ᠬᠠᠭᠠᠳ ᠤᠨ ᠳᠡᠭᠡᠳᠦ ᠠᠷᠪᠠᠨ ᠨᠢᠭᠡ
 ᠰᠣᠯᠣᠮᠣᠨ ᠶᠣᠬᠣᠸᠠ ᠠᠴᠠ ᠡᠷᠭᠢᠪᠡ

1 ᠰᠣᠯᠣᠮᠣᠨ ᠬᠠᠭᠠᠨ ᠹᠠᠷᠠᠣ᠋ ᠶᠢᠨ ᠥᠬᠢᠨ ᠡᠴᠡ ᠭᠠᠳᠠᠨ᠎ᠠ ᠮᠣᠶᠠᠪ᠂ ᠠᠮᠣᠨ᠂ ᠡᠳᠣᠮ᠂ ᠰᠢᠢᠳᠣᠨ᠂ ᠾᠢᠲ ᠵᠡᠷᠭᠡ ᠣᠯᠠᠨ ᠬᠠᠷᠢ ᠣᠷᠣᠨ ᠤ ᠡᠮᠡᠭᠲᠡᠢᠴᠦᠳ ᠢ ᠬᠠᠢᠷᠠᠯᠠᠳᠠᠭ ᠪᠠᠢᠯ᠎ᠠ᠃ 2 ᠡᠳᠡᠭᠡᠷ ᠦᠨᠳᠦᠰᠦᠲᠡᠨ ᠦ ᠲᠠᠯ᠎ᠠ ᠪᠠᠷ ᠶᠣᠬᠣᠸᠠ ᠢᠰᠷᠧᠯᠴᠦᠳ ᠲᠦ ᠠᠢᠯᠠᠳᠤᠨ᠄ 《ᠲᠠ ᠨᠠᠷ ᠲᠡᠳᠡᠨ ᠲᠡᠢ᠂ ᠲᠡᠳᠡ ᠴᠤ ᠲᠠ ᠨᠠᠷ ᠲᠠᠢ ᠤᠷᠤᠭᠯᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠳᠡ ᠲᠠ ᠨᠠᠷ ᠤᠨ ᠰᠡᠳᠬᠢᠯ ᠢ ᠯᠠᠪᠲᠠᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠤᠷᠬᠠᠳ ᠤᠷᠤᠭᠤ ᠡᠷᠭᠢᠭᠦᠯᠬᠦ ᠪᠣᠯᠣᠨ᠎ᠠ》 ᠭᠡᠰᠡᠨ ᠪᠣᠯᠪᠠᠴᠤ ᠰᠣᠯᠣᠮᠣᠨ ᠲᠡᠳᠡᠨ ᠳᠦ ᠡᠭᠡᠯᠢᠰᠢᠨ ᠲᠡᠳᠡᠨ ᠢ ᠬᠠᠢᠷᠠᠯᠠᠵᠤ ᠪᠠᠢᠯ᠎ᠠ᠃ 3 ᠲᠡᠷᠡ ᠪᠡᠷ ᠳᠣᠯᠣᠭᠠᠨ ᠵᠠᠭᠤᠨ ᠰᠤᠷᠪᠤᠯᠵᠢᠲᠤ ᠭᠠᠷᠤᠯ ᠲᠠᠢ ᠡᠬᠡᠨᠡᠷ ᠲᠡᠢ᠂ ᠪᠠᠰᠠ ᠭᠤᠷᠪᠠᠨ ᠵᠠᠭᠤᠨ ᠲᠠᠲᠠᠪᠤᠷᠢ ᠡᠬᠡᠨᠡᠷ ᠲᠡᠢ ᠪᠠᠢᠭᠰᠠᠨ ᠪᠥᠭᠡᠳ ᠡᠳᠡᠭᠡᠷ ᠡᠬᠡᠨᠡᠷ ᠨᠢ ᠲᠡᠭᠦᠨ ᠦ ᠰᠡᠳᠬᠢᠯ ᠢ ᠡᠷᠭᠢᠭᠦᠯᠵᠡᠢ᠃ 4 ᠰᠣᠯᠣᠮᠣᠨ ᠡᠪᠦᠭᠡᠷᠡᠬᠦ ᠳᠦ᠂ ᠡᠬᠡᠨᠡᠷ ᠤᠳ ᠨᠢ ᠲᠡᠭᠦᠨ ᠦ ᠰᠡᠳᠬᠢᠯ ᠢ ᠥᠭᠡᠷ᠎ᠡ ᠪᠤᠷᠬᠠᠳ ᠤᠷᠤᠭᠤ ᠡᠷᠭᠢᠭᠦᠯᠦᠭᠰᠡᠨ ᠢᠶᠡᠷ ᠲᠡᠭᠦᠨ ᠦ ᠰᠡᠳᠬᠢᠯ ᠪᠤᠷᠬᠠᠨ ᠤ ᠡᠮᠦᠨ᠎ᠡ ᠦᠨᠡᠨᠴᠢ ᠪᠠᠢᠭᠰᠠᠨ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠰᠡᠳᠬᠢᠯ ᠲᠠᠢ ᠠᠳᠠᠯᠢ ᠪᠢᠰᠢ ᠪᠠᠢᠪᠠ᠃ 5 ᠰᠣᠯᠣᠮᠣᠨ ᠰᠢᠢᠳᠣᠨᠴᠤᠳ ᠤᠨ ᠥᠬᠢᠨ ᠲᠩᠷᠢ ᠠᠱᠲ᠋ᠣᠷᠧᠲ᠂ ᠮᠥᠨ ᠠᠮᠣᠨᠴᠤᠳ ᠤᠨ ᠵᠢᠭᠰᠢᠭᠦᠷᠢᠲᠦ ᠰᠢᠲᠦᠭᠡᠨ ᠮᠣᠯᠧᠺ ᠢ ᠳᠠᠭᠠᠭᠰᠠᠨ ᠢᠶᠠᠷ 6 ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠶᠢᠨ ᠡᠮᠦᠨ᠎ᠡ ᠪᠤᠵᠠᠷ ᠮᠠᠭᠤ ᠵᠦᠢᠯ ᠦᠢᠯᠡᠳᠴᠡᠢ᠃ ᠲᠡᠷᠡ ᠶᠣᠬᠣᠸᠠ ᠶᠢ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠭᠦᠢᠴᠡᠳ ᠳᠠᠭᠠᠭᠰᠠᠨ ᠰᠢᠭ᠋ ᠳᠠᠭᠠᠭᠰᠠᠨ ᠪᠢᠰᠢ᠃ 7 ᠲᠡᠷᠡ ᠦᠶ᠎ᠡ ᠳᠦ ᠰᠣᠯᠣᠮᠣᠨ ᠮᠣᠶᠠᠪ ᠤᠨ ᠵᠢᠭᠰᠢᠭᠦᠷᠢᠲᠦ ᠰᠢᠲᠦᠭᠡᠨ ᠺᠧᠮᠣᠰ ᠪᠣᠯᠣᠨ ᠠᠮᠣᠨᠴᠤᠳ ᠤᠨ ᠵᠢᠭᠰᠢᠭᠦᠷᠢᠲᠦ ᠰᠢᠲᠦᠭᠡᠨ ᠮᠣᠯᠧᠺ ᠲᠤ ᠵᠣᠷᠢᠭᠤᠯᠤᠨ ᠶᠧᠷᠦ᠋ᠰᠠᠯᠧᠮ ᠤᠨ ᠵᠡᠭᠦᠨ ᠵᠦᠭ ᠦᠨ ᠠᠭᠤᠯᠠᠨ ᠳᠡᠭᠡᠷ᠎ᠡ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠪᠣᠰᠬᠠᠵᠤ᠂ 8 ᠮᠥᠨ ᠬᠠᠷᠢ ᠣᠷᠣᠨ ᠤ ᠡᠬᠡᠨᠡᠷ ᠪᠣᠯᠭᠠᠨ ᠤ ᠪᠠᠨ ᠲᠥᠯᠥᠭᠡ ᠲᠡᠢᠨ ᠬᠦ ᠦᠢᠯᠡᠳᠦᠭᠰᠡᠨ ᠳᠦ᠂ ᠲᠡᠳᠡ ᠨᠠᠷ ᠨᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠤᠷᠬᠠᠳ ᠲᠤ ᠤᠲᠤᠯᠭ᠎ᠠ ᠤᠭᠤᠭᠢᠭᠤᠯᠤᠨ ᠲᠠᠬᠢᠯ ᠡᠷᠭᠦᠵᠦ ᠪᠠᠢᠯ᠎ᠠ᠃

9 ᠰᠣᠯᠣᠮᠣᠨ ᠤ ᠰᠡᠳᠬᠢᠯ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠠᠴᠠ ᠰᠠᠯᠵᠤ ᠡᠷᠭᠢᠭᠰᠡᠨ ᠲᠤᠯᠠ ᠶᠣᠬᠣᠸᠠ ᠰᠣᠯᠣᠮᠣᠨ ᠳᠤ ᠬᠢᠯᠢᠩᠨᠡᠪᠡ᠃ ᠤᠤᠯ ᠨᠢ ᠶᠣᠬᠣᠸᠠ ᠲᠡᠭᠦᠨ ᠳᠦ ᠬᠣᠶᠠᠷ ᠴᠤ ᠤᠳᠠᠭ᠎ᠠ ᠦᠵᠡᠭᠳᠡᠨ᠂ 10 ᠥᠭᠡᠷ᠎ᠡ ᠪᠤᠷᠬᠠᠳ ᠢ ᠪᠦᠦ ᠳᠠᠭ᠎ᠠ ᠭᠡᠵᠦ ᠰᠠᠨᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢᠨ ᠲᠤᠰᠢᠶᠠᠯ ᠢ ᠳᠠᠭᠠᠭᠰᠠᠨ ᠦᠭᠡᠢ᠃ 11 ᠶᠣᠬᠣᠸᠠ ᠰᠣᠯᠣᠮᠣᠨ ᠳᠤ ᠠᠢᠯᠠᠳᠤᠨ᠄ 《ᠴᠢ ᠡᠢᠮᠦ ᠣᠪᠣᠷ ᠲᠠᠢ ᠪᠠᠢᠵᠤ᠂ ᠮᠢᠨᠦ ᠭᠡᠷ᠎ᠡ ᠶᠢ ᠴᠤ᠂ ᠮᠢᠨᠦ ᠴᠢᠮ᠎ᠠ ᠳᠤ ᠲᠤᠰᠢᠶᠠᠭᠰᠠᠨ ᠵᠢᠷᠤᠮ ᠢ ᠴᠤ ᠰᠠᠬᠢᠭ᠎ᠠ ᠦᠭᠡᠢ ᠤᠴᠢᠷ ᠠᠴᠠ ᠪᠢ ᠴᠢᠮ᠎ᠠ ᠠᠴᠠ ᠡᠨᠡ ᠬᠠᠭᠠᠨᠴᠢᠯᠠᠯ ᠢ ᠵᠠᠪᠠᠯ ᠲᠠᠰᠤᠳᠠᠨ ᠠᠪᠴᠤ᠂ ᠵᠠᠷᠤᠴᠠ ᠳᠤ ᠴᠢᠨᠢ ᠥᠭᠬᠦ ᠪᠣᠯᠣᠨ᠎ᠠ᠃ 12 ᠬᠠᠷᠢᠨ ᠴᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠤᠴᠢᠷ ᠢᠶᠠᠷ ᠪᠢ ᠴᠢᠨᠦ ᠠᠮᠢᠳᠤ ᠪᠠᠢᠭ᠎ᠠ ᠡᠳᠦᠷ ᠤᠳ ᠲᠤ ᠲᠡᠢᠨ ᠬᠦ ᠦᠢᠯᠡᠳᠬᠦ ᠦᠭᠡᠢ᠂ ᠬᠠᠷᠢᠨ ᠡᠨᠡ ᠤᠯᠤᠰ ᠢ ᠴᠢᠨᠦ ᠬᠥᠪᠡᠭᠦᠨ ᠦ ᠭᠠᠷ ᠠᠴᠠ ᠲᠠᠰᠤᠳᠠᠨ ᠠᠪᠬᠤ ᠪᠣᠯᠣᠨ᠎ᠠ᠃ 13 ᠭᠡᠪᠡᠴᠦ ᠪᠢ ᠡᠨᠡ ᠬᠠᠭᠠᠨᠴᠢᠯᠠᠯ ᠢ ᠪᠦᠬᠦᠯᠢ ᠳᠦᠨᠢ ᠲᠠᠰᠤᠳᠠᠨ ᠠᠪᠬᠤ ᠪᠢᠰᠢ᠂ ᠬᠠᠷᠢᠨ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠪᠣᠯᠣᠨ ᠥᠪᠡᠷ ᠦᠨ ᠢᠶᠠᠨ ᠰᠣᠩ᠋ᠭᠣᠭᠰᠠᠨ ᠶᠧᠷᠦ᠋ᠰᠠᠯᠧᠮ ᠤᠨ ᠲᠥᠯᠥᠭᠡ ᠨᠢᠭᠡ ᠣᠪᠣᠭ ᠢ ᠴᠢᠨᠦ ᠬᠥᠪᠡᠭᠦᠨ ᠳᠦ ᠦᠯᠡᠳᠡᠭᠡᠨ᠎ᠡ》 ᠭᠡᠯ᠎ᠡ᠃
 ᠰᠣᠯᠣᠮᠣᠨ ᠤ ᠳᠠᠢᠰᠤᠨ ᠨᠤᠭᠤᠳ

14 ᠶᠣᠬᠣᠸᠠ ᠡᠳᠣᠮ ᠬᠥᠮᠦᠨ ᠬᠠᠳᠠᠳ᠋ ᠢ ᠪᠣᠰᠬᠠᠵᠤ ᠰᠣᠯᠣᠮᠣᠨ ᠤ ᠥᠰᠲᠡᠨ ᠪᠣᠯᠭᠠᠭᠰᠠᠨ ᠪᠠᠢᠨ᠎ᠠ᠃ ᠲᠡᠷᠡ ᠡᠳᠣᠮ ᠬᠠᠭᠠᠨ ᠤ ᠦᠷ᠎ᠡ ᠤᠳᠤᠮ ᠪᠠᠢᠪᠠ᠃ 15 ᠤᠷᠢᠳᠤ ᠨᠢ ᠳ᠋ᠠᠸᠢᠳ᠋ ᠡᠳᠣᠮ ᠢ ᠡᠵᠡᠯᠡᠭᠰᠡᠨ ᠦ ᠳᠠᠷᠠᠭ᠎ᠠ᠂ ᠴᠡᠷᠢᠭ ᠤᠨ ᠵᠠᠩᠵᠤᠨ ᠶᠣᠶᠠᠪ ᠳᠠᠢᠨ ᠳᠤ ᠠᠮᠢ ᠡᠷᠡᠰᠳᠡᠭᠰᠡᠳ ᠢᠶᠡᠨ ᠣᠷᠣᠰᠢᠭᠤᠯᠬᠤ ᠪᠠᠷ ᠲᠡᠨᠳᠡ ᠣᠴᠢᠬᠤ ᠳᠠᠭᠠᠨ ᠡᠳᠣᠮ ᠤᠨ ᠪᠦᠬᠦ ᠡᠷᠡᠴᠦᠳ ᠢ ᠰᠥᠨᠥᠭᠡᠭᠰᠡᠨ ᠪᠠᠢᠵᠠᠢ᠃ 16 (ᠶᠣᠶᠠᠪ ᠪᠣᠯᠣᠨ ᠪᠦᠬᠦ ᠢᠰᠷᠧᠯ ᠲᠡᠨᠳᠡ ᠵᠢᠷᠭᠤᠭᠠᠨ ᠰᠠᠷ᠎ᠠ ᠪᠠᠢᠵᠤ᠂ ᠡᠳᠣᠮ ᠤᠨ ᠪᠦᠬᠦ ᠡᠷᠡᠴᠦᠳ ᠢ ᠤᠰᠠᠳᠬᠠᠪᠠ᠃) 17 ᠬᠠᠷᠢᠨ ᠬᠠᠳᠠᠳ᠋ ᠡᠴᠢᠭᠡ ᠳᠦᠨᠢ ᠵᠠᠷᠤᠴᠠᠯᠠᠭᠳᠠᠳᠠᠭ ᠪᠠᠢᠭᠰᠠᠨ ᠬᠡᠰᠡᠭ ᠡᠳᠣᠮᠴᠤᠳ ᠤᠨ ᠬᠠᠮᠲᠤ ᠶᠧᠵᠢᠫᠲ ᠤᠷᠤᠭᠤ ᠵᠢᠭᠤᠲᠠᠨ ᠭᠠᠷᠤᠭᠰᠠᠨ ᠪᠠᠢᠨ᠎ᠠ᠃ ᠲᠡᠷᠡ ᠦᠶ᠎ᠡ ᠳᠦ ᠬᠠᠳᠠᠳ᠋ ᠪᠠᠯᠴᠢᠷ ᠬᠥᠪᠡᠭᠦᠨ ᠪᠠᠢᠪᠠ᠃ 18 ᠲᠡᠳᠡ ᠮᠢᠳᠢᠶᠠᠨ ᠠᠴᠠ ᠬᠥᠳᠡᠯᠦᠨ ᠭᠠᠷᠴᠤ ᠫᠠᠷᠠᠨ ᠳᠤ ᠬᠦᠷᠦᠭᠡᠳ᠂ ᠲᠡᠨᠳᠡ ᠡᠴᠡ ᠬᠡᠳᠦᠨ ᠡᠷ᠎ᠡ ᠳᠠᠭᠠᠭᠤᠯᠤᠨ ᠶᠧᠵᠢᠫᠲ ᠲᠤ ᠣᠴᠢᠵᠤ᠂ ᠶᠧᠵᠢᠫᠲ ᠤᠨ ᠬᠠᠭᠠᠨ ᠹᠠᠷᠠᠣ᠋ ᠳᠤ ᠪᠠᠷᠠᠭᠠᠯᠬᠠᠭᠰᠠᠨ ᠳᠤ᠂ ᠹᠠᠷᠠᠣ᠋ ᠲᠡᠭᠦᠨ ᠳᠦ ᠭᠡᠷ ᠣᠷᠣᠨ ᠥᠭᠴᠦ᠂ ᠲᠡᠭᠦᠨ ᠢ ᠬᠣᠭᠣᠯᠠ ᠬᠦᠨᠡᠰᠦ ᠪᠡᠷ ᠬᠠᠩ᠋ᠭᠠᠭᠰᠠᠨ ᠢᠶᠠᠷ ᠦᠯᠦ ᠪᠠᠷᠠᠮ ᠭᠠᠵᠠᠷ ᠴᠤ ᠥᠭᠴᠡᠢ᠃ 19 ᠬᠠᠳᠠᠳ᠋ ᠹᠠᠷᠠᠣ᠋ ᠶᠢᠨ ᠲᠠᠭᠠᠯᠠᠯ ᠳᠤ ᠮᠠᠰᠢ ᠶᠡᠬᠡ ᠨᠡᠢᠴᠡᠭᠰᠡᠨ ᠢᠶᠡᠷ ᠹᠠᠷᠠᠣ᠋ ᠲᠡᠭᠦᠨ ᠳᠦ ᠡᠬᠡᠨᠡᠷ ᠲᠠᠫᠧᠨᠧᠰ ᠬᠠᠲᠤᠨ ᠤ ᠪᠠᠨ ᠥᠬᠢᠨ ᠳᠡᠭᠦᠦ ᠶᠢ ᠡᠬᠡᠨᠡᠷ ᠪᠣᠯᠭᠠᠨ ᠥᠭᠴᠡᠢ᠃ 20 ᠲᠠᠫᠧᠨᠧᠰ ᠤᠨ ᠥᠬᠢᠨ ᠳᠡᠭᠦᠦ ᠬᠦᠦ ᠭᠧᠨᠦ᠋ᠪᠠᠲ ᠢ ᠨᠢ ᠲᠥᠷᠥᠭᠦᠯᠦᠭᠰᠡᠨ ᠳᠦ᠂ ᠲᠠᠫᠧᠨᠧᠰ ᠲᠡᠭᠦᠨ ᠢ ᠹᠠᠷᠠᠣ᠋ ᠶᠢᠨ ᠣᠷᠳᠣᠨ ᠳᠤ ᠥᠰᠭᠡᠭᠰᠡᠨ ᠪᠠᠢᠵᠠᠢ᠃ ᠭᠧᠨᠦ᠋ᠪᠠᠲ ᠹᠠᠷᠠᠣ᠋ ᠶᠢᠨ ᠣᠷᠳᠣᠨ ᠳᠤ ᠹᠠᠷᠠᠣ᠋ ᠶᠢᠨ ᠬᠥᠪᠡᠭᠦᠳ ᠲᠡᠢ ᠬᠠᠮᠲᠤ ᠥᠰᠥᠯ᠎ᠡ᠃ 21 ᠬᠠᠳᠠᠳ᠋ ᠶᠧᠵᠢᠫᠲ ᠲᠤ ᠪᠠᠢᠬᠤ ᠳᠠᠭᠠᠨ ᠳ᠋ᠠᠸᠢᠳ᠋ ᠤᠨ ᠡᠴᠢᠭᠡ ᠡᠪᠦᠭᠡᠳ ᠲᠡᠢ ᠪᠡᠨ ᠨᠣᠢᠷᠰᠣᠵᠤ᠂ ᠴᠡᠷᠢᠭ ᠤᠨ ᠵᠠᠩᠵᠤᠨ ᠶᠣᠶᠠᠪ ᠤᠨ ᠨᠠᠰᠤ ᠪᠠᠷᠠᠭᠰᠠᠨ ᠢ ᠰᠣᠨᠣᠰᠣᠭᠠᠳ ᠹᠠᠷᠠᠣ᠋ ᠡᠴᠡ᠄ 《ᠨᠠᠮᠠᠶᠢ ᠶᠠᠪᠤᠭᠤᠯᠤᠭᠠᠴᠢ᠂ ᠪᠢ ᠲᠥᠷᠥᠭᠰᠡᠨ ᠨᠤᠲᠤᠭ ᠤᠷᠤᠭᠤ ᠪᠠᠨ ᠶᠠᠪᠤᠶ᠎ᠠ》 ᠭᠡᠵᠦ ᠭᠤᠶᠤᠪᠠ᠃ 22 ᠹᠠᠷᠠᠣ᠋ ᠲᠡᠭᠦᠨ ᠳᠦ᠄ 《ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠬᠤ ᠳᠤ ᠴᠢᠮ᠎ᠠ ᠳᠤ ᠶᠠᠭᠤ ᠳᠤᠲᠠᠭᠠᠳ ᠴᠢ ᠨᠤᠲᠤᠭ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠭᠡᠬᠦ ᠨᠢ ᠪᠤᠢ︖》 ᠭᠡᠬᠦ ᠳᠦ᠂ ᠬᠠᠳᠠᠳ᠋᠄ 《ᠦᠭᠡᠢ᠂ ᠬᠠᠷᠢᠨ ᠲᠠ ᠨᠠᠮᠠᠶᠢ ᠵᠠᠪᠠᠯ ᠶᠠᠪᠤᠭᠤᠯᠤᠭᠠᠴᠢ》 ᠭᠡᠯ᠎ᠡ᠃ 23 ᠪᠤᠷᠬᠠᠨ ᠪᠠᠰᠠ ᠡᠯᠢᠶᠠᠳᠠ ᠶᠢᠨ ᠬᠦᠦ ᠷᠧᠽᠣᠨ ᠢ ᠪᠣᠰᠬᠠᠵᠤ ᠰᠣᠯᠣᠮᠣᠨ ᠤ ᠥᠰᠲᠡᠨ ᠪᠣᠯᠭᠠᠭᠰᠠᠨ ᠪᠠᠢᠯ᠎ᠠ᠃ ᠤᠷᠢᠳᠤ ᠨᠢ ᠲᠡᠷᠡ ᠥᠪᠡᠷ ᠦᠨ ᠢᠶᠠᠨ ᠡᠵᠡᠨ ᠽᠣᠪᠠ ᠶᠢᠨ ᠬᠠᠭᠠᠨ ᠬᠠᠳᠠᠳᠧᠽᠧᠷ ᠡᠴᠡ ᠵᠢᠭᠤᠲᠠᠭᠰᠠᠨ ᠪᠠᠢᠪᠠ᠃ 24 ᠳ᠋ᠠᠸᠢᠳ᠋ ᠽᠣᠪᠠᠴᠤᠳ ᠢ ᠰᠥᠨᠥᠭᠡᠬᠦ ᠳᠦ᠂ ᠷᠧᠽᠣᠨ ᠬᠥᠮᠦᠰ ᠢ ᠴᠤᠭᠯᠠᠭᠤᠯᠵᠤ᠂ ᠲᠡᠷᠡ ᠪᠦᠯᠦᠭ ᠦᠨ ᠲᠣᠯᠣᠭᠠᠢᠯᠠᠭᠴᠢ ᠪᠣᠯᠪᠠ᠃ ᠲᠡᠳᠡ ᠳ᠋ᠠᠮᠠᠰᠺᠦ᠋ᠰ ᠲᠤ ᠣᠴᠢᠨ ᠰᠠᠭᠤᠷᠢᠰᠢᠵᠤ᠂ ᠲᠡᠭᠦᠨ ᠢ ᠬᠠᠭᠠᠨ ᠪᠣᠯᠭᠠᠵᠠᠢ᠃ 25 ᠷᠧᠽᠣᠨ ᠰᠣᠯᠣᠮᠣᠨ ᠤ ᠪᠦᠬᠦ ᠡᠳᠦᠷ ᠤᠳ ᠢᠶᠠᠷ ᠢᠰᠷᠧᠯ ᠢ ᠳᠠᠢᠰᠤᠩᠨᠠᠵᠤ᠂ ᠬᠠᠳᠠᠳ᠋ ᠲᠠᠢ ᠠᠳᠠᠯᠢ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠳᠠᠭ ᠪᠠᠢᠪᠠ᠃ ᠲᠡᠷᠡ ᠢᠰᠷᠧᠯ ᠳᠤ ᠥᠰᠢᠶᠡᠷᠭᠡᠭᠰᠡᠭᠡᠷ ᠠᠷᠠᠮ ᠢ ᠨᠣᠶᠠᠷᠬᠠᠵᠤ ᠪᠠᠢᠯ᠎ᠠ᠃
 ᠶᠧᠷᠣᠪᠣᠶᠠᠮ ᠤᠷᠪᠠᠪᠠ

26 ᠰᠣᠯᠣᠮᠣᠨ ᠤ ᠲᠦᠰᠢᠮᠡᠯ ᠪᠠᠢᠭᠰᠠᠨ᠂ ᠨᠧᠪᠠᠲ ᠤᠨ ᠬᠦᠦ ᠶᠧᠷᠣᠪᠣᠶᠠᠮ ᠪᠠᠰᠠ ᠬᠠᠭᠠᠨ ᠤ ᠡᠰᠡᠷᠭᠦ ᠨᠢᠳᠤᠷᠭ᠎ᠠ ᠵᠠᠩᠭᠢᠳᠪᠠ᠃ ᠲᠡᠷᠡ ᠽᠧᠷᠧᠳᠠ ᠭᠠᠷᠤᠯ ᠲᠠᠢ ᠡᠹᠷᠠᠢᠮ ᠬᠥᠮᠦᠨ ᠪᠥᠭᠡᠳ ᠲᠡᠭᠦᠨ ᠦ ᠡᠵᠢ ᠪᠣᠯ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠽᠧᠷᠣᠶ᠎ᠠ ᠪᠠᠢᠪᠠ᠃ 27 ᠲᠡᠷᠡ ᠬᠠᠭᠠᠨ ᠤ ᠡᠰᠡᠷᠭᠦ ᠨᠢᠳᠤᠷᠭ᠎ᠠ ᠵᠠᠩᠭᠢᠳᠤᠭᠰᠠᠨ ᠤ ᠤᠴᠢᠷ ᠨᠢ ᠡᠨᠡ ᠪᠠᠢᠵᠠᠢ᠄ ᠰᠣᠯᠣᠮᠣᠨ ᠮᠢᠯᠣ᠋ ᠶᠢ ᠪᠠᠷᠢᠵᠤ᠂ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠬᠣᠲᠠ ᠶᠢᠨ ᠬᠡᠷᠡᠮ ᠦᠨ ᠴᠥᠮᠥᠷᠡᠭᠰᠡᠨ ᠬᠡᠰᠡᠭ ᠢ ᠪᠢᠲᠡᠭᠦᠯᠡᠭᠦᠯᠵᠦ ᠪᠠᠢᠬᠤ ᠦᠶ᠎ᠡ ᠳᠦ᠂ 28 ᠶᠧᠷᠣᠪᠣᠶᠠᠮ ᠭᠡᠭᠴᠢ ᠡᠨᠡ ᠬᠥᠮᠦᠨ ᠶᠡᠬᠡ ᠴᠢᠳᠠᠪᠤᠷᠢ ᠲᠠᠢ ᠪᠠᠢᠬᠤ ᠪᠠᠨ ᠬᠠᠷᠠᠭᠤᠯᠵᠠᠢ᠃ ᠰᠣᠯᠣᠮᠣᠨ ᠡᠨᠡ ᠵᠠᠯᠠᠭᠤ ᠶᠢᠨ ᠠᠵᠢᠯᠯᠠᠵᠤ ᠪᠤᠢ ᠪᠠᠢᠳᠠᠯ ᠢ ᠬᠠᠷᠠᠭᠠᠳ ᠲᠡᠭᠦᠨ ᠢᠶᠡᠷ ᠶᠣᠰᠧᠹ ᠤᠨ ᠭᠡᠷ ᠦᠨ ᠬᠢᠨ ᠤ ᠪᠦᠬᠦ ᠠᠵᠢᠯᠴᠢᠳ ᠢ ᠬᠠᠷᠢᠭᠤᠴᠠᠭᠤᠯᠵᠠᠢ᠃ 29 ᠲᠡᠷᠡ ᠦᠶ᠎ᠡ ᠳᠦ ᠶᠧᠷᠣᠪᠣᠶᠠᠮ ᠶᠧᠷᠦ᠋ᠰᠠᠯᠧᠮ ᠡᠴᠡ ᠭᠠᠷᠴᠤ ᠶᠠᠪᠤᠬᠤ ᠳᠠᠭᠠᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠱᠢᠯᠣ᠋ ᠬᠥᠮᠦᠨ ᠠᠾᠢᠶᠠ ᠲᠠᠢ ᠵᠠᠮ ᠳᠡᠭᠡᠷ᠎ᠡ ᠲᠠᠭᠠᠷᠠᠯᠳᠤᠪᠠ᠃ ᠠᠾᠢᠶᠠ ᠰᠢᠨ᠎ᠡ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠪᠥᠭᠡᠳ ᠲᠡᠷᠡ ᠬᠣᠶᠠᠭᠤᠯᠠᠬᠠᠨ ᠢᠶᠠᠨ ᠬᠡᠭᠡᠷ᠎ᠡ ᠲᠠᠯ᠎ᠠ ᠳᠤ ᠪᠠᠢᠪᠠ᠃ 30 ᠠᠾᠢᠶᠠ ᠥᠪᠡᠷ ᠦᠨ ᠢᠶᠠᠨ ᠰᠢᠨ᠎ᠡ ᠳᠡᠪᠡᠯ ᠢᠶᠡᠨ ᠠᠷᠪᠠᠨ ᠬᠣᠶᠠᠷ ᠬᠡᠰᠡᠭ ᠪᠣᠯᠭᠠᠨ ᠤᠷᠠᠵᠤ᠂ 31 ᠶᠧᠷᠣᠪᠣᠶᠠᠮ ᠳᠤ᠄ 《ᠠᠷᠪᠠᠨ ᠬᠡᠰᠡᠭ ᠢ ᠨᠢ ᠴᠢ ᠠᠪ᠃ ᠤᠴᠢᠷ ᠨᠢ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨ᠎ᠠ᠄ 〈ᠬᠠᠷᠠ᠂ ᠪᠢ ᠰᠣᠯᠣᠮᠣᠨ ᠤ ᠭᠠᠷ ᠠᠴᠠ ᠬᠠᠭᠠᠨᠴᠢᠯᠠᠯ ᠢ ᠨᠢ ᠲᠠᠰᠤᠳᠠᠨ ᠠᠪᠴᠤ᠂ ᠠᠷᠪᠠᠨ ᠣᠪᠣᠭ ᠢ ᠨᠢ ᠴᠢᠮ᠎ᠠ ᠳᠤ ᠥᠭᠬᠦ ᠭᠡᠵᠦ ᠪᠠᠢᠨ᠎ᠠ︕ 32 ᠬᠠᠷᠢᠨ ᠪᠢ ᠨᠢᠭᠡ ᠯᠠ ᠣᠪᠣᠭ ᠢ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠲᠥᠯᠥᠭᠡ᠂ ᠮᠥᠨ ᠢᠰᠷᠧᠯ ᠤᠨ ᠪᠦᠬᠦ ᠣᠪᠣᠭ ᠠᠴᠠ ᠰᠢᠯᠢᠵᠦ ᠠᠪᠤᠭᠰᠠᠨ ᠬᠣᠲᠠ ᠶᠧᠷᠦ᠋ᠰᠠᠯᠧᠮ ᠤᠨ ᠢᠶᠠᠨ ᠲᠥᠯᠥᠭᠡ ᠰᠣᠯᠣᠮᠣᠨ ᠳᠤ ᠦᠯᠡᠳᠡᠭᠡᠨ᠎ᠡ᠃ 33 ᠮᠢᠨᠦ ᠢᠩᠭᠢᠵᠦ ᠬᠢᠬᠦ ᠨᠢ ᠲᠡᠳᠡ ᠨᠠᠮᠠᠶᠢ ᠣᠷᠬᠢᠵᠤ᠂ ᠰᠢᠢᠳᠣᠨᠴᠤᠳ ᠤᠨ ᠥᠬᠢᠨ ᠲᠩᠷᠢ ᠠᠱᠲ᠋ᠣᠷᠧᠲ᠂ ᠮᠣᠶᠠᠪ ᠤᠨ ᠪᠤᠷᠬᠠᠨ ᠺᠧᠮᠣᠰ᠂ ᠠᠮᠣᠨᠴᠤᠳ ᠤᠨ ᠪᠤᠷᠬᠠᠨ ᠮᠣᠯᠧᠺ ᠲᠤ ᠪᠥᠬᠥᠢᠭᠰᠡᠨ ᠦ ᠤᠴᠢᠷ ᠢᠶᠠᠷ ᠶᠤᠮ᠃ ᠲᠡᠳᠡ ᠮᠢᠨᠦ ᠵᠠᠮ ᠢᠶᠠᠷ ᠶᠠᠪᠤᠭᠰᠠᠨ ᠦᠭᠡᠢ᠂ ᠮᠢᠨᠦ ᠮᠡᠯᠮᠡᠢ ᠶᠢᠨ ᠡᠮᠦᠨ᠎ᠡ ᠵᠥᠪ ᠢ ᠦᠢᠯᠡᠳᠦᠭᠰᠡᠨ ᠦᠭᠡᠢ᠂ ᠪᠠᠰᠠ ᠮᠢᠨᠦ ᠲᠣᠭᠲᠠᠭᠠᠯ ᠵᠢᠷᠤᠮ ᠢ ᠰᠠᠬᠢᠭᠰᠠᠨ ᠡᠴᠢᠭᠡ ᠳ᠋ᠠᠸᠢᠳ᠋ ᠰᠢᠭ᠋ ᠢᠶᠠᠨ ᠪᠠᠢᠭᠰᠠᠨ ᠦᠭᠡᠢ᠃ 34 ᠭᠡᠬᠦ ᠳᠡᠭᠡᠨ ᠰᠣᠯᠣᠮᠣᠨ ᠤ ᠥᠪᠡᠷ ᠦᠨ ᠬᠢᠨᠢ ᠭᠠᠷ ᠠᠴᠠ ᠪᠦᠬᠦ ᠬᠠᠭᠠᠨᠴᠢᠯᠠᠯ ᠢ ᠠᠪᠬᠤ ᠪᠢᠰᠢ᠃ ᠪᠢ ᠳ᠋ᠠᠸᠢᠳ᠋ ᠢ ᠰᠣᠩ᠋ᠭᠣᠵᠤ ᠠᠪᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠮᠢᠨᠦ ᠲᠤᠰᠢᠶᠠᠯ ᠲᠣᠭᠲᠠᠭᠠᠯ ᠤᠳ ᠢ ᠰᠠᠬᠢᠭᠰᠠᠨ ᠤᠴᠢᠷ ᠠᠴᠠ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠲᠥᠯᠥᠭᠡ ᠰᠣᠯᠣᠮᠣᠨ ᠤ ᠨᠠᠰᠤᠨ ᠲᠤᠷᠰᠢ ᠳᠠᠭᠠᠨ ᠵᠠᠬᠢᠷᠤᠭᠴᠢ ᠪᠠᠢᠬᠤ ᠶᠢ ᠨᠢ ᠵᠥᠪᠰᠢᠶᠡᠷᠡᠭᠰᠡᠨ ᠶᠤᠮ᠃ 35 ᠬᠠᠷᠢᠨ ᠪᠢ ᠬᠠᠭᠠᠨᠴᠢᠯᠠᠯ ᠢ ᠬᠦᠦ ᠶᠢᠨ ᠬᠢᠨᠢ ᠭᠠᠷ ᠠᠴᠠ ᠠᠪᠴᠤ᠂ ᠠᠷᠪᠠᠨ ᠣᠪᠣᠭ ᠢ ᠨᠢ ᠴᠢᠮ᠎ᠠ ᠳᠤ ᠥᠭᠴᠦ᠂ 36 ᠨᠢᠭᠡ ᠣᠪᠣᠭ ᠢ ᠨᠢ ᠲᠡᠭᠦᠨ ᠦ ᠬᠥᠪᠡᠭᠦᠨ ᠳᠦ ᠦᠯᠡᠳᠡᠭᠡᠨ᠎ᠡ᠃ ᠲᠡᠢᠨ ᠬᠦ ᠪᠢ ᠨᠡᠷ᠎ᠡ ᠪᠡᠨ ᠲᠠᠯᠪᠢᠬᠤ ᠪᠠᠷ ᠰᠣᠩ᠋ᠭᠣᠵᠤ ᠠᠪᠤᠭᠰᠠᠨ ᠶᠧᠷᠦ᠋ᠰᠠᠯᠧᠮ ᠳᠤ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠳ᠋ᠧᠩ ᠢ ᠥᠪᠡᠷ ᠦᠨ ᠡᠮᠦᠨ᠎ᠡ ᠦᠷᠭᠦᠯᠵᠢ ᠠᠰᠠᠭᠠᠯᠲᠠᠲᠠᠢ ᠪᠠᠢᠯᠭᠠᠨ᠎ᠠ᠃ 37 ᠪᠢ ᠴᠢᠮᠠᠶᠢ ᠲᠣᠮᠢᠯᠠᠵᠤ᠂ ᠴᠢ ᠢᠰᠷᠧᠯ ᠤᠨ ᠳᠡᠭᠡᠷ᠎ᠡ ᠬᠠᠭᠠᠨ ᠪᠣᠯᠣᠭᠠᠳ ᠬᠦᠰᠡᠭᠰᠡᠨ ᠪᠦᠬᠦᠨ ᠢᠶᠡᠨ ᠵᠠᠬᠢᠷᠬᠤ ᠪᠣᠯᠣᠨ᠎ᠠ᠃ 38 ᠬᠡᠷᠪᠡ ᠴᠢ ᠮᠢᠨᠦ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠰᠢᠭ᠋᠂ ᠮᠢᠨᠦ ᠴᠢᠮ᠎ᠠ ᠳᠤ ᠲᠤᠰᠢᠶᠠᠬᠤ ᠪᠦᠬᠦᠨ ᠢ ᠳᠠᠭᠠᠨ ᠮᠢᠨᠦ ᠵᠠᠮ ᠢᠶᠠᠷ ᠶᠠᠪᠤᠵᠤ᠂ ᠮᠢᠨᠦ ᠮᠡᠯᠮᠡᠢ ᠶᠢᠨ ᠡᠮᠦᠨ᠎ᠡ ᠵᠥᠪ ᠢ ᠦᠢᠯᠡᠳᠦᠨ ᠮᠢᠨᠦ ᠲᠤᠰᠢᠶᠠᠯ᠂ ᠵᠢᠭᠠᠪᠤᠷᠢ ᠨᠤᠭᠤᠳ ᠢ ᠰᠠᠬᠢᠪᠠᠯ ᠪᠢ ᠴᠢᠮ᠎ᠠ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨ᠎ᠠ᠂ ᠮᠥᠨ ᠳ᠋ᠠᠸᠢᠳ᠋ ᠲᠤ ᠪᠠᠷᠢᠵᠤ ᠥᠭᠭᠥᠭᠰᠡᠨ ᠰᠢᠭ ᠪᠠᠲᠤ ᠭᠡᠷ ᠢ ᠴᠢᠮ᠎ᠠ ᠳᠤ ᠴᠤ ᠪᠠᠷᠢᠵᠤ ᠥᠭᠬᠦ ᠪᠥᠭᠡᠳ ᠢᠰᠷᠧᠯ ᠢ ᠴᠢᠮ᠎ᠠ ᠳᠤ ᠲᠤᠰᠢᠶᠠᠨ᠎ᠠ᠃ 39 ᠲᠡᠢᠨ ᠬᠦ ᠪᠢ ᠳ᠋ᠠᠸᠢᠳ᠋ ᠤᠨ ᠦᠷ᠎ᠡ ᠬᠡᠦᠬᠡᠳ ᠤᠳ ᠢ ᠲᠤᠢᠯᠳᠠᠭᠤᠯᠬᠤ ᠪᠣᠯᠪᠠᠴᠤ ᠦᠷᠭᠦᠯᠵᠢᠳᠡ ᠲᠡᠭᠡᠬᠦ ᠪᠢᠰᠢ〉》 ᠭᠡᠯ᠎ᠡ᠃ 40 ᠰᠣᠯᠣᠮᠣᠨ ᠶᠧᠷᠣᠪᠣᠶᠠᠮ ᠢ ᠠᠯᠠᠬᠤ ᠭᠡᠵᠦ ᠡᠷᠢᠭᠰᠡᠨ ᠪᠣᠯᠪᠠᠴᠤ ᠶᠧᠷᠣᠪᠣᠶᠠᠮ ᠪᠣᠰᠴᠤ᠂ ᠶᠧᠵᠢᠫᠲ ᠤᠨ ᠬᠠᠭᠠᠨ ᠱᠢᠱᠠᠺ ᠤᠷᠤᠭᠤ ᠵᠢᠭᠤᠲᠠᠨ ᠣᠴᠢᠵᠤ᠂ ᠰᠣᠯᠣᠮᠣᠨ ᠢ ᠥᠭᠡᠳᠡ ᠪᠣᠯᠲᠠᠯ᠎ᠠ ᠲᠡᠨᠳᠡ ᠪᠠᠢᠪᠠ᠃
 ᠰᠣᠯᠣᠮᠣᠨ ᠥᠭᠡᠳᠡ ᠪᠣᠯᠪᠠ

41 ᠰᠣᠯᠣᠮᠣᠨ ᠤ ᠪᠤᠰᠤᠳ ᠶᠠᠪᠤᠳᠠᠯ᠂ ᠬᠢᠭᠰᠡᠨ ᠪᠦᠬᠦ ᠠᠵᠢᠯ ᠬᠢᠭᠡᠳ ᠲᠡᠭᠦᠨ ᠦ ᠮᠡᠷᠭᠡᠨ ᠤᠬᠠᠭᠠᠨ ᠰᠣᠯᠣᠮᠣᠨ ᠤ ᠨᠠᠮᠲᠠᠷ ᠲᠤ ᠪᠢᠴᠢᠭᠳᠡᠭᠰᠡᠨ ᠪᠢᠰᠢ ᠤᠤ︖ 42 ᠰᠣᠯᠣᠮᠣᠨ ᠶᠧᠷᠦ᠋ᠰᠠᠯᠧᠮ ᠳᠤ ᠪᠦᠬᠦ ᠢᠰᠷᠧᠯ ᠢ ᠵᠠᠬᠢᠷᠤᠭᠰᠠᠨ ᠬᠤᠭᠤᠴᠠᠭ᠎ᠠ ᠨᠢ ᠳᠥᠴᠢᠨ ᠵᠢᠯ ᠪᠠᠢᠯ᠎ᠠ᠃ 43 ᠰᠣᠯᠣᠮᠣᠨ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠵᠤ᠂ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠬᠣᠲᠠ ᠳᠤ ᠣᠷᠣᠰᠢᠭᠤᠯᠤᠭᠳᠠᠵᠠᠢ᠃ ᠬᠦᠦ ᠷᠧᠬᠣᠪᠣᠶᠠᠮ ᠨᠢ ᠲᠡᠭᠦᠨ ᠢ ᠵᠠᠯᠭᠠᠮᠵᠢᠯᠠᠨ ᠬᠠᠭᠠᠨ ᠪᠣᠯᠣᠭᠰᠠᠨ ᠪᠠᠢᠨ᠎ᠠ᠃