ᠶᠣᠬᠠᠨ ᠶᠢᠰᠦ
ᠲᠥᠷᠥᠯᠬᠢ ᠰᠣᠬᠣᠷ ᠢ ᠡᠳᠡᠭᠡᠭᠡᠭᠰᠡᠨ ᠨᠢ
1 ᠢᠰᠦ᠋ᠰ ᠥᠩᠭᠡᠷᠡᠨ ᠭᠠᠷᠬᠤ ᠳᠠᠭᠠᠨ ᠲᠥᠷᠥᠯᠬᠢ ᠰᠣᠬᠣᠷ ᠨᠢᠭᠡ ᠬᠥᠮᠦᠨ ᠢ ᠬᠠᠷᠠᠵᠠᠢ᠃ 2 ᠱᠠᠪᠢ ᠨᠠᠷ ᠨᠢ᠄ 《ᠪᠠᠭᠰᠢ ᠡ᠂ ᠬᠡᠨ ᠨᠢ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠢᠶᠡᠷ ᠡᠨᠡ ᠬᠥᠮᠦᠨ ᠰᠣᠬᠣᠷ ᠲᠥᠷᠥᠭᠰᠡᠨ ᠪᠤᠢ︖ ᠥᠪᠡᠷ ᠢᠶᠡᠨ ᠤᠤ︖ ᠡᠴᠢᠭᠡ ᠡᠬᠡ ᠨᠢ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 3 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠡᠨᠡ ᠬᠥᠮᠦᠨ ᠴᠤ᠂ ᠡᠴᠢᠭᠡ ᠡᠬᠡ ᠨᠢ ᠴᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠪᠢᠰᠢ᠃ ᠬᠠᠷᠢᠨ ᠪᠤᠷᠬᠠᠨ ᠤ ᠠᠵᠢᠯ ᠤᠳ ᠢ ᠲᠡᠭᠦᠨ ᠦ ᠳᠡᠭᠡᠷᠡ ᠢᠯᠡᠷᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠶᠤᠮ᠃ 4 ᠡᠳᠦᠷ ᠪᠠᠢᠬᠤ ᠳᠡᠭᠡᠷᠡ ᠨᠢ᠂ ᠨᠠᠮᠠᠶᠢ ᠢᠯᠡᠭᠡᠭᠰᠡᠨ ᠨᠢᠭᠡᠨ ᠦ ᠠᠵᠢᠯ ᠤᠳ ᠢ ᠪᠢᠳᠡ ᠬᠢᠬᠦ ᠶᠣᠰᠣᠲᠠᠢ᠃ ᠰᠥᠨᠢ ᠪᠣᠯᠴᠢᠬᠠᠪᠠᠯ ᠬᠡᠨ ᠴᠤ ᠠᠵᠢᠯᠯᠠᠵᠤ ᠴᠢᠳᠠᠬᠤ ᠦᠭᠡᠢ᠃ 5 ᠪᠢ ᠶᠢᠷᠲᠢᠨᠴᠦ ᠳᠦ ᠪᠠᠢᠬᠤ ᠵᠠᠭᠤᠷᠠ ᠪᠠᠨ ᠶᠢᠷᠲᠢᠨᠴᠦ ᠶᠢᠨ ᠭᠡᠷᠡᠯ ᠮᠥᠨ》 