᠮᠢᠭᠠ ᠣᠴᠢᠬᠤ ᠶᠤᠮ ᠪᠤᠢ︖》 ᠭᠡᠰᠡᠨ ᠳᠦ᠂ ᠢᠰᠦ᠋ᠰ᠄ 《ᠮᠢᠨᠦ ᠣᠴᠢᠬᠤ ᠭᠠᠵᠠᠷ ᠲᠤ ᠴᠢ ᠡᠳᠦᠭᠡ ᠳᠠᠭᠠᠵᠤ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠬᠣᠵᠢᠮ ᠳᠠᠭᠠᠵᠤ ᠴᠢᠳᠠᠨᠠ》 ᠭᠡᠯᠡ᠃ 37 ᠫᠧᠲ᠋ᠧᠷ᠄ 《ᠡᠵᠡᠨ ᠡ᠂ ᠶᠠᠭᠠᠬᠢᠭᠠᠳ ᠡᠳᠦᠭᠡ ᠲᠠᠨ ᠢ ᠳᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠶᠤᠮ ᠪᠤᠢ︖ ᠪᠢ ᠲᠠᠨ ᠤ ᠲᠥᠯᠥᠭᠡ ᠠᠮᠢ ᠪᠠᠨ ᠵᠣᠷᠢᠭᠤᠯᠤᠶᠠ》 ᠭᠡᠬᠦ ᠳᠦ᠂ 38 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠴᠢ ᠮᠢᠨᠦ ᠲᠥᠯᠥᠭᠡ ᠠᠮᠢ ᠪᠠᠨ ᠵᠣᠷᠢᠭᠤᠯᠤᠨᠠ ᠭᠡᠨᠡ ᠤᠤ︖ ᠴᠢᠮᠠ ᠳᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠲᠠᠬᠢᠶᠠ ᠳᠤᠤᠭᠠᠷᠬᠤ ᠠᠴᠠ ᠡᠮᠦᠨᠡ ᠴᠢ ᠨᠠᠮᠠᠶᠢ ᠲᠠᠨᠢᠬᠤ ᠦᠭᠡᠢ ᠭᠡᠵᠦ ᠭᠤᠷᠪᠠᠨᠲᠠ ᠮᠡᠯᠵᠢᠬᠦ ᠪᠣᠯᠣᠨᠠ᠃