ᠶᠣᠬᠠᠨ ᠭᠤᠷᠪᠠ
ᠳᠠᠬᠢᠨ ᠲᠥᠷᠥᠯᠲᠡ
1 ᠨᠢᠺᠣᠳᠧᠮ ᠭᠡᠭᠴᠢ ᠹᠠᠷᠢᠰᠠᠢ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠪᠣᠯ ᠶᠦᠳᠠᠢᠴᠤᠳ ᠤᠨ ᠨᠢᠭᠡᠨ ᠨᠣᠶᠠᠨ ᠶᠤᠮ᠃ 2 ᠲᠡᠷᠡ ᠬᠥᠮᠦᠨ ᠰᠥᠨᠢ ᠪᠠᠷ ᠢᠰᠦ᠋ᠰ ᠲᠤ ᠢᠷᠡᠭᠡᠳ᠄ 《ᠪᠠᠭᠰᠢ ᠡ᠂ ᠲᠠᠨ ᠢ ᠪᠤᠷᠬᠠᠨ ᠠᠴᠠ ᠢᠷᠡᠭᠰᠡᠨ ᠪᠠᠭᠰᠢ ᠭᠡᠳᠡᠭ ᠢ ᠪᠢᠳᠡ ᠮᠡᠳᠡᠨᠡ᠃ ᠪᠤᠷᠬᠠᠨ ᠬᠠᠮᠲᠤ ᠪᠠᠢᠬᠤ ᠦᠭᠡᠢ ᠪᠣᠯ ᠲᠠᠨ ᠤ ᠦᠢᠯᠡᠳᠳᠡᠭ ᠲᠡᠳᠡᠭᠡᠷ ᠰᠢᠳᠢ ᠲᠡᠮᠳᠡᠭ ᠢ ᠬᠡᠨ ᠴᠤ ᠦᠢᠯᠡᠳᠴᠦ ᠴᠢᠳᠠᠬᠤ ᠦᠭᠡᠢ ᠶᠤᠮ》 ᠭᠡᠪᠡ᠃ 3 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠴᠢᠮᠠ ᠳᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠬᠥᠮᠦᠨ ᠳᠠᠬᠢᠵᠤ ᠲᠥᠷᠥᠬᠦ ᠦᠭᠡᠢ ᠪᠠᠷ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠦᠵᠡᠵᠦ ᠴᠢᠳᠠᠬᠤ ᠦᠭᠡᠢ》 ᠭᠡᠬᠦ ᠳᠦ᠂ 4 ᠨᠢᠺᠣᠳᠧᠮ ᠲᠡᠭᠦᠨ ᠳᠦ᠄ 《ᠨᠢᠭᠡᠨᠲᠡ ᠥᠲᠡᠯᠦᠭᠰᠡᠨ ᠬᠥᠮᠦᠨ ᠬᠡᠷᠬᠢᠨ ᠲᠥᠷᠥᠬᠦ ᠶᠤᠮ ᠪᠤᠢ︖ ᠬᠥᠮᠦᠨ ᠡᠬᠡ ᠶᠢᠨ ᠢᠶᠠᠨ ᠬᠡᠪᠡᠯᠢ ᠳᠤ ᠬᠣᠶᠠᠷᠲᠠ ᠣᠷᠣᠵᠤ ᠲᠥᠷᠥᠵᠦ ᠴᠢᠳᠠᠨᠠ ᠭᠡᠵᠢ ᠤᠤ︖》 ᠭᠡᠪᠡ᠃ 5 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠴᠢᠮᠠ ᠳᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠬᠥᠮᠦᠨ ᠤᠰᠤ ᠪᠠ ᠠᠷᠢᠭᠤᠨ ᠰᠦᠨᠡᠰᠦᠨ ᠡᠴᠡ ᠲᠥᠷᠥᠬᠦ ᠦᠭᠡᠢ ᠪᠠᠷ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ᠃ 6 ᠮᠢᠬᠠᠨ ᠪᠡᠶᠡ ᠡᠴᠡ ᠲᠥᠷᠥᠭᠰᠡᠨ ᠨᠢ ᠮᠢᠬᠠᠨ ᠪᠡᠶᠡ᠂ ᠰᠦᠨᠡᠰᠦᠨ 7 ᠡᠴᠡ ᠲᠥᠷᠥᠭᠰᠡᠨ ᠨᠢ ᠰᠦᠨᠡᠰᠦ ᠮᠥᠨ᠃ 7 〈ᠲᠠ ᠨᠠᠷ ᠳᠠᠬᠢᠨ ᠲᠥᠷᠥᠬᠦ ᠶᠣᠰᠣᠲᠠᠢ〉 ᠭᠡᠵᠦ ᠬᠡᠯᠡᠭᠰᠡᠨ ᠢ ᠮᠢᠨᠢ ᠪᠦᠦ ᠭᠠᠢᠬᠠᠭᠠᠷᠠᠢ᠃ 8 ᠰᠠᠯᠬᠢ 8 ᠳᠤᠷᠠ ᠪᠠᠷ ᠢᠶᠠᠨ ᠰᠠᠯᠬᠢᠯᠠᠳᠠᠭ᠂ ᠴᠢ ᠳᠠᠭᠤ ᠶᠢ ᠨᠢ ᠰᠣᠨᠣᠰᠪᠠᠴᠤ ᠬᠠᠮᠢᠭᠠ ᠠᠴᠠ ᠢᠷᠡᠵᠦ᠂ ᠬᠠᠮᠢᠭᠠᠰᠢ ᠪᠠᠨ ᠣᠳᠳᠠᠭ ᠢ ᠨᠢ ᠮᠡᠳᠡᠳᠡᠭ ᠦᠭᠡᠢ᠃ ᠠᠷᠢᠭᠤᠨ ᠰᠦᠨᠡᠰᠦᠨ ᠡᠴᠡ ᠲᠥᠷᠥᠭᠰᠡᠨ ᠪᠦᠬᠦᠨ ᠡᠭᠦᠨ ᠲᠡᠢ ᠠᠳᠠᠯᠢ ᠶᠤᠮ》 ᠭᠡᠵᠦ ᠬᠡᠯᠡᠪᠡ᠃ 9 ᠨᠢᠺᠣᠳᠧᠮ ᠲᠡᠭᠦᠨ ᠡᠴᠡ᠄ 《ᠡᠳᠡᠭᠡᠷ ᠵᠦᠢᠯ ᠶᠠᠭᠠᠬᠢᠨ ᠪᠠᠢᠵᠤ ᠪᠣᠯᠬᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 10 ᠢᠰᠦ᠋ᠰ᠄ 《ᠴᠢ ᠢᠰᠷᠧᠯ ᠤᠨ ᠪᠠᠭᠰᠢ ᠪᠠᠢᠲᠠᠯᠠ ᠪᠠᠨ ᠡᠳᠡᠭᠡᠷ ᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ ᠤᠤ︖
