ᠶᠣᠬᠠᠨ ᠠᠷᠪᠠ ᠶᠢᠰᠦ
ᠥᠷᠭᠡᠰᠦᠲᠦ ᠮᠥᠴᠢᠷ ᠢᠶᠠᠷ ᠰᠦᠯᠵᠢᠭᠰᠡᠨ ᠲᠢᠲᠢᠮ
1 ᠫᠢᠯᠠᠲ ᠢᠰᠦ᠋ᠰ ᠢ ᠠᠪᠴᠢᠷᠠᠵᠤ ᠲᠠᠰᠢᠭᠤᠷᠳᠠᠭᠤᠯᠪᠠ᠃ 2 ᠴᠡᠷᠢᠭ ᠤᠳ ᠥᠷᠭᠡᠰᠦᠲᠦ ᠮᠥᠴᠢᠷ ᠢᠶᠠᠷ ᠲᠢᠲᠢᠮ ᠰᠦᠯᠵᠢᠭᠡᠳ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠲᠠᠯᠪᠢᠵᠤ᠂ ᠨᠢᠯ ᠶᠠᠭᠠᠨ ᠨᠥᠮᠥᠷᠭᠡ ᠨᠥᠮᠥᠷᠥᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ᠂ 3 ᠲᠡᠭᠦᠨ ᠳᠦ ᠳᠥᠭᠥᠭᠰᠡᠭᠡᠷ᠄ 《ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠮᠠᠨᠳᠤᠲᠤᠭᠠᠢ︕》 ᠭᠡᠳ ᠬᠠᠴᠠᠷ ᠢ ᠨᠢ ᠠᠯᠠᠭᠠᠳᠠᠵᠤ ᠪᠠᠢᠪᠠ᠃ 4 ᠫᠢᠯᠠᠲ ᠳᠠᠬᠢᠨ ᠭᠠᠷᠴᠤ ᠢᠷᠡᠭᠡᠳ ᠶᠦᠳᠠᠢᠴᠤᠳ ᠲᠤ᠄ 《ᠬᠠᠷᠠᠭᠲᠤᠨ︕ ᠪᠢ ᠲᠡᠭᠦᠨ ᠢ ᠨᠠᠰᠢ ᠠᠪᠴᠢᠷᠠᠶᠠ᠂ ᠪᠢ ᠲᠡᠭᠦᠨ ᠡᠴᠡ ᠶᠠᠮᠠᠷ ᠴᠤ ᠪᠤᠷᠤᠭᠤ ᠣᠯᠣᠭᠠ ᠦᠭᠡᠢ ᠶᠢ ᠲᠠ ᠨᠠᠷ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃ 5 ᠢᠰᠦ᠋ᠰ ᠥᠷᠭᠡᠰᠦᠲᠦ ᠲᠢᠲᠢᠮ᠂ ᠪᠣᠷᠣ ᠤᠯᠠᠭᠠᠨ ᠨᠥᠮᠥᠷᠭᠡ ᠲᠠᠢ ᠭᠠᠷᠴᠤ ᠢᠷᠡᠬᠦ ᠳᠦ᠂ ᠫᠢᠯᠠᠲ ᠲᠡᠳᠡᠨ ᠳᠦ᠄ 《ᠬᠥᠮᠦᠨ ᠴᠢᠨᠢ ᠡᠨᠡ ᠪᠠᠢᠨᠠ︕》 ᠭᠡᠯᠡ᠃ 6 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠠ ᠬᠠᠷᠠᠭᠤᠯ ᠤᠳ ᠲᠡᠭᠦᠨ ᠢ ᠬᠠᠷᠠᠩ᠋ᠭᠤᠲᠠ᠄ 《ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ︕ ᠴᠣᠪᠳᠣᠯᠠ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠬᠤ ᠳᠤ᠂ ᠫᠢᠯᠠᠲ᠄ 《ᠲᠠ ᠨᠠᠷ ᠥᠪᠡᠷᠰᠡᠳ ᠢᠶᠡᠨ ᠲᠡᠭᠦᠨ ᠢ ᠠᠪᠠᠴᠢᠵᠤ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ᠂ ᠪᠢ ᠲᠡᠭᠦᠨ ᠡᠴᠡ ᠶᠠᠮᠠᠷ ᠴᠤ ᠭᠡᠮ ᠪᠤᠷᠤᠭᠤ ᠣᠯᠣᠭᠰᠠᠨ ᠦᠭᠡᠢ》 ᠭᠡᠰᠡᠨ ᠳᠦ᠂ 7 ᠶᠦᠳᠠᠢᠴᠤᠳ᠄ 《ᠪᠢᠳᠡᠨ ᠳᠦ ᠬᠠᠤᠯᠢ ᠪᠤᠢ᠂ ᠲᠡᠷᠡ ᠬᠠᠤᠯᠢ ᠪᠠᠷ ᠪᠣᠯ ᠲᠡᠷᠡ ᠦᠬᠦᠬᠦ ᠶᠣᠰᠣᠲᠠᠢ᠃ ᠲᠡᠷᠡ ᠥᠪᠡᠷ ᠢ ᠪᠠᠨ ᠪᠤᠷᠬᠠᠨ ᠤ ᠬᠦᠦ ᠭᠡᠰᠡᠨ》 ᠭᠡᠵᠡᠭᠡᠵᠦ ᠪᠠᠢᠯᠠ᠃
8 ᠫᠢᠯᠠᠲ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠤᠯᠠᠮ ᠶᠡᠬᠡ ᠠᠶᠤᠵᠤ᠂ 9 ᠣᠷᠳᠣᠨ ᠳᠠᠭᠠᠨ ᠳᠠᠬᠢᠨ ᠣᠷᠣᠵᠤ᠄ 《ᠴᠢ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠴᠤ ᠢᠰᠦ᠋ᠰ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ 10 ᠫᠢᠯᠠᠲ᠄ 《ᠴᠢ ᠨᠠᠳᠠ ᠳᠤ ᠬᠡᠯᠡᠬᠦ ᠦᠭᠡᠢ ᠤᠤ︖ ᠴᠢᠮᠠᠶᠢ ᠰᠤᠯᠠᠯᠠᠬᠤ ᠡᠷᠬᠡ ᠴᠤ᠂ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠬᠤ ᠡᠷᠬᠡ ᠴᠤ ᠨᠠᠳᠠ ᠳᠤ ᠪᠠᠢᠭᠠ ᠶᠢ ᠴᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ ᠤᠤ︖》 ᠭᠡᠬᠦ ᠳᠦ᠂ 11 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠬᠡᠷᠪᠡ ᠳᠡᠭᠡᠷᠡ ᠡᠴᠡ ᠰᠣᠶᠣᠷᠬᠠᠭᠠ ᠦᠭᠡᠢ ᠪᠠᠢᠭᠰᠠᠨ ᠪᠣᠯ᠂ ᠴᠢᠮᠠ ᠳᠤ ᠨᠠᠳᠠ ᠲᠠᠢ ᠬᠠᠯᠳᠠᠬᠤ ᠶᠠᠮᠠᠷ ᠴᠤ ᠡᠷᠬᠡ ᠪᠠᠢᠬᠤ ᠦᠭᠡᠢ᠂ ᠲᠡᠢᠮᠦ ᠡᠴᠡ ᠨᠠᠮᠠᠶᠢ ᠴᠢᠮᠠ ᠳᠤ ᠲᠤᠰᠢᠶᠠᠭᠰᠠᠨ ᠬᠥᠮᠦᠨ ᠨᠢ ᠢᠯᠡᠭᠦᠦ ᠨᠢᠭᠦᠯ ᠲᠡᠢ ᠶᠤᠮ》 ᠭᠡᠪᠡ᠃ 12 ᠡᠭᠦᠨ ᠡᠴᠡ ᠬᠣᠢᠰᠢ ᠫᠢᠯᠠᠲ ᠢᠰᠦ᠋ᠰ ᠢ ᠰᠤᠯᠠᠯᠠᠬᠤ ᠪᠠᠷ ᠬᠢᠴᠢᠶᠡᠭᠰᠡᠨ ᠪᠣᠯᠪᠠᠴᠤ ᠶᠦᠳᠠᠢᠴᠤᠳ᠄ 《ᠲᠠ ᠬᠡᠷᠪᠡ ᠡᠨᠡ ᠬᠥᠮᠦᠨ ᠢ ᠰᠤᠯᠠᠯᠠᠪᠠᠯ ᠺᠠᠶᠧᠰᠠᠷ ᠬᠠᠭᠠᠨ ᠤ ᠠᠨᠳᠠ ᠪᠢᠰᠢ᠂ ᠥᠪᠡᠷ ᠢ ᠪᠠᠨ ᠬᠠᠭᠠᠨ ᠭᠡᠭᠴᠢ ᠪᠣᠯᠭᠠᠨ ᠺᠠᠶᠧᠰᠠᠷ ᠬᠠᠭᠠᠨ ᠠᠴᠠ ᠲᠡᠷᠰᠯᠡᠭᠴᠢ ᠮᠥᠨ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠵᠤ ᠪᠠᠢᠪᠠ᠃
13 ᠫᠢᠯᠠᠲ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠢᠰᠦ᠋ᠰ ᠢ ᠠᠪᠴᠢᠷᠠᠭᠤᠯᠵᠤ᠂ ᠰᠢᠭᠢᠳᠬᠡᠮᠡᠯ ᠴᠢᠯᠠᠭᠤᠲᠤ (ᠢᠪᠷᠠᠢ ᠪᠠᠷ ᠭᠠᠪᠠᠲ᠋ᠠ) ᠭᠡᠳᠡᠭ ᠭᠠᠵᠠᠷ ᠳᠠᠬᠢ ᠰᠢᠭᠦᠭᠴᠢ ᠶᠢᠨ ᠰᠠᠭᠤᠳᠠᠯ ᠳᠤ ᠰᠠᠭᠤᠪᠠ᠃ 14 ᠲᠡᠭᠡᠬᠦ ᠳᠦ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠪᠡᠯᠡᠳᠬᠡᠯ ᠦᠨ ᠡᠳᠦᠷ ᠦᠨ ᠦᠳᠡ ᠶᠢᠨ ᠣᠷᠴᠢᠮ ᠪᠠᠢᠯᠠ᠃ ᠫᠢᠯᠠᠲ ᠶᠦᠳᠠᠢᠴᠤᠳ ᠲᠤ᠄ 《ᠬᠠᠭᠠᠨ ᠴᠢᠨᠢ ᠡᠨᠡ ᠪᠠᠢᠨᠠ︕》 ᠭᠡᠰᠡᠨ ᠳᠦ᠂ 15 ᠲᠡᠳᠡ᠄ 《ᠲᠡᠭᠦᠨ ᠢ ᠲᠣᠨᠢᠯᠭᠠ᠂ ᠲᠣᠨᠢᠯᠭᠠ︕ ᠲᠡᠭᠦᠨ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃ ᠫᠢᠯᠠᠲ᠄ 《ᠲᠠ ᠨᠠᠷ ᠤᠨ ᠬᠠᠭᠠᠨ ᠢ ᠪᠢ ᠴᠣᠪᠳᠣᠯᠠᠬᠤ ᠭᠡᠵᠢ ᠤᠤ︖》 ᠭᠡᠬᠦ ᠳᠦ᠂ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ᠄ 《ᠺᠠᠶᠧᠰᠠᠷ ᠠᠴᠠ ᠥᠭᠡᠷᠡ ᠬᠠᠭᠠᠨ ᠪᠢᠳᠡᠨ ᠳᠦ ᠪᠠᠢᠬᠤ ᠦᠭᠡᠢ》 ᠭᠡᠵᠡᠭᠡᠪᠡ᠃ 16 ᠡᠴᠦᠰ ᠲᠤᠨᠢ ᠫᠢᠯᠠᠲ ᠢᠰᠦ᠋ᠰ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠤᠯᠬᠤ ᠪᠠᠷ ᠲᠡᠳᠡᠨ ᠳᠦ ᠲᠤᠰᠢᠶᠠᠭᠰᠠᠨ ᠳᠤ᠂ ᠲᠡᠳᠡ ᠢᠰᠦ᠋ᠰ ᠢ ᠠᠪᠤᠭᠠᠳ ᠶᠠᠪᠤᠪᠠ᠃
ᠢᠰᠦ᠋ᠰ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠨᠢ
17 ᠢᠰᠦ᠋ᠰ ᠥᠪᠡᠷ ᠢᠶᠡᠨ ᠵᠠᠭᠠᠯᠮᠠᠢ ᠶᠢ ᠡᠭᠦᠷᠦᠭᠰᠡᠭᠡᠷ ᠭᠠᠷᠴᠤ ᠭᠠᠪᠠᠯᠠ ᠶᠢᠨ ᠭᠠᠵᠠᠷ (ᠢᠪᠷᠠᠢ ᠪᠠᠷ ᠭᠣᠯᠭᠣᠲ᠋ᠠ) ᠭᠡᠳᠡᠭ ᠭᠠᠵᠠᠷ ᠤᠷᠤᠭᠤ ᠶᠠᠪᠤᠯᠠ᠃ 18 ᠢᠰᠦ᠋ᠰ ᠢ ᠲᠡᠨᠳᠡ ᠴᠣᠪᠳᠣᠯᠠᠵᠠᠢ᠃ ᠲᠡᠭᠡᠬᠦ ᠳᠡᠭᠡᠨ ᠬᠣᠶᠠᠷ ᠲᠠᠯᠠ ᠳᠤᠨᠢ ᠨᠢᠭᠡ ᠨᠢᠭᠡ ᠬᠥᠮᠦᠨ ᠢ᠂ ᠢᠰᠦ᠋ᠰ ᠢ ᠳᠤᠮᠳᠠ ᠨᠢ ᠴᠣᠪᠳᠣᠯᠠᠵᠠᠢ᠃ 19 ᠫᠢᠯᠠᠲ ᠥᠪᠡᠷ ᠦᠨ ᠢᠶᠠᠨ ᠪᠢᠴᠢᠭᠰᠡᠨ 《ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ — ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ》 ᠭᠡᠬᠦ ᠫᠠᠢᠰᠠ ᠶᠢ ᠢᠰᠦ᠋ᠰ ᠤᠨ ᠵᠠᠭᠠᠯᠮᠠᠢ ᠳᠡᠭᠡᠷᠡ ᠡᠯᠭᠦᠭᠦᠯᠪᠡ᠃ 20 ᠢᠰᠦ᠋ᠰ ᠢ ᠴᠣᠪᠳᠣᠯᠠᠭᠰᠠᠨ ᠭᠠᠵᠠᠷ ᠬᠣᠲᠠ ᠠᠴᠠ ᠬᠣᠯᠠ ᠦᠭᠡᠢ ᠲᠤᠯᠠ ᠶᠦᠳᠠᠢᠴᠤᠳ ᠣᠯᠠᠨ ᠢᠶᠠᠷ ᠢᠶᠠᠨ ᠡᠭᠦᠨ ᠢ ᠤᠩ᠋ᠰᠢᠵᠠᠢ᠃ ᠫᠠᠢᠰᠠᠨ ᠳᠡᠭᠡᠷᠡ ᠢᠪᠷᠠᠢ᠂ ᠯᠠᠲ᠋ᠢᠨ᠂ ᠭᠷᠧᠭ ᠬᠡᠯᠡ ᠪᠡᠷ ᠪᠢᠴᠢᠭᠰᠡᠨ ᠪᠠᠢᠪᠠ᠃ 21 ᠶᠦᠳᠠᠢᠴᠤᠳ ᠤᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠫᠢᠯᠠᠲ ᠲᠤ᠄ 《〈ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ〉 ᠭᠡᠵᠦ ᠪᠦᠦ ᠪᠢᠴᠢ᠂ ᠬᠠᠷᠢᠨ 〈ᠥᠪᠡᠷ ᠢ ᠪᠠᠨ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠭᠡᠰᠡᠨ〉 ᠭᠡᠵᠦ ᠪᠢᠴᠢᠭᠲᠦᠨ》 ᠭᠡᠰᠡᠨ ᠳᠦ᠂ 22 ᠫᠢᠯᠠᠲ᠄ 《ᠪᠢ ᠪᠢᠴᠢᠶᠡ ᠭᠡᠰᠡᠨ ᠢᠶᠡᠨ ᠪᠢᠴᠢᠴᠢᠬᠡᠭᠰᠡᠨ》 ᠭᠡᠪᠡ᠃ 23 ᠴᠡᠷᠢᠭ ᠤᠳ ᠢᠰᠦ᠋ᠰ ᠢ ᠴᠣᠪᠳᠣᠯᠠᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠭᠦᠨ ᠦ ᠭᠠᠳᠠᠭᠤᠷ ᠬᠤᠪᠴᠠᠰᠤ ᠶᠢ ᠠᠪᠴᠤ ᠳᠥᠷᠪᠡ ᠬᠤᠪᠢᠶᠠᠭᠠᠳ᠂ ᠬᠤᠪᠢ ᠬᠤᠪᠢ ᠪᠠᠨ ᠬᠦᠷᠲᠡᠵᠡᠢ᠃ ᠳᠣᠲᠣᠷ ᠬᠤᠪᠴᠠᠰᠤ ᠨᠢ ᠣᠶᠣᠳᠠᠯ ᠦᠭᠡᠢ᠂ ᠳᠡᠭᠡᠷᠡ ᠡᠴᠡ ᠪᠡᠨ ᠳᠣᠣᠷᠠ ᠬᠦᠷᠲᠡᠯᠡ ᠪᠢᠲᠡᠭᠦᠦ ᠨᠡᠬᠡᠭᠳᠡᠭᠰᠡᠨ ᠤᠴᠢᠷ ᠠᠴᠠ᠂ 24 ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠡᠭᠦᠨ ᠢ ᠤᠷᠠᠬᠤ ᠦᠭᠡᠢ ᠪᠠᠷ ᠬᠡᠨ ᠦ ᠬᠢ ᠪᠣᠯᠬᠤ ᠶᠢ ᠨᠢ ᠰᠢᠪᠠᠭᠠᠳᠠᠵᠤ ᠰᠢᠢᠳᠦᠶᠡ》 ᠭᠡᠪᠡ᠃ ᠲᠡᠢᠨ ᠬᠦ 《ᠭᠠᠳᠠᠷ ᠬᠤᠪᠴᠠᠰᠤ ᠶᠢ ᠮᠢᠨᠢ ᠬᠤᠪᠢᠶᠠᠨ ᠠᠪᠴᠤ᠂ ᠳᠣᠲᠣᠷ ᠬᠤᠪᠴᠠᠰᠤᠨ ᠤ ᠮᠢᠨᠢ ᠲᠥᠯᠥᠭᠡ ᠰᠢᠪᠠᠭᠠᠳᠠᠭᠰᠠᠨ》 ᠭᠡᠰᠡᠨ ᠡᠰᠢᠯᠡᠯ ᠪᠡᠶᠡᠯᠡᠭᠳᠡᠵᠡᠢ᠃ ᠡᠳᠡᠭᠡᠷ ᠢ ᠴᠡᠷᠢᠭ ᠤᠳ ᠦᠢᠯᠡᠳᠴᠡᠢ᠃ 25 ᠢᠰᠦ᠋ᠰ ᠤᠨ ᠵᠠᠭᠠᠯᠮᠠᠢ ᠶᠢᠨ ᠳᠡᠷᠭᠡᠳᠡ ᠢᠰᠦ᠋ᠰ ᠤᠨ ᠡᠬᠡ᠂ ᠨᠠᠭᠠᠴᠤ ᠡᠬᠡ᠂ ᠺᠯᠣᠫᠠ ᠶᠢᠨ ᠡᠬᠡᠨᠡᠷ ᠮᠠᠷᠢᠶᠠ᠂ ᠮᠠᠭᠳᠠᠯ ᠤᠨ ᠮᠠᠷᠢᠶᠠ ᠨᠠᠷ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠶᠤᠮ᠃ 26 ᠢᠰᠦ᠋ᠰ ᠡᠵᠢ ᠪᠣᠯᠣᠨ ᠳᠡᠷᠭᠡᠳᠡ ᠨᠢ ᠪᠠᠢᠭᠠ ᠬᠠᠢᠷᠠᠲᠠᠢ ᠱᠠᠪᠢ ᠪᠠᠨ ᠬᠠᠷᠠᠭᠠᠳ᠂ ᠡᠵᠢ ᠳᠡᠭᠡᠨ᠄ 《ᠡᠷᠬᠢᠮ ᠪᠦᠰᠡᠭᠦᠢ ᠡ᠂ ᠬᠦᠦ ᠴᠢᠨᠢ ᠲᠡᠷᠡ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠡᠳ᠂ 27 ᠨᠥᠭᠥᠭᠡ ᠱᠠᠪᠢ ᠳᠠᠭᠠᠨ᠄ 《ᠡᠵᠢ ᠴᠢᠨᠢ ᠲᠡᠷᠡ ᠪᠠᠢᠨᠠ》 ᠭᠡᠯᠡ᠃ ᠲᠡᠷᠡ ᠴᠠᠭ ᠠᠴᠠ ᠬᠣᠢᠰᠢ ᠲᠡᠷᠡ ᠱᠠᠪᠢ ᠨᠢ ᠢᠰᠦ᠋ᠰ ᠤᠨ ᠡᠬᠡ ᠶᠢ ᠭᠡᠷ ᠲᠡᠭᠡᠨ ᠪᠠᠢᠯᠭᠠᠪᠠ᠃
28 ᠡᠭᠦᠨ ᠦ ᠳᠠᠷᠠᠭᠠ᠂ ᠢᠰᠦ᠋ᠰ ᠪᠦᠬᠦ ᠶᠠᠭᠤᠮᠠ ᠪᠡᠶᠡᠯᠡᠭᠳᠡᠭᠰᠡᠨ ᠢ ᠮᠡᠳᠡᠭᠡᠳ᠄ 《ᠪᠢ ᠴᠠᠩ᠋ᠭᠠᠵᠤ ᠪᠠᠢᠨᠠ》 ᠭᠡᠪᠡ᠃ ᠲᠡᠢᠨ ᠬᠦ ᠠᠷᠢᠭᠤᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠨᠢ ᠪᠡᠶᠡᠯᠡᠭᠳᠡᠵᠡᠢ᠃ 29 ᠲᠡᠨᠳᠡ ᠬᠥᠨᠥᠭ ᠳᠦᠭᠦᠷᠡᠩ ᠢᠰᠭᠦᠯᠡᠩ ᠳᠠᠷᠠᠰᠤ ᠪᠠᠢᠪᠠ᠃ ᠬᠥᠮᠦᠰ ᠲᠡᠷᠡ ᠬᠦ ᠳᠠᠷᠠᠰᠤᠨ ᠠᠴᠠ ᠳᠠᠯᠠᠢ ᠶᠢᠨ ᠬᠥᠪᠥᠩ ᠳᠤ ᠰᠢᠩᠭᠡᠭᠡᠵᠦ᠂ ᠾᠢᠰᠣᠫ ᠤᠨ ᠮᠥᠴᠢᠷ ᠲᠤ ᠡᠯᠭᠦᠭᠡᠳ ᠢᠰᠦ᠋ᠰ ᠤᠨ ᠠᠮᠠᠨ ᠳᠤ ᠬᠦᠷᠭᠡᠪᠡ᠃ 30 ᠢᠰᠦ᠋ᠰ ᠢᠰᠭᠦᠯᠡᠩ ᠳᠠᠷᠠᠰᠤᠨ ᠠᠴᠠ ᠠᠪᠤᠨ᠄ 《ᠪᠦᠲᠦᠯᠡ︕》 ᠭᠡᠵᠦ ᠬᠡᠯᠡᠭᠡᠳ ᠲᠣᠯᠣᠭᠠᠢ ᠪᠠᠨ ᠪᠥᠬᠥᠢᠯᠭᠡᠨ ᠠᠮᠢᠰᠬᠤᠯ ᠲᠠᠯᠪᠢᠪᠠ᠃
31 ᠲᠡᠷᠡ ᠡᠳᠦᠷ ᠨᠢ ᠪᠡᠯᠡᠳᠬᠡᠯ ᠦᠨ ᠡᠳᠦᠷ᠂ ᠮᠠᠷᠭᠠᠰᠢ ᠨᠢ ᠠᠮᠠᠷᠠᠯ ᠤᠨ ᠶᠡᠬᠡ ᠡᠳᠦᠷ ᠪᠣᠯᠬᠣᠷ ᠶᠦᠳᠠᠢᠴᠤᠳ ᠱᠠᠷᠢᠯ ᠤᠳ ᠢ ᠵᠠᠭᠠᠯᠮᠠᠢ ᠳᠡᠭᠡᠷᠡ ᠪᠠᠢᠯᠭᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠬᠥᠯ ᠢ ᠨᠢ ᠬᠤᠭᠤᠯᠵᠤ 24 ᠵᠠᠢᠯᠠᠭᠤᠯᠬᠤ ᠶᠢ ᠫᠢᠯᠠᠲ ᠠᠴᠠ ᠭᠤᠶᠤᠭᠰᠠᠨ ᠪᠠᠢᠪᠠ᠃ 32 ᠴᠡᠷᠢᠭ ᠤᠳ ᠶᠠᠪᠤᠵᠤ᠂ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠨᠢᠭᠡᠳᠡᠬᠢ ᠬᠥᠮᠦᠨ ᠪᠣᠯᠣᠨ ᠨᠥᠭᠥᠭᠡᠳᠡᠬᠢ ᠬᠥᠮᠦᠨ ᠦ ᠬᠥᠯ ᠢ ᠬᠤᠭᠤᠯᠪᠠ᠃ 33 ᠬᠠᠷᠢᠨ ᠢᠰᠦ᠋ᠰ ᠤᠨ ᠳᠡᠷᠭᠡᠳᠡ ᠣᠴᠢᠭᠠᠳ ᠨᠢᠭᠡᠨᠲᠡ ᠨᠥᠭᠴᠢᠭᠰᠡᠨ ᠢ ᠨᠢ ᠦᠵᠡᠭᠡᠳ ᠬᠥᠯ ᠢ ᠨᠢ ᠬᠤᠭᠤᠯᠤᠭᠰᠠᠨ ᠦᠭᠡᠢ᠃ 34 ᠴᠡᠷᠢᠭ ᠤᠳ ᠤᠨ ᠨᠢᠭᠡ ᠨᠢ ᠲᠡᠭᠦᠨ ᠦ ᠰᠦᠪᠡᠭᠡ ᠤᠷᠤᠭᠤ ᠵᠢᠳᠠᠯᠠᠭᠰᠠᠨ ᠳᠤ᠂ ᠳᠣᠣᠷᠠ ᠪᠠᠨ ᠴᠢᠰᠤ ᠪᠠ ᠤᠰᠤ ᠭᠣᠭᠣᠵᠢᠯᠠ᠃ 35 [ᠬᠠᠷᠠᠭᠰᠠᠨ ᠬᠥᠮᠦᠨ ᠡᠭᠦᠨ ᠢ ᠭᠡᠷᠡᠴᠢᠯᠡᠭᠰᠡᠨ ᠲᠤᠯᠠ ᠭᠡᠷᠡᠴᠢᠯᠡᠯ ᠨᠢ ᠦᠨᠡᠨ ᠶᠤᠮ᠃ ᠲᠡᠷᠡ ᠬᠡᠯᠡᠭᠰᠡᠨ ᠦ ᠪᠠᠨ ᠦᠨᠡᠨ ᠭᠡᠳᠡᠭ ᠢ ᠮᠡᠳᠡᠵᠦ᠂ ᠲᠠ ᠨᠠᠷ ᠢ ᠴᠤ ᠢᠲᠡᠭᠡᠭᠡᠰᠡᠢ ᠭᠡᠰᠡᠨ ᠳᠡᠭᠡᠨ ᠭᠡᠷᠡᠴᠢᠯᠡᠪᠡ᠃] 36 ᠡᠳᠡᠭᠡᠷ ᠶᠠᠪᠤᠳᠠᠯ ᠪᠣᠯᠣᠭᠰᠠᠨ ᠢᠶᠠᠷ 《ᠲᠡᠭᠦᠨ ᠦ ᠨᠢᠭᠡ ᠶᠠᠰᠤ ᠴᠤ ᠬᠤᠭᠤᠯᠤᠭᠳᠠᠬᠤ ᠦᠭᠡᠢ》 ᠭᠡᠰᠡᠨ ᠡᠰᠢᠯᠡᠯ ᠪᠡᠶᠡᠯᠡᠭᠳᠡᠵᠡᠢ᠃ 37 ᠥᠭᠡᠷᠡ ᠡᠰᠢᠯᠡᠯ ᠳᠡᠭᠡᠷᠡ 《ᠲᠡᠳᠡ ᠥᠪᠡᠷᠰᠡᠳ ᠦᠨ ᠵᠢᠳᠠᠯᠠᠭᠰᠠᠨ ᠬᠥᠮᠦᠨ ᠤᠷᠤᠭᠤ ᠪᠠᠨ ᠬᠠᠷᠠᠨᠠ》 ᠭᠡᠰᠡᠨ ᠦᠭᠡ ᠴᠤ ᠪᠠᠢᠳᠠᠭ᠃
ᠢᠰᠦ᠋ᠰ ᠪᠤᠯᠠᠰᠢᠯᠠᠭᠳᠠᠭᠰᠠᠨ ᠨᠢ
