ᠶᠣᠬᠠᠨ ᠬᠣᠷᠢᠨ ᠨᠢᠭᠡ
ᠳᠣᠯᠣᠭᠠᠨ ᠱᠠᠪᠢ ᠳᠠᠭᠠᠨ ᠦᠵᠡᠭᠳᠡᠭᠰᠡᠨ ᠨᠢ
1 ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠢᠰᠦ᠋ᠰ ᠲᠢᠪᠧᠷ ᠲᠠᠩᠭᠢᠰ 25 ᠤᠨ ᠬᠥᠪᠡᠭᠡᠨ ᠳᠦ ᠥᠪᠡᠷ ᠢ ᠪᠠᠨ ᠱᠠᠪᠢ ᠨᠠᠷ ᠲᠠᠭᠠᠨ ᠳᠠᠬᠢᠨ ᠬᠠᠷᠠᠭᠤᠯᠵᠠᠢ᠃ ᠲᠡᠷᠡ ᠥᠪᠡᠷ ᠢ ᠪᠠᠨ ᠡᠢᠨ ᠬᠦ ᠬᠠᠷᠠᠭᠤᠯᠪᠠ᠄ 2 ᠰᠢᠮᠣᠨ ᠫᠧᠲ᠋ᠧᠷ᠂ ᠢᠬᠡᠷᠡ ᠭᠡᠭᠳᠡᠳᠡᠭ ᠲᠣᠮᠠ᠂ ᠭᠠᠯᠢᠯᠠᠶᠠ ᠶᠢᠨ ᠺᠠᠨᠠ ᠳᠠᠬᠢ ᠨᠠᠲ᠋ᠠᠨᠠᠶᠧᠯ᠂ ᠽᠧᠪᠧᠳᠠᠢ ᠶᠢᠨ ᠬᠥᠪᠡᠭᠦᠳ᠂ ᠪᠠᠰᠠ ᠥᠭᠡᠷᠡ ᠬᠣᠶᠠᠷ ᠱᠠᠪᠢ ᠨᠢ ᠬᠠᠮᠲᠤ ᠪᠠᠢᠯᠴᠠᠵᠤ ᠪᠠᠢᠬᠤ ᠳᠤ᠂ 3 ᠰᠢᠮᠣᠨ ᠫᠧᠲ᠋ᠧᠷ ᠲᠡᠳᠡᠨ ᠳᠦ᠄ 《ᠪᠢ ᠵᠢᠭᠠᠰᠤ ᠪᠠᠷᠢᠬᠤ ᠪᠠᠷ ᠶᠠᠪᠤᠯᠠ》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠪᠢᠳᠡ ᠴᠤ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠶᠠ》 ᠭᠡᠳ ᠭᠠᠷᠴᠤ ᠵᠠᠪᠢᠨ ᠳᠤ ᠰᠠᠭᠤᠪᠠ᠃ ᠬᠠᠷᠢᠨ ᠲᠡᠷᠡ ᠰᠥᠨᠢ ᠲᠡᠳᠡ ᠶᠠᠭᠤ ᠴᠤ ᠣᠯᠵᠤ ᠪᠠᠷᠢᠭᠰᠠᠨ ᠦᠭᠡᠢ᠃
4 ᠦᠷ ᠴᠠᠢᠬᠤ ᠦᠶᠡ ᠳᠦ᠂ ᠢᠰᠦ᠋ᠰ ᠬᠥᠪᠡᠭᠡᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠢ ᠢᠰᠦ᠋ᠰ ᠭᠡᠵᠦ ᠲᠠᠨᠢᠭᠰᠠᠨ ᠦᠭᠡᠢ᠃ 5 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠬᠡᠦᠬᠡᠳ ᠤᠳ ᠡ᠂ ᠲᠠ ᠨᠠᠷ ᠲᠤ ᠵᠢᠭᠠᠰᠤ ᠪᠤᠢ ᠤᠤ︖》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠠᠯᠠᠭᠠ》 ᠭᠡᠯᠡ᠃ 6 ᠢᠰᠦ᠋ᠰ᠄ 《ᠲᠠ ᠨᠠᠷ ᠵᠠᠪᠢ ᠶᠢᠨ ᠢᠶᠠᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠲᠣᠣᠷ ᠢᠶᠠᠨ ᠬᠠᠶᠠ᠂ ᠲᠡᠭᠡᠪᠡᠯ ᠣᠯᠣᠨᠠ》 ᠭᠡᠬᠦ ᠳᠦ᠂ ᠲᠡᠳᠡ ᠲᠣᠣᠷ ᠢᠶᠠᠨ ᠲᠡᠰᠢ ᠨᠢ ᠬᠠᠶᠠᠭᠰᠠᠨ ᠳᠤ᠂ ᠵᠢᠭᠠᠰᠤ ᠶᠡᠬᠡ ᠣᠷᠣᠭᠰᠠᠨ ᠲᠤᠯᠠ ᠲᠣᠣᠷ ᠢᠶᠠᠨ ᠴᠤ ᠲᠠᠲᠠᠵᠤ ᠶᠠᠳᠠᠪᠠ᠃ 7 ᠲᠡᠭᠡᠲᠡᠯᠡ ᠢᠰᠦ᠋ᠰ ᠤᠨ ᠬᠠᠢᠷᠠᠲᠠᠢ ᠲᠡᠷᠡ ᠱᠠᠪᠢ ᠫᠧᠲ᠋ᠧᠷ ᠲᠤ᠄ 《ᠡᠵᠡᠨ ᠪᠠᠢᠨᠠ︕》 ᠭᠡᠯᠡ᠃ 《ᠡᠵᠡᠨ ᠪᠠᠢᠨᠠ︕》 ᠭᠡᠬᠦ ᠶᠢ ᠰᠢᠮᠣᠨ ᠫᠧᠲ᠋ᠧᠷ ᠰᠣᠨᠣᠰᠣᠮᠠᠭᠴᠠ ᠭᠠᠳᠠᠷ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ᠂ (ᠲᠤᠬᠠᠢ ᠶᠢᠨ ᠦᠶᠡ ᠳᠦ ᠲᠡᠷᠡ ᠨᠢᠴᠦᠭᠦᠨ ᠪᠠᠢᠪᠠ᠃) ᠲᠠᠩᠭᠢᠰ ᠲᠤ ᠦᠰᠦᠷᠦᠨ ᠣᠷᠣᠪᠠ᠃ 8 ᠪᠤᠰᠤᠳ ᠱᠠᠪᠢ ᠨᠠᠷ ᠨᠢ ᠵᠠᠪᠢᠨ ᠳᠠᠭᠠᠨ ᠰᠠᠭᠤᠭᠰᠠᠭᠠᠷ ᠵᠢᠭᠠᠰᠤ ᠲᠠᠢ ᠲᠣᠣᠷ ᠢᠶᠠᠨ ᠴᠢᠷᠦᠨ ᠳᠠᠭᠠᠵᠤ ᠢᠷᠡᠯᠡ᠃ ᠲᠡᠳᠡ ᠬᠥᠪᠡᠭᠡᠨ ᠡᠴᠡ ᠬᠣᠯᠠ ᠦᠭᠡᠢ᠂ ᠶᠡᠷᠡᠭᠡᠳ ᠮᠧᠲ᠋ᠷ ᠵᠠᠢᠲᠠᠢ ᠪᠠᠢᠵᠠᠢ᠃
9 ᠲᠡᠳᠡ ᠬᠥᠪᠡᠭᠡᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠮᠣᠳᠣᠨ ᠨᠡᠭᠦᠷᠡᠰᠦᠨ ᠦ ᠭᠠᠯ ᠳᠡᠭᠡᠷᠡ ᠲᠠᠯᠪᠢᠭᠠᠰᠤᠲᠠᠢ ᠵᠢᠭᠠᠰᠤ ᠪᠠ ᠪᠣᠣᠪᠣ ᠶᠢ ᠬᠠᠷᠠᠪᠠ᠃ 10 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠰᠠᠶ᠋ᠢ ᠶᠢᠨ ᠪᠠᠷᠢᠭᠰᠠᠨ ᠵᠢᠭᠠᠰᠤ ᠠᠴᠠ ᠪᠠᠨ ᠠᠪᠤᠭᠠᠳ ᠢᠷᠡ》 ᠭᠡᠰᠡᠨ ᠳᠦ᠂ 11 ᠰᠢᠮᠣᠨ ᠫᠧᠲ᠋ᠧᠷ ᠵᠠᠪᠢᠨ ᠳᠠᠭᠠᠨ ᠭᠠᠷᠴᠤ᠂ ᠲᠣᠣᠷ ᠢᠶᠠᠨ ᠬᠥᠪᠡᠭᠡᠨ ᠳᠡᠭᠡᠷᠡ ᠲᠠᠲᠠᠵᠤ ᠭᠠᠷᠭᠠᠪᠠ᠃ ᠲᠡᠷᠡ ᠲᠣᠣᠷ ᠲᠤᠨᠢ ᠲᠣᠮᠣ ᠵᠢᠭᠠᠰᠤ ᠪᠠᠷ ᠳᠦᠭᠦᠷᠡᠩ ᠪᠠᠢᠪᠠ᠃ ᠪᠦᠭᠦᠳᠡ ᠵᠠᠭᠤ ᠲᠠᠪᠢᠨ ᠭᠤᠷᠪᠠᠨ ᠵᠢᠭᠠᠰᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠢᠮᠦ ᠠᠷᠪᠢᠨ ᠵᠢᠭᠠᠰᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠣᠣᠷ ᠨᠢ ᠤᠷᠠᠭᠳᠠᠭᠰᠠᠨ ᠦᠭᠡᠢ ᠪᠠᠢᠯᠠ᠃ 12 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠨᠠᠰᠢ ᠢᠷᠡᠵᠦ ᠥᠷᠯᠥᠭᠡ ᠶᠢᠨ ᠬᠣᠭᠣᠯᠠ ᠪᠠᠨ ᠢᠳᠡᠵᠡᠭᠡ》 ᠭᠡᠬᠦ ᠳᠦ᠂ ᠲᠡᠭᠦᠨ ᠢ ᠡᠵᠡᠨ ᠮᠥᠨ ᠭᠡᠵᠦ ᠱᠠᠪᠢ ᠨᠠᠷ ᠨᠢ ᠮᠡᠳᠡᠭᠰᠡᠨ ᠤᠴᠢᠷ ᠠᠴᠠ ᠬᠡᠨ ᠨᠢ ᠴᠤ᠄ 《ᠲᠠ ᠬᠡᠨ ᠪᠤᠢ︖》 ᠭᠡᠵᠦ ᠵᠢᠷᠦᠬᠡᠯᠡᠵᠦ ᠠᠰᠠᠭᠤᠭᠰᠠᠨ ᠦᠭᠡᠢ᠃ 13 ᠢᠰᠦ᠋ᠰ ᠳᠥᠭᠥᠵᠦ ᠪᠣᠣᠪᠣ ᠠᠴᠠ ᠠᠪᠴᠤ ᠲᠡᠳᠡᠨ ᠳᠦ ᠥᠭᠪᠡ᠃ ᠵᠢᠭᠠᠰᠤᠨ ᠠᠴᠠ ᠪᠠᠰᠠ ᠥᠭᠪᠡ᠃ 14 ᠢᠰᠦ᠋ᠰ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠱᠠᠪᠢ ᠨᠠᠷ ᠲᠠᠭᠠᠨ ᠥᠪᠡᠷ ᠢ ᠪᠠᠨ ᠡᠢᠨ ᠬᠦ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠪᠢᠯᠡ᠃
