ᠶᠣᠬᠠᠨ ᠠᠷᠪᠠᠨ ᠳᠥᠷᠪᠡ
ᠢᠰᠦ᠋ᠰ ᠱᠠᠪᠢ ᠨᠠᠷ ᠢᠶᠠᠨ ᠲᠠᠢᠳᠬᠤᠷᠠᠭᠤᠯᠤᠭᠰᠠᠨ ᠨᠢ
1 ᠲᠠ ᠨᠠᠷ ᠪᠢᠲᠡᠭᠡᠢ ᠰᠠᠨᠠᠭᠠ ᠵᠣᠪᠠ᠃ ᠲᠠ ᠨᠠᠷ ᠪᠤᠷᠬᠠᠨ ᠢ ᠢᠲᠡᠭᠡᠵᠦ᠂ ᠨᠠᠮᠠᠶᠢ ᠢᠲᠡᠭᠡᠭᠡᠷᠡᠢ 20 ᠂ 2 ᠮᠢᠨᠦ ᠡᠴᠢᠭᠡ ᠶᠢᠨ ᠭᠡᠷ ᠲᠦ ᠶᠡᠬᠡ ᠵᠠᠢ ᠪᠤᠢ᠃ ᠬᠡᠷᠪᠡ ᠲᠡᠢᠮᠦ ᠪᠢᠰᠢ ᠪᠣᠯ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠬᠦ ᠪᠠᠢᠭᠰᠠᠨ᠃ ᠪᠢ ᠲᠠ ᠨᠠᠷ ᠲᠤ ᠭᠠᠵᠠᠷ ᠪᠡᠯᠡᠳᠬᠡᠬᠦ ᠪᠡᠷ ᠶᠠᠪᠤᠨᠠ᠃ 3 ᠪᠢ ᠶᠠᠪᠤᠵᠤ᠂ ᠲᠠ ᠨᠠᠷ ᠲᠤ ᠭᠠᠵᠠᠷ ᠪᠡᠯᠡᠳᠬᠡᠴᠢᠬᠡᠭᠡᠳ ᠳᠠᠬᠢᠨ ᠢᠷᠡᠵᠦ᠂ ᠲᠠ ᠨᠠᠷ ᠢ ᠲᠡᠨᠳᠡ ᠠᠪᠠᠴᠢᠨᠠ᠃ ᠪᠢ ᠬᠠᠮᠢᠭᠠ ᠪᠠᠢᠪᠠᠯ ᠲᠠ ᠨᠠᠷ ᠮᠥᠨ ᠲᠡᠨᠳᠡ ᠪᠠᠢᠨᠠ᠃ 4 ᠮᠢᠨᠦ ᠣᠴᠢᠬᠤ ᠭᠠᠵᠠᠷ ᠤᠨ ᠵᠠᠮ ᠢ ᠲᠠ ᠨᠠᠷ ᠮᠡᠳᠡᠨᠡ》 ᠭᠡᠪᠡ᠃ 5 ᠲᠣᠮᠠ ᠲᠡᠭᠦᠨ ᠳᠦ᠄ 《ᠡᠵᠡᠨ ᠡ᠂ ᠪᠢᠳᠡ ᠲᠠᠨ ᠤ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠶᠢ ᠮᠡᠳᠡᠬᠦ ᠦᠭᠡᠢ ᠲᠤᠯᠠ᠂ ᠲᠡᠷᠡ ᠵᠠᠮ ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠤᠢ︖》 ᠭᠡᠰᠡᠨ ᠳᠦ᠂ 6 ᠢᠰᠦ᠋ᠰ᠄ 《ᠪᠢ ᠪᠣᠯ ᠵᠠᠮ᠂ ᠦᠨᠡᠨ᠂ ᠠᠮᠢ ᠮᠥᠨ᠃ ᠬᠡᠨ ᠴᠤ ᠨᠠᠳᠠ ᠪᠠᠷ ᠳᠠᠮᠵᠢᠯ ᠦᠭᠡᠢ ᠪᠠᠷ ᠡᠴᠢᠭᠡ ᠳᠦ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ᠃ 7 ᠬᠡᠷᠪᠡ ᠲᠠ ᠨᠠᠷ ᠨᠠᠮᠠᠶᠢ ᠲᠠᠨᠢᠭᠰᠠᠨ ᠪᠣᠯ᠂ ᠮᠢᠨᠦ ᠡᠴᠢᠭᠡ ᠶᠢ ᠴᠤ ᠮᠥᠨ ᠲᠠᠨᠢᠬᠤ ᠪᠠᠢᠭᠰᠠᠨ᠂ ᠣᠳᠣ ᠠᠴᠠ ᠡᠬᠢᠯᠡᠨ ᠲᠠ ᠨᠠᠷ ᠲᠡᠭᠦᠨ ᠢ ᠲᠠᠨᠢᠵᠤ᠂ ᠲᠡᠭᠦᠨ ᠢ ᠨᠢᠭᠡᠨᠲᠡ ᠬᠠᠷᠠᠯᠠ》 ᠭᠡᠯᠡ᠃
8 ᠹᠢᠯᠢᠫ᠄ 《ᠡᠵᠡᠨ ᠡ᠂ ᠪᠢᠳᠡᠨ ᠳᠦ ᠡᠴᠢᠭᠡ ᠪᠡᠨ ᠬᠠᠷᠠᠭᠤᠯᠤᠭᠠᠴᠢ᠂ ᠲᠡᠭᠡᠪᠡᠯ ᠪᠢᠳᠡᠨ ᠦ ᠰᠡᠳᠬᠢᠯ ᠬᠠᠨᠤᠨᠠ》 ᠭᠡᠪᠡ᠃ 9 ᠢᠰᠦ᠋ᠰ᠄ 《ᠹᠢᠯᠢᠫ ᠡ᠂ ᠪᠢ ᠲᠠ ᠨᠠᠷ ᠲᠠᠢ ᠡᠢᠮᠦ ᠤᠳᠠᠭᠠᠨ ᠬᠠᠮᠲᠤ ᠪᠠᠢᠬᠤ ᠳᠤ᠂ ᠴᠢ ᠨᠠᠮᠠᠶᠢ ᠲᠠᠨᠢᠭᠰᠠᠨ ᠦᠭᠡᠢ ᠤᠤ︖ ᠨᠠᠮᠠᠶᠢ ᠦᠵᠡᠭᠰᠡᠨ ᠬᠥᠮᠦᠨ ᠡᠴᠢᠭᠡ ᠶᠢ ᠦᠵᠡᠭᠰᠡᠨ᠃ 〈ᠪᠢᠳᠡᠨ ᠳᠦ ᠡᠴᠢᠭᠡ ᠪᠡᠨ ᠬᠠᠷᠠᠭᠤᠯᠤᠭᠠᠴᠢ〉 ᠭᠡᠳᠡᠭ ᠴᠢᠨᠢ ᠶᠠᠭᠤ ᠪᠤᠢ︖ 10 ᠪᠢ ᠡᠴᠢᠭᠡ ᠶᠢᠨ ᠳᠣᠲᠣᠷᠠ᠂ ᠡᠴᠢᠭᠡ ᠮᠢᠨᠦ ᠳᠣᠲᠣᠷᠠ ᠪᠠᠢᠭᠠ ᠭᠡᠳᠡᠭ ᠢ ᠴᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ ᠤᠤ︖ ᠲᠠ ᠨᠠᠷ ᠲᠤ ᠬᠡᠯᠡᠬᠦ ᠦᠭᠡᠰ ᠢᠶᠡᠨ ᠪᠢ ᠲᠠᠪᠠ ᠪᠠᠷ ᠢᠶᠠᠨ ᠶᠠᠷᠢᠳᠠᠭ ᠦᠭᠡᠢ᠃ ᠮᠢᠨᠦ ᠳᠣᠲᠣᠷᠠ ᠪᠠᠢᠳᠠᠭ ᠡᠴᠢᠭᠡ ᠥᠪᠡᠷ ᠦᠨ ᠢᠶᠠᠨ ᠠᠵᠢᠯ ᠢ ᠬᠢᠵᠦ ᠪᠤᠢ᠃ 11 ᠪᠢ ᠡᠴᠢᠭᠡ ᠶᠢᠨ ᠳᠣᠲᠣᠷᠠ᠂ ᠡᠴᠢᠭᠡ ᠮᠢᠨᠦ ᠳᠣᠲᠣᠷᠠ ᠪᠠᠢᠨᠠ ᠭᠡᠳᠡᠭ ᠢ ᠢᠲᠡᠭᠡᠭᠲᠦᠨ᠂ ᠡᠰᠡᠬᠦᠯᠡ ᠮᠢᠨᠦ ᠬᠢᠭᠰᠡᠨ ᠠᠵᠢᠯ ᠢᠶᠠᠷ ᠢᠲᠡᠭᠡᠭᠲᠦᠨ᠃ 12 ᠲᠠ ᠨᠠᠷ ᠲᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠨᠠᠮᠠᠶᠢ ᠢᠲᠡᠭᠡᠭᠴᠢ ᠨᠢ ᠮᠢᠨᠦ ᠬᠢᠳᠡᠭ ᠠᠵᠢᠯ ᠢ ᠬᠢᠬᠦ ᠲᠡᠳᠦᠢ ᠦᠭᠡᠢ᠂ ᠡᠳᠡᠭᠡᠷ ᠡᠴᠡ ᠠᠭᠤᠤ ᠠᠵᠢᠯ ᠢ ᠴᠤ ᠬᠢᠬᠦ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠪᠢ ᠡᠴᠢᠭᠡ ᠳᠡᠭᠡᠨ ᠣᠴᠢᠬᠤ ᠪᠠ 13 ᠲᠠ ᠨᠠᠷ ᠮᠢᠨᠦ ᠨᠡᠷᠡ ᠪᠡᠷ ᠶᠠᠭᠤ ᠭᠤᠶᠤᠭᠰᠠᠨ ᠴᠤ ᠪᠢ ᠪᠦᠲᠦᠭᠡᠵᠦ ᠥᠭᠭᠥᠨᠡ᠃ ᠲᠡᠭᠡᠪᠡᠯ ᠬᠦᠦ ᠡᠴᠡ ᠪᠡᠨ ᠪᠣᠯᠵᠤ ᠡᠴᠢᠭᠡ ᠨᠢ ᠠᠯᠳᠠᠷᠰᠢᠨᠠ᠃ 14 ᠲᠠ ᠨᠠᠷ ᠮᠢᠨᠦ ᠨᠡᠷᠡ ᠪᠡᠷ ᠨᠠᠳᠠ ᠠᠴᠠ ᠶᠠᠭᠤ ᠭᠤᠶᠤᠭᠰᠠᠨ ᠴᠤ ᠪᠢ ᠪᠦᠲᠦᠭᠡᠵᠦ ᠥᠭᠭᠥᠨᠡ᠃
ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠡᠭᠦᠷᠭᠡ
15 ᠲᠠ ᠨᠠᠷ ᠨᠠᠳᠠ ᠳᠤ ᠬᠠᠢᠷᠠᠲᠠᠢ ᠪᠣᠯ ᠮᠢᠨᠦ ᠵᠠᠷᠯᠢᠭ ᠢ ᠰᠠᠬᠢᠬᠤ ᠪᠣᠯᠣᠨᠠ᠃ 16 ᠪᠢ ᠡᠴᠢᠭᠡ ᠡᠴᠡ ᠪᠡᠨ ᠭᠤᠶᠤᠶᠠ᠂ ᠲᠡᠷᠡ ᠲᠠ ᠨᠠᠷ ᠲᠤ ᠥᠭᠡᠷᠡ ᠲᠤᠰᠠᠯᠠᠭᠴᠢ ᠥᠭᠴᠦ᠂ ᠡᠭᠦᠷᠢᠳᠡ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠯᠭᠠᠬᠤ ᠪᠣᠯᠣᠨᠠ᠃ 17 ᠲᠡᠷᠡ ᠪᠣᠯ ᠦᠨᠡᠨ ᠦ ᠰᠦᠨᠡᠰᠦ ᠮᠥᠨ᠃ ᠶᠢᠷᠲᠢᠨᠴᠦ ᠲᠡᠭᠦᠨ ᠢ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠲᠠᠨᠢᠬᠤ ᠴᠤ ᠦᠭᠡᠢ ᠪᠣᠯᠬᠣᠷ ᠲᠡᠭᠦᠨ ᠢ ᠬᠦᠯᠢᠶᠡᠨ ᠠᠪᠴᠤ ᠦᠯᠦ ᠴᠢᠳᠠᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠲᠡᠭᠦᠨ ᠢ ᠲᠠᠨᠢᠨᠠ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠲᠡᠷᠡ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠥᠭᠡᠳ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠪᠠᠢᠬᠤ ᠪᠣᠯᠣᠨᠠ᠃
18 ᠪᠢ ᠲᠠ ᠨᠠᠷ ᠢ ᠥᠨᠥᠴᠢᠷᠡᠭᠦᠯᠵᠦ ᠣᠷᠬᠢᠬᠤ ᠦᠭᠡᠢ᠂ ᠲᠠ ᠨᠠᠷ ᠤᠷᠤᠭᠤ ᠢᠷᠡᠨᠡ᠃ 19 ᠤᠳᠠᠯ ᠦᠭᠡᠢ ᠶᠢᠷᠲᠢᠨᠴᠦ ᠨᠠᠮᠠᠶᠢ ᠳᠠᠬᠢᠵᠤ ᠬᠠᠷᠠᠬᠤ ᠦᠭᠡᠢ ᠪᠣᠯᠣᠨᠠ᠂ ᠬᠠᠷᠢᠨ ᠲᠠ ᠨᠠᠷ ᠨᠠᠮᠠᠶᠢ ᠬᠠᠷᠠᠨᠠ᠃ ᠤᠴᠢᠷ ᠨᠢ ᠪᠢ ᠠᠮᠢᠳᠤ ᠪᠠᠢᠨᠠ᠂ ᠲᠠ ᠨᠠᠷ ᠴᠤ ᠠᠮᠢᠳᠤ ᠪᠠᠢᠬᠤ ᠪᠣᠯᠣᠨᠠ᠃ 20 ᠲᠡᠷᠡ ᠡᠳᠦᠷ ᠪᠣᠯᠬᠤ ᠳᠤ᠂ ᠪᠢ ᠡᠴᠢᠭᠡ ᠶᠢᠨ ᠳᠣᠲᠣᠷᠠ᠂ ᠲᠠ ᠨᠠᠷ ᠮᠢᠨᠦ ᠳᠣᠲᠣᠷᠠ᠂ ᠪᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠪᠠᠢᠬᠤ ᠶᠢ ᠲᠠ ᠨᠠᠷ ᠮᠡᠳᠡᠬᠦ ᠶᠤᠮ᠃ 21 ᠮᠢᠨᠦ ᠵᠠᠷᠯᠢᠭ ᠢ ᠠᠪᠴᠤ᠂ ᠰᠠᠬᠢᠳᠠᠭ ᠬᠥᠮᠦᠨ ᠪᠣᠯ ᠨᠠᠮᠠᠶᠢ ᠬᠠᠢᠷᠠᠯᠠᠭᠴᠢ ᠮᠥᠨ᠃ ᠨᠠᠮᠠᠶᠢ ᠬᠠᠢᠷᠠᠯᠠᠭᠴᠢ ᠮᠢᠨᠦ ᠡᠴᠢᠭᠡ ᠳᠦ ᠬᠠᠢᠷᠠᠯᠠᠭᠳᠠᠨᠠ᠃ ᠪᠢ ᠴᠤ ᠲᠡᠷᠡ ᠬᠥᠮᠦᠨ ᠢ ᠬᠠᠢᠷᠠᠯᠠᠵᠤ᠂ ᠥᠪᠡᠷ ᠢ ᠪᠠᠨ ᠲᠡᠭᠦᠨ ᠳᠦ ᠢᠯᠡᠷᠡᠭᠦᠯᠦᠨᠡ》 ᠭᠡᠵᠦ ᠬᠡᠯᠡᠪᠡ᠃ 22 ᠶᠦᠳᠠ (ᠢᠰᠺᠠᠷᠢᠣᠲ ᠤᠨ ᠶᠦᠳᠠ ᠪᠤᠰᠤ)᠄ 《ᠡᠵᠡᠨ ᠡ᠂ ᠲᠠᠨ ᠤ ᠪᠢᠳᠡᠨ ᠳᠦ ᠥᠪᠡᠷ ᠢ ᠪᠠᠨ ᠢᠯᠡᠷᠡᠭᠦᠯᠦᠭᠡᠳ᠂ ᠶᠢᠷᠲᠢᠨᠴᠦ ᠳᠦ ᠢᠯᠡᠷᠡᠭᠦᠯᠬᠦ ᠦᠭᠡᠢ ᠭᠡᠳᠡᠭ ᠴᠢᠨᠢ ᠶᠠᠭᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 23 ᠢᠰᠦ᠋ᠰ᠄ 《ᠬᠡᠨ ᠨᠠᠮᠠᠶᠢ ᠬᠠᠢᠷᠠᠯᠠᠪᠠᠯ ᠮᠢᠨᠦ ᠦᠭᠡ ᠶᠢ ᠰᠠᠬᠢᠬᠤ ᠪᠥᠭᠡᠳ ᠮᠢᠨᠦ ᠡᠴᠢᠭᠡ ᠲᠡᠭᠦᠨ ᠢ ᠬᠠᠢᠷᠠᠯᠠᠨᠠ᠃ ᠪᠢᠳᠡ ᠲᠡᠷᠡ ᠬᠥᠮᠦᠨ ᠤᠷᠤᠭᠤ ᠣᠴᠢᠵᠤ᠂ ᠲᠡᠭᠦᠨ ᠲᠡᠢ ᠬᠠᠮᠲᠤ ᠰᠠᠭᠤᠨᠠ᠃ 24 ᠨᠠᠮᠠᠶᠢ ᠦᠯᠦ ᠬᠠᠢᠷᠠᠯᠠᠭᠴᠢ ᠨᠢ ᠮᠢᠨᠦ ᠦᠭᠡ ᠶᠢ ᠰᠠᠬᠢᠳᠠᠭ ᠦᠭᠡᠢ᠃ ᠲᠠ ᠨᠠᠷ ᠤᠨ ᠰᠣᠨᠣᠰᠴᠤ ᠪᠠᠢᠭᠠ ᠦᠭᠡ ᠪᠣᠯ ᠮᠢᠨᠦᠬᠢ ᠪᠢᠰᠢ᠂ ᠬᠠᠷᠢᠨ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠡᠴᠢᠭᠡ ᠶᠢᠨ ᠬᠢ ᠪᠢᠯᠡ᠃
25 ᠪᠢ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠳᠠᠭᠠᠨ ᠡᠳᠡᠭᠡᠷ ᠢ ᠬᠡᠯᠡᠯᠡ᠃ 26 ᠬᠠᠷᠢᠨ ᠲᠤᠰᠠᠯᠠᠭᠴᠢ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠮᠢᠨᠦ ᠨᠡᠷᠡ ᠪᠡᠷ ᠡᠴᠢᠭᠡ ᠶᠢᠨ ᠮᠢᠨᠢ ᠢᠯᠡᠭᠡᠬᠦ ᠠᠷᠢᠭᠤᠨ ᠰᠦᠨᠡᠰᠦ ᠲᠠ ᠨᠠᠷ ᠲᠤ ᠠᠯᠢᠪᠠ ᠶᠢ ᠵᠢᠭᠠᠬᠤ ᠪᠥᠭᠡᠳ ᠮᠢᠨᠦ ᠲᠠ ᠨᠠᠷ ᠲᠤ ᠬᠡᠯᠡᠭᠰᠡᠨ ᠪᠦᠭᠦᠳᠡ ᠶᠢ ᠰᠠᠨᠠᠭᠤᠯᠬᠤ ᠪᠣᠯᠣᠨᠠ᠃ 27 ᠪᠢ ᠲᠠ ᠨᠠᠷ ᠲᠤ ᠠᠮᠤᠭᠤᠯᠠᠩ ᠢ ᠦᠯᠡᠳᠡᠭᠡᠶᠡ᠃ ᠥᠪᠡᠷ ᠦᠨ ᠠᠮᠤᠭᠤᠯᠠᠩ ᠢ ᠲᠠ ᠨᠠᠷ ᠲᠤ ᠥᠭᠭᠥᠶᠡ᠃ ᠮᠢᠨᠦ ᠥᠭᠳᠡᠭ ᠨᠢ ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠥᠭᠳᠡᠭ ᠡᠴᠡ ᠥᠭᠡᠷᠡ ᠶᠤᠮ᠃ ᠲᠠ ᠨᠠᠷ ᠰᠡᠳᠬᠢᠯ ᠢᠶᠠᠨ ᠪᠢᠲᠡᠭᠡᠢ ᠵᠣᠪᠠᠭᠠ᠂ ᠪᠢᠲᠡᠭᠡᠢ ᠠᠶᠤ᠃ 28 〈ᠪᠢ ᠶᠠᠪᠤᠭᠠᠳ᠂ ᠲᠠ ᠨᠠᠷ ᠤᠷᠤᠭᠤ ᠡᠷᠭᠢᠵᠦ ᠢᠷᠡᠨᠡ〉 ᠭᠡᠵᠦ ᠮᠢᠨᠦ ᠬᠡᠯᠡᠭᠰᠡᠨ ᠢ ᠲᠠ ᠨᠠᠷ ᠰᠣᠨᠣᠰᠣᠯᠠ᠃ ᠬᠡᠷᠪᠡ ᠲᠠ ᠨᠠᠷ ᠨᠠᠮᠠᠶᠢ ᠬᠠᠢᠷᠠᠯᠠᠳᠠᠭ ᠪᠣᠯ ᠡᠴᠢᠭᠡ ᠳᠡᠭᠡᠨ ᠣᠴᠢᠵᠤ ᠪᠠᠢᠭᠠ ᠳᠤ ᠮᠢᠨᠢ ᠪᠠᠶᠠᠷᠯᠠᠬᠤ ᠪᠠᠢᠭᠰᠠᠨ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠡᠴᠢᠭᠡ ᠨᠠᠳᠠ ᠠᠴᠠ ᠠᠭᠤᠤ ᠶᠤᠮ᠃ 29 ᠡᠢᠮᠦ ᠶᠠᠪᠤᠳᠠᠯ ᠪᠣᠯᠬᠤ ᠦᠶᠡ ᠳᠦ ᠲᠠ ᠨᠠᠷ ᠢ ᠢᠲᠡᠭᠡᠭᠡᠰᠡᠢ ᠬᠡᠮᠡᠨ᠂ ᠡᠢᠮᠦ ᠶᠠᠪᠤᠳᠠᠯ ᠪᠣᠯᠬᠤ ᠠᠴᠠ ᠡᠮᠦᠨᠡ ᠪᠢ ᠲᠠ ᠨᠠᠷ ᠲᠤ ᠤᠷᠢᠳᠴᠢᠯᠠᠨ ᠬᠡᠯᠡᠯᠡ᠃ 30 ᠡᠭᠦᠨ ᠡᠴᠡ ᠬᠣᠢᠰᠢ ᠪᠢ ᠲᠠ ᠨᠠᠷ ᠲᠠᠢ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠵᠠᠬᠢᠷᠤᠭᠴᠢ ᠢᠷᠡᠵᠦ ᠪᠠᠢᠨᠠ᠃ ᠲᠡᠷᠡ ᠨᠠᠮᠠᠶᠢ ᠶᠠᠭᠠᠬᠢᠵᠤ ᠴᠤ ᠴᠢᠳᠠᠬᠤ ᠦᠭᠡᠢ᠃ 31 ᠬᠠᠷᠢᠨ ᠪᠢ ᠡᠴᠢᠭᠡ ᠪᠡᠨ ᠬᠠᠢᠷᠠᠯᠠᠳᠠᠭ ᠢᠶᠠᠨ᠂ ᠡᠴᠢᠭᠡ ᠶᠢᠨ ᠨᠠᠳᠠ ᠳᠤ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠯᠠ ᠬᠢᠳᠡᠭ ᠢᠶᠡᠨ ᠶᠢᠷᠲᠢᠨᠴᠦ ᠳᠦ ᠮᠡᠳᠡᠭᠦᠯᠬᠦ ᠶᠣᠰᠣᠲᠠᠢ᠃ ᠪᠣᠰᠴᠠᠭᠠ᠂ ᠡ᠊ᠨᠳᠡ ᠡᠴᠡ ᠶᠠᠪᠤᠵᠠᠭᠠᠶᠠ᠃