38 ᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠳᠠᠷᠠᠭᠠ ᠠᠷᠢᠮᠠᠲ᠋ᠠ ᠬᠥᠮᠦᠨ ᠶᠣᠰᠧᠹ ᠫᠢᠯᠠᠲ ᠠᠴᠠ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠭᠤᠶᠤᠪᠠ᠃ ᠶᠣᠰᠧᠹ ᠢᠰᠦ᠋ᠰ ᠤᠨ ᠱᠠᠪᠢ ᠪᠣᠯᠪᠠᠴᠤ ᠶᠦᠳᠠᠢᠴᠤᠳ ᠠᠴᠠ ᠠᠶᠤᠵᠤ ᠳᠠᠯᠳᠠ ᠪᠠᠢᠵᠠᠢ᠃ ᠫᠢᠯᠠᠲ ᠵᠥᠪᠰᠢᠶᠡᠷᠡᠭᠰᠡᠨ ᠳᠦ᠂ ᠲᠡᠷᠡ ᠣᠴᠢᠭᠠᠳ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠠᠪᠴᠤ ᠶᠠᠪᠤᠪᠠ᠃ 39 ᠤᠷᠢᠳᠤ ᠨᠢ ᠢᠰᠦ᠋ᠰ ᠤᠷᠤᠭᠤ ᠰᠥᠨᠢ ᠪᠠᠷ ᠣᠴᠢᠵᠤ ᠪᠠᠢᠭᠰᠠᠨ ᠨᠢᠺᠣᠳᠧᠮ ᠴᠤ ᠵᠠᠭᠤᠨ ᠵᠢᠩ ᠣᠷᠴᠢᠮ ᠤᠨ ᠭᠦᠭᠦᠯ ᠪᠠ ᠠᠭᠠᠷᠤ ᠠᠪᠴᠢᠷᠠᠪᠠ᠃ 40 ᠲᠡᠷᠡ ᠬᠣᠶᠠᠭᠤᠯᠠ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠠᠪᠴᠤ᠂ ᠶᠦᠳᠠᠢᠴᠤᠳ ᠤᠨ ᠣᠷᠣᠰᠢᠭᠤᠯᠭᠠ ᠶᠢᠨ ᠶᠣᠰᠣ ᠪᠠᠷ ᠠᠩᠬᠢᠯᠤᠭᠤᠨ ᠦᠨᠦᠷ ᠰᠢᠩᠭᠡᠭᠡᠭᠰᠡᠨ ᠨᠠᠷᠢᠨ ᠣᠯᠣᠰᠣᠨ ᠪᠥᠰ ᠢᠶᠡᠷ ᠤᠷᠢᠶᠠᠪᠠ᠃ 41 ᠢᠰᠦ᠋ᠰ ᠢ ᠴᠣᠪᠳᠣᠯᠠᠭᠰᠠᠨ ᠭᠠᠵᠠᠷ ᠲᠤ ᠴᠡᠴᠡᠷᠯᠢᠭ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠴᠡᠴᠡᠷᠯᠢᠭ ᠳᠣᠲᠣᠷᠠ ᠬᠥᠮᠦᠨ ᠲᠠᠯᠪᠢᠭᠠ ᠦᠭᠡᠢ ᠰᠢᠨᠡ ᠪᠤᠯᠠᠰᠢ ᠪᠠᠢᠵᠠᠢ᠃ 42 ᠲᠡᠭᠡᠬᠦ ᠳᠦ᠂ ᠶᠦᠳᠠᠢᠴᠤᠳ ᠤᠨ ᠪᠡᠯᠡᠳᠬᠡᠯ ᠦᠨ ᠡᠳᠦᠷ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠪᠤᠯᠠᠰᠢ ᠣᠢᠷᠠᠬᠠᠨ ᠪᠠᠢᠭᠰᠠᠨ ᠲᠤᠯᠠ ᠢᠰᠦ᠋ᠰ ᠢ ᠲᠡᠨᠳᠡ ᠲᠠᠯᠪᠢᠪᠠ᠃