ᠬᠠᠭᠠᠳ ᠤᠨ ᠳᠡᠭᠡᠳᠦ ᠬᠣᠶᠠᠷ
ᠳ᠋ᠠᠸᠢᠳ᠋ ᠤᠨ ᠰᠣᠯᠣᠮᠣᠨ ᠳᠤ ᠥᠭᠭᠥᠭᠰᠡᠨ ᠵᠠᠬᠢᠶᠠᠰᠤ
1 ᠳ᠋ᠠᠸᠢᠳ᠋ ᠥᠭᠡᠳᠡ ᠪᠣᠯᠬᠤ ᠡᠳᠦᠷ ᠨᠢ ᠣᠢᠷᠠᠲᠤᠬᠤ ᠳᠤ᠂ ᠬᠦᠦ ᠰᠣᠯᠣᠮᠣᠨ ᠳᠠᠭᠠᠨ ᠵᠠᠬᠢᠨ᠄ 2 《ᠪᠢ ᠬᠣᠷᠸᠠ ᠶᠢᠨ ᠵᠠᠮ ᠢᠶᠠᠷ ᠣᠳᠬᠤ ᠭᠡᠵᠦ ᠪᠠᠢᠨᠠ᠃ ᠴᠢ ᠬᠦᠴᠦᠲᠡᠢ ᠪᠠᠢᠵᠤ᠂ ᠡᠷᠡ ᠬᠥᠮᠦᠨ ᠪᠣᠯ᠃ 3 ᠶᠣᠬᠣᠸᠠ ᠪᠤᠷᠬᠠᠨ ᠤ ᠰᠠᠬᠢᠭᠤᠯᠤᠭᠰᠠᠨ ᠢ ᠰᠠᠬᠢᠨ ᠲᠡᠭᠦᠨ ᠦ ᠵᠠᠮ ᠢᠶᠠᠷ ᠶᠠᠪᠤᠵᠤ᠂ ᠲᠡᠭᠦᠨ ᠦ ᠲᠣᠭᠲᠠᠭᠠᠯ ᠪᠣᠯᠣᠨ ᠲᠤᠰᠢᠶᠠᠯ᠂ ᠵᠢᠷᠤᠮ ᠪᠣᠯᠣᠨ ᠵᠠᠷᠴᠢᠮ ᠢ ᠮᠣᠰᠧ ᠶᠢᠨ ᠬᠠᠤᠯᠢ ᠳᠤ ᠪᠢᠴᠢᠭᠳᠡᠭᠰᠡᠨ ᠶᠣᠰᠣᠭᠠᠷ ᠰᠠᠬᠢ᠃ ᠲᠡᠭᠡᠪᠡᠯ ᠴᠢ ᠶᠠᠭᠤ ᠬᠢᠭᠰᠡᠨ ᠴᠤ᠂ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠴᠤ ᠠᠮᠵᠢᠯᠲᠠ ᠣᠯᠬᠤ ᠪᠠ 4 ᠶᠣᠬᠣᠸᠠ ᠴᠤ᠄ 〈ᠬᠡᠷᠪᠡ ᠴᠢᠨᠦ ᠦᠷᠡ ᠤᠳᠤᠮ ᠦᠢᠯᠡ ᠶᠠᠪᠤᠳᠠᠯ ᠳᠠᠭᠠᠨ ᠪᠣᠯᠭᠣᠮᠵᠢ ᠲᠠᠢ᠂ ᠪᠦᠬᠦ ᠵᠢᠷᠦᠬᠡ᠂ ᠪᠦᠬᠦ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠮᠢᠨᠦ ᠡᠮᠦᠨᠡ ᠦᠨᠡᠨ ᠦ ᠳᠣᠲᠣᠷᠠ ᠶᠠᠪᠤᠪᠠᠯ ᠢᠰᠷᠧᠯ ᠤᠨ ᠰᠡᠨᠲᠢ ᠳᠤ ᠵᠠᠯᠠᠷᠠᠬᠤ ᠬᠥᠮᠦᠨ ᠴᠢᠮᠠ ᠠᠴᠠ ᠬᠣᠢᠰᠢ ᠲᠠᠰᠤᠷᠠᠬᠤ ᠦᠭᠡᠢ〉 ᠭᠡᠵᠦ ᠨᠠᠳᠠ ᠳᠤ ᠠᠮᠠᠯᠠᠭᠰᠠᠨ ᠦᠭᠡ ᠪᠡᠨ ᠪᠡᠶᠡᠯᠡᠭᠦᠯᠦᠨᠡ᠃
5 ᠬᠠᠷᠢᠨ ᠽᠧᠷᠣᠢᠶᠠ ᠶᠢᠨ ᠬᠦᠦ ᠶᠣᠶᠠᠪ ᠤᠨ ᠲᠤᠬᠠᠢ ᠭᠡᠪᠡᠯ᠂ ᠴᠢ ᠪᠠᠰᠠ ᠲᠡᠭᠦᠨ ᠦ ᠨᠠᠳᠠ ᠳᠤ ᠶᠠᠭᠤ ᠬᠢᠭᠰᠡᠨ᠂ ᠮᠥᠨ ᠢᠰᠷᠧᠯ ᠤᠨ ᠴᠡᠷᠢᠭ ᠤᠨ ᠬᠣᠶᠠᠷ ᠵᠠᠩᠵᠤᠨ ᠨᠧᠷ ᠤᠨ ᠬᠦᠦ ᠠᠪᠨᠧᠷ᠂ ᠶᠧᠲ᠋ᠧᠷ ᠤᠨ ᠬᠦᠦ ᠠᠮᠠᠰᠠ ᠳᠤ ᠶᠠᠭᠤ ᠬᠢᠭᠰᠡᠨ ᠢ ᠨᠢ ᠮᠡᠳᠡᠨᠡ᠂ ᠶᠣᠶᠠᠪ ᠠᠮᠤᠷ ᠲᠠᠢᠪᠤᠩ ᠦᠶᠡ ᠳᠦ᠂ ᠳᠠᠢᠨ ᠤ ᠦᠶᠡ ᠳᠦ ᠮᠡᠲᠦ ᠪᠡᠷ ᠲᠡᠳᠡᠨ ᠢ ᠠᠯᠠᠵᠤ ᠴᠢᠰᠤ ᠤᠷᠤᠰᠬᠠᠨ᠂ ᠲᠡᠷᠡ ᠴᠢᠰᠤ ᠶᠢ ᠪᠡᠯᠬᠡᠭᠦᠰᠦᠨ ᠳᠠᠬᠢ ᠪᠦᠰᠡ᠂ ᠬᠥᠯ ᠳᠠᠬᠢ ᠱᠠᠬᠠᠢ ᠳᠠᠭᠠᠨ ᠦᠰᠦᠷᠭᠡᠭᠰᠡᠨ ᠶᠤᠮ᠃ 6 ᠡᠢᠮᠦ ᠡᠴᠡ ᠴᠢ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠰᠢᠢᠳᠦᠭᠡᠷᠡᠢ᠃ ᠲᠡᠭᠦᠨ ᠦ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠶᠢ ᠪᠤᠯᠠᠰᠢ ᠤᠷᠤᠭᠤ ᠨᠢ ᠠᠮᠤᠷ ᠲᠠᠢᠪᠤᠩ ᠶᠠᠪᠤᠭᠤᠯᠬᠤ ᠶᠣᠰᠣ ᠦᠭᠡᠢ᠃ 7 ᠬᠠᠷᠢᠨ ᠴᠢ ᠭᠢᠯᠧᠶᠠᠳ᠋ ᠬᠥᠮᠦᠨ ᠪᠠᠷᠽᠢᠯᠠᠢ ᠶᠢᠨ ᠬᠥᠪᠡᠭᠦᠳ ᠲᠦ ᠡᠨᠡᠷᠢᠯ ᠬᠠᠢᠷᠠ ᠦᠵᠡᠭᠦᠯᠦᠨ᠂ ᠰᠢᠷᠡᠭᠡᠨ ᠳᠦ ᠴᠢᠨᠢ ᠬᠣᠭᠣᠯᠠᠯᠠᠳᠠᠭ ᠬᠥᠮᠦᠰ ᠦᠨ ᠢᠶᠠᠨ ᠳᠤᠮᠳᠠ ᠪᠠᠢᠯᠭᠠ᠃ ᠨᠠᠮᠠᠶᠢ ᠠᠪᠰᠠᠯᠣᠮ ᠠᠬᠠ ᠠᠴᠠ ᠴᠢᠨᠢ ᠵᠢᠭᠤᠲᠠᠵᠤ ᠪᠠᠢᠭᠰᠠᠨ ᠦᠶᠡ ᠳᠦ ᠲᠡᠳᠡ ᠨᠠᠳᠠ ᠳᠤ ᠲᠤᠰᠠᠯᠠᠵᠠᠢ᠃ 8 ᠠᠩ᠋ᠬᠠᠷᠤᠭᠲᠤᠨ᠂ ᠪᠠᠾᠦᠷᠢᠮ ᠠᠴᠠ ᠭᠠᠷᠤᠯ ᠲᠠᠢ ᠪᠢᠨᠶᠠᠮᠢᠨ ᠬᠥᠮᠦᠨ ᠭᠧᠷᠠ ᠶᠢᠨ ᠬᠦᠦ ᠱᠢᠮᠧᠶᠢ ᠴᠤ ᠴᠢᠮᠠ ᠲᠠᠢ ᠬᠠᠮᠲᠤ ᠦᠯᠡᠳᠡᠭᠡᠳ ᠪᠠᠢᠨᠠ᠃ ᠨᠠᠮᠠᠶᠢ ᠮᠠᠬᠠᠨᠠᠢᠮ ᠤᠷᠤᠭᠤ ᠶᠠᠪᠤᠬᠤ ᠡᠳᠦᠷ ᠢᠷᠸᠠ ᠲᠠᠢ ᠬᠠᠷᠢᠶᠠᠯ ᠢᠶᠠᠷ ᠬᠠᠷᠢᠶᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠨᠢ ᠲᠡᠷᠡ ᠶᠤᠮ᠃ ᠭᠡᠪᠡᠴᠦ ᠲᠡᠷᠡ ᠨᠠᠮᠠᠶᠢ ᠤᠭᠲᠤᠬᠤ ᠪᠠᠷ ᠶᠣᠷᠳᠠᠨ ᠳᠡᠭᠡᠷᠡ ᠢᠷᠡᠭᠰᠡᠨ ᠳᠦ᠂ ᠪᠢ᠄ 〈ᠴᠢᠮᠠᠶᠢ ᠪᠢ ᠢᠯᠳᠦ ᠪᠡᠷ ᠬᠣᠷᠣᠭᠠᠬᠤ ᠦᠭᠡᠢ〉 ᠭᠡᠵᠦ ᠶᠣᠬᠣᠸᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠶᠤᠮ᠃ 9 ᠬᠠᠷᠢᠨ ᠣᠳᠣ ᠲᠡᠭᠦᠨ ᠢ ᠭᠡᠮ ᠦᠭᠡᠢ ᠭᠡᠵᠦ ᠪᠦᠦ ᠪᠣᠳᠣ᠃ ᠴᠢ ᠤᠬᠠᠭᠠᠯᠢᠭ ᠬᠥᠮᠦᠨ ᠤᠴᠢᠷ ᠲᠡᠭᠦᠨ ᠢ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠨᠡ᠃ ᠲᠡᠭᠦᠨ ᠦ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠶᠢ ᠪᠤᠯᠠᠰᠢ ᠤᠷᠤᠭᠤ ᠨᠢ ᠴᠢᠰᠤ ᠲᠠᠢ ᠶᠠᠪᠤᠭᠤᠯᠬᠤ ᠶᠣᠰᠣᠲᠠᠢ》 ᠭᠡᠪᠡ᠃
10 ᠳ᠋ᠠᠸᠢᠳ᠋ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠤ ᠣᠷᠣᠰᠢᠭᠤᠯᠪᠠ᠃ 11 ᠳ᠋ᠠᠸᠢᠳ᠋ ᠾᠧᠪᠷᠣᠨ ᠳᠤ ᠳᠣᠯᠣᠭᠠᠨ ᠵᠢᠯ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠭᠤᠴᠢᠨ ᠭᠤᠷᠪᠠᠨ ᠵᠢᠯ᠂ ᠨᠡᠢᠲᠡ ᠳᠥᠴᠢᠨ ᠵᠢᠯ ᠢᠰᠷᠧᠯ ᠢ ᠬᠠᠭᠠᠨᠴᠢᠯᠠᠪᠠ᠃ 12 ᠰᠣᠯᠣᠮᠣᠨ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠰᠡᠨᠲᠢ ᠳᠤ ᠵᠠᠯᠠᠷᠠᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠦ ᠬᠠᠭᠠᠨᠴᠢᠯᠠᠯ ᠶᠡᠬᠡᠳᠡ ᠪᠠᠲᠤ ᠪᠣᠯᠣᠭᠰᠠᠨ ᠪᠠᠢᠯᠠ᠃
ᠰᠣᠯᠣᠮᠣᠨ ᠤ ᠬᠠᠭᠠᠨᠴᠢᠯᠠᠯ ᠪᠠᠲᠤᠵᠢᠪᠠ
13 ᠬᠠᠬᠢᠲ ᠤᠨ ᠬᠦᠦ ᠠᠳᠣᠨᠢᠶᠠ ᠰᠣᠯᠣᠮᠣᠨ ᠤ ᠡᠵᠢ ᠪᠠᠲ᠋ᠱᠧᠪᠠ ᠳᠤ ᠢᠷᠡᠪᠡ᠃ ᠪᠠᠲ᠋ᠱᠧᠪᠠ᠄ 《ᠴᠢ ᠠᠮᠤᠷ ᠲᠠᠢᠪᠤᠩ ᠤᠨ ᠤᠴᠢᠷ ᠢᠶᠠᠷ ᠢᠷᠡᠪᠡ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠷᠡ᠄ 《ᠠᠮᠤᠷ ᠲᠠᠢᠪᠤᠩ ᠤᠨ ᠤᠴᠢᠷ ᠢᠶᠠᠷ》 ᠭᠡᠵᠡᠢ᠃ 14 ᠲᠡᠷᠡ ᠮᠥᠨ᠄ 《ᠲᠠᠨ ᠳᠤ ᠶᠠᠷᠢᠬᠤ ᠦᠭᠡ ᠪᠠᠢᠨᠠ》 ᠭᠡᠬᠦ ᠳᠦ᠂ ᠪᠠᠲ᠋ᠱᠧᠪᠠ᠄ 《ᠶᠠᠷᠢᠭᠠᠷᠠᠢ》 ᠭᠡᠪᠡ᠃ 15 ᠲᠡᠷᠡ᠄ 《ᠬᠠᠭᠠᠨ ᠪᠣᠯᠬᠤ ᠡᠷᠬᠡ ᠤᠭ ᠨᠢ ᠨᠠᠳᠠ ᠳᠤ ᠪᠠᠢᠭᠰᠠᠨ ᠢ ᠲᠠ ᠮᠡᠳᠡᠨᠡ᠃ ᠪᠦᠬᠦ ᠢᠰᠷᠧᠯ ᠨᠠᠮᠠᠶᠢ ᠬᠠᠭᠠᠨ ᠪᠣᠯᠣᠨᠠ ᠭᠡᠵᠦ ᠨᠠᠢᠳᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠬᠠᠭᠠᠨ ᠪᠣᠯᠬᠤ ᠡᠷᠬᠡ ᠶᠣᠬᠣᠸᠠ ᠶᠢᠨ ᠰᠠᠨᠠᠭᠠ ᠪᠠᠷ ᠰᠢᠯᠵᠢᠵᠦ ᠮᠢᠨᠦ ᠳᠡᠭᠦᠦ ᠶᠢᠨ ᠬᠢ ᠪᠣᠯᠣᠭᠰᠠᠨ ᠪᠠᠢᠨᠠ᠃ 16 ᠣᠳᠣ ᠪᠢ ᠲᠠᠨ ᠠᠴᠠ ᠨᠢᠭᠡ ᠵᠦᠢᠯ ᠢ ᠭᠤᠶᠤᠶᠠ᠃ ᠨᠠᠳᠠ ᠠᠴᠠ ᠨᠢᠭᠤᠷ ᠢᠶᠠᠨ ᠪᠦᠦ ᠪᠤᠷᠤᠭᠤᠯᠠᠭᠠᠴᠢ》 ᠭᠡᠯᠡ᠃ ᠪᠠᠲ᠋ᠱᠧᠪᠠ᠄ 《ᠶᠠᠷᠢᠭᠠᠷᠠᠢ》 ᠭᠡᠬᠦ ᠳᠦ᠂ 17 ᠲᠡᠷᠡ᠄ 《ᠱᠦᠨᠧᠮ ᠡᠮᠡᠭᠲᠡᠢ ᠠᠪᠢᠱᠠᠭ ᠢ ᠨᠠᠳᠠ ᠳᠤ ᠡᠬᠡᠨᠡᠷ ᠪᠣᠯᠭᠠᠨ ᠥᠭᠬᠦ ᠶᠢ ᠰᠣᠯᠣᠮᠣᠨ ᠬᠠᠭᠠᠨ ᠠᠴᠠ ᠭᠤᠶᠤᠵᠤ ᠥᠭᠭᠥᠭᠡᠴᠢ᠃ ᠬᠠᠭᠠᠨ ᠲᠠᠨ ᠠᠴᠠ ᠨᠢᠭᠤᠷ ᠪᠤᠷᠤᠭᠤᠯᠠᠬᠤ ᠦᠭᠡᠢ ᠶᠤᠮ》 ᠭᠡᠵᠦ ᠬᠡᠯᠡᠵᠡᠢ᠃ 18 ᠪᠠᠲ᠋ᠱᠧᠪᠠ᠄ 《ᠵᠠ᠂ ᠰᠠᠢᠨ᠃ ᠪᠢ ᠴᠢᠨᠦ ᠡᠮᠦᠨᠡ ᠡᠴᠡ ᠥᠪᠡᠷ ᠢᠶᠡᠨ ᠬᠠᠭᠠᠨ ᠲᠠᠢ ᠶᠠᠷᠢᠯᠴᠠᠶᠠ》 ᠭᠡᠪᠡ᠃
