ᠶᠣᠬᠠᠨ ᠠᠷᠪᠠᠨ ᠬᠣᠶᠠᠷ
ᠮᠠᠷᠢᠶᠠ ᠢᠰᠦ᠋ᠰ ᠢ ᠲᠣᠰᠣᠯᠠᠭᠰᠠᠨ ᠨᠢ
1 ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠠᠴᠠ ᠵᠢᠷᠭᠤᠭᠠᠨ ᠬᠣᠨᠣᠭ ᠤᠨ ᠡᠮᠦᠨᠡ ᠢᠰᠦ᠋ᠰ ᠪᠧᠲ᠋ᠠᠨᠢᠶᠠ ᠳᠤ ᠬᠦᠷᠴᠡᠢ᠃ ᠲᠡᠨᠳᠡ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠢᠰᠦ᠋ᠰ ᠤᠨ ᠠᠮᠢᠯᠠᠭᠤᠯᠤᠭᠰᠠᠨ ᠯᠠᠽᠠᠷᠠ ᠴᠤ ᠪᠠᠢᠳᠠᠭ᠃ 2 ᠲᠡᠨᠳᠡᠬᠢ ᠶᠢᠨ ᠬᠢᠨ ᠢᠰᠦ᠋ᠰ ᠲᠤ ᠵᠣᠭᠣᠭ ᠪᠠᠵᠠᠭᠠᠵᠤ᠂ ᠮᠠᠷᠲ᠋ᠠ ᠦᠢᠯᠡᠴᠢᠯᠡᠵᠦ ᠪᠠᠢᠪᠠ᠃ ᠯᠠᠽᠠᠷᠠ ᠴᠤ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠰᠠᠭᠤᠯᠴᠠᠭᠰᠠᠨ ᠬᠥᠮᠦᠰ ᠦᠨ ᠳᠤᠮᠳᠠ ᠪᠠᠢᠯᠠ᠃ 3 ᠮᠠᠷᠢᠶᠠ ᠨᠢᠭᠡ ᠵᠢᠩ ᠮᠠᠰᠢ ᠦᠨᠡ ᠲᠠᠢ ᠴᠤᠯ ᠨᠠᠷᠳ᠋ ᠤᠨ ᠦᠨᠦᠷᠲᠦ ᠲᠣᠰᠣ ᠠᠪᠴᠢᠷᠠᠵᠤ᠂ ᠢᠰᠦ᠋ᠰ ᠤᠨ ᠬᠥᠯ ᠤᠷᠤᠭᠤ ᠴᠢᠳᠬᠤᠭᠠᠳ᠂ ᠭᠡᠵᠢᠭᠡ ᠪᠡᠷ ᠢᠶᠠᠨ ᠬᠥᠯ ᠢ ᠨᠢ ᠠᠷᠴᠢᠪᠠ᠃ ᠠᠩᠬᠢᠯᠤᠭᠤᠨ ᠲᠣᠰᠣᠨ ᠤ ᠦᠨᠦᠷ ᠭᠡᠷ ᠳᠦᠭᠦᠷᠡᠩ ᠬᠠᠩ᠋ᠬᠤᠯᠪᠠ᠃ 4 ᠢᠰᠦ᠋ᠰ ᠤᠨ ᠱᠠᠪᠢ ᠨᠠᠷ ᠤᠨ ᠨᠢᠭᠡ᠂ ᠲᠤᠬᠠᠢᠯᠠᠪᠠᠯ ᠢᠰᠦ᠋ᠰ ᠢ ᠪᠠᠷᠢᠭᠤᠯᠤᠭᠴᠢ ᠢᠰᠺᠠᠷᠢᠣᠲ ᠤᠨ ᠶᠦᠳᠠ᠄ 5 《ᠶᠠᠭᠠᠬᠢᠭᠠᠳ ᠡᠨᠡ ᠲᠣᠰᠣ ᠶᠢ ᠭᠤᠷᠪᠠᠨ ᠵᠠᠭᠤᠨ ᠳ᠋ᠧᠨᠠᠷ 16 ᠢᠶᠠᠷ ᠬᠤᠳᠠᠯᠳᠤᠭᠠᠳ ᠶᠠᠳᠠᠭᠤᠴᠤᠳ ᠢ ᠲᠤᠰᠠᠯᠠᠭᠰᠠᠨ ᠦᠭᠡᠢ ᠶᠤᠮ ᠪᠤᠢ︖》 ᠭᠡᠪᠡ᠃ 6 (ᠲᠡᠷᠡ ᠶᠠᠳᠠᠭᠤᠴᠤᠳ ᠤᠨ ᠲᠥᠯᠥᠭᠡ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠪᠢᠰᠢ᠂ ᠬᠠᠷᠢᠨ ᠬᠤᠯᠠᠭᠠᠢᠴᠢ ᠪᠠᠢᠭᠰᠠᠨ ᠪᠥᠭᠡᠳ ᠵᠣᠭᠣᠰᠣᠨ ᠤ ᠤᠭᠤᠲᠠ ᠶᠢ ᠠᠳᠬᠤᠵᠤ᠂ ᠳᠣᠲᠣᠷᠠ ᠨᠢ ᠬᠢᠭᠰᠡᠨ ᠢ ᠨᠢ ᠠᠪᠴᠢᠬᠠᠳᠠᠭ ᠪᠠᠢᠵᠠᠢ᠃) 7 ᠬᠠᠷᠢᠨ ᠢᠰᠦ᠋ᠰ᠄ 《ᠳᠤᠷᠠ ᠪᠠᠷ ᠢᠶᠠᠨ ᠪᠣᠯᠣᠭ᠃ ᠮᠢᠨᠦ ᠣᠷᠣᠰᠢᠭᠤᠯᠭᠠ ᠶᠢᠨ ᠡᠳᠦᠷ ᠦᠨ ᠲᠥᠯᠥᠭᠡ ᠲᠡᠷᠡ ᠡᠭᠦᠨ ᠢ ᠬᠠᠳᠠᠭᠠᠯᠠᠭᠰᠠᠨ ᠶᠤᠮ᠃ 8 ᠶᠠᠳᠠᠭᠤᠴᠤᠳ ᠲᠠ ᠨᠠᠷ ᠲᠠᠢ ᠦᠷᠭᠦᠯᠵᠢ ᠬᠠᠮᠲᠤ ᠪᠠᠢᠳᠠᠭ᠂ ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠠᠢ ᠦᠷᠭᠦᠯᠵᠢ ᠬᠠᠮᠲᠤ ᠪᠠᠢᠬᠤ ᠪᠢᠰᠢ》 ᠭᠡᠵᠦ ᠬᠡᠯᠡᠪᠡ᠃
9 ᠢᠰᠦ᠋ᠰ ᠤᠨ ᠲᠡᠨᠳᠡ ᠪᠠᠢᠭᠠ ᠶᠢ ᠮᠡᠳᠡᠭᠡᠳ ᠦᠯᠡᠮᠵᠢ ᠣᠯᠠᠨ ᠶᠦᠳᠠᠢᠴᠤᠳ ᠢᠷᠡᠪᠡ᠃ ᠲᠡᠳᠡ ᠵᠥᠪᠬᠡᠨ ᠢᠰᠦ᠋ᠰ ᠢ ᠪᠢᠰᠢ᠂ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠤᠯᠤᠭᠳᠠᠭᠰᠠᠨ ᠯᠠᠽᠠᠷᠠ ᠶᠢ ᠴᠤ ᠦᠵᠡᠬᠦ ᠭᠡᠵᠦ ᠪᠠᠢᠯᠠ᠃ 10 ᠲᠡᠢᠮᠦ ᠡᠴᠡ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠯᠠᠽᠠᠷᠠ ᠶᠢ ᠴᠤ ᠠᠯᠠᠬᠤ ᠭᠡᠵᠦ ᠵᠥᠪᠯᠡᠯᠳᠦᠪᠡ᠃ 11 ᠤᠴᠢᠷ ᠨᠢ ᠶᠦᠳᠠᠢᠴᠤᠳ ᠯᠠᠽᠠᠷᠠ ᠠᠴᠠ ᠪᠣᠯᠵᠤ ᠣᠯᠠᠨ ᠢᠶᠠᠷ ᠰᠠᠯᠵᠤ ᠶᠠᠪᠤᠭᠠᠳ ᠢᠰᠦ᠋ᠰ ᠢ ᠢᠲᠡᠭᠡᠵᠦ ᠪᠠᠢᠯᠠ᠃
ᠢᠰᠦ᠋ᠰ ᠶᠧᠷᠦ᠋ᠰᠠᠯᠧᠮ ᠳᠤ ᠣᠷᠣᠭᠰᠠᠨ ᠨᠢ
12 ᠳᠠᠷᠠᠭᠠ ᠡᠳᠦᠷ ᠨᠢ ᠪᠠᠶᠠᠷ ᠲᠤ ᠢᠷᠡᠭᠰᠡᠨ ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠢᠰᠦ᠋ᠰ ᠤᠨ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠠᠢᠰᠤᠢ ᠶᠢ ᠰᠣᠨᠣᠰᠣᠭᠠᠳ 13 ᠬᠢᠯᠭᠠᠰᠤᠲᠤ ᠮᠣᠳᠣᠨ ᠤ ᠮᠥᠴᠢᠷ ᠠᠪᠴᠤ᠂ ᠲᠡᠭᠦᠨ ᠢ ᠤᠭᠲᠤᠬᠤ ᠪᠠᠷ ᠭᠠᠷᠤᠭᠠᠳ᠄ 《ᠬᠣᠰᠠᠨᠨᠠ 17 ︕ ᠡᠵᠡᠨ ᠦ ᠨᠡᠷᠡ ᠪᠡᠷ ᠢᠷᠡᠭᠴᠢ ᠢᠰᠷᠧᠯ ᠤᠨ ᠬᠠᠭᠠᠨ ᠢᠷᠥᠭᠡᠯ ᠲᠡᠢ ᠡ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠭᠰᠠᠭᠠᠷ ᠪᠠᠢᠯᠠ᠃ 14 ᠢᠰᠦ᠋ᠰ ᠡᠯᠵᠢᠭᠡᠨ ᠳᠠᠭᠠ ᠣᠯᠵᠤ ᠤᠨᠤᠪᠠ᠃ 15 ᠡᠨᠡ ᠨᠢ᠂ 《ᠽᠢᠶᠣᠨ ᠥᠬᠢᠨ ᠡ᠂ ᠪᠦᠦ ᠠᠶᠤ᠂ ᠬᠠᠷᠠ︕ ᠬᠠᠭᠠᠨ ᠴᠢᠨᠢ ᠡᠯᠵᠢᠭᠡᠨ ᠳᠠᠭᠠ ᠤᠨᠤᠭᠠᠳ ᠠᠢᠰᠤᠢ》 ᠭᠡᠵᠦ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠶᠣᠰᠣᠭᠠᠷ ᠪᠣᠯᠪᠠ᠃ 16 ᠱᠠᠪᠢ ᠨᠠᠷ ᠨᠢ ᠡᠳᠡᠭᠡᠷ ᠢ ᠠᠩ᠋ᠬᠠᠨ ᠳᠠᠭᠠᠨ ᠣᠢᠯᠠᠭᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠢᠰᠦ᠋ᠰ ᠠᠯᠳᠠᠷᠰᠢᠭᠤᠯᠤᠭᠳᠠᠭᠰᠠᠨ ᠤ ᠳᠠᠷᠠᠭᠠ ᠯᠠ ᠡᠳᠡᠭᠡᠷ ᠨᠢ ᠲᠡᠭᠦᠨ ᠦ ᠲᠤᠬᠠᠢ ᠪᠢᠴᠢᠭᠳᠡᠭᠰᠡᠨ ᠪᠥᠭᠡᠳ ᠬᠥᠮᠦᠰ ᠲᠡᠭᠦᠨ ᠳᠦ ᠡᠨᠡ ᠮᠡᠲᠦ ᠪᠡᠷ ᠦᠢᠯᠡᠳᠦᠭᠰᠡᠨ ᠢ ᠤᠬᠠᠭᠠᠷᠠᠵᠠᠢ᠃ 17 ᠢᠰᠦ᠋ᠰ ᠯᠠᠽᠠᠷᠠ ᠶᠢ ᠪᠤᠯᠠᠰᠢᠨ ᠠᠴᠠ ᠳᠠᠭᠤᠳᠠᠵᠤ᠂ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠤᠯᠬᠤ ᠳᠤᠨᠢ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠰᠠᠨ ᠣᠯᠠᠨ ᠬᠥᠮᠦᠨ ᠢᠰᠦ᠋ᠰ ᠢ ᠭᠡᠷᠡᠴᠢᠯᠡᠭᠰᠡᠭᠡᠷ ᠪᠠᠢᠯᠠ᠃ 18 ᠡᠨᠡ ᠰᠢᠳᠢ ᠲᠡᠮᠳᠡᠭ ᠢ ᠦᠢᠯᠡᠳᠦᠭᠰᠡᠨ ᠢ ᠨᠢ ᠰᠣᠨᠣᠰᠣᠭᠰᠠᠨ ᠣᠯᠠᠨ ᠬᠥᠮᠦᠨ ᠤᠭᠲᠤᠬᠤ ᠪᠠᠷ ᠭᠠᠷᠤᠭᠰᠠᠨ ᠠᠵᠢ᠃ 19 