11 ᠴᠢᠮᠠ ᠳᠤ ᠦᠨᠡᠬᠡᠷ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠪᠢᠳᠡ ᠮᠡᠳᠡᠭᠰᠡᠨ ᠢᠶᠡᠨ ᠶᠠᠷᠢᠵᠤ᠂ ᠦᠵᠡᠭᠰᠡᠨ ᠢᠶᠡᠨ ᠭᠡᠷᠡᠴᠢᠯᠡᠵᠦ ᠪᠠᠢᠬᠤ ᠳᠤ᠂ ᠲᠠ ᠨᠠᠷ ᠪᠢᠳᠡᠨ ᠦ ᠭᠡᠷᠡᠴᠢᠯᠡᠯ ᠢ ᠬᠦᠯᠢᠶᠡᠨ ᠠᠪᠳᠠᠭ ᠦᠭᠡᠢ᠃ 12 ᠪᠢ ᠭᠠᠵᠠᠷ ᠤᠨ ᠶᠠᠪᠤᠳᠠᠯ ᠢ ᠶᠠᠷᠢᠭᠰᠠᠨ ᠴᠤ ᠲᠠ ᠨᠠᠷ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠬᠤ ᠳᠤ᠂ ᠲᠩᠷᠢ ᠶᠢᠨ ᠶᠠᠪᠤᠳᠠᠯ ᠢ ᠶᠠᠷᠢᠪᠠᠯ ᠶᠠᠭᠠᠬᠢᠨ ᠢᠲᠡᠭᠡᠬᠦ ᠪᠤᠢ︖ 13 ᠲᠩᠷᠢ ᠡᠴᠡ ᠪᠠᠭᠤᠭᠰᠠᠨ 〈ᠬᠥᠮᠦᠨ ᠦ ᠬᠦᠦ〉 ᠡᠴᠡ ᠥᠭᠡᠷᠡ ᠬᠡᠨ ᠴᠤ ᠲᠩᠷᠢ ᠳᠤ ᠭᠠᠷᠴᠤ ᠪᠠᠢᠭᠠ ᠦᠭᠡᠢ᠃ 14 ᠮᠣᠰᠧ ᠴᠥᠯ ᠳᠤ ᠮᠣᠭᠠᠢ ᠶᠢ ᠡᠷᠭᠦᠭᠰᠡᠨᠴᠢᠯᠡᠨ ᠬᠥᠮᠦᠨ ᠦ ᠬᠦᠦ ᠴᠤ ᠡᠷᠭᠦᠭᠳᠡᠬᠦ ᠶᠣᠰᠣᠲᠠᠢ᠃ 15 ᠡᠢᠨ ᠬᠦ ᠲᠡᠭᠦᠨ ᠢ ᠢᠲᠡᠭᠡᠭᠴᠢ ᠪᠦᠬᠦᠨ ᠮᠥᠩᠬᠡ ᠠᠮᠢ ᠲᠠᠢ ᠪᠣᠯᠣᠨᠠ᠃
16 ᠪᠤᠷᠬᠠᠨ ᠶᠢᠷᠲᠢᠨᠴᠦ ᠶᠢ ᠬᠠᠢᠷᠠᠯᠠᠭᠠᠳ ᠴᠣᠷ ᠤᠨ ᠭᠠᠭᠴᠠ ᠬᠦᠦ ᠪᠡᠨ ᠥᠭᠭᠥᠭᠰᠡᠨ᠂ ᠡᠢᠨ ᠬᠦ ᠲᠡᠭᠦᠨ ᠢ ᠢᠲᠡᠭᠡᠭᠴᠢ ᠪᠦᠬᠦᠨ ᠮᠥᠬᠥᠬᠦ ᠦᠭᠡᠢ᠂ ᠬᠠᠷᠢᠨ ᠮᠥᠩᠬᠡ ᠠᠮᠢ ᠲᠠᠢ ᠪᠠᠢᠬᠤ ᠪᠣᠯᠣᠯᠠ᠃
17 ᠪᠤᠷᠬᠠᠨ ᠬᠦᠦ ᠪᠡᠨ ᠶᠢᠷᠲᠢᠨᠴᠦ ᠳᠦ ᠢᠯᠡᠭᠡᠭᠰᠡᠨ ᠨᠢ ᠶᠢᠷᠲᠢᠨᠴᠦ ᠶᠢ ᠶᠠᠯᠠᠯᠠᠬᠤ ᠶᠢᠨ ᠲᠤᠯᠠᠳᠠ ᠪᠢᠰᠢ᠂ ᠬᠠᠷᠢᠨ ᠶᠢᠷᠲᠢᠨᠴᠦ ᠶᠢ ᠲᠡᠭᠦᠨ ᠢᠶᠡᠷ ᠠᠪᠤᠷᠠᠭᠤᠯᠬᠤ ᠶᠢᠨ ᠲᠥᠯᠥᠭᠡ ᠶᠤᠮ᠃ 18 ᠲᠡᠭᠦᠨ ᠢ ᠢᠲᠡᠭᠡᠭᠴᠢ ᠨᠢ ᠶᠠᠯᠠᠯᠠᠭᠳᠠᠬᠤ ᠦᠭᠡᠢ᠃ ᠬᠠᠷᠢᠨ ᠦᠯᠦ ᠢᠲᠡᠭᠡᠭᠴᠢ ᠨᠢ ᠪᠤᠷᠬᠠᠨ ᠤ ᠴᠣᠷ ᠤᠨ ᠭᠠᠭᠴᠠ ᠬᠦᠦ ᠶᠢᠨ ᠨᠡᠷᠡ ᠶᠢ ᠢᠲᠡᠭᠡᠭᠡ ᠦᠭᠡᠢ ᠤᠴᠢᠷ ᠠᠴᠠ ᠨᠢᠭᠡᠨᠲᠡ ᠶᠠᠯᠠᠯᠠᠭᠳᠠᠭᠰᠠᠨ᠃ 19 ᠭᠡᠷᠡᠯ ᠶᠢᠷᠲᠢᠨᠴᠦ ᠳᠦ ᠢᠷᠡᠭᠰᠡᠨ ᠪᠠᠢᠲᠠᠯᠠ ᠬᠥᠮᠦᠰ ᠦᠢᠯᠡ ᠶᠠᠪᠤᠳᠠᠯ ᠤᠨ ᠢᠶᠠᠨ ᠮᠠᠭᠤ ᠠᠴᠠ ᠪᠣᠯᠵᠤ ᠬᠠᠷᠠᠩ᠋ᠭᠤᠢ ᠶᠢ ᠭᠡᠷᠡᠯ ᠡᠴᠡ ᠢᠯᠡᠭᠦᠦ ᠬᠠᠢᠷᠠᠯᠠᠭᠰᠠᠨ ᠨᠢ ᠲᠡᠷᠡ ᠬᠦ ᠶᠠᠯᠠ ᠪᠢᠯᠡ᠃ 20 ᠮᠠᠭᠤ ᠶᠢ ᠦᠢᠯᠡᠳᠦᠭᠴᠢ ᠪᠣᠯᠭᠠᠨ ᠭᠡᠷᠡᠯ ᠢ ᠦᠵᠡᠨ ᠶᠠᠳᠠᠵᠤ᠂ ᠦᠢᠯᠡ ᠶᠠᠪᠤᠳᠠᠯ ᠮᠢᠨᠢ ᠢᠯᠡᠷᠡᠴᠢᠬᠡᠬᠦ ᠪᠤᠢ ᠭᠡᠳ ᠭᠡᠷᠡᠯ ᠤᠷᠤᠭᠤ ᠢᠷᠡᠳᠡᠭ ᠦᠭᠡᠢ ᠪᠣᠯ᠂ 21 ᠦᠨᠡᠨ ᠢ ᠦᠢᠯᠡᠳᠦᠭᠴᠢ ᠨᠢ ᠪᠤᠷᠬᠠᠨ ᠤ ᠳᠣᠲᠣᠷᠠ ᠭᠦᠢᠴᠡᠳᠬᠡᠭᠳᠡᠭᠰᠡᠨ ᠦᠢᠯᠡ ᠶᠠᠪᠤᠳᠠᠯ ᠮᠢᠨᠢ ᠢᠯᠡᠷᠡᠭᠡᠰᠡᠢ ᠭᠡᠳ ᠭᠡᠷᠡᠯ ᠤᠷᠤᠭᠤ ᠢᠷᠡᠳᠡᠭ ᠶᠤᠮ》 ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠶᠣᠬᠠᠨ ᠤ ᠰᠡᠭᠦᠯᠴᠢ ᠶᠢᠨ ᠭᠡᠷᠡᠴᠢᠯᠡᠯ
22 ᠡᠭᠦᠨ ᠦ ᠳᠠᠷᠠᠭᠠ᠂ ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠶᠦᠳᠠᠢ ᠨᠤᠲᠤᠭ ᠲᠤ ᠣᠴᠢᠭᠠᠳ ᠲᠡᠳᠡᠨ ᠲᠡᠢ ᠬᠠᠮᠲᠤ ᠲᠡᠨᠳᠡ ᠪᠠᠢᠵᠤ᠂ ᠤᠬᠢᠶᠠᠯ ᠬᠦᠷᠲᠡᠭᠡᠵᠦ ᠪᠠᠢᠯᠠ᠃ 23 ᠶᠣᠬᠠᠨ ᠴᠤ ᠰᠠᠯᠢᠮ ᠤᠨ ᠣᠢᠷᠠᠯᠴᠠᠭᠠᠬᠢ ᠠᠢᠨᠣᠨ ᠳᠤ ᠤᠬᠢᠶᠠᠯ ᠬᠦᠷᠲᠡᠭᠡᠵᠦ ᠪᠠᠢᠪᠠ᠃ ᠤᠴᠢᠷ ᠨᠢ ᠲᠡᠨᠳᠡ ᠤᠰᠤ ᠶᠡᠬᠡᠲᠡᠢ ᠠᠵᠢ᠃ ᠡᠢᠨ ᠬᠦ ᠬᠥᠮᠦᠰ ᠢᠷᠡᠵᠡᠭᠡᠨ ᠤᠬᠢᠶᠠᠯ ᠬᠦᠷᠲᠡᠵᠦ ᠪᠠᠢᠵᠠᠢ᠃ 24 (ᠶᠣᠬᠠᠨ ᠬᠠᠷᠠᠬᠠᠨ ᠱᠣᠷᠣᠩ ᠳᠤ ᠬᠣᠷᠢᠭᠳᠠᠭᠠ ᠦᠭᠡᠢ ᠪᠠᠢᠪᠠ᠃)
25 ᠶᠣᠬᠠᠨ ᠤ ᠱᠠᠪᠢ ᠨᠠᠷ ᠪᠣᠯᠣᠨ ᠨᠢᠭᠡᠨ ᠶᠦᠳᠠᠢ ᠬᠥᠮᠦᠨ ᠦ ᠬᠣᠭᠣᠷᠣᠨᠳᠣ ᠠᠷᠢᠭᠤᠳᠬᠠᠯ ᠤᠨ ᠲᠠᠯᠠ ᠪᠠᠷ ᠮᠠᠷᠭᠤᠭᠠᠨ ᠪᠣᠯᠵᠠᠢ᠃ 26 ᠲᠡᠳᠡ ᠶᠣᠬᠠᠨ ᠳᠤ ᠬᠦᠷᠴᠦ᠄ 《ᠪᠠᠭᠰᠢ ᠡ᠂ ᠬᠠᠷᠠᠭᠠᠴᠢ︕ ᠶᠣᠷᠳᠠᠨ ᠭᠣᠣᠯ ᠤᠨ ᠲᠡᠷᠲᠡᠭᠡ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠨ᠂ ᠲᠠᠨ ᠤ ᠭᠡᠷᠡᠴᠢᠯᠡᠵᠦ ᠪᠠᠢᠭᠰᠠᠨ ᠲᠡᠷᠡ ᠬᠥᠮᠦᠨ ᠤᠬᠢᠶᠠᠯ ᠬᠦᠷᠲᠡᠭᠡᠵᠦ ᠪᠠᠢᠭᠠ᠃ ᠪᠦᠬᠦ ᠬᠥᠮᠦᠨ ᠲᠡᠰᠢ ᠣᠴᠢᠵᠤ ᠪᠠᠢᠨᠠ》 ᠭᠡᠰᠡᠨ ᠳᠦ᠂ 27 ᠶᠣᠬᠠᠨ᠄ 《ᠬᠡᠷᠪᠡ ᠲᠩᠷᠢ ᠡᠴᠡ ᠰᠣᠶᠣᠷᠬᠠᠬᠤ ᠦᠭᠡᠢ ᠪᠣᠯ ᠬᠥᠮᠦᠨ ᠶᠠᠭᠤ ᠴᠤ ᠬᠦᠷᠲᠡᠵᠦ ᠴᠢᠳᠠᠬᠤ ᠦᠭᠡᠢ᠃ 28 〈ᠪᠢ ᠾᠷᠢᠰᠲ᠋ᠣᠰ ᠪᠢᠰᠢ᠂ ᠲᠡᠭᠦᠨ ᠡᠴᠡ ᠤᠷᠢᠳᠠ ᠢᠯᠡᠭᠡᠭᠳᠡᠭᠰᠡᠨ ᠬᠥᠮᠦᠨ〉 ᠭᠡᠵᠦ ᠬᠡᠯᠡᠭᠰᠡᠨ ᠢ ᠮᠢᠨᠢ ᠭᠡᠷᠡᠴᠢᠯᠡᠭᠴᠢ ᠨᠢ ᠲᠠ ᠨᠠᠷ ᠪᠢᠯᠡ᠃ 29 ᠰᠢᠨᠡ ᠪᠡᠷᠢ ᠨᠢ ᠰᠢᠨᠡ ᠬᠦᠷᠭᠡᠨ ᠦ ᠬᠢ᠃ ᠰᠢᠨᠡ ᠬᠦᠷᠭᠡᠨ ᠢ ᠬᠦᠯᠢᠶᠡᠨ ᠵᠣᠭᠰᠣᠭᠴᠢ ᠨᠠᠢᠵᠢ ᠨᠢ ᠬᠦᠷᠭᠡᠨ ᠦ ᠳᠠᠭᠤ ᠶᠢ ᠰᠣᠨᠣᠰᠪᠠᠯ ᠶᠡᠬᠡᠳᠡ ᠪᠠᠶᠠᠰᠳᠠᠭ ᠲᠠᠢ ᠠᠳᠠᠯᠢᠬᠠᠨ ᠪᠢ ᠴᠤ ᠪᠠᠶᠠᠷ ᠬᠥᠷ ᠢᠶᠡᠷ ᠳᠦᠭᠦᠷᠡᠩ ᠪᠠᠢᠨᠠ᠃ 30 ᠲᠡᠷᠡ ᠮᠠᠨᠳᠤᠵᠤ ᠪᠢ ᠪᠠᠭᠤᠷᠠᠬᠤ ᠶᠣᠰᠣᠲᠠᠢ》 ᠭᠡᠪᠡ᠃