19 ᠲᠡᠭᠡᠭᠡᠳ ᠪᠠᠲ᠋ᠱᠧᠪᠠ ᠠᠳᠣᠨᠢᠶᠠ ᠶᠢᠨ ᠡᠮᠦᠨᠡ ᠡᠴᠡ ᠶᠠᠷᠢᠯᠴᠠᠬᠤ ᠪᠠᠷ ᠰᠣᠯᠣᠮᠣᠨ ᠬᠠᠭᠠᠨ ᠳᠤ ᠪᠠᠷᠠᠭᠠᠯᠬᠠᠪᠠ᠃ ᠬᠠᠭᠠᠨ ᠪᠣᠰᠴᠤ ᠡᠵᠢ ᠪᠠᠨ ᠤᠭᠲᠤᠨ᠂ ᠲᠡᠭᠦᠨ ᠳᠦ ᠮᠡᠬᠦᠢᠭᠡᠳ ᠰᠡᠨᠲᠢ ᠳᠡᠭᠡᠨ ᠵᠠᠯᠠᠷᠠᠪᠠ᠃ ᠲᠡᠷᠡ ᠬᠠᠲᠤᠨ ᠡᠵᠢ ᠳᠡᠭᠡᠨ ᠰᠡᠨᠲᠢ ᠵᠠᠰᠠᠭᠤᠯᠤᠭᠰᠠᠨ ᠳᠤ᠂ ᠡᠵᠢ ᠨᠢ ᠰᠣᠯᠣᠮᠣᠨ ᠤ ᠪᠠᠷᠠᠭᠤᠨ ᠲᠠᠯᠠ ᠳᠤ ᠰᠠᠭᠤᠯᠠ᠃ 20 ᠪᠠᠲ᠋ᠱᠧᠪᠠ᠄ 《ᠴᠢᠮᠠ ᠠᠴᠠ ᠨᠢᠭᠡ ᠵᠢᠭᠠᠬᠠᠨ ᠵᠦᠢᠯ ᠢ ᠭᠤᠶᠤᠶᠠ᠃ ᠨᠠᠳᠠ ᠠᠴᠠ ᠨᠢᠭᠤᠷ ᠢᠶᠠᠨ ᠪᠦᠦ ᠪᠤᠷᠤᠭᠤᠯᠠᠭᠠᠴᠢ》 ᠭᠡᠰᠡᠨ ᠳᠦ᠂ ᠬᠠᠭᠠᠨ᠄ 《ᠡᠵᠢ ᠮᠢᠨᠢ ᠭᠤᠶᠤ᠂ ᠪᠢ ᠲᠠᠨ ᠠᠴᠠ ᠨᠢᠭᠤᠷ ᠢᠶᠠᠨ ᠪᠤᠷᠤᠭᠤᠯᠠᠬᠤ ᠦᠭᠡᠢ》 ᠭᠡᠪᠡ᠃ 21 ᠪᠠᠲ᠋ᠱᠧᠪᠠ᠄ 《ᠱᠦᠨᠧᠮ ᠥᠬᠢᠨ ᠠᠪᠢᠱᠠᠭ ᠢ ᠠᠬᠠ ᠠᠳᠣᠨᠢᠶᠠ ᠳᠠᠭᠠᠨ ᠡᠬᠡᠨᠡᠷ ᠪᠣᠯᠭᠠᠨ ᠥᠭᠭᠥᠨᠡ ᠤᠤ︖》 ᠭᠡᠬᠦ ᠳᠦ᠂ 22 ᠰᠣᠯᠣᠮᠣᠨ ᠬᠠᠭᠠᠨ ᠡᠵᠢ ᠳᠡᠭᠡᠨ᠄ 《ᠲᠠ ᠶᠠᠭᠤ ᠭᠡᠵᠦ ᠱᠦᠨᠠᠮ ᠥᠬᠢᠨ ᠠᠪᠢᠱᠠᠭ ᠢ ᠠᠳᠣᠨᠢᠶᠠ ᠶᠢᠨ ᠲᠥᠯᠥᠭᠡ ᠭᠤᠶᠤᠵᠤ ᠪᠠᠢᠭᠠ ᠶᠤᠮ ᠪᠤᠢ︖ ᠲᠡᠷᠡ ᠮᠢᠨᠦ ᠠᠬᠠ ᠶᠤᠮ ᠴᠢᠨᠢ ᠲᠡᠭᠦᠨ ᠦ ᠲᠥᠯᠥᠭᠡ ᠬᠠᠭᠠᠨᠴᠢᠯᠠᠯ ᠢ ᠴᠤ ᠭᠤᠶᠤᠬᠤ ᠦᠭᠡᠢ ᠤᠤ︖ ᠡᠭᠦᠨ ᠢᠶᠡᠷ ᠪᠠᠷᠠᠬᠤ ᠦᠭᠡᠢ᠂ ᠲᠠᠬᠢᠯᠴᠢ ᠠᠪᠢᠶᠠᠲ᠋ᠠᠷ᠂ ᠽᠧᠷᠣᠢᠶᠠ ᠶᠢᠨ ᠬᠦᠦ ᠶᠣᠶᠠᠪ ᠤᠨ ᠲᠥᠯᠥᠭᠡ ᠴᠤ ᠭᠤᠶᠤᠬᠤ ᠦᠭᠡᠢ ᠤᠤ︖》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 23 ᠰᠣᠯᠣᠮᠣᠨ ᠬᠠᠭᠠᠨ ᠶᠣᠬᠣᠸᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠨ᠄ 《ᠬᠡᠷᠪᠡ ᠠᠳᠣᠨᠢᠶᠠ ᠡᠨᠡ ᠦᠭᠡ ᠶᠢ ᠠᠮᠢ ᠶᠢᠨ ᠢᠶᠠᠨ ᠡᠰᠡᠷᠭᠦ ᠬᠡᠯᠡᠭᠡ ᠦᠭᠡᠢ ᠪᠣᠯ ᠪᠤᠷᠬᠠᠨ ᠨᠠᠮᠠᠶᠢ ᠬᠠᠲᠠᠭᠤ ᠰᠢᠳᠬᠡᠬᠦ ᠪᠣᠯᠲᠤᠭᠠᠢ᠃ 24 ᠲᠡᠢᠮᠦ ᠡᠴᠡ ᠨᠠᠮᠠᠶᠢ ᠪᠡᠯᠡᠳᠬᠡᠵᠦ᠂ ᠳ᠋ᠠᠸᠢᠳ᠋ ᠡᠴᠢᠭᠡ ᠶᠢᠨ ᠮᠢᠨᠢ ᠰᠡᠨᠲᠢ ᠳᠤ ᠰᠠᠭᠤᠯᠭᠠᠭᠰᠠᠨ ᠶᠣᠬᠣᠸᠠ᠂ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠨᠠᠳᠠ ᠳᠤ ᠭᠡᠷ ᠪᠣᠰᠬᠠᠵᠤ ᠥᠭᠭᠥᠭᠰᠡᠨ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠠᠳᠣᠨᠢᠶᠠ ᠥᠨᠥᠳᠥᠷ ᠵᠠᠪᠠᠯ ᠦᠬᠦᠬᠦ ᠶᠣᠰᠣᠲᠠᠢ》 ᠭᠡᠳ 25 ᠶᠧᠬᠣᠷᠠᠢᠳᠠ ᠶᠢᠨ ᠬᠦᠦ ᠪᠧᠨᠠᠢᠶᠠ ᠶᠢ ᠢᠯᠡᠭᠡᠭᠰᠡᠨ ᠳᠦ᠂ ᠲᠡᠷᠡ ᠠᠳᠣᠨᠢᠶᠠ ᠶᠢ ᠴᠣᠬᠢᠵᠤ ᠠᠯᠠᠪᠠ᠃