ᠹᠠᠷᠢᠰᠠᠢᠴᠤᠳ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠬᠠᠷᠠᠭᠠᠴᠢ᠂ ᠱᠠᠯ ᠳᠡᠮᠡᠢ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠨᠠ᠂ ᠶᠢᠷᠲᠢᠨᠴᠦ ᠪᠡᠷ ᠢᠶᠠᠨ ᠲᠡᠭᠦᠨ ᠢ ᠳᠠᠭᠠᠯᠠ ᠰᠢᠦ》 ᠭᠡᠵᠡᠭᠡᠪᠡ᠃
ᠭᠷᠧᠭᠴᠦᠳ ᠢᠰᠦ᠋ᠰ ᠢ ᠬᠠᠢᠭᠰᠠᠨ ᠨᠢ
20 ᠪᠠᠶᠠᠷ ᠢᠶᠠᠷ ᠮᠥᠷᠭᠥᠯ ᠬᠢᠬᠦ ᠪᠡᠷ ᠢᠷᠡᠭᠰᠡᠨ ᠬᠥᠮᠦᠰ ᠦᠨ ᠳᠤᠮᠳᠠ ᠬᠡᠳᠦᠨ ᠭᠷᠧᠭ ᠬᠥᠮᠦᠨ ᠪᠠᠢᠵᠠᠢ᠃ 21 ᠲᠡᠳᠡ ᠭᠠᠯᠢᠯᠠᠶᠠ ᠳᠠᠬᠢ ᠪᠧᠲ᠋ᠰᠠᠢᠳᠠ ᠶᠢᠨ ᠹᠢᠯᠢᠫ ᠲᠤ ᠣᠴᠢᠵᠤ᠄ 《ᠠᠪᠤᠭᠠᠢ ᠡ᠂ ᠪᠢᠳᠡ ᠢᠰᠦ᠋ᠰ ᠲᠠᠢ ᠠᠭᠤᠯᠵᠠᠬᠤ ᠭᠡᠰᠡᠨ ᠶᠤᠮ》 ᠭᠡᠵᠦ ᠭᠤᠶᠤᠭᠰᠠᠨ ᠳᠤ᠂ 22 ᠹᠢᠯᠢᠫ ᠶᠠᠪᠤᠵᠤ ᠠᠨᠳ᠋ᠷᠧ ᠳᠤ ᠬᠡᠯᠡᠪᠡ᠃ ᠠᠨᠳ᠋ᠷᠧ᠂ ᠹᠢᠯᠢᠫ ᠨᠠᠷ ᠶᠠᠪᠤᠵᠤ ᠢᠰᠦ᠋ᠰ ᠲᠤ ᠳᠤᠭᠤᠯᠭᠠᠪᠠ᠃ 23 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠬᠥᠮᠦᠨ ᠦ ᠬᠦᠦ ᠶᠢᠨ ᠠᠯᠳᠠᠷᠰᠢᠭᠤᠯᠤᠭᠳᠠᠬᠤ ᠴᠠᠭ ᠢᠷᠡᠯᠡ᠃ 24 ᠲᠠ ᠨᠠᠷ ᠲᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠨᠢᠭᠡ ᠮᠥᠬᠥᠯᠢᠭ ᠪᠤᠭᠤᠳᠠᠢ ᠭᠠᠵᠠᠷ ᠲᠤ ᠤᠨᠠᠭᠠᠳ ᠦᠬᠦᠬᠦ ᠦᠭᠡᠢ ᠪᠣᠯ ᠭᠠᠭᠴᠠ ᠬᠡᠪ ᠢᠶᠡᠷ ᠢᠶᠠᠨ ᠦᠯᠡᠳᠡᠬᠦ ᠪᠣᠯᠪᠠᠴᠤ ᠦᠬᠦᠪᠡᠯ ᠣᠯᠠᠨ ᠦᠷᠡ ᠪᠤᠢ ᠪᠣᠯᠣᠨᠠ᠃ 25 ᠠᠮᠢ ᠪᠠᠨ ᠬᠠᠢᠷᠠᠯᠠᠭᠴᠢ ᠨᠢ ᠠᠮᠢ ᠪᠠᠨ ᠠᠯᠳᠠᠨᠠ᠃ ᠡᠨᠡ ᠶᠢᠷᠲᠢᠨᠴᠦ ᠳᠦ ᠠᠮᠢ ᠪᠠᠨ ᠵᠠᠨᠤᠭᠴᠢ ᠨᠢ ᠮᠥᠩᠬᠡ ᠠᠮᠢ ᠳᠤ ᠬᠦᠷᠲᠡᠯᠡ ᠠᠮᠢ ᠪᠠᠨ ᠦᠯᠡᠳᠡᠭᠡᠨᠡ᠃ 26 ᠬᠡᠨ ᠨᠠᠳᠠ ᠳᠤ ᠵᠠᠷᠤᠭᠳᠠᠬᠤ ᠭᠡᠪᠡᠯ ᠨᠠᠮᠠᠶᠢ ᠳᠠᠭᠠ᠃ ᠪᠢ ᠬᠠᠮᠢᠭᠠ ᠪᠠᠢᠪᠠᠯ ᠮᠢᠨᠦ ᠵᠠᠷᠤᠴᠠ ᠴᠤ ᠲᠡᠨᠳᠡ ᠪᠠᠢᠬᠤ ᠪᠥᠭᠡᠳ ᠬᠡᠨ ᠬᠡᠷᠪᠡ ᠨᠠᠳᠠ ᠳᠤ ᠵᠠᠷᠤᠭᠳᠠᠪᠠᠯ ᠡᠴᠢᠭᠡ ᠲᠡᠭᠦᠨ ᠢ ᠬᠦᠨᠳᠦᠯᠡᠬᠦ ᠪᠣᠯᠣᠨᠠ᠃
