ᠶᠣᠬᠠᠨ ᠠᠷᠪᠠᠨ ᠲᠠᠪᠤ
ᠢᠰᠦ᠋ᠰ ᠪᠣᠯ ᠦᠵᠦᠮ ᠦᠨ ᠮᠣᠳᠣ᠂ ᠳᠠᠭᠠᠯᠳᠤᠭᠴᠢᠳ ᠨᠢ ᠮᠥᠴᠢᠷ
1 ᠪᠢ ᠪᠣᠯ ᠵᠢᠩᠬᠢᠨᠢ ᠦᠵᠦᠮ ᠦᠨ ᠮᠣᠳᠣ᠂ ᠮᠢᠨᠦ ᠡᠴᠢᠭᠡ ᠲᠠᠷᠢᠶᠠᠯᠠᠭᠴᠢ ᠪᠢᠯᠡ᠃ 2 ᠮᠢᠨᠦ ᠳᠣᠲᠣᠷᠠ ᠪᠠᠢᠭᠠ ᠮᠥᠴᠢᠷ ᠤᠳ ᠠᠴᠠ ᠵᠢᠮᠢᠰ ᠰᠠᠭᠤᠳᠠᠭ ᠦᠭᠡᠢ ᠪᠣᠯᠭᠠᠨ ᠢ ᠨᠢ ᠲᠡᠷᠡ ᠲᠠᠰᠤᠯᠤᠨ ᠠᠪᠴᠤ ᠵᠢᠮᠢᠰ ᠰᠠᠭᠤᠳᠠᠭ ᠢ ᠨᠢ ᠤᠯᠠᠮ ᠶᠡᠬᠡ ᠵᠢᠮᠢᠰ ᠲᠠᠢ ᠪᠣᠯᠭᠠᠬᠤ ᠪᠠᠷ ᠳᠣᠳᠣᠮᠳᠠᠵᠤ ᠴᠡᠪᠡᠷᠯᠡᠨᠡ᠃ 3 ᠮᠢᠨᠦ ᠬᠡᠯᠡᠭᠰᠡᠨ ᠦᠭᠡᠨ ᠡᠴᠡ ᠪᠣᠯᠵᠤ ᠲᠠ ᠨᠠᠷ ᠨᠢᠭᠡᠨᠲᠡ ᠴᠡᠪᠡᠷ ᠪᠣᠯᠣᠭᠰᠠᠨ᠃ 4 ᠮᠢᠨᠦ ᠳᠣᠲᠣᠷᠠ ᠣᠷᠣᠰᠢᠭᠲᠤᠨ᠂ ᠪᠢ ᠴᠤ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠣᠷᠣᠰᠢᠶᠠ᠃ ᠮᠥᠴᠢᠷ ᠨᠢ ᠦᠵᠦᠮ ᠦᠨ ᠮᠣᠳᠣᠨ ᠳᠠᠭᠠᠨ ᠣᠷᠣᠰᠢᠬᠤ ᠦᠭᠡᠢ ᠪᠣᠯ ᠥᠪᠡᠷ ᠢᠶᠡᠨ ᠵᠢᠮᠢᠰ ᠰᠠᠭᠤᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠶᠢᠨ ᠠᠳᠠᠯᠢ᠂ ᠬᠡᠷᠪᠡ ᠲᠠ ᠨᠠᠷ ᠮᠢᠨᠦ ᠳᠣᠲᠣᠷᠠ ᠣᠷᠣᠰᠢᠬᠤ ᠦᠭᠡᠢ ᠪᠣᠯ ᠮᠥᠨ ᠡᠢᠮᠦ ᠪᠣᠯᠣᠨᠠ᠃ 5 ᠪᠢ ᠪᠣᠯ ᠦᠵᠦᠮ ᠦᠨ ᠮᠣᠳᠣ᠂ ᠲᠠ ᠨᠠᠷ ᠪᠣᠯ ᠮᠥᠴᠢᠷ ᠤᠳ ᠮᠥᠨ᠃ ᠬᠥᠮᠦᠨ ᠮᠢᠨᠦ ᠳᠣᠲᠣᠷᠠ ᠣᠷᠣᠰᠢᠵᠤ᠂ ᠪᠢ ᠮᠥᠨ ᠲᠡᠭᠦᠨ ᠦ ᠳᠣᠲᠣᠷᠠ ᠣᠷᠣᠰᠢᠪᠠᠯ ᠲᠡᠷᠡ ᠬᠥᠮᠦᠨ ᠶᠡᠬᠡ ᠵᠢᠮᠢᠰ ᠲᠠᠢ ᠪᠣᠯᠣᠨᠠ᠃ ᠲᠠ ᠨᠠᠷ ᠨᠠᠳᠠ ᠠᠴᠠ ᠰᠠᠯᠪᠠᠯ ᠶᠠᠭᠤ ᠴᠤ ᠬᠢᠵᠦ ᠴᠢᠳᠠᠬᠤ ᠦᠭᠡᠢ᠃ 6 ᠬᠡᠷᠪᠡ ᠬᠥᠮᠦᠨ ᠮᠢᠨᠦ ᠳᠣᠲᠣᠷᠠ ᠣᠷᠣᠰᠢᠬᠤ ᠦᠭᠡᠢ ᠪᠣᠯ ᠭᠠᠳᠠᠭᠰᠢ ᠪᠠᠨ ᠬᠠᠶᠠᠭᠳᠠᠵᠤ ᠬᠤᠪᠠᠬᠠᠢᠷᠠᠭᠰᠠᠨ ᠮᠥᠴᠢᠷ ᠮᠡᠲᠦ ᠪᠣᠯᠣᠨᠠ᠃ ᠬᠥᠮᠦᠰ ᠲᠡᠷᠡ ᠮᠥᠴᠢᠷ ᠤᠳ ᠢ ᠲᠡᠭᠦᠵᠦ ᠭᠠᠯ ᠳᠤ ᠬᠠᠶᠠᠵᠤ ᠲᠦᠯᠡᠨᠡ᠃ 7 ᠬᠡᠷᠪᠡ ᠲᠠ ᠨᠠᠷ ᠮᠢᠨᠦ ᠳᠣᠲᠣᠷᠠ ᠣᠷᠣᠰᠢᠵᠤ᠂ ᠮᠢᠨᠦ ᠦᠭᠡᠰ ᠴᠤ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠣᠷᠣᠰᠢᠪᠠᠯ ᠲᠠ ᠨᠠᠷ ᠶᠠᠭᠤ ᠬᠦᠰᠡᠭᠰᠡᠨ ᠢᠶᠡᠨ ᠭᠤᠶᠤᠭᠲᠤᠨ᠃ ᠲᠡᠭᠡᠪᠡᠯ ᠲᠡᠷᠡ ᠨᠢ ᠲᠠ ᠨᠠᠷ ᠲᠤ ᠪᠡᠶᠡᠯᠡᠭᠳᠡᠬᠦ ᠪᠣᠯᠣᠨᠠ᠃ 8 ᠲᠠ ᠨᠠᠷ ᠵᠢᠮᠢᠰ ᠶᠡᠬᠡ ᠰᠠᠭᠤᠯᠭᠠᠵᠤ ᠮᠢᠨᠦ ᠱᠠᠪᠢ ᠨᠠᠷ ᠪᠣᠯᠪᠠᠯ ᠡᠭᠦᠨ ᠢᠶᠡᠷ ᠡᠴᠢᠭᠡ ᠮᠢᠨᠢ ᠠᠯᠳᠠᠷᠰᠢᠨᠠ᠃ 9 ᠡᠴᠢᠭᠡ ᠨᠠᠮᠠᠶᠢ ᠬᠠᠢᠷᠠᠯᠠᠳᠠᠭ ᠰᠢᠭ᠋ ᠪᠢ ᠪᠠᠰᠠ ᠲᠠ ᠨᠠᠷ ᠢ ᠬᠠᠢᠷᠠᠯᠠᠳᠠᠭ᠃ ᠮᠢᠨᠦ ᠬᠠᠢᠷᠠ ᠶᠢᠨ ᠳᠣᠲᠣᠷᠠ ᠣᠷᠣᠰᠢᠭᠲᠤᠨ᠃ 10 ᠪᠢ ᠡᠴᠢᠭᠡ ᠶᠢᠨ ᠢᠶᠠᠨ ᠵᠠᠷᠯᠢᠭ ᠢ ᠰᠠᠬᠢᠵᠤ᠂ ᠲᠡᠭᠦᠨ ᠦ ᠬᠠᠢᠷᠠ ᠶᠢᠨ ᠳᠣᠲᠣᠷᠠ ᠣᠷᠣᠰᠢᠳᠠᠭ ᠤᠨ ᠠᠳᠠᠯᠢ᠂ ᠲᠠ ᠨᠠᠷ ᠴᠤ ᠮᠢᠨᠦ ᠵᠠᠷᠯᠢᠭ ᠢ ᠰᠠᠬᠢᠪᠠᠯ ᠮᠢᠨᠦ ᠬᠠᠢᠷᠠ ᠳᠣᠲᠣᠷᠠ ᠣᠷᠣᠰᠢᠬᠤ ᠪᠣᠯᠣᠨᠠ᠃ 11 ᠮᠢᠨᠦ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠪᠠᠢᠯᠭᠠᠵᠤ᠂ ᠲᠠ ᠨᠠᠷ ᠤᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢ ᠲᠡᠭᠦᠯᠳᠡᠷ ᠪᠣᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠡᠳᠡᠭᠡᠷ ᠢ ᠲᠠ ᠨᠠᠷ ᠲᠤ ᠬᠡᠯᠡᠪᠡ᠃