ᠢᠰᠦ᠋ᠰ ᠫᠧᠲ᠋ᠧᠷ ᠬᠣᠶᠠᠷ
15 ᠲᠡᠳᠡ ᠬᠣᠭᠣᠯᠠ ᠢᠳᠡᠵᠦ ᠳᠠᠭᠤᠰᠬᠤ ᠳᠤ᠂ ᠢᠰᠦ᠋ᠰ ᠰᠢᠮᠣᠨ ᠫᠧᠲ᠋ᠧᠷ ᠲᠤ᠄ 《ᠶᠣᠬᠠᠨ ᠤ ᠬᠦᠦ ᠰᠢᠮᠣᠨ ᠡ᠂ ᠴᠢ ᠨᠠᠮᠠᠶᠢ ᠡᠨᠡ ᠬᠥᠮᠦᠰ ᠡᠴᠡ ᠢᠯᠡᠭᠦᠦ ᠬᠠᠢᠷᠠᠯᠠᠳᠠᠭ ᠤᠤ︖》 ᠭᠡᠰᠡᠨ ᠳᠦ᠂ ᠫᠧᠲ᠋ᠧᠷ᠄ 《ᠲᠡᠢᠮᠦ ᠡ᠂ ᠡᠵᠡᠨ᠂ ᠲᠠᠨ ᠳᠤ ᠬᠠᠢᠷᠠᠲᠠᠢ ᠶᠢ ᠮᠢᠨᠢ ᠲᠠ ᠮᠡᠳᠡᠨᠡ》 ᠭᠡᠵᠦ ᠬᠡᠯᠡᠪᠡ᠃ ᠢᠰᠦ᠋ᠰ ᠲᠡᠭᠦᠨ ᠳᠦ᠄ 《ᠮᠢᠨᠦ ᠬᠤᠷᠠᠭᠠ ᠨᠤᠭᠤᠳ ᠢ ᠲᠡᠵᠢᠭᠡ》 ᠭᠡᠯᠡ᠃ 16 ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠲᠡᠭᠦᠨ ᠳᠦ᠄ 《ᠶᠣᠬᠠᠨ ᠤ ᠬᠦᠦ ᠰᠢᠮᠣᠨ ᠡ᠂ ᠴᠢ ᠨᠠᠮᠠᠶᠢ ᠬᠠᠢᠷᠠᠯᠠᠳᠠᠭ ᠤᠤ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠲᠡᠢᠮᠦ ᠡ᠂ ᠡᠵᠡᠨ᠂ ᠲᠠᠨ ᠳᠤ ᠬᠠᠢᠷᠠᠲᠠᠢ ᠶᠢ ᠮᠢᠨᠢ ᠲᠠ ᠮᠡᠳᠡᠨᠡ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠢᠰᠦ᠋ᠰ᠄ 《ᠮᠢᠨᠦ ᠬᠣᠨᠢᠳ ᠢ ᠬᠠᠷᠢᠭᠤᠯ》 ᠭᠡᠯᠡ᠃ 17 ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠲᠡᠭᠦᠨ ᠳᠦ᠄ 《ᠶᠣᠬᠠᠨ ᠤ ᠬᠦᠦ ᠰᠢᠮᠣᠨ ᠡ᠂ ᠴᠢ ᠨᠠᠮᠠᠶᠢ ᠬᠠᠢᠷᠠᠯᠠᠳᠠᠭ ᠤᠤ︖》 ᠭᠡᠪᠡ᠃ 《ᠨᠠᠮᠠᠶᠢ ᠬᠠᠢᠷᠠᠯᠠᠳᠠᠭ ᠤᠤ︖》 ᠭᠡᠵᠦ ᠭᠤᠷᠪᠠᠨᠲᠠ ᠠᠰᠠᠭᠤᠭᠰᠠᠨ ᠤᠴᠢᠷ ᠲᠤ ᠫᠧᠲ᠋ᠧᠷ ᠭᠤᠨᠢᠭᠯᠠᠵᠤ᠄ 《ᠡᠵᠡᠨ ᠡ᠂ ᠲᠠ ᠪᠦᠬᠦᠨ ᠢ ᠮᠡᠳᠡᠳᠡᠭ᠂ ᠲᠠᠨ ᠳᠤ ᠬᠠᠢᠷᠠᠲᠠᠢ ᠶᠢ ᠮᠢᠨᠢ ᠲᠠ ᠮᠡᠳᠡᠨᠡ》 ᠭᠡᠬᠦ ᠳᠦ᠂ ᠢᠰᠦ᠋ᠰ᠄ 《ᠮᠢᠨᠦ ᠬᠣᠨᠢᠳ ᠢ ᠲᠡᠵᠢᠭᠡ᠃ 18 ᠪᠢ ᠴᠢᠮᠠ ᠳᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠴᠢ ᠵᠠᠯᠠᠭᠤ ᠪᠠᠢᠬᠤ ᠳᠠᠭᠠᠨ ᠪᠦᠰᠡ ᠪᠡᠨ ᠥᠪᠡᠷ ᠢᠶᠡᠨ ᠪᠦᠰᠡᠯᠡᠭᠡᠳ ᠳᠤᠷᠠᠲᠠᠢ ᠭᠠᠵᠠᠷ ᠲᠠᠭᠠᠨ ᠶᠠᠪᠤᠵᠤ ᠪᠠᠢᠪᠠ᠃ ᠬᠠᠷᠢᠨ ᠥᠲᠡᠯᠬᠦ ᠳᠡᠭᠡᠨ ᠴᠢ ᠭᠠᠷ ᠢᠶᠠᠨ ᠡᠷᠭᠦᠵᠦ᠂ ᠥᠭᠡᠷᠡ ᠬᠥᠮᠦᠨ ᠴᠢᠮᠠ ᠳᠤ ᠪᠦᠰᠡ ᠪᠦᠰᠡᠯᠡᠭᠦᠯᠵᠦ᠂ ᠳᠤᠷᠠ ᠦᠭᠡᠢ ᠭᠠᠵᠠᠷ ᠲᠤ ᠴᠢᠨᠢ ᠠᠪᠠᠴᠢᠬᠤ ᠪᠣᠯᠣᠨᠠ》 ᠭᠡᠵᠡᠢ᠃ 19 ᠫᠧᠲ᠋ᠧᠷ ᠤᠨ ᠶᠠᠮᠠᠷ ᠦᠬᠦᠯ ᠢᠶᠡᠷ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠬᠤ ᠶᠢ ᠵᠢᠭᠠᠬᠤ ᠶᠢᠨ ᠲᠤᠯᠠᠳᠠ ᠢᠰᠦ᠋ᠰ ᠡᠭᠦᠨ ᠢ ᠬᠡᠯᠡᠭᠰᠡᠨ ᠶᠤᠮ᠃ ᠢᠰᠦ᠋ᠰ ᠢᠩᠭᠢᠵᠦ ᠬᠡᠯᠡᠭᠡᠳ ᠫᠧᠲ᠋ᠧᠷ ᠲᠤ᠄ 《ᠨᠠᠮᠠᠶᠢ ᠳᠠᠭᠠ》 ᠭᠡᠯᠡ᠃
ᠢᠰᠦ᠋ᠰ ᠪᠣᠯᠣᠨ ᠲᠡᠭᠦᠨ ᠦ ᠬᠠᠢᠷᠠᠲᠠᠢ ᠱᠠᠪᠢ
20 ᠫᠧᠲ᠋ᠧᠷ ᠠᠷᠤᠨᠰᠢ ᠡᠷᠭᠢᠭᠡᠳ᠂ ᠠᠷᠤ ᠠᠴᠠ ᠨᠢ ᠢᠰᠦ᠋ᠰ ᠤᠨ ᠬᠠᠢᠷᠠᠲᠠᠢ ᠲᠡᠷᠡ ᠱᠠᠪᠢ ᠳᠠᠭᠠᠵᠤ ᠶᠠᠪᠤᠭᠠ ᠶᠢ ᠬᠠᠷᠠᠪᠠ᠃ ᠲᠡᠷᠡ ᠪᠣᠯ ᠲᠡᠷᠡ ᠣᠷᠣᠢ ᠶᠢᠨ ᠵᠣᠭᠣᠭ ᠳᠡᠭᠡᠷᠡ ᠢᠰᠦ᠋ᠰ ᠤᠨ ᠡᠪᠦᠷ ᠲᠦ ᠨᠠᠯᠠᠨ ᠰᠠᠭᠤᠵᠤ᠄ 《ᠡᠵᠡᠨ ᠡ᠂ ᠲᠠᠨ ᠢ ᠪᠠᠷᠢᠭᠤᠯᠤᠭᠴᠢ ᠨᠢ ᠬᠡᠨ ᠶᠤᠮ ᠪᠤᠢ︖》 ᠭᠡᠵᠦ ᠠᠰᠠᠭᠤᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠪᠢᠯᠡ᠃ 