ᠬᠠᠭᠠᠳ ᠤᠨ ᠳᠡᠭᠡᠳᠦ ᠬᠣᠷᠢᠨ ᠨᠢᠭᠡ
ᠨᠠᠪᠣᠲ ᠤᠨ ᠦᠵᠦᠮ ᠦᠨ ᠴᠡᠴᠡᠷᠯᠢᠭ
1 ᠡᠭᠦᠨ ᠦ ᠳᠠᠷᠠᠭᠠ ᠡᠳᠡᠭᠡᠷ ᠶᠠᠪᠤᠳᠠᠯ ᠪᠣᠯᠪᠠ᠃ ᠶᠧᠽᠷᠧᠯ ᠬᠥᠮᠦᠨ ᠨᠠᠪᠣᠲ ᠶᠧᠽᠷᠧᠯ ᠳᠤ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠲᠡᠢ ᠪᠥᠭᠡᠳ ᠲᠡᠷᠡ ᠴᠡᠴᠡᠷᠯᠢᠭ ᠰᠠᠮᠠᠷᠢᠶᠠ ᠶᠢᠨ ᠬᠠᠭᠠᠨ ᠠᠬᠠᠪ ᠤᠨ ᠣᠷᠳᠣᠨ ᠤ ᠬᠠᠵᠠᠭᠤ ᠳᠤ ᠪᠠᠢᠵᠠᠢ᠃ 2 ᠨᠢᠭᠡᠨ ᠡᠳᠦᠷ ᠠᠬᠠᠪ ᠨᠠᠪᠣᠲ ᠲᠤ᠄ 《ᠲᠠᠨ ᠤ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠮᠢᠨᠦ ᠣᠷᠳᠣᠨ ᠠᠴᠠ ᠣᠢᠷᠠ ᠪᠣᠯᠬᠣᠷ ᠲᠡᠭᠦᠨ ᠢ ᠨᠠᠳᠠ ᠳᠤ ᠥᠭᠭᠥᠨᠡ ᠤᠤ︖ ᠪᠢ ᠲᠡᠭᠦᠨ ᠢ ᠬᠦᠷᠢᠶᠡᠯᠡᠩ ᠪᠣᠯᠭᠠᠬᠤ ᠭᠡᠰᠡᠨ ᠶᠤᠮ᠃ ᠣᠷᠣᠨ ᠳᠤᠨᠢ ᠪᠢ ᠴᠢᠮᠠ ᠳᠤ ᠡᠭᠦᠨ ᠡᠴᠡ ᠢᠯᠡᠭᠦᠦ ᠰᠠᠢᠨ ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠢ ᠥᠭᠭᠥᠶᠡ᠃ ᠴᠢ ᠳᠤᠷᠠᠲᠠᠢ ᠪᠣᠯ ᠪᠢ ᠴᠢᠮᠠ ᠳᠤ ᠡᠭᠦᠨ ᠦ ᠦᠨᠡ ᠪᠣᠯᠬᠤ ᠮᠥᠩᠭᠥ ᠶᠢ ᠥᠭᠭᠥᠶᠡ》 ᠭᠡᠬᠦ ᠳᠦ᠂ 3 ᠨᠠᠪᠣᠲ ᠠᠬᠠᠪ ᠲᠤ᠄ 《ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠥᠮᠴᠢ ᠶᠢ ᠲᠠᠨ ᠳᠤ ᠰᠢᠯᠵᠢᠭᠦᠯᠬᠦ ᠶᠠᠪᠤᠳᠠᠯ ᠢ ᠶᠣᠬᠣᠸᠠ ᠨᠠᠳᠠ ᠠᠴᠠ ᠬᠣᠯᠠ ᠪᠠᠢᠯᠭᠠᠭ》 ᠭᠡᠯᠡ᠃ 4 《ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠥᠪ ᠢ ᠰᠢᠯᠵᠢᠭᠦᠯᠬᠦ ᠦᠭᠡᠢ》 ᠭᠡᠵᠦ ᠶᠧᠽᠷᠧᠯ ᠬᠥᠮᠦᠨ ᠨᠠᠪᠣᠲ ᠤᠨ ᠬᠡᠯᠡᠭᠰᠡᠨ ᠦᠭᠡᠨ ᠡᠴᠡ ᠪᠣᠯᠵᠤ ᠠᠬᠠᠪ ᠤᠨᠲᠤᠭᠤᠴᠠᠨ ᠤᠴᠠᠭᠠᠷᠯᠠᠵᠤ᠂ ᠣᠷᠳᠣᠨ ᠳᠠᠭᠠᠨ ᠪᠤᠴᠠᠪᠠ᠃ ᠲᠡᠷᠡ ᠪᠡᠷ ᠣᠷᠣ ᠳᠡᠭᠡᠷᠡ ᠪᠡᠨ ᠬᠡᠪᠲᠡᠵᠦ᠂ ᠪᠤᠷᠤᠭᠤ ᠬᠠᠷᠠᠭᠠᠳ ᠬᠣᠭᠣᠯᠠ ᠴᠤ ᠢᠳᠡᠭᠰᠡᠨ ᠦᠭᠡᠢ᠃
5 ᠡᠬᠡᠨᠡᠷ ᠶᠧᠽᠧᠪᠧᠯ ᠨᠢ ᠲᠡᠭᠦᠨ ᠤᠷᠤᠭᠤ ᠢᠷᠡᠭᠡᠳ᠄ 《ᠴᠢ ᠶᠠᠭᠤᠨ ᠳᠤ ᠤᠴᠠᠭᠠᠷᠯᠠᠭᠠᠳ ᠬᠣᠭᠣᠯᠠ ᠢᠳᠡᠬᠦ ᠦᠭᠡᠢ ᠪᠠᠢᠭᠠ ᠶᠤᠮ ᠪᠤᠢ︖》 ᠭᠡᠯᠡ᠃ 6 ᠬᠠᠭᠠᠨ ᠲᠡᠭᠦᠨ ᠳᠦ᠄ 《ᠪᠢ ᠶᠧᠽᠷᠧᠯ ᠬᠥᠮᠦᠨ ᠨᠠᠪᠣᠲ ᠲᠠᠢ ᠶᠠᠷᠢᠯᠴᠠᠵᠤ᠂ ᠲᠡᠭᠦᠨ ᠳᠦ᠄ 〈ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠢᠶᠡᠨ ᠨᠠᠳᠠ ᠳᠤ ᠬᠤᠳᠠᠯᠳᠤᠭᠠᠴᠢ᠃ ᠬᠡᠷᠪᠡ ᠴᠢ ᠬᠦᠰᠡᠪᠡᠯ᠂ ᠪᠢ ᠴᠢᠮᠠ ᠳᠤ ᠡᠭᠦᠨ ᠡᠴᠡ ᠥᠭᠡᠷᠡ ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠥᠭᠭᠥᠶᠡ〉 ᠭᠡᠰᠡᠨ ᠪᠣᠯᠪᠠᠴᠤ ᠲᠡᠷᠡ᠄ 〈ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠢᠶᠡᠨ ᠥᠭᠬᠦ ᠦᠭᠡᠢ〉 ᠭᠡᠰᠡᠨ》 ᠭᠡᠪᠡ᠃ 7 ᠡᠬᠡᠨᠡᠷ ᠶᠧᠽᠧᠪᠧᠯ ᠨᠢ ᠲᠡᠭᠦᠨ ᠳᠦ᠄ 《ᠬᠠᠷᠢᠨ ᠲᠠ ᠣᠳᠣ ᠢᠰᠷᠧᠯ ᠢ ᠵᠠᠬᠢᠷᠴᠤ ᠪᠠᠢᠭᠠ ᠪᠢᠰᠢ ᠤᠤ︖ ᠪᠣᠰ ᠡ᠂ ᠬᠣᠭᠣᠯᠠ ᠢᠳᠡᠭᠡᠳ ᠰᠡᠳᠬᠢᠯ ᠢᠶᠠᠨ ᠰᠡᠷᠭᠦᠭᠡ᠃ ᠪᠢ ᠥᠪᠡᠷ ᠢᠶᠡᠨ ᠶᠧᠽᠷᠧᠯ ᠬᠥᠮᠦᠨ ᠨᠠᠪᠣᠲ ᠤᠨ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠢ ᠴᠢᠮᠠ ᠳᠤ ᠠᠪᠤᠭᠠᠳ ᠥᠭᠴᠢᠭᠡᠶᠡ》 ᠭᠡᠵᠦ ᠬᠡᠯᠡᠪᠡ᠃
8 ᠶᠧᠽᠧᠪᠧᠯ ᠠᠬᠠᠪ ᠤᠨ ᠨᠡᠷᠡ ᠪᠡᠷ ᠵᠠᠬᠢᠳᠠᠯ ᠤᠳ ᠪᠢᠴᠢᠭᠡᠳ᠂ ᠲᠠᠮᠠᠭᠠ ᠪᠠᠷ ᠨᠢ ᠯᠠᠴᠠᠳᠠᠨ ᠨᠠᠪᠣᠲ ᠤᠨ ᠬᠣᠲᠠ ᠳᠤ ᠰᠠᠭᠤᠳᠠᠭ ᠠᠬᠠᠯᠠᠭᠴᠢᠳ ᠪᠣᠯᠣᠨ ᠨᠣᠶᠠᠳ ᠲᠤ ᠢᠯᠡᠭᠡᠪᠡ᠃ 9 ᠲᠡᠷᠡ ᠪᠡᠷ ᠵᠠᠬᠢᠳᠠᠯ ᠤᠳ ᠲᠠᠭᠠᠨ᠄ 《ᠪᠠᠴᠠᠭ ᠪᠠᠷᠢᠬᠤ ᠶᠢ ᠲᠤᠩ᠋ᠬᠠᠭᠯᠠᠨ ᠨᠠᠪᠣᠲ ᠢ ᠠᠷᠠᠳ ᠣᠯᠠᠨ ᠤ ᠡᠮᠦᠨᠡ ᠢᠯᠡ ᠰᠠᠭᠤᠯᠭᠠ᠃ 10 ᠲᠡᠭᠦᠨ ᠦ ᠬᠠᠷᠠᠯᠳᠤᠭᠠ ᠬᠣᠶᠠᠷ ᠪᠦᠲᠦᠯ ᠦᠭᠡᠢ ᠬᠥᠮᠦᠨ ᠢ ᠰᠠᠭᠤᠯᠭᠠᠵᠤ᠂ ᠨᠠᠪᠣᠲ ᠤᠨ ᠡᠰᠡᠷᠭᠦ ᠭᠡᠷᠡᠴᠢᠯᠡᠭᠦᠯᠵᠦ᠄ 〈ᠴᠢ ᠪᠤᠷᠬᠠᠨ ᠪᠣᠯᠣᠨ ᠬᠠᠭᠠᠨ ᠢ ᠬᠠᠷᠢᠶᠠᠭᠰᠠᠨ〉 ᠭᠡᠵᠦ ᠬᠡᠯᠡᠭᠦᠯ᠃ ᠲᠡᠭᠡᠭᠡᠳ ᠲᠡᠭᠦᠨ ᠢ ᠭᠠᠷᠭᠠᠵᠤ᠂ ᠴᠢᠯᠠᠭᠤᠳᠠᠨ ᠠᠯᠠ》 ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠪᠠ᠃ 11 ᠨᠠᠪᠣᠲ ᠤᠨ ᠬᠣᠲᠠ ᠳᠤ ᠰᠠᠭᠤᠳᠠᠭ ᠠᠬᠠᠯᠠᠭᠴᠢᠳ ᠪᠠ ᠨᠣᠶᠠᠳ ᠶᠧᠽᠧᠪᠧᠯ ᠤᠨ ᠵᠠᠬᠢᠭᠰᠠᠨ ᠢ ᠵᠠᠬᠢᠳᠠᠯ ᠳᠤ ᠪᠢᠴᠢᠵᠦ ᠢᠯᠡᠭᠡᠭᠰᠡᠨ ᠦ ᠶᠣᠰᠣᠭᠠᠷ ᠦᠢᠯᠡᠳᠦᠨ 12 ᠪᠠᠴᠠᠭ ᠪᠠᠷᠢᠬᠤ ᠶᠢ ᠲᠤᠩ᠋ᠬᠠᠭᠯᠠᠵᠤ᠂ ᠨᠠᠪᠣᠲ ᠢ ᠠᠷᠠᠳ ᠣᠯᠠᠨ ᠤ ᠡᠮᠦᠨᠡ ᠢᠯᠡ ᠰᠠᠭᠤᠯᠭᠠᠵᠠᠢ᠃ 13 ᠲᠡᠭᠡᠲᠡᠯᠡ ᠬᠣᠶᠠᠷ ᠪᠦᠲᠦᠯ ᠦᠭᠡᠢ ᠡᠷᠡ ᠭᠠᠷᠴᠤ ᠢᠷᠡᠭᠡᠳ ᠬᠠᠷᠠᠯᠳᠤᠭᠠ ᠰᠠᠭᠤᠵᠤ᠂ ᠣᠯᠠᠨ ᠤ ᠡᠮᠦᠨᠡ ᠨᠠᠪᠣᠲ ᠤᠨ ᠡᠰᠡᠷᠭᠦ ᠭᠡᠷᠡᠴᠢᠯᠡᠵᠦ᠄ 《ᠴᠢ ᠪᠤᠷᠬᠠᠨ ᠪᠣᠯᠣᠨ ᠬᠠᠭᠠᠨ ᠢ ᠬᠠᠷᠢᠶᠠᠭᠰᠠᠨ ᠶᠤᠮ》 ᠭᠡᠬᠦ ᠳᠦ᠂ ᠲᠡᠳᠡ ᠨᠠᠪᠣᠲ ᠢ ᠬᠣᠲᠠ ᠠᠴᠠ ᠭᠠᠳᠠᠭᠰᠢ ᠭᠠᠷᠭᠠᠨ ᠲᠡᠭᠦᠨ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠨ ᠠᠯᠠᠭᠠᠳ 14 ᠶᠧᠽᠧᠪᠧᠯ ᠳᠤ᠄ 《ᠨᠠᠪᠣᠲ ᠴᠢᠯᠠᠭᠤ ᠪᠠᠷ ᠰᠢᠳᠡᠭᠦᠯᠦᠨ ᠦᠬᠦᠭᠰᠡᠨ》 ᠭᠡᠵᠦ ᠬᠡᠯᠡ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠨᠠ᠃
15 ᠨᠠᠪᠣᠲ ᠴᠢᠯᠠᠭᠤ ᠪᠠᠷ ᠰᠢᠳᠡᠭᠦᠯᠦᠨ ᠦᠬᠦᠭᠰᠡᠨ ᠭᠡᠳᠡᠭ ᠢ ᠶᠧᠽᠧᠪᠧᠯ ᠰᠣᠨᠣᠰᠣᠮᠠᠭᠴᠠ ᠪᠠᠨ ᠠᠬᠠᠪ ᠲᠤ᠄ 《ᠵᠠ᠂ ᠪᠣᠰ᠃ ᠮᠥᠩᠭᠥ ᠪᠡᠷ ᠴᠤ ᠴᠢᠮᠠ ᠳᠤ ᠥᠭᠬᠦ ᠦᠭᠡᠢ ᠭᠡᠳᠡᠭ ᠪᠠᠢᠭᠰᠠᠨ ᠶᠧᠽᠷᠧᠯ ᠬᠥᠮᠦᠨ ᠨᠠᠪᠣᠲ ᠤᠨ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠢ ᠡᠵᠡᠮᠰᠢᠵᠦ ᠠᠪ᠃ ᠨᠠᠪᠣᠲ ᠠᠮᠢᠳᠤ ᠪᠢᠰᠢ᠂ ᠦᠬᠦᠭᠰᠡᠨ ᠪᠢᠯᠡ》 ᠭᠡᠪᠡ᠃ 16 ᠠᠬᠠᠪ ᠨᠠᠪᠣᠲ ᠤᠨ ᠦᠬᠦᠭᠰᠡᠨ ᠢ ᠰᠣᠨᠣᠰᠣᠭᠠᠳ ᠶᠧᠽᠷᠧᠯ ᠬᠥᠮᠦᠨ ᠨᠠᠪᠣᠲ ᠤᠨ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠢ ᠡᠵᠡᠮᠰᠢᠵᠦ ᠠᠪᠬᠤ ᠪᠠᠷ ᠪᠣᠰᠴᠤ ᠶᠠᠪᠤᠯᠠ᠃
17 ᠶᠣᠬᠣᠸᠠ ᠶᠢᠨ ᠦᠭᠡ ᠲᠢᠱᠪ ᠬᠥᠮᠦᠨ ᠧᠯᠢᠶᠠ ᠳᠤ ᠢᠷᠡᠵᠦ ᠠᠢᠯᠠᠳᠤᠨ᠄ 18 《ᠪᠣᠰ᠂ ᠴᠢ ᠰᠠᠮᠠᠷᠢᠶᠠ ᠳᠠᠬᠢ ᠢᠰᠷᠧᠯ ᠤᠨ ᠬᠠᠭᠠᠨ ᠠᠬᠠᠪ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤ᠃ ᠲᠡᠷᠡ ᠣᠳᠣ ᠨᠠᠪᠣᠲ ᠤᠨ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠢ ᠡᠵᠡᠮᠰᠢᠨ ᠠᠪᠬᠤ ᠪᠠᠷ ᠲᠡᠨᠳᠡ ᠣᠴᠢᠭᠠᠳ ᠪᠠᠢᠨᠠ︕ 19 ᠴᠢ ᠲᠡᠭᠦᠨ ᠳᠦ ᠡᠢᠨ ᠬᠦ ᠶᠠᠷᠢ᠂ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠴᠢ ᠬᠥᠮᠦᠨ ᠠᠯᠠᠴᠢᠬᠠᠭᠠᠳ᠂ ᠮᠥᠨ ᠡᠳ᠋ ᠬᠥᠷᠥᠩᠭᠡ ᠶᠢ ᠨᠢ ᠠᠪᠤᠭᠰᠠᠨ ᠪᠢᠵᠡ ᠳᠠ︖〉 ᠭᠡᠳ ᠪᠠᠰᠠ ᠲᠡᠭᠦᠨ ᠳᠦ᠄ 〈ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠨᠣᠬᠠᠳ ᠨᠠᠪᠣᠲ ᠤᠨ ᠴᠢᠰᠤ ᠶᠢ ᠳᠣᠯᠢᠶᠠᠭᠰᠠᠨ ᠭᠠᠵᠠᠷ ᠲᠤ᠂ ᠨᠣᠬᠠᠳ ᠴᠢᠨᠦ ᠴᠢᠰᠤ ᠶᠢ ᠪᠠᠰᠠ ᠳᠣᠯᠢᠶᠠᠬᠤ ᠪᠣᠯᠣᠨᠠ〉 ᠭᠡᠵᠦ ᠶᠠᠷᠢ》 ᠭᠡᠵᠡᠢ᠃
20 ᠠᠬᠠᠪ ᠧᠯᠢᠶᠠ ᠳᠤ᠄ 《ᠥ᠂ ᠮᠢᠨᠦ ᠳᠠᠢᠰᠤᠨ᠂ ᠴᠢ ᠨᠠᠮᠠᠶᠢ ᠣᠯᠣᠯᠠ》 ᠭᠡᠰᠡᠨ ᠳᠦ᠂ ᠧᠯᠢᠶᠠ᠄ 《ᠲᠡᠢᠮᠦ ᠡ᠂ ᠪᠢ ᠲᠠᠨ ᠢ ᠣᠯᠣᠯᠠ᠃ ᠤᠴᠢᠷ ᠨᠢ ᠲᠠ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠶᠢᠨ ᠡᠮᠦᠨᠡ ᠪᠤᠵᠠᠷ ᠮᠠᠭᠤ ᠶᠢ ᠦᠢᠯᠡᠳᠬᠦ ᠪᠡᠷ ᠥᠪᠡᠷ ᠢ ᠪᠠᠨ ᠬᠤᠳᠠᠯᠳᠤᠭᠰᠠᠨ ᠶᠤᠮ᠃ 21 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠴᠢᠮᠠ ᠳᠡᠭᠡᠷᠡ ᠭᠠᠢ ᠭᠠᠮᠰᠢᠭ ᠪᠠᠭᠤᠯᠭᠠᠨᠠ᠂ ᠴᠢᠨᠦ ᠬᠣᠢᠴᠢ ᠦᠷᠡ ᠤᠳᠤᠮ ᠢ ᠠᠷᠢᠯᠭᠠᠵᠤ᠂ ᠠᠬᠠᠪ ᠤᠨ ᠡᠷᠡᠴᠦᠳ ᠢ ᠪᠣᠭᠣᠯ᠂ ᠴᠢᠯᠥᠭᠡᠲᠦ ᠭᠡᠵᠦ ᠢᠯᠭᠠᠯ ᠦᠭᠡᠢ ᠢᠰᠷᠧᠯ ᠡᠴᠡ ᠤᠰᠠᠳᠬᠠᠬᠤ ᠪᠣᠯᠣᠨᠠ᠃ 22 ᠡᠢᠨ ᠬᠦ ᠪᠢ ᠴᠢᠨᠦ ᠭᠡᠷ ᠢ ᠨᠧᠪᠠᠲ ᠤᠨ ᠬᠦᠦ ᠶᠧᠷᠣᠪᠣᠶᠠᠮ ᠤᠨ ᠭᠡᠷ ᠰᠢᠭ᠂ ᠪᠠᠰᠠ ᠠᠾᠢᠶᠠ ᠶᠢᠨ ᠬᠦᠦ ᠪᠠᠱᠠ ᠶᠢᠨ ᠭᠡᠷ ᠰᠢᠭ ᠪᠣᠯᠭᠠᠬᠤ ᠨᠢ ᠨᠠᠮᠠᠶᠢ ᠬᠢᠯᠢᠩᠨᠡᠭᠦᠯᠦᠨ ᠢᠰᠷᠧᠯ ᠢᠶᠠᠷ ᠭᠡᠮ ᠦᠢᠯᠡᠳᠦᠭᠦᠯᠦᠭᠰᠡᠨ ᠦ ᠴᠢᠨᠢ ᠤᠴᠢᠷ ᠢᠶᠠᠷ ᠶᠤᠮ᠃〉 23 ᠶᠣᠬᠣᠸᠠ ᠪᠠᠰᠠ ᠶᠧᠽᠧᠪᠧᠯ ᠤᠨ ᠲᠤᠬᠠᠢ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠶᠧᠽᠷᠧᠯ ᠤᠨ ᠬᠡᠷᠡᠮ ᠦᠨ ᠳᠡᠷᠭᠡᠳᠡ ᠨᠣᠬᠠᠳ ᠶᠧᠽᠧᠪᠧᠯ ᠢ ᠢᠳᠡᠬᠦ ᠪᠣᠯᠣᠨᠠ〉᠂ 24 ᠪᠠᠰᠠ᠄ 〈ᠠᠬᠠᠪ ᠤᠨ ᠬᠢᠨ ᠡᠴᠡ ᠬᠣᠲᠠ ᠳᠤ ᠦᠬᠦᠭᠰᠡᠨ ᠢ ᠨᠢ ᠨᠣᠬᠠᠳ ᠢᠳᠡᠵᠦ᠂ ᠲᠠᠯᠠ ᠳᠤ ᠦᠬᠦᠭᠰᠡᠨ ᠢ ᠨᠢ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ ᠢᠳᠡᠬᠦ ᠪᠣᠯᠣᠨᠠ〉》 ᠭᠡᠵᠦ ᠬᠡᠯᠡᠪᠡ᠃