ᠭᠡᠵᠦ ᠬᠡᠯᠡᠵᠡᠢ᠃ 6 ᠲᠡᠷᠡ ᠢᠩᠭᠢᠵᠦ ᠬᠡᠯᠡᠭᠡᠳ ᠭᠠᠵᠠᠷ ᠲᠤ ᠨᠤᠯᠮᠤᠵᠤ᠂ ᠰᠢᠯᠦᠰᠦ ᠪᠡᠷ ᠢᠶᠠᠨ ᠰᠢᠪᠠᠷ ᠵᠢᠭᠤᠷᠠᠨ᠂ ᠲᠡᠷᠡ ᠬᠥᠮᠦᠨ ᠦ ᠨᠢᠳᠦ ᠶᠢ ᠰᠢᠪᠠᠭᠠᠳ᠄ 7 《ᠰᠢᠯᠣᠶᠠᠮ (ᠣᠷᠴᠢᠭᠤᠯᠪᠠᠯ᠄ ᠢᠯᠡᠭᠡᠭᠳᠡᠭᠰᠡᠨ) ᠴᠥᠭᠥᠷᠥᠮ ᠳᠤ ᠣᠴᠢᠵᠤ ᠤᠬᠢᠶᠠ》 ᠭᠡᠵᠦ ᠬᠡᠯᠡᠬᠦ ᠳᠦ᠂ ᠥᠨᠥᠬᠢ ᠬᠥᠮᠦᠨ ᠶᠠᠪᠤᠵᠤ ᠤᠬᠢᠶᠠᠭᠠᠳ ᠬᠠᠷᠠᠭᠠ ᠲᠠᠢ ᠪᠣᠯᠵᠤ ᠪᠤᠴᠠᠨ ᠢᠷᠡᠵᠡᠢ᠃ 8 ᠤᠷᠢᠳᠤ ᠨᠢ ᠲᠡᠭᠦᠨ ᠦ ᠭᠤᠶᠤᠯᠭᠠᠴᠢᠨ ᠪᠠᠢᠭᠰᠠᠨ ᠢ ᠬᠠᠷᠠᠭᠰᠠᠨ ᠬᠥᠮᠦᠰ ᠪᠣᠯᠣᠨ ᠬᠥᠷᠰᠢ ᠨᠦᠭᠦᠳ ᠨᠢ᠄ 《ᠡᠨᠡ ᠴᠢᠨᠢ ᠰᠠᠭᠤᠭᠠᠳ ᠭᠤᠶᠤᠯᠭᠠ ᠭᠤᠶᠤᠳᠠᠭ ᠪᠠᠢᠭᠰᠠᠨ ᠬᠥᠮᠦᠨ ᠪᠢᠰᠢ ᠤᠤ︖》 ᠭᠡᠯᠴᠡᠵᠦ ᠪᠠᠢᠪᠠ᠃ 9 ᠵᠠᠷᠢᠮ ᠨᠢ᠄ 《ᠲᠡᠷᠡ ᠮᠥᠨ ᠪᠠᠢᠨᠠ》 ᠭᠡᠬᠦ ᠳᠦ᠂ ᠪᠠᠰᠠ ᠵᠠᠷᠢᠮ ᠨᠢ᠄ 《ᠦᠭᠡᠢ᠂ ᠬᠠᠷᠢᠨ ᠲᠡᠭᠦᠨ ᠲᠡᠢ ᠲᠥᠰᠥᠭᠡᠲᠡᠢ ᠶᠤᠮ ᠪᠠᠢᠨᠠ》 ᠭᠡᠵᠦ ᠪᠠᠢᠲᠠᠯᠠ᠂ ᠲᠡᠷᠡ ᠥᠪᠡᠷ ᠢᠶᠡᠨ᠄ 《ᠲᠡᠷᠡ ᠴᠢᠨᠢ ᠪᠢ ᠪᠠᠢᠨᠠ》 ᠭᠡᠯᠡ᠃ 10 《ᠲᠡᠢᠮᠦ ᠪᠣᠯ ᠴᠢ ᠬᠡᠷᠬᠢᠨ ᠬᠠᠷᠠᠭᠠ ᠣᠷᠣᠪᠠ︖》 ᠭᠡᠵᠦ ᠲᠡᠳᠡ ᠠᠰᠠᠭᠤᠭᠠᠳ ᠪᠠᠢᠬᠤ ᠳᠤ᠂ 11 ᠲᠡᠷᠡ᠄ 《ᠢᠰᠦ᠋ᠰ ᠭᠡᠳᠡᠭ ᠬᠥᠮᠦᠨ ᠰᠢᠪᠠᠷ ᠵᠢᠭᠤᠷᠠᠵᠤ᠂ ᠨᠢᠳᠦ ᠶᠢ ᠮᠢᠨᠢ ᠰᠢᠪᠠᠭᠠᠳ ᠨᠠᠳᠠ ᠳᠤ᠄ 〈ᠴᠢ ᠰᠢᠯᠣᠶᠠᠮ ᠴᠥᠭᠥᠷᠥᠮ ᠳᠤ ᠣᠴᠢᠵᠤ ᠤᠬᠢᠶᠠ〉 ᠭᠡᠵᠦ ᠬᠡᠯᠡᠭᠰᠡᠨ᠂ ᠪᠢ ᠣᠴᠢᠵᠤ ᠤᠬᠢᠶᠠᠭᠠᠳ ᠬᠠᠷᠠᠭᠠ ᠣᠷᠣᠪᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 12 ᠲᠡᠳᠡ᠄ 《ᠲᠡᠷᠡ ᠬᠥᠮᠦᠨ ᠬᠠᠮᠢᠭᠠ ᠪᠠᠢᠨᠠ︖》 ᠭᠡᠰᠡᠨ ᠳᠦ᠂ ᠲᠡᠷᠡ᠄ 《ᠮᠡᠳᠡᠬᠦ ᠦᠭᠡᠢ》 ᠭᠡᠯᠡ᠃
ᠬᠡᠷᠡᠭᠦᠯ ᠭᠠᠷᠤᠭᠰᠠᠨ ᠨᠢ
13 ᠡᠢᠨ ᠬᠦ ᠲᠡᠳᠡ ᠤᠷᠢᠳᠤ ᠨᠢ ᠰᠣᠬᠣᠷ ᠪᠠᠢᠭᠰᠠᠨ ᠲᠡᠭᠦᠨ ᠢ ᠹᠠᠷᠢᠰᠠᠢᠴᠤᠳ ᠲᠤ ᠠᠪᠠᠴᠢᠪᠠ᠃ 14 ᠢᠰᠦ᠋ᠰ ᠤᠨ ᠰᠢᠪᠠᠷ ᠵᠢᠭᠤᠷᠠᠵᠤ ᠲᠡᠭᠦᠨ ᠳᠦ ᠬᠠᠷᠠᠭᠠ ᠣᠷᠣᠭᠤᠯᠤᠭᠰᠠᠨ ᠡᠳᠦᠷ ᠨᠢ ᠠᠮᠠᠷᠠᠯ ᠤᠨ ᠡᠳᠦᠷ ᠠᠵᠢ᠃ 15 ᠹᠠᠷᠢᠰᠠᠢᠴᠤᠳ ᠪᠠᠰᠠ ᠲᠡᠭᠦᠨ ᠡᠴᠡ ᠬᠡᠷᠬᠢᠨ ᠬᠠᠷᠠᠭᠠ ᠲᠠᠢ ᠪᠣᠯᠣᠭᠰᠠᠨ ᠢ ᠨᠢ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠷᠡ ᠬᠥᠮᠦᠨ᠄ 《ᠲᠡᠷᠡ ᠮᠢᠨᠦ ᠨᠢᠳᠦ ᠶᠢ ᠰᠢᠪᠠᠷ ᠢᠶᠠᠷ ᠰᠢᠪᠠᠭᠰᠠᠨ᠂ ᠪᠢ ᠤᠬᠢᠶᠠᠭᠠᠳ ᠯᠠ ᠬᠠᠷᠠᠭᠠ ᠲᠠᠢ ᠪᠣᠯᠣᠭᠰᠠᠨ》 ᠭᠡᠪᠡ᠃ 16 ᠹᠠᠷᠢᠰᠠᠢᠴᠤᠳ ᠤᠨ ᠵᠠᠷᠢᠮ ᠨᠢ᠄ 《ᠡᠨᠡ ᠬᠥᠮᠦᠨ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠰᠠᠬᠢᠳᠠᠭ ᠦᠭᠡᠢ ᠪᠣᠯᠬᠣᠷ ᠪᠤᠷᠬᠠᠨ ᠠᠴᠠ ᠢᠷᠡᠭᠰᠡᠨ ᠬᠥᠮᠦᠨ ᠪᠢᠰᠢ》 ᠭᠡᠬᠦ ᠳᠦ᠂ ᠪᠠᠰᠠ ᠵᠠᠷᠢᠮ ᠨᠢ᠄ 《ᠨᠢᠭᠦᠯᠲᠦ ᠬᠥᠮᠦᠨ ᠲᠡᠢᠮᠦ ᠰᠢᠳᠢ ᠲᠡᠮᠳᠡᠭ ᠤᠳ ᠢ ᠬᠡᠷᠬᠢᠨ ᠦᠢᠯᠡᠳᠴᠦ ᠴᠢᠳᠠᠬᠤ ᠪᠢᠯᠡ︖》 ᠬᠡᠮᠡᠨ ᠲᠡᠳᠡᠨ ᠦ ᠳᠤᠮᠳᠠ ᠬᠠᠭᠠᠷᠠᠯ ᠭᠠᠷᠴᠠᠢ᠃ 17 ᠲᠡᠢᠮᠦ ᠡᠴᠡ ᠲᠡᠳᠡ ᠰᠣᠬᠣᠷ ᠪᠠᠢᠭᠰᠠᠨ ᠬᠥᠮᠦᠨ ᠳᠦ ᠳᠠᠬᠢᠨ᠄ 《ᠴᠢᠮᠠ ᠳᠤ ᠬᠠᠷᠠᠭᠠ ᠣᠷᠣᠭᠤᠯᠤᠭᠰᠠᠨ ᠲᠡᠷᠡ ᠬᠥᠮᠦᠨ ᠦ ᠲᠤᠬᠠᠢ ᠴᠢ ᠶᠠᠭᠤ ᠬᠡᠯᠡᠬᠦ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠡᠰᠢ ᠦᠵᠡᠭᠦᠯᠦᠭᠴᠢ ᠮᠥᠨ》 ᠭᠡᠪᠡ᠃
18 ᠬᠠᠷᠢᠨ ᠶᠦᠳᠠᠢᠴᠤᠳ ᠲᠡᠭᠦᠨ ᠦ ᠰᠣᠬᠣᠷ ᠪᠠᠢᠵᠤ ᠪᠠᠢᠭᠠᠳ ᠬᠠᠷᠠᠭᠠ ᠲᠠᠢ ᠪᠣᠯᠣᠭᠰᠠᠨ ᠢ ᠢᠲᠡᠭᠡᠭᠡ ᠦᠭᠡᠢ᠂ ᠲᠡᠷᠡ ᠬᠥᠮᠦᠨ ᠦ ᠡᠴᠢᠭᠡ ᠡᠬᠡ ᠶᠢ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠡᠳ 19 ᠡᠴᠢᠭᠡ ᠡᠬᠡ ᠡᠴᠡ ᠨᠢ᠄ 《ᠡᠨᠡ ᠬᠥᠮᠦᠨ ᠲᠠ ᠨᠠᠷ ᠤᠨ ᠬᠦᠦ ᠮᠥᠨ ᠤᠤ︖ ᠰᠣᠬᠣᠷ ᠲᠥᠷᠥᠭᠰᠡᠨ ᠭᠡᠵᠦ ᠲᠠ ᠨᠠᠷ ᠤᠨ ᠶᠠᠷᠢᠳᠠᠭ ᠡᠨᠡ ᠬᠥᠮᠦᠨ ᠬᠡᠷᠬᠢᠨ ᠬᠠᠷᠠᠭᠠ ᠲᠠᠢ ᠪᠣᠯᠣᠭᠰᠠᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 20 ᠡᠴᠢᠭᠡ ᠡᠬᠡ ᠨᠢ᠄ 《ᠡᠨᠡ ᠮᠠᠨ ᠤ ᠬᠦᠦ ᠮᠥᠨ᠂ ᠪᠠᠰᠠ ᠲᠥᠷᠥᠯᠬᠢ ᠰᠣᠬᠣᠷ ᠭᠡᠳᠡᠭ ᠢ ᠪᠢᠳᠡ ᠮᠡᠳᠡᠳᠡᠭ ᠪᠣᠯᠪᠠᠴᠤ 21 ᠬᠠᠷᠢᠨ ᠲᠡᠷᠡ ᠣᠳᠣ ᠶᠠᠭᠠᠬᠢᠭᠠᠳ ᠬᠠᠷᠠᠳᠠᠭ ᠪᠣᠯᠣᠭᠰᠠᠨ ᠢ ᠨᠢ ᠪᠢᠳᠡ ᠮᠡᠳᠡᠬᠦ ᠦᠭᠡᠢ᠂ ᠬᠡᠨ ᠬᠠᠷᠠᠭᠠ ᠣᠷᠣᠭᠤᠯᠵᠤ ᠥᠭᠭᠥᠭᠰᠡᠨ ᠢ ᠴᠤ ᠪᠢᠳᠡ ᠮᠡᠳᠡᠬᠦ ᠦᠭᠡᠢ᠂ ᠥᠪᠡᠷ ᠡᠴᠡ ᠨᠢ ᠠᠰᠠᠭᠤ᠂ ᠲᠡᠷᠡ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠬᠥᠮᠦᠨ᠂ ᠥᠪᠡᠷ ᠢᠶᠡᠨ ᠶᠠᠷᠢᠬᠤ ᠪᠠᠢᠯᠭᠦᠢ》 ᠭᠡᠪᠡ᠃ 22 ᠲᠡᠭᠦᠨ ᠦ ᠡᠴᠢᠭᠡ ᠡᠬᠡ ᠶᠦᠳᠠᠢᠴᠤᠳ ᠠᠴᠠ ᠠᠶᠤᠬᠤ ᠳᠠᠭᠠᠨ ᠡᠢᠨ ᠬᠦ ᠬᠡᠯᠡᠵᠡᠢ᠃ ᠤᠴᠢᠷ ᠨᠢ ᠢᠰᠦ᠋ᠰ ᠢ ᠾᠷᠢᠰᠲ᠋ᠣᠰ ᠮᠥᠨ ᠭᠡᠵᠦ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠰᠡᠨ ᠬᠥᠮᠦᠨ ᠢ ᠬᠤᠷᠠᠯ ᠤᠨ ᠲᠠᠩᠬᠢᠮ ᠠᠴᠠ ᠬᠥᠭᠡᠭᠡᠬᠦ ᠪᠡᠷ ᠶᠦᠳᠠᠢᠴᠤᠳ ᠨᠢᠭᠡᠨᠲᠡ ᠰᠢᠢᠳᠦᠭᠰᠡᠨ ᠪᠠᠢᠵᠠᠢ᠃ 23 ᠲᠡᠢᠮᠦ ᠡᠴᠡ ᠡᠴᠢᠭᠡ ᠡᠬᠡ ᠨᠢ᠄ 《ᠲᠡᠷᠡ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠬᠥᠮᠦᠨ᠂ ᠥᠪᠡᠷ ᠡᠴᠡ ᠨᠢ ᠠᠰᠠᠭᠤ》 ᠭᠡᠵᠦ ᠬᠡᠯᠡᠭᠰᠡᠨ ᠠᠵᠢ᠃
24 ᠹᠠᠷᠢᠰᠠᠢᠴᠤᠳ ᠰᠣᠬᠣᠷ ᠪᠠᠢᠭᠰᠠᠨ ᠬᠥᠮᠦᠨ ᠢ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠳᠠᠭᠤᠳᠠᠭᠠᠳ ᠲᠡᠭᠦᠨ ᠳᠦ᠄ 《ᠪᠤᠷᠬᠠᠨ ᠳᠤ ᠠᠯᠳᠠᠷ ᠰᠤᠤ ᠶᠢ ᠡᠷᠭᠦ᠃ ᠲᠡᠷᠡ ᠬᠥᠮᠦᠨ ᠦ ᠨᠢᠭᠦᠯᠲᠡᠨ ᠭᠡᠳᠡᠭ ᠢ ᠪᠢᠳᠡ ᠮᠡᠳᠡᠨᠡ》 ᠭᠡᠬᠦ ᠳᠦ᠂ 25 ᠲᠡᠷᠡ᠄ 《ᠲᠡᠭᠦᠨ ᠦ ᠨᠢᠭᠦᠯᠲᠡᠨ ᠮᠥᠨ ᠡᠰᠡᠬᠦ ᠶᠢ ᠪᠢ ᠮᠡᠳᠡᠬᠦ ᠦᠭᠡᠢ᠂ ᠰᠣᠬᠣᠷ ᠪᠠᠢᠭᠰᠠᠨ ᠪᠢ ᠬᠠᠷᠠᠭᠠ ᠲᠠᠢ ᠪᠣᠯᠣᠭᠰᠠᠨ ᠢᠶᠠᠨ ᠯᠠ ᠮᠡᠳᠡᠨᠡ》 ᠭᠡᠵᠦ ᠬᠡᠯᠡᠪᠡ᠃ 26 ᠹᠠᠷᠢᠰᠠᠢᠴᠤᠳ᠄ 《ᠲᠡᠷᠡ ᠴᠢᠮᠠ ᠳᠤ ᠶᠠᠭᠤ ᠬᠢᠵᠦ ᠥᠭᠭᠥᠭᠰᠡᠨ ᠪᠤᠢ︖ ᠴᠢᠮᠠ ᠳᠤ ᠶᠠᠭᠠᠬᠢᠨ ᠬᠠᠷᠠᠭᠠ ᠣᠷᠣᠭᠤᠯᠤᠭᠰᠠᠨ ᠪᠤᠢ︖》 ᠭᠡᠵᠦ ᠬᠡᠯᠡᠬᠦ ᠳᠦ᠂ ᠲᠡᠷᠡ᠄ 27 《ᠲᠠ ᠨᠠᠷ ᠲᠤ ᠬᠡᠳᠦᠢᠨᠡᠢ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠲᠠ ᠨᠠᠷ ᠰᠣᠨᠣᠰᠣᠭᠠ ᠦᠭᠡᠢ᠃ ᠶᠠᠭᠤᠨ ᠳᠤ ᠳᠠᠬᠢᠨ ᠰᠣᠨᠣᠰᠬᠤ ᠭᠡᠵᠦ ᠪᠠᠢᠨᠠ︖ ᠲᠠ ᠨᠠᠷ ᠪᠠᠰᠠ ᠲᠡᠭᠦᠨ ᠦ ᠱᠠᠪᠢ ᠪᠣᠯᠬᠤ ᠭᠡᠵᠦ ᠪᠠᠢᠨᠠ ᠤᠤ︖》 ᠭᠡᠪᠡ᠃ 28 ᠹᠠᠷᠢᠰᠠᠢᠴᠤᠳ ᠬᠠᠷᠢᠶᠠᠨ ᠵᠦᠬᠡᠵᠦ᠄ 《ᠴᠢ ᠯᠠ ᠲᠡᠭᠦᠨ ᠦ ᠱᠠᠪᠢ ᠪᠠᠢᠨᠠ᠂ ᠪᠢᠳᠡ ᠪᠣᠯ ᠮᠣᠰᠧ ᠶᠢᠨ ᠱᠠᠪᠢ ᠰᠢᠦ ᠳᠠ᠃ 29 ᠮᠣᠰᠧ ᠳᠤ ᠪᠤᠷᠬᠠᠨ ᠬᠡᠯᠡᠭᠰᠡᠨ ᠢ ᠪᠢᠳᠡ ᠮᠡᠳᠡᠨᠡ᠂ ᠬᠠᠷᠢᠨ ᠡᠨᠡ ᠬᠥᠮᠦᠨ ᠢ ᠪᠣᠯ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠢ ᠨᠢ ᠴᠤ ᠪᠢᠳᠡ ᠮᠡᠳᠡᠬᠦ ᠦᠭᠡᠢ》 ᠭᠡᠬᠦ ᠳᠦ᠂ 30 ᠥᠨᠥᠬᠢ ᠬᠥᠮᠦᠨ᠄ 《ᠡᠨᠡ ᠶᠠᠮᠠᠷ ᠬᠠᠴᠢᠨ ᠪᠤᠢ︖ ᠲᠡᠷᠡ ᠨᠠᠳᠠ ᠳᠤ ᠬᠠᠷᠠᠭᠠ ᠣᠷᠣᠭᠤᠯᠤᠭᠰᠠᠨ ᠪᠠᠢᠲᠠᠯᠠ ᠲᠠ ᠨᠠᠷ ᠲᠡᠭᠦᠨ ᠦ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠢ ᠴᠤ ᠮᠡᠳᠡᠳᠡᠭ ᠦᠭᠡᠢ ᠭᠡᠵᠢ ᠤᠤ︖ 31 ᠪᠤᠷᠬᠠᠨ ᠨᠢᠭᠦᠯᠲᠡᠳ ᠦᠨ ᠬᠢ ᠶᠢ ᠰᠣᠨᠣᠰᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠪᠤᠷᠬᠠᠨ ᠳᠤ ᠰᠦᠰᠦᠭᠯᠡᠵᠦ ᠪᠤᠷᠬᠠᠨ ᠤ ᠰᠠᠨᠠᠭᠠ ᠶᠢ ᠪᠡᠶᠡᠯᠡᠭᠦᠯᠦᠭᠴᠢ ᠶᠢᠨ ᠬᠢ ᠶᠢ ᠰᠣᠨᠣᠰᠳᠠᠭ ᠢ ᠪᠢᠳᠡ ᠮᠡᠳᠡᠨᠡ᠃ 32 ᠶᠢᠷᠲᠢᠨᠴᠦ ᠲᠣᠭᠲᠠᠭᠰᠠᠨ ᠠᠴᠠ ᠨᠠᠰᠢ ᠲᠥᠷᠥᠯᠬᠢ ᠰᠣᠬᠣᠷ ᠲᠤ ᠬᠠᠷᠠᠭᠠ ᠣᠷᠣᠭᠤᠯᠵᠤ ᠥᠭᠭᠥᠭᠰᠡᠨ ᠶᠠᠪᠤᠳᠠᠯ ᠶᠡᠷᠦ ᠡᠴᠡ ᠰᠣᠨᠣᠰᠳᠠᠭᠠ ᠦᠭᠡᠢ᠃ 33 ᠬᠡᠷᠪᠡ ᠡᠨᠡ ᠬᠥᠮᠦᠨ ᠪᠤᠷᠬᠠᠨ ᠠᠴᠠ ᠢᠷᠡᠭᠰᠡᠨ ᠪᠢᠰᠢ ᠪᠣᠯ ᠶᠠᠭᠤ ᠶᠢ ᠴᠤ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ》 ᠭᠡᠵᠦ ᠬᠡᠯᠡᠬᠦ ᠳᠦ᠂ 34 ᠲᠡᠳᠡ᠄ 《ᠴᠢ ᠪᠦᠷᠢᠮᠦᠰᠦᠨ ᠨᠢᠭᠦᠯ ᠳᠣᠲᠣᠷᠠ ᠪᠠᠨ ᠲᠥᠷᠥᠭᠰᠡᠨ ᠪᠠᠢᠲᠠᠯᠠ ᠪᠠᠨ ᠪᠢᠳᠡᠨ ᠢ ᠰᠤᠷᠭᠠᠨᠠ ᠤᠤ︖》 ᠭᠡᠳ ᠲᠡᠭᠦᠨ ᠢ ᠬᠥᠭᠡᠭᠡᠵᠦ ᠭᠠᠷᠭᠠᠪᠠ᠃
ᠢᠰᠦ᠋ᠰ ᠪᠤᠷᠬᠠᠨ ᠭᠡᠳᠡᠭ ᠢᠶᠡᠨ ᠮᠡᠳᠡᠭᠦᠯᠦᠭᠰᠡᠨ ᠨᠢ