21 ᠫᠧᠲ᠋ᠧᠷ ᠲᠡᠭᠦᠨ ᠢ ᠬᠠᠷᠠᠭᠠᠳ ᠢᠰᠦ᠋ᠰ ᠲᠤ᠄ 《ᠡᠵᠡᠨ ᠡ᠂ ᠡᠨᠡ ᠬᠥᠮᠦᠨ ᠶᠠᠭᠠᠬᠢᠬᠤ ᠪᠣᠯ︖》 ᠭᠡᠰᠡᠨ ᠳᠦ᠂ 22 ᠢᠰᠦ᠋ᠰ᠄ 《ᠪᠢ ᠲᠡᠭᠦᠨ ᠢ ᠨᠠᠮᠠᠶᠢ ᠢᠷᠡᠲᠡᠯᠡ ᠪᠠᠢᠯᠭᠠᠶᠠ ᠭᠡᠰᠡᠨ ᠴᠤ ᠴᠢᠮᠠ ᠳᠤ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠨᠠ︖ ᠴᠢ ᠯᠠ ᠨᠠᠮᠠᠶᠢ ᠳᠠᠭᠠ》 ᠭᠡᠪᠡ᠃ 23 ᠡᠭᠦᠨ ᠡᠴᠡ ᠪᠣᠯᠵᠤ ᠲᠡᠷᠡ ᠱᠠᠪᠢ ᠨᠢ ᠦᠬᠦᠬᠦ ᠦᠭᠡᠢ ᠭᠡᠰᠡᠨ ᠶᠠᠷᠢᠶᠠ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠳᠤᠮᠳᠠ ᠲᠠᠷᠬᠠᠪᠠ᠃ ᠭᠡᠪᠡᠴᠦ ᠢᠰᠦ᠋ᠰ ᠲᠡᠷᠡ ᠬᠥᠮᠦᠨ ᠢ ᠦᠬᠦᠬᠦ ᠦᠭᠡᠢ ᠭᠡᠵᠦ ᠬᠡᠯᠡᠭᠡ ᠦᠭᠡᠢ᠂ ᠵᠥᠪᠬᠡᠨ 《ᠪᠢ ᠲᠡᠭᠦᠨ ᠢ ᠨᠠᠮᠠᠶᠢ ᠢᠷᠡᠲᠡᠯᠡ ᠪᠠᠢᠯᠭᠠᠶᠠ ᠭᠡᠰᠡᠨ ᠴᠤ ᠴᠢᠮᠠ ᠳᠤ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠨᠠ︖》 ᠭᠡᠰᠡᠨ ᠪᠢᠯᠡ᠃
24 ᠡᠳᠡᠭᠡᠷ ᠢ ᠭᠡᠷᠡᠴᠢᠯᠡᠵᠦ᠂ ᠡᠳᠡᠭᠡᠷ ᠢ ᠪᠢᠴᠢᠭᠰᠡᠨ ᠬᠥᠮᠦᠨ ᠪᠣᠯ ᠲᠡᠷᠡ ᠱᠠᠪᠢ ᠨᠢ ᠮᠥᠨ᠃ ᠲᠡᠭᠦᠨ ᠦ ᠭᠡᠷᠡᠴᠢᠯᠡᠯ ᠦᠨᠡᠨ ᠭᠡᠳᠡᠭ ᠢ ᠪᠢᠳᠡ ᠮᠡᠳᠡᠨᠡ᠃ 25 ᠢᠰᠦ᠋ᠰ ᠤᠨ ᠬᠢᠭᠰᠡᠨ ᠵᠦᠢᠯ ᠥᠭᠡᠷᠡ ᠣᠯᠠᠨ ᠪᠤᠢ᠃ ᠬᠡᠷᠪᠡ ᠲᠡᠳᠡᠭᠡᠷ ᠢ ᠨᠢ ᠨᠢᠭᠡᠪᠦᠷᠢᠴᠢᠯᠡᠨ ᠪᠢᠴᠢᠪᠡᠯ ᠪᠢᠴᠢᠭᠳᠡᠭᠰᠡᠨ ᠨᠣᠮ ᠤᠳ ᠢ ᠨᠢ ᠶᠢᠷᠲᠢᠨᠴᠦ ᠴᠤ ᠪᠠᠭᠲᠠᠭᠠᠬᠤ ᠦᠭᠡᠢ ᠪᠠᠢᠬᠠ ᠭᠡᠵᠦ ᠪᠢ ᠪᠣᠳᠣᠳᠠᠭ᠃