31 《ᠳᠡᠭᠡᠷᠡ ᠡᠴᠡ ᠢᠷᠡᠭᠴᠢ ᠨᠢ ᠪᠦᠬᠦᠨ ᠦ ᠳᠡᠭᠡᠷᠡ ᠪᠠᠢᠳᠠᠭ᠃ ᠭᠠᠵᠠᠷ ᠠᠴᠠ ᠢᠷᠡᠭᠴᠢ ᠨᠢ ᠭᠠᠵᠠᠷ ᠤᠨ ᠬᠢ ᠪᠥᠭᠡᠳ ᠭᠠᠵᠠᠷ ᠳᠡᠯᠡᠬᠡᠢ ᠶᠢᠨ ᠬᠢ ᠶᠢ ᠯᠠ ᠶᠠᠷᠢᠳᠠᠭ᠃ ᠲᠩᠷᠢ ᠡᠴᠡ ᠢᠷᠡᠭᠴᠢ ᠨᠢ ᠪᠦᠬᠦᠨ ᠦ ᠳᠡᠭᠡᠷᠡ ᠪᠠᠢᠳᠠᠭ ᠪᠥᠭᠡᠳ 32 ᠦᠵᠡᠭᠰᠡᠨ ᠰᠣᠨᠣᠰᠣᠭᠰᠠᠨ ᠢᠶᠠᠨ ᠭᠡᠷᠡᠴᠢᠯᠡᠳᠡᠭ ᠪᠣᠯᠪᠠᠴᠤ ᠲᠡᠭᠦᠨ ᠦ ᠭᠡᠷᠡᠴᠢᠯᠡᠯ ᠢ ᠬᠡᠨ ᠴᠤ ᠬᠦᠯᠢᠶᠡᠨ ᠠᠪᠳᠠᠭ ᠦᠭᠡᠢ᠃ 33 ᠲᠡᠭᠦᠨ ᠦ ᠭᠡᠷᠡᠴᠢᠯᠡᠯ ᠢ ᠬᠦᠯᠢᠶᠡᠨ ᠠᠪᠤᠭᠴᠢ ᠨᠢ ᠪᠤᠷᠬᠠᠨ ᠢ ᠦᠨᠡᠨ ᠭᠡᠵᠦ ᠨᠣᠲᠠᠯᠠᠭᠰᠠᠨ ᠶᠤᠮ᠃ 34 ᠪᠤᠷᠬᠠᠨ ᠤ ᠢᠯᠡᠭᠡᠭᠰᠡᠨ ᠨᠢᠭᠡᠨ ᠨᠢ ᠪᠤᠷᠬᠠᠨ ᠤ ᠦᠭᠡ ᠶᠢ ᠬᠡᠯᠡᠳᠡᠭ᠃ ᠤᠴᠢᠷ ᠨᠢ ᠪᠤᠷᠬᠠᠨ ᠲᠡᠭᠦᠨ ᠳᠦ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠪᠠᠷ ᠥᠭᠳᠡᠭ᠃ 35 ᠡᠴᠢᠭᠡ ᠨᠢ ᠬᠦᠦ ᠪᠡᠨ ᠬᠠᠢᠷᠠᠯᠠᠨ ᠲᠡᠭᠦᠨ ᠦ ᠭᠠᠷ ᠲᠤ ᠠᠯᠢᠪᠠ ᠪᠠᠨ ᠥᠭᠭᠥᠭᠰᠡᠨ ᠶᠤᠮ᠃ 36 ᠬᠦᠦ ᠶᠢ ᠨᠢ ᠢᠲᠡᠭᠡᠭᠴᠢ ᠨᠢ ᠮᠥᠩᠬᠡ ᠠᠮᠢ ᠲᠠᠢ᠃ ᠬᠦᠦ ᠳᠦ ᠦᠯᠦ ᠢᠲᠡᠭᠡᠭᠴᠢ ᠨᠢ ᠮᠥᠩᠬᠡ ᠠᠮᠢ ᠶᠢ ᠦᠵᠡᠬᠦ ᠦᠭᠡᠢ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠬᠢᠯᠢᠩ ᠲᠡᠭᠦᠨ ᠦ ᠳᠡᠭᠡᠷᠡ ᠪᠠᠢᠳᠠᠭ᠃》