12 ᠲᠠ ᠨᠠᠷ ᠢ ᠬᠠᠢᠷᠠᠯᠠᠳᠠᠭ ᠲᠠᠢ ᠮᠢᠨᠢ ᠠᠳᠠᠯᠢ ᠲᠠ ᠨᠠᠷ ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠭᠲᠤᠨ᠂ ᠡᠨᠡ ᠪᠣᠯ ᠮᠢᠨᠦ ᠵᠠᠷᠯᠢᠭ᠃ 13 ᠨᠥᠬᠥᠳ ᠦᠨ ᠢᠶᠠᠨ ᠲᠥᠯᠥᠭᠡ ᠠᠮᠢ ᠪᠠᠨ ᠵᠣᠷᠢᠭᠤᠯᠬᠤ ᠠᠴᠠ ᠠᠭᠤᠤ ᠬᠠᠢᠷᠠ ᠬᠡᠨ ᠳᠦ ᠴᠤ ᠪᠠᠢᠬᠤ ᠦᠭᠡᠢ᠃ 14 ᠬᠡᠷᠪᠡ ᠲᠠ ᠨᠠᠷ ᠮᠢᠨᠦ ᠵᠠᠷᠯᠢᠭ ᠢᠶᠠᠷ ᠬᠢᠳᠡᠭ ᠪᠣᠯ ᠮᠢᠨᠦ ᠨᠥᠬᠥᠳ ᠮᠥᠨ᠃ 15 ᠡᠭᠦᠨ ᠡᠴᠡ ᠬᠣᠢᠰᠢ ᠪᠢ ᠲᠠ ᠨᠠᠷ ᠢ ᠵᠠᠷᠤᠴᠠ ᠭᠡᠵᠦ ᠳᠠᠭᠤᠳᠠᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠡᠵᠡᠨ ᠦ ᠪᠠᠨ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠢ ᠵᠠᠷᠤᠴᠠ ᠮᠡᠳᠡᠳᠡᠭ ᠦᠭᠡᠢ ᠶᠤᠮ᠃ ᠪᠢ ᠲᠠ ᠨᠠᠷ ᠢ ᠨᠥᠬᠥᠳ ᠭᠡᠵᠦ ᠳᠠᠭᠤᠳᠠᠯᠠ᠃ ᠶᠠᠭᠤ ᠭᠡᠪᠡᠯ᠂ ᠪᠢ ᠡᠴᠢᠭᠡ ᠡᠴᠡ ᠪᠡᠨ ᠰᠣᠨᠣᠰᠣᠭᠰᠠᠨ ᠪᠦᠬᠦᠨ ᠢᠶᠡᠨ ᠲᠠ ᠨᠠᠷ ᠲᠤ ᠮᠡᠳᠡᠭᠦᠯᠦᠭᠰᠡᠨ ᠪᠢᠯᠡ᠃ 16 ᠲᠠ ᠨᠠᠷ ᠨᠠᠮᠠᠶᠢ ᠰᠣᠩ᠋ᠭᠣᠭᠠ ᠦᠭᠡᠢ᠂ ᠬᠠᠷᠢᠨ ᠪᠢ ᠲᠠ ᠨᠠᠷ ᠢ ᠰᠣᠩ᠋ᠭᠣᠵᠤ ᠲᠣᠮᠢᠯᠠᠭᠰᠠᠨ᠃ ᠡᠨᠡ ᠪᠣᠯ ᠲᠠ ᠨᠠᠷ ᠶᠠᠪᠤᠵᠤ ᠵᠢᠮᠢᠰ ᠰᠠᠭᠤᠯᠭᠠᠨ᠂ ᠦᠷᠭᠦᠯᠵᠢ ᠵᠢᠮᠢᠰ ᠲᠠᠢ ᠪᠠᠢᠬᠤ ᠪᠠ ᠮᠢᠨᠦ ᠨᠡᠷᠡ ᠪᠡᠷ ᠡᠴᠢᠭᠡ ᠡᠴᠡ ᠶᠠᠭᠤ ᠭᠤᠶᠤᠭᠰᠠᠨ ᠴᠤ ᠣᠯᠬᠤ ᠶᠢᠨ ᠲᠤᠯᠠᠳᠠ ᠶᠤᠮ᠃ 17 ᠨᠢᠭᠡ ᠨᠢᠭᠡ ᠪᠡᠨ ᠬᠠᠢᠷᠠᠯᠠᠭᠲᠤᠨ᠃ ᠡᠨᠡ ᠪᠣᠯ ᠮᠢᠨᠦ ᠵᠠᠷᠯᠢᠭ᠃
ᠱᠠᠪᠢ ᠨᠠᠷ ᠤᠨ ᠶᠢᠷᠲᠢᠨᠴᠦ ᠯᠦᠭᠡ ᠶᠢᠨ ᠬᠠᠷᠢᠯᠴᠠᠭᠠ
18 ᠶᠢᠷᠲᠢᠨᠴᠦ ᠲᠠ ᠨᠠᠷ ᠢ ᠵᠠᠨᠤᠪᠠᠯ᠂ ᠲᠠ ᠨᠠᠷ ᠠᠴᠠ ᠡᠮᠦᠨᠡ ᠨᠠᠮᠠᠶᠢ ᠵᠠᠨᠤᠭᠰᠠᠨ ᠢ ᠮᠡᠳᠡᠭᠲᠦᠨ᠃ 19 ᠲᠠ ᠨᠠᠷ ᠶᠢᠷᠲᠢᠨᠴᠦ ᠶᠢᠨ ᠬᠢ ᠪᠠᠢᠭᠰᠠᠨ ᠪᠣᠯ᠂ ᠶᠢᠷᠲᠢᠨᠴᠦ ᠥᠪᠡᠷ ᠦᠨ ᠬᠢ ᠪᠠᠨ ᠭᠡᠵᠦ ᠬᠠᠢᠷᠠᠯᠠᠬᠤ ᠪᠠᠢᠭᠰᠠᠨ᠃ ᠲᠠ ᠨᠠᠷ ᠶᠢᠷᠲᠢᠨᠴᠦ ᠶᠢᠨ ᠬᠢ ᠪᠢᠰᠢ᠂ ᠬᠠᠷᠢᠨ ᠪᠢ ᠶᠢᠷᠲᠢᠨᠴᠦ ᠡᠴᠡ ᠲᠠ ᠨᠠᠷ ᠢ ᠰᠣᠩ᠋ᠭᠣᠭᠰᠠᠨ ᠲᠤᠯᠠ ᠶᠢᠷᠲᠢᠨᠴᠦ ᠲᠠ ᠨᠠᠷ ᠢ ᠵᠠᠨᠤᠳᠠᠭ᠃ 20 〈ᠪᠣᠭᠣᠯ ᠨᠢ ᠡᠵᠡᠨ ᠡᠴᠡ ᠪᠡᠨ ᠠᠭᠤᠤ ᠪᠠᠢᠳᠠᠭ ᠦᠭᠡᠢ〉 ᠭᠡᠵᠦ ᠲᠠ ᠨᠠᠷ ᠲᠤ ᠬᠡᠯᠡᠭᠰᠡᠨ ᠢ ᠮᠢᠨᠢ ᠰᠠᠨᠠᠭᠲᠤᠨ᠃ ᠲᠡᠳᠡ ᠨᠠᠮᠠᠶᠢ ᠬᠢᠬᠠᠭᠰᠠᠨ ᠪᠣᠯ᠂ ᠲᠠ ᠨᠠᠷ ᠢ ᠴᠤ ᠬᠢᠬᠠᠬᠤ ᠪᠥᠭᠡᠳ ᠲᠡᠳᠡ ᠮᠢᠨᠦ ᠦᠭᠡ ᠶᠢ ᠰᠠᠬᠢᠭᠰᠠᠨ ᠪᠣᠯ᠂ ᠲᠠ ᠨᠠᠷ ᠤᠨ ᠦᠭᠡ ᠶᠢ ᠴᠤ ᠰᠠᠬᠢᠬᠤ ᠪᠣᠯᠣᠨᠠ᠃ 21 ᠭᠡᠪᠡᠴᠦ ᠲᠡᠳᠡ ᠮᠢᠨᠦ ᠨᠡᠷᠡ ᠡᠴᠡ ᠪᠣᠯᠵᠤ ᠡᠨᠡ ᠪᠦᠬᠦᠨ ᠢᠶᠡᠷ ᠲᠠ ᠨᠠᠷ ᠲᠤ ᠬᠠᠨᠳᠤᠬᠤ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠲᠡᠳᠡ ᠨᠠᠮᠠᠶᠢ ᠢᠯᠡᠭᠡᠭᠴᠢ ᠶᠢ ᠲᠠᠨᠢᠳᠠᠭ ᠦᠭᠡᠢ᠃ 22 ᠪᠢ ᠢᠷᠡᠵᠦ᠂ ᠲᠡᠳᠡᠨ ᠳᠦ ᠬᠡᠯᠡᠭᠡ ᠦᠭᠡᠢ ᠪᠣᠯ ᠲᠡᠳᠡ ᠨᠢᠭᠦᠯ ᠦᠭᠡᠢ ᠪᠠᠢᠬᠤ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠣᠳᠣ ᠲᠡᠳᠡ ᠨᠢᠭᠦᠯ ᠳᠡᠭᠡᠨ ᠰᠢᠯᠲᠠᠭ ᠣᠯᠬᠤ ᠦᠭᠡᠢ ᠪᠣᠯᠣᠯᠠ᠃ 23 ᠨᠠᠮᠠᠶᠢ ᠵᠠᠨᠤᠳᠠᠭ ᠬᠥᠮᠦᠨ ᠮᠢᠨᠦ ᠡᠴᠢᠭᠡ ᠶᠢ ᠴᠤ ᠵᠠᠨᠤᠳᠠᠭ᠃ 24 ᠪᠤᠰᠤᠳ ᠤᠨ ᠬᠢᠭᠡ ᠦᠭᠡᠢ ᠠᠵᠢᠯ ᠢ ᠪᠢ ᠲᠡᠳᠡᠨ ᠦ ᠳᠤᠮᠳᠠ ᠬᠢᠭᠡ ᠦᠭᠡᠢ ᠪᠣᠯ ᠲᠡᠳᠡ ᠨᠢᠭᠦᠯ ᠦᠭᠡᠢ ᠪᠠᠢᠬᠤ ᠪᠠᠢᠭᠰᠠᠨ᠃ ᠬᠠᠷᠢᠨ ᠣᠳᠣ ᠲᠡᠳᠡ ᠨᠠᠮᠠᠶᠢ ᠪᠣᠯᠣᠨ ᠡᠴᠢᠭᠡ ᠶᠢ ᠮᠢᠨᠢ ᠬᠠᠷᠠᠭᠰᠠᠨ ᠪᠣᠯᠪᠠᠴᠤ ᠪᠢᠳᠡ ᠬᠣᠶᠠᠭᠤᠯᠠ ᠶᠢ ᠵᠠᠨᠤᠭᠰᠠᠨ ᠪᠠᠢᠨᠠ᠃ 25 〈ᠲᠡᠳᠡ ᠰᠢᠯᠲᠠᠭᠠᠨ ᠦᠭᠡᠢ ᠪᠠᠷ ᠨᠠᠮᠠᠶᠢ ᠦᠵᠡᠨ ᠶᠠᠳᠠᠭᠰᠠᠨ〉 ᠭᠡᠵᠦ ᠲᠡᠳᠡᠨ ᠦ ᠬᠠᠤᠯᠢ ᠳᠤ ᠪᠢᠴᠢᠭᠳᠡᠭᠰᠡᠨ ᠦᠭᠡ ᠲᠡᠢᠨ ᠬᠦ ᠪᠡᠶᠡᠯᠡᠭᠳᠡᠭᠰᠡᠨ ᠶᠤᠮ᠃
26 ᠪᠢ ᠡᠴᠢᠭᠡ ᠡᠴᠡ ᠪᠡᠨ ᠲᠠ ᠨᠠᠷ ᠤᠷᠤᠭᠤ ᠲᠤᠰᠠᠯᠠᠭᠴᠢ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠡᠴᠢᠭᠡ ᠡᠴᠡ ᠭᠠᠷᠬᠤ ᠦᠨᠡᠨ ᠦ ᠰᠦᠨᠡᠰᠦ ᠶᠢ ᠢᠯᠡᠭᠡᠨᠡ᠃ ᠲᠡᠷᠡ ᠢᠷᠡᠭᠡᠳ ᠮᠢᠨᠦ ᠲᠤᠬᠠᠢ ᠭᠡᠷᠡᠴᠢᠯᠡᠨᠡ᠃ 27 ᠲᠠ ᠨᠠᠷ ᠡᠬᠢᠨ ᠡᠴᠡ ᠪᠡᠨ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠨ ᠲᠤᠯᠠ ᠲᠠ ᠨᠠᠷ ᠴᠤ ᠭᠡᠷᠡᠴᠢᠯᠡᠬᠦ ᠶᠣᠰᠣᠲᠠᠢ᠃