ᠢᠰᠦ᠋ᠰ ᠠᠯᠠᠭᠳᠠᠬᠤ ᠲᠤᠬᠠᠢ ᠪᠠᠨ
27 ᠣᠳᠣ ᠮᠢᠨᠦ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠨᠠ᠂ ᠪᠢ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠤᠢ︖ 〈ᠠᠪᠤ ᠡ᠂ ᠡᠨᠡ ᠴᠠᠭ ᠠᠴᠠ ᠨᠠᠮᠠᠶᠢ ᠠᠪᠤᠷᠠᠭᠠᠴᠢ〉 ᠭᠡᠬᠦ ᠤᠤ︖ ᠦᠭᠡᠢ᠂ ᠪᠢ ᠶᠠᠭ ᠡᠨᠡ ᠵᠣᠷᠢᠯᠭᠠ ᠪᠠᠷ ᠡᠨᠡ ᠴᠠᠭ ᠲᠤ ᠢᠷᠡᠭᠰᠡᠨ᠂ 28 ᠠᠪᠤ ᠡ᠂ ᠨᠡᠷᠡ ᠪᠡᠨ ᠠᠯᠳᠠᠷᠰᠢᠭᠤᠯᠤᠭᠠᠴᠢ︕》 ᠭᠡᠰᠡᠨ ᠳᠦ᠂ ᠲᠩᠷᠢ ᠡᠴᠡ ᠳᠠᠭᠤ ᠭᠠᠷᠴᠤ᠄ 《ᠪᠢ ᠠᠯᠳᠠᠷᠰᠢᠭᠤᠯᠤᠭᠰᠠᠨ᠂ ᠪᠠᠰᠠ ᠳᠠᠬᠢᠨ ᠠᠯᠳᠠᠷᠰᠢᠭᠤᠯᠤᠨᠠ》 ᠭᠡᠪᠡ᠃ 29 ᠬᠠᠵᠠᠭᠤ ᠳᠤᠨᠢ ᠵᠣᠭᠰᠣᠵᠤ ᠡᠭᠦᠨ ᠢ ᠰᠣᠨᠣᠰᠣᠭᠰᠠᠨ ᠣᠯᠠᠨ ᠬᠥᠮᠦᠨ᠄ 《ᠲᠩᠷᠢ ᠳᠤᠤᠭᠠᠷᠤᠯᠠ》 ᠭᠡᠬᠦ ᠳᠦ᠂ ᠵᠠᠷᠢᠮ ᠨᠢ᠄ 《ᠲᠩᠷᠢ ᠡᠯᠴᠢ ᠲᠡᠭᠦᠨ ᠳᠦ ᠶᠠᠷᠢᠯᠠ》 ᠭᠡᠵᠡᠭᠡᠪᠡ᠃ 30 ᠢᠰᠦ᠋ᠰ᠄ 《ᠡᠨᠡ ᠳᠠᠭᠤ ᠮᠢᠨᠦ ᠲᠥᠯᠥᠭᠡ ᠪᠢᠰᠢ᠂ ᠬᠠᠷᠢᠨ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠭᠠᠷᠤᠭᠰᠠᠨ᠃ 31 ᠣᠳᠣ ᠡᠨᠡ ᠶᠢᠷᠲᠢᠨᠴᠦ ᠰᠢᠭᠦᠭᠳᠡᠬᠦ ᠪᠣᠯᠣᠯᠠ᠂ ᠣᠳᠣ ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠵᠠᠬᠢᠷᠤᠭᠴᠢ 18 ᠬᠥᠭᠡᠭᠡᠭᠳᠡᠬᠦ ᠪᠣᠯᠣᠨᠠ᠃ 32 ᠪᠢ ᠭᠠᠵᠠᠷ ᠠᠴᠠ ᠡᠷᠭᠦᠭᠳᠡᠪᠡᠯ ᠪᠦᠬᠦ ᠬᠥᠮᠦᠨ ᠢ ᠪᠡᠶᠡ ᠳᠡᠭᠡᠨ ᠲᠠᠲᠠᠬᠤ ᠪᠣᠯᠣᠨᠠ》 