25 ᠦᠨᠡᠨ ᠳᠡᠭᠡᠨ ᠠᠬᠠᠪ ᠰᠢᠭ᠋ ᠡᠬᠡᠨᠡᠷ ᠶᠧᠽᠧᠪᠧᠯ ᠳᠡᠭᠡᠨ ᠤᠷᠤᠭᠤ ᠲᠠᠲᠠᠭᠳᠠᠨ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠪᠤᠵᠠᠷ ᠮᠠᠭᠤ ᠶᠢ ᠦᠢᠯᠡᠳᠬᠦ ᠳᠦ ᠥᠪᠡᠷ ᠢ ᠪᠠᠨ ᠬᠤᠳᠠᠯᠳᠤᠭᠰᠠᠨ ᠬᠥᠮᠦᠨ ᠤᠷᠢᠳᠤ ᠡᠮᠦᠨᠡ ᠪᠠᠢᠭᠠ ᠦᠭᠡᠢ᠃ 26 ᠠᠬᠠᠪ ᠤᠨ ᠰᠢᠲᠦᠭᠡᠨ ᠨᠦᠭᠦᠳ ᠢ ᠳᠠᠭᠠᠭᠰᠠᠨ ᠵᠢᠭᠰᠢᠭᠦᠷᠢᠲᠦ ᠶᠠᠪᠤᠳᠠᠯ ᠨᠢ ᠶᠣᠬᠣᠸᠠ ᠶᠢᠨ ᠢᠰᠷᠧᠯᠴᠦᠳ ᠦᠨ ᠡᠮᠦᠨᠡ ᠡᠴᠡ ᠵᠠᠢᠯᠠᠭᠤᠯᠤᠭᠰᠠᠨ ᠠᠮᠣᠷᠢᠴᠤᠳ ᠤᠨ ᠦᠢᠯᠡᠳᠦᠭᠰᠡᠨ ᠠᠯᠢᠪᠠ ᠶᠠᠪᠤᠳᠠᠯ ᠲᠠᠢ ᠠᠳᠠᠯᠢ ᠪᠠᠢᠯᠠ᠃
27 ᠬᠠᠷᠢᠨ ᠠᠬᠠᠪ ᠡᠳᠡᠭᠡᠷ ᠦᠭᠡ ᠶᠢ ᠰᠣᠨᠣᠰᠣᠮᠠᠭᠴᠠ ᠪᠠᠨ ᠬᠤᠪᠴᠠᠰᠤ ᠪᠠᠨ ᠤᠷᠠᠨ᠂ ᠪᠡᠶᠡ ᠳᠡᠭᠡᠨ ᠲᠠᠭᠠᠷ ᠡᠮᠦᠰᠴᠦ᠂ ᠪᠠᠴᠠᠭ ᠪᠠᠷᠢᠨ᠂ ᠲᠠᠭᠠᠷ ᠤᠨ ᠬᠤᠪᠴᠠᠰᠤ ᠲᠠᠢ ᠪᠠᠨ ᠬᠡᠪᠲᠡᠵᠦ ᠳᠠᠷᠤᠤᠬᠠᠨ ᠶᠠᠪᠤᠳᠠᠭ ᠪᠣᠯᠵᠠᠢ᠃ 28 ᠲᠡᠭᠡᠬᠦ ᠳᠦ ᠶᠣᠬᠣᠸᠠ ᠶᠢᠨ ᠦᠭᠡ ᠲᠢᠱᠪ ᠬᠥᠮᠦᠨ ᠧᠯᠢᠶᠠ ᠳᠤ ᠢᠷᠡᠵᠦ᠄ 29 《ᠮᠢᠨᠦ ᠡᠮᠦᠨᠡ ᠠᠬᠠᠪ ᠥᠪᠡᠷ ᠢ ᠪᠠᠨ ᠳᠠᠷᠤᠤ ᠪᠣᠯᠭᠠᠭᠰᠠᠨ ᠢ ᠴᠢ ᠬᠠᠷᠠᠪᠠ ᠤᠤ︖ ᠲᠡᠷᠡ ᠮᠢᠨᠦ ᠡᠮᠦᠨᠡ ᠥᠪᠡᠷ ᠢ ᠪᠠᠨ ᠳᠠᠷᠤᠤ ᠪᠣᠯᠭᠠᠭᠰᠠᠨ ᠲᠤᠯᠠ ᠪᠢ ᠡᠨᠡ ᠭᠠᠢ ᠭᠠᠮᠰᠢᠭ ᠢ ᠲᠡᠭᠦᠨ ᠦ ᠡᠳᠦᠷ ᠤᠳ ᠲᠤ ᠪᠠᠭᠤᠯᠭᠠᠬᠤ ᠦᠭᠡᠢ᠂ ᠬᠠᠷᠢᠨ ᠲᠡᠭᠦᠨ ᠦ ᠬᠦᠦ ᠶᠢᠨ ᠡᠳᠦᠷ ᠤᠳ ᠲᠤ ᠭᠡᠷ ᠳᠡᠭᠡᠷᠡ ᠨᠢ ᠪᠠᠭᠤᠯᠭᠠᠨᠠ》 ᠭᠡᠪᠡ᠃