ᠶᠣᠬᠠᠨ ᠠᠷᠪᠠᠨ ᠳᠣᠯᠣᠭᠠ
ᠢᠰᠦ᠋ᠰ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠶᠢᠨ ᠡᠷᠬᠡ ᠪᠡᠷ ᠢᠶᠠᠨ ᠳᠠᠭᠠᠳᠬᠠᠭᠰᠠᠨ ᠨᠢ
1 ᠢᠰᠦ᠋ᠰ ᠢᠩᠭᠢᠵᠦ ᠬᠡᠯᠡᠭᠡᠳ ᠲᠩᠷᠢ ᠥᠭᠡᠳᠡ ᠬᠠᠷᠠᠨ ᠳᠠᠭᠠᠳᠬᠠᠵᠤ᠄ 《ᠠᠪᠤ ᠡ᠂ ᠴᠠᠭ ᠢᠷᠡᠯᠡ᠃ ᠬᠦᠦ ᠪᠡᠨ ᠠᠯᠳᠠᠷᠰᠢᠭᠤᠯᠤᠭᠠᠴᠢ᠂ ᠬᠦᠦ ᠴᠢᠨᠢ ᠲᠠᠨ ᠢ ᠠᠯᠳᠠᠷᠰᠢᠭᠤᠯᠬᠤ ᠪᠣᠯᠣᠨᠠ᠃ 2 ᠲᠠ ᠬᠦᠦ ᠳᠡᠭᠡᠨ ᠬᠠᠮᠤᠭ ᠬᠥᠮᠦᠨ ᠢ ᠵᠠᠬᠢᠷᠬᠤ ᠡᠷᠬᠡ ᠶᠢ ᠰᠣᠶᠣᠷᠬᠠᠵᠤ᠂ ᠲᠠᠨ ᠤ ᠲᠡᠭᠦᠨ ᠳᠦ ᠥᠭᠭᠥᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠳᠡᠭᠡᠨ ᠮᠥᠩᠬᠡ ᠠᠮᠢ ᠶᠢ ᠥᠭᠭᠥᠭᠦᠯᠦᠭᠰᠡᠨ ᠶᠤᠮ᠃ 3 ᠴᠣᠷ ᠤᠨ ᠭᠠᠭᠴᠠ ᠵᠢᠩᠬᠢᠨᠢ ᠪᠤᠷᠬᠠᠨ ᠲᠠᠨ ᠢ ᠪᠣᠯᠣᠨ ᠲᠠᠨ ᠤ ᠢᠯᠡᠭᠡᠭᠰᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢ ᠲᠠᠨᠢᠬᠤ ᠨᠢ ᠮᠥᠩᠬᠡ ᠠᠮᠢ ᠮᠥᠨ᠃ 4 ᠪᠢ ᠲᠠᠨ ᠤ ᠳᠠᠭᠠᠭᠠᠯᠭᠠᠭᠰᠠᠨ ᠠᠵᠢᠯ ᠢ ᠭᠦᠢᠴᠡᠳᠬᠡᠵᠦ᠂ ᠲᠠᠨ ᠢ ᠭᠠᠵᠠᠷ ᠳᠡᠭᠡᠷᠡ ᠠᠯᠳᠠᠷᠰᠢᠭᠤᠯᠪᠠ᠃ 5 ᠠᠪᠤ ᠡ᠂ ᠶᠢᠷᠲᠢᠨᠴᠦ ᠶᠢ ᠪᠦᠲᠦᠭᠡᠬᠦ ᠡᠴᠡ ᠡᠮᠦᠨᠡ᠂ ᠲᠠᠨ ᠤ ᠳᠡᠷᠭᠡᠳᠡ ᠮᠢᠨᠦ ᠡᠳ᠋ᠯᠡᠭᠰᠡᠨ ᠠᠯᠳᠠᠷ ᠰᠤᠤ ᠪᠠᠷ ᠣᠳᠣ ᠨᠠᠮᠠᠶᠢ ᠳᠡᠷᠭᠡᠳᠡ ᠪᠡᠨ ᠠᠯᠳᠠᠷᠰᠢᠭᠤᠯᠤᠭᠠᠴᠢ᠃
6 ᠶᠢᠷᠲᠢᠨᠴᠦ ᠡᠴᠡ ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠬᠥᠮᠦᠰ ᠲᠦ ᠪᠢ ᠲᠠᠨ ᠤ ᠨᠡᠷᠡ ᠶᠢ ᠢᠯᠡᠷᠬᠡᠶᠢᠯᠡᠭᠰᠡᠨ᠃ ᠲᠡᠳᠡ ᠲᠠᠨ ᠤ ᠬᠢ ᠪᠠᠢᠭᠰᠠᠨ᠂ ᠲᠠ ᠲᠡᠳᠡᠨ ᠢ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠪᠥᠭᠡᠳ ᠲᠡᠳᠡ ᠲᠠᠨ ᠤ ᠦᠭᠡ ᠶᠢ ᠰᠠᠬᠢᠭᠰᠠᠨ᠃ 7 ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠠᠯᠢᠪᠠ ᠪᠦᠬᠦᠨ ᠲᠠᠨ ᠠᠴᠠ ᠢᠷᠡᠭᠰᠡᠨ ᠢ ᠣᠳᠣ ᠲᠡᠳᠡ ᠮᠡᠳᠡᠯᠡ᠃ 8 ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠦᠭᠡᠰ ᠢ ᠪᠢ ᠲᠡᠳᠡᠨ ᠳᠦ ᠥᠭᠭᠥᠭᠰᠡᠨ ᠳᠦ᠂ ᠲᠡᠳᠡ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠪᠥᠭᠡᠳ ᠨᠠᠮᠠᠶᠢ ᠲᠠᠨ ᠠᠴᠠ ᠢᠷᠡᠭᠰᠡᠨ ᠭᠡᠵᠦ ᠦᠨᠡᠬᠡᠷ ᠣᠢᠯᠠᠭᠠᠭᠠᠳ ᠲᠠᠨ ᠤ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠢ ᠴᠤ ᠢᠲᠡᠭᠡᠵᠡᠢ᠃ 9 ᠪᠢ ᠲᠡᠳᠡᠨ ᠦ ᠲᠥᠯᠥᠭᠡ ᠳᠠᠭᠠᠳᠬᠠᠨᠠ᠃ ᠪᠢ ᠶᠢᠷᠲᠢᠨᠴᠦ ᠶᠢᠨ ᠲᠥᠯᠥᠭᠡ ᠪᠤᠰᠤ᠂ ᠬᠠᠷᠢᠨ ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠬᠥᠮᠦᠰ ᠦᠨ ᠲᠥᠯᠥᠭᠡ ᠳᠠᠭᠠᠳᠬᠠᠵᠤ ᠪᠠᠢᠨᠠ᠃ ᠤᠴᠢᠷ ᠨᠢ ᠲᠡᠳᠡ ᠲᠠᠨ ᠤ ᠬᠢ ᠪᠢᠯᠡ᠃ 10 ᠮᠢᠨᠦ ᠪᠦᠬᠦ ᠶᠠᠭᠤᠮᠠ ᠲᠠᠨ ᠤ ᠬᠢ᠂ ᠲᠠᠨ ᠤ ᠪᠦᠬᠦ ᠶᠠᠭᠤᠮᠠ ᠮᠢᠨᠦᠬᠢ᠃ ᠪᠢ ᠲᠡᠳᠡᠨ ᠦ ᠳᠤᠮᠳᠠ ᠠᠯᠳᠠᠷᠰᠢᠳᠠᠭ᠃ 11 ᠡᠭᠦᠨ ᠡᠴᠡ ᠬᠣᠢᠰᠢ ᠪᠢ ᠲᠠᠨ ᠤᠷᠤᠭᠤ ᠣᠴᠢᠵᠤ᠂ ᠶᠢᠷᠲᠢᠨᠴᠦ ᠳᠦ ᠪᠠᠢᠬᠤ ᠦᠭᠡᠢ ᠪᠣᠯᠣᠨᠠ᠂ ᠬᠠᠷᠢᠨ ᠲᠡᠳᠡ ᠶᠢᠷᠲᠢᠨᠴᠦ ᠳᠦ ᠦᠯᠡᠳᠡᠨᠡ᠃ ᠠᠷᠢᠭᠤᠨ ᠠᠪᠤ ᠡ᠂ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠨᠡᠷᠡ ᠪᠡᠷ ᠢᠶᠠᠨ ᠲᠡᠳᠡᠨ ᠢ ᠬᠠᠮᠠᠭᠠᠯᠠᠵᠤ᠂ ᠲᠡᠳᠡᠨ ᠢ ᠪᠢᠳᠡᠨ ᠦ ᠠᠳᠠᠯᠢ ᠨᠢᠭᠡᠳᠬᠡᠭᠡᠴᠢ᠃ 12 ᠪᠢ ᠲᠡᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠳᠠᠭᠠᠨ ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠨᠡᠷᠡ ᠪᠡᠷ ᠲᠡᠳᠡᠨ ᠢ ᠬᠠᠮᠠᠭᠠᠯᠠᠵᠤ ᠰᠠᠬᠢᠵᠤ ᠪᠠᠢᠭᠰᠠᠨ ᠳᠤ᠂ ᠮᠥᠬᠥᠬᠦ ᠶᠣᠰᠣᠲᠠᠢ ᠬᠥᠮᠦᠨ ᠡᠴᠡ ᠭᠠᠳᠠᠨᠠ ᠨᠢᠭᠡ ᠨᠢ ᠴᠤ ᠮᠥᠬᠥᠭᠰᠡᠨ ᠦᠭᠡᠢ ᠪᠠᠷ ᠠᠷᠢᠭᠤᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠨᠢ ᠪᠡᠶᠡᠯᠡᠭᠳᠡᠵᠡᠢ᠃
ᠶᠢᠷᠲᠢᠨᠴᠦ ᠳᠠᠬᠢ ᠱᠠᠪᠢ ᠨᠠᠷ
13 ᠣᠳᠣ ᠪᠢ ᠲᠠᠨ ᠤᠷᠤᠭᠤ ᠣᠴᠢᠨᠠ᠃ ᠬᠠᠷᠢᠨ ᠲᠡᠳᠡᠨ ᠦ ᠳᠣᠲᠣᠷᠠ ᠮᠢᠨᠦ ᠪᠠᠶᠠᠰᠤᠯ ᠢ ᠳᠦᠭᠦᠷᠡᠩ ᠪᠠᠢᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠪᠢ ᠡᠳᠡᠭᠡᠷ ᠢ ᠶᠢᠷᠲᠢᠨᠴᠦ ᠳᠦ ᠪᠠᠢᠬᠤ ᠳᠠᠭᠠᠨ ᠶᠠᠷᠢᠵᠤ ᠪᠠᠢᠨᠠ᠃ 14 ᠪᠢ ᠲᠡᠳᠡᠨ ᠳᠦ ᠲᠠᠨ ᠤ ᠦᠭᠡ ᠶᠢ ᠥᠭᠭᠥᠭᠰᠡᠨ ᠳᠦ ᠶᠢᠷᠲᠢᠨᠴᠦ ᠲᠡᠳᠡᠨ ᠢ ᠵᠠᠨᠤᠭᠰᠠᠨ᠂ ᠤᠴᠢᠷ ᠨᠢ ᠪᠢ ᠶᠢᠷᠲᠢᠨᠴᠦ ᠶᠢᠨ ᠬᠢ ᠪᠢᠰᠢ ᠶᠢᠨ ᠠᠳᠠᠯᠢ ᠲᠡᠳᠡ ᠪᠠᠰᠠ ᠶᠢᠷᠲᠢᠨᠴᠦ ᠶᠢᠨ ᠬᠢ ᠪᠢᠰᠢ ᠶᠤᠮ᠃ 15 ᠪᠢ ᠳᠠᠭᠠᠳᠬᠠᠬᠤ ᠳᠠᠭᠠᠨ ᠲᠡᠳᠡᠨ ᠢ ᠶᠢᠷᠲᠢᠨᠴᠦ ᠡᠴᠡ ᠠᠪᠠᠴᠢᠭᠠᠷᠠᠢ ᠭᠡᠬᠦ ᠦᠭᠡᠢ᠂ ᠬᠠᠷᠢᠨ ᠲᠡᠳᠡᠨ ᠢ ᠮᠠᠭᠤ ᠮᠠᠭᠤᠬᠠᠢ ᠨᠢᠭᠡᠨ ᠡᠴᠡ ᠬᠠᠮᠠᠭᠠᠯᠠᠭᠠᠴᠢ ᠭᠡᠳᠡᠭ᠃ 16 ᠪᠢ ᠶᠢᠷᠲᠢᠨᠴᠦ ᠶᠢᠨ ᠬᠢ ᠪᠢᠰᠢ ᠶᠢᠨ ᠠᠳᠠᠯᠢ ᠲᠡᠳᠡ ᠪᠠᠰᠠ ᠶᠢᠷᠲᠢᠨᠴᠦ ᠶᠢᠨ ᠬᠢ ᠪᠢᠰᠢ ᠪᠢᠯᠡ᠃ 17 ᠦᠨᠡᠨ ᠢᠶᠡᠷ ᠲᠡᠳᠡᠨ ᠢ ᠠᠷᠢᠭᠤᠳᠬᠠᠭᠠᠴᠢ᠂ ᠲᠠᠨ ᠤ ᠦᠭᠡ ᠪᠣᠯ ᠦᠨᠡᠨ ᠮᠥᠨ᠃ 18 ᠲᠠ ᠨᠠᠮᠠᠶᠢ ᠶᠢᠷᠲᠢᠨᠴᠦ ᠤᠷᠤᠭᠤ ᠢᠯᠡᠭᠡᠭᠰᠡᠨ ᠲᠡᠢ ᠠᠳᠠᠯᠢ ᠪᠢ ᠴᠤ ᠲᠡᠳᠡᠨ ᠢ ᠶᠢᠷᠲᠢᠨᠴᠦ ᠤᠷᠤᠭᠤ ᠢᠯᠡᠭᠡᠪᠡ᠃ 19 ᠪᠢ ᠲᠡᠳᠡᠨ ᠦ ᠲᠥᠯᠥᠭᠡ ᠥᠪᠡᠷ ᠢ ᠪᠠᠨ ᠠᠷᠢᠭᠤᠳᠬᠠᠨᠠ᠂ ᠡᠨᠡ ᠨᠢ ᠲᠡᠳᠡᠨ ᠢ ᠴᠤ ᠦᠨᠡᠨ ᠢᠶᠡᠷ ᠠᠷᠢᠭᠤᠳᠬᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠶᠤᠮ᠃
20 ᠪᠢ ᠵᠥᠪᠬᠡᠨ ᠲᠡᠳᠡᠨ ᠦ ᠲᠥᠯᠥᠭᠡ ᠪᠤᠰᠤ᠂ ᠲᠡᠳᠡᠨ ᠦ ᠦᠭᠡ ᠪᠡᠷ ᠨᠠᠮᠠᠶᠢ ᠢᠲᠡᠭᠡᠬᠦ ᠬᠥᠮᠦᠰ ᠦᠨ ᠲᠥᠯᠥᠭᠡ ᠴᠤ ᠳᠠᠭᠠᠳᠬᠠᠵᠤ ᠪᠠᠢᠨᠠ᠃ 21 ᠠᠪᠤ ᠡ᠂ ᠲᠠ ᠮᠢᠨᠦ ᠳᠣᠲᠣᠷᠠ᠂ ᠪᠢ ᠲᠠᠨ ᠤ ᠳᠣᠲᠣᠷᠠ ᠪᠠᠢᠭᠠ ᠲᠠᠢ ᠠᠳᠠᠯᠢ᠂ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠢᠭᠡᠳᠴᠦ᠂ ᠮᠥᠨ ᠲᠡᠳᠡ ᠪᠢᠳᠡᠨ ᠦ ᠳᠣᠲᠣᠷᠠ ᠪᠠᠢᠵᠤ᠂ ᠲᠠᠨ ᠤ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠭᠡᠳᠡᠭ ᠢ ᠶᠢᠷᠲᠢᠨᠴᠦ ᠢᠲᠡᠭᠡᠬᠦ ᠪᠣᠯᠲᠤᠭᠠᠢ᠃
ᠱᠠᠪᠢ ᠨᠠᠷ ᠤᠨ ᠠᠪᠤᠭᠰᠠᠨ ᠠᠯᠳᠠᠷ ᠰᠤᠤ
22 ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠠᠯᠳᠠᠷ ᠰᠤᠤ ᠶᠢ ᠪᠢ ᠲᠡᠳᠡᠨ ᠳᠦ ᠥᠭᠭᠥᠭᠰᠡᠨ ᠲᠤᠯᠠ ᠪᠢᠳᠡᠨ ᠦ ᠨᠢᠭᠡᠳᠦᠮᠡᠯ ᠪᠠᠢᠳᠠᠭ ᠤᠨ ᠠᠳᠠᠯᠢ ᠲᠡᠳᠡ ᠴᠤ ᠨᠢᠭᠡᠳᠬᠦ ᠶᠣᠰᠣᠲᠠᠢ᠃ 23 ᠪᠢ ᠲᠡᠳᠡᠨ ᠦ ᠳᠣᠲᠣᠷᠠ᠂ ᠲᠠ ᠮᠢᠨᠦ ᠳᠣᠲᠣᠷᠠ ᠪᠠᠢᠬᠤ ᠨᠢ ᠲᠡᠳᠡᠨ ᠢ ᠪᠦᠷᠢᠮᠦᠰᠦᠨ ᠨᠢᠭᠡᠳᠬᠡᠬᠦ ᠶᠢᠨ ᠲᠤᠯᠠᠳᠠ ᠶᠤᠮ᠂ ᠡᠢᠨ ᠬᠦ ᠲᠠᠨ ᠤ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠪᠠ ᠨᠠᠮᠠᠶᠢ ᠬᠠᠢᠷᠠᠯᠠᠳᠠᠭ ᠲᠠᠢ ᠠᠳᠠᠯᠢ ᠲᠡᠳᠡᠨ ᠢ ᠴᠤ ᠬᠠᠢᠷᠠᠯᠠᠳᠠᠭ ᠢ ᠶᠢᠷᠲᠢᠨᠴᠦ ᠮᠡᠳᠡᠬᠦ ᠪᠣᠯᠣᠨᠠ᠃ 24 ᠠᠪᠤ ᠡ᠂ ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠬᠥᠮᠦᠰ ᠪᠠᠰᠠ ᠮᠢᠨᠦ ᠪᠠᠢᠳᠠᠭ ᠭᠠᠵᠠᠷ ᠲᠤ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠭᠠᠰᠠᠢ᠂ ᠶᠢᠷᠲᠢᠨᠴᠦ ᠪᠦᠲᠦᠭᠡᠭᠳᠡᠬᠦ ᠡᠴᠡ ᠡᠮᠦᠨᠡ ᠲᠠ ᠨᠠᠮᠠᠶᠢ ᠬᠠᠢᠷᠠᠯᠠᠭᠰᠠᠨ ᠤᠴᠢᠷ ᠠᠴᠠ ᠲᠠᠨ ᠤ ᠨᠠᠳᠠ ᠳᠤ ᠥᠭᠭᠥᠭᠰᠡᠨ ᠠᠯᠳᠠᠷ ᠰᠤᠤ ᠶᠢ ᠮᠢᠨᠢ ᠲᠡᠳᠡ ᠨᠠᠷ ᠴᠤ ᠬᠠᠷᠠᠬᠤ ᠪᠣᠯᠲᠤᠭᠠᠢ᠃
25 ᠵᠥᠪᠲᠦ ᠠᠪᠤ ᠡ᠂ ᠶᠢᠷᠲᠢᠨᠴᠦ ᠲᠠᠨ ᠢ ᠲᠠᠨᠢᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠪᠢ ᠲᠠᠨ ᠢ ᠲᠠᠨᠢᠳᠠᠭ ᠪᠥᠭᠡᠳ ᠲᠠᠨ ᠤ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠢ ᠡᠳᠡᠭᠡᠷ ᠬᠥᠮᠦᠰ ᠮᠡᠳᠡᠭᠰᠡᠨ᠃ 26 ᠪᠢ ᠲᠠᠨ ᠤ ᠨᠡᠷᠡ ᠶᠢ ᠲᠡᠳᠡᠨ ᠳᠦ ᠮᠡᠳᠡᠭᠦᠯᠦᠭᠰᠡᠨ ᠪᠥᠭᠡᠳ ᠴᠠᠭᠠᠰᠢᠳᠠ ᠪᠠᠰᠠ ᠮᠡᠳᠡᠭᠦᠯᠦᠨᠡ᠃ ᠢᠩᠭᠢᠭᠰᠡᠨ ᠢᠶᠡᠷ ᠲᠠᠨ ᠤ ᠨᠠᠮᠠᠶᠢ ᠬᠠᠢᠷᠠᠯᠠᠳᠠᠭ ᠲᠡᠷᠡ ᠬᠠᠢᠷᠠ ᠲᠡᠳᠡᠨ ᠦ ᠳᠣᠲᠣᠷᠠ ᠪᠠᠢᠵᠤ᠂ ᠪᠢ ᠴᠤ ᠲᠡᠳᠡᠨ ᠦ ᠳᠣᠲᠣᠷᠠ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