ᠭᠡᠯᠡ᠃ 33 ᠢᠰᠦ᠋ᠰ ᠶᠠᠮᠠᠷ ᠦᠬᠦᠯ ᠢᠶᠡᠷ ᠦᠬᠦᠬᠦ ᠪᠡᠨ ᠮᠡᠳᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠡᠭᠦᠨ ᠢ ᠬᠡᠯᠡᠵᠡᠢ᠃ 34 ᠬᠤᠷᠠᠭᠰᠠᠨ ᠣᠯᠠᠨ ᠲᠡᠭᠦᠨ ᠳᠦ᠄ 《ᠾᠷᠢᠰᠲ᠋ᠣᠰ ᠮᠥᠩᠬᠡᠳᠡ ᠪᠠᠢᠬᠤ ᠪᠣᠯᠣᠨᠠ ᠭᠡᠵᠦ ᠪᠢᠳᠡ ᠬᠠᠤᠯᠢ ᠡᠴᠡ ᠰᠤᠷᠤᠯᠴᠠᠭᠰᠠᠨ ᠠᠲᠠᠯᠠ ᠲᠠ ᠶᠠᠭᠤᠨ ᠳᠤ᠄ 〈ᠬᠥᠮᠦᠨ ᠦ ᠬᠦᠦ ᠡᠷᠭᠦᠭᠳᠡᠬᠦ ᠶᠣᠰᠣᠲᠠᠢ〉 ᠭᠡᠵᠦ ᠬᠡᠯᠡᠨᠡ ᠪᠤᠢ︖ ᠡᠨᠡ ᠬᠥᠮᠦᠨ ᠦ ᠬᠦᠦ ᠭᠡᠳᠡᠭ ᠨᠢ ᠬᠡᠨ ᠪᠤᠢ︖》 ᠭᠡᠰᠡᠨ ᠳᠦ᠂ 35 ᠢᠰᠦ᠋ᠰ᠄ 《ᠭᠡᠷᠡᠯ ᠲᠠ ᠨᠠᠷ ᠤᠨ ᠳᠤᠮᠳᠠ ᠲᠦᠷ ᠵᠠᠭᠤᠷᠠ ᠪᠠᠢᠬᠤ ᠪᠣᠯᠣᠨᠠ᠃ ᠬᠠᠷᠠᠩ᠋ᠭᠤᠢ ᠳᠤ ᠨᠥᠮᠥᠷᠥᠭᠳᠡᠬᠦ ᠦᠭᠡᠢ ᠶᠢᠨ ᠲᠤᠯᠠᠳᠠ ᠭᠡᠷᠡᠯ ᠪᠠᠢᠬᠤ ᠳᠤᠨᠢ ᠵᠠᠮ ᠢᠶᠠᠨ ᠬᠥᠭᠡᠭᠡᠭᠲᠦᠨ᠂ ᠬᠠᠷᠠᠩ᠋ᠭᠤᠢ ᠳᠤ ᠶᠠᠪᠤᠳᠠᠭ ᠬᠥᠮᠦᠨ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠠᠨ ᠮᠡᠳᠡᠳᠡᠭ ᠦᠭᠡᠢ᠃ 36 ᠭᠡᠷᠡᠯ ᠪᠠᠢᠬᠤ ᠳᠤᠨᠢ ᠭᠡᠷᠡᠯ ᠢ ᠢᠲᠡᠭᠡᠭᠲᠦᠨ᠂ ᠲᠡᠭᠡᠪᠡᠯ ᠭᠡᠷᠡᠯ ᠦᠨ ᠬᠡᠦᠬᠡᠳ ᠪᠣᠯᠣᠨᠠ》 ᠭᠡᠯᠡ᠃
ᠦᠯᠦ ᠢᠲᠡᠭᠡᠭᠴᠢ ᠶᠢ ᠢᠰᠦ᠋ᠰ ᠤᠨ ᠦᠭᠡ ᠰᠢᠭᠦᠨᠡ
37 ᠢᠰᠦ᠋ᠰ ᠬᠡᠳᠦᠢᠪᠡᠷ ᠲᠡᠳᠡᠨ ᠦ ᠡᠮᠦᠨᠡ ᠣᠯᠠᠨ ᠰᠢᠳᠢ ᠲᠡᠮᠳᠡᠭ ᠢ ᠦᠢᠯᠡᠳᠦᠭᠰᠡᠨ ᠪᠣᠯᠪᠠᠴᠤ ᠲᠡᠳᠡ ᠮᠥᠨ ᠯᠠ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠯᠠ᠃ 38 ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠶᠢᠨ᠄ 《ᠡᠵᠡᠨ ᠡ᠂ ᠪᠢᠳᠡᠨ ᠦ ᠰᠣᠨᠣᠰᠬᠠᠭᠰᠠᠨ ᠢ ᠬᠡᠨ ᠢᠲᠡᠭᠡᠪᠡ︖ ᠡᠵᠡᠨ ᠦ ᠮᠤᠲᠤᠷ ᠬᠡᠨ ᠳᠦ ᠢᠯᠡᠷᠡᠭᠰᠡᠨ ᠪᠤᠢ︖》 ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠡᠢᠨ ᠬᠦ ᠪᠡᠶᠡᠯᠡᠭᠳᠡᠵᠡᠢ᠃ 39 ᠲᠡᠳᠡᠨ ᠦ ᠢᠲᠡᠭᠡᠵᠦ ᠴᠢᠳᠠᠭᠠ ᠦᠭᠡᠢ ᠶᠢᠨ ᠤᠴᠢᠷ ᠢ ᠢᠰᠠᠢᠶᠠ ᠪᠠᠰᠠ᠄ 40 《ᠲᠡᠷᠡ ᠲᠡᠳᠡᠨ ᠦ ᠨᠢᠳᠦ ᠶᠢ ᠨᠢ ᠰᠣᠬᠣᠯᠠᠵᠤ᠂ ᠵᠢᠷᠦᠬᠡ ᠶᠢ ᠨᠢ ᠬᠠᠲᠠᠭᠤᠷᠠᠭᠤᠯᠤᠭᠰᠠᠨ᠃ ᠲᠡᠳᠡ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠬᠦ᠂ ᠵᠢᠷᠦᠬᠡ ᠪᠡᠷ ᠢᠶᠠᠨ ᠤᠬᠠᠭᠠᠷᠠᠬᠤ᠂ ᠡᠷᠭᠢᠵᠦ ᠢᠷᠡᠬᠦ ᠤᠴᠢᠷ ᠦᠭᠡᠢ᠂ ᠪᠢ ᠲᠡᠳᠡᠨ ᠢ ᠡᠳᠡᠭᠡᠭᠡᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠭᠰᠡᠨ᠃ 41 ᠢᠰᠠᠢᠶᠠ ᠢᠰᠦ᠋ᠰ ᠤᠨ ᠠᠯᠳᠠᠷ ᠰᠤᠤ ᠶᠢ ᠬᠠᠷᠠᠭᠰᠠᠨ ᠤᠴᠢᠷ ᠠᠴᠠ ᠲᠡᠭᠦᠨ ᠦ ᠲᠤᠬᠠᠢ ᠢᠩᠭᠢᠵᠦ ᠥᠭᠦᠯᠡᠭᠰᠡᠨ ᠠᠵᠢ᠃ 42 ᠬᠠᠷᠢᠨ ᠨᠣᠶᠠᠳ ᠳᠣᠲᠣᠷᠠ ᠠᠴᠠ ᠴᠤ ᠣᠯᠠᠨ ᠬᠥᠮᠦᠨ ᠢᠰᠦ᠋ᠰ ᠢ ᠢᠲᠡᠭᠡᠭᠰᠡᠨ ᠪᠠᠢᠨᠠ᠃ ᠭᠡᠪᠡᠴᠦ ᠲᠡᠳᠡ ᠹᠠᠷᠢᠰᠠᠢᠴᠤᠳ ᠠᠴᠠ ᠪᠣᠯᠵᠤ᠂ ᠢᠲᠡᠭᠡᠯ ᠢᠶᠡᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠦᠭᠡᠢ᠃ ᠲᠡᠳᠡ ᠬᠤᠷᠠᠯ ᠤᠨ ᠲᠠᠩᠬᠢᠮ ᠠᠴᠠ ᠬᠥᠭᠡᠭᠡᠭᠳᠡᠬᠦ ᠡᠴᠡ ᠠᠶᠤᠭᠰᠠᠨ ᠠᠵᠢ᠃ 43 ᠲᠡᠳᠡ ᠬᠥᠮᠦᠨ ᠦ ᠰᠠᠢᠰᠢᠶᠠᠯ ᠢ ᠪᠤᠷᠬᠠᠨ ᠤ ᠰᠠᠢᠰᠢᠶᠠᠯ ᠠᠴᠠ ᠢᠯᠡᠭᠦᠦ ᠲᠠᠭᠠᠯᠠᠭᠰᠠᠨ ᠶᠤᠮ᠃