26 ᠬᠠᠭᠠᠨ ᠲᠠᠬᠢᠯᠴᠢ ᠠᠪᠢᠶᠠᠲ᠋ᠠᠷ ᠲᠤ᠄ 《ᠠᠨᠠᠲ᠋ᠣᠲ ᠳᠠᠬᠢ ᠲᠠᠯᠠᠪᠠᠢ ᠤᠷᠤᠭᠤ ᠪᠠᠨ ᠪᠤᠴᠠ᠃ ᠲᠠ ᠦᠬᠦᠬᠦ ᠶᠣᠰᠣᠲᠠᠢ ᠬᠥᠮᠦᠨ ᠪᠣᠯᠪᠠᠴᠤ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠡᠮᠦᠨᠡ ᠡᠵᠡᠨ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠠᠪᠴᠤ ᠶᠠᠪᠤᠨ᠂ ᠮᠢᠨᠦ ᠡᠴᠢᠭᠡ ᠶᠢᠨ ᠠᠮᠰᠠᠭᠰᠠᠨ ᠪᠦᠬᠦ ᠵᠣᠪᠠᠯᠠᠩ ᠢ ᠲᠠ ᠨᠠᠷ ᠴᠤ ᠠᠮᠰᠠᠭᠰᠠᠨ ᠤᠴᠢᠷ ᠠᠴᠠ ᠥᠨᠥᠳᠥᠷ ᠪᠢ ᠴᠢᠮᠠᠶᠢ ᠴᠠᠭᠠᠵᠠᠯᠠᠬᠤ ᠦᠭᠡᠢ》 ᠭᠡᠳ 27 ᠠᠪᠢᠶᠠᠲ᠋ᠠᠷ ᠢ ᠶᠣᠬᠣᠸᠠ ᠶᠢᠨ ᠲᠠᠬᠢᠯᠴᠢ ᠶᠢᠨ ᠲᠤᠰᠢᠶᠠᠯ ᠠᠴᠠ ᠨᠢ ᠬᠠᠯᠠᠭᠰᠠᠨ ᠢᠶᠠᠷ ᠶᠣᠬᠣᠸᠠ ᠶᠢᠨ ᠡᠯᠢ ᠶᠢᠨ ᠭᠡᠷ ᠦᠨ ᠲᠤᠬᠠᠢ ᠱᠢᠯᠣ᠋ ᠳᠤ ᠬᠡᠯᠡᠭᠰᠡᠨ ᠦᠭᠡ ᠪᠡᠶᠡᠯᠡᠵᠡᠢ᠃
28 ᠡᠳᠡᠭᠡᠷ ᠮᠡᠳᠡᠭᠡ ᠶᠣᠶᠠᠪ ᠤᠨ ᠰᠣᠨᠣᠷ ᠲᠤ ᠬᠦᠷᠪᠡ᠃ ᠶᠣᠶᠠᠪ ᠠᠪᠰᠠᠯᠣᠮ ᠢ ᠳᠠᠭᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠠᠳᠣᠨᠢᠶᠠ ᠶᠢ ᠳᠠᠭᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠶᠣᠬᠣᠸᠠ ᠶᠢᠨ ᠴᠠᠴᠠᠷ ᠤᠷᠤᠭᠤ ᠵᠢᠭᠤᠲᠠᠨ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠡᠪᠡᠷ ᠡᠴᠡ ᠵᠢᠭᠤᠷᠠᠨ ᠪᠠᠷᠢᠪᠠ᠃ 29 《ᠶᠣᠶᠠᠪ ᠶᠣᠬᠣᠸᠠ ᠶᠢᠨ ᠴᠠᠴᠠᠷ ᠤᠷᠤᠭᠤ ᠵᠢᠭᠤᠲᠠᠨ ᠣᠴᠢᠭᠠᠳ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠠᠵᠠᠭᠤ ᠳᠤ ᠪᠠᠢᠨᠠ》 ᠭᠡᠵᠦ ᠬᠡᠨ ᠨᠢᠭᠡ ᠨᠢ ᠳᠤᠭᠤᠯᠭᠠᠭᠰᠠᠨ ᠳᠤ᠂ ᠰᠣᠯᠣᠮᠣᠨ ᠬᠠᠭᠠᠨ ᠶᠧᠬᠣᠷᠠᠢᠳᠠ ᠶᠢᠨ ᠬᠦᠦ ᠪᠧᠨᠠᠢᠶᠠ ᠶᠢ ᠶᠠᠪᠤᠭᠤᠯᠵᠤ᠄ 《ᠲᠡᠭᠦᠨ ᠢ ᠴᠣᠬᠢ》 ᠭᠡᠵᠦ ᠲᠤᠰᠢᠶᠠᠪᠠ᠃ 30 ᠪᠧᠨᠠᠢᠶᠠ ᠶᠣᠬᠣᠸᠠ ᠶᠢᠨ ᠴᠠᠴᠠᠷ ᠲᠤ ᠣᠷᠣᠭᠠᠳ ᠶᠣᠶᠠᠪ ᠲᠤ᠄ 《ᠬᠠᠭᠠᠨ ᠠᠢᠯᠠᠳᠴᠤ ᠪᠠᠢᠨᠠ᠂ ᠭᠠᠷᠤᠭᠠᠳ ᠢᠷᠡ》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠦᠭᠡᠢ᠂ ᠪᠢ ᠡ᠊ᠨᠳᠡ ᠯᠠ ᠦᠬᠦᠨᠡ》 ᠭᠡᠵᠡᠢ᠃ ᠪᠧᠨᠠᠢᠶᠠ ᠬᠠᠭᠠᠨ ᠳᠤ ᠪᠤᠴᠠᠵᠤ᠄ 《ᠶᠣᠶᠠᠪ ᠢᠩᠭᠢᠵᠦ ᠬᠡᠯᠡᠨ ᠨᠠᠳᠠ ᠳᠤ ᠢᠩᠭᠢᠵᠦ ᠬᠠᠷᠢᠭᠤᠯᠤᠯᠠ》 ᠭᠡᠰᠡᠨ ᠳᠦ᠂ 31 ᠬᠠᠭᠠᠨ ᠪᠧᠨᠠᠢᠶᠠ ᠳᠤ᠄ 《ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠦᠢᠯᠡᠳᠦᠨ ᠲᠡᠭᠦᠨ ᠢ ᠠᠯᠠᠵᠤ᠂ ᠣᠷᠣᠰᠢᠭᠤᠯ᠃ ᠡᠢᠨ ᠬᠦ ᠴᠢ ᠶᠣᠶᠠᠪ ᠤᠨ ᠤᠷᠤᠰᠬᠠᠭᠰᠠᠨ ᠭᠡᠮ ᠦᠭᠡᠢ ᠴᠢᠰᠤ ᠶᠢ ᠨᠠᠳᠠ ᠠᠴᠠ ᠪᠣᠯᠣᠨ ᠮᠢᠨᠦ ᠡᠴᠢᠭᠡ ᠶᠢᠨ ᠭᠡᠷ ᠪᠦᠯᠢ ᠡᠴᠡ ᠵᠠᠢᠯᠠᠭᠤᠯᠬᠤ ᠪᠥᠭᠡᠳ 32 ᠶᠣᠬᠣᠸᠠ ᠶᠣᠶᠠᠪ ᠤᠨ ᠴᠢᠰᠤ ᠶᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠡᠷᠭᠢᠨ ᠪᠠᠭᠤᠯᠭᠠᠨᠠ᠃ ᠤᠴᠢᠷ ᠨᠢ ᠲᠡᠷᠡ ᠥᠪᠡᠷ ᠡᠴᠡ ᠪᠡᠨ ᠢᠯᠡᠭᠦᠦ ᠰᠢᠳᠤᠷᠭᠤ᠂ ᠰᠠᠢᠨ ᠬᠣᠶᠠᠷ ᠬᠥᠮᠦᠨ ᠢ ᠴᠣᠬᠢᠭᠰᠠᠨ᠂ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠤ ᠳᠤ᠂ ᠲᠡᠷᠡ ᠢᠰᠷᠧᠯ ᠤᠨ ᠴᠡᠷᠢᠭ ᠤᠨ ᠵᠠᠩᠵᠤᠨ ᠨᠧᠷ ᠤᠨ ᠬᠦᠦ ᠠᠪᠨᠧᠷ ᠪᠣᠯᠣᠨ ᠶᠦᠳᠠ ᠶᠢᠨ ᠴᠡᠷᠢᠭ ᠤᠨ ᠵᠠᠩᠵᠤᠨ ᠶᠧᠲ᠋ᠧᠷ ᠤᠨ ᠬᠦᠦ ᠠᠮᠠᠰᠠ ᠬᠣᠶᠠᠷ ᠢ ᠢᠯᠳᠦ ᠪᠡᠷ ᠬᠥᠨᠥᠭᠡᠭᠰᠡᠨ᠃ 33 ᠡᠢᠨ ᠬᠦ ᠲᠡᠳᠡᠨ ᠦ ᠴᠢᠰᠤ ᠶᠣᠶᠠᠪ ᠪᠣᠯᠣᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠤᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠡᠷᠭᠢᠨ ᠪᠠᠭᠤᠵᠤ᠂ ᠮᠥᠩᠬᠡᠳᠡ ᠪᠠᠢᠬᠤ ᠪᠣᠯᠪᠠᠴᠤ ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ᠂ ᠲᠡᠭᠦᠨ ᠦ ᠭᠡᠷ᠂ ᠲᠡᠭᠦᠨ ᠦ ᠰᠡᠨᠲᠢ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠠᠮᠤᠷ ᠲᠠᠢᠪᠤᠩ ᠮᠥᠩᠬᠡᠳᠡ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃ 34 ᠶᠧᠬᠣᠷᠠᠢᠳᠠ ᠶᠢᠨ ᠬᠦᠦ ᠪᠧᠨᠠᠢᠶᠠ ᠶᠠᠪᠤᠵᠤ᠂ ᠶᠣᠶᠠᠪ ᠢ ᠴᠣᠬᠢᠵᠤ ᠠᠯᠠᠭᠰᠠᠨ ᠳᠤ᠂ ᠬᠥᠮᠦᠰ ᠲᠡᠭᠦᠨ ᠢ ᠴᠥᠯ ᠳᠠᠬᠢ ᠥᠪᠡᠷ ᠦᠨ ᠬᠢᠨᠢ ᠭᠡᠷ ᠲᠦ ᠣᠷᠣᠰᠢᠭᠤᠯᠵᠠᠢ᠃ 35 ᠬᠠᠭᠠᠨ ᠶᠣᠶᠠᠪ ᠤᠨ ᠣᠷᠣᠨ ᠳᠤ ᠶᠧᠬᠣᠷᠠᠢᠳᠠ ᠶᠢᠨ ᠬᠦᠦ ᠪᠧᠨᠠᠢᠶᠠ ᠶᠢ ᠴᠡᠷᠢᠭ ᠤᠨ ᠵᠠᠩᠵᠤᠨ ᠢᠶᠠᠷ ᠲᠣᠮᠢᠯᠠᠵᠤ᠂ ᠠᠪᠢᠶᠠᠲ᠋ᠠᠷ ᠤᠨ ᠣᠷᠣᠨ ᠳᠤ ᠽᠠᠳᠣᠺ ᠢ ᠲᠠᠬᠢᠯᠴᠢ ᠶᠢᠨ ᠲᠤᠰᠢᠶᠠᠯ ᠳᠤ ᠣᠷᠣᠭᠤᠯᠤᠭᠰᠠᠨ ᠪᠠᠢᠯᠠ᠃
36 ᠳᠠᠷᠠᠭᠠ ᠨᠢ ᠬᠠᠭᠠᠨ ᠬᠥᠮᠦᠨ ᠢᠯᠡᠭᠡᠵᠦ᠂ ᠱᠢᠮᠧᠶᠢ ᠶᠢ ᠥᠪᠡᠷ ᠲᠡᠭᠡᠨ ᠳᠠᠭᠤᠳᠠᠭᠤᠯᠵᠤ᠄ 《ᠴᠢ ᠶᠧᠷᠦ᠋ᠰᠠᠯᠧᠮ ᠳᠤ ᠭᠡᠷ ᠪᠠᠷᠢᠵᠤ᠂ ᠲᠡᠨᠳᠡ ᠪᠡᠨ ᠯᠠ ᠠᠮᠢᠳᠤᠷᠠ᠃ ᠥᠭᠡᠷᠡ ᠬᠠᠮᠢᠭᠠᠰᠢ ᠪᠠᠨ ᠴᠤ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ᠃ 37 ᠴᠢ ᠵᠠᠪᠠᠯ ᠮᠡᠳᠡᠵᠦ ᠠᠪ᠃ ᠬᠡᠷᠪᠡ ᠴᠢ ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠺᠢᠳ᠋ᠷᠣᠨ ᠭᠣᠷᠣᠬᠠ ᠶᠢ ᠭᠠᠲᠤᠯᠬᠤ ᠳᠤ ᠬᠦᠷᠪᠡᠯ᠂ ᠲᠡᠷᠡ ᠡᠳᠦᠷ ᠲᠡᠭᠡᠨ ᠵᠠᠢᠯᠠᠰᠢ ᠦᠭᠡᠢ ᠦᠬᠦᠨᠡ᠃ ᠴᠢᠨᠦ ᠴᠢᠰᠤ ᠥᠪᠡᠷ ᠦᠨ ᠴᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠢᠬᠤ ᠪᠣᠯᠣᠨᠠ》 ᠭᠡᠰᠡᠨ ᠳᠦ᠂ 38 ᠱᠢᠮᠧᠶᠢ ᠬᠠᠭᠠᠨ ᠳᠤ᠄ 《ᠬᠡᠯᠡᠭᠰᠡᠨ ᠦᠭᠡ ᠲᠠᠨᠢ ᠵᠥᠪ ᠪᠠᠢᠨᠠ᠃ ᠮᠢᠨᠦ ᠡᠵᠡᠨ ᠬᠠᠭᠠᠨ ᠤ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠲᠠᠨ ᠤ ᠵᠠᠷᠤᠴᠠ ᠪᠢ ᠲᠡᠢᠨ ᠬᠦ ᠦᠢᠯᠡᠳᠦᠶᠡ》 ᠭᠡᠪᠡ᠃ ᠢᠩᠭᠢᠭᠡᠳ ᠱᠢᠮᠧᠶᠢ ᠶᠧᠷᠦ᠋ᠰᠠᠯᠧᠮ ᠳᠤ ᠣᠯᠠᠨ ᠡᠳᠦᠷ ᠰᠠᠭᠤᠵᠠᠢ᠃
39 ᠲᠡᠭᠡᠲᠡᠯᠡ ᠭᠤᠷᠪᠠᠨ ᠵᠢᠯ ᠤᠨ ᠡᠴᠦᠰ ᠲᠦ ᠱᠢᠮᠧᠶᠢ ᠶᠢᠨ ᠬᠣᠶᠠᠷ ᠵᠠᠷᠤᠴᠠ ᠭᠠᠲ ᠤᠨ ᠬᠠᠭᠠᠨ᠂ ᠮᠠᠺᠠ ᠶᠢᠨ ᠬᠦᠦ ᠠᠺᠢᠱ ᠤᠷᠤᠭᠤ ᠵᠢᠭᠤᠲᠠᠭᠰᠠᠨ ᠪᠠᠢᠵᠠᠢ᠃ ᠬᠥᠮᠦᠰ ᠱᠢᠮᠧᠶᠢ ᠳᠤ᠄ 《ᠬᠠᠷᠠ᠂ ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠭᠠᠲ ᠲᠤ ᠪᠠᠢᠨᠠ》 ᠭᠡᠵᠦ ᠮᠡᠳᠡᠭᠦᠯᠬᠦ ᠳᠦ᠂ 40 ᠱᠢᠮᠧᠶᠢ ᠪᠣᠰᠴᠤ᠂ ᠡᠯᠵᠢᠭᠡ ᠪᠡᠨ ᠡᠮᠡᠭᠡᠯᠯᠡᠭᠡᠳ ᠵᠠᠷᠤᠴᠠ ᠨᠠᠷ ᠢᠶᠠᠨ ᠡᠷᠢᠵᠦ ᠣᠯᠬᠤ ᠪᠠᠷ ᠭᠠᠲ ᠲᠤ ᠪᠤᠢ ᠠᠺᠢᠱ ᠤᠷᠤᠭᠤ ᠶᠠᠪᠤᠪᠠ᠃ ᠡᠢᠨ ᠬᠦ ᠱᠢᠮᠧᠶᠢ ᠶᠠᠪᠤᠵᠤ ᠭᠠᠲ ᠠᠴᠠ ᠵᠠᠷᠤᠴᠠ ᠨᠠᠷ ᠢᠶᠠᠨ ᠠᠪᠴᠢᠷᠠᠵᠠᠢ᠃ 41 ᠬᠠᠷᠢᠨ ᠱᠢᠮᠧᠶᠢ ᠶᠢᠨ ᠶᠧᠷᠦ᠋ᠰᠠᠯᠧᠮ ᠡᠴᠡ ᠭᠠᠲ ᠤᠷᠤᠭᠤ ᠶᠠᠪᠤᠭᠠᠳ ᠡᠷᠭᠢᠵᠦ ᠢᠷᠡᠭᠰᠡᠨ ᠨᠢ ᠰᠣᠯᠣᠮᠣᠨ ᠳᠤ ᠮᠡᠳᠡᠭᠳᠡᠪᠡ᠃ 42 ᠬᠠᠭᠠᠨ ᠬᠥᠮᠦᠨ ᠢᠯᠡᠭᠡᠨ ᠱᠢᠮᠧᠶᠢ ᠶᠢ ᠳᠠᠭᠤᠳᠠᠭᠤᠯᠵᠤ᠂ ᠲᠡᠭᠦᠨ ᠳᠦ᠄ 《ᠪᠢ ᠴᠢᠮᠠᠶᠢ ᠶᠣᠬᠣᠸᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠤᠯᠤᠨ᠂ ᠬᠠᠲᠠᠭᠤ ᠰᠠᠨᠠᠭᠤᠯᠬᠤ ᠳᠠᠭᠠᠨ᠄ 〈ᠴᠢ ᠵᠠᠪᠠᠯ ᠮᠡᠳᠡᠵᠦ ᠠᠪ᠂ ᠬᠡᠷᠪᠡ ᠴᠢ ᠲᠡᠨᠳᠡ ᠡᠴᠡ ᠪᠡᠨ ᠭᠠᠷᠤᠭᠠᠳ ᠥᠪᠡᠷ ᠢᠶᠡᠨ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠶᠠᠪᠤᠪᠠᠯ ᠲᠡᠷᠡ ᠡᠳᠦᠷ ᠲᠡᠭᠡᠨ ᠵᠠᠢᠯᠠᠰᠢ ᠦᠭᠡᠢ ᠦᠬᠦᠨᠡ〉 ᠭᠡᠬᠦ ᠳᠦ ᠮᠢᠨᠢ ᠴᠢ ᠥᠪᠡᠷ ᠢᠶᠡᠨ ᠨᠠᠳᠠ ᠳᠤ᠄ 〈ᠲᠠᠨ ᠤ ᠬᠡᠯᠡᠭᠰᠡᠨ ᠦᠭᠡ ᠵᠥᠪ ᠪᠠᠢᠨᠠ᠂ ᠪᠢ ᠳᠠᠭᠠᠶᠠ〉 ᠭᠡᠰᠡᠨ ᠪᠢᠯᠡ᠃ 43 ᠭᠡᠲᠡᠯᠡ ᠴᠢ ᠶᠠᠭᠤᠨ ᠳᠤ ᠶᠣᠬᠣᠸᠠ ᠳᠤ ᠥᠭᠭᠥᠭᠰᠡᠨ ᠲᠠᠩ᠋ᠭᠠᠷᠢᠭ ᠪᠣᠯᠣᠨ ᠮᠢᠨᠦ ᠲᠤᠰᠢᠶᠠᠭᠰᠠᠨ ᠲᠤᠰᠢᠶᠠᠯ ᠢ ᠰᠠᠬᠢᠭᠰᠠᠨ ᠦᠭᠡᠢ ᠪᠤᠢ︖》 ᠭᠡᠪᠡ᠃ 44 ᠬᠠᠭᠠᠨ ᠴᠢᠨᠠᠭᠰᠢ ᠨᠢ ᠱᠢᠮᠧᠶᠢ ᠳᠤ᠄ 《ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠤ ᠬᠢᠭᠰᠡᠨ ᠪᠦᠬᠦ ᠬᠣᠷᠣᠨ ᠮᠠᠭᠤ ᠪᠠᠨ ᠴᠢ ᠳᠣᠲᠣᠷᠠ ᠪᠠᠨ ᠮᠡᠳᠡᠵᠦ ᠪᠠᠢᠭᠠ ᠪᠠᠢᠬᠠ᠂ ᠶᠣᠬᠣᠸᠠ ᠴᠢᠨᠦ ᠬᠣᠷᠣᠨ ᠮᠠᠭᠤ ᠶᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠴᠢᠨᠢ ᠪᠤᠴᠠᠭᠠᠬᠤ ᠪᠣᠯᠣᠨᠠ᠃ 45 ᠬᠠᠷᠢᠨ ᠰᠣᠯᠣᠮᠣᠨ ᠬᠠᠭᠠᠨ ᠢᠪᠡᠭᠡᠭᠳᠡᠵᠦ᠂ ᠳ᠋ᠠᠸᠢᠳ᠋ ᠤᠨ ᠰᠡᠨᠲᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠮᠥᠩᠬᠡᠳᠡ ᠪᠠᠲᠤ ᠪᠠᠢᠬᠤ ᠪᠣᠯᠣᠨᠠ》 ᠭᠡᠳ 46 ᠶᠧᠬᠣᠷᠠᠢᠳᠠ ᠶᠢᠨ ᠬᠦᠦ ᠪᠧᠨᠠᠢᠶᠠ ᠳᠤ ᠲᠤᠰᠢᠶᠠᠯ ᠪᠠᠭᠤᠯᠭᠠᠭᠰᠠᠨ ᠳᠤ᠂ ᠲᠡᠷᠡ ᠭᠠᠷᠴᠤ ᠶᠠᠪᠤᠨ᠂ ᠱᠢᠮᠧᠶᠢ ᠶᠢ ᠴᠣᠬᠢᠵᠤ ᠠᠯᠠᠪᠠ᠃