35 ᠲᠡᠷᠡ ᠬᠥᠮᠦᠨ ᠢ ᠬᠥᠭᠡᠭᠡᠨ ᠭᠠᠷᠭᠠᠭᠰᠠᠨ ᠢ ᠢᠰᠦ᠋ᠰ ᠰᠣᠨᠣᠰᠣᠭᠠᠳ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ᠄ 《ᠴᠢ ᠬᠥᠮᠦᠨ ᠦ ᠬᠦᠦ ᠳᠦ ᠢᠲᠡᠭᠡᠵᠦ ᠪᠠᠢᠨᠠ ᠤᠤ︖》 ᠭᠡᠰᠡᠨ ᠳᠦ᠂ 36 ᠲᠡᠷᠡ ᠬᠠᠷᠢᠭᠤ ᠳᠤᠨᠢ᠄ 《ᠡᠵᠡᠨ ᠡ᠂ ᠲᠡᠷᠡ ᠨᠢ ᠬᠡᠨ ᠪᠤᠢ︖ ᠪᠢ ᠲᠡᠭᠦᠨ ᠳᠦ ᠢᠲᠡᠭᠡᠶᠡ》 ᠭᠡᠪᠡ᠃ 37 ᠢᠰᠦ᠋ᠰ᠄ 《ᠴᠢ ᠲᠡᠭᠦᠨ ᠢ ᠬᠠᠷᠠᠯᠠ᠂ ᠣᠳᠣ ᠴᠢᠮᠠ ᠲᠠᠢ ᠶᠠᠷᠢᠵᠤ ᠪᠠᠢᠭᠠ ᠨᠢ ᠲᠡᠷᠡ ᠮᠥᠨ》 ᠭᠡᠰᠡᠨ ᠳᠦ᠂ 38 ᠲᠡᠷᠡ᠄ 《ᠡᠵᠡᠨ ᠡ᠂ ᠪᠢ ᠢᠲᠡᠭᠡᠵᠦ ᠪᠠᠢᠨᠠ》 ᠭᠡᠳ ᠢᠰᠦ᠋ᠰ ᠲᠤ ᠮᠥᠷᠭᠥᠪᠡ᠃ 39 ᠢᠰᠦ᠋ᠰ᠄ 《ᠪᠢ ᠡᠨᠡ ᠶᠢᠷᠲᠢᠨᠴᠦ ᠳᠦ ᠰᠢᠭᠦᠬᠦ ᠶᠢᠨ ᠲᠥᠯᠥᠭᠡ ᠢᠷᠡᠭᠰᠡᠨ ᠶᠤᠮ᠂ ᠡᠢᠨ ᠬᠦ ᠬᠠᠷᠠᠳᠠᠭ ᠦᠭᠡᠢ ᠨᠢ ᠬᠠᠷᠠᠵᠤ᠂ ᠬᠠᠷᠠᠳᠠᠭ ᠨᠢ ᠰᠣᠬᠣᠷ ᠪᠣᠯᠣᠨᠠ》 ᠭᠡᠯᠡ᠃ 40 ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠯᠴᠠᠭᠰᠠᠨ ᠹᠠᠷᠢᠰᠠᠢᠴᠤᠳ ᠤᠨ ᠵᠠᠷᠢᠮ ᠨᠢ ᠡᠭᠦᠨ ᠢ ᠰᠣᠨᠣᠰᠣᠭᠠᠳ᠄ 《ᠪᠢᠳᠡ ᠪᠠᠰᠠ ᠰᠣᠬᠣᠷ ᠤᠤ︖》 ᠭᠡᠰᠡᠨ ᠳᠦ᠂ 41 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠬᠡᠷᠪᠡ ᠲᠠ ᠨᠠᠷ ᠰᠣᠬᠣᠷ ᠪᠠᠢᠭᠰᠠᠨ ᠪᠣᠯ ᠨᠢᠭᠦᠯ ᠦᠭᠡᠢ ᠪᠠᠢᠬᠤ ᠰᠠᠨ᠃ ᠬᠠᠷᠢᠨ ᠣᠳᠣ 〈ᠪᠢᠳᠡ ᠬᠠᠷᠠᠳᠠᠭ〉 ᠭᠡᠵᠦ ᠪᠠᠢᠭᠠ ᠪᠣᠯᠬᠣᠷ ᠨᠢᠭᠦᠯ ᠴᠢᠨᠢ ᠮᠥᠨ ᠪᠠᠢᠭᠰᠠᠭᠠᠷ ᠪᠠᠢᠨᠠ᠃