44 ᠢᠰᠦ᠋ᠰ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠨᠠᠮᠠᠶᠢ ᠢᠲᠡᠭᠡᠭᠴᠢ ᠨᠢ ᠨᠠᠮᠠᠶᠢ ᠢᠲᠡᠭᠡᠵᠦ ᠪᠠᠢᠭᠠ ᠲᠡᠳᠦᠢ ᠪᠢᠰᠢ᠂ ᠬᠠᠷᠢᠨ ᠨᠠᠮᠠᠶᠢ ᠢᠯᠡᠭᠡᠭᠴᠢ ᠶᠢ ᠢᠲᠡᠭᠡᠵᠦ ᠪᠠᠢᠨᠠ᠃ 45 ᠨᠠᠮᠠᠶᠢ ᠬᠠᠷᠠᠭᠴᠢ ᠨᠢ ᠨᠠᠮᠠᠶᠢ ᠢᠯᠡᠭᠡᠭᠴᠢ ᠶᠢ ᠬᠠᠷᠠᠵᠤ ᠪᠠᠢᠭᠠ ᠶᠤᠮ᠃ 46 ᠨᠠᠳᠠ ᠳᠤ ᠢᠲᠡᠭᠡᠭᠴᠢ ᠪᠣᠯᠭᠠᠨ ᠢ ᠬᠠᠷᠠᠩ᠋ᠭᠤᠢ ᠳᠤ ᠪᠠᠢᠯᠭᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠪᠢ ᠶᠢᠷᠲᠢᠨᠴᠦ ᠳᠦ ᠭᠡᠷᠡᠯ ᠪᠣᠯᠵᠤ ᠢᠷᠡᠭᠰᠡᠨ᠃ 47 ᠬᠡᠨ ᠨᠢᠭᠡᠨ ᠨᠢ ᠮᠢᠨᠦ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠳᠠᠭᠠᠬᠤ ᠦᠭᠡᠢ ᠴᠤ ᠭᠡᠰᠡᠨ ᠪᠢ ᠲᠡᠭᠦᠨ ᠢ ᠰᠢᠭᠦᠬᠦ ᠦᠭᠡᠢ᠃ ᠤᠴᠢᠷ ᠨᠢ ᠪᠢ ᠶᠢᠷᠲᠢᠨᠴᠦ ᠶᠢ ᠰᠢᠭᠦᠬᠦ ᠪᠡᠷ ᠪᠢᠰᠢ᠂ ᠬᠠᠷᠢᠨ ᠠᠪᠤᠷᠠᠬᠤ ᠪᠠᠷ ᠢᠷᠡᠭᠰᠡᠨ ᠶᠤᠮ᠃ 48 ᠨᠠᠮᠠᠶᠢ ᠭᠣᠯᠣᠵᠤ᠂ ᠮᠢᠨᠦ ᠦᠭᠡ ᠶᠢ ᠦᠯᠦ ᠬᠦᠯᠢᠶᠡᠨ ᠠᠪᠤᠭᠴᠢ ᠶᠢ ᠰᠢᠭᠦᠬᠦ ᠰᠢᠭᠦᠭᠴᠢ ᠪᠤᠢ᠃ ᠮᠢᠨᠦ ᠬᠡᠯᠡᠭᠰᠡᠨ ᠦᠭᠡ᠂ ᠡᠴᠦᠰ ᠦᠨ ᠡᠳᠦᠷ ᠲᠦ ᠲᠡᠭᠦᠨ ᠢ ᠰᠢᠭᠦᠨᠡ᠃ 49 ᠪᠢ ᠲᠠᠪᠠ ᠪᠠᠷ ᠢᠶᠠᠨ ᠶᠠᠷᠢᠭᠠ ᠦᠭᠡᠢ᠂ ᠬᠠᠷᠢᠨ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠡᠴᠢᠭᠡ ᠶᠠᠭᠤ ᠥᠭᠦᠯᠡᠵᠦ᠂ ᠶᠠᠭᠤ ᠶᠠᠷᠢᠬᠤ ᠶᠢ ᠮᠢᠨᠢ ᠨᠠᠳᠠ ᠳᠤ ᠵᠠᠷᠯᠢᠭᠳᠠᠭᠰᠠᠨ ᠶᠤᠮ᠃ 50 ᠲᠡᠭᠦᠨ ᠦ ᠵᠠᠷᠯᠢᠭ ᠪᠣᠯ ᠮᠥᠩᠬᠡ ᠠᠮᠢ ᠮᠥᠨ ᠭᠡᠳᠡᠭ ᠢ ᠪᠢ ᠮᠡᠳᠡᠨᠡ᠃ ᠲᠡᠢᠮᠦ ᠡᠴᠡ ᠪᠢ ᠶᠠᠭᠤ ᠶᠢ ᠴᠤ ᠭᠡᠰᠡᠨ ᠡᠴᠢᠭᠡ ᠶᠢᠨ ᠨᠠᠳᠠ ᠳᠤ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠡᠯᠡᠳᠡᠭ ᠶᠤᠮ》 ᠭᠡᠯᠡ᠃